|
|
 وردي يغني للشاعرة أسماء الجنيد
|
مبروك للأخت الشاعرة المبدعة سوما
فقد اختار الفنان العبقري وردي مجموعة من قصائدها ليتغنى ببعضها
وهذا نص الخبر الوارد في جريدة الوطن العمانية
=========
بعد إعجابه بقصائدها والطريقة التي تكتب بها
(وردي) يغني للشاعرة (أسماء الجنيد)
اختار الفنان محمد وردي مجموعة من القصائد للشاعرة السودانية المقيمة في السلطنة اسماء الجنيد وذلك لتقديمها قريبا ويقول وردي ان اختياره لاشعار اسماء الجنيد تم قبل ان يلتقي بها بعد ان سمع عنها وقرأ اشعارها ثم كان التعارف معها عبر شبكة المعلومات الدولية (الانترنت) حين كان في اميركا ويقول وردي انه وجد في الشعر الذي تكتبه فضاءات جديدة تتسم بالتلقائية والجرأة في آن واحد ولذلك استوقفتني قصيدتها واعجبتني الطريقة التي تكتب بها خاصة وان حضور الشاعرة السودانية في الاغنية مازال يكاد يكون غائبا وهذه الخطوة اعتقد انها ستحرك المشهد الشعري الغنائي وتفتح بابا واسعا للمرأة الشاعرة كيما تسهم بشكل اكثر فاعلية في حركة تطوير الاغنية السودانية.
ويضيف الفنان محمد وردي بأن شعر اسماء الجنيد مكتوب بسجية مريحة تجعل قصائدها تصل بسرعة للمتلقي ودون اي تعقيدات وهذا هو السهل الممتع الذي لا بد ان تتسم به القصائد الغنائية كما ان قصيدتها متشبعة الى حد كبير بالتراث السوداني الاصيل حيث المفردة الشعرية تتأسس ضمن هذا التراث وحيث الصورة نفسها تستلهم موضوعها من هذا التراث ايضا.
واخيرا قال محمد وردي انه طلب من الشاعرة اسماء الجنيد ان ترسل له كل جديدها الشعري حتى يتواصل هذا التعاون بينهما وحثها على ان تكتب على ذات النسق الذي تكتب به لانه قريب جدا من اجوائه الشعرية التي تعود ان يقدمها في اغنياته.
ومن بين القصائد التي سيتغنى بها الفنان محمد وردي للشاعرة اسماء الجنيد قصيدة (بناجيلك وعز ترابك وسلام من بلد) التي يقول مطلعها :
سلام ..
اغرف من بحر الكلام ..
اغلا الحروف انسج سلام..
في ثوب موشح بالمحنة والوئام ..
واقلع من قيف الجرف شتلات غرام..
اجدع في الثوب القبيل ..
ارسم طيور فوق الغمام ..
حاضنه الحنين .. حاضنة الوله ..
شوق وابتسام..
وارسل تحايا معبقة بالمشاعر والهيام ..
مليانه بي ريق الاهل ..
نفس الاهل بتقول كلام .. وتقول سلام
www.alwatan.com/dailyhtml/culture.html#3
|
|
 
|
|
|
|
|
|
|
|
Re: وردي يغني للشاعرة أسماء الجنيد (Re: sympatico)
|
العزيز سمباتكو
دا لقاء مذهل فى ابداعه بين كلمات سومة الطالعة من مسامات الجوف السودانى بكل تلقائية و موهبة مطبوعة رويانة من رحيق العشق و زهراته التى تعرف مكامنها وحدها..و تأتينا بخلاصته سومة لا تكتب الشعر بل هى قصيدة ممتدة بلا رتابة تولد كل يوم من رحم الوطن الذى تحفظ صلته و فيه لذاته و فينا ابناء الرحم الكبير .... و وردى بكل انتقاءه لم يجد وسيلة لتخطى سومة المبدعة و الانسان و الاخت الحنون. اسعدتنى اشارة وردى للقاء الذى تعرف فيه على سومة فى البال طوك حيث كنت ضمن الحضور و كلى شوق لسماع الاعمال المشترك بينهما الحاملة لضمان الجودة مسبقا.
ودى
| |
|
|
|
|
|
|
|
|
|
Re: وردي يغني للشاعرة أسماء الجنيد (Re: نصار)
|
يا سومة ادروب مبسوط شديد و طوالي ختة الجبنة في النار و جاب الفنجان و قعد يقرء في الخبر الجميل ده و ربنا يوفقك يعني بعد ده ادروب حيموت من شراب الجبنة وهو يستمع لمحمد وردي.
شكر ليك يا سايباتكو على هذا الخبر الجميل و اتفضل اشرب معانا جبنة.
| |
|
|
|
|
|
|
|
|
|
Re: وردي يغني للشاعرة أسماء الجنيد (Re: aosman)
|
الاخ سامبتيكو
يا طائر الفرح الجميل
دائما نسمع منك الروائع
وهاهى القامة الفنية الشاعرة المبدعة
سوما تشرفنا بهذا الاختيار لقصائدها
ليتغنى بها فنان افريقيا الاول
الاستاذ محمد وردى
والاخ الرائع نصار
انت لم تكن شاهدا فقط ذلك اليوم بل انت الذى
ادرت ذلك اللقاء باقتدار كعادتك دائما
ومازالت ذكريات جلسة الاستاذ وردى معنا فى البال توك
ماثلة فى الذاكرة بكل جمالياتها
هل تذكر عندما دعوتونى مع مجموعة من المبدعين وبينهم الاستاذة سوما
للتفاكر فى كيفية ادارة تلك الجلسة..فاقترحت عليكم دعوة الشاعرة
احلى عانيدة لتكن بيننا..وبالفعل قمت بدعوتها..وعندما علمت
انه مطلوب منها المشاركة بقصائدها فى تلك الجلسة..اقترحت ان تتنازل
للشاعر المتفرد اسحاق الحلنقى
ولم نكن نعلم انه والدها..وفى اليوم الموعود ..شاركت الاستاذة سوما
بقصائدها الرائعة ..وادائها المتميز
وكذلك الشاعر الحلنقى,,فقد احتفى به الاستاذ وردى ..وكانت تلك الجلسة
بداية لتواصل فنى جديد بينهما.
افتقدنا تلك الجلسات الحميمية ..وغرفة تاجوج
تحتفى بالمبدعين..من الفنانين والشعراء
لكم الود ..والفرح يغمرنا لسماع هذه الاخبار المفرحة
فسوما تستاهل كل خير
ومازال الوطن جميلا بابناءه
مزيد من التألق والجمال
ولكم مودتى والمحبة
| |
|
|
|
|
|
|
|
|
|
Re: وردي يغني للشاعرة أسماء الجنيد (Re: sympatico)
|
الغالي سمباتيكو سلام كتييييير
هي يا يما جد لينا سومة تشعر لينا ووردي يغني لينا
بالمناسبة أنا شاعر بالشاعرة سومة (حلوة شاعر بالشاعرة دي مش؟؟؟) إنها مشغولة شديد وشايلة هم ناس كتار في السودان وفي الخليج وفي أمريكا يعني لو لقت يدها زي ما بقولوا هي بتبدع ونحن بنستمتع
تحياتي للجميع
| |
|
|
|
|
|
|
|
|
|
Re: وردي يغني للشاعرة أسماء الجنيد (Re: sympatico)
|
عشان نرجع نتحكر فى الواطه ونتربع ......
نحسب الفات من الايام نعد اصبع فوق اصبع ....
نخت العشره جمب العشرة نعد نجمع ....
نقول للداير الرجعه صمدنا خلاص وما بنخضع ...
ونقول للتائه مع الدنيا كفايه طمع ....
عشان نرجع نخر ساجدين نخر نركع ...
نسبح ديمه فى الرحمن وبى ايدينا نتضرع ...
نتوسد ليلنا صبر نتحزم نضم ايدينا نتشجع ...
بعد نرجع نشوف القمره يوم تطلع ..
نجوم ساطعات لقاء عشاق لعب شفع
ضفاف النيل والخضره جمال الخالق الابدع..
حبوبة تحجينا حكاوى السمحه من بلدى تتحلى بالصفات اجمع
وعن والدهميم وكريم يقوم باكريه يحش يزرع
وود حبوبه ديمه جسورلا يوم خاف ولا اتزعزع ..
وعن فارس دوام حارس لا دبابة لا مدفع ..
وبعد ارجع اكون سواح فى بلدى اشوف الكنت بيه بسمع ...
شرقنا سواكن الشامخه جمال سنكات ومصوع ..
وفى ضفاف القاش اقيف ارتاح وجبال توتيل هناك اروع ..
وسط بلدى جزيرة الخير عطاها وفير لا بتكل ولا بتقنع ..
وفى الخرطوم لقاء النيل زى عاشقين متعانقين من المنبع ..
شمال الفن من مروى منبع التاريخ والمرتع ..
حكاويهم شعر منسوج فى العايش والودع ..
غربنا جمال وراحة بال نطوف ونشوف ونستمتع ..
جنوبنا الحاضر الماضى بى خيراتو جاد ونفع
وبعد أرجع اعانق بلدى بى لهفه عين تفرح وعين تدمع ..
عين تفرح وعين تدمع ....
عين تفرح وعين تدمع .....
اسماء صديق الطيب الجنيد
سلطنة عمان مسقط 17/3/2002
حقا الشاعره اسماء مبدعه ولها انتاج فكري شعري ثر وهى تستحق وعن جداره ان يقدم لها وردي وعدد من الفنانين عدد من الاعمال فالتحيه لها,,,,,
| |
|
|
|
|
|
|
|
|
|
Re: وردي يغني للشاعرة أسماء الجنيد (Re: sympatico)
|
الف مبروك للمبدعة اسماء الجنيد ، ومزيد من الابدا ولقدام ، والتحية للاستاذ محمد وردي لانه يعطي مساحة لابداع المراة السودانية ونرجو ان تعم التجربة ويغني كل السودانيين بدفء حواء وكلام من القلب للقلب
وياريت سومة تنزل لينا شئ من كلماتهاليتعرف ناس البورد عليها لانه البيت الذي عليها ان تغرد فيه قبل كل شي
دقيقة عندي ليك مفاجاة
| |
|
|
|
|
|
|
|
|
 Re: وردي يغني للشاعرة أسماء الجنيد (Re: HOPEFUL)
|
سلام يا أهلنا ..
أولا لكم العتبى جميعا حتى ترضو لانقطاعي عنكم طيلة هذة ألمده .. وذلك نسبة للظروف القاسية اللومتنى معاكم ..
اخى العزيز سمابتيكو .. يا بطحاني من أهل الكرم
التحية ليك قدر جودك . والتحية ليك قدر المعاني النبيلة الساكناك. منذ أن عرفناك وأنت معطاء ودون مقابل .. ناكر للذات .. تعمل في الخفاء من اجل غيرك، صوتك مسموع من خلال يراعك المتميز .. ربنا يديك قدر ألجواك يا نبتة من عمق الوطن ..
العزيز نصار يا شامخ شموخ بلدي بكم انتم ومعكم كانت البداية وكنتم نعم الأخوان .. وقفتم وعبرتم عما يجول بخاطركم وأكثر .. شددتم من ا زرى .. سقيتم معي زرعي وكانت رعايتكم مخلصه كإخلاصكم المعهود.. ترعرع ونضج بنبعكم الصافي كصفاء نواياكم الطاهرة .. وكان القطف قطفكم فهنيئا لنا به جميعا تحت راية بلدي المعطاء ..
ادرووووب يا ولوووووف أنت بالكرم والجود موصو ووف .. وبالولف معروف .. التحية ليك قدر فرحتك المن عمق الجوف ..
بهديك فنجان جبنه بي هبها نه في قهوة تحت ضل قطيه .. مختوته في طبلية مضروبة بوهيه لبنيه وممسحة بي زيت عربيه
..مكشحه جمبك مويه مطره في شارع كسلا بالردمية ..دبايوا يا زول ..
منعم المرهف .. سلام يا شاعرنا العتيق .. يا طيب من اصل الطيبين .. حقيقة كانت أيام وليالي ملاح في غرف البال توك .. ليالي شعرية وأدبيه منارة بكلامكم وعباراتكم المن ريحة البلد ونفس الأهل .. وتلك ألليله في حضرة شاعرنا الحلنقى وأستاذنا وردى لن تنسى أبدا وحا تفضل منحوته في ذاكرتنا .. وأستاذنا وردى الله يطراه بالخير .في آخر لقاء به كان يذكر تلك ألليله ومعجب بها وبمن أداروها للغاية .. التحية ليك يا منعم ولكل من كان معنا في تلك ألليله وجزاكم الله ألف ألف خير ..
الجند ريه يا بت بلدي ألحنينه .. يديك ألف عافيه يا يمه ويديك قدر نيتك يا أم نيتة لبينه وصافية ..
إن شاء الله نفرح معاك في السمح الزى خصالك .. تسلمىى يا أحلا امانى يا سندسية..
المنصورى يستاهلك الخير يا يابا وبرية من ألعلقه .. يديك العافية يا شيخ المناصير .. ودعواتك بندورا بالكتير ..
كوستا يا ضل الأهل .. التحية ليك ولتعبيرك المكانتو أعلا من السحاب .. إن شاء ربنا يعلى مقامك ويطيب خاطرك يا أب خاطرا طيب ..
بدر الدين الحنين السمح مو شين .. أنا برضي شاعره بيك حنين ودميعاتك في طرف عينك .. بس ما تقوم هسه تنقطن لينا في الكلام ده وتمسحو قبال اصحابو ما يقروه لوووووووووووول .. بدر الدين التحية ليك غزيرة غزراة قصبنا وطااااااااااعمه أحلا من سكره ويديك العافية أبو ابواب ..
ألحبيبه الغالية بيان .. يا أصيله من بيت الكرم والضيفان .. يا بت أهل الخلاوى والقرآن ..
التحية ليك كيمان كيمان .. تغشاك وتشيل من نداك وتوزع للحبان .. شكرا كتير كتير وعرفان
تسلمي يا منبع الحنااااااان ..
الأخ إيهاب الطيب .. التحية ليك أنت يا رجل يا طيب .. وشكرا لي كلامك الطيب .. أتمنى ليك كل خير يا ود بلدي ..وكتر ألف خيرك على كل كلمه جميله كتبتها في حقي .أتمنى أن أكون عند حسن الظن دائما وربنا يوفقني .. دعواتكم هي سندي .. يديك العافية يا رب..
عشة بت امى فاطنة .. حباب اختى حباب ألقريبه المى بعيده .. تسلمي انتى يا رمز المرأة ألمكافحه .. يا صاحبة أنقى ضمير واكبر قلب .. وين المفاجأة يا عشة طال انتظارنا ليها .. تسلمي من تانى
تماضر يعظم شأنك ويعلا مكانك .. ويديك ألفى مرادك .. التحية ليك يا بت البلد قدر عز البلد .. وقدر طيبة البلد .. وأهل البلد .. ويحفظك من شر حاسد إذا حسد ..
هاله قوته شكرا على طلتك يا جميله .. والتحية من خلال طلتك لكل امرأة وكل سنه وانتى وهن جميعا بالف ألف خير .. شكرا حنينه يا هاله..
اخى وابن بلدي جمال عبد الرحمن ..
حبابك وحباب طلتك وجيتك يا ضى القبيلة الما بنطفي .. إن شاء الله تفرح بالسمح ونفرح معاك ..
ونفاخر بيك كل البلود يا دخرى الجدود ..
جمال شكرا خدار جروف... وتحية اكبر من كل الحروف ..
| |
|
|
|
|
|
|
| |
نصار
aosman
عبد المنعم سيد احمد
الجندرية
منصوري
بدرالدين شنا
bayan
Ehab Eltayeb
عشة بت فاطنة
Tumadir
HOPEFUL
فيس بوك
تويتر
انستقرام
يوتيوب
بنتيريست