|
نعى اليم ...... سودانيز اون لاين دوت كم تحتسب الزميل فتحي البحيري فى رحمه الله
وداعاً فتحي البحيري
|
|
 Re: الديوم الشرقية :{ مهبط الوعي والفن وقلعة نضال ومرتع جمال } (Re: أبو ساندرا)
|
كان اسمها مدرسة ( الزبالة ) لان حيطانها مبنية من الطين والبياض بدل أسمنت زبالة ... وكنا نكتب في كراساتنا ( مدرسة الديم شرق (1) الابتدائية بنين ) ... في طرف المدرسة كان يقبع العم التوم وبجواره سوط عنج وكومر ... سوط العنج طبعاً للجلد والكومر لمطاردتنا ، كنا اشقياء بمعني الكلمة ومن الانشطة المحببة جدا لنا أن نضع حقن الملاريا في منقد دكان اللوز الذي يمتاز بزحمة مبالغ فيها لجودة فوله ونبعد مسافة لنري اثر الانفجارات للحقن علي الناس وبعدها تتم المطارده من المغفور له عم التوم ... وكان وقعت الله معاك ... في سنه خامسة ابتدائي جاتنا أستاذة علي درجة من الجمال وفي واحد مننا كتب له خطاب غرام وكده ( شفتو الديامة بحبو من بدري كيف ) .. لا اتذكر من بالتحديد كاتب الخطاب ولا استبعد أن اكون أنا عموما هذه المعلمة طلعت بت عم التوم وما كنا خايفين منها هي بل خايفين تكلم لنا ابوها( شفتو الخوف دا ) ... وعموما اكتشفنا انها لا تقل قدرة في بث الرعب عن ابيها فقد جلدت كل الفصل ليس بسبب كتابة الخطاب وانما للاخطاء الاملائية الموجودة به
| |
 
|
|
|
|
|
|
|
|
Re: الديوم الشرقية :{ مهبط الوعي والفن وقلعة نضال ومرتع جمال } (Re: أبو ساندرا)
|
ابو ساندرا
أختها الاكبر منها كانت برضو معلمة وصعبة شديد عموما تخرجنا من الديم شرق (1) الابتدائية الي الديوم المتوسطة وكانت مركز انتخابات لو بتتذكر ، وبحكم وجودي كطالب في الصف الثالث واعمل في الدعاية الانتخابية كنت اقف قرب الذين جاءوا للتصويت وادعو للتصويت لمرشحي وكان أن قابلت الاخت الاكبر فقلت لها طبعا حاتصوتي للغزالة ( وبالمناسبة هي اتحادية ) وانا عارف كده ،،، فقالت لي الغزالة رمز منو ؟؟ وكانت تعلم الاجابة ... فقلت لها نقد ،، دعتني ( تنقدك الجدادة ) .. تلقاك انت الكتبت الجواب لاختي ...
| |
|
|
|
|
|
|
|
|
|
Re: الديوم الشرقية :{ مهبط الوعي والفن وقلعة نضال ومرتع جمال } (Re: مدثر محمد ادم)
|
سلام يا شباب ..
رحم الله أستاذ عبد الصادق .
كان ذلك في زمان موغل في القدم , و الدنيا خريف , مدرسة الديم شرق ( 1 ) الإبتدائية بنين .. مدرسة الزبالة . لم تتوقف الأمطار من صباحات الله .. فعام الحوش , و كانت الفصول بسقوفها الجملون المصنوع من مادة الإسبستس مليئة بالثقوب , و ذاك ما جعل حالنا داخلها كحال المستجير من الرمضاء بالنار , و العم ميرغني رحمه الله يحضر قفة السندوتشات إلى داخل الفصول حيث لا مجال للخروج تحت سيل الماء المنهمر ...
كنت في الصف الثالث الإبتدائي , رحمه الله أستاذ عبدالصادق كان يدرس لنا مادة " الحساب " , و كان أن جلس في البرندة خارج مكتب الأساتذة الذي يتوسط الفصول و أمرنا بالإصطفاف للتصحيح , و خلف رجلاً على رجل و في حجره سوط العنج التخين . جاء دوري فطفق يصحح و أنا أرقبه متوجساً و يقتلني الرعب , ثم فجأة ألقى إلي بالقنبلة و في صوت حاد و قاطع : ده شنو ؟؟ إتنين في واحد بكم ؟؟ ألجمني السؤال و رهبة الموقف و صوته القاطع .. فتلعثمت . قال : إتكلم .. إتنين في واحد بكم يا بجم , قلت و أمري لله و دون تفكير : إتنين في واحد بتلاتة . هوى على وجهي بصفعة زلزلتني , ثم كرر السؤال : بتلاته ؟ .. علمتك كده أنا ؟؟ إتنين في واحد بكم .. بسرعة ؟ .. قلت : بواحد ؟؟؟ فتنرفز الرجل رحمه الله و صفعني بأضرط من سابقه .. : يا بهيم , إتنين في واحد بكم قبل ما أشدك هنا هسع ؟ .. أنطق !! قلت و أنا في حال لا يعلم بها إلا الله : بإتنين ؟؟ صفعني ثالثة و هو يزمجر : بتسألني ولا بتجاوب ؟ و توالى علي غضبه رحمه الله و صب عليّ سوط عذاب ..
لم أنجح في الرياضيات منذ ذلك التاريخ ..
و ظلت لغة الأرقام - و الحمد الله - لغزاً عندي و أحاجي و طلاسم و أبوابا مغلقة , و كان أن توجتها بإحرازي ست درجات نظيفات لمادة الرياضيات في إمتحان الشهادة السودانية ( و أظنها منحت لي عطية مزين لنظافة الورقة ) .
رحم الله أستاذي عبدالصادق , فقد كان حريصاً على أن يصنع منا رجالا و أهل علم و ثقافة .
و التحية لأساتذتي الأجلاء .. و زملائي الذين ما زالوا يقيمون في القلب و الذاكرة ..
و للمدرسة الشامخة التي خرجت خيرة رجالات الديم و البلد , و ظلت الأولى و المتميزة لسنوات طويلة , و التي كنا نفاخر بها و نتباهى و نغيظ بها ناس الختمية و الديم شرق ( 2 ) بحسباننا أفضل و أشطر و أعلى منهم , كيف لا .. و نحن طلبة الديم شرق ( 1 ) الأولية بنين .
طارق الأمين ..
تعال و أحكي عن بلاويك و التلاتة أردية التي كنت تلبسها كل يوم سبت ( يوم التسميع العالمي )  .
| |
|
|
|
|
|
|
|
|
|
Re: الديوم الشرقية :{ مهبط الوعي والفن وقلعة نضال ومرتع جمال } (Re: Emad Abdulla)
|
ياإلهى ! هذه صوره طبق الأصل من العباسيه أمدرمان !
نفس الملامح والشبه .. المواقف , والأحداث , والشخصيات ,
وأى شىْء !.. حتى لما كتب عماد عبدالله , عن أخينا الجميل فيصل ساولين ,
خلته يتكلم عن , عبدالقادر ديجانقو , أو ( كار ) النعيم ودالكاوبوى !
نفس النسيج , نفس المزيج .. وهى ذاتها نفس المكونات لذلك المكان الفريد!
هل ياترى أن العباسيه, هى ديوم أمدرمان ؟! أم أن الديوم,هى عباسيه أخرى بالخرطوم ؟!
أبوساندرا .. عماد وصلاح عبدالله .. وكل الديامه والعباسيين , سلام .
| |
|
|
|
|
|
|
|
|
|
Re: الديوم الشرقية :{ مهبط الوعي والفن وقلعة نضال ومرتع جمال } (Re: مامون أحمد إبراهيم)
|
Quote: حتى لما كتب عماد عبدالله , عن أخينا الجميل فيصل ساولين ,
خلته يتكلم عن , عبدالقادر ديجانقو , أو ( كار ) النعيم ودالكاوبوى !
|
الاخ مامون سلا مات من حلتك التانية الديم
احنا عندنا غرام شديد مع ناس العباسية
يا احنا في العباسية يا اما هم في الديم
والغريبة احنا رضو عندنا عبد القادر ديجانقو
ساكن جن مدرسة المايقوما واحد اوجامع سف
وكان عقيد في الاحتياطي المركزي زمن دكتاتورية
نميري
وتسلم يا زول يارائع وواصل معانا بعتبارك ديامي
بالتجنس
| |
|
|
|
|
|
|
|
|
|
Re: الديوم الشرقية :{ مهبط الوعي والفن وقلعة نضال ومرتع جمال } (Re: مامون أحمد إبراهيم)
|
Quote: أعزائى وأبناء حلتى الأخرى ,
مدثر الغالى , , وأبو البنات الأغلى ,
ألف كفاره وسلامتك , وكل الديوم والعباسيه كرامتك .
أنا بفتكر تاريخياً أنو فى عوامل, وأرض مشتركه, وحس مشترك مابين كل
أحياء أمدرمان والخرطوم القديمه .
هنالك وجه شبه كبير فى ما بين هذه الأحياء ! وياريت لو نوثق لى حالة توأمه مابين
الديوم والعباسيه ! |
الرائع مامون مرحب بيك والتوامة قائمة من بدري
| |
|
|
|
|
|
|
|
|
|
بدون فرز (Re: أبو ساندرا)
|
الديم الوطن العلم الناس الرحمة التربية صحي الما بربيهو البيت الشارع بربيهو لا تحتاج وانت من جهلتك الى كثير من الوقت لتتعلم الحياة فقط امشي في شوارعه واستظل تحت اصغر نيماية يزاحم زير وكلب ظلها اجغم من الكوز المربوط بي سلك جغمتين واكشح الباقي على الكلب واجلس واستمع الليلة اللاعبين منو في الساحة؟ والله ناس الزهرة امل الفن راشيهم راشيهم. اها يا مان امبارح حمادة سلطان فكاها فينا يا مان قال لي عندنا رجلة من باقي الغدا قمنا كبينا القنزب كلو في اللحسة وهي زاتا طلعت بيش الظاهر تامنا بي حنبك مغلي المهم حاجة امنة ادتنا شوية شوربة مجانا مسحنا بيها سدورنا قمنا الصباح كابسنا موية الفول من علي زنون, يرتفع صوت من الراديو يغالط الحراية والسموم مختارااااات الاحد ويبدا الشعار بين فيروز والجيلاني الواثق, الشمس حمرت وضل النيماية يضيق بالفرد شي سياسة وشي جكس والكتير من الاجتماعيات.
فجاءة تخرج جنازة تنظر لمن في الامام فتعرف من اي بيت يتسع النيماية اجر وصلي حتى مقابر فاروق.
الجمعات لذيذة سوق الديم ام فتفت بتخلص فيهو الساعة سبعة صباحا لكن ما عليك, انت بس اشتهي دار كول تركين مرس ملحوة قراصة عصيدة دخن؟ اقرب ناس خبت الباب وخش, هذا هو الديم وطن بحاله يتجدد صبح ومساء من اكبر منك فهو زيو زي استاذ محمد سليمان وصلاح اخوي اجلس لديه وانصت وارتقي, مافي زول صعلوق كل الناس شفوت كلهم قدوة بتاع السجارة بي سيجارتو ويظل اخيك الناصح الكبير وكذلك ملك الكاسات يعلمك ان لا تقرب الخمر الا دمثا كريما حسبك ان النار تستثني الكرماء.
كل الناس تدفعك دفعا للقراءة والقراية مافي زول سفيه ساكت, ياخي والله انا ما بقدر اقرا لي كتاب, يوجهونك ابدا بي قصة مدينتين, يلحقونها لك بالحرب والسلام والبؤساء ثم تجد نفسك قد التهمت انا كارنينا ولم يعد للوليتا وجود. تتشكل المعرفة ديستوفسكي وتتسائل عن عبقريته فلا تعرفها الا بعد ان تقرا عن ثورة الديسمبريين, تكتشف بنفسك صبر فلورينتنو اريثا على فيرمينا داثا وتعجب لعلم الكوليرا الاصفر تغوص مع جورج امادو وغوركا وتقف كثيرا عندما يصلب المسيح من جديد. تبقى راجل محترم مافي زول صعلوق ولا سفيه, كنا صغارا نتشفتن تفتح زراير القميص ما عدا الاخيرة ونحاكي معلم نون نوووون فكي مجنون. كولو اتعلمناهو الا الكورة والغنا, الديامي سمح اذا صاحب واذا ناسب واذا اعتلى وتكس يرجع
| |
|
|
|
|
|
|
|
|
|
Re: الديوم الشرقية :{ مهبط الوعي والفن وقلعة نضال ومرتع جمال } (Re: أبو ساندرا)
|
ديامى جديد
المولد : ديم التعايشة
المنزل : مقاصد نادى التعايشة ( منزل العائلة )
المرحلة الابتدائية : مدرسة السجانة المزدوجة ( مدرسة النور )
المرحلة المتوسطة : مدرسة الديوم
الان السكن : الصحافة غرب
اشياء فى الذاكرة : مطعم عمى عبدو فى نادى التعايشة ،
محطة التعاون ، الترزية فضل الله وهلالى والتاج ، حاجة كلتوم قطاعة الخشوم
امير ود الحجة ، مبارك النجار ، مدرسة الزبالة اولاد والزبالة بنات
مدرسة الراعى الصالح ومدرسة الشباب طلاب كبار فى الحجم والاعمار وفوضى
ومظاهرات ولم ينجح احد ، دكان السر ، ترب بلاع ، مدرسة الجهاد بنات
بيت ود اب رأس ، عبدالرحمن سعدية ، عربية المشروبات بتاعت شركة لــويــزو
عربية التلج
| |
|
|
|
|
|
|
|
|
|
Re: الديوم الشرقية :{ مهبط الوعي والفن وقلعة نضال ومرتع جمال } (Re: أبو ساندرا)
|
لقد تم اعتقال حسن عثمان وبما انه مختفي فالقصة شكلها وراها قصة ، نفس وكدا .. وثبت ذلك فجاء ضابط أمن يسأل عن جمال عبد الرحمن ؟؟؟ ويتم اذاعة الخبر بسرعة فائقة في البيوت .. مساحة المنزل بالديم متين متر مربع وحي 3 اتش اي فيه 48 منزل وكل احياء الديم كذلك بس البيوت النواصي بتكون اكبر عشان التخطيط كما اظن ( عبد الرحمن بركات لو انا غلطان صححني ) ... يعني لو همست بتعبر همستك لي سابع بيت .. سيتم اعتقال جمال لا ما ممكن وتبتكر نساء الحي اجمل اشكال المقاومة وقوفا مع عزة ام جمال ومع جمال
( ود قلبه طيب
نزيه الخصال
نبيه في دروسه
يحب المشائخ
يبوس العيال
متي حد ينده
يا شاطر تعال
يحط ابتسامة
تزيد الجلال
يجيلك مهذب
يجواب السؤال ) ....
كل واحدة جابت عيالها وسريعا امتلأت جنينة خالة عزة .. والجنينة سوار صغير قدام المنازل يستخدم كمتنفس للبيت وكلما اقترب ضابط الامن صاحت النساء والشفع كواريك شديدة وفي هذه اللحظات تم اخفاء الوثائق الاكثر خطورة من بيت ناس جمال لي بيت عطا المنان ابو حسن وميرغني ولي بيت عثمان عبد الغني وهكذا ارتبك ضابط الامن ( والله حقو يكتب اعتقال جمال في مذكراته ) ... وعندما لم تفلح محاولاته استدعي كميات من العسكر وقد وصلوا سريعا واظن انهم من مدرسة الشرطة ،،، خوفا علي الاطفال من رائحة البمبان استجاب جمال لضابط الامن وخرج بعد ان اقنع التجمع الاطفالي والنسائي بأنه سيعود ،،، بكت هدي خطبيته فزجرها واعتلت خالة عزة المنصة وخطبت : امشي معاهم لا سرقت لا خنت وانفعلت رشاد ميرغني بزغرودة طويلة فبادله جمع النساء الزغاريد وانطلق هتاف واحد كان : ( ارجل منهم .. ارجل منهم ) ...
وسمعنا بعدها ان كل الديامة الذين اعتقلوا بعد جمال كانت مشكلة ضابط الامن معهم في مشكلة واحدة فيسأل اي معتقل انت ما زغردوا لك ليه ؟؟؟ وزغردوا لجمال عبد الرحمن ؟؟
| |
|
|
|
|
|
|
|
|
 Re: الديوم الشرقية :{ مهبط الوعي والفن وقلعة نضال ومرتع جمال } (Re: أبو ساندرا)
|
( نجوم ترحل عن سماء الديم)
فقدالديم في الاسبوع الماضي نجمين من المع نجومها في مجال كرة القدم
رحل:
- بكري هيمت: (معلم جمرة)
-----------------------------------------
أفضل لاعب وسط شهدته الملاعب،كان يمتاز بالتمريرات المتقنه والتحكم المدهش في الكرة،
عرفته الملاعب ،لاعب فذ ومدرب قدير، وكذلك عرفته امسيات الديم مبدعا لاتكون للحفلات طعم ان لم يرقص فيها
معلم جمرة رقصته المشهورة التي كان يكوي فيها حساده واصحابه على السواء.
-خضر وراق:
-----------------------------------------
الجناح الطيارة ،اللاعب الموهوب ،الرجل الساعي بين الناس بالقفشه والنكته
اللهم ربي اسألك ان ترحمهم وتسكنهم فسيح جناتك وتلهم آلهم وذويهم واصدقائهم اكثر الصبر والسلوان
| |
|
|
|
|
|
|
|
|
|
Re: الديوم الشرقية :{ مهبط الوعي والفن وقلعة نضال ومرتع جمال } (Re: أبو ساندرا)
|
ابوساندرا سلامات ليك ولي كل الديامه في المبر
الحمدالله وصلت الديم من يوم الخميس الفات بعد غياب دام اربعة سنين
ولقيت الحال اتغير وانا لسه في حالت ىاندهاش ماعارف انا في الديم
ولا اثيوبيا
المهم سوف اغيب شوية من المنبر لاحدي ما ارتب اموري وبحول اداخل
فيالبوست بتاع الديم كل ما لقيت فرصة
الملاحظة في الديم انو اتغير شديد من جميع النواحي حتى تركيبت
السكان اتغيرت
وسلام لاحدي ما اجئ راجع ليكم
تيف تيف
| |
|
|
|
|
|
|
|
|
|
Re: الديوم الشرقية :{ مهبط الوعي والفن وقلعة نضال ومرتع جمال } (Re: أبو ساندرا)
|
كتب مدثر محمد آدم :
| Quote: الحمدالله وصلت الديم من يوم الخميس الفات بعد غياب دام اربعة سنين |
بركة الوصلت طيب وياريت تكون لقيت الناس كلهم بخير
عامل كراعك اللينة دي مليت لبلد موية
لازم تمشي دكان جون في سوق الديم وتجيب لينا الأخبار والشمارات
وفتش عن محمد عبدالرحيم قرني وسلم لي عليهو
وماتنسى تقعد شوية مع سعادة الفريق كمال علي صالح وأفتح ليه البوست
وأطلب منو التعليق فهو رجل عارف عن الديم وعساكرو وضباطو والكورنجية
والفنانين
| |
|
|
|
|
|
|
|
|
|
Re: الديوم الشرقية :{ مهبط الوعي والفن وقلعة نضال ومرتع جمال } (Re: أبو ساندرا)
|
الأخ مدثر
ألف حمدلله على السلامة وبلغ تحياتي للديامة بدون فرز
وخلى بالك من نفسك يا حبيب ,,,,,,,,
-----------------------------------------
أشرف طه عمل نائم وفتح للديم وحنانو زاتو
يا مكيش تعال أفتح نيران فى الامة دى تعال أتنفس شوية تعال شم ريحة
الفحم المبلول بالمطر وتعال خوج ميدان الهلال حمادة سلطان منتظرك
جنب عادل شروم. وبربر تحت النيمة بحنك مع شرف تعال للديم وناسو الحنان
كفكف بنطلونك عبد الواحد وشيل سفنجتل منتظرنك يا مكيش,,,
| |
|
|
|
|
|
|
|
|
|
Re: الديوم الشرقية :{ مهبط الوعي والفن وقلعة نضال ومرتع جمال } (Re: احمد معتصم الطيب)
|
لا اظن ان هناك منطقة حبها اهلها كما الديم ،والديم فى رأى يستحق ذلك الحب لآن تفاصيل الحياة اليومية فيه مفعمه بالجمال حتى المشاكل فيها نكهة خاصة وكذلك الكورة والسياسية والفن وحتى الحب والتواصل الاجتماعى فى الفرح والكره باختصار كل شى فى الديم جميل حتى شوارعه الضيقة المليئة بالحفر ،وبما ان الديامى يكشف عن هويته الديامية حتى قبل السودانية فىأى مكان يذهب اليه تجدنى الا ان تكون اولى مشاركتى فى معشوقى الاول الديم الوطن ، وسوف احاول ان احكى معكم عن كل شئ من الغالى لحجازى ومن بيوت الحجر حتى السوق الشعبى عن الساحة وسوق الديم عن شخصيات الديم .
اكيد الديم اتغير يامدثر وبخارى لكن حبنا للديم اكبر من هذا التغير .
وما تعلمناه فى الديم من وفاء يخلينا عشان الديم نجيب الغيم .
اخوانى فى الديم ارجوا ان يكون هذا البوست تواصل للديامة من داخل الديم وجميع انحاء العالم حتى نوفى دين الديم علينا .
تحياتى ليكم جميعا وشكرا ابو ساندرا على هذا البوست الوطن واكيد حا اكون من سكانه .
معتز جعفر الركن الشمالى الغربى للساحة الشعبية ,هولندا مؤقتا.
| |
|
|
|
|
|
|
|
|
|
Re: الديوم الشرقية :{ مهبط الوعي والفن وقلعة نضال ومرتع جمال } (Re: أبو ساندرا)
|
الرائع ابوساندرا سلام
الديم استقبلني بالامطار ولسع ما حمت كل الديم
قرني ماشائفو قاعد قدام الشجرة الجنب بيتم
بس اروق حبه واشوف قرني وكمال علي صالح
واكو ود المرحوم عمر عبده جاز الديم
وكل الديامه
احمد المعتصم لسه ميدان الاتحاد غارق
بحيرة بس
وقبيل الصباح لقيت حماده سلطان راسو شيب
وقول لي اشرف طه ما تبيع القضية
الصديق معتز جعفر سلامات قالو جيت السودان
ورجعت
شنو الركن الشمال الغربي ما تقول حلة الشعراب وبس
انا اسع في النت الجنب حلتكم معاي جدو وبحبح وبدوي
مهدي
وبعدين ماشئ لي ناس كمبلاوي وابدراع وسفيان جنب بيت بها الدين
ومرحب بيك اضافه في البوست
واكتب عن فريق الكفاح وانت كنت سكرتير نادي الكفاح وعن نادي
الديوم الشرقية وعمك الهادي
وبجيكم راجع
تيف تيف
| |
|
|
|
|
|
|
|
|
|
Re: الديوم الشرقية :{ مهبط الوعي والفن وقلعة نضال ومرتع جمال } (Re: أبو ساندرا)
|
فقد اليم
عبدالرحمن عبدون حماد في ذمة الله
_______________________________________
إنتقل اليوم إلى رحمة الله الكابتن عبدالرحمن عبدون { النجاروت }
أحد أعمدة الديم خاصة في مجال الرياضة
كان صوته الجهور الممتليء حماس وفتوة يأتينا في منازلنا
عصرآ أوان تمرين فريق النصر تحت قيادة وإشراف الكوتش عبدالرحمن عبدون
بالأمس رحل خدنه وصديقه ونسيبه استاذنا صلاح إسماعيل
وكأني بعبدالرحمن لم يطب له المقام بعد رحيل صلاح فإلتحق به سريعآ
الراحل إبن المربي الجليل عبدون حماد وشقيق الإستاذ هاشم عبدون
والإستاذة نعمات عبدون أرملة أستاذ صلاح إسماعيل
واللواء الفاضل عبدون واللواء أحمد عبدون
التعازي موصولة لهم جميعآ وللاعزاء محمد وجمال إسماعيل وسميرة إسماعيل
والتعازي لكل الرياضيين في الديم خاصة أسرة فريق النصر وفريق الرعد
ولأصدقاء الفقيد في سوق الديم وفي الحيي ومنهم أحمد عثمان { حسن }
وعبدالمنعم محمد حامد عشرة ولآل تلاتين ، ومصطفى ودالكندو وفيصل تاج السر
نسأل الله أن يتغمد الفقيد العزيز بواسع رحمته وأن يجعل الجنة مثواه
| |
|
|
|
|
|
|
|
|
|
Re: الديوم الشرقية :{ مهبط الوعي والفن وقلعة نضال ومرتع جمال } (Re: مدثر محمد ادم)
|
رحم الله عبدالرحمن عبدون حماد واسكنه الجنة وكل موتى الديم والمسلمين اجمعين .
تحياتى يا ديامة .
مدثر الشين حمدالله على السلامة بس اوعا تكون خليت مجاهد براهو فى القاهرة ، سألت منك فى زيارتى للسودان وكنت عاوز ارجع عن طريق مصر عشان اقابل الديامة هناك لكن ربك ماسهل ورجعت عن طريق سوريا ، طبعا اكيد حاتكون لقيت الديم اتغير وكمية من الحبش لكن يا تف تيف الحبش ديل حبايبنا واهلنا عشان كده اوصيكم بهم خير .
احاول ان ارتب افكارى حتى أحكى عن الساحة والكورة ونادى الديوم الشرقية ودكان كمبال والعطلة تحت عمارة الاصيل وبشرى العوير وقعر بابور وحسن ود الجنة وكمال كاسات والجكس والحفلات والشوعيين وسينما النيلين ورابطة السجانة واستاذ مرتضى وعرقلة وحاجات كمية كده من الديم .
تحياتى للديايمة فردا فردا .
| |
|
|
|
|
|
|
|
|
|
Re: الديوم الشرقية :{ مهبط الوعي والفن وقلعة نضال ومرتع جمال } (Re: أبو ساندرا)
|
Sent : Saturday, August 25, 2007 9:32 AM
To : [email protected]
Subject : الاخ عبد الرحمن بركات
| | | Inbox
لا حولة ولا قوة الا بالله
رحم الله عبد الرحمن عبدون والتعازي الحارة لاسرته الكريمة وللأخ / احمد عبدون
تعتبر اسرة عبدون من اهم معالم الديم التعليمية والاجتماعية ...
عندما قرأت الخبر تذكرت ( الشجرة )والتى كانت معلم بارز فكل من يسال عن احد من الديم
كنا نوجهه الي هؤلاء الاساتذه لانهم كانوا يعرفون اهل الديم فرداً فرداً
ومن رواد الشجرة ...المرحوم على طمبل والمرحوم عبد الرحمن وصلاح اسماعيل ...
وغيرهم من الآباء والاخوة الكرام ...
رحمة بنا يا زمن الارتحال فقد اخذت منا الكثير
ود أحمد
ديامى .. ياباني
| |
|
|
|
|
|
|
|
|
|
الا رحم الله موتانا وغفر لهم (Re: أبو ساندرا)
|
الا رحم الله موتانا وغفر لهم ولقد احزنني موت المعلم صلاح اسماعيل الرجل القامة ولعلك تذكر ايام الاعداد للانتخابات يا بركات وكراسة التصنيف والتي تعد بلا شك عمل جبار حيث صنفت العمارات وحي الزهور والديم بمربعاته بيتا بيتا وفردا فردا وفي اثناء ذلك كان السؤال الحائر من هو مرشح الحزب؟ فذهب كل منا بتوقعه حتى مغربية ذلك اليوم وفي النادي المقابل لبيتكم عند البيارة حين قدم لنا المرحوم الاستاذ نقد مرشحا , زاد ذلك من الهمة والنشاط توج بفوز مرشح الدائرة. كما لا انسى وقفته ايام السيول والامطار بمجلس شعبي الديوم حين كنا حتى ساعات الصباح الاولى نوزع مواد الاغاثة والخيم ـوالكهربة قاطعة والخوج للركب ـ كانت اجمل الايام تعلمنا منه الصبر والجدية له الرحمة والمغفرة
| |
|
|
|
|
|
|
|
|
|
Re: الديوم الشرقية :{ مهبط الوعي والفن وقلعة نضال ومرتع جمال } (Re: أبو ساندرا)
|
Sent : Tuesday, August 28, 2007 12:50 AM
To : [email protected]
Subject : السلام عليكم
| | | Inbox
الاخ العزيز /عبد الرحمن
لاحولة ولا قوة الا بالله
لم اقرا خبر وفاة ( معلم جمرة ) الا الآن ...
كانت لي معه مواقف طريفة بدكان جون وخاصة عندما يأتى بعد العصر متوجها للحلة الجديدة
وبمجرد القاءه للسلام علي الحضور كانت التعليقات تنطلق نحوه من شخصي
ومعاوية خليفه وحسن طحنية وبدوى ولو كان بين الحضور حسن فضل الله ( حسن النجار )
يسمع ضحكنا الذي في آخر السوق ...
كان المرحوم من عشاق الفنان الكبير ابراهيم عوض ولا يرضي فيه اى كلمة
و لا نفوت هذه الفرصة حين حضوره فكنا ننتقد ابراهيم عوض ... وكان رده ساخراً وضاحكاً في نفس الوقت
رحمهم الله جميعاُ
على طمبل
استاذي / النور يعقوب
الاخ / كمال حبيب الله
الاستاذ / صلاح اسماعيل
عبد الرحمن عبدون
اللهم اسكن موتانا فسيح جناتك
ود أحمد / ديامي
| |
|
|
|
|
|
|
| |
خالد العبيد
أبو ساندرا
bukhary el amin
طارق جبريل
Emad Abdulla
مامون أحمد إبراهيم
احمد معتصم الطيب
ASHRAF TAHA
عبد الدائم سيد أحمد
معتز جعفر الحسن
ابراهيم عدلان
Deng
فيس بوك
تويتر
انستقرام
يوتيوب
بنتيريست