|
Re: بعض أطباء المخ والأعصاب في السودان لا إنسانيين ..حبيبي عيان ..يوجد(نزيف وجلطات متكررة وإحبا (Re: ذواليد سليمان مصطفى)
|
الأخ ذو اليد مصطفي بعد السلام
بالتأكيد أن كل الاطباء في بلادنا أبناء أسر صالحة
كلهم أبناء أسر تفانت وتعبت في تربيتهم إلى أن جعلتهم
في هذه المهنة المرموقة والتي لا يصل إليها إلا المجتهدين
والأذكياء في علمهم وتحصيل علومهم
لا يصح أن تقدح في تربيتهم وأخلاقهم ففي هذا تجاوز أربأ بك عنه وأدعوك أخي
للإعتذار عن تلك اللغة في حق شريحة الأطباء
فان كان غضبك من ( بعضهم) مشروعاً لاسباب ترأها موضوعية ففي تعميمك والفاظك المستخدمة هنا خطأ كبيراً
أرجو أن تصححه أخي وأن تلتزم جانب الموضوعية في طرحك ولك التقدير
| |
|
|
|
|
|
|
Re: بعض أطباء المخ والأعصاب في السودان لا إنسانيين ..حبيبي عيان ..يوجد(نزيف وجلطات متكررة وإحبا (Re: Dr.Elsadig Abdalla)
|
الاخت نادية
ادعوا الله القدير ان ينعم على الوالد العزيز الصحة والعافية
معظم اصدقائى فى الغربة والسودان من الاطباء ولا داعى هنا لذكر الاسماء فدعنى احى كل الاطباء اللذين كرسوا حياتهم وجل حياتهم فى اداء هذه المهنة الانسانية بكل ما تحمل المهنية من معنى , هم كثر فى سوداننا الحبيب.
لا للتجريح ولكن لابد من اظهار الحق ولو بصرخة او اى نوع من انواع التعبير وليس فقط برفع الدعاوى بالطرق القانونية اى بالوقوف امام المحاكم والا انقلبت العلاقة بين الطبيب ومريضه الى عداوة وبغضاء ولا انصح بالاطباء ان ينادوا بمثل هذه المناداة وبالذات فى مجتمع كالمجتمع السودانى والذى يغيب او يغيب بضم الغين عنه الكثير من المعلومات فما عليهم الا بالظاهر.
والذى يحدث فى السودان مرده مزيج من الغبن وقلة الحيلة تظهر فى لغة التخاطب بالسلب فيفسره الطرف الاخر كل على مقدار فهمه او احساسه , مشاعره ...........فلا الاطباء فوق النقد والتعليق على طريقة ادائهم ولا المرضى ومن والاهم على خطا . فاين تكمن المشكلة ؟
| |
|
|
|
|
|
|
Re: بعض أطباء المخ والأعصاب في السودان لا إنسانيين ..حبيبي عيان ..يوجد(نزيف وجلطات متكررة وإحبا (Re: MOHAMMED ELSHEIKH)
|
.. صادق تعاطفنا اختي الكريمة نادية .. و صادق دعواتنا مرفوعة لرب العباد ان يُخفف وعثاء الوالد وبأسم الرابطة الإشتراكية للأطباء السودانيين التى شيد صرحها رجال مثل طه بعشر و موريس سدرة و طاهر عبد الرحمن، و عبد الغفار الحداد (سيد العارفين) ، و عابدين شرف و عثمان سوركتى و عبد الوهاب سنادة و آخرين أفذاذ افاضل .. الرابطة الإشتراكية التى دفع الشهيد على فضل حياته ثمنا لبقاء رايتها عالية، باسمهم كلهم :
- اجزم بان الجريمة في مبتداها و اصلها صنعتها حكومة الظلم و الغباء و غياب العقل و الرحمة ! ومع ذلك نسجل إعتذار وطنى مباشر مسؤل لبسطاء و كادحي اهل السودان عن ما يجرى ! عن هذا الإنهيار الشامل في القيم و الممارسة الطبية !!
- نجدد إلتزامنا الأخلاقي المهني - السياسي بمواصلة النضال لإستعادة الشرعية النقابية و الديمقراطية الحقة بوصف الحريات النقابية - السياسية هي مفتاح حل مشاكل البلاد و قطاع خدماتها الصحى
- ننضال اليوم وغدا من اجل تكريس الإستاندرد و قيم الممارسة المهنية المتحلية بتواصل المعرفة و التحصيل ، و برفيع الخلق ، و الرحمة و العقلانية .. علمتنا التجربة نحن الاطباء انه : لكي تكون سياسيا جيدا .. فكن طبيبا ممتازا
| |
|
|
|
|
|
|
Re: بعض أطباء المخ والأعصاب في السودان لا إنسانيين ..حبيبي عيان ..يوجد(نزيف وجلطات متكررة وإحبا (Re: عوض محمد احمد)
|
د. عوض محمد أحمد
سلامات
عفواً سيدي .. لكن إنت بتقرأ ردودي عليك ومداخلاتي ومداخلات بعض الأخوان هنا كويس ؟!!
بتقول ( الجميع) هنا يحاولون رمي المسئولية على عاتق الأطباء !!
أنظر لكلمة ( الجميع هنا) في مداخلتك الكتبتها
في حين أنا وأخرين بنكتب كلمة ( بعض) الأطباء في كل مداخلاتنا !
وبعدين مافي ( غبائن) فردية ولا جمعية مع إنو حتى ( الغبينة)
لو إتولدت جواي فهي بسببها وضع نفسك مكاني وشوف إحساسك بيكون كيف رغم إنو موضوع (غبينة) ده ماحصل والفي الضمائر عالم بيهو ربنا!
عن نفسي حزنت وإستفزني تصرفات ( بعض) الأطباء تجاه مرض والدي وتجاه أسرتي وهذا ماكتبته كما كتب الآخرين تجاربهم مع أطباء آخرين وهذا كل مافي الأمر وفي النهاية يظل الأطباء بشر ويمكن أن يصدر عن بعضهم تصرفات وسلوك لا إنساني وهذا ماحدث معي وأسرتي فذكرت الواقعة دون التجني على ( الكل) وقلت ( البعض) فلماذا تعمم أنت وتقول ( الجميع هنا) ؟!
وبرضو لا أنسى تعاملك الإنساني معي أنت ود. ندى وإهتمامكم وتسلموا يارب
| |
|
|
|
|
|
|
Re: بعض أطباء المخ والأعصاب في السودان لا إنسانيين ..حبيبي عيان ..يوجد(نزيف وجلطات متكررة وإحبا (Re: أحمد طراوه)
|
د. أحمد طراوة
شكراً نبيلاً لدعواتك الطيبات ولتحليلك
العميق لأزمة الطب والطبيب والمرض والمريض في بلادنا !
ورغم يقيني أن السياسة تدخل في كل تفصيلة من تفاصيل حياتنا ومانعانيه
من أزمات إلا أنني أجد سؤالاً يلح في خاطري دوماً وهو : إذا كانت الحكومات تضهدنا و( تبشتن) حالنا كسودانيين على مر الحقب السياسية في البلاد فلماذا لا يكون ذلك أدعى لنكون نحن كـ ( شعب) بكل فئاته على قلوب بعضنا البعض ونسعى لخدمة بعضنا البعض بدلاً عن (فش غبائننا) من الحكومة في بعضنا البعض ؟!
| |
|
|
|
|
|
|
Re: بعض أطباء المخ والأعصاب في السودان لا إنسانيين ..حبيبي عيان ..يوجد(نزيف وجلطات متكررة وإحبا (Re: abookyassarra)
|
ود المنا ؟؟
والله العظيم شفت صورة أبوي حبيبي في بروفائلك قلبي قال ( ششششح) !
عليك الله شفت الراجل السمح ده وشو مليان طيبة وحنية كيف ؟
ياحليلو والله المرض هد حيلو حبيبي الراجل الجميل الغالي!
تتذكر عمك عثمان لمن كنت بتجي تزوره يا ود المنا إنت ومصطفى أخوك
كان بتونس ويضحك وشايفكم وفي أمان الله كيف رغم تأثير الجلطة على يده ؟!
هسي مسكين بقى مابين جلطة ونزيف كل يوم والتاني وكل مرة بفقد شئ من حركة جسمه !
الحمد لله على كل شئ ياابو السارة ومنتظرين طلتك في مصر باذن الله سمح؟
| |
|
|
|
|
|
|
Re: بعض أطباء المخ والأعصاب في السودان لا إنسانيين ..حبيبي عيان ..يوجد(نزيف وجلطات متكررة وإحبا (Re: نادية عثمان)
|
Quote: ود المنا ؟؟
والله العظيم شفت صورة أبوي حبيبي في بروفائلك قلبي قال ( ششششح) !
عليك الله شفت الراجل السمح ده وشو مليان طيبة وحنية كيف ؟
ياحليلو والله المرض هد حيلو حبيبي الراجل الجميل الغالي!
تتذكر عمك عثمان لمن كنت بتجي تزوره يا ود المنا إنت ومصطفى أخوك
كان بتونس ويضحك وشايفكم وفي أمان الله كيف رغم تأثير الجلطة على يده ؟!
هسي مسكين بقى مابين جلطة ونزيف كل يوم والتاني وكل مرة بفقد شئ من حركة جسمه !
الحمد لله على كل شئ ياابو السارة ومنتظرين طلتك في مصر باذن الله سمح؟ |
مليون سلامة ان شاء الله
وعمك زول فردة واجعنا مرضو
لكن شيخ عرب لن تمس وضاءته السنون
وزى ما كان عارفك وشايفك ولدو وبتو
فثقته فيك زى ما كلنا عارفين ما بتقع واطه
شيالة تقيلة وركازة فى ساعة الحارة بى مية راجل
ان شاء الله لمن نصل يكون تعافى وما يحتاج لى دكاترة السجم
| |
|
|
|
|
|
|
Re: بعض أطباء المخ والأعصاب في السودان لا إنسانيين ..حبيبي عيان ..يوجد(نزيف وجلطات متكررة وإحبا (Re: ismeil abbas)
|
((( والله العظيم شفت صورة أبوي حبيبي في بروفائلك قلبي قال ( ششششح) !))
والله العظيم يا ناديه لما دخلت أشوف اخبار ابوك وشفته الكلام ده قلبي قال (ششششششششششششششح !)
انشاء يا ناديه بحكم الكريم القادر العطوف الحنين ياالله يالله يالله تشفي ابونا عثمان يارب عطفك ورحمتك وحنانك وسعوا كل شيء يالله يا جبار اعطف وحن على ابونا عثمان ورجعه لي ناديه وكل افراد اسرتها وادخل البهجه والسرور في بيتهم يارب يا كريم تشفي سيد البيت وتملى البيت بي عطفه وحنانه.
قولي آمييييييييين يا ناديه وأسألي الله واتضرعي ربنا ما بيخذل عبده انشاء الله ربنا يرفعه ويوالي بالعافيه ........
أما الاطباء ربنا يعينهم ويعينا عليهم......
طمنينا على الوالد خطوه خطوه
| |
|
|
|
|
|
|
Re: بعض أطباء المخ والأعصاب في السودان لا إنسانيين ..حبيبي عيان ..يوجد(نزيف وجلطات متكررة وإحبا (Re: ismeil abbas)
|
أخي وصديقي الإنسان المحترم الخلوق
إسماعيل محمد أحمد عباس
تسلم من كل شرور الدنيا يارب
وخليني أحكي ليك على أبوي السمح ده شوية
عارف ؟
والله العظيم هذا العثمان مختار كان لما في صحتو وعافيتو
تلاقيهو في بيوت أعراس أهلنا كلهم بايت في الليل عشان
يضبح ليهم التور ويجهز اللحمة للطباخين لي عشاء الضيفان
وتلاقيهو يرجع يتمم على الصيوان وبعد داك يلبس جلابيتو البيضاء مكوية
ويجي يشهد على العقد بتاع العرس ويمشي بعد يطمن كل شئ تمام
وفي بيوت البكاء تلاقيهو من يسمع قولة فلان مات والله أول زول يصل بيت العزاء
ويقيف فوق رأس الميت بنفسو ويغسل الجنازة ويكفنها ويشيل عنقريب الميت
فوق كتفه ويصل المقابر يحفر ود اللحد بي نفسو وينزل فيهو ينزل الميت
ويهيل فوقه التراب ويطمن عليهو في رقدتو دي بين يدي الله وبعد داك يمشي !!
راجل تشهد عليهو أعماله الصالحات ويشهد
ليهو أي زول بعرفو في الشعبية وإشلاق بوليس بحري
والله ماعشان أبوي لكن راجل سوداني ضكران وخليني تاني أجي أحكي ليك عن سمح ؟
| |
|
|
|
|
|
|
Re: بعض أطباء المخ والأعصاب في السودان لا إنسانيين ..حبيبي عيان ..يوجد(نزيف وجلطات متكررة وإحبا (Re: ايهاب اسماعيل)
|
اللهم أشفى العم عثمان واعطيه الصحة والعافية
اكاد اجزم كل بيت في السودان فيه ضحيه بسبب تشخيصات خطأ wrong diagnoses هولاء القلة من الأطباء لا يتعظون ان لم يجدوا من يحاسبهم يجب القضاء علي هذه الظواهر السالبة ... عدم اعطاء الطبيب المعالج لتلفونه يعني لا يمكن الاتصال به وقت الحاجه يعني انه لاتهمه صحة المريض وهذا يخالف شرف مهنه الطب ارجو إستشارة قانوني واتباع وسائل قانونية لفتح بلاغ علي هذا الطبيب .... كذلك تقديم شكوي لجمعية الاطباء بتأخر حالة العم عثمان لعدم تعاون هذا الطبيب.
أنور أحمد
| |
|
|
|
|
|
|
Re: بعض أطباء المخ والأعصاب في السودان لا إنسانيين ..حبيبي عيان ..يوجد(نزيف وجلطات متكررة وإحبا (Re: ismeil abbas)
|
إسماعيل ياصديقي الوفي
تسلم ياربي من كل شر ويخلي ليك وليداتك وأحبابك يارب
طبعاً في الصورة الجبتها دي كان أبوي حبيبي شايفني وبتكلم معاي زي العجب !
كنت ماشة تصوير حلقة من برنامجي ( نخلات من بلادي) ومتعودة قبل ما أطلع لأي
تصوير أدخل ليهو أبوس رأسو وجبينو وأقول ليهو : أبوي أنا عندي تصوير أدعي لي بالتوفيق
يقوم يقول لي : بارك الله فيك أمشي يابتي
أها دعاء أبوي ده عندي بالدنيا ومافيها ولولاه لما نجحت في شئ في حياتي كلها !
ربنا يكمل شفاه ويبعد عنه الشر بحق جاه النبي يارب
| |
|
|
|
|
|
|
Re: بعض أطباء المخ والأعصاب في السودان لا إنسانيين ..حبيبي عيان ..يوجد(نزيف وجلطات متكررة وإحبا (Re: نادية عثمان)
|
أحكى يا صديقة..عن سيرة هذا الرجل الطيب..الذى يمثل نموذج الرجل السودانى ألأصيل..
أحكى عن هذه السيرة السمحة.وسماحة خصالنا السودانيه ألأصيلة...
Quote: على أولاد مانجيب ربع همّية الراجل السمح ده !
يا إسماعيل عندي مزاج أحكي ليك في البوست ده وأحكي لكل الأحباب
المروا والحايمروا من هنا أعضاء وقراء
عن حاج عثمان مختار الرجل السوداني البسيط جداً
|
سمحة هذه البساطة..الممزوجة بالطيبة والشهامة..أحكى قدر ما تحكى..نحن نسمع ليك .أحكى عن هذا الرجل الطيب.. ونسأل الله له الشفاء..
إسماعيل محمد احمد عباس...
| |
|
|
|
|
|
|
Re: بعض أطباء المخ والأعصاب في السودان لا إنسانيين ..حبيبي عيان ..يوجد(نزيف وجلطات متكررة وإحبا (Re: نادية عثمان)
|
أختي الفاضلة نادية ألف لا بأس للوالد طهور إنشاء الله ... الوالد سيكون بألف خير فقط تصدقي عليه وأكثري له من الدعاء بالشفاء أنصاف الليالي والناس نيام فرب السموات والأرض لا تأخذه سنة ولا نوم وسترين ...
Quote: والله هذا الرجل عثمان مختار إنسان بكل ماتحمله الكلمة من معانِ |
بكل تأكيد من إنجب نادية مختار لا بد ان يتسم بهذه الصفة وأكثر .... اللهم إني أسالك باسمائك الحسني وصفاتك العلا أن تشفي والدي عثمان مختار شفاءاً عاجلاً غير آجلاً .. يارب السموات ورب العرش العظيم ... يا من يقول للشيء كن فيكون قل لوالدي كن شافياً معافياً ليكون ..
| |
|
|
|
|
|
|
|