|
Re: تيموليلت: المغربية السحاقية، الفاتنة وصيّادة الفتيات (Re: محسن خالد)
|
اخونا الغائب واللابدلو فوق راي
مشتهيك والله
جيناك في بلدك واتعاقبنا ،، لقيناك طافش والبلد كلها مسدودة بي طبلة وجنزير
لكن ،، الأيام قادمات
Quote: لما كنت أنصاري سُنّة كنت مروّق كيف ودعول، عارف إجابة أي سؤال، حافظ جنس حفظ، الله بس، |
..
يا صديقي انت كنت وهابي ولا شنو غايتو انا مافهمت كلامك اشرح بالتفصيل باقي نحن عقولنا كلها عقاب
وكتين ماقدرت تتابع لينا قصة تيمولليت احكي لينا عن ايامك وانت مقصر جلابيتك وحافي شاربك ومطلق لحيتك
وفي رجاك
لك ودي
| |
|
|
|
|
|
|
Re: تيموليلت: المغربية السحاقية، الفاتنة وصيّادة الفتيات (Re: محسن خالد)
|
اخونا الغايب جيناك في بلدك لقيناك طافش وسارح هناك مع حفيدات مانديلا
لكن الايام جايات
Quote: لما كنت أنصاري سُنّة كنت مروّق كيف ودعول، عارف إجابة أي سؤال، حافظ جنس حفظ، الله بس،.. |
دا شنو دا
قول علي ما فهمتو حاول اشرح لي
وكتين ماقدرت تكمل لينا تيمولليت
احكي لينا عن محسن الوهابي ايامو الكان مقصر جلابيتو وحافي شنبو ومطلق اللحية
ونحن في انتظارك بكل المحبة
| |
|
|
|
|
|
|
Re: تيموليلت: المغربية السحاقية، الفاتنة وصيّادة الفتيات (Re: ahmed haneen)
|
..
محمد السني دفع الله،.. يا تحيات،.. أو كما يقول أخوك عاطف خيري: والحمام بَيَّاع مناديل خضراء في كل العصور،.. أها تيموليلت ذاتها بتسلّم عليك، مش إنت الدراوي الكان مع عادل إمام ويسرا في التلفزة، اتوحشنا نشوفو بزّاف آمحسن، تبارك الله عليه،.. وكي داير هو؟ اللي تحسنلو الحياة آمحسن، وقد نشوفو ونهدرو معه.. صايرة في ظمتك آمحسن،.. أها، مرقنا من الذمّة، والتخاصيم، من بلاد حبّيانها ملء مواعين الحب كلها،.. شكراً علي صوتك يا رجل، ولا بدّ أصلك وكل الأحباب بهناك، قريييب،.. لك الحب والأمنيات الأجمل،..
ahmed haneen،.. إزيك يا صديقي في الغار،.. ياخي ما بتعرف قدر شنو زعلني تجي وأجلّيك، يا ريت الزمن لقدام يكون أرحم،.. طبعاً جَرَّبت أكون وهابي لشهور، زول حافظ قرآن وفطموهو بالخلوة، منتظر منو شنو؟ أنا كنت وهابي متطرّف، وحتى مؤمن بالجهاد في جنوب السودان "لَمَّا كنت 19 سنة"، وناس الحركة أصحابك ديل غير الموت ما شايف لي معاهم حل، شفت طورانية الأُسس دي كيف؟ بس غلبني أطوّل معاهم، كلها شهور، وحسيت إنو الله قبض روحي وبدّلها بالموت، والحياة ويني الحياة، معقول الله يكون داير كدا، بالشكل دا ح أموت مافي شك، لا بنات لا موسيقى لا سينما ووقّفت قراءة كتب الأدب، دا مقلب شنو دا الرميت فيهو روحي، يا الله أنا كنت تائق للخلاص فحسب، وما كان قصدي بدل خلاء واحد أبقيهن هكتر خلاء، أنا الله خلقني عشان أكون مع الجمال والحياة والحرية وكرامة الإنسان، أها، ربنا من جودو وكرمو كَفّرني بربنا بتاع القطيع وأدّاني روحو علي نحو خاص، أدَّاني رؤيوي أعتز بيهو،.. بس ما تنخلع شديد، لويز باسكال مات بالتبتّل في الكنائس، نيكوس كازانتزاكيس عدّى 4 سنوات في جبل القدّيسين "آتوس"، وإينشتاين كان متدّين للنخاع السبب الخلاهو حتى يحاول يكتب تبريرات عن بعض النقاط التي ربما يستشف منها الإلحاد في النسبية، الفيلسوف بوهمة كان رجل دين بالأساس وعيييييك... بل مافي عبقري ما كان بعاني من نزعات دينية أو بدأ دينياً، الشيء الخلاني أكتب في قسيس الطبيعة أكبر جزء منها "ذهنية النبوغ والدين" من خلال تجربتي، كنتُ سأنشره في ذلك البوست "الكلوروفيل" لكن مشى المكتبة،.. بجي للموضوع دا في وكتو وبالطول الكافي والعمق الكافي والأناة الكافية،.. ماهو كلنا جينا من بيوت دين، بس كيف نقدر نوزن فهمنا مستقبلاً ونحرّر وعينا،.. مشتاق ليك، أبقه سمّعني صوتك،.. وكن بخير، أبداً بخير،..
...
| |
|
|
|
|
|
|
Re: تيموليلت: المغربية السحاقية، الفاتنة وصيّادة الفتيات (Re: محسن خالد)
|
اخى محسن...
التقيتك على عجالة فى دار السودانيين فى ابوظبى والوعد ان اتيك فى المجمع لاقتنى بعضا من دررك...وها انت تفيض كل يوم بسحر لا نطيق معه الا الانحناءة لهذه القامة الاديبة ... وارى انك قطعت سيرة التيموليلتة الشهية الذاكية وما صار لانوفنا عطر تستبشقه الا ذاك الرحيق...القريافة قتلتنا.... سابقى فى صمت وتادب الى ان يمن الله على بلقاء معك ايها الشفيف العاتى...
| |
|
|
|
|
|
|
Re: تيموليلت: المغربية السحاقية، الفاتنة وصيّادة الفتيات (Re: محسن خالد)
|
اخى محسن...
التقيتك على عجالة فى دار السودانيين فى ابوظبى والوعد ان اتيك فى المجمع لاقتنى بعضا من دررك...وها انت تفيض كل يوم بسحر لا نطيق معه الا الانحناءة لهذه القامة الاديبة ... وارى انك قطعت سيرة التيموليلتة الشهية الذاكية وما صار لانوفنا عطر تسنشقه الا ذاك الرحيق...القريافة قتلتنا.... سابقى فى صمت وتادب الى ان يمن الله على بلقاء معك ايها الشفيف العاتى...
| |
|
|
|
|
|
|
Re: تيموليلت: المغربية السحاقية، الفاتنة وصيّادة الفتيات (Re: طارق جبريل)
|
..
Yahia Abd El Kareem،... تحياتي يا أستاذ ولك الود،.. أذكر اللقاء جيداً، وتعرّفك علي فوراً، أنت وصديقك،.. أشكرك على هذه المحبّة وكلماتك الوفيّة للكتابة، أرجو أن أستطيع المواصلة في سيرة تيموليلت وأنا نفسي اشتقت لها ولمجالستها في الكتابة، سنفعل غاية جهدنا، وكن بخير أبداً بخير
طارق جبريل،.. ياخي ماك طيّب، التسوّل عليكو من هنا ما بنفع، بغينا نجيك تمّاك وكي داير كي داير، تدوّر بيناتنا ونحن في الأحضان،.. تسلم يا أمير وكن بخير،.. تحياتي للمغرب،..
..
| |
|
|
|
|
|
|
Re: تيموليلت: المغربية السحاقية، الفاتنة وصيّادة الفتيات (Re: محسن خالد)
|
..
منع الكتب والمعارض والأفلام "الرقابات المهووسة بالجنس والدين والعنصرية" القصة دي آخرها وين؟ أول أمس القريبة دي، بحكي لي الزول الجميل "محمد السني دفع الله" الحي وعايش دا، قال عملوا فيلم ولما جوا ياخدو التقارير حوله من المصنّفات اكتشفوا إنو التقرير باختصار "يُمنع منعاً باتاً حتى لو المشاهد عمره ديناصور"؟ والله لو عملنا مسابقة لكل الدنيا، وقيمتها مليار دولار، عشان تتخيل سبب المنع شنو؟ مافي واحد يقدر يقرّب ساي، مجرّد القرب من السبب! أنا بكتب في القصة دي وما عارف أضحك وألا أبكي من قوم زي ديل،.. هل لسبب ثقافي؟ كضباً كاضب،.. سياسي؟ كضباً كاضب ديني؟ كضباً كاضب تيموليلتي؟ كضباً كاضب طيّب شنو، سلّيت روحنا،.. لسبب "جنسي"،.. هل في مشهد بوسة؟ أبداً، هو نحن السودانيين ديل، عندنا في حياتنا البره دي ساي بوس لامن يطلع في فيلم،.. في ناس –ريفيين- لاهسع ما عارفين أخوانن الصغار أمهم وأبوهم ولدوهم كيف، الأب عندو ديوان يبعد مسافة كيلومتر عن بيت النساء، والأم تنام مع أطفالها ببيت النساء، ولامن شاف ولا من درى، لامن تستغرب الناس ديل بلدوهم كيف في الريف؟ خليك من حب وبوس وكب حنان وكدا وكدا، وأمك وأبوك لامن الله يطراهم بنادوا بعض "بود فلان" و"بت فلان" يا بت فلان، سوينا غدا عليك الله، لا حبيبي لا حبيبتي ولا حناني ولا حنانك،.. بالتالي ود السني لا يجرؤ أن يصوّر بوسة في فيلم، هذا من الأبجديات المنتهين منها،.. طيّب تعااال يا رقيب الما بعرفو اسموهو شنو؟ مالك مع فيلم ود السني،.. قال الفيلم فيهو "نعامة"،.. أها وبعدين، النعامة مالها؟ قبضوها في بيت دعارة قبل كدا؟ قال النعامة متبرجة وكرعيها مثيرات،.. شوف الزول دا، النعامة عارضة أزياء، نعامة الله والرسول دي، البهيمة، عندو رأي علي كرعيها السمحات ديل، كان لقى فيها فرقة ينزل بها فندق،... يا أخوانا ديل قوم منو، قوم لوط عرفناهم، وقوم تيموليلت عرفناهم، وقوم العديل عرفناهم، صدق ذلك المصطول بقوله: ناس الدين ديل، من مسويين ميضنتن زي ضَكَر الحمار كدا، أنا أصلو ما عندي فيهم ثقة
دا يقولوا فيهو يا منو؟
لسبي اللهُ ونعم الوكيل،..
..
| |
|
|
|
|
|
|
Re: تيموليلت: المغربية السحاقية، الفاتنة وصيّادة الفتيات (Re: محسن خالد)
|
..
Quote:
طورانيةُ التلَقِّي
ورد في الطَّوْر (إنَّا خلقناكم أطواراً)، أي الإنسان كمبتنى فيزيكي خُلق من سلسلة من الأطوار التركيبية وكذلك من سلسلة طورانية أخرى –غير المبتنى الفيزيكي- تقوم على فضاء هذا الخلق الطوري ووراءه. ما يهمنا هو هذه الطورانية المتعلّقة بفضاءات أخرى غير بدنية -جسمانية، أو المتعلّقة بالمخيّلة والدماغ والحس، مع ملاحظة أنَّه لا بد من الانتباه للختل الذي تتضمنه هذه الكلمة العربية –الحس- لأنها تجمع بين دلالتين متناقضتين في ماعون واحد، فهي أحياناً تستخدم بمعنى الحس –الملموس، أو الاختبار الشكلاني كما أوضحنا ذلك في "شكلانية الأُسس"، الذي يتم باليد والأنف واللسان و.. إلخ، وأيضاً هي تستخدم تارةً بمعنى "الحدوس"، أي ما هو حصيلة لتلقي غير اختباري شكلاني، بمعنى أنّه يتم بأدوات تقبع وراء الحواس، بعكس معناها الأول الذي يتم عبر الحواس ومن خلالها. فالتلقي في إجماله ينبني على أطوار، تتحكّم فيها ميكانيزمات كثيرة، منها ما يتصل بالطور الفيزيكي العادي، بمعنى قدرات الدماغ كمشين لها وظيفة تقوم بها، بناءً على قدراتها وكفاءتها كمشين، أي ما لا يستطيع البشري أن يتحكم فيه لأنّه الأُعطية الجَبْرية التي تلقاها من خلال خَلْقه المبتني، الذي لا يد له فيه، وليس بوسعه تحريكه إلا في حدود يسيرة، لنقل إذن إننا نؤمن بتواضعات علماء النفس وجداولهم حول الغباء والذكاء، العبقرية والتخلّف والوسطية. أما الفضاءات الأخرى، التي بوسعنا كبشر التحكم فيها، التي هي قابلة للترويض والتدريب، وأيضاً للإسراع فيها بالانتقال من طور إلى طور في التلقي، فهي الأساس لموضوعنا الحالي، ولهذه المفاكرة. فالمخيّلة قابلة للتدريب والتوسعة، إن لم تكن تعاني من ضيق في ماعونها الأساسي "الأُعطية"، وكذلك الذاكرة قابلة للتدريب والتوسعة إن لم تكن تعاني من تشوهات ما، وبوسع العطالة فحسب أن تملأها بالقروح والتشوهات، فالتدريب الملازم والمثابرة يمنحان القدرات الخفية في الإنسان استعدادها الدائم، وخصيصتي التوثّب واليقظة. في ماضي بعيد، كانت "دجاجي يلقط الحبَّ، ويجري وهو فرحان" طوراً من أطوار التلقي السمعي الجمالي –فيما يخص الشعر، وكانت تلك "السحلية" الملوَّنة في كُرَّاسة العلوم بألوانها النازَّة من الأطراف، تُمَثِّل لنا قمة الذائقة التشكيلية، التي هي في الحقيقة وبالتمحيص، كانت حادثةً درامية مركّبة تناسب ما كنا فيه من طور أكثر منها واقعة تشكيلية، أو حتى فكرة لها علاقة بالتشكيل، وهذه هي الفكرة من ناحيتها –الدرامية- غير البصرية بمعنى التشكيلية إطلاقاً. ففي تلك السن ذات الاستعداد الدرامي بامتياز، المفتقرة للتحليل الجمالي والاختبار كأغلب ما يكون، "دجاجي يلقط الحبّ"، كانت بالضبط هي: دجاجتنا الواقعية، أو دجاج الجيران في حال انعدام الدجاج بيتياً، يجري في الشارع ويجري في الشعر بالساق نفسها، ولا دخل للمخيّلة ذات القدرات هنا بأي صفة من الصفات التي تقود إلى "الاستيعاب" أو إلى أي "مُتَعٍ" مجاورة. هنا الارتهان التام لعنصري "المطابقة" و"النقل للصورة من خارج "الكلمات –النشيد" أي من قفص الدجاج إلى النص، أو العكس. وحين نقوم بتلحين النشيد عينه "دجاجي يلقط الحبّ"، نقع من الناحية الأخرى، في دراما الموسيقى والطرب الغريزي والبدائي البحت –إن جاز التعبير، ما يقع في حارة "الوَجْد" وليس "السَّماع"، وما يبعد عن تمايل شخص ناضج مع غناء مصطفى سيد أحمد بما لا يقاس، لأنّه ما من مسافة بين هذا وذاك، فكل موضوع يقف على كوكب خاص به. هذا الطور، طور دجاجي يلقط الحبّ، نحن قفزنا إليه عمداً فوق عدّة أطوار غيره، تبدأ منذ كان الإنسان شجرة، بمعنى كائن حي غير متواصل مع غيره من الكائنات، إلى أن يترقى قليلاً ويبلغ طور التواصل بمعنى "الاستجابة فحسب" للعالم الخارجي، مع كل القصور في "التفاهم" معه، أي العالم الخارجي. وهذا هو طور أن تقول للطفل: إييشششك، ياااااك، تكننو ننو، فيضحك الطفل ويقرقر وتُبرق عيناه، مع تمام اللافهم والقصور في التواصل، عدا عبر هذه "الاستجابة" المبهمة، والميّتة دون شك. الأطوار هذه تختلف –بالضرورة- من شخص إلى آخر، والانتقال عبرها يتم بسرعات متفاوتة دون شك، كما تُحَتِّم "قدرات المشين الأُعطية" أولاً، وكما يمكن للتجربة والبيئة التأثير القوي عليها ثانياً، أو إجمالاً عبر التلقّي موضوع حديثنا. لذا من باب –الافتراض- والقياس الزمني مع مراحل التعليم المدرسي، باعتبار "المدرسة" الجهة الأكثر اهتماماً بترقية الإنسان والانتقال به من طور إلى طور، وباعتبار أنَّ النظام المدرسي نفسه هو النظام الوحيد والصياغات "الطورانية" الوحيدة، التي أُسِّست على مفاهيم "الأطوار" هذه، إذن يجوز لنا أن نخوض جزافاً ومجانيةً في طور "يا جارة الوادي طربتُ وعادني ما يُشبه الأحلام من ذكراك"، قلنا جزافاً ومجانيةً لانعدام المعايير الدقيقة التي يمكننا من خلالها دراسة هذه الأطوار وتمرحلات الكائن نحو كائن آخر أكثر تطوراً على الدوام، فأهم خلاصات الفكر الوجودي، أنَّ الوجود سابق على الجوهر، إذن "وعي الكائن" يظل على الدوام مسألة في مستقبل أيامه وقابلة للتبدّل والتوسّع، ما يفترض بكل وضوح وليس –ضمنياً- الطورانية، وما لا يضع سقفاً نهائياً للأمور إطلاقاً. ولكن هذا فيما يخص الأشخاص الذين لا يعانون من أي إشكالات في "الأعطية المشين" إذ تبقى حقيقة أنّ هذه المشين يمكنها أن تخذل الكثيرين ممن يعانون من عُطب "ما" فيها، أو أولئك الذين سيعانون من نموها البطيء أو حتى توقف هذا النمو نهائياً لدى طورٍ من الأطوار، والانتهاء إلى كائن متشكّل القدرات على نحو نهائي وحاسم. طور "يا جارة الوادي" هو طور من صميم التواصل مع الخارج، هذه مسألة واضحة، ولكن من خلال ضباب "الرومانس المستحكم"، قلنا المستحكم لأنّ هناك طور الرومانس "الخافت"، والمستحكم ميزته أنَّه يشارك في الوجود كمندهش به أكثر منه كمتصفّح له وكمُخْتَبِر، أو حتى كراغب في تبديله، هو طور "شرنقة الوعي"، وهذا لا ينفي أنَّ هذا الطور هو نفسه الذي يصبح بوسعنا فيه ملاحظة أنّ أختنا "فلانة" أو أخانا "فلان" هو ثرثار أو هي أنانية ومجمل مثل هذه الاكتشافات التي بالتحري عنها، نكتشف أنها إما بيتية أو تقع في حقل الصداقة أو الزمالة أو.. أو... إلخ، مما هو حميم ولصيق ويتحتّم كشفه، وتبقى خلاصة أننا نتعامل معه كشيء "درامي" أيضاً، بدون حساسية أو ثورة ضده، من أجل رفضه أو تبديله. طور "يا جارة الوادي" هو في أساسه طورٌ عاطفي، ما يستدعي نمو أشكال خارجية له، تتلخّص في "قبول الوجود" على نحو "رومانسي" مسالم، فيه نتعرّف على الحب دون تشريح لماهيته أو ماهية المحبوب، هنا المحبوب محبوب بدون مقاييس، فهو طور "خاضع" وغير ثوروي، أي غير حالم بتبديل شيء، إنما هو مُسْتَقْبِلٌ أو ممتصٌ للوجود "كأمنية" وليس كموضوعة يمكن الحصول عليها "كاش داون" ووفق ما نحلم، بل وفق ما هو الوجود كائن وما هو متاح. هو الطور نفسه الذي لا نشعر فيه بالفقر وبالظلم وبالمرض كما يجب، بل ويدعمه البناء الفيزيكي بقوة الجسد لدى هذا الطور، فمن جهة البناء الداخلي لا يستطيع اكتشاف قبح العالم ولا نقده، ومن جهة ثانية البناء الخارجي بوسعه تحمّل الجوع والبرد والتعب والمهانة بشكل عام مع تسامح كبير، هذا هو الطور المسيحي إن شئت. التلقي الجمالي البصري فيه، يميل إلى الزخرفة، إلى ما هو متنوع وقارّ –استاتيكي- لا يجنح إلى التجريد، يحب أن يرى الصور فوراً، بحيث لا تُحْدِثُ له ربكةً داخل الصور الهشّة والطفولية التي يحملها بداخله وهي صورٌ خالية من الصراع والاحتمالات. لذا يمكنك أن تقول إنه يحب معارض "البورتريه" الأكاديمي، ستعجبه الموناليزا جداً، خصوصاً لو ثَقّفته بفكرة ساذجَة مفادها الانتباه إلى أنّ "الموناليزا" –المرأة الجميلة- من جميع الزوايا تراها تنظر إليك، فصاحب هذا الطور في قاعه مسكونٌ بأن ينظر إليه الجمال من كل ناحية، لا يُريد أن يرى القبح بتاتاً. أما التلقي الجمالي السماعي، فهو لن يميل إلى موسيقى معقّدة، سيرتاح إلى الأورغ أكثر، ولن تعجبه الأوركسترا لدى هذا الطور مطلقاً، لن يذهب أبعد من حيدر بورتسودان ومغنيي الأورغ –الحالمين- مهما اجتهد، وإن كان مجدَّاً للغاية فسينتهي عند أوركسترا "مصطفى مضوي" والواضح جداً من أعمال "إسماعيل حسب الدائم" و"صلاح مصطفى" و"صلاح بن البادية". مع وضع أصوات المغنين نفسها في أطوار، فهذا الـ"يا جارة الوادي" يميل للرقة، وللأصوات المنسابة والعذبة، الخشونة لن تغريه بأي حال من الأحوال، وسيعافُ بالتأكيد أصواتاً مثل "محمد الأمين" وحتى "الباس بارتون" مثل "مصطفى سيد أحمد"، لأنّ الجملة الغنائية مبدئياً وكجملة سابقة للجملة الموسيقية –بداخل مخيّلته- ستزعجه بعامل التأمل فيها قبل الطرب لها. في ناحية المسلسلات والأفلام، هو يُحب ليس النهايات السعيدة فحسب، كما يمكن توقعُّ رغبات أطوارٍ غيره، بل أيضاً يحب مبدأ الاعتذار والإحساس بالذنب من قِبَل الشخصية الشريرة، هو لن يفضّل كثيراً النهايات التي تَنْشَّل فيها شخصية الشرير و-يتلوي بوزها- أو تعمى وتُفلس وينتهي مفعولها السلطوي، أبداً، هذا يناسب أكثر طور الرومانس "الخافت"، أما "الرومانس المستحكم" فهو سيفضل تلك الشخصيات التي تبكي في النهاية وتعتذر وينصلح حالُها، هو يؤمن أكثر بمبدأ الإصلاح عن إيمانه بمبدأ العقوبة، الإيمان بالعقوبة يليق بطور "الرومانس الخافت". فالرومانس الخافت هو خطوة أكثر تقدمية ناحية إصلاح الوجود بطريقة واعية وواقعية وتضع الخلل الذي لا يمكن إصلاحه في اعتبارها. لدى هذا الطور لا يمكنك التوصل إلى أي القراءات النصوصية تناسب الرومانس المستحكم إن لم تذهب في اتجاه المنفلوطي وشاكلته على نحو أساسي. ولن تجد أبداً كُتّاباً خشنين، كحال الوجود، مثل دستوفسكي، شكسبير، جيمس جويس. بالنسبة لهذا الطور أساس وقوع الأحداث لديه هو "المجانية" و"الساااكت" لذا أول ما سيقرعه على رأسه ويدفعه خطوة ناحية "الرومانس الخافت" هو اكتشافه إلى القانون الرئيس في الوجود، وهو حدوث الأفعال لمُبَرِّر ما، يمكن تعيينه، أي اكتشافه لقانون "السببية"، فهو لعامل سنّه وخبراته لم يلاحظ في السابق، وسيكتشف في اللاحق، أنّ خيالاته وتصوراته كانت تتم عبر حراكه –المدفوع ثمنه من قبل جهة ما- في الوجود، تجاه الوجود الذي سيتأكد من كونه لا يتم فيه شيءٌ إلا بناءً على العوامل المادية –للأسف- سينتبه لأول مرّة بأنّه لا يستطيع أن يركب البص بدون مقابل، ولن يحصل على الآيسكريم إن لم يتصرف مع مصروفه بسياسة ما، وأنّ الدراجة التي اشتراها له والده، تم شراؤها مع خصيصة قابليّة إطاراتها لأن تُعطب، ولأن تحتاج لبالون داخلي جديد. هنا سيتم له التطور نحو رؤية للوجود و-للتلقي- تبعاً لذلك، أكثر أصالة من سابقتها. هذا هو طور "لا بد لهذا الليل أن ينجلي، ولا بد لهذا القيد أن ينكسر"، البصر أو التشكيل ضمناً سيذهب في اتجاه صور البؤس الوجودي والإنساني، هنا سيصبح بوسعه تقبّل المشردين في اللوحات والسلاسل والزنازين، مع لطخات من ألوان غير مفهومة، ومن ظلال، سيقبل المعقول جداً من التجريد في السينما والموسيقى والنصوص، وربما يعلّق بورتريه لجيفارا في دولابه أو غرفة نومه، وهذا الطور لصيق جداً بالطور الذي يليه، وهو طور "النضج السلبي"، النضج الذي يفهم فيه الكائن الوجود وإن كان لا يسعى فيه نحو الأصالة وتنقية الشخصية من الشوائب المجتمعية، واستيلاد الخصوصية الفردية، وربما هو لخوف باطني من الانفلات أو كنتيجة للمقدرات الطبيعية التي يمتاز بها الكائن "الأُعطية"، فلدى هذا الطور الأمور مختلطة كثيراً، وتبعاً لذلك يضطرب -التلقي-، ولا يمكن تمييزه أو تقديره كما أرى، وربما 70% من سُكّان السودان –المتعلّمين- يقبعون لدى هذا الطور، حسب تقديري أنّ نوعية النضج السوداني فصيلٌ من فصائل "النضج السلبي"، الذي يكسل عن النقد والتمحيص والاختبار والمماحكة مع الوجود. والتلقّي هنا ربما تقع في دائرته النصوصية الشعرية أعمالٌ كالتي ينتجها "الكتيابي"، "معز عمر بخيت"، "روضة الحاج"، كأعمال تحتفظ بموسيقى مهدهدة، وإن كانت لا تتميز بالحفر وأصالة الأسئلة الفنيّة أو غير الفنيّة، فالمخيّلة هنا تُدخل القليل جداً من التلوين على الصور، أما السبر العقلاني فهو منعدمٌ بالأساس، والتركيز يتم أكثر على التفعيل العاطفي، والشعري البنائي "الدرامي"، بمعنى التزويقي السطحي،.. أو حتى في ناحية أخرى، مع القليل من التفاوت في توجهات الشخصية الأيدلوجية أو –لاختلاف التلقي الثقافي، بمعنى البيئة، يمكن للتلقي أن يتجه –مع زيادة التلوين في الصور- نحو "محجوب شريف" أو "محمد الحسن سالم حمّيد" أو "القدّال"، فالأمور هنا لا تخرج عن أصوات البيئة و"الهدفية" كثيراً، والتلقي هنا يهدف بشكل أساسي نحو "العزاء" وما هو مجتمعي، غير مستفرسٍ وضارٍ وغريب، أي غير متجه ناحية الفنون في تكريسها، وإنما في درجات توظيفها والخطف منها بأضعف المخالب. هذا الطور يمكن تصنيفه بالطور الجيّد، وإن هو ليس بالطور الصحي تماماً لشخص يُريد أن يضيف للمجتمع أو يحذف منه، بمعنى غير الرسالي، أو الأيدلوجي، الحزبي، أقصد التفتّح في المجال نفسه وترقيته كمساهمة أصيلة من الفرد في الوجود وليس في الحياة المجتمعية، فشاعر كمصطفى سند سيكتب ديواناً مثل "البحر القديم" وغداً يكتب قصيدةً عن "توريت" أو "استشهاد وداعة الله"، و"صلاح محمد إبراهيم" سيعود من منفاه دون "الحاجَّة ست الفول"، وإلى آخره مما يعزّز رؤيتنا بخصوص "النضج السلبي". وهذا يتم لأنّ المتلقي أيضاً هو متلقٍ سلبي، ولا ما نع لديه من أي تنويعات غير منطقية، وهو الطور نفسه، المناسب لسماع ود الأمين ووردي والكابلي، على حسب مخلّفات الطور الرومانسي في الشخصية. لدى هذا الطور -التلقي البصري، التشكيل، يكون على حسب القراءة، فالشخصية هنا تتميز ببعض القراءات والنضج، لذا حين تقرأ عن الأعلام –المشهورين- من أئمة التشكيل، مثل سلفادور دالي كأشهر ممثل للسوريالية، أو سيزان ومونيه كأشهر ممثلين للانطباعية، أو رامبرانت كممثل للواقعية –الفَجَّة، "الفجّة" هذه من عندي- أو بيكاسو وتكعيبيته فشخصيات هذا الطور تستطيع بالفعل وليس نفاقاً، أن تُعجب ببعض هذه الأعمال، وأن تتواصل معها، وإن بشكل سطحي في أغلب الأحايين. والأمر يختلف قليلاً مع النصوص، بحسبان أن ثقافة النص أيسر وأكثر انتشاراً من ثقافة التشكيل، هنا تجد ماركيز والطيب صالح وإيزابيل الليندي كجماليين متينين، وأيضاً نجيب محفوظ ووليم فوكنر وجورجي أمادو كجماليين كلاسيكيين، شخصيات هذا الطور لديها القدرة على تقبل ما هو مشهور ورائج، والولوج إليه وتحصيله، ولا أدري لماذا؟ هذا الطور في المسلسلات والأفلام سيحبّذ أعمالاً لرجل مثل أسامة أنور عكاشة، فهنا الكثير من الموضوعية المشهدية، أو ما يمكن إيهام المتلقّي بكونه قضايا، كما أنَّه يمثّل حظوةً ما وخصوصية، في تقديري أنّ أعماله تناسب طور النضج السلبي أكثر من غيرها، خصوصاً أعمالاً ذات ادعاءات فكرية مثل أبي العلاء البشري. أما بخصوص الأفلام فهذا الطور سيميل ناحية السينما الأمريكية بشكل خاص، وستعجبه الأفلام –الملحمية- وأيضاً الأفلام ذات الطابع الخاص بسيرة النضال والنجاح مثل "محمد علي كلاي"، أو "ذهب مع الريح"، "سبارتا كوس"، كنماذج لأفلام كلاسيكية. في تقديري أنّ هذه الإشارات كافية لأنتقل إلى "طور النضج الإيجابي" نادر الحدوث في بيئة مثل المجتمع السوداني، السوداني يميل لتقبّل الأشياء سماعاً، ضعيف من ناحية اختبارها شخصياً، والتأكد من جدواها ومآلاتها، هذا طور بكل صلف دعنا نقول إنه يخص فصيلة قليلة –جداً جداً- و"مبدعة" بحرفية الكلمة، بمعنى أنها قامت بالتطهر أولاً من نظرتها السودانية –الداجنة- للوجود، وقامت بتبديل كل الأعراف في مخيّلتها أولاً، ثم سعت إلى تحقيقها على أرض الواقع بكل شجاعة واندفاع، دون خوف من التحطم أو الغرق أو الضياع، ودون الارتهان لأي أيدلوجيا ما، أي بكل مجانية وطيش مفيد، إن جاز التعبير. هذا فيما يخص الكشف أي التقدّم على نحو ابتكاري، وأنا لا أُميّز المتلقين من هذه الفصيلة عن المبدعين، فهم يلتقون لدى رؤى واحدة إلى العالم والنَّفْس البشرية وما يجب أن تكون عليه الحياة وما يجب أن يصاغ عليه الوجود. وهم يتواطؤون على خيانة العالم القديم في كل لحظة وهدمه، مبدعون ومتلقّون، التلقي هنا لا يمكنك تسميته إلا إبداعاً، ولا يمكنك الاقتراب منه إلا كحرفة ومهنة من مهن الدماغ العظيمة، فالتلقي بالأساس لدى هذا الطور يقوم على الاختبار والنقد والمساءلة والتقصي، وما من شيء يتم تقبله جزافاً أو مجاناً، وهذه هي عين النظرية الإبداعية، فالمبدع النحات يخلق عالماً مختلفاً لأنه يمتلك تصوراً مختلفاً لأشكال الأشياء، مثلما هو المبدع المصوّر والراوي، كلاهما يتأمل في الواقع المُعْطَى، فهو لا يستخدم طريقة الإنقاص والإضافة، بل عجن المشهد من أول وجديد لإعادة خلقه، في عمل فني جديد كليةً وبتلوين آخر. والمتشددون من أهل الفن في هذه الأنحاء –وأنا منهم- بخصوص الأدب مثلاً يرفضون الماضي بكل آليات عمله، حتى الفنية، كالتناص مثلاً، ففنان أصيل كبشرى الفاضل يعاف حتى "التناص" بمفهوم أنَّ الكتابة فعل فردي، ولا يجوز تربيته مشاعياً، أو السير به وفق دروب سار فيها آخرون، ما يجرّه للجماعية والتكرار دون شك، وما يعني بالضرورة قهر عامل الابتكارية الجذرية والتجديد فيه. فإيجاد مرتقيات جديدة للكتابة أفضل من توسعة أخرى قديمة. يصعب لدى هذا الطور رصد المحدّدات الفنية لديه، أو حتى طريقة العيش بالنسبة لهذه الكائنات كمخلوقات تميل إلى التجديد والتنويع والتلوين في كل ثانية، المزاجية الحصيفة والناقدة ربما تصلح كوصفة لهذا الطور أكثر من غيرها، والفلسفة متاعٌ أساسي يحمله هؤلاء -"الناضجون الإيجابيون"- في مواجهة ظروفهم، وكاختيار في تلوين تلقيهم لمجمل الوجود، أي هم يختارون نظرتهم، ولا تُملي عليهم الصور صورتها. هؤلاء هم من يمكنهم اختبار الحداثة وتجريبها قبل الوقوع تحت رحمتها كـ"متلقين لها" بكل أُعطياتها، وهم بالقطع لا يعانون من عُطب في "الأُعطية الجبرية"، نظراً لسيرهم حتى هذه النقطة وبلوغها معافين ودون مشقة وفي الـfit time. مع هذه الفصيلة لن يمكنك تقديم "الإسكتش" على أنَّه مسرح، ولا تقديم جماعة "تيراب" المسرحية –تسميةً، على أنَّها مسرحٌ "واقعيٌّ وفعلي" وبوسعه منافسة مسرح "أنطونيو إسكارميتا"، ولا تقديم النكات اللفظية و-تجريدية الأصوات- المجلوبة من طور "الإنسانُ في مقام الشجرة" على أنها "سخرية"، ولا حتى تقديم الصور الشعرية في خامها الموسيقي، كألاعيب أشعار ضعيفة ومجاورة للطفولة، من أمثال بهلوانيات "روضة الحاج" و"غنائيات الكتيابي" و"لا فقاريات معز عمر بخيت" و"مراهقات نزار قباني" على كونها شعراً، هنا تحتاج لوزن ثقيل، ولعقول مفتولة العضلات، كـ"أوفيد"، "بابلو نيرودا"، "أكتافيو باث"، "ديريك والكوت" أو على نحو محلي كـ"الصادق الرضي" و"عاطف خيري"، هنا تتبدَّل أقانيم كل ما هو متوفِّر ويُرَوِّج له الإعلان، إلى مأخوذات ما تم اختباره وتعيينه بدقة ووعي كبيرين. في تصوري أنّ الكُتّاب السودانيين السالفين، أمثال صلاح أحمد إبراهيم وعلي المك والمهدي المجذوب هم كُتّابٌ راجوا دون أن يُقرؤوا فحسب، وإن قُرؤوا لما راجوا، ولا يمكن تقبّلهم إلا على نحو "غفران تاريخي" كروّاد، كما قلنا مع مسرح الفاضل سعيد، أما الريادة بمفهومها المتحقّق فعلاً فلا يمكنك أن تتسامح فيها مهما كنت كريماً إلا مع أسماء أخرى يقف على رأسها الطيب صلاح ومحمد عبد الحي وبشرى الفاضل، -أعني من يمكنك الاطمئنان إليهم بكل ثقة كسولة-. بوسعك مع هذا الطور تقديم معرض بورتريه لـ"لوسيان فرويد"، لطخة لون من هنا ولطخة من هناك، والوجه يحضر في كامل دلالة اللاصور واللاتشخيص، واللاتعيين، أما البورتريه الأكاديمي فسيبدو كموضوع فقير، وفيه الكثير من المكاشفة المملّة، والتدخل في شؤون كاميرا الفوتوغراف. الناس هنا تبحث عن لوحاتٍ ربما تقابلها في القيامة –المستقبل- وليس عن صور "هشّة" من –ماضي- الطفولة. تبحث عَمَّا هو دينمايكي فَوّار، وليس عَمَّا هو استاتيكي محدود من طبع الرومانس المستحكم. الأغنية هنا مجرّد جنوح وتوق إلى التحليق بعيداً وفي فضاء الموسيقى، مع كلمة نافذة وكل ما يمكن توفره من تلوين موسيقي، فالهدهدة وأغاني "Loulli bye" التي جاءت منها أغاني "اللول اللول، والنوم النوم، بكريك بالدوم"، ليس في وسعها جلب النعاس والطمأنينة لشخص ناضج بشكل صحي. مع هذا الطور يمكنك النظر إلى رسوم فنّان ربما يحلو لك أن تصفه بـ"النزق" أو حتى "الشرير" مثل حسن موسى بواقع كونها كاريكاتوراً فحسب، لا يُحصحص ولا ينظر إليه إلا في واقعه المتعيِّن هذا، وليس في إطار الزعل، وما دورُ الكاريكاتور سوى تبشيع الواقع ورصده من زاوية القبح، أو تظهيره وتحميضه في معمل القبح، أيصنع الكاريكاتور مثلاً للإشادة بمنجزات الناس؟ بأشيائهم الجميلة!؟ أبداً، إنه الصنيعة التي تنجح بدرجات أشد كلما ألقمت الناس جبلاً وليس حجراً، لا مساومة بحوزته إطلاقاً، فهو الفن المعني بالنقد –الجارح أو الجاد- فحسب، ولذلك هو يقع بتمامه في طور "النضج الإيجابي"، النضج الإيجابي تنطبق عليه مقولة حذيفة بن اليمان، الذي كان الصحابة يسألون الرسول من –طور الرومانس- عن الجنّة، أي ما هو جميل وفردوسي عن فُرُشٍ موضوعة ونمارق مصفوفة، أما هو فكان يسأل عن –جهنم- ما هو قبيح و"نقدي"، ليتجنبه. ولكن إن كان التفهم لهذا الفن، من جنس تفهّم الديكتاتور –الرومانسي- ياسر عرفات، فلا بد أن تملأ الجبخانة صدر "ناجي العلي"، ولا بد أن يُقتل "حنظلة"، وليس "تفاحة" كما يمكن أن يقترح صاحب "رومانس مستحكم". المسافات بين هذه الأطوار مختلفة الأبعاد، والكميات، والأسفار، وأساس التنقل بينها هو الرغبة في التنقل بالأساس، إن لم تكن تعوِّق الشخص ظروفٌ بنائية ومتعلّقة بقدرات "المشين: الـgift ، أو برحابة المخيّلة وسعة التصور. بالنسبة لأصحاب "النضج الإيجابي" فالأمور واضحة ولا تحتاج إلى كل هذه "المعاتلات" الفكرية والنظرية. وبالإجمال يمكننا القول، بوسعك أن تتلاعب في الساحة الفنية، أو التلاعب في أدوات الإعلان كيفما تشاء، ولكن تظل ساحة "النضج الإيجابي" ساحةً مملوكةً لوعيها، ولأهلها ومتلقيها، عن كامل القصدية والتعيين والوعي، وبعيدةً عن متناول أي تزوير أو تزييف. وكخلاصة إجمالية لهذا المرسوم الطوراني –الافتراضي- هل من حق طور الاعتراض على غيره من الأطوار؟ ليصبح بوسعنا –بعد ذلك- الشروع في الإجابة على نحو لا يُبرّر للصراع بين هذه الأطوار بقدر ما يرصده، ويقف عليه من باب استكناه ميكانيزماته وتحليلها، في الغالب "الأطوار الهشّة والبرايمري خالص" لديها احتجاج على أي نمو يتم لاحقاً، فيما بعدها ومتجاوزاً لها، وهذه المسألة يمكنها أن تتم أيضاً على نحو تاريخي حتى بين منتسبي الطور الواحد، لأنّ النمو على الدوام نحو -لانهاية- تقبع في المجهول سيظل النقطة الأبدية التي تحافظ على بقاء الاختلاف والطورانية نفسها، فالزمن بمفهومه "الثري" وليس التجريدي، أو الزمن المُغَذَّى بخبرات الحركة والتجارب –المتبدّل- وما هو دينمايكي، المغذَّى بالتأثّر أو بالتلقّي –المفردة التي اخترناها لتعنون الموضوع- سيصبح بوسعه التطور داخل طوره الواحد –الإيجابي- إلى "خواتيم العمر"، لاحظ أنّ أي كائن حي محكوم بـ"العمر" وبفترة صلاحية معيّنة، ولذلك يقول الله بشكل حاسم، وبشكل يؤيد ما ذهبنا إليه من الطورانية "كلُّ يومٍ هو في شأن"، فالتبدّل اللانهائي –الطورانية الأبدية- هو الميزة الحاسمة للإله، لأنه غير محدود بـ"عُمُر" أو صلاحية. إذن لا بدّ من اشتجار الأطوار البرايمري مع الإيجابية، بالنسبة للأطوار للبرايمري الصراعات من قبلها تقع بناءً على خوفها من أن يتم تجاوزها ومحوها، أما بالنسبة للإيجابي فهو ينظر إلى المسألة كدور لا بدّ له أن يقوم به باتجاه التغيير والإسهام في التطوّر والتحديث. (كلُّ يومٍ هو في شأن). محسن خالد - أبو ظبي
|
..
| |
|
|
|
|
|
|
Re: تيموليلت: المغربية السحاقية، الفاتنة وصيّادة الفتيات (Re: محسن خالد)
|
...
الليلات الباردة.. التي تُدَثِّرني بنسيانها لي،.. كأني رجل يحاكمه قلبُه منتصف الليل،... فيتمدد التاريخ على مائدة الارتكاب والشبهة،.. وتبرق عيناي في الظلام كمجرم،.. ما هربتُ منه سابقاً يدركني اليوم، عند هذه الليلة ومن خلل هذه الشبابيك إن استطعت أن تحمي نفسك من كل شيء،.. من يحميك من نفسك،..
...
| |
|
|
|
|
|
|
Re: تيموليلت: المغربية السحاقية، الفاتنة وصيّادة الفتيات (Re: محسن خالد)
|
..
ناس كتيرة بتكاتبني بحزنها، لما أضحك، وأتذكر زمانات المنفلوطي، وأقول والله أيام،.. شكلها كدا الدنيا محزنة (عموم) في هادي الأيام،.. في أمريكا وأوروبا والخليج والسودان ويات ما تقبّل،.. في شنو اتبدّل بداخلنا؟ يخيّل لي إنو الرابط هو الغربة، وعد الطمأنينة إلى أحد،.. ونسة بس، مع أولاد الحلّة أو بنات الحلّة بيشوفوا من كتير،.. بس الناس الرجعت هناك، قالت الحياة مختنقة وصعبة،.. والسودان أخييي منو! الحل شنو؟
...
| |
|
|
|
|
|
|
Re: تيموليلت: المغربية السحاقية، الفاتنة وصيّادة الفتيات (Re: محسن خالد)
|
..
الغربة،.. إنَّ بحث الرجل النسر –الذي يحبس الفريسة بمخلب ويضرب الريح بجناح، الصلد، الذي عيناه مثبتتان على مدى الأفق- لم يهتدِ بعد إلى الخط المستقيم،..
في حكمة يوم آخر، وإن راق للّيل طرد قصتي عنه،.. واستبقائي في وعاء آخر، وادَّخاري لدرب،... ما زلنا بعمق ليل المرافعين،.. اليوم أنا ناذرٌ روحي لتلتقي بأرواح كثيرة ضائعة مثلها،.. كاسك كاس، وغبار دخان،.. وليل المرافعين،.. معلّق كالرايات في زوايا الجبل،...
...
| |
|
|
|
|
|
|
Re: تيموليلت: المغربية السحاقية، الفاتنة وصيّادة الفتيات (Re: محسن خالد)
|
...
أذكر في يوم بعيد،.. كانت معنا منى النجاحي، وجينا نازلين من خلال سوق الملابس بوسط الرباط،.. قلت لتيموليلت: المغرب جميل، لولا آفة الفقر،.. لو لقيت شغل بحق المعايش بس، ح أعيش هنا، وأحسن لي من أي مكان في الدنيا،.. تضحك، واشنو قد تدير هنا يا؟ ولا أي حاجة.. أكتب مع ناس حسن نجمي ديل، ونكون أصحاب،.. أسألها، ما ممكن يوم تفكّري في الزواج يا عزيزة؟ تضحك، تدفعني منى النجاحي بعيداً،.. وإيش بغيتِ منها؟ تغار منى النجاحي،.. سألتني تيموليلت بجدية، ما زلتُ أتعجب منها،.. بما معناه: طيّب، قول تبنا، ح تعرسني،.. وليه لا؟ تغفري لي، وأغفر ليك،.. أي زواج بدون غفران، يخيّل لي ما كان حتمي،.. تسألني منى: يعني لازم ذنوب،.. أبداً، بس لما الناس يكونوا متورطين في تاريخ لا يمكن محوه، ويصلوا لصيغة غفران، دا بيعني إنهم بالفعل دايرين بعض،.. وألا كيف؟ لتتمجّد روح الأب ديسموند توتو، باعث الغفران، وآخر عيسى يبشّر به،.. أجمل ما في الله هو الغفران،.. البشري بشري لأنه لا يستطيع أن يغفر،.. الذي بوسعه أن يغفر، فيه شيء إلهي دون شك،.. وغير خاضع لأن يبتزه الألم تاريخياً،..
...
| |
|
|
|
|
|
|
Re: تيموليلت: المغربية السحاقية، الفاتنة وصيّادة الفتيات (Re: محسن خالد)
|
..
كتبت شادية عبد المنعم:
Quote: الله يجازي محنك كاتب في زمن أت قابلتني شتمة سودانية في النص وأنا السيدة في منتصف العمر وجدتني أتصل من الخرطوم بصديق في الرياض لأسأله معناها قلت عليكم الله يا ولاد أمي افتش زمن لي محسن خالد أدافع عنه غيباً لاااااااامن ألقاهو يخليني أهرول زي تلميذة في الكُتاب ؟ بضم الكاف أولاد الما مننا خلونا ما لاقين كتبك لكن عزانا أنك تكتب وتكسر قيد المتوقع. لكن تحريشتك لي بيان دي دايره ليها شعر نحنا هنا الألفة شغالة معانا بي طول الاسكيرت وسمك الطرحة ناهيك عن سن القلم الذي هو في يدك الذكورية حاولو كسره أتابع بشغف من وجد لسانه في قلم زول ولا قلم زول في لسانو ياخي دي خرفنة خارم بارم ساكت المهم حجرك ماكن في بركتنا الراكدة الله يسلموا ... شادية عبد المنعم |
تحياتي، وكوني بخير،.. بدايةً مبروك على كسر البروكسي،.. حسيت بفرحتك أنا ذاتي، وفرحان معاك، نكايةً في الطيب مصطفى، وما تركه خلفه من ذيول جرذان تسعى بالطاعون،.. سلّمي علي الخرطوم بزّاف، وأرتعي تمام الليلة، وألا أقوليك أعملي داون لود سرعة سرعة، وساهري بمزاج وآخر خمج، وكل ما تمر بيك شتيمة سمحة ومودّكة، فننيها في رأس أحد الأوغاد،. مبسوط منك شديد ومعاك،.. لتدم الخرطوم حرةً ولا نامت أعين الرقباء لا طرحة ولا عباية ولا إسكيرت الخرطوم عاصمة إفريقية والأفارقة عُرفوا بالعري وليس العُهر العُهر استوردوه مع العباية والطرحة وطول الإسكيرت واللحى العُهر قضية متعلّقة بالذهنية وليس بالجسد لتدم الخرطوم حُرة وإفريقية وكوني بخير يا شادية
...
| |
|
|
|
|
|
|
Re: تيموليلت: المغربية السحاقية، الفاتنة وصيّادة الفتيات (Re: محسن خالد)
|
...
ركضت تلك المرأة طويلاً، ولم تتتعثّر أبداً، كي لا يتعثّر في ظهرها خنجر،.. بعد سنين طويلة، كانت أبعد من بلادها بكثير، وإن ما زالت قرب وجدانها الذي ركضت به خوف أن يفسدوه عليها،.. كانت (خالفة نَفْس الساق) البضة والجوّادية، على الساق الأخرى،.. ساق "كُنْ".. تلك المرأة بساقها كانت تشبه الخالقين كثيراً،.. إن خلفتها تكن الأمور على الفور،.. كانت تدخّن وتشرب البيرة وتمارس العادة السرية برجال وبدون رجال،.. هناك شيءٌ واحد لم تستطع بصقه مع طعم التبغ المرّ، طعم أغنية مُرَّة، مثل القهوة، ما زالت غصباً عن كل هذه السنين مدمدمة بحس لحظتها،.. والبوسة، أيوة البوسة، لما وصَّلها هو المطار قام باسها،.. البوسة دي كأنو خدّها من اللحظة ديك انقلب ثيرموس، وبقه شغلتو يحفظ البوسة دي طازجة –دافئة- وبدوخة لحظتها،.. كل ما يطلع طعم الغنية –القهوة- المُرَّة إلى حلقها، ترجّع البوسة دي وتدوخ،.. هي الآن أبعد من بلادها بكثير،.. ولكن أي ساق تستخدم في ركضها للهروب من وجدانها،.. كيف نهرب من أغانينا وحبايبنا في اليفاعة صوت الجيران من فوق الحيط والنيل والمقابر
...
| |
|
|
|
|
|
|
Re: تيموليلت: المغربية السحاقية، الفاتنة وصيّادة الفتيات (Re: محسن خالد)
|
..
فلاشات فلاشات، تضوي ذاكرتي من جُوَّه، فيما بعد العتمة والضباب،.. بحكي جدّي الدرويش عنو،.. الدنيا رمضان قهنوبة، من الحر سكّة القطر دي تعاين ليها تشوفها مخجوجة في الرهاب،.. سمعنا الثكلي، وكنا كلنا متلمّين بنقلع في بير أولاد الطيب، جابت ليها سَار "صخور بيضاء توجد على عمق كبير من سطح الأرض" وقَطَّت من موية،.. الزول مننا كان بكون واقف ذاتو، وزي المخلوق بكاملو من الرهاب، كلو يوشل عَرَق ما عندو نهاية،.. في شنو؟ في شنو؟ قالوا أبوكم "حاج كزّام" مات،.. نزلنا من دربنا دا فوق المقابر طوالي، كنّا في مَتَر الحلّة الفوق،.. الناس ما بتقدر ترجى بالجنازة الفطره، لأنو الدنيا حَرَّ وخافوها تتعفّن،.. (من هنا بتبدأ حكمة الإنسان الهالك بلا كرامة،.. وببدأ حزني كشخص باحث عن كرامة الإنسان)،. سفاية وحر، والطواري تشيل وتجي راجعة،.. كان راجل مهيب، تتخيّل إنو لو جاهو الموت يهشو زي ضبانة،.. التوب والملفحة، القرجة الملوية، ويقعد نص الدارة،.. قرآن وفقه وحديث ورواية وسيرة ونحو وييين ووين،.. أساتذة الجامعات الكُبار بجوا يبركوا مع حيرانو،.. يواصل جدّي الحكي عنو،.. بتذكروا يوم قبل صلاة الصبح، جاء دق الباب،.. الدرويش الدرويش،.. جيتو مارق لقيتو في مهابتو دي كلها والدنيا برد زمهرير،.. نعم يا أبوي،.. قال لي تعال وصلني شندي،.. في شنو ماشي بدري؟ قال لي أم الحيران عيانة، ودايرك توصلها بسراع شندي مشيت اتلفلفت من البرد داك، ولحقتو في بيت حبوبتي وديناها المستشفى ومعاها شوية نسوان،.. قال لي نمشي الجامع، وكان يا دوب أذان الفجر أذّن،.. دخلنا وأول الناس ما شافتو كلهم جوا منكبين يسالموا فيهو، راجلاً كان عِلِم وعَلَم وضو، الإمام برضو شيخ كبير، بس ما بحجم الراجل دا، رجع ورا وخلاهو يصلي بالناس القرآن دا عندو، لا ابن اليمان ولا سعد بن معاذ ولا عبد الله بن مسعود،.. شيء جنسو براهو،.. ما بصلي إلا بقالون عن نافع، ودي كان دخلنا فيها قصة براها،.. بعد ما انتهى، الناس انكبت فيهو من تاني، الداير يدعو ليهو، والداير يستفتي وو.. إلخ،.. الإمام طلب منو يتكلّم، حسيت بيهو ململ شوية، كان بحب حبوبتي دي جداً، ولمن يقول ليك أم الحيران قالت،.. خلاص، آمييين، والحمدو انتهى،.. كان داير يرجع المستشفى سريع، ورغماً عن دا قام وقال آلمباريك أكلمكم عن شيخي علي المديني (والمديني دا، أنا ورثت حبو من هذا الجدّ،.. المديني كان شيخ البخاري، وأعلم من أنجبته امرأة، إلا أنّ آفته التدوين كما يقول الرواة والمحدّثون أنا شعرت بإني مشيت هناك، وكنت واحد من تلاميذو،.. ولا هسّع ما قادر أجزم إني ما سمعت دروس من المديني دا،.. مَرّات بقول إني راجل مبروك، ولا بد إني قطعت وتاوقت من كوى الزمن علي حلْقة من حلقاتو ومرّات أقول أنا روائي كضاب يا روح ذاك الفجر، ضويني من تاني)،..
(حاج كظَّام –في الأصل، كزّام بالعامي،.. مات قبل أن أُولد بسبعين سنة –ربما- أو يزيد)،.. بس الفجر دا أنا حضرتو،.. والما عاجبو بطريقتو،..
...
| |
|
|
|
|
|
|
Re: تيموليلت: المغربية السحاقية، الفاتنة وصيّادة الفتيات (Re: الفاتح وديدي)
|
..
Adil Al Badawi،.. ود البدوي إزيك،.. اللنك قالوا محظور، غايتو نقوم نشوف لينا طريقة هجّة علي أمريكا دي ساي طبعاً الكون شغّال بالذكرتو دا قطع شك،.. أنا قايل الدنيا تمشي وتلف وتجي تاني تُعيد للشاعر اعتباره الدنيا دي شِعر إن سعلوني منها يعني أحلام وجمال وأمنيات وخيال ووو إلخ،.. في بكان هسع ما متذكرو، كتبت عبارة بقول فيها: إنو الشاعر هو الإيمان الأصبل الفقدتو الحياة كلما الدنيا تبعد من الشعر، بزيد شقاء الإنسان هسّع شوف عذاب الناس الفي الاغتراب ديل الاغتراب مُظَهِّر جيّد للألم، لأنو بيعزلك عن القطيع –الأهل- بالتالي بتجبرك وحدته علي التأمل والتفكّر، هسع الناس ديل كلهم، السودانيون أعني، اتعلموا كلمة "أحبك" وكلهم بفتشوا للحب، البنيات المعانا هنا ديل، والوليدات برضهم دا كلو ضربة غربة علي وزن ضربة شمس،.. عارف؟ الناس العايشين مع أهلن، الواحد بموت ساي بدون ما يكتشف نفسو، في إحداثيات الإنسان في كلام كدا: "إن تكشف عن الذات تغترب"
الفاتح وديدي،.. إزيك ولامن تصل أهلك أبقه كاتبنا تاني
...
| |
|
|
|
|
|
|
Re: تيموليلت: المغربية السحاقية، الفاتنة وصيّادة الفتيات (Re: محسن خالد)
|
سلامات يا محسن،
Quote: اللنك قالوا محظور، |
لنكاً محظور في الإمارات ويتضرَّع في السعودية دا قلب لينا نظرية الكون الشغَّال بعقل فَدْ نفر رأساً على عقب. فارق توقيت، عشان نقول العقل دا كان صاحي في السعودية بس نايم في الإمارات، ذاتو مافي.
أمري لله، أنسخ ليك الجزئية المتعلِّقة بكلامي عن الشبه بينك وبين بِتَّ الحطَّاب:
Quote: It’s like looking in a mirror! It turns out we all have a little something in common with Narcissus—the mythical fellow who fell in love with his own reflection. Scientists at the University of Liverpool recently concluded that our brains favor people with familiar faces. The research team asked over 200 participants to view a number of digitally altered human faces. They found that subjects preferred the features they found the most familiar—whether that means his or her own visage or that of a family member. This may explain that common phenomenon of couples looking like they could be siblings |
الكلام دا ذكَّرني تحقيق صحفي قريتو زماااان في مجلة مصرية بقول إنَّو الرجال أقرب لأن يميلوا إلى نساء يشبهن أمهاتهم. واحد صاحبي خبيث علَّل النظرية دي بإنُّو عشان الواحد لو أمُّو قالت ليهو دي شني البِتْ الشينة المباريها دي يقوم يقول ليها شينة شنو ما ياها دي بتشبهك الخالق الناطق.
تحيَّاتي
الاقتباس من المقال Love: 10 crazy scientific facts: By Laura Schaefer
| |
|
|
|
|
|
|
Re: تيموليلت: المغربية السحاقية، الفاتنة وصيّادة الفتيات (Re: Adil Al Badawi)
|
.. ود البدوي، كيفنّك؟ ما داير أخرّم بهناك وأمشي عقدة أوديب والكترا، لكن في ناس كتيرين بحبوا نساء بشبهن أمهاتهم، وكان ممكن أكون منهم بس ما لقيت لي بنية بتشبه البتولا بت الموفد كلو كلو،.. بت الحطّاب بتشبهني لولا نقاعتها الشفّافة، وقديدمها الأحمر الكلام الكاتبنو الخواجات ديل، يخيّل لي بصدق لحدٍّ ما، باعتبار الألفة نفسها لكن بالنسبة لي صَدَق كشترة مني ساي، بالأصل بحب الغَرَابة وإن متمسك جداً بالألفة،..
..
| |
|
|
|
|
|
|
Re: تيموليلت: المغربية السحاقية، الفاتنة وصيّادة الفتيات (Re: محسن خالد)
|
..
عندنا زول كان كعب خلاص،.. كمّل آداب الخرطوم من هنا، ونزل مع العربجية السوق من هنا، يوم ضرب فلان، كم شهر في سجن، مرات يزمبع ساي ببيوت المرايس حول وحولين زول مشهادو كعب خلاص، وختري جد، وكسّيب بشكل لامن يحيّر، بس كلها يودرها في دربو دا وزول وسيم وسامة الله أكبر، لامن كان طالب في الجامعة البنات بغناهو يرقصن عروس ورا عروس،. أها جابوا لينا أستاذة ثانوي من شندي، ما بعرفو الحصل ليهو شنو غايتو، يوم يشوفها في البص، يسكت تم لامن الخلق دي تحتار زمان لو ركب البص دا عوَّتو وكوراكو تورّم إضنين الخلق، ولط طبعاً لو مرة صادفني في البص بكره حياتي، لأنو بنقلب فوراً مصطفى سعيد ويشبكني شعر إنجليزي وفلان قال والمقطع الفلاني، شيء غريب، حفّاظ وذكاء وقدرة علي التحليل واستنباط الجمال، مبالغة أها الأستاذة دي طفيرتها بكرعينه السميحات ديل في البص، زولك دا يتُوفى عديل وتحس بيهو جَرّه عمتو في وشو، كأنو داير يضاري ريحة الشراب، ويلبد في صفحة الزول القاعد جنبو دا لامن تظنو نزل يوم جاني بالليل، لط طبعاً، بالله الزول دا قعد مأدّب وبحزن أسطوري كيف؟ قال لي أنا ما قادر أتحمّل، قلت ليهو قصدك الأستاذة صاح؟ هزّ رأسو، الكهرباء كانت قاطعة وكنت مولّع لي فانوس بقرأ بيهو، شفت لمعة الدمع في عيونو، دمع الفُرّاس الليلة ما نزل، هلا هلا، أمانة ما كتِل راجل، كان مبكِّي خلق الله دي كلها، خمج وسماحة، لامن حسيت بالشماتة الجميلة والمشجّعة تجاهو، يا زول بهنا بهنا، بلغ أمرُه الفتاة الشنداوية، أها طبعاً أهلها شافو الزول بقروشو وسمح وفاااهم، قالولوا خييير، بس خلينا نشاور ونسأل منك والفيها خير تبقى تب،.. قلنا الزول دا عَلَم، وما داير ليهو سؤال تخصصي يجيبن المسيكتاب، أبداً، الناس من شندي بوروهم عمايلو وكراماتو، النوع البفرتك بيوت المريسة بضراعو داك، لا بحتاج عكاز ولا سكين طبعاً جوهوا صادين وقالولوا "لا" بالصوت العريض والخط العريض،.. البنية بقت تشوفوا، وبرضك حتلت فيها، عجبها وحبّتو،... أهلها قالوا إلا كان يكتلنا كلنا ويعرسك، غير كدا السماء قريب، قالت ليهم بصلّح، سلموني ليهو وبتشوفو، قالولها يا بت إنت مطروشة في رأسك، دا والله يسلموهو ست عرقي تجيبو راجع أها القصة اتعضّدت هنا، قالت ليهو ما تسكر، عشان أقدر أدافع عنك، دغري بَطّل سكر وكمان "سجاير" هوادة منو من المغارب أتلم، بيقى يجيني بهناك يقرأ معاي عشان أشهد ليهو بالانعدال، أنا الما من منعدل دا البت رادتني وشعرت بي قروي مختلف حبّة، سألتني: انصلاح الزول دا رأيك فيهو شنو؟ قلت ليها: البعرفو أنا إنو بحبك كما لم يحب رجل امرأة في مدى بصري،.. لكن أخوانك أنا بعرفن، ما بقبلوا تزوجيهو، وبقيفوا فيهو ألف أحمر، وحد الموت،. لامن تجي سيرة أخوانها، الزول دا بحس بيهو بتحسّر، يُخيّل لي إنو في رأسو بقول: أريتو كان الموضوع بيني وبينن ما "حب" طين وألا ساقية وألا تمر، عشان أحلق ليهم كاري من طرف، وحتى قمندان شندي وناظر محطتها، برضو نعمل ليهم قطعية الشباب ديل استمروا بحبو بعض 3 سنوات، والزول دا ماشي سيف دغري يمشي يقيس وزنة انصلاحو بدقة باب أخوانا البت كل 3 شهور، والإجابة نفسها، لو بقت آخر مره ما بتاخدها، يا زول خلالالاص فاض بيهم الاتنين، وقرّرا العصيان العشقي والعلني، قال ليها أحاول آخر محاولة، وبعدّاك نقتدي بنصيحة ود المكي إبراهيم لقيس بن الملوّح، "أهينك هأنذا عبر القرون وأهين كلَّ من فرَّطوا في الحب نذالة الكسب الذليل، على حساب القلب" قابل أخوها في سوق العيش، الزول قلنا كسّيب وضراعو أخضر، حق الله بق الله، وأخوها واقف تج، ومعاها بنسويلك وبنسويلك،.. قالو "يا فلان، من محل بتنضم دا أنا جيت، وكان ياها بحلوها كدي، البت أنا عرّستها تب، خليها البت، كان درت راجل ذاتو بمنطق عكازي وعكازك بعرّسو، أها إن قصرتو الشر وأديتوني البت برضاكم، والله ما بتلوّب فيها تب، وإن قلتو لا، بخرتها بضراعي" سمعني قاصد شندي قام فسراعو..... طابق درقو.. يخرت رَيَّا قال بضراعو.... "العبادي" اتفقو هو والبنية علي اليوم الفلاني، يمشوا لمولانا عبد الحميد يعقد ليهم، الناس الكُبار لامن عرفوا الكلام دا ادّخلوا، نادوا أبوها وأخوانها وقالوا يحلوا الموضوع دا بالجودية، من حاح للبياح أهلها رضوا ما عدا واحد في أخوانها قال قبل كدا رأي لأبوهو نهائي وكان غايب، المهم البت كانت نازلة مع خالتاً لينا، والعقد تمّ خلاص، أخوها دا كان مسافر وجاء من كبوشية وألا من وين ما بعرفو، عرف إنها في بيت خالتنا، وقّف عربيتو وطفّر سيفو في السماء،.. قال يضبحها بس ويرتاح منها، وزولنا الفقري دا سمع بيهو اتناول سيفو وجري، الحلّة دي كلها قامت جارية علي بيت خالتنا، أنا كنت أقرب زول من البيت دا، لأني بمشي بقرأ جنب قبر البتولا بت الموفد والبيت طرفاني وقريب من المقابر، شفت العربية من بعيد قلت دا منو؟ إلا أسمع البنات يكوركن، خالتنا دي مره شجاعة جد، اتحزّمت وجاتو طايرة، قالت ليهو لو بتكتل أوّل حاجة تكتلني وتاني مخيّر،.. يا مره زحي يا ولية زحي، غفّلتو ليك وشبطتو بسيفو، الكلام دا برّه الباب، أنا جيت جاري عليهم، قبل أصلو ود خالتنا دي ذاتها جاء مارق شالو بسيفو ووقع بيهو الـواطة، دا كدا مأمّن، وما مشكلة، المشكلة زولنا الفقري جاي والله مبردب زي حصان مغبّي، قايلو كتلها، بقيت أنا فيهو هو، خالتي تشيل وتكورك، البت شديدة البت شديدة، والزول دا كان جاري أجل مش بشر، علي أخوها، لا بسمع لا بشوف، قادر الله في "حبو" بقيت أنا قصادو عديل، باقي عندي حبّة حرفنة في المشاكل، المشكلة يدي ما فيها إلا كتاب فرانس فانون العامل مقدمتو سارتر، شَفْ.. الأولى بتاعة السيف شالت الكتاب المجلّد القوي دا علي اتنين، شَفْ التانية نمت منها مع الحيطة فرتكت الروت غبار فوق رأسي، التالتة دي قطعت شكها يا في ود خالتي المتكوّم فوق أخو البت، يا في أخوها، شوفوا خالتنا الشجاعة دي بركت فوقن الاتنين من فوق، ولدها وأخو البت، وما عندها يمين شك أبداً إنو يومها تمّه،.. أنقرو الزول دا وقف كيف، حبيبتو من جنب الباب قالت يا "فلان"، واحدة بس وما زادتها، السيف تجمّد في الهواء، وأشبطو ليك بسيفو وأقع بيهو الواطـة، الزول دا لاهسع دغري وبقه دكتور، معاكم في سعودية الله دي، وبوليداتو، الكتاب المقطوع لسع في مكتبتي، قلت ليهو الكتاب دا أنا داسيهو لأولادك لما يكبروا، عشان يتعلموا الحب والثورة من كتاب واحد مشقوق بسيف
..
| |
|
|
|
|
|
|
Re: تيموليلت: المغربية السحاقية، الفاتنة وصيّادة الفتيات (Re: محسن خالد)
|
شوف يا ود البتولا بت الموفد، هي كلمة وغتايتها...
قِصَّتك دي خلَّتني أعدِّل عنوان المقال الإقتَبَسْتو ليك فوق دا إلى: Love: The Eleventh Crazy Scientific Fact
دا طبعاً لحدي ما أجيك/يجيك هميم بالاطناشراوية، التلطاشراوية...الخ.
سؤال في الخاص مدثِّر بثوب العام (لك أن تجيب أو لا تجيب عليه): حال كونك روائي، ذكرى البتولا بت الموفد بِتَحَرِق حشاك متين؟!
أحييك دوماً
| |
|
|
|
|
|
|
Re: تيموليلت: المغربية السحاقية، الفاتنة وصيّادة الفتيات (Re: Adil Al Badawi)
|
..
Adil Al Badawi،.. حبابك يا صاحبي حرقة حشاي علي البتولا بت الموُفد لحظة واحدة ما ادَّلت من قلبي، حاسس بإنو قصتها بتشبه قصة مريوم بتاعة الطيب صالح، مره صادقة ودغرية وسمحة لدرجة عاملة لي عُقَد من نسوان الدنيا دي كلها،... دايرك تقرأ كلامي عنها في (النور والتابوت، قسيس الطبيعة) بتلقى أجوبة وكلام كتير،.. عامل لي بيت حَنَّاي جنب قبرها، تحت شجرة سيّال غير ظليلة،.. ودا محل قرايتي وكتابتي الأساسي، أو بجانب البحر،.. هسَّع سودانن دا كلو، غير المحلّين ديل، والله ما واحشني منو أيتها حاجة،..
...
| |
|
|
|
|
|
|
Re: تيموليلت: المغربية السحاقية، الفاتنة وصيّادة الفتيات (Re: محسن خالد)
|
عزيزي محسن
صديقي "الطارقي" الذي نزع اللثام منذ زمن طويل، يحرضني دائما على الذهاب إلى "شوفي مافي". يقول لي، إن المطعم الكسول الراقد على جفن الخليج العربي، يذكره بالمغرب. هناك، نأكل "الكسكسي"، ونحتسي "الحريرة". أدمنا تلك الطقوس تدريجيا. هو ولد في "تمبكتو"، وتجول في مالي ونيجيريا. مترع بالحكايات، ونديم من طراز فريد. يمازح "الشلحية": شلحية!!. ترد راسمة ابتسامة ساحرة على ثغرها: عروبية. هنّ، بالغات الجمال في اللباس المغربي، الذي يشددن عليه حزاما من القماش يقسم أجسادهن لقسمين أنثويين تماما. الأربعة، يأتون بآلاتهم. أنا متيم بالموشحات الأندلسية، يهزني "الصويري". والطارقي مفتون بـ"القناوة". هل تكتب "قاف" أم "غين" ؟ حين يغنون القناوة، تأتي الفتيات. يصفقن. الشلحية تكون أكثرهن طربا. تتقافز، ويكاد يغمى عليها. الايقاع يسخن تدريجيا، ونصفق معهم. نضطر للقيام. لا يمكن أن تنغمس في القناوة وأنت جالس. هكذا يقول لي. اللحن المجنون يدغدغ الحواس. وكذا جمال الفتيات الساحر. المكان، مغربي تماما. الثريات، والتجاويف في الجدران، التي تشع بداخلها إضاءة خافتة. لو كان هذا القسم من العالم، يدع كتابه يا محسن يتفرغون لأبداعهم، لأقمت في المغرب، لأكتب وحسب. ولو ذهبت لذلك البلد، لما عدت قط.
| |
|
|
|
|
|
|
Re: تيموليلت: المغربية السحاقية، الفاتنة وصيّادة الفتيات (Re: محسن خالد)
|
Quote: أنقرو الزول دا وقف كيف، حبيبتو من جنب الباب قالت يا "فلان"، واحدة بس وما زادتها، |
مُحســن خالد تحية زيّك كده .. لو موجودة
زولك الفارس ده وقفتو قولة ( فلان ) أنا البرقِّد شَـعرة جلدي الواقفة دي شنو ؟ ياخ إنت مبااالغة .. كتابتك دي والله يوم بتقوّم لينا رِحِـم . . الغريبة ماحصل قريت ليك نص أداني جسدو من أول هبشة تتمنّـع نصوصك وهي ترغب القراءة إغراء يحير الواحد.. يعني غصباً عنو يرجع تاني وكل ما أجي راجع أقراك ألقى في النص لون ماشفتو فصدة في الجبين .. حور في العيون .. أطراف متبورة ريحة خُمرة في شَعَر الكتابة . غايتو جِنس شغلك دا إلا الزول يتلبّبوا ويخلي الجاي والجاي
ودائماً تحيرنا نطير على وين ؟؟ القدح أم الراح ؟؟ أقداحك رِقاق ودنّــك عتيق
الله يغطيك ويعليك فوق المابيك قوقو آميييييين كلكم عليكم الله
| |
|
|
|
|
|
|
Re: تيموليلت: المغربية السحاقية، الفاتنة وصيّادة الفتيات (Re: ثابت محمد)
|
سلامات يا محسن، أقولها ليك بي وَشْ وَشُّو يلعن قفاهو من السهر والحمى،
Quote: دايرك تقرأ كلامي عنها في (النور والتابوت، قسيس الطبيعة) بتلقى أجوبة وكلام كتير،.. |
بديت أقرأ. غايتو شوف، لو حصل لي قدر الله في يومي البدأ قبل ما ينتهي القبلو دا إنت المسؤول.
طلعت ونزلت مع سارتر وصحابو وتيَّة والست ثمَّ وصلت إلى أمر زيارتك للآخرة من ناحية قريتكم عبر مسجِّلة "المقبول" ولم أراوح مكاني حتى هذه اللحظة...كلام أعاين فيهو وابكي وأمشي وأجيهو راجع.
بدون لولوة دايرك تشوف كلامي التحت دا وتجاوبني ما وجدت إلى ذلك سبيلا (ويا معجبي تيموليلت استأذنكم فتيموليلت كان ويت):
هل تعدَّى قلم الأوتوبيوغرافيست، في حكايتك مع "المقبول"، الحواجز إلى حيث قلم الروائي؟ أسأل سؤالي هذا لأنُّو لو حكايتك مع "المقبول" حصلت ووب ولو ما حصلت ووبين، أما الووب الثالثة فأدَّخرها إلى حين إروائك لعطش السؤال عن سر توقفك الفجائي عن سرد حكايتك مع "المقبول"، على الأقل من البداية وإلى حيث وقفت أنا عن القراءة، بمجرَّد استماعك لعبارة واحدة بصوت أمك على الرغم من عبورك بنا بحراً من الآلام وصولاً لتلك العبارة...كيف لك أن تقتلنا بعبارة تفيض بالألم مثل "أريد* أمي. أتذكر صوتها أكثر" ثم تكتفي بمجرَّد عبارة "مطايبة" أمك للمقبول؟ هل هو "الصوت" فحسب ما كنت تبحث عنه ولماذا أردت مَرْحَلة الموضوع كي لا تبدو متلهفاً لسماع صوت أمك.
تقول في "قسيس الطبيعة، النور والتابوت"
Quote: ولكن أمي تحديداً كانت مصابة بداء القلب ويمكن توقع موتها. وكفنها الذي اشترته بنفسها، نزل قبلها للقبر سبع مرات في صحبة أموات آخرين. |
وتقول في مواضع أخرى، من هذا المنبر، إنَّك لن تحيا طويلاً، فهل تتوقَّع الموت، تخشاه أم تتمنَّاه أم هناك أمر آخر؟ وفي حالة أن الاجابة ليست التوقّع، هل من تعليل لذلك.
معليش، ربَّما أجدِّد أحزانك لكنَّ تجربتي في الحزن المدمِّر على من غيَّب الموت من الأحباب لا تتجاوز تلك المتعلِّقة بأمي الحاجة وهي "حبوبتي" التي لم أناديها بـ "حبوبتي" قط وهي أيضاً أمي بالرضاعة...عليه، أبحث أنا عن أجوبة وكلام كثير.
أحييك وأرجو أن لا يكون في أعلاه أي مضايقة لك.
* مهم جداً: هل قلت، يا ود البتولا بت الموفد، للمقبول: "أريد أمي" أم "داير أمي"؟!
| |
|
|
|
|
|
|
Re: تيموليلت: المغربية السحاقية، الفاتنة وصيّادة الفتيات (Re: mutwakil toum)
|
..
خالد عويس،.. أيوووة، بس ما كلّمتوني ع الواقع، معيدين عيدكم وحامدين سيدكم،.. صديقنا الطارقي الجميل، له أجمل التحايا ولكتابه "الطوارق"، قابلني في معرض الشارقة الفات وأهداني نسخة منه، فله تحياتي، وكتابه ثمين وقمين، لقد جعلني أقرأ في دهاليز "تمبكتو" برؤي غير الشائعة، وألمح تاريخاً جديداً لأفارقة حقيقيين ومنسيين، نحن تعودنا على التشكي بالظلم، ولكن من كتاب صديقنا الطارقي ترى من الظلم والتجاهل ما لا عين رأت ولا خطر على قلب بشر،.... بنجيكم، وبنشوف "شوفي مافي"، "القناوة" طبعاً بتكون متذكر كتابات عمك جان جينيه عنهم وعن محبتو ليهم وللدراويين بتوعم، قريب ناس المجمّع جابوهم هنا، خجوا أبو ظبي خج،..
ثابت محمّد،.. يا زول أنا ذاتي مبسوط منَّك ومن كتابتك،.. إنت رجل حريف كتابة وقراية، القراية "لكتابة سمحة" زي الحنّة، لازم تطبقها عشان تشيل،.. القراية أم الواحدة، وعين مفتحة وعين مغمضة، وسطر تقراهو والتاني تفطو،.. دي أنا بقابلها ناس الجرايد بس، لأنو شَبَه كتابتن.. والله يا ثابت لامن ألقالي كتاب أقراهو نفسي ينقطع، همم أممم دا الكلام، بتذكّر "الجحيم" لهنري باربوس، الأيامات دي دائماً في ذكرتو ما عارف ليه، يا زول إنت رجل طاعم بزَّاف وأنا مبسوط منَّك،
Adil Al Badawi،.. وا مرحباً، ويا مرحبا حكاية المقبول حقائق ناصعة ومائة بالمائة، وما جرّيت فيها القلم الروائي إلا لتسجيلها،.. بالطبع الصوت بالنسبة لـ"ابنها" ليس مُجَرَّد صوت، بل هو حضورٌ كامل، مع إغماضة للعينين ستراها، وستعود لجلسات كثيرة معها، أمي يا عادل عندها هارت ديسيس وما عندها بنت، لما تكون تعبانة أنا كنت بغسَّل ليها شعرها، وبحمّمها، وبأكّلها،.. أمرحل الموضوع دي الإجابة في النص نفسو، إنو الرجل عندنا يجب أن يُخفي عاطفته، تجاه الأم، تجاه الحبيبة، تجاه الأخت، تجاه الولد، الشيء البخلينا بننشأ وكلنا حُفر محتاجة للرواء من الحنان والثقة، يعني هل في سوداني بكون عمرو من 6 سنة وإنت طالع، أبوهو باسو؟ وألا بنت برضو في نفس الإطار العمري، أبوها باسها،.. غايتو إلا كان المغتربين ديل، اتعلموا شيء من المجتمعات التانية دي وألا من المسلسلات، نحن ناشفين نشاف الحراز في الخريف، ووكت يبتسم الأخضر، تلقاهو كالح،.. العبارة الأنا قلتها بالضبط هي "داير" مش "أُريد"، لكن ليفهم النص الناطقون بغير السودانية،.. أقول ذلك لأنَّ لي تجارب في الرؤيا، أمي مثلاً رأيتها تموت، وبعدها بأيام ماتت، أم صديقي وجدتي وأشخاص كثر من قريتنا، كنتُ أكتب أسماء من أرى موتهم بداخل ظروف جوابات مغلقة وأعطيها لأصدقائي في القرية، يومين تلاتة الشخص يموت، وأجي أقول ليهم أفتحوا الظرف، يلقوا اسم المتوفى، دايرين يجنوا،.. آخر حادثة أو رؤيا منها وأنا جيت هنا، كنت في مدني، مشيت أستخرج شهادتي بتاعة الجامعة، شفت أم صديقي وجارتنا طوالي، أكثر امرأة محبوبة في قريتنا، لحسن خلقها وآدابها، تُتوفى، الرؤيا نفسها أراها بطريقة معيّنة، أرى الشخص يغرق في البحر،.. طوالي طبّقت شنطتي وسافرت شندي، لقيتها نصيحة وشديدة، حبوبتي عارفة الموهبة دي عندي، قبل كدا كلّمتها بموت أخوها، قالت لي ما تتكلّم ومشينا معاً، أنا وهي يا ود البدوي لقينا المرأة شديدة ولا تشكو من أي شيء، شربنا معاها الجبنة واتفرتكنا، بكرة طوالي اتألمت، ودوها مستشفى شندي، جيت لقيتها معاها بنتها بس، قلت ليهم ح أبيّت معاكم، قالت لي يا ولدي أنا طيبة وشنو وشنو، رفضت تماماً، شوية كدا ولدها جاء ومعاهو نسيبها، قلت ليهم خلونا نبيّت معاهم يمكن يحتاجوا حاجة، ولدها طبعاً صاحبي وعارف الموهبة دي برضو، شكّ في الموضوع طوالي، سألني شفتَ حاجة؟ نفيت، قال لود أعمو خلاص نبيّت نحن، ود أعمو قال ليهو ياخ أمك كويسة وما عندها عوجة، ما تشفق ساي، قال ليهو لا، اتفقوا يبيتو، طوالي ود أعمو دا حلف طلاق أنا أمشي أبيّت مع ناس عمي في شندي، زهجت منو بالحيل، المرأة كانت عزيزة علي، بس مشيت،.. الصباح جيت لقيت السرير فاااضي، سألت جيرانها، قالوا "رحيمها الله"،.. زي القصة دي بالعشرات، وأنا شايف روحي ما بقعد كتير، وياها القصة نفسها،.. دي أجوبتك بالواضح جداً، وبدون أي فلهمة كُتَّاب،.. أبقه طيّب،..
mutwakil toum،.. يا سمح أريتك بخير،.. عارفك رفعت البوست دا لأنك بتكون برضو مغروض في الأجوبة بتاعة ود البدوي دي،.. أها أقراها كويس وتعال بواحدات تانيات ولنج،.. كن بخير،..
..
| |
|
|
|
|
|
|
Re: تيموليلت: المغربية السحاقية، الفاتنة وصيّادة الفتيات (Re: ثابت محمد)
|
..
Quote: ونطبُــق ليها البوخة لمن عرقنا يَهَتِّـف |
ياخي البوخة دي أنا فيها من أمس،.. شِعِر مش بنيّة، ما يطقشنا واحد بفهم غلط، بقصد كلام جدَّك الشاعر الفحل بالجد "العبادي"،.. الله، ياخي طار مني، ما داير أبوظو كدي لو حافظها شوتها هنا، أنا بحترم الشعر وما داير أجوطها،.. هو بقول في ما معناهو بتطبق الدخان، والفاصل بينهما حَمّام منعش، بتجي ونداها يهتِّف، مره ضنبها سمح وموزون، بتنتكي علي صفحتها، وتجدع إيدها هنا الموس بتنزل في الأعماق وتجلخ، إلا زولاً يكون ما عندو حَسَس
كتابتي دي ياها ذاتها فرحة البجي يداقر ورا الإيد المجدوعة دي، شنو ليك؟
محمّد السر بتوديهو بيوت المرايس، بطريقتو، أنا غايتو معاك ورا اليد المجدوعة دي،..
..
| |
|
|
|
|
|
|
Re: تيموليلت: المغربية السحاقية، الفاتنة وصيّادة الفتيات (Re: محسن خالد)
|
مُحسـن مالك مورطني ؟؟ قالُولَك أنا الحافظ
الطابق البوخة قام نداهو يهتَّف نام من الدوخة إيدو عاقباهو جدلة مملوخة ولي معالي الجوف موسو مجلوخة
دحين ياصاحبي بوخة شِـعرَك دي أنغمِل فيها كويس وسَّـع ليها النَّـطُع وأطبق ليها الشّـملة ولا أصابعين حرف ماتخليها بره طلع لينا حاجة صفراء كما البرتكان أو زي ســندي وودزمان
خليتك عافية
| |
|
|
|
|
|
|
Re: تيموليلت: المغربية السحاقية، الفاتنة وصيّادة الفتيات (Re: محسن خالد)
|
سلامات يا محسن، سلامات آآآخوي
Quote: بالطبع الصوت بالنسبة لـ"ابنها" ليس مُجَرَّد صوت، |
دي طبعاً قاطع شكَّها. الداير أقطع شَكُّو، وقفت عن السرد عند تلك النقطة ليه؟
Quote: أمرحل الموضوع دي الإجابة في النص نفسو، |
قطعاً شفت الإجابة الفي النص، المشكلة إنِّي ما مقتنع بيها بسبب اقتناعي بنشأتك كود أُمُّو بَسْ وليس ود أمُّو وابوهو وقرايبو حتى قبل أن تقول لي "أمي يا عادل عندها هارت ديسيس وما عندها بنت، لما تكون تعبانة أنا كنت بغسَّل ليها شعرها، وبحمّمها، وبأكّلها،.." هذا فضلاً عن إنَّك كروائي (أي عندما كتبت ما كتبت) ما زلت ود أمَّك وبذلك يصبح من الصعب جداً أن استوعب تلك الاجابة...لاحظ، يا محسن، إنّك حتى في ردَّك علي قلت "أمي يا عادل عندها هارت ديسيس..." ولم تقل "أمي يا عادل كان عندها..." أمَّك ما زالت على قيد الحياة جوَّاك، يا محسن، ولم تمت لا أثناء حكايتك مع المقبول ولا عندما كتبتها ولا الآن ولهذا اعتقد أن حدسي قد صدق وحدسي أنَّك قد كنت خائفاً حينها مما هو غير ذلك لا أكثر ولا أقل و"أعرف هذا الاحساس" فقد "داهمني" وأنا أدخل الغرفة التي صحوني فيها ذات مساء وأنا إبن خمسة أعوام لأستلم البدلة والشمسية الجابتها لي أمي الحاجة من الحج...دخلت تلك الغرفة بعد أكثر من عام ونصف من وفاتها وكنت متماسكاً حتى تلك اللحظة بل لم يخطر ببالي أي شيء عن التماسك أو عدمه إلى أن انفجرت في نوبة بكاء مخيف...
Quote: العبارة الأنا قلتها بالضبط هي "داير" مش "أُريد"، لكن ليفهم النص الناطقون بغير السودانية،.. |
هذا ما توقَّعته بالضبط وقاتل الله "الفصحنة". هل تحس، أقول تحس، بالفرق بين الكلمتين. أود أن أعتذر قبل ان أقول: في ستين داهية الناطقين بغير السودانية، فقد كان ينبغي عليك حشو شرح "داير أمي" كما حشوت شرح ذلك العنقريب.
Quote: أقول ذلك لأنَّ لي تجارب في الرؤيا، |
لم أتوقَّع هذا وإن كان في بالي، عندما قرأتك، شيئاُ مشابها فأبي يزعم أنَّه إذا رأى لحماً في حلمٍ فإن شخصاً ما سيموت...لم يصل حد رؤياك ليستطيع أن يحدِّد من يموت لكن...وكان في بالي أيضاً حلماً حلمته في جوف غفوة غفوتها وقد كنت وصلت للتو من الحج في رحلة شاقة بالبر...لقد حلمت أنَّني قابلت أحد المعارف في ساحة الحرم وقال لي أنَّ "بِتْ رُمَّان"، وهي عمة أبي وأمي في آن وعزيزة على نفسي، "راحت" في الحج وقد صحوت من ذلك الحلم على صوت جرس تلفون استقبلته من صهري يفيدني بوفاة "بِتْ رُمَّان" في ذلك الصباح..
Quote: دي أجوبتك بالواضح جداً، وبدون أي فلهمة كُتَّاب،.. |
أشكرك أجزل الشكر وقد همَّني جداً أن أخطَّ الخط الفاصل بين الأوتوبيوغرافيست والروائي فيك، على الأقل في الكتابة موضوع هذه المفاكرة.
لك أصدق تحيَّاتي
| |
|
|
|
|
|
|
Re: تيموليلت: المغربية السحاقية، الفاتنة وصيّادة الفتيات (Re: Adil Al Badawi)
|
..
عادل البدوي،.. إزيك، أنا لم أتوقّف عن الحكي عنها، بس باخد نَفَس، بتلقاها هنا وهناك، وحتى في تيموليلت آخر فصل، القصة بالنسبة لي أكبر من قولها في قصة واحدة، زوايا تصوير كتيرة، كل ما حصل ليها تناسب، مع أي نص، بندَّخلها في تَتَر القصة الفيلم،.. أُريد ح أرجعها "داير" كما تقترح، وتتطير الفصحنة،.. عارف؟ بت الموفد كانت صاحبتي، عشان كدا ذكراها مبارياني دائماً،.. خليك طيّب وفي ديار من السلام،.. وكن بخير
...
| |
|
|
|
|
|
|
Re: تيموليلت: المغربية السحاقية، الفاتنة وصيّادة الفتيات (Re: محسن خالد)
|
القلم السنين محسن تحية وتقدير جايي لك بشيء ولا حتى في الخيال يوضح ليك التناقضات اللي عايشنها الجماعة ديل00من رموا المحصنات اخواتنا الجمهوريات بأسوأ ما في القواميس من سفه حين كن يعطرن هواء الجامعات بالمديح00والان المديح بالصوت الأنثوي الحلو ومعاهو موسيقى كمان000 شفت كيف؟؟؟000 محسن دا ما الموضوع000الموضوع شيء تاني خااااالص00بجيلك بكرة او بعده00 لك الود المضاعف
| |
|
|
|
|
|
|
Re: تيموليلت: المغربية السحاقية، الفاتنة وصيّادة الفتيات (Re: محسن خالد)
|
القلم السنين محسن تحية وتقدير جايي لك بشيء ولا حتى في الخيال يوضح ليك التناقضات اللي عايشنها الجماعة ديل00من رموا المحصنات اخواتنا الجمهوريات بأسوأ ما في القواميس من سفه حين كن يعطرن هواء الجامعات بالمديح00والان المديح بالصوت الأنثوي الحلو ومعاهو موسيقى كمان000 شفت كيف؟؟؟000 محسن دا ما الموضوع000الموضوع شيء تاني خااااالص00بجيلك بكرة او بعده00 لك الود المضاعف 0000
| |
|
|
|
|
|
|
Re: تيموليلت: المغربية السحاقية، الفاتنة وصيّادة الفتيات (Re: فتحي الصديق)
|
..
فتحي الصدّيق،.. تحياتي، وألف مرحب،.. الجمهوريون غايظين الناس ديل بالتصالح النفسي والتسامح، دي كل القصة،.. كلّ روشتات الدين غير الجمهورية، سيدها يسوي الغاغاء نص الليل،.. عذاب وورم وزهج، الله بتاعم دا تجيهو يزهجك، تفوت منو يزهجك تربيع،... والنصوص قااعدة زي ما هي، لا اتقرت ولا مسموح بقراءتها وكلو خوف من "الله بتاع الخوف" الدمبعلو زي ما قلنا، وفي نفس الوكت الواحد منهم عبارة عن زريبة بتاعة جنس ويدّين حلّة كاملة من لصوص،.. كدي شوف الباكستانيين بتوع التاكسي في الخليج، تركب معاهم مره يقرصوها، يشاغلوها، يتمنتشوا عليها، يركب معاهم شافع وألا شافعة يتوكوه، الواحد عبارة عن مشين بتاعة جنس، تديهو قروش ما يرجع ليك باقيك، يزيد العدّاد، يسرق ويغش، يكضب، ودا كلو ما همّية،.. لامن تعمل كدا، وتبقى علي كدا، الله ذاتو بتكيّف منك، ويقول دا واحد من عبيدي الكعبين وانتهينا،.. بس لاحظ ليهم، لمّا يأذّن الأذان، أبو ظبي دي كلها تخلى من تاكسي، كلهم يجروا الجامع ولو تموت وكت الصلاة ما في واحد بقيف ليك،.. أها دا يقولوا فيهو شنو؟ كل ما أشوف تكاسيهم دي جارية علي الجوامع، بعد يوم ودوام طويل من الاعتداءات والتحرشات والنهوبات، أقول عووووووووع، من دا إسلام وديل مسلمين،.. والله سبب واحد بخلِّي البتولا بت الموفد، البتصلّي الضحى في وكتو، ولا بتعرف لف ولا دوران ولا كضب، ولا بتسمح بقطيعة في بيتها، سبب واحد بخليها تصلي علي قِبْلة التكّاسة ديل مافي،.. شوف! زول كضّاب دا زول كافر،.. زول سرّاق! دا زول كافر زول غشّاش! دا زول كافر زول بغتصب! دا زول كافر زول بتحرّش بالأطفال! دا زول كافر والكيزان من الترابي لأصغر واحد، ديل ناس كفّار وأنا أهدرت دمهم،.. والكيزان التانين من عمر البشير لأصغر لص دفاع شعبي ديل كفّار وأنا أهدرت دمهم،.. أها خلونا نتعاون كلّنا نكتّل الكفّار ديل،.. ونستعين بأخوانا المسيحيين –من أمريكان وغيرم- زي ما ابن تيمية استعان بالمسيحيين في قتال التتار،.. أمس كنّا في بيت صديقنا خالد عويس، كان عازم السيد الصادق المهدي، ودعا بعض أصحابو والإعلاميين للجلسة دي،.. سألناه رأيك شنو في إنو تجي قوات دولية؟ قال تجي طوالي، وكان رأيو واضح جداً، لامن اتكيّفت منو،..
...
| |
|
|
|
|
|
|
Re: تيموليلت: المغربية السحاقية، الفاتنة وصيّادة الفتيات (Re: فتحي الصديق)
|
السطور الواردة أعلاه هي جزء من رواية (جزيرة العوض ) للروائي المرحوم عمر الحميدي00الروائي والكاتب المسرحي المعروف00صدرت الرواية عن الدار السودانية للكتب بالخرطوم دون تأريخ وبمقدمة كتبها المرحوم الأديب جمال محمد أحمد00 والرواية متوفرة الأن بالرياض بمقر سفارة الطيب مصطفى والهندي عز الدين00أوردتها هنا بغرض توضيح تناقض (القوم)00000
| |
|
|
|
|
|
|
Re: تيموليلت: المغربية السحاقية، الفاتنة وصيّادة الفتيات (Re: محسن خالد)
|
سلامات يا محسن،
Quote: عارف؟ بت الموفد كانت صاحبتي، عشان كدا ذكراها مبارياني دائماً،.. |
كانت شنو يا زول. ما زالت...مازالت، يا ود بِت الموفد. باين الواحد استمرأ حكاية الاقتراحات البيؤخذ بيها دي، بدون مؤاخذة.
أغيب أكان يومين أكان تلاتة أكان أكتر وأرجع ألقاكم كلَّكم طيبين وسمحين.
| |
|
|
|
|
|
|
Re: تيموليلت: المغربية السحاقية، الفاتنة وصيّادة الفتيات (Re: samwal ebrahiem)
|
..
فتحي الصديق،.. تحياتي يا فتحي وكن بخير،.. شكراً للمقطع المنقول، ونحن تظل رؤيتنا بصدد الأدب هي نفسها، لأنّ الراوي هنا يروي ويحكي،.. ونبقى معك في تساؤل من يدُعم من الكتّاب، ومن يُحارب، هنا تحل السياسة لتفرّق الرؤى،.. وكن بخير
Adil Al Badawi،.. إزيك، الجملة كانت في البداية زي ما ذكرت، بس صلَّحتها كي لا يتتنقطع علينا متتطنقع، بعد ما تبته أنت أعلاه،.. بنحبك يا زول جميل،.. ويضحك نهارك،..
samwal ebrahiem،.. كيفنّك،.. أوكي، خليك على وعد مقابلة تيموليلت ومستّف شنطتك، وخليك طيّب،..
...
| |
|
|
|
|
|
|
Re: تيموليلت: المغربية السحاقية، الفاتنة وصيّادة الفتيات (Re: محسن خالد)
|
..
Quote: "إنَّ الدنيا تعيشنا ولا نعيشها. أُناسٌ كثيرون يمرون من هناك ومن هنا بظلالهم فقط. فالناس في هذه الدنيا لم يعبروا بذواتهم قط. الأشباح الآدمية تمضي يومياً وفي جلبة.. لأكل الموت، لبصق الموت ولبول الموت. وأنا لا أزال عند ملامحي كأي شخص مجهول. يُرَكِّز في مشيته ويسبق خطواته كثيراً. نادراً ما أخرج من معطف ذاتي، فرداءة الطقس الإنساني المستحكمة ما كنت لتعجبني"،...
|
إحداثيات الإنسان، يا ود السر،..
..
| |
|
|
|
|
|
|
Re: تيموليلت: المغربية السحاقية، الفاتنة وصيّادة الفتيات (Re: محسن خالد)
|
أها إن شاء الله تكون انتهيت من التصحيح؟ ناس كيالي ديل بعد كدا بكونوا زهجوا من سؤالي الكتير، إسراء ذاتها بقت تزهج من إيميلاتي.. المقطع الجبتو دا فيهو جزء فكرته كم مرة لاقتني في كتابتك، وهو الجزء البشبه كلام الصوفيه عن التسيير ولاّ ما كدا
لكن أنا عاجبني دا أكتر..
Quote: أجمل ما في الله هو الغفران،.. البشري بشري لأنه لا يستطيع أن يغفر،.. الذي بوسعه أن يغفر، فيه شيء إلهي دون شك،.. وغير خاضع لأن يبتزه الألم تاريخياً،.. |
دا كلام سمح بالحيل
| |
|
|
|
|
|
|
Re: تيموليلت: المغربية السحاقية، الفاتنة وصيّادة الفتيات (Re: محمد سنى دفع الله)
|
..
طارق جبريل،.. وااو،..
شكراً آلدرواي، راك مزيان وبزّاف تحب تيموليلت،.. يا حبيب إنت متفنجر مع نونا البيضاء دي، وأنا خجلت من كرمك معاي،.. يا ريت تلفحني طيارة عليكم كدا، ونتم الأنس،.. شكراً يا صديقي في الغار، والتجريد هنا عجبني جدا، بحب الناس بدون وجوه، والورود من دون ثمار، بحب الحاجات في أحكم حكمتها، وبحبك يا طارق جبريل
محمد السر،.. إزيك يا أعسل زول هنا،.. انتهيييييت، وجرّب المرة دي لو مغالطني،. هسع بعد دا خلاص منتظر الكتاب في معرض الكتاب دا،.. بعدين صاحبي الفنّان "علي الجاك" ظبط غلاف مجنون لإحداثيات الإنسان، الليل كلو أتفرّج فيهو،.. الشوام ديل كلهم، وبعد خبرتم البسنين دي، ما بخافوا في تصميم الكتب إلا من صاحبي ود الجاك دا،
الكلام التحت دا، بتاع الغفران، عارف؟ أنا أفشل زول فيهو، أوعَ تكون إنت زيي، وعجبك لأنك ما بتقدر عليهو، لو أنا قدرت سمحت روحي في الحتة دي، بكون أسمح ولد، فاهم وألا ما فاهم؟ الغفران، الغفران، وكمان بعد تغفر ما تتألم، تغفر وتمشي إنسان سمح وصاحب غفران جميل، والحاجات ميتة تماماً في ذكرياتك وفي قلبك،.. ما هو الدنيا كلها تُقرأ من خلال العبثية نفسها، التي تجعل الرسول يقول: ما أنا والدنيا إلا كراكب استظل بظل شجرة! إذاً الألم فوق كم!؟ إحساس الإنسان بأنَّه مخلوق خالد هو الذي يجر عليه الآلام،.. لأني مخلوق خالد، عايز قروش كتااار، أعيش بيها إلى الأبد لأني مخلوق خالد، عايز امرأة جميييلة، عشان ما أزهج منها للأبد لأني مخلوق خالد عايز بت ما لمسها إنسان قبلي، عشان تكون اكتشافي إلى الأبد وعشان أولادي يكونوا ولدتهم امرأة –يُفخر بها - إلى الأبد، ولأنو أنسابن ح تمشي إلى الأبد، ولأنو المرأة في نظرتنا هي مخلوق ملائكي خالد وطاهر غير دنيوي، إلى الأبد،.. بينما يا عزيزي، إحساس العابر والكون العابر والظل العابر، هو الشيء الوحيد الخالد إلى الأبد ما أنا والدنيا إلا كراكب استظل بظل شجرة،.. لو كان الضل نصو رقراق بكفيهو، لأنو بعد شوية ح يمشي لو كانت المرأة ظريفة وطيبة وذكية بتكفيهو، لأنو الحور المكملات قِدّام لو كان مفلّس، الغنيان ليها زي بيل جيتس شنو، ما في زول بدفنوهو بقروشو، ولا بتفيدو بعد الدفن ووو ... ووووو... وقعت ليك؟
محمد سنى دفع الله،.. إزيك يا ود السني، العذب، والزول القمراء،.. بس تصلني فيزتكم دي، وتلقوني معاكم بهناك، ياخي مشتاقين ليك جنس شوق،.. لما أصلك بالدرب، بتعرف حينها، وكن بخير، يا صديقي في الغار
...
| |
|
|
|
|
|
|
Re: تيموليلت: المغربية السحاقية، الفاتنة وصيّادة الفتيات (Re: محسن خالد)
|
..
Quote: الغفران، الغفران، وكمان بعد تغفر ما تتألم، تغفر وتمشي إنسان سمح وصاحب غفران جميل، والحاجات ميتة تماماً في ذكرياتك وفي قلبك،.. ما هو الدنيا كلها تُقرأ من خلال العبثية نفسها، التي تجعل الرسول يقول: ما أنا والدنيا إلا كراكب استظل بظل شجرة! إذاً الألم فوق كم!؟ إحساس الإنسان بأنَّه مخلوق خالد هو الذي يجر عليه الآلام،.. لأني مخلوق خالد، عايز قروش كتااار، أعيش بيها إلى الأبد لأني مخلوق خالد، عايز امرأة جميييلة، عشان ما أزهج منها للأبد لأني مخلوق خالد عايز بت ما لمسها إنسان قبلي، عشان تكون اكتشافي إلى الأبد وعشان أولادي يكونوا ولدتهم امرأة –يُفخر بها - إلى الأبد، ولأنو أنسابن ح تمشي إلى الأبد، ولأنو المرأة في نظرتنا هي مخلوق ملائكي خالد وطاهر غير دنيوي، إلى الأبد،.. بينما يا عزيزي، إحساس العابر والكون العابر والظل العابر، هو الشيء الوحيد الخالد إلى الأبد ما أنا والدنيا إلا كراكب استظل بظل شجرة،.. لو كان الضل نصو رقراق بكفيهو، لأنو بعد شوية ح يمشي لو كانت المرأة ظريفة وطيبة وذكية بتكفيهو، لأنو الحور المكملات قِدّام لو كان مفلّس، الغنيان ليها زي بيل جيتس شنو، ما في زول بدفنوهو بقروشو، ولا بتفيدو بعد الدفن، ولا حتى في الدنيا بتفيدو أكتر مما الغنيان العادي مستفيد! يعني بيل جيتس بياكل 17 وجبة بدل التلاتة؟ يمشي مثلاً يشتري بنطلون جديد؟ بيشرب الخمور محل الموية؟ وألا بشرب جاز الطيارات الغالي داك، بيركب تلاتة عربات فخمات في مشوار واحد؟ ما يأخذه البشري من الدنيا له مقدار محدَّد! واستهلاكه معلوم، إن كان بيل جيتس أو الفقير محسن خالد!
عليكم بالجمال، عليكم بالجمال، والغفران، شوفوا القرآن مع كلمة الجميل والجمال دي كيف قال تعالى (فاصفح الصفح الجميل )
الصفح الجميل بدون عتاب، وبدون ما تمسكها ذلّة للشخص، وبدون ما تتعذّب إنت نفسك بعد الغفران
قال تعالى على لسان يعقوب (فصبرٌ جميلٌ، عسى اللهُ أن يأتيني بهم جميعاً) الصبر الجميل، بدون شكوى وقنتي وضجر
(وأُسَرِّحكن سراحاً جميلاً ) (واهجرهم هجراً جميلاً) كونوا جميلين بالطريقة النبوية والقرآنية دي، (الدنيا اسمها دار النقصان)
|
...
| |
|
|
|
|
|
|
Re: تيموليلت: المغربية السحاقية، الفاتنة وصيّادة الفتيات (Re: محسن خالد)
|
..
Quote: يا طلعتك بارودة من صدر البنات لا تجلِّي الهدف لا تمشي تنهر في الممات شَعَرك يطوِّحبك وخصرك يشطِّر مشيك.. قافية ثبات شبّالك ينفض شعرك علي طول المدى.. حركة رهاب وتلميهو مستعجلة.. زي نشاف الترع وتنسرقي لاحقة المشاط القوارب شافهت سكوت الريح لما لبست طرحتك صاري انفلات ورِدتك اتقسّمتني بوليسها أُمِّي في كل النقاط اتهجَّاني مجهول طاردني كُلْ ما هَزَّ قبر وقعت منّو مكتول ويا مشيتك جنب الحقول حقل القصب عشرق لما جات دي القلت أكلّمها عترت بيناتنا اللغة ووقع السُّكات لاقتَك وسماها شبّت بالهطول ضلك وِهِم برالو زول وشبهك اتلخم حتلت ملامحك في تقاطيعك أفول مجهولك.. صحَّى غموض شبحك وانتبه كونك ما تتعرف عدم العرفة جاملك وأدَّاك شَبَه
محسن خالد مجموعة "أطلس"
|
..
| |
|
|
|
|
|
|
Re: تيموليلت: المغربية السحاقية، الفاتنة وصيّادة الفتيات (Re: محسن خالد)
|
محسن خالد
النبوءه والفلسفه والشعر..
يازول إنتا مشروع مكتمل .. وبقدر مايحز الكبد خبر منع كتاباتك من قبل (آل هولاك).. بقدر مايفرح أيضآ نفس الخبر..فمنع كتاباتك يعنى أنك تسللت إليهم بمالا قبل لهم به-بالكتابه-..
شفتا كيف يامحسن إنو الحرف بصنع أمه وبيفضح كم كذبه..ويعرى مشاريع حضاريه كامله ويخليها قاعده فى السهله ميطى..
| |
|
|
|
|
|
|
Re: تيموليلت: المغربية السحاقية، الفاتنة وصيّادة الفتيات (Re: محسن خالد)
|
العزيز المبدع محسن خالد ظللت اتابع واتابع واتابع ما تكتب حتي خفت ان يظن وليس كل الظن اثما اني تبيعا وما وددت يوما ان اقطع هذا التواصل فاجدني وكلما دخلت هذا المنبر ارفه عن نفسي بما تكتب واليوم وددت ان اقطع حبل التتبع لاقول لك اصبحت افكر كثيرا بزيارة المغرب لاقابل هذه الشخوص التي عشتهم عبر كل هذه الصفحات واخاف ان يجري لي كما جري قديما حين بحثت عن مصطفي سعيد يوما تحياتي ابوكيفو
| |
|
|
|
|
|
|
Re: تيموليلت: المغربية السحاقية، الفاتنة وصيّادة الفتيات (Re: محمد ادم ابوكيفو)
|
..
الجيلي أحمد،.. صباحك ضواي يا زول،.. آل هولاك، وآل تتر، ذاهبون بإذن الله، والأدب قااعد ومتربّع عشرون عاماً تشبّحت فيها الخرطوم أنصاص الليالي وسوّت السوتو، تبقى الفكرة عنهم، ياخي الدنيا دي.. ياها دنيا ساي، سبحان من له أخلاق المشكلة البص بصح، منو العندو أخلاق؟ أما –الدين- دا طبعاً قصة خلاص انتهينا من فرزها عن البشر، وخصوصاً الكيزان كن بخير
محمد آدم أبو كيفو،.. إزيك يا زين ومرحبا بالذمة كدا البموت من دون يديها طلّة مغرب بكون فاتتو حاجات كتيرة، ودا كلام من زول حَوّام، بس ما تكوس الناس ديل، لا مصطفى سعيد ولا تيموليلت، الكتب أسمح من الدنيا، والناس في الكتب أسمح منهم في الأرض،.. إلا تيموليلت، تيموليلت دي سمحة وين ما كانت،.. النعاس البشيل نضارة الوش بديها والله "صَنَّة ملاك"،.. والنوم البقوم سيدو شين داك، بالله هي تقول قامت من حُفرة دخان،.. ياخي أنا براي الليلة فارقة معاي،.. خليك في الجوار
..
| |
|
|
|
|
|
|
Re: تيموليلت: المغربية السحاقية، الفاتنة وصيّادة الفتيات (Re: Adil Al Badawi)
|
..
عادل البدوي، عارف؟ بعد ما عملت ساين آوت، جيتك راجع، أيامي في هادي الوحشة مبشتنة خلاص، إلا عجبتني معضلة إسفيرية دي، لو ربنا مدّ في العمر، بجي بقولك انطباعاتي "الروائحية" عن كُتاب البورد، شنو ليك؟ خترفات آخر العُمُر،.. في كتاب اسمه "العطر" لكاتب ألماني "باتريك زوسكيند" فتّش الكتاب دا وأتونّس معاهو شوية، كن بخير،..
...
| |
|
|
|
|
|
|
Re: تيموليلت: المغربية السحاقية، الفاتنة وصيّادة الفتيات (Re: محسن خالد)
|
يا محسن، يا محسن
Quote: لو ربنا مدّ في العمر، بجي بقولك انطباعاتي "الروائحية" عن كُتاب البورد، شنو ليك؟ خترفات آخر العُمُر،.. |
اها دي الكايس لها.
اتناضمنا أنا والخواض (أسامة) في شان الروائح والأروما ثيرابي وخترفات (مقتنع بيها جملة وتفصيلا) وخترفات. حكمة الله مافي ذكريات بتعذِّبني أكتر من ذكريات روائح الناس والأشياء والأمكنة وعوادم السيارات المشبَّعة برائحة البنزين غير مكتمل الاحتراق...بَسْ المعالجات الاسفيرية للحتيتة دي إياها الغلبتني لامن لقيت لي ليها دريب يوم جيتني لا أحراكَ ولا أدراكَ، في سايبر الله والرسول دا، تكلِّمني بيها. دحين أنا في رجاك آلمبروك.
الألوان خبرها شنو؟ عالق لي لون قلم رصاص بنفسجي كان معاي أكان في أولى ابتدائي أكان في تانية أبى بالتقطِّعو ماينقلع من نخاشيش دماغي دا بي كل ما مر بيها من ألوان طيلة ثلاثة عقود ونصف...الكترابة أل...لحقنا الرقدو وانفقدو!
تحيَّاتي
| |
|
|
|
|
|
|
Re: تيموليلت: المغربية السحاقية، الفاتنة وصيّادة الفتيات (Re: محسن خالد)
|
يا زول تطير العولمة والفلهمة بي وراها. المصيبة طير دمي، وطير دمك، وطير دم الناس دي كلَّها ياهو يصيح بي طاقة العولمة والفلهمة ديل...أكان طارَنْ ياهو السكت وأكان سَكت ماني شايف حلاً غير الكالود...الكالود وما غيرو وتجرُّو بي وراك جَرْ.
"طير دمي يصيح" دي عمَّك محمد عبد الحي، الله يرحمو ويحسن إليه، قلب فيها هوبتين.
| |
|
|
|
|
|
|
Re: تيموليلت: المغربية السحاقية، الفاتنة وصيّادة الفتيات (Re: محسن خالد)
|
أول حاجـــة الصورة المعلقــة دى ما محســـن الشوفناهو هنــا فى الدوحـــة....دى بتاعة محســن التانـــى (تيموليلت)....أما محسن الشفناهو هنـــا(السيرلانكى)........أبقى محسن زولنا زاتو........بالدليل:
لك كل الحب ياصديق الحب.......جعلتنا نميل طرباً من عزتنا بوجودك معنا.......و نقدل فخراً بزهونا بك......
تخريمــة:
معاويــة الطيب مالو عامل كدهـــا فى الصورة دى.........
الحضور من اليمين: محمد عبدالرحمن....بهاء بكرى...محسن خــالد...ابناء بهاء الدين "خالد و طارق" و فيصل عباس فى الخلفية وأبن خالة محسن ربيع و المقهـــّى: معــــاوية الطيب....
| |
|
|
|
|
|
|
Re: تيموليلت: المغربية السحاقية، الفاتنة وصيّادة الفتيات (Re: Siddig A. Omer)
|
Quote: عادل البدوي، وأبو ساندرا إزيكما،..
وجايين،.. |
طيبين تَبْ والله...وفي رجاك. لكين شكيت صورتك علي الخلقها في أحسن تقويم، أعفى لي بَسْ.
في واحد تنزاني كان عُمْدَتنا، في حركةٍ مطلبيةٍ ما في زمان ما في مكان ما (احتمال يكون شنتير عِتِر فيهو بي طريقة أو بأخرى)، لما شُفْتَ صورتك دي اتذكَّرتو. الحكاية شنو يا زول، مرَّة تتقلبن في شكل جنوب أفريقية ومرَّة سريلانكي فَدْ مرَّة ومرَّة زي تنزاني! دي "أطوار" الانسان المجرِّي وألا شنو؟
تحياتي
| |
|
|
|
|
|
|
Re: تيموليلت: المغربية السحاقية، الفاتنة وصيّادة الفتيات (Re: محمد السر)
|
...
عدنا لعالم الكراسي من جديد، وشكراً لكل تلك الأيام الاستراحة وبديعة الأنس عدنا لعالم الكتب المرصوصة على الكراسي،.. في "بيت ضيف" بيت منتظر من زمان في صالون الضيوف المايكرويف في كرسي شمال اللاب التوب الذي هو على كرسي أزرق،.. التلفزيون -البور- في كرسي أمام المطبخ على طول كل شيء علي ضهر كرسي، بيت مصنقر اجتماع كراسي، في كل صوب ربما أقرب وصف له.. إنو كانت في حفلة رابّة في الأستديو الصغير دا–اتفرتكت من هنا، وأنا سكنت من هنا- من مطار الدوحة عملت للكل Save asهيومان، ومشيت
بالمناسبة ليه الأولاد ما يعملوا للبنات Save وبس، ليه إلا Save as، وعنونة يلاقيها ويتكلموا، وفي مدى الأنس كله تلاقيهو يفكّر، أعمل ليها Save as حبيبتي؟ Save as صديقتي؟ Save as أختي؟ Save as خطيبتي؟ والأكعب من دا كلو، Save as بنية عابرة، نتحسسها في الظلام، وخشمنا يلقط ليهو كم بوسة مستعجلين، ويغيب ما بينا فيما هو قادم من أيام ليه ما يكون دائماً Save as هيومان، وما بينهم دائماً يجري نيل
معاوية الطيب، شكراً يا صديقي في الغار، يا راعي تلك الاستضافة الأول، سأفتقدك وسأفتقد تلك الاستراحة والأنس الجميل،.. وتحياتي لرفيقيْ المنتدى محمد الربيع والحسن البكري،..
شكراً جزيلاً لمدام صدّيق عبد المنعم التي أكرمت البورداب جميعهم بليلة مورقة عن حق أبدع فيها أستاذنا السني والأخ عادل "أب جقادو"،.. اكتشفتُ في تلك الليلة أنّ لميلادي عيداً ويمكن الاحتفال به، وشكراً أيضاً لمعاوية الطيب، هنا وشكراً لمدام عبد الجليل "نادوس" ولمدام "أبو ساندرا" الغائبة، ولمدام محمد عثمان المسيكتابي،.. البيت بالطبع صاحبته المرأة، ولذلك هي من تُشكر،..
وأشكر كل من تفضّل علي برؤيته وقابلني محيياً في قلب القلب،.. أشكركم جميعاً من المطار إلى المطار،.. بدون فرز
...
| |
|
|
|
|
|
|
|