|
|
 بص امدرماني
|
راكب رقم واحد مقعد رقم واحد ورا السواق مقعد ثابت وراكب اساسي
عم احمد جاد المولي يوميا من الساعه سته الا ربع من المحطه الوسطي
لحدي سته ونص او حسب الكبري للوصول الي الاداره المركزيه حيث يعمل
ومن الساعه تلاته وعشره.. وربع ..ونص او حسب الزحمه وضابط الحركه
المناوب رجوعا الي البيت ..مربوع القامه.. مرفوع الراس.. ابيض الشعر
والقميص الذي فقد الكثير من ثقله وفرط في لونه الاساسي إثر علاقته الحميمه بالطشت
..مهذب ..وفي حاله(عم احمد اكيد ما القميص) ودود وشعاره صابحني دائما مبتسم
يغني فيها من الصباح مع ختت رجله في البص
-تا ريرا را لالالا..صفاره تعلو بالنغم وابتسامه صافيه صابحني دائما مبتسم
(صوت شجي وحنين ينم عن ماضي بتاع زول غناي في قعدات الاصحاب)
-صباح الخير يا برعي
-صباح النور والابتسامه والمزااج
يرد عم برعي غامزا بابتسامه لطيفه
وعمنا برعي اكيد سواق البص الادرماني
كاتب في البص بخط ممتاز( حبيبي كان جميل من قلبو لو يرحم عذابي)
يعشق ابو داؤود ويفخر لمعرفته الشخصيه به..في اقصي حالات الانفعال
عندما تسئ استخدام البص كما يعبر بقوله عمنا برعي وفي عز هيجته
بقول ليك يا جاهل البص ده ركب فيهو ابو العز نسبه لابو داؤود
كما يناديه ودي بعدها لو هبشتو ببدأ معاك ضرب طوالي لانو بتكون
دي اخر فرمله ليهو ..
فيما عدا اساءه استخدام البص او الحديث بشكل غير مرضي عن ابو العز
مستحيل في حاجه تهيج عم برعي لا الجوطه ولا الزحمه
ولا حتي انو يستني حاجه بتول الجايه من اخر الشارع وتكورك في ود بتها
يا ود ارجع البيت وتتبعه باخر الوصايا قول لامك تاكل الحمام وتسقيهو
وفي اثناء استعجالها لا تنسي ان تكورك للطيب سيد اللبن يغشا البيت
وتتاوق بنظره شماريه سريعه لزقاق ناس عشه والولد الواقف مع البنيه
في اخره وفي اثناء لولوتها النهائيه لخشمها وخروج كلمه مسخره
منه تميل نحو البص وبوضع رجلها اليمني في البص وقبل قوله بسم الله ينحني لها
البص مرغما من اثر الصعود
وقبل ان تضع رجلها الاخري تصيح ببرعي النبي يا برعي كان تقوم, نفيسه
ختي جايه ..
-حاضر يا حاجه
وتظهر نفيسه مسرعه يعرقل سيرها امتلأ ساقيها وجسدها
وعموما لارتباط الوزن وخفه الدم برباط وثيق جدا بالتالي
حاجه سكينه واختها نفيسه عباره عن نكته متحركه واي
كلمه بتطلع من خشيمن المدقوق بالوشم تخليك تضحك من جوه قلبك ..
الا في حاله استثنائيه جدا وهي حاله عم حامد الصعب راكب اساسي
يومي مقعد رقم حداشر ما بتغير لا هو لا المقعد ,لا يبتسم, لا يعقب كل
البقولو السلام عليكم, ونصب وزير للسلام في البص لرده السلام علي
كل من تكرم به باحسن منه ..واثناء جلوسه يهز راسه عده مرات
في كل مره يسمع فيها تعليق لا يعجبه ولكنه لا يعقب اطلاقا يحتفظ
باختلافه معك لنفسه حتي استنكاره صامت ..
حاجه سكينه تركب بص عم برعي يوميا عند عودته في اتجاه المحطه الوسطي
حيث تفرش المخلايه وترص الطواقي بطريقه جميله ومغريه لانك تتفرج حتي
لو ما عندك قروش ..وتقعد في مكانها المعتاد في سوق الطواقي جنب
ابو مرين في الجانب الشمالي لسوق ام درمان وسط المكافحات والبربن
في وليداتن من عمل الطواقي والعشره الممتده بيناتن
تلقاهن ينسجن.. ويتونسن ,ويضحكن يفرقن علي بعضن, ويشكن ويسندن
بعضن بالرأي والحلول ,وصرفه الشهر للمحتاجاها اكتر فيهن ..
حاجه سكينه رغم طوله لسانها لكن حلاوته طاغيه علي اي حاجه تانيه
تطلع منه وطيبه وحراره قلبها ووقفتها مع كل زول محتاج
حتي كان ما بمالها بسماحه شورتها وبكلمتها التفتح البيبان وكان
بيدها ما بتبخل علي زول حتي انها ولمده شهر كامل تصحي الدغش
وتحضر الشاي وتذهب مع نفيسه اختها لزياره علويه صاحبتها وجارتها
في السوق لمده سبعتاشر سنه بشربن شاي الصباح سوا ويمرقن علي السوق
ولمرض علويه اصبح شراب الشاي اليومي يتم في مستشفي السلاح الطبي
حيث ترقد علويه
-وحاول يخفي شعورو يتدلل عليا ..ياخي من زمان ..يا سيدي من زمان
يعلو صوتو بالغناء عمك علي اول ما حاجه سكينه تخت رجلها في البص ..
تعاين ليهو بعين حمراوشراره
-يا راجل ما تختشي
وعمك علي مواصل ..ياخي من زمان..من زمن مستني عوده قلللللبي راحل
ومع تشديد اللام تشد حاجه سكينه وتنفعل
-قلبك بالتقطعو ليك حته حته
-اها وانتي دايره ياتو حته
يرد عم علي ممعنا في مكاواته بينما ينفجر الجميع بالضحك
ويغلبها الضحك هي الاخري رغم مقاومتها المستميته وينفرج فمها
الجميل المدقوق وينفرج معه عم علي
-واحوم ليكم انا ساي بلا قلب والله البص ده ما يتركب ليكم تاني
يبتسم البعض ويهمهم البعض اي والله صحي ,وحاجه سكينه جواها
عاجبها الكلام ده وبحسسها لطيف وبذكرها ايام كانت موقفه الحركه في ام درمان
الحاجه سكينه ام شلاخ
|
|
 
|
|
|
|
|
|
|
|
Re: بص امدرماني (Re: توما)
|
Quote: وحاول يخفي شعورو يتدلل عليا ..ياخي من زمان ..يا سيدي من زمان
يعلو صوتو بالغناء عمك علي اول ما حاجه سكينه تخت رجلها في البص ..
تعاين ليهو بعين حمراوشراره
-يا راجل ما تختشي
وعمك علي مواصل ..ياخي من زمان..من زمن مستني عوده قلللللبي راحل
ومع تشديد اللام تشد حاجه سكينه وتنفعل
-قلبك بالتقطعو ليك حته حته
-اها وانتي دايره ياتو حته
يرد عم علي ممعنا في مكاواته بينما ينفجر الجميع بالضحك
|
العزيزة توما,
كأني أقرأ قصة قصيرة طالت قليلا, ويبدو (أتمنى) أنها ستطول أكثر. فالسرد بديع ومتصل, يجذب القارئ بمكوناته المكانية وشخوصه الحقيقية (وإن لم يكونوا حقيقيين). القطوف أعلاه أعجبتي لأن ليس من السهل علي الكاتب الروائي أن يسترق أبتسامة القارئ , فدائما ما يشحننا الروائيين بالحزن أو متعة تتعدد ملذاتها ولكن قليلهم فقط قادر علي إدخال البهجة في النص, فهذه ملكة أدبية عالية تجبرني علي إحترامك كروائية موهوبة.
الخلط مابين العامية والفصحي قد لايحمده كثير من النقاد الأدبيين, فالعربية الفصحي كـ "البحر في أحشائه الدر كامن" فهي قد "وسعت كتاب الله معنىً ولغة" وهي تتسع للجميع. ولكنّ كثير من الأدباء مثل الطيب صالح ومحمد شكري قد وفقوا في إقحام الدارجة في نصوصهم فزادتها واقعية وكرست فكرة تزاوج النص مع البيئة, بمافيها الإنسان الذي يستهلك مفاهيم الدارجة وينفصل عن الفصحي التي لا تأنس المقاهي والحوانيت والزنقات, وتقطن المكتبات ومدرجات الجامعات ومعاقل الكذب السياسي.
إختيارك لموضوع القصة موفق جدا, فالبص ,كأمدرمان, متحرك, لايهدأ تتغير أوجه أبطاله ولكن لايتبدلون, يأتون محملين بحقائبهم (وقففهم) وكذلك بثقل الحياة حلوها ومرها, إن طالت الحكاية فإني أشتاق أن أتعرف علي مراحل تطورها وتداخل شخصياتها والصراع الخفي الدائر مابين الآلام المخبأة والفرح الشجاع.
لك كل التوفيق توما
عبدالماجد
| |
|
|
|
|
|
|
|
|
|
Re: بص امدرماني (Re: عبدالماجد فرح يوسف)
|
توما
والشوق الجاري عليك
اعتقد أن السيد عبد الماجد قد كفانا القراءة النقدية
عموما اريحة البص تفرض علينا جدا التعاطي مع شخوصة كان لهم صلة حقيقية بعالمنا الموضوعية .. هذا لا يجيدة سوي متمرس جدا في الكتابة
اعجبتني جدا المكاواة الاخيرة
اكتبي لنا ماشائت من ( باصات ) هذه الشوارع فينا مشرعة لصوتك الاريحي الوهاج
والريد نيلين ِ
| |
|
|
|
|
|
|
|
|
|
Re: بص امدرماني (Re: humida)
|
تومااااا هوك
وينك من ديك وعيك
تعرفي حقيقة كنت اساسي جدا في المواصلات عشان كدا عندي ذاكرة متخمة بالمواقف (المواصلاتية) البوست استفذاني جدا انه اجي انداح ليك هنا
بس طولي بالك للنضم
جايك لابد بي نضم كتر
شكرا للبوست
| |
|
|
|
|
|
|
|
|
|
Re: بص امدرماني (Re: توما)
|
محطه الفيل..يقيف البص لعم قاسم ,مع ختت رجله في البص يصيح قائلا
-يا ولد تعال الحق عمك ما بشوف..ارفعو وقودو اليقنب..
ينزل عمر الهميم ضاحكا
-صباح الخير يا عم قاسم
-عميره التميره وينك يا الهدي يا الرضي امس يا يابا ما جيت عساك طيب,
امك واخوانك كيفنهم,عاد انت ما ود الغالي ,ابوك الله يرحمو عاد ما كان صاحب
عمري, يا حليلو الدنيا دي ما فوقها عمار ......
ويستمع عمر للسرد المتكرر لعم قاسم وهو قايدو الي الكرسي
,ويتعثر عم قاسم اثناء مروره بحاجه نفيسه اخت حاجه سكينه
القاعده بالطرف ورجلها لبره نسبه لضيق المقعد بها وضيقها من
البص ككل لعدم توفر مقاعد بالحجم العائلي
-يا راجل ها مالك آبتشوف?
-مني??!!نفيسه المفدع ديسها ها يايمه العتب علي النظر حليل وقت كنا
بنشوف جدي الريل ابو كزيمه ونروح نتمشي في الغيمه ..حليلنا وحليل
ايامنا يا ست الناس والبنوت لحدهن عساك طيبه امي انا
-الحمد لله ..تبتسم ببساطه كانو ما حصل حاجه
عمر صابر ومبتسم قايده لمقعده
خطوتين ويشوف عم علي وعم احمد بس يقيف جنبهم ويفك يد عمر متكلا بيده
اليسري علي العصا ويبدا بطقطقه اللحن بالاخري مدوبيا
هي يا الكيكه يا الكلكم ديكه
قدامكم فروجه بتكاكي ( غامزا ولامزا الي حيث حسناوات الفريق)
ام بغيه غاغ
ام بغيه غيغ
صباح الخير يا أمه الامجاد والماضي التليد انتو
مستغرقين في الضحك يردو
-صباح النور يا قاسم ,كيفك يا استاذ??
وطبعا عم قاسم لو جد داير تدورو تقول ليهو يا استاذ..
في الماضي البعيد شويه كان معلم وبفخر جدا لانتمائه لسلك التدريس
لمده عشرين سنه ..وبعتز بطلبته الناجحين جدا لما يلقاهم ويقول ليك
شوف بالله ده كان تلميذي ويا سلام اسا وصل وين..ويسعد جدا لاحترام
تلاميذه الدرسهم لما يقدروه ويخدموهو في اي حته يمشيها..ومن جروحو
العميقه انو برغم نجاحو في الاسهام في نجاح الاخرين الا انو حزين علي
فشلو في انو يعمل من اولادو الحقيقين افراد ناجحين في المجتمع..واحد منهم
ابا القرايه وسافر ليبيا ليهو حداشر سنه ولا خبر لا جواب لا اي حاجه,
والتاني اتورط في كم سرقه وفي الاخر انتهي في السجن الكبير بامدرمان ,
عم قاسم من صدمتو دق صيوان كبير واعلن انو بيتقبل العزاء في موت اولادو ,
وبالتالي اصبحت محصلتو صفر من نجاح اولادو او حتي وجودهم في وقت هو احوج ما
يكون ليهم, في الاخر عم قاسم رغم اسهامه الكبير في تكوين وعي الآخرين إلا
انو بحصل رزقه المعاش الممحوق و شويه منلوجات وضحكات بوزعها هنا وهناك
بين الناس البحبوهو والما ببخلو عليهو بالعندهم ,واخر الليل يقعد في خلوه
شيخ محجوب يتونس.. مع الجايين يفكو العمل ,والجايات يكوسن العرس والولاده
, والامات الجايات يكوسن خبر وليداتن الطشو قبال سنين, والنسوان الشفقانات
من عرس رجالن ,والرجال ناقصي عقل ودين وايمان البجو لشنو ما معروف
,وبين ديل وديل رضيان عم قاسم بالقليل
او بالكتير...
| |
|
|
|
|
|
|
|
|
|
Re: بص امدرماني (Re: توما)
|
ود عمي الفرح يا صاحب الفرح الشجاع
شكرا شديد للحاجات الفتحت عيوني عليها
وخليك اساسي هنا لانو وجودك مهم شددديد
| |
|
|
|
|
|
|
|
|
|
Re: بص امدرماني (Re: توما)
|
زوربا يا ود النيلين والغربه
اولا ازيك
وثانيا شكرا للحضور والتشجيع
وثالثا عندك تذكره مجانيه وكيس تسالي مدفوع القيمه
وخليك بالبوست او بالبص
| |
|
|
|
|
|
|
|
|
|
Re: بص امدرماني (Re: توما)
|
اساسي تعرف اساسيتك في المواصلات والحكي مشجعه شديد
جيب الكلام الكتير داك وتعال سريع ياخ
شكرا ليك شديد
| |
|
|
|
|
|
|
|
|
|
Re: بص امدرماني (Re: zola123)
|
ياسايق ياماشي النظره ماشه وراك وقف وسوقني معاك
توما العسل ازيك
انتي ياختي بصاتك دي طوااااااالي مدوره مالك
حقو يشغلوك وزير المواصلات في الحيكومه الجديده
ههههههههههه
سرد جميل ياتوما
واكتفي كما قيل من قبل بماقاله استاذنا فرح
تسلمي توما
ماتنساني يالكمساري انا نازله السلاح الطبي
| |
|
|
|
|
|
|
|
|
 Re: بص امدرماني (Re: bint algazeira)
|
جيتك
قلت اتاوق في وجدانك
جيتك وجبت معاي ضيوف
الفرح ..الدهشه..وباقي الشوق مكتوب في حروف
اقرا عليك الدرس الاول ..
باري حنينك واوعي يخونك شوقك لينا
نحنا قراب بينا محيط والالفه سفينه
وما تتناسي خطاك في لفه
يا راجينك وكلنا لهفه
باء الباب الليك بدخل
شين يا شوق جاييك متمهل
ارسم فيك اللوحه الاولي
يوم لبيتك من غير دعوه تقولها
فرشي الشوق والحب الوان
شخبتي لخبتي في الوجدان
اوعك تهبشي لون الدم الاحمر
لون الحب الاكبر
لون الطيبه الابيض زيدو
نقص لون الهم الشايلو وما بايدو
لون اللهفه ادفقو فيك واكيد حتريدو
زيد من حبك لون لونين
لون الشوق جواي حنين
لون الصحبه الليك ممتن
ولونك سال جواي وطن
وما تتخيل كيف حسيتك
لامن جيتك
وقلت اتاوق في وجدانك
لما مرقت
اتمنيت لو كنت مكانك
أعلاه من إبداعات توما
أين البص
| |
|
|
|
|
|
|
|
|
|
Re: بص امدرماني (Re: توما)
|
بت الجزيره تصدقي لسه ما قرشنا لي اسع
السلاح الطبي دايره بيهو شنو نعلك بتبلعي جنبو الحبه
عموما وعليه بركه الجيتي شديد.. حقيقي بستمتع بحضورك
| |
|
|
|
|
|
|
|
|
 Re: بص امدرماني (Re: توما)
|
توما
راكبين وما نازلين الا في اخر محطه
البص دا سياحي
وبيمر بمعالم جميييييله
سوقي بمهل
وما تتعدي محطه
| |
|
|
|
|
|
|
|
|
|
Re: بص امدرماني (Re: توما)
|
لا حولااااا
البوست دا كان دفوس وين ؟
شكراً توما
وشكراً للظريف / ة النفضو من الغبار وعلقو / ته لينا هنا
| |
|
|
|
|
|
|
|
|
|
Re: بص امدرماني (Re: توما)
|
-صباح الخير عم احمد
-صباح النور استاذ ادريس
-يا عم علي صباح الخير ..السلام عليكم عم حامد ..استاذ قاسم..
حاجه فاطنه ..خالتي نفيسه..
يوزع استاذ ادريس التحايا الصباحيه علي الجميع ..واستاذ ادريس
مثال مشرف لسلك التدريس عموما ولمدرسته بشكل خاص..وابن مشرف لوالدته
حاجه زينب وهو الطويل الاخدر القيافه ومشهور باللطافه وغنن ليهو البنات
من العباسيه للجرافه..مهزب ..لطيف ..وسيم ..وحقيقي محترم ومحبوب عند الكل ..
مثقف جدا وأمين في عطاءه ..في المدرسه والحله والبيت..
-ادريس يا ولدي مالك نسيت كتب عمار القالها ليك؟؟
-ما نسيت والله يا عم علي لكن الكتب جايه في اليومين ديل للمدرسه.
في المدرسه لو بديت من عم حسين الفراش بقول ليك يا سلاام ادريس ده مافي منو
اتنين..الطلبه مندهشين بوجود استاذ بمواصفاته ومرتبطين بهو شديد استاذ عمر
المدير مبسوط منو شديد ..اولا لأخلاصه في العمل الشديد ولحضوره الدائم مش بس في
الحصه لكن في كل المواقف..مشكله تلميذ..حصه فاضيه ..فصل جايط ..حتي بهتم
بنظافه المدرسه وبحرص عليها و يحرض الطلبه كمان يهتمو بيها ..في مره لمّ معاهو
كميه من الطلبه بعد الحصص ولمو كل الكراسي و الادراج المركونه وشبه قنعو منها
كده واشتغلو فيها وطلعو منها تلتين درج واتنين وعشرين كرسي في حاله جيده جدا
للاستعمال لفتره معقوله جدا..
عم حسين الفراش ودفع الله الود البقعد في الباب لتسجيل الزوار بحبو ونسه ادريس
شدييد وطوالي ما بين الحصص تلقاهو قاعد معاهم يشربو في الشاي ..دفع الله معتقد
في استاذ ادريس شديد وبتعلم منه كتير زي ما بقول..بحترمه و بخصه بمعظم الخاص
حقو ويثرثر معاهو بامنيات في البال وحبيبه في الخاطر,واستاذ ادريس دائما بشجعو
علي اجتهادو الشديد وانو بشتغل بالصباح عشان يوفر عيشه معقوله لاسرته البسيطه
ويقرا بالمساء عشان يوفر كم من المعرفه يبني بيهو مستقبل لروحو,استاذ ادريس
بفتكر انو دفع الله طموح ويوما ما ممكن يصل ويبقي شخص ما في حين انو هو نفسو
طموحو محدود وما بتجاوز انو يكون نفسو, والي حد ما محصور في الستره ,وانجاز
الماجستير, وانو يعرس حبيبتو ويجيب منها تلاته اولاد ويعيش حياه معقوله,
ناهد حبيبتو في تقييمي انا واللي هو مافي ليهو مكان في احساسو انها ما بتشبهو
ومختلفه معاهو في كتير من التفاصيل مع اتفاقها التام في الحب والالتزام والامانه
المطلقه ,بختلفو في الطموح والقدره علي استيعاب الآخر بداء من انو يكون حمودي
وانك تخلق معاهو حوار بخصو ويستوعبو وتفي بوعدك ليهو بانكم ماشين الليله العجلاتي
ولو علي حساب اجتماع الحزب المفاجئ , وانتهاء بانو يكون عم حسين المزرور في قسط
الركشه وتقسم معاهو انت قسط التلاجه الممكن يتأجل وبالتالي تتأجل علاقتك الحسيه بالحب
والمويه البارده في الحر الشديد وحبيبتك الفايتاك فهم للامنيات وتحويلها لتلاجه ,
عموما بعيد عن الثقافه ومكياج الشناه ..ناهد ركبت معاهو البص مرتين وغالبا
ما كانت رضيانه لا هي لا طموحها لانو اخر مره كانت اخر مره وتاني ما اظن ولو بالعدم..
| |
|
|
|
|
|
|
|
|
|
Re: بص امدرماني (Re: توما)
|
الجندريه بالغتي في مدفوس علي وزن بص الساعه تلاته في تمام السوق العربي او الشعبي
وعليه مرحب بيك نورتينا شديد
وشكرا للجيه شديد
| |
|
|
|
|
|
|
|
|
|
Re: بص امدرماني (Re: توما)
|
| Quote: كلمه بتطلع من خشيمن المدقوق بالوشم تخليك تضحك من جوه قلبك .. |
وا مغصتى يا توما الما لحقت الباص ده...يا اثيرة تلك بصات
بحلاوة الشهد..وناس لهم عبق...احى انا من باصات امدرمان القديمة
يا سمحة مالك دايرة تخربى علينا بعد قنعنا بالغربة عندما لم نجد
امدرمان الحنينة تلمنا..تسلمى لامدرمانك،،،
| |
|
|
|
|
|
|
|
|
|
Re: بص امدرماني (Re: توما)
|
علي ذكر العدم نذكر معدوم ,, ومعدوم احلي بنات الخرتوم,,اكيد دي ما
شهاده فرديه لانو يشهد ليها تقريبا كل السودان وتشاد و مالي الا ربع ,
والربع ده اكيد بنات حاسدات ساكت لانو معدوم حقيقي معدوم واحده بس ..
خلقه واخلاق , مهذبه, ولطيفه, وانيقه , و وووووووب من معدوم,
واجمل ما فيها متواضعه وخاتيه اللوم,خفه دم وظرافه مبالغه ,
ختت رجلها في البص وابتسامتها تخلي البص كلو يبتسم ,
- عم برعي صباح الخير, خالتي نفيسه كيف اصبحتي,
عم علي ازيك, وعم علي قبل الرد وبالتعاون مع عم قاسم طوالي يبدأ
- جمالك في البنات معدوم ..شبيهك ما كحل عيني ..هي اقدلي و انزلي في العوازل كيييييي ..
آآآآآآآي ..
ومع ال آآي يضج البص بالضحك ويضج وجه معدوم بالخجل والارتباك
مع الاحتفاظ بابتسامتها المقاسها جدا تسلم ضاحكه عليهم ان شاء الله طيبين ..
تقعد في المقاعد الوراهم ,عمر في المقعد المقابل, يبتسم, تبتسم
- كيف الجامعه؟؟
- تمام الحمد لله.
وبس .
ده كل الحوار المشروع بيناتم,اولاً لوجود كل الناس البعرفوهم في البص ,
ثانياً لاحساس غريب جدا ممتد بيناتم , ثالثا وده الاهم لارتباط عمر بسوزان
حفيده حاجه سكينه ونفيسه ..
وسوزان ما ساكنه امدرمان حاليا لانتقالها مع اسرتها لمنزلهم الفخم جدا
والممتد مربوع كامل عرضا واربعه طوابق طولاً والكائن بالرياض..
وسوزان البت الوحيده ..
ارتباطها بعمر كان من هم صغار يسكنون نفس الشارع ويسكنهم نفس الاحساس.
سافر ابو سوزان لفتره طويله ورجع ومعاهو كم هائل من المال و بالتالي
النجاح وغادرو ناس سوزان مأسوف عليهم جدا من معظم اهل الحي ومن عمر بشكل خاص
لينتقلو بذلك الي منطقه وبيئه وحياه مختلفه جدا..
سوزان وعمر ما زالو مرتبطين لتمسكهم ببعض الشديد, رغم انو بعد رحول سوزان
من الحله بدأ شكل العلاقه فيما بينهم يختلف وبدأ عامل اختلاف المكان واليومي
يبث سمه في العلاقه , ولتمسك سوزان بعمر الشديد حاولت تخليهو اساسي في عالمها
الجديد كمان , لكن عمر رغم محاولاته لارضاء سوزان الا انو الاهتمامات ..اللغه..
اللبس..كل الحاجات غريبه عليهو شديد .. بدأ اتساع الهوه الاتخلقت بيناتم
واستمرت محاولاتهم للتواصل عبر الكبري القديم والصار متهالك جدا تحت ثقل
الخلافات اليوميه وبدأ يتهاوي بيهم كل ما يخاولو يعبرو لبعض ,الخلاف قائم علي
مفاهيم اصبحت مختلفه باختلاف المكان واراء ولا حتي قريبه لبعض في اي حاجه
بالتالي النقاش ما بوصل لاي حته ودائما بنتهي بي انو تعال نلمها
وربنا يكضب الشينه ..
انتقال سوزان للعالم الجديد رغم تربيتها في عالم مختلف تماما اثر عليها
بصوره ملحوظه ومزعجه للناس البعرفوها وعلاقتهم بيها مميزه ..في كليه
الهندسه البقرو فيها هي وعمر ما بتحب اصحاب عمر ولا بتقدر تقيف معاهم
ودائما متذمره منهم
- ديل شنو ديل يا عمر المباريهم؟؟ ديل شله اولاد مشاغبين ومقطعين كل
يوم في مسيره ولا مظاهره وجايبين لينا البوليس هنا وكمان مسمين روحهم
مناضلين ..فاكينها في روحهم كده وكلامهم كبار كبار مافي زول فاهم منو
حاجه يعني كانو مافي زول قرا غيرهم ..اركان نقاش وجرائد وكلامات فارغه..
هم قايلين الديمقراطيه دي بجيبوها بالكوراك ده..وين مع الرجال المشو
الجنوب ديل
- سوززااان ن ن ن
قال عمر اسمها بكل الدهشه ومراره الدنيا
- سوزان ده شنو البتقولي فيهو ده , وده انتي فعلا مقتنعه بيهو؟؟!!!!!!!!
سوزان وينو مفهومك للسلام ورايك في حرب الجنوب والورقه القدمتيه
عن الديمقراطيه في تانيه متوسط في احتفالات الرابطه ,وينها قصايدنا
الكتبناها سوا عن النضال والوطنيه وال..حب !!!
ويتوه الحب في الخلاف..
سوزان بتناقشو بكل اصرار وقناعه انو دي مرحله مختلفه بالتالي المفهوم
بتغير وكيف انو الماره بيهو البلد حلو الوحيد في .......
يستمر النقاش داير حول نفسو وكأنو الاتنين بتكلمو لغتين مختلفتين تماما
سوزان غيرتها كل التفاصيل الجديده المحيطه بيها بدايه من الانتقال الي
عالم جديد واصحاب جداد بمفاهيم جديده ونهايه بالضيوف اللذين بدأو بالتردد
علي البيت مؤخرا والبستقبلهم ابوها يوميا من الرجال اصحاب الذقون والنساء
المحجبات حجابا باتا اللذين فرضتهم المرحله ..والبجن جايبات معاهمن مفاهيمن
وافكارهن الي داخل البيت وهن ينظرن باستنكار الي سوزان في البنطلون الجينز
داخل القسم النسائي بالمنزل ..
الي حد ما استطعن التاثير عليها بحكاويهن عن اخوات نسيبه و عن الشهداء وعن
الوعود باولاد وبنات الحور ..لكن ولاثر صحباتهاالاقوي عليها لسه ما قدرن يوصلن
لحدودها الشخصيه من لبس ومكياج ومرقات ونوادي وحفلات ,وسوزان بين ديل و ديل
ما لاقيه الدليل ..علاقتها بعمر اضعفتها الغربه داخل الوطن العايشاهاو بقو
حتي ما بقعدو مع بعض في الكليه ولا بفتشو لبعض حتي في الاماكن المعتاده لكل
واحد منهم ..سوزان ما بتحب تمشي كافتيريا السوق الشعبي حيث يتواجد عمر عاده
مع اصحابه الدائمين , وعمر يرفض بشكل واضح انو يمشي اركان الحناكيش لانو يكره
نظرتهم الغريبه وهو يسلم عليهم كانو جاي من عالم تاني ,مره سمع واحده بتسأل سوزان
- مش ده صاحبك البكورك داك ؟؟
- ده ما كوراك يا سهي ده اسمو كولن لاركان النقاش
ضحك عمر من الكوراك البكوركو ده وضحك اكتر لصوت الشفقه في سؤال سهي عنو
في حين انو هو ذاتو مشفق عليها وعلي غيابهم عن العالم كلو رغم الكوراك الفيهو
في الأخر كل واحد مشفق علي الآخر في حين انو من يستحق الشفقه فعلاً هو سوزان
لانو علي الاقل هم الاتنين قادرين يحددو هويتهم بشكل واضح ..الا انو شفقتهم ..
- اشفاقهم وليس شفقتهم يا شيخنا
يتدخل (علي عربي) من بعيد صائحاً مصححاً
| |
|
|
|
|
|
|
|
|
|
Re: بص امدرماني (Re: توما)
|
طبعا حبابك قدر بص ابو رجيله الاصفر داك
وعندي ليك سؤال عنو علاقه بالصداقه و الموج
وين بدر الدين شنا بالله ؟؟
| |
|
|
|
|
|
|
|
|
|
Re: بص امدرماني (Re: توما)
|
شوقي بدري شخصياا
زارتنا ام درمان عديل كده
طبعا اول حاجه سعيده بحضورك جدا
تاني حاجه شكرا للتشفيفه بتاعه محطات البص دي لانها عجبتني جدا
بعدين انا قريت بوست جرائم ام درمان و غلبني النوم و وقت قدرت جاني زولك اب ساطور داك صحاني
علا برضو عافيه ليك
وشكرا شديد لجيتك
و والله ما بتدفع
| |
|
|
|
|
|
|
|
|
|
Re: بص امدرماني (Re: توما)
|
Quote: وعندي ليك سؤال عنو علاقه بالصداقه و الموج
وين بدر الدين شنا بالله ؟؟ |
العلاقة انه اسمى الحقيقى
صديق الحاج الطيب الموج
بدر فى السودان الله يرد غربته ..شفتى بقت معكوسة كيف الشغلة
الواحد لما يرجع السودان نقول الله يرد غربته عشان بقى ما بلد
والواحد يقول ليك شافر فور قود وهو يكون ماشى امريكا مع
انو فورقود معناها هوم الله يحلنا وتسلمى،،
| |
|
|
|
|
|
|
|
|
|
Re: بص امدرماني (Re: عبدالماجد فرح يوسف)
|
اللستباليــــــــــــــــــة حـــــدي نــــــــــــــــازل
يا أبو الشباب خش جوه خلي الحاجة دي تدخل.
جوه وين يعني غنتا ماشايفنا مزنوقين كيف؟
يا مان دي أفكها ليك من وين..خلاص بديك الباقي لما نصل
ياسواقنا لسه البص ماوصل ...منتظرين.....
| |
|
|
|
|
|
|
|
|
|
Re: بص امدرماني (Re: توما)
|
توما..
حقيقي والله دا امتع بوست
في حراية الايام دي
احييك
بس ما قلتولي...
ماعندكم بص بيمشي علي الدباغة؟؟
في شان عندي غشوة للقماير كدي
 
| |
|
|
|
|
|
|
|
|
|
Re: بص امدرماني (Re: طيفور)
|
يا سايق يا رايق
وقف وقف وسوقني معاك
علي الكبري القصاد أم در
الاقي وجيها شاقي النيل
اعاين في البحر مهموم
والكمساري يقول ما راجعين
نجيك كدراي وجوانا كل الريد
| |
|
|
|
|
|
|
|
|
|
Re: بص امدرماني (Re: توما)
|
Quote:
طيفور شكرا للحضور و التشجيع
العزيزه توما..
ليست مجاملة وانما حقيقي استمتع به
في زمن يسلقنا بألسنة حداد ويشوينا على جمر المداد الردئ
واليوم.. اكتشفت لك بوستا آخرا لا يقل عنه جمالا
(ما اظن يموت الشوق معاي .. او يحزن الريد بـي قفاي)
حقيقي ممتع
لك كل الود وما شئت من غرف القلب
| |
|
|
|
|
|
|
|
|
|
Re: بص امدرماني (Re: توما)
|
وعلي يسكن العباسيه ..شغوف جدا باللغه العربيه ويهتم بتصحيح لغه الاخرين..
يستمع اليك باهتمام , يعدل من اي مصطلح تستخدمه في المكان الخطأ لدرجه تحسسك انو
اصلا هو ما سمع قصتك , ولا اهتم بيها قدر اهتمامو بتصحيحك حينما تخطئ , واكيد في دي
كمان جانبك الصواب لاهتمام علي الكبير واحساسو العالي و تركيزو التام مع السرد لدرجه
بطلع من العالم و يخت نفسو في مكانك, و بعد ما تنتهي من سردك, ويبدا يتكلم ليك عن احساسك ومدي الوجعه الجواك يدهشك تماما في احسساسو العميق بيك وبالتالي بقرب منك جدا, ويطرح معاك حلول تتوافق مع اتجاه تفكيرك, و تقع في شرك الموافقه مع كل ما يقترح الي ان يدهشك بما لا يدع مجال للمغالطه لما يسالك
- وطيب ما دام انت مقتنع كده ليه لحدي اسا متردد وبتفكر؟
وكاجابه متعودين عليها
- ما عارف والله!!
ويبهتك في صمه خشمك.
- لا عارف و ساكت, والسكوت كفعل ينتج عن التردد و عدم الاقتناع بالحل , وبالتالي التوقف عن
تنفيذه معناها جواك في حل موازي بتميل ليهو.
ورغم لغته الغريبه و المريحه في آن واحد, بيحكي معاك و يريحك
اغلب اصدقائه المفضلين من الناس البسطاء شديد بدءا من نسمه ست الشاي طوالي بشاغلها
- انتي اسمك ده صرفوه ليك من ياتو مسلسل مصري
تضحك بلطافه و تقول ليهو
- تصدق امي دي كان جنها مسلسلات مصريه, تهاجر ليها عند واحده مصريه هناك زمن مافي تلفزيون,
واها في حضريها للمسلسلات ده لفحت اسمي ده, جابتو صاراه لامن ولدتني فرتقتو لبستني ليهو.
تضحك ضحكه قرنفليه طاعمه وهي تدغدغ الشاي بالملعقه .
حمو بتاع الورنيش ابو عشره سنين عمر ,و اربعه خبره ورنيشيه مثلو الاعلي و اكتر زول بعتقد فيهو
في العالم هو علي عربي كما يناديه البعض ..ساعدو علي في انو يلقي طريقو للمدرسه, ويركز مع القرايه كطريق للخلاص من الورنيش ,وانو يركز مع الورنيش كطريقه للمساهمه في مصاريف البيت مع حاجه فاطنه,حبوبتو المربياهو مع اخوانه التلاته, بعد وفاه امهم فطين اثر حادث لوري اثناء قدومهم الي الخرطوم عبر شارع يسمي افتراء زلط رئيسي, مطنشاهو الحكومه ومطلعاهو من حساباتها كأنو في دوله مجاوره
اتوفت فطين و مريم الصغيره والفي بطنها محتفظا بهويته , و بقدره قادر وصل حمو و اخوانو
الصغار بيت حاجه فاطنه في العباسيه ..
حاجه فاطنه و رغم انو وليدات بتها بصوره عمليه اصبحو زياده علي الحمل التقيل اصلا الا انها سعيده جدا بوجودهم حولها و مستمتعه تماما بصحبتهم , تشرف عليهم و علي قرايتهم ,اكلهم و
شرابهم بالنهار, و بالعصريه قدام البيت يساعدوها في الرش و النضافه و رص الترابيز و نقل العده والكوانين و تجهيز المكان للزبائن الوافدين للعشاء الطاعم حق حاجه فاطنه المشهوره بالكوارع التي لا يُعلي عليها ,و مديده التمر و الحلبه و ضحكتها و ترحيبها الما بتلقاها في فندق عشره نجوم , ونستها الاطعم من اكلها و اكتر حاجه تفتح نفسك فعلا للجيه من ابعد بيت في ام درمان, اللون الابيض الطاغي علي كل الترابيز و الصحانه و الكبابي و المصره عليهو حاجه فاطنه شعارا للنظافه و الطيبه والمكسور باللون البمبي لورده الجهنميه الاضافتها نوسه في
كل تربيزه, واعتمدتها حاجه فاطنه كلازمه يوميه مكلفه بيها نوسه.
هنا ام درمان
الساعه الان السابعه والنصف بتوقيت السودان
اعلنها رادي ام درمان و ساعه عم علي المتوجه صوب بمبره المعتاد في اول تربيزه جنب حاجه فاطنه ,و عم علي يوميا اول الزبائن لانو من العشاء للِِِعشاء للسرير ..
- مساء النور حاجه فاطنه
- حباب حاج علي حبابك ..كيفنك ؟
- الحمد لله كيفنك انتي؟
- نحمدو و نشكرو عاد بنقدر علي جزاهو
نونا الصغيرونه:- اهلا عمو علي
- اهلا يا نونا ازيك يا سكره انتي لسه صاحيه؟
- لسسسه
ترد بضحكه لطيفه علي السؤال اليومي
تناديها حاجه فاطنه
- تعالي يا نونا ناوليني الصحانه ديك
تجري نونا تجيب الصحانه , يعتر ليها حجر طالع من الارض الغير مستويه تقع نونا في الارض
- واااااااااي يماااااااااااه
تجري عليها حاجه فاطنه و يرفعها عم علي من الارض و يختها في اقرب بمبر بينما حاجه فاطنه تولول
- ووووب علي يا جنا حشااي
- لا لا بسيطه ان شاء الله
يحاول عم علي تهديتها رغم رعبه الشخصي من الدم
- حمو يا ولد يا حمو
يجي حمو جاري من داخل البيت
- ااي امي فاطنه
و يخلعو منظر الدم الجاري
- نونا مالهااا
- وقعتاااااااااااااااااااا
ترد نونا وسط بكاها و هي الحزنانه و واعيه
- اجري يا حمو جيب ليمونه و قطعه نضيفه
- لا لا يا حمو جيب ريحه احسن
يتدخل حاج علي قبل ان يجري حمو الي البيت و سط اعتراض نونا و بكاها
- الريحه لاااااااااااااااااااااااااااااااااااااا
يعود حمو مع الريحه ونونا تكورك من الالم و مع رشه الريحه تصرخ باعلي صوتها وتفشل صيحتها في
تقليل الالم رغم كونها العامل الرئيسي في قدوم كل من ادم سيد الدكان, علويه شمارات,دكتوره مها,علي عربي ,كنكو بتاع التسالي, وحتي عم قاسم وهو يجري باقصي سرعه لعصاته السحريه..
وصل اولا علي عربي تتبعه دكتوره مها وخلفها علويه شمارات تعدل في توبها وهي تتمتم داعيه
- عاد يا الله قدرني النصل واجيب الخبر
- الحقيني يا مها يا بتي
تصيح حاجه فاطنه عند رؤيتها مها قادمه
- الشافعه تسوي في الما بتسوي
- مالها يمه فاطنه
- وقعت عتر ليها حجر بس علا بس الدم ماسوره كابي شوووووو
- لا خير ان شاء الله
تنحني دكتوره مها
- بسم الله يا نونا انتي كويسه يا حلوه مافي اي حاجه
علي مرتبك اشد ما يكون لوجود مها القريب و محاولا تفادي النظر و غض البصر عن
ملامحها الجميله و جسدها اللين في تقوسه اثناء انحناءها لتفحص نونا مؤنبا نفسه
- عيب يا علي
و يشغل نفسه بمحاوله تهدئيه حاجه فاطنه
- خير يا حاجه بسيطه باذن الله
تزيل مها الدم من الجرح لتري مدي عمقه ,علي يسالها باهتمام وقلق حقيقي و كثير من الارتباك
- نوديها المستشفي يا دكتوره
ترفع مها عينيها الزي عيون المها بحق و تنظر باتجاه علي
- لا ما محتاجه ابدا انا بس حاعمل.....
و يتوه علي في عينيها و هو ما سامع غير صوتها بدون حروف ولا كلمات, و ينتبه علي صرخه قويه من نونا
مع وضع المطهر في الجرح بعد ما حمو جاب شنطه الدكتوره من بيتهم
- مالك يا نونا ياخ
ينهرها علي بصمت ,جابتو من عالم بعيد كان عايش فيهو مع مها براه
تلف مها الجرح بشاش نظيف و تربت علي كراع نونا ماسحه دموعها وهي تتمتم بكلمات لطيفه
- خلاص يا نونا يا سكره بكره تصحي تمام شديد
وتطلع حلاوه من شنطه الاسعافات تمدها لنونا قائله
- اول ما تاكليها الوجع بروح طوالي ,دي حلاوه سحريه
تلتقي عيونها بعيون علي مبتسمه غامزه باتجاه نونا لتلقيها الفكره السحريه بفرح طفولي واندمجت في اكل الحلاوه السحريه كما صدقت نونا و ايقن تماما علي بمفعول سحرها الممتد اليه
ومع دعاء حاجه فاطنه لمها بانها تلقي الفي مرادها و ود الحلال اليسعدها ويهنيها تؤاطا القدر او حاجه فاطنه وربما كلاهما حين قالت
- قدمها يا علي يا ولدي الدكتوره دي لبيتهم
| |
|
|
|
|
|
|
|
|
|
Re: بص امدرماني (Re: توما)
|
العفيفة الظريفة توما
سلام مدفوس دفس بالشوق والإحترام
وإن شاء الله يا توما اليد الكتبت الحروف دي تتملي دهب بس كيتاً عليك
Quote: وعندي ليك سؤال عنو علاقه بالصداقه و الموج
وين بدر الدين شنا بالله ؟؟ |
تسالوا مني إنتي وصديق الموج لمن قلعتوني من زوجتي وليداتي وجبتوني للصحراء الموحشة دي قال إيه؟؟؟ الله يرد غربتو
عليك الله يا توما كان عينك وقعت في صديق الموج دا تاني سلمي عليه
عجبني ليك يا تمبص
ممكن أهدي يا توما
الإخوة تمبس وصديق الوج وصادوح أشكر لكم سؤالكم عني في آخر بوست كتبته والذي تعمدت أن لا ارفعه ولكن مشاعركم وصلت لكم حبي
| |
|
|
|
|
|
|
|
|
|
Re: بص امدرماني (Re: توما)
|
قبل اكثر من عشرين عام......و بداخل البص المكتظ بالسكان ...القادم من الخرتوم.... المتجه لامدرمان..... من الصعب ان تعرف فى اى المحطات انت بسبب الذحام...ياتيك صوت الكمسارى
"عشريــــــــــــن........نازل؟"
و عشرين هى اول محطه فى امدرمان فى مواجهه قصرالشباب و الاطفال
بسماع هذه الكلمه ...عشرين.....نشعر بالامان ........
فنحن داخل حبيبتنا امدر
شكرا ياتوما على النسمه الامدرمانيه
النصرى امين
| |
|
|
|
|
|
|
|
|
|
Re: بص امدرماني (Re: توما)
|
بدر الدين نشاه
ازيك جنس زيكه شديده
ان شاء الله طيب رد الله غربتك الي اهلك واطفالك قول امين
تاكل الخروف السمين
في نصهم ان شاء الله
والدهب قايلني باباهو قال ليك
انا ما بدور المزارعيه
بدور اتكشكش بدهب السعوديه
وكان فلست افتح بيهو طبليه
واسا بكون بحمر ليا
تر را راراريااا
كدي بمناسبه البص المقرش ده انا بالجد لسه داير اعمل معاك لقاء جد كده
انا جاده جنس جداده بس قول لي اي عشان ما انحرج ساي
بالمناسبه هو صديق الموج ذاتو مختفي بعدين تصدق انا كنت قايله اسمو صديق الموج بالشده يعني صاحب الموج دي زي زمان كان في زول اسمو شناه بالشده قبل ما يتم التعديل
تصدق بقا بص بالجد جد ونسه ساي باقي لينا التسالي
بص خلاس انت ذاتك
| |
|
|
|
|
|
|
|
|
|
Re: بص امدرماني (Re: توما)
|
النصري امين
تحياتي الامدرمانيه
فعلا عشرين دي بتحسسك قربت تصل البيت
شكرا ليك ولحضورك الجميل
| |
|
|
|
|
|
|
|
|
|
Re: بص امدرماني (Re: توما)
|
Quote: كافتيريا السوق الشعبي
|
بس يا حليلنا انحنا دموع تروي الوسادة ....
اهي اهي اهي .. سنيف
توما واصلي واتدفقي ..
| |
|
|
|
|
|
|
|
|
|
Re: بص امدرماني (Re: توما)
|
توما
يا سلام على البص الامدرمانى البوست روعة وعشرة على عشرة وبرجعنى الى ايام زمان والباصات الامدرمانية تبدأ تسميتها بالخطوط واذكر منها
خط الثورات بداية الرحلة موقف العرضة جوار نادى التاج الامدرمانى مسارالتحرك المرور بكمسنجى موقف بوستة امدرمان واعطاء اشارة لتحرك بأمان والساعة 2 ظهرا يعنى مواعيد انتهاء الداوم اليومى الركاب مجموعة افندية يبحثون عن موضع قدم نيبة اكثرو اكيايس الورق واخرون اكياس دمور وهى مكتظة بما يسيل اللعاب وبعض الطلاب اللذين يتسكعون وتانى محطة مستشفى ومن ثم محطة القسم الجنوبى وفى مقدمة مدخله التمساح المعلق والذى علق عليه احد الظرفاء بعد انقلاب الانقاذ وبمرور السنين واختفاء التمساح من مكانه المعروف (عليك الله الجماعه ديل تسماح شنو البقدر عليهم حرم بلوعه بقشه) ولا بد من صعود بعض افراد البوليس ذاهبين الى منازلهم ولحظتها تجد الكمسارى قد بدأ بفتعل الكواريك اثناء قطع التذاكر مع الركاب والسبب البوليس الجاى اركب معاه بالمجان وعند صنية المجلس البلدى عمنا السواق سمبو يشمر ساعديه ويبدأ العزف على الجربوكس وتسمع (كع-وكعكع- وكعكعوك عند بداية اللفة مع الصينية وما ان يتجه البص شمالا هاك يا احتجاج ( ي
يا زول انته البص ده ما بتشحومه والله شنو ) واخر( حربت مزاجنا واخرى ( بس عليك ياولدى عليك الله حسه الديك الشياله فى القفه ده لو جرى منى بسبب فرملتك ده عاد بتدف لى تمنه ) وعمنا سمبو لمن خلاص يصل الحد حرم ضربة حقة الصعود الراكب اخر الباص يتخلع والمخطة الجاية المستشفى وده براه حكاية
مع تحياتى
| |
|
|
|
|
|
|
|
|
|
Re: بص امدرماني (Re: توما)
|
دكين مؤكد رغم الغياب
متاكده انك من رواد السوق الشعبي تصدق
بس ابو اللول ده اوعي يكون لؤي حبيب نهي
شكرا للحضور و
عفوا للغياب
| |
|
|
|
|
|
|
|
|
|
Re: بص امدرماني (Re: توما)
|
بلدي يا حبوب
طبعا امتعني سردك تماااااما
وبتذكرو التمساح تصدق القدام القسم الجنوبي داك
والبص الزحمه داك ..حقيقي استمتعت بمداخلتك الامدرمانيه جداا
و يا ريت لو تواصل تحكي
شكرا جدااا للحضور الجميل جدا
| |
|
|
|
|
|
|
|
|
|
Re: بص امدرماني (Re: توما)
|
برد برد برد يااااااا
المويه البارده ياااااااا
يتقدم شنكبه من البص
- برد يا عم احمد برددد
- شنكبه يا ولد يا محتال انت تعال جيب المويه دي
- اتفضل يا عم احمد بالهنا
- الله يهنيك يا ولدي بردت علينا
- ادخل يا عم احمد
- ادخل بس براحه بدون ازعاج عشان النايمين
ويضحك عم احمد وشنكبه سويا , شنكبه طبعا و لكل من يرتاد المواصلات العامه غير مسموح له بالركوب في اي بص ما عدا بص حاج احمد لمعرفته بشنكبه وتهذيبه الشديد ونضافته
وفجاه يتعالي الصياح من داخل البص و
- جيب الباقي يا ولد
- ما هو ده انت اديتني عشره جنيه ودي تسعه و نص
- لا لا انا اديتك عشرين جنيه
- ما حصل والله يا حاج
-تحج بالنقاره بلا حاج بلا استهبال معاك طلع القروش
- والله ما اديتني غير العشره دي
ويتدخل عم احمد صائحا من بعيد
- يا ناس الجضه شنو ,شنكبه ما ترجع للزول الباقي
- والله يا عم احمد ما شلتو منو
- يعني انا كضاب
- العفو بس تكون اتلخبت سااي
- اتلخبت شنو كمان داير تطلعني مجنوون ولا شنو
- لا والله يا حاج
- ااااااا قصدك شنو انت الليله بوديك في ستين داهيه يا حرامي
يسرع عم احمد من مقدمه البص وسط الصياح والهمهمات من اطراف البص
- ياخ ما ترجع الباقي
- بطل استهبال ياخي رجع للراجل قروشو
- والله السرقه بقت عدييل كده كمان
ومع وصول عم احمد ال مكان الشكله ينظر الي شنكبه عميقا في عينيه و هو الذي يعرفه لسنوات عديده حيث ياتي في تمام السخانه ست الاسم ليوزع المويه البارده والراحه علي خلق الله
- شنكبه الراجل ده اداك كم؟
يتدخل الرجل صائحا قبل ان يتمكن شنكبه من الرد
- تسالو هو ولا تسالني انا اسه بلاي
يواصل عم احمد موجها حديثه الي شنكبه ومخاطبا قلبه عبر النظر الي عينيه مباشره دون ان يعير الرجل ادني اهتمام
- اداني عشره جنيه بس والله يا عم احمد
- رجعت ليهو الباقي ؟
- اي والله
يواصل الرجل صياحه المتكرر في حين يتجاهله عم احمد تماما
- طلع القروش الفي جيبك كلها يا شنكبه
يفرغ شنكبه كل ما في جيبه بما فيها الفكه واللستكه السوداء نظام الجنصصه وحتي روشته امه الراجي يصرفها,
ويضعها كلها بين يدي عم احمد الممدودتين اليه ,يفرتق عم احمد القروش واحده واحده ثم موجها حديثه للراجل بكل غضب
- اسا القروش دي كلها عشرين جنيه واحده ما فيها يا ربي يكون بلعها
يتصبب الرجل عرقا و حرجا بدون ان يستطيع ردا ويغادر البص مسرعا
- شنكبه ما تزعل يا ولدي الدنيا ياما تعلمك يلا قوام ورينا همتك يا بطل قبال التلج يسيح
يبتسم شنكبه ممتنا لعم احمد ويغادر البص وسط همهمه البعض و استنكار قله وصمت من كان يهلل
| |
|
|
|
|
|
|
|
|
|
بص امدرماني (Re: توما)
|
الاخ توما بصكم ده بى وين الاربعين ولا الموردة انا على العموم الاتنين بيودونى بس سواقكم كيف
وهلبنا دائما فووووووووووووووووووووووووووووووووق
| |
|
|
|
|
|
|
|
|
|
ام درمان (Re: توما)
|
موردابيي
اهلا بيك في امدرمان
بمشي بيهن الاتنين بس كدي هو اليرضي يدور
شكرا ليك وللجيه
| |
|
|
|
|
|
|
|
|
|
Re: بص امدرماني (Re: توما)
|
توما العزيزة...انا قصدت ارجع الباص ده اول محطة..عشان الايام دى انا مستمتع بالرقشات
وعشان اغيظ بعض الناس المشتاقين ليهم لى باص زى ده..المهم اهو الباص رفعنا ليكم لساتكو
اقصد بوستيه...بس ساعدونا بى دفرة،،،
| |
|
|
|
|
|
|
|
|
|
Re: بص امدرماني (Re: توما)
|
يا اخونا البص بى الاربعين .....
ومالوا واقف البص دا مايكون بنشر ....!!
اهاانا غايتو قربته اصل الباقين ديل ايشيلوا شيلتوم ...
وياكافى البلا الباص دا مافيه مسجل الناس دي صارين فى
بعض كدا ليه وكل زول اخلاقه فى ...
توما تحياتى حتى تقولى الرووووووب
| |
|
|
|
|
|
|
|
|
|
Re: بص امدرماني (Re: توما)
|
- حاج احمد صباح الخير
- صباح النور حاج علي
هدوء كامل وغير عادي ابدا داخل البص
كل من يركب يسلم ويجلس بهدوء
يهمهم احدهم
- لا حول ولا قوه الا بالله
ويردد البعض
- ونعم بالله
يعلو صوت اخر وهو يشهق بالبكاء
- حسبي الله ونعم الوكيل
يصبره من لا يستطيع مع الحال صبرا
-وحد الله يا حاج ده حال الدنيا ياخي
الحزن مخيم داخل البص وعلي مسئوليه الجميع
حتي الركاب العابرين التزمو بالجو العام للحزن العام
الذي وجد ارض صالحه للسكن بعد الحضور الخفي للموت ليلا
وسواقته لعم قاسم معه
بكته ام درمان كما تبكي ابنها الطيب
بكت عطاءه وتفانيه في خدمتها
بكاه الابناء والطلبه والموظفين وكل من تعلم علي يديه
بكاه الجيران والحبان وكل من استطاع الي معرفته سبيلا
بكاه الاطفال الذين يداعبهم ويجزل لهم بالحلوي والضحكات بمنلوجاته الشهيره
بكاه زوار الخلوه والجامع والسوق الكبير حيث كان يقضي حوائجه ويقضي
علي تجهم الوجوه بنكته اللذيذه وحديثه الساخر المحبب
مات عم قاسم....
ترك زوجه محبه ,وان كان حظها قليل من الجمال والطيبه
بعكس عم قاسم الحبوب ..وهو معروف بحبه للجمال وحفظه لاغاني
الحقيبه وما ان تظهر فتاه جميله حتي يصدح بالغناء والوصف
سالته احدي الجارات الخبيثات مداعبه
- بالله انت مرتك دي اخترتها كيف؟
رد عليها بضحكه قال
- هو انا اصلا جابو لي تلاته اعزل منهم هي كانت احسن واحده فيهن عزلتها ..
بالله اتخيلي التانيات يكونن كيف !!منتهيات عديل ..
كان يضحك ملء قلبه ووجهه وروحه
لحسن الحظ بقيت روحه الجميله تلازم الحي وبقيت حكاياه
كان يحكي لي باسهاب وبشكل ممتع عن ام درمان البهيه العذراء التي عرفها
يقول ان ام درمان كانت بت (فتاه)
حتي تزوجها النيل في ليله مقمره
ويسكت
فاساله بلهفه.. اها وبعدين
يقول لي بابتسامه من اصطاد فضولي
- ولا قبلين..ولدوني انا الشقي ده..
- حاسب يا حاج احمد
- يا حاج خلي بالك
- لا حول ولا قوه الا بالله
- طيب يا جماعه ان شاء الله خير معليش معليش
يرد عم احمد بنفاذ صبر علي غير عادته بعد ان كاد يصطدم باحدي الحافلات
وهو المحزون علي فراق عم قاسم صديق عمره
كان لا بد ان يعود الي العمل بعد رفع الفراش وان كان لم يتعافي ولن يتعافي ابدا حتي يلتقي صديق عمره لاحقا..
يتوقف البص في المحطه الاخيره..
ويعلن عم احمد بعد نزول اخر راكب قبل حاج علي
- ما راجعين
ثم يوجه الحديث الي علي بعد ان يقفل باب البص
- والله يا علي ما قادر اتخيل الدنيا دي من غير قاسم
تنزل دموعه
ويجهش علي بالبكاء في البص الحنين الذي شهد اجمل ايام الاصدقاء معا
وها هو الشاهد الامين علي الاحزان ايضا
| |
|
|
|
|
|
|
|
|
|
Re: بص امدرماني (Re: توما)
|
صديق الموج
انت جد رجعت السودان كلو كلو ولا شنو
كان كده بختك شديد والله وهنئيا ليك بامدرمان وناسها وبصاتها وسمك موردتها ذاتو
شكرا شدديد للدفره دي
| |
|
|
|
|
|
|
|
|
|
Re: بص امدرماني (Re: توما)
|
ود عمي يا فرح
ونبقي زمان
وهسه
وبكره
يا متكيه في زمني
وشايله هموم الزمن الفات
ويا مشتهيه الزمن الجاي
حافظه مش ؟؟
| |
|
|
|
|
|
|
|
|
|
Re: بص امدرماني (Re: توما)
|
البص والله فوقو عستريو علي قول الحاجه
اشكرك جدا يا ود العباسيه وام درمان الحنينه
بالله خلو بالكم من ناس حمو وحاجه فاطنه ديل
| |
|
|
|
|
|
|
|
|
|
Re: بص امدرماني (Re: توما)
|
تومـــــــــا
عم قاسم الله يرحمه
كيف هان عليك؟
بالجد أنا حزنت لموته المفاجئ وبعدين إنت ماكلمتينا إنو حايموت.
إنا لله وإنا إليه راجعون والبركه فيكم وفي كل أمدرمان.
ياخي الناس ديل حبايبنا خليهم قاعدين.
| |
|
|
|
|
|
|
|
|
|
Re: بص امدرماني (Re: توما)
|
تبلدينا و ود المايقوما
حبابكم الف في البص ..
لكن البص ده وحلان مني شويه بس ان شاء الله يدور
شكرا ليكم
| |
|
|
|
|
|
|
|
| |
توما
عبدالماجد فرح يوسف
زوربا
humida
اساسي
zola123
bint algazeira
HOPEFUL
الجندرية
Ibrahim Algrefwi
صديق الموج
shawgi badri
tmbis
طيفور
حبيب نورة
بدرالدين شنا
بلدى يا حبوب
ALMURADABI
لؤى
ودالعباسية
فيس بوك
تويتر
انستقرام
يوتيوب
بنتيريست