الديوم الشرقية :{ مهبط الوعي والفن وقلعة نضال ومرتع جمال }

Quote: ازيك يا عمدة ، انت ذكرت ناس يا سلام ، قعر بابور ، وفيصل السر واسامة السر ومعمر الصغير والناس اللي مشت الامارات من زمن بدري وانا عرفتك انت دفعة احمد عثمان (سيحة ) وما تعمل انك صغير وبلي وصلعتي دي زهج من الدنيا والهواء اللي شفناهو في الخرطوم خلي ابو ساندرا يقول ليك هواء الخرطوم كيف ، طبعا نحن صغار كنا بنجي للساحة الشعبية وفريق حلتنا الامل وكانوا فيهو الحرفيين الجد ، خلف الله باقرين وسيحة وبشري عيسي والدودة واولاد عم صديق وعماد عثمان ونصرالدين عبدالحي وعلي بيك اسرع جناح في الديم اها كنا ناس الربيع ديل ننفش ريشهم ، والمساء يجيك قعر بابور يقلد في الحلة ياسسسسسلام وطبعا في الساحة كان كع بتاع التسالي ، بجيكم راجع ، يا عمدة انا الدفعة اللي وراء رضا طوالي

غايتو صلاح قال لي مصطفى ده الزين سغيرون .. دفعة عمك سهل بتاع الدكان العلي التُرب ..
خلف الله باقرين ( خلف القون ) .. لحق السمحين , بقى يشبه عمك تنقو .. شغال هنا في الدوحة صيدلي .
بشرى عيسى ده آخر مرة قالوا طلع مظاهرة بالغلط و منها كبّر اللفة .
أخونا عبدالله " قعر بابور " قالو بقى حنفولي و استكان .. ما تسألني مدير شنو .
نصرالدين عبدالحي و علي بيك ديل هسه أجدادنا القدماء .
و بعدين فريق الأمل شنو البيطقطق يا أخو ؟؟ و ينفش ريش منو ؟
طوالي كنتو ملطشين و راجعين معلقين كداراتكم في الكتف بالشرابات المقدودة و ريحتها بيض بيض .
نصر الدين عتوقة يطنطن و سيحة يكمل كيس سعوط من الساحة لغاية الحجر .. يا فارات

الفاضل جعفر قون المؤتمر أب لسان فالت ( و هو ود خالتنا بالمناسبة ) ..
مرة سألني في واحدة من إجازاته من السعودية :
بالله معني كيف ؟ قلت ليهو : تمااام .
: أها و فيصل عبدالسلام ؟ ..
قلنا : تمام .
و داك الزول أب راص ممصوص داك .. صلاح العم ؟ ..
قلت ليهو : ميه ميه .
قال لي : بالله الناس ديل مباريننا من زمن " علي زيرق كَتّال الكلاب " شكيتهم علي الله
هسع أنا و إنت و صلاح عبدالله و الجلاكين القلتهم ديل و سيد العقار الأنحنا فيهو ده .. كلنا بقينا علي زيرق .
ما عندك شوية كلاب نكتّلهم ليك ؟؟

تحياتي يا مصطفى ..