|
|
 Re: مشاهد ثانية من الخرطوم ..!! (Re: nazar hussien)
|
دكتور المعز الرجل الشفيف
مرحب حبابك ..
لوحة واقعيه حقيقيه من البندر ..
اسمح لى اديك لوحة مصغره لاهلى واهل اب حراز اهلنا اهل العوض ..علها تبرد جوفك وجوف احبابك الزوار..
اول يوم وصولنا الحله .. عند العصريه ..
الحله كلها راجيانا برهه اهلك وجيرانك وآخر زول فى الحله ..كلهم متشوقين ومتلهفين ليك زى ناس بيتكم .. بكون فرحانه فرح خرافى من طلوعى من صالة المطار .. ورغم انى بحس انى خلاص ودعت الغربه ام غرور .. ووصلت بلدى الوسيعه بدون اى سور ..
ولازم اقضى ليله فى الخرتوم النعمنو الاهل الفى البندر والمناسبات البتجبرك ما تفوت وتجرى لى الحله والاهل .. وعشان كمان تستمتع بعقاب الاجازه كلها هناك .. وتكون ختيت هم ناس الخرتوم ..رغم انهم من افراد البيت ..لكن انا بشترط عليهم من بدرى نظموا اجازتكم معاى فى الحله ..دايره اعيش الفرحه بالاجازه ..لا زحمة عربات و لا شخشخة مكيفات ولا آخر صيحة الموضات .. ولا حاجات كتيره بتحسسك انك لسه ما فارقت بلاد بره ..
كل شىء اتغير حتى الملامح البسيطه نادرا ما تجدها فى البندر ..
عارف يا دكتور الليله البقضيها فى العاصمة دى ..بتكون بسنه كاملة .. مع انه مرات بتكون سواد ليل فقط .. وبدااااااااار بنطلع دقداق صاحب لوريك داك متوجهين على الحله الفى طرف الجروف والبحر .. لانه احيانا الرحله بتصل المساء..
لكن عارف سواد الليل ده.. اختك بتقعد فى نص السرير تحسب النجوم لمن جامع امدرمان يبدأ النباه القبل الفجر .. وطبعا بشترط نومة الحوش ..رغم ضيق مساحات الفسحه الفى البيت ..
وفرحتى بتتضاعف لما تبدأ المشاهد الحنينه بعد مغادرة البندر .. كمية من التوتر .. ما تحسسك حتى بالسفر والارهاق والفتر ..
تجى مارى بالحلال مرصوصه حوالين الشارع كالعقد المنضوم .. تتزين بقبه الشيخ فلان وضريح الشيخ فلان ..
وكيمان بيوت وسطهم مدرسة . وميدان كوره فى طرف الحله .. وعربتين بوكسى قدام دكان الحله الفى طرف الزلط .. ودى برضو فيها ريحة المدنيه ولو من بعيد ..
لكن احساسك بالغبش ببدا جواك اصل وليس صورة .. وحلم وليس خيال .. عند وصولى البنطون الجنيد او رفاعه
معروف انت جاى من السفر باين من شنطك وهدومك النضيفه وملامح الشوق .. البتكسر خاطر البشوفك ..
خالات وعمات جن راجعات من زيارة مريض فى مستشفى فى ابو عشر ولا الحصاحيصا
يجوك بى لهفه رغم عدم معرفتك باى واحده منهن .. فقط الملامح الحنينه والنوايا الجوه متشابه تمام وريحة الطيبه المشتته فى هدمن البارد ونفسن الاحلا من عطور الدنيا كلها .. واللهفه فى السلام ( وااااااااااااااا مصارينى ..يا حليلكم .. جيتو من السعوديه ؟؟ ) الاغتراب كلو ياهو السعوديه لمعظم اهلنا .. انا فى اللحظه ديك دمعتى وعبرتى ببداها معاهن يعلم الله .. وبعصر رويحتى جوووووووووووه فى كل واحده واشم ريحة امى وباقى اهلى ..
ويبدأ السلام بركه الجيتو وشفناكم طيبين يا اولاد بطنى ..
بتاع البنطون حمد الله على السلامه يا اولادى وبركه الشفناكم طيبين ..
العسكرى الواقف ..يا جماعه ديل جايين من السفر وتعبانيين ادوهم دور فى البدايه عشان يعدوا قبال مغيب الشمس ..ولا عشان الواطه حر واهلهم راجينهم بى غادى .
حاجه كبيره جد لى اماتكم الليله الجيتوهن طيبين ..
ستات التسالى ..دايرين تسالى .. يصرخوا الاولاد ايوه دايرين .. بس مافى قروش سودانيه دقيقه نادى عمك ..عمو الجايبنا من البندر .. ست التسالى لا لا خلاص شيلوا ده ساى عشان جايين من السفر..
كل واحد حانى فى حالك .. وهم حالهم تحنن اى عدو .. غبش بكل ما تحمل الكلمه دى من معانى جوه وبره
تغشف فى الحياة فى المعيشه ..ملابسهم الباليه والمتسخه بسبب معيشتهم اليوميه والكتاحه وحركة العربات ..
وتبدا ريحة الترعه والمويه وريحة القش الاخدر من الجروف .. وصوت البهائم ومراح السعيه جاى قاطع نص الطريق .. والعربيه تقيف .. والعلاله تعمى السواق ..
والهمبريب بى علالته انقى من اى غرفه مكندشه بى تكييف مركزى.. وبعد عراك طويل بين العربه ومراح البقر .. تبدا العلاله فى انخفاض بسبب وصولنا للجنائن ..والحواشات ومن هناك تلقى الناس كلها متشابه .. قاعدين وسط السرابات .. فيهم البحش فى قش بهيمتو ..وفيهم البسقى فى الحواشه وفيهم البتيرب يا دوب .. وملامح العراقى والسروال .. والبهائم المكومه فى طرف الزراعه والراعى البغنى بى مزااااااااااج حاكل عصايتو فى رغبتو ..
طلعنا كبرى الترعه ووصلنا الحله ..والقلب دقاتو زادت .. وده تفسير علمى ممكن تشرحوا لينا انت يا دكتور.. انا دقات قلبى بسمع صداها فى صدر امى البقع فيها قبل اى زول .. وبجعــــــــــــــر .. بى طول حسى.. نعم ببكى بى مراره الفراق الجواى ..ودام سنه بحالها .. علنى افضى هم السنه الماضيه وشوقها فى اللحظات الاولى .. واخواتى واخوانى وباقى ناس البيت والجيران مكومين فينى كل واحد داير يعصرنى جوووووه الحشا .. وانا لما يغلبنى بتفن فى الواطه لما يرفعونى ..قولى بسم الله وصلتى ولقيتى اهلك كويسين .. احمدى الله ..
تانى اجى على امى وناس بيتنا مقالده من طرف ..
وتبدا الصوره الجميله الحيه..يا حليلهم جوا ..بركة الجيتو .. عليكم الله ما تطولوا تانى .. اها ما بتصوموا معنا رمضان ؟ ويكون رمضان باقى ليه 8 شهور .. لا بعرفن ليك اقامه ولا بخبرن ليك اجازه سنويه وشغل ..
محنه حد النخاع.. ده كلو كوم وباقى الاجازه كوم تانى
لكن انا بقيف لغاية هنا .. وصدقونى سرحت وما حسيت بى نفسى كتبت كل الكلام ده ..
ارجو المعذره على الاطاله يا دكتور يا شاعر ..وللاخوه والاخوات زوار البوست..
والتحيه ليك قدر ابداعك وتسلم
|
|
 
|
|
|
|
|
| العنوان |
الكاتب |
Date |
| مشاهد ثانية من الخرطوم ..!! | Dr. Moiz Bakhiet | 09-23-04, 03:08 PM |
| Re: مشاهد ثانية من الخرطوم ..!! | Raja | 09-23-04, 03:37 PM |
| Re: مشاهد ثانية من الخرطوم ..!! | Dr. Moiz Bakhiet | 09-23-04, 03:46 PM |
| Re: مشاهد ثانية من الخرطوم ..!! | Mohamed Yousif Hamad | 09-23-04, 05:38 PM |
| Re: مشاهد ثانية من الخرطوم ..!! | خضر عطا المنان | 09-23-04, 10:59 PM |
| Re: مشاهد ثانية من الخرطوم ..!! | Dr. Moiz Bakhiet | 09-24-04, 08:38 AM |
| Re: مشاهد ثانية من الخرطوم ..!! | Dr. Moiz Bakhiet | 09-24-04, 05:13 AM |
| Re: مشاهد ثانية من الخرطوم ..!! | سجيمان | 09-24-04, 05:31 AM |
| Re: مشاهد ثانية من الخرطوم ..!! | Dr. Moiz Bakhiet | 09-24-04, 10:00 AM |
| Re: مشاهد ثانية من الخرطوم ..!! | Agab | 09-24-04, 07:10 AM |
| Re: مشاهد ثانية من الخرطوم ..!! | شمهروش | 09-24-04, 08:23 AM |
| Re: مشاهد ثانية من الخرطوم ..!! | Dr. Moiz Bakhiet | 09-24-04, 11:49 AM |
| Re: مشاهد ثانية من الخرطوم ..!! | Dr. Moiz Bakhiet | 09-24-04, 11:45 AM |
 Re: مشاهد ثانية من الخرطوم ..!! | تاج السر حسن | 09-24-04, 09:27 AM |
| Re: مشاهد ثانية من الخرطوم ..!! | Dr. Moiz Bakhiet | 09-25-04, 04:34 AM |
| Re: مشاهد ثانية من الخرطوم ..!! | samwal ebrahiem | 09-24-04, 09:25 PM |
| Re: مشاهد ثانية من الخرطوم ..!! | Dr. Moiz Bakhiet | 09-25-04, 06:50 AM |
| Re: مشاهد ثانية من الخرطوم ..!! | willeim andrea | 09-24-04, 11:21 PM |
| Re: مشاهد ثانية من الخرطوم ..!! | Dr. Moiz Bakhiet | 09-25-04, 11:08 AM |
| Re: مشاهد ثانية من الخرطوم ..!! | samwal ebrahiem | 09-25-04, 08:30 PM |
| Re: مشاهد ثانية من الخرطوم ..!! | ابوحراز | 10-04-04, 02:02 AM |
| Re: مشاهد ثانية من الخرطوم ..!! | nazar hussien | 10-04-04, 06:07 AM |
| Re: مشاهد ثانية من الخرطوم ..!! | soma | 10-04-04, 11:38 AM |
| Re: مشاهد ثانية من الخرطوم ..!! | Dr. Moiz Bakhiet | 10-05-04, 12:18 PM |
| Re: مشاهد ثانية من الخرطوم ..!! | Dr. Moiz Bakhiet | 10-05-04, 05:33 AM |
| Re: مشاهد ثانية من الخرطوم ..!! | ابوحراز | 10-05-04, 09:23 PM |
| Re: مشاهد ثانية من الخرطوم ..!! | Dr. Moiz Bakhiet | 10-05-04, 00:36 AM |
| Re: مشاهد ثانية من الخرطوم ..!! | Dr. Moiz Bakhiet | 10-04-04, 02:18 PM |
| Re: مشاهد ثانية من الخرطوم ..!! | samwal ebrahiem | 10-05-04, 02:00 AM |
 Re: مشاهد ثانية من الخرطوم ..!! | Rawia | 10-05-04, 12:22 PM |
| Re: مشاهد ثانية من الخرطوم ..!! | Dr. Moiz Bakhiet | 10-05-04, 02:21 PM |
| Re: مشاهد ثانية من الخرطوم ..!! | Mohamed Yousif Hamad | 10-05-04, 06:31 PM |
| Re: مشاهد ثانية من الخرطوم ..!! | Dr. Moiz Bakhiet | 10-06-04, 03:02 AM |
| Re: مشاهد ثانية من الخرطوم ..!! | Dr. Moiz Bakhiet | 10-06-04, 06:16 AM |
| Re: مشاهد ثانية من الخرطوم ..!! | Alia awadelkareem | 10-06-04, 11:58 PM |
| Re: مشاهد ثانية من الخرطوم ..!! | Dr. Moiz Bakhiet | 10-08-04, 02:20 PM |
| Re: مشاهد ثانية من الخرطوم ..!! | بلدى يا حبوب | 10-07-04, 06:49 AM |
| Re: مشاهد ثانية من الخرطوم ..!! | Dr. Moiz Bakhiet | 10-08-04, 02:37 PM |
|
| |
فيس بوك
تويتر
انستقرام
يوتيوب
بنتيريست