|
طيور عينـــــــــيك - قصيدة صغيرونة
|
طيور عينيك
وأنا جاي عليك لاقني طيور عينيك في حقول الدم واقدات الفرحة نشيد وزارعات الدنيا نغم واتونست ... وولعت رتاين الشوق غنيت ورقصت وشلت شبابيلك تيراب وعشم وكل البيناتنا اتشايل قام الحان واشجان واقلام غرستك شتلة حن ... وفرهد جواي زهر الاحلام وأنا جاي عليك هشّنّي طيور عينيك وكتلنا الليلة غنا وفرشنا لحاف باكر غيمات وزعنا فترنا على الدمعات وقرينا حنينّا شجن وآهات ونقطنا سحاب الالفة الفات غنوات غنوات
وأنا جاي عليك بي غيم عينيك شطفّتي هواي وفتحتي ابوابك للايام الشاربة غناي ودقينا سوا سدر الالحان واعصاب الناي وركّن فوق غصن اللهفة خطيواتك عصفورتين وسقيتن براااااااااااااحة وحجّيتن ما هشّيتن خليتن يرعن في جواي
وأنا جاي عليك وصّيت النوم الفي عينيك يصحاكي معاي
|
|
|
|
|
|
|
|
Re: طيور عينـــــــــيك - قصيدة صغيرونة (Re: الجندرية)
|
هو في اطيب منك يا جميلة ؟
كانت في يديه زهرتان حين مات وكان يشتعل اشتياقا كحفيف الاغنيات لحبيبته يغني كالبكاء ولأمه صلّى على اوتار لهفتها وفات
********************
بتكمسدك رغم احتضارات المسا واتغتغتك رغم امتداد اشواقي والنيل والاسى وبلقاك هناك فوق احتمال لهفة شقاك شايلك معاي مطر الحروف شايلك وطن مطر الحروف متوسدك زي لون جبيرة وشحّّة الورد الملامحو بلاك تنح بتكمسدك رغم الفواصل في المكان من بيني خيط برسم ملامحك في غناي واتناولك من شهقتي واسقيك دموع طيرتين صغار ما خانن النيل والقمر واتناولن جمر السفر سفّن شعير الارتحال واتناومن ما بين مقل صمت الكلام وضجيج رموش باقي السكات واتوسدك اتوسدك زي رملة ما فاتت لسان الريح شبر مدّت ايدينا بلا عشم تتوسمك يانور شرق ضو الزمن فتّق اصابع الليل حنين وضحت ملامحك يا قمح سرق النسيم قالد وتر همس الصباح واتصورك في ضل شدر شايلاك عيون فرهد لقاك فرع الطويرات الجمر ناداهو صمت الكون تعال لاقاك صبر نشّف مواعين الجراح بتكمسدك لا مات جنا الحرف الرجاك لا ودّر النيل الوعود بتغتغتك رغم الشحيح واتوسدك من دون حدود
| |
|
|
|
|
|
|
Re: طيور عينـــــــــيك - قصيدة صغيرونة (Re: أسامة معاوية الطيب)
|
Quote: اتوسدك زي رملة ما فاتت لسان الريح شبر مدّت ايدينا بلا عشم تتوسمك يانور شرق ضو الزمن فتّق اصابع الليل حنين وضحت ملامحك يا قمح سرق النسيم قالد وتر همس الصباح واتصورك في ضل شدر شايلاك عيون فرهد لقاك فرع الطويرات الجمر ناداهو صمت الكون تعال لاقاك صبر نشّف مواعين الجراح بتكمسدك لا مات جنا الحرف الرجاك لا ودّر النيل الوعود بتغتغتك رغم الشحيح واتوسدك من دون حدود .. |
أسامه معاوية الطيب
ياوسيم الحروف .. المغموسة في طيب الإبداع والجمال.. لك التحايا علي هذا الجمال الطيب,,,
| |
|
|
|
|
|
|
Re: طيور عينـــــــــيك - قصيدة صغيرونة (Re: أسامة معاوية الطيب)
|
أخوي أسامة لك التحية
ونحن ننهل من سبيلك (ابو مويتاً صاقطي دا) لانرتوي ابدا رغم اننا نعب منه عبا
ونستاذنك في تخريمة :
أخوي خضر متعك الله بالعافي
الحقيقة الكلمات دي سمعتها في اغنية لعقد الجلاد وكنت ناوي انزل عنها بوست كامل لاستفسر عن شاعرها وملحنها ؟ يا ريت لو عندك معلومات تفيدني بيها سواء بالايميل او حتى على نفس البوست على المتضرر ( اسامة ) ان يستعوض الله في هذه المساحة
تحياتي لكم بقدر ابداعكم وروعتكم
شرووم
| |
|
|
|
|
|
|
Re: طيور عينـــــــــيك - قصيدة صغيرونة (Re: أسامة معاوية الطيب)
|
يا صَديق رغم غفلتي
ما أروعك
Quote: وأنا جاي عليك هشّنّي طيور عينيك وكتلنا الليلة غنا وفرشنا لحاف باكر غيمات وزعنا فترنا على الدمعات وقرينا حنينّا شجن وآهات ونقطنا سحاب الالفة الفات غنوات غنوات
|
وهذه الأخري أرجعتني لتلك الأيام الجميلة جامعة السودان .. الشلتر .. المنتدي .. تجمع الروابط .. تجارية .. ...
Quote: بتكمسدك رغم احتضارات المسا واتغتغتك رغم امتداد اشواقي والنيل والاسى وبلقاك هناك فوق احتمال لهفة شقاك
|
ياااه
| |
|
|
|
|
|
|
Re: طيور عينـــــــــيك - قصيدة صغيرونة (Re: أسامة معاوية الطيب)
|
شرووم ازيك اعتذر اولا لعدم تمكني من الاستجابه لطلبك بالكامل القصيده ياعزيزي للشاعر محجوب شريف كتبها في الراحل المقيم عبد الكريم مرغني تناول فيه محجوب شريف السيره العطره لهذا الراحل اول اصدار للقصيده كانت عبر صفحات مجله نفاج التي تحمل اسم مركز عبد الكريم مرغني الثقافي بامدرمان يقول في مطلعها يابا مع السلامه مع السلامه ياكالنخل هامه قامه واستقامه هيبه مع البساطه الخ اثنا تواجدي في السودان علمت بان فرقه عقد الجلاد تجري بروفاتها علي القصيده ومن ثم تقديمها للجمهور في كاسيت طال انتظاري لهذا العمل الجميل عموما اعدك بارسال كامل القصيده متي ماسنح لي الوقت وشكرا ياجميل
| |
|
|
|
|
|
|
Re: طيور عينـــــــــيك - قصيدة صغيرونة (Re: أسامة معاوية الطيب)
|
أخونا معاوية صباحك كلو خير وسرور
نواصل التخريمة مع الاخ خضر
أخوي خضر لك تحياتي وشكري العميق على معلوماتك واهتمامك ،،
القصيدة قمت بكتابتها من خلال الاغنية وفعلا هي عبارة عن لوحة فنية متكاملة أو يمكنك ان تقول مشهد درامي رسمه الاستاذالكبير محجوب شريف بكل ابعاده الثلاثية واللحن غاية في الروعة ،،لحن فعلا يليق بتلك الكلمات الراقية الرقيقة البسيطة أو السهل الممتنع ،، يا ريت لو كنت اقدر انزلا على البورد لانها عندي على الجهاز بس اخووووك شروووم في حكاية التنزيل كيشة خالص زي مابقول الخال ود قاسم
لك التحية والاماني السرمدية بالتوفيق وسداد الخطى
شرووم
| |
|
|
|
|
|
|
|