|
|
 صدي للجنون** محمد النور كبر
|
صدي للجنون
صوت للحنين
احتمالات للفرح الغايب في المسافة ..!
صدى (1) ....
** ** **
الحاصل .. انى عرفتك جواى
ما.. مرتبه..حسيتك حقيقه..
وشاترت فيك.. الاعيب القدر..
نضحت بيكـ.. وكت المخاض..
لكنى معاك..
زمنى كان..
ديمة مسكون بسر الحيض..
صوت(1).....
** ** **
يفاجؤنى..
صوتك..عبر حرفك المتفرد..
صدى(2).....
** ** **
كنت عارف انى..
ما ح القاك..
ماكنت ديمه ..
بكفر بالصبح..
مديتك جواى ..
امل الفجر ..
ندى الفجر ..
وهتفت بيك .. في كل الشوارع الخاوية .!
صوت (2)...
** ** **
حرفك المتفرد
يكسر هادية الانتظار
فانزف حتى اراك
شيئا من الالق والدهشة العامرة ..
صدى (3) ...
** ** **
رسمتك جواى ..
مارست فيك ...
انفصام ذاتى...
المعتقة برؤاك..
كنت حاضرة قريب منى
وكت اخاف المطرة ..
واقع في الطين..
قريب منى ..
لم ازعل من الاعيب الوطن الغبار..
اتهجسك .. في خاطرى
واخاصب ضو حروفك
امشاج الحنين جواى حية
مسقية بضي عيونك
صوت(3)
** ** **
اقرأ فيك حنين السنين
التى ارهقتنى..
صدى (4)
** ** **
ما أظنك بتعرفي ..
انو حضورك طاقة هايله
ما بيقدر يحتملها
كتف الزمن
قولي ...
انك بتخافي تشوفي تقاسيم الانكسار
في خطاى
قولي انو ..
بتخافي يفضحك ضباب شوقك
ما قادر
اتخيلك .. وكت اللقاء..
صوت (4) ...
** ** **
ما زلت حتى الان
في مرحلت عدم .. التصديق ..
صدى (5)...
** ** **
احتجتك مره
عشان امارس فيك..
حفلة تسكع
طفت بكل الشوارع..
والمدينة كانت مسكونة ..
بي سر بهاك
اشوفك..
في كل الحوارى ..
وصورتك طاله ..
من كل باب ..
عرفتك في ملامح .. شفع ..
بيلعبوا .. وسط الشوارع
ناديتك ..
يازوله .. ها
انقطع معاى زمن الحضور
فارقنى سر حضرتك..
صوت (5)....
** ** **
هل انت موجود
بهذا الديار حقاً ...؟
ام ...
صدى (6)...
** ** **
صدقيني
علمــــــــــنى
الزمان دايماً
انى ابقي .. نبوءة كاذبه ..
كنت بحاورك
وانتى قاعدة جنبي
بينى وبين تباريح الوطن السفاله
بينـــــــــى .... و بيـــــــن
سؤالاتي اللجوجه
حاولت استوعبك
واراهن بيك جور زمانى الزايف
لقيت ايقاعى ممجوج
يسافر بعيد عن صباح وشك
عبارتك معاى
مواعيد .. صدق .. وفرح دافق
بقيتي معاى مبتوره
زى كل الامانى الجواى
صوحت
ما داير اشوفك
لو كان رفضي ليك بأختيارى
مبتورة
جزاير حرفك
ومعاها .. بتبتر حداى
احتمال انى افهمك ..
يا زوله .. ها ..
صوت (6)....
** ** **
حقيقة الفرح يملؤني بشده..
صدى (7).....
** ** **
خفت من شكل الهزيمه
حقيقة خفت كتير
انى القاك..
اتهزم بفيض شوقي
وما اقدر استوعبك..
صوت (7)...
** ** **
في البدء
كانت الكلمه ..
وستظل ........
صدى ( ...
** ** **
اهـ .. منك يانزيف اللغات المتبرجه
وملفوفة
بتوب الوحل
اهـ .. منك يا كلام يا خسيس
ياوهم مابيقدر يطيق
شكل فرحى بلون الاميره
صدقيني ، هــــى..
الكلمة نفس الأله فوق الارض..
وهـــى فيض الرب..
صدق الرب ...
شرف الرب ...
صوت (....
** ** **
الى موعد اللقيا ..
صدى (9)...
** ** **
حكمتك يا زمان ..
هو .. انا لقيتك عشان .. أودعك ..
صوت (9) ...
** ** **
لدى ..
لكى الكثير ... فعجل..
صدى (10)...
** ** **
اكتبي عندك
انى اتهذمت وقنعت منك ..
اكتبي عندك
انى زفة مراثي
لونت بوح الغنا..
وبقت سر في خاطر الغيب
لابدور القاك
ولا بدور احسك دفقة فرح جواى..
براك
عارفة....
انى تهت في زمن الحدود
واتبرجت حداى مفاهيم الاحتلال
وبقيت وطن تحت خطاك
متوسد هموم
وبشكي من بعد العبير
براك
عارفة .. انى لا بقدر اشوفك
ولا بقدر..
اختزل نبض السنين.. البيك نور
صوت (10)....
** ** **
ابداً ...
صدى (11)....
** ** **
حاولت اهتف ضدك
وفعلا هتفت
حاصرتنى شرطة الشوق
وبسطت قدام خطاى
احتمال واحد ..
وبقيت غصباً عني
بتهجسك
صرخت فيك
يا شقية هوى
كفاك امرقى من دمى ..
كنت .. في كل لحظة..
بتتعمقي في جواى
تتجزرى..
في مخابئ ذاتى البعيده..
غريبة ..!
قبلت أنك تكونى .. في جواى نبضه..
لكنك بقيتي ..
كل نبضي ...!
اتلونت بيك ..
وبديت قصة ايمانى بالرب من جديد
تليتك في ركعة الحرف الاولى ..
وسجدت في ضل حضورك..
واتشهدت بيك قدام الأله..
وصليتك
........ سهو ....
عمري..
اللى ..
فـــات...
صوت(11)....
** ** **
كــــاف ...
صــاد ...
صدى (12)...
** ** **
كن صادقاً
صدقتك..!
وصدقي معاك كان فوق اختيارى..
كــــــــأف ..... صــــــــــاد
كن .. صادحاً ..
صرخت .. وبليت .. وتر الكلام
بليل ضفايرك..
وعلمت العزارى
سر غناك
وهاجرت في دروب وجودك
لاكين ... ما لقيتك
ولسة نفس الحقيقة ..ما طل
عشانك احتملت المدينة الكافرة
وحاولت
اتصالح معاها .. وكت الغروب
صدى ..
اخير..
اقول..
ليك ..
حاجة ..
خليك ..
كده ..
ماتجى ..
خـــــــــــــــــــــــــالص ...!
|
|
 
|
|
|
|
|
|
|
 Re: صدي للجنون** محمد النور كبر (Re: rani)
|
مــات النهـار
وفي الافق دمـو رسـم لون الشفق..
حزن كتير داهـمني.
صـمت الـمسا بلل كل الـملامح والدروب..
نجـمة بزغت تقاوم غبار الزمن وترسم معـنى الوضوح.
سيل الكآبة غرقني..
قـمح الهـم شال خضار في بيادر الذات والقلب..
صورة بـكا..تشيل مني ملامح قصه منسيه
أكتب وعارف انو الحرف بيني بينك ماتت سكتو..
وحفنة مراصد تسد براءة الخـطى وشهقات الحنين..
بطاقات الود ضاعت..وعزي بلاك مفقود ..
انتي ياروح النبض ودفق الكلام..انتي يا عشق الصفا..
بلاك فارقني طهر الحضرة والتجلي ..
وصلوات حزني بترجع مرفوضة..
وفيك سري..فيني مـنك صدق الكلام والانفعال..
بتذكرك وبدور أعيش لحظة من غير مـا أتذكرك
فـي قلب الحـواري ،وكت بتوه خطـانا..
تجن الريـح..تفر تـوبك..وتتبعثر خصل فرعك..
تشتت بسـيماتك ضــي..
تنـمو الـمسافة غنـا..نـمة فرحة بالرعشة مروية..
ننسـى الكــون كلو..ونغيب في معارج النور والبـها
بتذكرك ،
وبدور أعيش لحظة من غير ما اتذكرك
سـرب البداية..حفنة سـلام..مشاوير البوح..
هـمسة تغزل جواي ملامح الندم على الزمن البفوت مسراع..
ضعت فيك ومشت فيني ملامحك السمحة..بقيت موبوء بيك..في صـمتي..في حـزني..
في مشـي خطــاي وسط الشوارع والضجيج..
مـسكون بيـك..وسـاكنة في نبضـي،
تيراب هواجـس وقسـوة لحظة تفاجـئني بالتذكار..
عينـيك نبع قولي ..
وهـمسـة "مشـتاقة" اخـر حروف الندا البتهـمني..
عقب ما اطوف وفيني مباهـجك ،مشاعل تفجر درب الخطـى بالنـور..
بتذكرك،.. وبدور اعيش لحظة من غير ما اتذكرك..
فـي عـمق الـمغيب بتوهـمك..
و أفيض حسرة، آهة وجع مسكوب فوق شـقى الجدران..
حـزمة تصـاوير تـظللني من هجـير لحظة فيها بتذكرك..
و أتقاسـمك ونسة شقى، فضلت تكلل دروب البـوح جـوانا..
بتأمـلك مـعاني..فيها براي بعاني..
و صعوبة تسـآل تـمرق من مرافي الشفاه
وتـموت في أرصفة السـكوت..و الخـوف..والنجيع..
بتـذكرك ، ..
وتعجـز شـفاي من قـولة حـروف بتحـمل في جوفها معـاني اسمك..
و أنقش في عيون الزمن مساحة للفرح والتأريخ
كنت مرة وعشت في الأزل..
ويوم ما اتولدت..اترسم فيني خيط من رؤاك ..
جيت لقيتك طفلة في حضن الـمدينه..
قلت ألعب معاك بالطـين،
قلـتي تلعبي معاي بنار الحزن..
ومـشيتي انتي في رحلة أبد.
مرسومة من بدء الزمن..
وبقيت وراك ، جـزيرة هـواجس..
فاقد الهوية والملامح
بـتذكـــرك ، وبدور لحظة من غير ما اتذكرك
محمد النور كـبر
| |
|
|
|
|
|
|
|
|
|
Re: صدي للجنون** محمد النور كبر (Re: rani)
|
رانـي ..العزيز ..حبابك
كتر خيرك على هذا الجهد..ولك وللأصدقاء هذا الكلام
حـزين..يا وجـع الـمفازة
ياخـيول
هـداها كتر الرحــيل
الشـموس البينا كانت
اللـيلة أغواها الـمقيل
و الزهور الحلوة صاحية
تتباهى بالعطر الثـميل
الخطوة منـي تاهت
خانت الحلم الجميل
والصدق جـوايا وافي
والفرح مـمتد كتيل
حـزين يا تعب النحوم
يا آهـه في الوجع الصهـيل
القـمر خاصـمني روح
والعطر فارق نبض الخـميل
الدروب حيرانة تبكي
تـسأل النجـم الدليـل
الحرف واقف مكتف
والدمع حزنان ذلـيل
حزين يا وجع الـمفازة
يا خيـول
هـداها كتر الرحـيل
ودمتم
كــبر
| |
|
|
|
|
|
|
| |
rani
AnwarKing
Kabar
doma
فيس بوك
تويتر
انستقرام
يوتيوب
بنتيريست