Re: يوم هتفت عطبرة "كلنا محمود" (Re: Omer Abdalla)
دعونا الآن نسمع رواية الأستاذ محمود عن نشأت الحركة الوطنية .. ابتداءا بمؤتمر الخريجين .. وذلك من حديثه الذي أدلي به لمندوبي معهد الدراسات الأفريقة والأسيوية (جامعة الخرطوم) في منتصف السبعينات: مؤتمر الخريجين كان نتيجة طبيعية للوعى الشمل الخريجين بعد إضراب طلبة كلية غردون .. حصل تحول كبير فى الحقيقة .. كان الإنسان البمشى المدارس قبل إضراب الطلبة أو قل قبل الأزمة الإقتصادية بتاعة سنة 29/30/31 كان الشىء الطبيعى أنه الإنسان البمشى المدارس بيطلع موظف .. لمن جات الأزمة أصبح عندنا نوع من المتعلميين ما بجدوا فرصة فى الوظايف .. بل الحقيقة أنه مش الحكومة ما كانت بتشغل الخريجين بس ، كانت برضو بتفصل بنوع من الإقتصاد بعض الموظفين العندها .. دى جعلت نوع من الوعى ونوع من التذمر إن شئتوا وجد تعبيره فى مواجهة الإنجليز .. مؤتمر الخريجين الى حد كبير استلف من المؤتمر العام فى الهند .. الفكرة أيامها ديك كانت قايمة فى الهند قومة كبيرة وظهر اسم غاندى – وقبله كان ظاهر – لكنه ظهر فى الفترة ديك ظهور كبير واسم نهرو وحركة التصفيات البقوموا بيها الهنود فى مواجهة الإستعمار البريطانى ، فاقترح واحد من كبار الخريجين ، أحمد خير ، فى الجمعية الأدبية فى مدنى ، أنو الخريجين السودانيين يعملو مؤتمر عام ليبلور نشاطهم ويجعلهم فى مواجهة الإستعمار قوة فعالة .. المؤتمر واجه إعتراض من الإستعمار بمعنى أنو الخريجين موظفين للحكومة وموظفى الحكومة ليس من حقهم أن يعملوا فى السياسة والأفندية المنضويين تحت لواء مؤتمر الخريجين مش هم البيمثلوا السودان ، بيمثل السودان زعماء العشائر وزعماء الدين .. الصورة دى اتصعدت فى مواجهة الإستعمار لغاية سنة 42 عندما أقروا رؤساء الدول الحليفة: بريطانيا وأمريكا و فرنسا وروسيا والصين الوطنية ما سمى بوثيقة الأطلنطى ، وكانت بتدعو إلى إعطاء الدول المستعمرة حق تقرير المصير ودا كان معمول كدعاية حربية ليقنعوا الناس اللى الاستعمار مهيمن عليهم ومواردهم يمكن كان تستعمل لتغذية الجيوش ولمساعدة نشاط الحرب أنو عندهم نصيب فى الحرب لما تنتهى فكانت وثيقة الأطلنطى بعثت فى الحركة الوطنية فى بداية مؤتمر الخريجين نشاط جديد ، وتقدمو بوثيقة للحكومة .. لكن المستر يوقول ، كان السكرتير الإدارى وقتها سنة 42 ، فرد الوثيقية دى بدون ما ينظر فيها ، أو هكذا زعم .. لأنو السودانيين الخريجين ما بمثلوا مصالح السودان ، يتكلموا بى اسم السودان زى ما قلنا – فيما قالوه هم – زعماء العشائر وزعماء الدين .. دى صعدت الحركة لتبدأ الأحزاب السياسية .. قبلها مؤتمر الخريجين كان ببدأ المعارضات من الإنجليز بعدم الإعتراف بيه بل التهديد بأنه كل موظف فى المؤتمر يمكن أن يصله جواب ليختار بين أن يكون فى المؤتمر أو أن يفصل من وظيفته – أما أن يخرج من العمل السياسى ضد الدولة أو يعرض وظيفته للخطر .. كان النشاط الى حد كبير منحصر فيما سمى بيوم التعليم ، ونشأت المدارس الأهلية فى الوكت داك نشوء سريع لنشاط الخريجين فى جمع الأموال لنشر التعليم .. وذكرنا قبيلك أنو فى وسط الأزمة الإنجليز خفضوا المدارس من مدرسة وسطى كاملة أربعة فصول عملوها فصلين ، تآخد سنة وتغيب سنة ، فدا أعان على أنو الناس مضطرين لتعليم أولادهم ينجحوا يوم التعليم نجاح كبير فنشأت المدارس الأهلية بصورة كبيرة جدا .. أفتكر أنو مؤتمر الخريجين ما خرج عن مساره لأنو أصلو ماساب السياسة لكن فى كل وكت كان بوسع قاعدة المتعلمين بنشر التعليم بالصورة دى لعله يصل الى اليوم اليكون الوعى منتشر بصورة أوسع ، فى سنة 42 حصل التحول الكبير بخروج الأحزاب السياسية عن مؤتمر الخريجين .. الحقيقة كان الصراع داخل المؤتمر صراع متبلور حول الأنصار والختمية .. كان الصراع على مناصب مؤتمر الخريجين قائماته تظهر بصراع بين العضوية البتنتسب للختمية والعضوية البتنتسب للأنصار ، كان عنده جمعيته العامة من 60 والمجلس التنفيذى من 15 وكان الصراع محتدم بالصورة دى .. وخروج الأحزاب من المؤتمر هو نفس الصورة .. خرج الختمية والأنصار ، وكان الأنصار هم الاستقلاليين وكان الختمية هم الإتحاديين. ... مؤتمر الخريجين زى ما قلنا مشى بى اتجاهو المشى فيه وخرجت منه الأحزاب لتحمل الإستعمار على احترام الحركة الوطنية اللهى المتعلمين لابد أنهم يكونوا هم البتكلمو باسم السودان .. خرجت الأحزاب ، وزى ما قلنا الختمية والأنصار ، الأحزاب الإتحادية كلها كانت كتيرة لكن بترجع لأصل واحد ، راعيها السيد على الميرغنى ، هم الختمية .. الأحزاب التانية كانت كتيرة برضو وبترجع لأصل واحد ، هم الأنصار ، راعيها السيد عبد الرحمن المهدى .. فكان اتجاه الأحزاب المنضوية تحت طائفة الختمية أنه يكون فى نوع من العلاقة مع مصر ، إتحاد أو وحدة بعضهم بقول ، اندماج ، أشياء زى دى .. وحزب الأمة – الحزب الإستقلالى كان متجه لى ألا تكون عنده أى علاقة بمصر ، تحت الكلام دا ، أن تكون عنده علاقة بالانجليز .. وهو بيعتقد أنو الانجليز مافى خطر كبير منهم على السودان لأنهم فى يوم من الأيام بيرحلوا ، لكن المصريين فى خطر كبير منهم لأنهم عندهم مطمع قديم بل الحقيقة هم بيعتبروا السودان أصلو تابع ليهم ، أصلو بتاعهم ، وهو مجالهم الحيوى ، وعندهم مصالح اقتصادية مادية فيه ، دا يجعل خطرهم كبير .. ولذلك بنفس الروح اللى كانوا بيها الإتحاديين عايزين يستعينوا بالمصريين على الإنجليز ، كانوا الإستقلاليين عايزين يستعينوا بالإنجليز على المصريين .. المسألة دى ، كان فى همس بدور يجوز ليهو ما يبررو ، أنه من المحتمل أنه الإنجليز ينصبوا السيد عبد الرحمن ملك على السودان ، ودى بطبيعة الحال ، بذكر الناس عن المهدية والحالة ديك ، كان فى نفور كبير جدا منها .. لكن كان انقسام الحركة على أى حال بين جانب مع الإنجليز وجانب مع المصريين واضح وضوح شديد ، حتى لمن سنة 46 – فى مارس 46 مشى وفد الأحزاب لمصر ، لأنه كان النقراشى عايز يعرض قضية وادى النيل على هيئة الأمم المتحدة فى * كانوا هم عايزين يدوهو السند اللى يستطيع أن يتكلم بيهو باسم السودانيين مع المصريين .. فقام وفد على رأسه أزهرى * معاهو برضو الإستقلاليين مشوا .. لمن مشوا هناك ، المصريين ما كان عندهم رغبة فى احترام الإستقلاليين بالمرة ، زى الأساءوا معاملتهم بصورة خشنة كدة ، ظاهرة .. الإتحاديين ، كانوا المصريين بيعتبروهم برضو وسيلة لأن يتكلموا بى اسمهم ، لكن هم فى الحقيقة ما عايزين يدوا السودان أى فرصة ، خصوصا فى الأيام دى – أيام ناس النقراشى وصدقى باشا ، معروفة حكاية صدقى باشا وكلامه عن السيادة اللى جابا للمصريين على السودانيين .. فى أثناء تعاون الإتحاديين و الإستقلاليين فى مصر عملوا وثيقة – وثيقة تربطهم مع بعض ويكون عملهم موحد على أساسها ، قالوا غرضهم أنو السودان يكون مستقل فى تحالف مع بريطانيا واتحاد مع مصر ، أو لعله الصورة: اتحاد مع مصر وتحالف مع برطانيا .. دا كان ماهو جديد بالنسبة للفريقين ، كان من هنا ديل بحترموا الانجليز ، ديل بحترموا المصريين .. ... (عدل بواسطة Omer Abdalla on 05-17-2005, 07:17 AM)

العنوان	الكاتب	Date
يوم هتفت عطبرة "كلنا محمود"	Omer Abdalla	05-14-05, 06:08 PM
Re: يوم هتفت عطبرة "كلنا محمود"	Hussein Mallasi	05-15-05, 01:00 AM
Re: يوم هتفت عطبرة "كلنا محمود"	ناذر محمد الخليفة	05-15-05, 06:19 AM
Re: يوم هتفت عطبرة "كلنا محمود"	هاشم نوريت	05-15-05, 06:24 AM
Re: يوم هتفت عطبرة "كلنا محمود"	ناذر محمد الخليفة	05-15-05, 07:07 AM
Re: يوم هتفت عطبرة "كلنا محمود"	Omer Abdalla	05-15-05, 07:29 AM
Re: يوم هتفت عطبرة "كلنا محمود"	Hussein Mallasi	05-15-05, 07:34 AM
Re: يوم هتفت عطبرة "كلنا محمود"	هاشم نوريت	05-15-05, 07:34 AM
Re: يوم هتفت عطبرة "كلنا محمود"	Omer Abdalla	05-15-05, 10:08 AM
Re: يوم هتفت عطبرة "كلنا محمود"	Omer Abdalla	05-15-05, 10:22 AM
Re: يوم هتفت عطبرة "كلنا محمود"	omar ali	05-15-05, 10:25 AM
Re: يوم هتفت عطبرة "كلنا محمود"	Omer Abdalla	05-15-05, 01:39 PM
Re: يوم هتفت عطبرة "كلنا محمود"	Yasir Elsharif	05-15-05, 06:17 PM
Re: يوم هتفت عطبرة "كلنا محمود"	Omer Abdalla	05-15-05, 08:48 PM
Re: يوم هتفت عطبرة "كلنا محمود"	Omer Abdalla	05-16-05, 04:53 PM
Re: يوم هتفت عطبرة "كلنا محمود"	هشام مدنى	10-21-05, 06:00 AM
Re: يوم هتفت عطبرة "كلنا محمود"	Abureesh	10-21-05, 08:21 AM
Re: يوم هتفت عطبرة "كلنا محمود"	Sabri Elshareef	12-22-05, 10:47 PM

[رد على الموضوع]

صفحة 1 „‰ 1: << 1 >>

احدث عناوين سودانيز اون لاين الان

اراء حرة و مقالات	Latest Posts in English Forum
Articles and Views	اخر المواضيع فى المنبر العام
News and Press Releases	اخبار و بيانات

الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة

About Us
Contact Us
About Sudanese Online

اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين

News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums

If you're looking to submit News,Video,a Press Release or or Article please feel free to send it to [email protected]