|
Re: رسالة مفتوحة الي أسعد ابراهيم ..... (Re: ASAAD IBRAHIM)
|
عزيزي
أسعد
قلت لكم مرارا ..... ان الطوابير التي تمر في استعراض عيد الفطر والجلاء ... ( فتهتف النساء في النوافذ انبهارا ) ... لا تصنع انتصارا ....
قلت لك مرارا ليس في سيرتي أو سيرة بلدي ما يخجل ....
هانا الآن أمامك عار من كل ما يسترني ... ووعدتك ذات يوم أنني سوف اجيب علي كل اسئلتك ... وليتك سألتني عن اسم حبيبتي .. فقد كان الأمر أكثر سهولة ....
طوال الشهر الماضي وانا احاول عبثا ان امسح ضوئيا الصورة واكمل بقية معلوماتي لتعرف من أنا ... ووعدتك ان لو طال الزمن أو قصر سوف أوفي بوعدي فهانذا كاملا أمامك...
اسمي جعفر بشير محمد عمر
ميلادي 1971-1972 وما تستغرب لانو عندي تاريخين ميلاد بس لانو الوالدة لحدي هسي شغالة غلات مع ناس الاحصاء ... هم مصرين انو انا مولود في 72 وهي مصرة انو انا مولود في 71 .. لكن بيني وبينك كدة ... هي مرة قالت لي انها نست تاريخ ميلادي والغريبة حافظة الباقيين كلهم .... تقول شنو في جنس الفرز ده .... قلت ليها طيب طيب الغلات شنو مع ناس الاحصاء .... ادتني ليك عين لمن فهمت ليك .... كويس انو هي بتحب المعارك الجانبية ......... يعني يا خوي بالوراثة شايلين عكاكيزنا ... تجي تقول لي هارب من الحوار ....
لكن هي طبعا حكيمة جدا وما حسمت الموضوع عشان يا ابو السعود اكون مطالبك بي هديتين كل سنة واحدة في 5/10/1971 وواحدة في 5/3 /1972 .... عشان عيد ميلادي الماحصل احتفلت بيهو ولا عارف بعملوا فيهو شنو غير الشمعة البنفخوها دي .... اتخرجت من جامعة الخرطوم 1996 – 1997 برضة ما مفهومة لكن برضو الفرز حاصل ما بين تاريخ التخرج وتاريخ استلام الشهادة .... وما عارف مسالة فريز الكيمان دي متابعاني وين .... اصبر بس تاني جاياك ...
كنت يا سيدي كادر خطابي لمؤتمر الطلاب المستقلين ... بالجامعة .. انا من أهل العوض من الجزيرة من قرية اسمها فداسي الحليماب .... وسط بين مدني والحصاحيصا .... بس شفت يا سيدي هيثم الرشيد بتاع المريخ ده ولدنا ... هيثم منو رئيس التادي زاتو ولدنا واخوك مما ولدو شايل ( الخرقة الصفراء بي أحمر ) ... والمريخ ده يا خوي بنضارب فيهو عديل كدة ووالله تطلع هلالابي خلاص بعد كدة العجاجة حدها السماء ... هي اصلها قايمة ... بلا هلال بلا لمة ... معاك ...
اها تاني في شنو
ايوة
الاقامة الحالية في مدينة الرياض الجميلة ... واوعك تسمع لي كلام ناس ود شاموق وابوقوته ديل ... ديل اصلهم سوداويين لكن كان شفته الرياض بي عيوني حاتشوفها اجمل مدينة في العالم .. رياض تمبس وبنبن وصلاح غريبة واحمد ساطور وود قاسم واحمد سعيد ومحمد الشيخ والفقر ديل ناس ودشاموق وابو قوتة واشرف ادريس ... والاخوان الساحر والسنجك ... اها رايك شنو في جمال اكتر من كدة ... وبس اوقف ليك لحدي هنا عشان ما تمدد ليك اكتر تقوم تخلي .. اسمها شنو مدينتك دي ... المهم تخلي امريكا وتقول جايينا تعمل لينا ضيق هنا .... لكن ناس ود شاموق وابو قوتة ديل براهم بهابشو عشان كدة شايفنها ليك زي نهاية التاريخ .... بالمنسبة دي نظرية فوكوياما ولو عايز تتعرف علي الشخصية دي كويس قناة الجزيرة كانت عاملة معاهو لقاء قبل فترة مع يسري فودة ... احتمال يكونوا هسي نزلولهو علي الموقع بتاع القناة ... حوار جميل جدا ويستحق انو الواحد يقراهو عشرين مرة ..
الشغل الحالي ... مع شركة اسمها Horizon مدير قسم تقينايت الانترنت .... يادوب اسبوع لكن بيني وبينك شكلي باقي معاهم ... خلاص تعبنا من المساسقة والهتاف .... معقولة بس زول في ظرف سنتين يشتغل في 10 شركات ..... معقولة
في شنو تاني
الحالة المادية : والله دي زول بعرفها ليك مافي انا زاتي ما بعرفها الحالة الاجتماعية : Single نحمد الله علي نعمو ..... الحالة العاطفية : عشرة علاقات فاشلة ...وواحدة ناجحة مع البت البتغني ليك دي بس راجي لي فرصة ومليان بالامل بعد ده كله .... اخوك صنديد .... اكان ربك هون. .... اهي علاقة من طرف واحد لكن بتمشي الحال لحدي ما ربك يسترها معانا ....ولحدي هنا نقيف يا خوي ... اها قولك شنو .... اقدر قول حاجة ... تاني في شنو كمان انا عايز اكملو ليك كلو عشان تاني ما تسالني ... ياخي كرهتني الرياض والمدن المجاورة تقول كاتل لي روح ..... ملاحقني كدة .... والله الامريكان ديل غلتانين غلت كبير مفروض بس يدوك فرقة البحث عن بن لادن و صدام حتي بعد ما قبضوهو ... كان كفيتهم شر الجبال والوهاد وبرد افغانستان ده .... بالمناسبة كيف البرد عندكم ......
اها وبالله عليك الله اختار لي واحدة من الصور دي عشان اعلقها ليك في البروفايل واكمل ليك الباقي .... وكان الله مغضبها عليك اقدر أسالني تاتي .... والله كان يفرزونا بال ... ولا خليها لمن الاقيك
خلاص انتهينا
ولك هذه القصيدة ( استغلال طبعا عشان امرر الاسبوع عبر بوستاتك ) ... وانا قلت ما بشارك في حاجة مافيها شعر ولا غنا اها قلنا اخونا اسعد ده ما نغلت عليهو لكن برضو ندخله في الاسبوع بتاعنا ....
قصرت معاك
اما اذا كان هنالك ما تبقي من اسئلة ارجو اعفائي مؤقتا لانني قررت الصيام عن الحديث في مثل هذا الاسبوع
واهدي اليك القصيدة
يتبع
|
|
|
|
|
|
|
|
|