**** في حلتنا وتحت ضل نيمتنا ****

Quote: جيناكم يا حبايبنا

Quote: التحية لأستاذة / أسماء في حضرة اللغة العامية نرتاح قليلاً بكتاب قص مرفوع إلى عيونكم لتقرأ ، ونتحلل التحلل الأصغر : قلت : ـ إنتي والله صَعبة ...أنا ما كَنتَ قايلِك كِدة قالت : ـ كيف ، صغَيرة وما عِندي مُخ ! قلت : ـ أبداً أنا ما قلتَ كِدة ! قالت كمن يسخر : ـ لأ أحسن تقول ! قلت : ـ إنتي كل كلمة تغسِّليها وتَمصُريها لَمَن تكورِك . قالت : ـ أنا ما جِبتو من عِندي ..دة كلامك . المَفروض تَفَكِري في أي حاجة ، المُسلمات قابلة لإعادة النظر ... ياهو كلامك . قلت : ـ نعم ...لكن بدون مُبالغة . قالت : ـ أنا سألتك ، وما تغير الكَلام . قلت : ـ إنتِ ما سمعتي الشعراء يتبعهم ( القاوون ) قالت : ـ القاوون البياكلو ! قلت : ـ معقول الفصاحة دي فصاحة بِت في المرحلة الوسطى ! قالت بغضب حلو : ـ بِت ... إنتَ مُصِّر ؟ قلت : ـ طيب يا أستاذة ، نرجع للرياضيات ، سَمِعِي لي قوانين المُثلثات كلها قبل المسائل . قالت : ـ دة دَرِس ولا زَعل ؟ قلت : ـ الإتنين ... استمر الدرس طويلاً ..، وأحسنت الإستيعاب والإختبارات . فجأة بدأت : ـ شايفاك زي الزعلان ، قِراية سَاكِت ! لو زعلان من كلامِي بسحَبو . قلت : ـ البِحِب ما بِزعَل قالت : ـ يعني إنتَ بِتحِب ؟ ...مِسكِين .

Quote: إتكاءة علي جدار البوست. رُبُع سعيّد وعُمُر مديد للجميع. ود المدير...

(عدل بواسطة خالد أحمد شطة on 04-02-2011, 01:18 PM)

Quote: سوما سلام وضيوفكن سلام عليهن . . حسب الله ود خالي علي بقوم من بيتكن وابدا ادخل في بيوت الفريق بيت بيت حسب الله : سلام عليكن يا ناس البيت حسب الله : اهلا يا حسب الله ( براه يرد على نفسو لانو مستعجل ) لازم اكمل الفريق كلو حسب الله : اتفضل آ حسب الله ( والله صحي يا سوما براه كدي ) حسب الله : شكرا ماشي وهكذا دوليك ودلاليك تدق كل يوم اسع الزمن العلينا دا في زول بدخل من بيت لبيت للسلام فقط ؟ عليك الله في يا سوما اختي باقي انا طولت من البلد . . ات يا سوما ما اظنك حضرت الحفلة بالرتينة والبنات يغنن قبل الفنان : جابو السكسفون وعلو المكرفون وينو الليلة واي واحد داير اظهر امش ادي الرتينة كبستين تلاتة كف كف كفك كفففففف ويا داك يا الشارستون والجزمة نفس اللون او او او يا اللابس الشارسلتون او او او الجزمة نفسسسس اللون والاغنية دي لازم تكون معاها رقصة اسما الهورس والهورس دا كان قبلو الجيركي الجيركي جنني يا يا يا عاجبني شوالي الجابو لي خالي والشوال هو الفستان لمن كان لايدري . . سوما غايتو انا بحردك بوستيك دا ولا تخلي لي ولا كمان تخلي لي . . جاييك بحكايات عمنا الجارعودو وعمنا ود ابعجاجة وعمنا ود تور كنيزة والباع جملو وعيييييييييك حظي لقيت لي بوست واقع ومعاهو فقوسة

Quote: قال لي حتى الشافع البرسلوه بقى مافي تمشي الشارع تلقيهو صاااااااااني

Quote: بركة الجيت بركة الجيت ااااااااااااي عسل انت وبسكويت الف حمدا لله على السلامة

Quote: اسماء بت صديق حبابك عشره ياغالية قايتو اني ماشي لكرباب حببتي الدهيبة بت حمدالسيد. نجيب تيران بطيخ وبنشق الحله وبنجي علي نيمتك . وبعدين نونسك بكلام قالتا لي حبوبتي. بس شرافيها بوجعنها حار ماكملت الونسه. مودتي شــــــــــطة

Quote: معاويه المدير بله امشى دكان الخزين قول ليه معاوية قال ليك املالو الحقة دى تمباك.

Quote: غايتو يا سوما بوستيك ابو نيمة دا لو ضربت الراري لـ موسي الراجل وقعدنا ليك هنا حمالتك علي كان ترحلي الخرطوم وتقولي الناس لاشفتهن ولا بعرفهن وبعد كدا ما تقدري تدخلي في هذا البوست الا بترجمان

Quote: سوما الحنينة الله يزيدك محنة حبوبتي -المرحومة- خجيجة بت إساغ قالت عندها قريبها في أبو ظبط (أبوظبي) بس اتعديت على النيم بزاف (كما قال ود جبريل المغربي) في زمتك ما شفتي نيم بحر أبيض من الكوة دي وإنت عانية جزيرة أبا، وكيلك الله الميضنة رايحة صفق نيم.

Quote: سوما .........سلام مريت اتعطر.... كل حله فى السودان فيها نيمة.. كل نيمة فى السودان مسرح كبير.. مايكمل اللوحة فى النيمة وجود بعض الشخصيات التى تكاد تكون موجودة فى كل حلة.. النيمة واحدة من الاماكن المفضله بالنسبة لهم.. اولهم بله العولاق ذلك الانسان البسيط ناس يقولون انه عوير واخرين يقولون عنه انه من اهل الله...... الخاله ام حقين بت على كانت تبره ويقضى معظم وقته معها. يقاسمها مأكلها ومشربها ولا تتافف من ذلك بل لاتاكل حتى يأتى.. حلفت الخاله ام حقين ان بله مع انه لايعرف الى الحمام طريق ويقضى معظم يومه تحت شمس الله ان اسم رائحة عرق مافيه... كانت الخالة ام حقين الوحيده فى الحله التى تناديه بالبخيت .. وتساله من عروسه فيرد فلانه مع ضحكة رضا بلهاء وماهى الا ايام حتى تكون فلانه عروس الموسم، هذه الاسباب كافية ان تكون مؤشر صلاح لبله عندالخاله ام حقين،لذا تناديه بالبخيت.. بقية الحله تناديه بالعولاق.. عين بلة لاتخطىء الجمال ابدا يعرفه يحسه يذوب فيه فلذا اكثر ما تجده فى منازل العوائل ذوات الفتيات الاكثر جمالا فى الفريق.. وعندما ياتى الى النيمة يتخير موقع جلوسه بعناية فائقة.. نصيبه من مراسيل النيمه يكاد يكون 90%.. اسماء الجنيد تناديه بله ادفق موية القهوة دى فى الشمس عشان ماتلم الضبان.. معاويه المدير بله امشى دكان الخزين قول ليه معاوية قال ليك املالو الحقة دى تمباك. الفاتح بفتل ليه فى حبل يربطبو عتود، بله امسك راس الحبل ده من قدام.. بله هاك فرش الجير والجنزير ديل اجدعن بفوق الحيطة ديك يقول احدهم.. بله لايكل ولايمل ،يفعل كل ذلك بصبر نبى وخفة فراشة.. الذين لايرون فى مثل بله الا متخلفين عقليا اوعوراء هولاء ينظرون بعين غير ما الناسك وتلك بها غشاوة.. اسماء الجنيد ختى بله وامثاله فى بالك لاتنسوا ان تطعموهم وتكسوهم وتحسنوا اليهم ولاشك انك بانسانيتك التى اعرف تفعلين. من يدرى فقد نكون نحن الذين ناكل من رزقهم؟؟ اى ان الله يبعث لنا الرزق من اجل ان نحسن الى هولاء.. اسماء اعود لشخصية اخرى من شخيات النيمة لاحقا

Quote: تسف الجردقة يا بركة الشريفة، القالك منو انا قاعد اسف ؟؟؟ عارف يا ود الموج، زي بلة ده عندنا طارق تنقا. مرّة في اتبرا، الواطة سخانة مولعة نار، واتبرا عدمانة أسم التلجة. الناس يكفحو في الموية زي السليقة. في نسوان في الإسبتالية ينضمن قالن البلد ما فيها تلج، قام سمعن طارق تنقا،قالهن: التلج رااااقد ، هسع أكان دايرتلكن تلج أجيبلكن. قلن لو: إنت يا يابا تتبارك، بسراعك الحقنا بيهو. يا زول تنقا مشى جابلهن كمية بتاعت تلج. والنسوان قعدن يبردن في الموية ويشربن، ويدعن لتنقا وتلجن مطفح في المواعين. جا راجل سعلن من وين جابن التلج؟ قالن لو: جابو لينا الولد المبروك داك. الراجل مشى سأل تنقا، تنقا قال ليهو: تعال معاي التلج راااااقد. الراجل مشى مع تنقا، تنقا وداهو المشرحة. قالو: التلج ياهو دا!!! الراجل مشى للنسوان قالهن: الولد دا جابلكن التلج من المشرحة!!! يازول النسوان قامن يطرشن، ويسبن لتنقا، ويهرجن فوقوا. طارق تنقا قالهن: هو زاتو الزول ما ميّت، التلج دايربو شنو؟؟؟

Quote: الاخت الفاضلة اسماء نكت ليك بوستك من طقاطيق الارض , عشان يستاهل الصفحة الاولى بدل من الحشرة دة . تحياتى

Quote: الحنينة بت الحبوبات أسومة ، ياخى جننتى النيمة ذاتة، رجعتة من المدرسة بحمة شديدة حبوبتى الله يرحمه قالت لامى جيبى لى لبان ضكر ومخبر عشان البت دى بتكون معيونة، قامت قمتتنى بالبطانية والدخان يقول ياليل،وكانت بتقول ياعين ياعنية أخرجى من بلدنا ما بنديك ولدنا،أخرجى من بيوتنا ما بنديك بنوتنا عين الراجل فيها خناجر، عين الفتا قدت الواطة أن جات العشية قدر الوحشية وأن جات الصباح قدر المراح أخرجى أخرجى عين الصبى جنن غبى أخرجى من ديارنا ما بنديك عيالنا بعد شوية تسمعى طق طق جاية من المبخر ، تقوم حبوبتى تقول لامى شفتى العين مرقت وطرشقت طق طق سمعتها باأضانى البكرة بتاكلةالارضة دى، شفتى الكلام دا يابت الجنيد بتذكروا ذى الليلة ربنا يرحمك يا حبوبة بت علوب.

Quote: ناس محو اللمية،عمنا عبد الله شاف صورة الطربوش وجنبها حرف الطاء قام الأستاذ سأله بالطاء شنو؟ عاين زين لصورة الطربوش ،وأجاب: بالطاء ملوه قال الأستاذ وقد ضاق صدره: أحلنا الله من ناس بالطاء ملوه

Quote: وآحد من ظرفاء البلد علّق قائلاً: والله يا جماعة، الأكل الأكلوهو الجماعة ديل، القرنتية زآآآتها من ربنا خلقا ما أكلتو...

Quote: اها لقيتني كيف ؟

Quote: حبوبتي التومة يا بت الجنيد أختي، مره (امرأة) صعبة بالحيل، يهابها الصغير والكبير. زارها قريبا ليها مغترب ، سلمت عليه بفتور ومدت ليهو راس أصابعيها، وما قالت ليهو إتفضل ولا أقعد في العنقريب . قام براهو قعد في العنقريب، وقدر ما حاول يتكلم معاها، أبت تب تتكلم معاهو. مليانة منه شديد، عشرين سنة وهو مغترب وما شافت منه حاجة، لا هدية، ولا خميسات، وهو عارف نفسه مقصر معاها شديد. بي شيش دخّل إيدو في جيبه، ومرق ليهو خمشة قروش وراح عاصره ليها في إيدها، الساعة الـ نتلت إيدها وهاجت فيهو وقالت ليهو: القروش أنا ما دايراهن، أنا دايره الـ بشوفوه الناس !!!!. حاجة التومة يا بت الجنيد دايره ليها توب أبوقجيجة ولا رسالة لندن، دايره تقدل بيهو في بيت عرس، عشان لامن يقومن النسوان يسألنها : الرسول عليك يا حاجة التومة التوب السمح دا الجابو ليك منو؟ تقوم تنفش ريشه وتقول ليهن بافتخار: جابوا لي ولدي فلان ولد فلان، الله يبارك فيهو، إديهو واملأ إيديهو، العرف كيف يعز حبوبتو، عافية ورضيانه عليهو ،وبي جناح جبريل تغطيهو من راسو لي كرعيهو. شفت يا بت الجنيد حكمة وفهم حبوباتنا الكبار ديل كيف؟ والقروش اللي بغمتوهن للزول في إيدو ما في زول بجيب خبرن وعلمن عند الله وحده، صحي زي ما قالوا الدنيا سمع وشوف ..

Quote: محمود ود الحلال يلقاك دائما مبتسما يداعبك ويقول: "ما فيها ميتة"، فتدخل يدك في جيبك فتناوله قرشا، فيطير فرحا كأنما حاز الدنيا بحذافيرها، ويصيح بأعلا صوته "أنا شين، أنا كعب، أنا كاكا"، وينطلق كالريح مسرورا. كان يعمل حجارا في طاحون القرية، وكانت كل زينته في هذه الفانية "عراقي دمورية تحسبه خيشة" معفرة بالطحين، وسروال قصير كأنه "مخلاية علوق" ،وجهه ليس مدورا ولا مستطيلا ، كثير النتواءات، شعره مجعد " مفلفل"، ومفرق في شكل عقد صغيرة، كثقوب المنخل ، عيناه ضيقتان صغيرتان محمرتان، لا ترى له رموشا، حاجباه متعرجان أملسان ، وأذناه صغيرتان لهما قدرة فائقة على إلتقاط الصوت ولو كان همسا. كان كثير المزاح خاصة مع النساء، فإن قابل إحداهن في الطريق، وكانت فتاة، داعبها وقال : " إتي بعرسوك متين، البنات كلهن عروسهن، ما فضلت إلا إتي آآآ البايرة" فتضحك وتقول له: " أنا ما دايره لي عرس، لكن إنت خلاص كبرت وعجزت ولسه ما عرست" ، فيضحك ضحكته المميزة ويصيح " هها هها هها .. قالت أنا عجزّت، والله حكاية ، أنا شين، أنا كعب، أنا كاكا". كان صديقا للمعلمات بمدارس القرية، وكن يجدن في مزاحه متعة وسلوى خاصة اللائي فاتهن قطار الزواج، فكان يمازحهن ويقول: " إتي يالسمحة بتعرسيني" فتضحك وتقول: " هو أنا لاقية زيك وين"، فينبسط ويصيح كما يصيح الزين " حظك يا محمود بت عبد اللطيف قالت بتعرسك، أنا شين، أنا كعب، أنا كاكا". وكان يحسب لآخر الشهر ويعد له عدا، وقد اعتادت المعلمات تخصيص مبلغ له نهاية كل شهر. وكان مهتما بنقل أخبار القرية، فتسمعه يقول : فلان عاد من السفر بعد طول غياب، وفلانة خطبوها لفلان، البارح الحرامي سرق بقر حاج عبد الله ، وقالوا صرف المزارعين يوم الخميس، وناس أمحمد ود حاج أحمد رحلوا في بيتهم الجديد. وفي المساء، عندما يكون رائق المزاج، يأتيك صوته الغريد تحمله نسمات الصيف الباردة فيطربك ويشجيك : " أحرموني ولا تحرموني سنة الإسلام السلام"، فيدهشك جمال صوته وعذب أغانيه خاصة أغاني الحقيبة التي يحفظها عن ظهر قلب. وكان يسقي الناس من ماء النيل إن أصاب وابور القرية عطل ، فتراه حاملاً صفيحتان "جوز" على كتفه ،فيروي ظمأهم. وكان أكثر الناس حفظا للسانه عندما يهل شهر رمضان، فلا تسمع له صوتا ، فيترك المزاح، ويصوم بكل جوارحه ، وكان يصوم قبل الناس بيوم . وذات صباح لم يسمع الناس صوت محمود ، فانزعجوا، لم يمض وقت طويل ، وعلا صوت القرية بالبكاء والصراخ والنحيب وقد بلغهم خبر موته ، وقد صدمته سيارة رعناء كانت تسير بسرعة كالسهم فأردته قتيلا، وحرمت الناس من رجل محبوب كان يرسم الإبتسامة على شفاه الناس بمزاحه وعذب حديثه وجمال صوته، وأفل نجم كان يعد رمزا من رموز القرية الخالدين.

Quote: سومة بت العز ازيك والله فرقتك في مسقط كبيرة خلاص اسحاق ود اللمين

Quote: سلام وشوق سوما وضيوفها الاعزاء.. يا سوما النيمة كبرت وناسها كتار والتميز حاصل ودالموج ودالمدير بلة وتنقا ما شاء الله عليكم الله يغطيكم.. مودتي

Quote: يا جماعة اختونا الأيام دي برانا مدغوتين في الشغل. أها واقفين محتارين جا ولد الراجل لقاهم مشرورين راح يحنّس في تنقا عشان يخليهم يدخلوا، تنقا قال ليهو: يا آخ إنتو ما تشيلوا الفطيسة بتاعتكم دي من هنا عشان نحن نعرف نشوف شُغُلنا.

Quote: شميت ريحة القلوة وجيت غاشي الراكوبة وما لقيت فيها زول ! يا جماعة وين راحوا ناس الراكوبة وروادها؟ إن شاء الله خير

Quote: لأخت المبدعة / الأستاذة أسماء بت الشيخ الجنيد الأخوان المستظلون بظل الشجرة وزوارها السلام عليكم ورحمة الله وبركاته نجد في قرانا ومدننا، كثير من عباد الله الصالحين . يا الله دايرين نكتب عنهم وعن كراماتهم. الفكي أمحمّد ود الشيخ مدار حديثنا اليوم عن الفكي محمد "ود الشيخ" المصحف الذي يمشي على رجلين، وصاحب الفانوس الذي لا ينطفيء وحامل زجاجة زيت السمسم التي لا تفرغ أبداً ولا تفارقه مطلقاً . ذلكم الرجل الصالح مضى ولم نعرف عن سره الشيء الكثير، لجدير بالبحث والاهتمام. في قريتنا بركة وأسرار ، فهي قبلة العلماء والأولياء والصالحين، لو تذكروا فكي أحمد الذي كان مقيماً بالمسجد والمشهور بحبه "للشربات" ، وإبراهيم "بطيخ" الذي كان مولعاً بأكل البطيخ، وفكي آدم الذي كان يسكن في غرفة منزوية بالقرب من دكان العم خلف الله ود عوض الله . كثير من هذه الشخصيات تظهر ثم تختفي دون أن يحاول أحد سبر أغوارها لمعرفة أسرارها. كان الفكي محمد "ود الشيخ" رجلاً ذا صلاح بين والدليل على ذلك لسانه الذي لا يتوقف عن قراءة القرآن، إذ كان مصحفاً يمشي بين الناس، وكان نظره دائماً إلى أسفل، وما رأيته يوماً رافعاً رأسه إلى أعلى. كان يلقاك ويسألك أن تعطيه قرشاً، فإن أعطيته أكثر منه لا يأخذه ثم ينصرف. وكان كثير التجوال بالليل والناس نيام والفانوس العجيب الذي لاينطفيء في يده. ففانوسه هذا محير، فالمعروف عن الفانوس أنه لا يتحمل الحركة ، فلو حركته وأنت داخل الغرفة لا يلبث أن ينطفيء، إلا أن فانوس" ود الشيخ" يصمد أمام الرياح فلا ينطفيء. لو تأملنا وأمعنا النظر فيمن حولنا لوجدنا كثيراً من الأسرار التي لا يفطن إليها كثير من الناس، ولله في خلقه شئون.

Quote: تكية تحت ضُل نيمتنا... حكاية قرنتية كريمة: قالوا:... الله يكفينا شر قلنا، وقالوا... في كريمة ظهرت قرنتية. محّنت الناس مِحنة شديدة. كمّلت الجروف، وسدرت لافوق كمّلت المزروع في الحيضان، وكان في جرايد نخل مهدلات أكلتن. قش الواطة لحستو. البروس عدمتو نفااخة النار. التقاعدمتهاأسم الحبة، الفي بطن المطآمير برضو لحقتو. الناس حاولوا المستحيل للقبض عليها أو قتلها، لكن كلّ المحآولآت بآءت بالفشل. أعيان البلد عقدوا إجتماع طارئ وقرروا إرسال برقية لشـرطة أتـبـرا... وصلت البرقية, وردّت عليها شرطة أتبرا بإرسال إثنين شاويشية لكريمة. نُحآف زي المساويك. قُدآم من زمن الأردية والعِمم. كل وآحد دآرع في كتفو بُندقية أبوعشرة، كان علقها في كتفو اليمين يميّل معاها يمين، وكان علقها في كتفو الشمال يميّل معاها شمال. يآآآآالله شايلين روحهم وقالِيّن البنادق... وصلوا كريمة مواعيد الفطور. ناس البلد كلهم مرقوا لإستقبالهم فوق المشرع. ركبوهم فوق الحمير وزفوهم علي المضيفة. حليل المضيفة. ( المضيفة عبارة عن غرفة كبيرة, تبني في مكان منعزل غير بعيد من المنازل، وغالباً يبنيها ناس البلد عن طريق النفير. وهي مأوى لكل عابر سبيل. يتفقدها ناس البلد في مواعيد الطعام عسي أن يكون لجأ إليها عابر سبيل)... بعد فاصلوهم، وأخدوا خبارهم، الفطور وصل. الجاي بملاح دمعة بقُرآصة، والقُرآصتو مملحة بملاح ورق، والجاي بعمود، ووأحد بصحن كبير مغطي بكبديق، ووأحد كسرتو بايته مملحها بلسان طير، وشي مُلآح سبروق. فوقهم ناس البلد من كل صوب وحدب، بأصناف متعددة من الطعام. إنكسروا أكلوا تماااام، ومصمصوا أصابعينهم. بعد دآك وصل الشاى. كل وآحد الجماعة شرب تسعي. حقبوا بنادقهم، وبقو مندلين علي البحر... الوقت منتصف النهار، والسخآنة تقلي الحبة. النسوان قامن علي(التكلة) شدّن الحِلل فوق النار. الحِلل يجقجقن، والبلد صآآآنة، وصوت الفنان الكاشف منبعث من راديو قديم حجارته قديمة يحاول بصعوبة أن يوصل صوت الكاشف للسآمعين وهو يردد (حبيبي آه وقلبي تآه يوم الزيارة). الصاجات مولعة، والقراريص مردومة في الطُبآقة. القرية صآآآنة، والدخآخين منبعثة من التكلة ورواكيب العوآسة. قطع هذا الصمت صوت حُمار بدأ يهنِق أزعج قمريتين في رأس التمرة، طارن وركّن فوق شُدرة سُنُط، قوقن لفترة بسيطة، وسكتن لِيعود الهدوء يعم المكان، وبدأ صوت المذياع يظهر من جديد. ضعيّف، متقطع، والنعام آدم يردد(يقولوا لي يا مسكين عليك ظلم الحسن وحسين، يا دآب قل نوم العين). الجماعة مصنقرين فوق البحر والقرنتية ما منها خبر... حان موعد الغداء. نادوهم للمضيفة، وناس البلد يعجبوك. ردموا قرآريص، ومِلحآت تكفي يأجوج ومأجوج. الجماعة دفسوا تمآآآم، وشربوا الشاي. تآني كل واحد تسعى، وقاموا علي البحر. الجو أصبح معتدل نوعا ما. لحظات العصاري جميلة. النيل هادئ، وساكن لايُعكّر صفوه إلآ مركب حوآتة تعبث بمجاديفها خالقة فوضي في وسط السكون الممتد يين الضفاف. الجماعة حاقبين بنادقهم وقاعدين. البيناولهن سيجارة، البيناولهن سفة، واحد يديهم تمرآت. ترمس كبكبيق... الخ وكت الواطة بقت المغيرب نادوهم للشاى. شاي المغرب طبعاً شئ أساسي في البلد، وبلبن طبيعي. البرآريد، والكبابي، وقُداحة اللقيمآت ما تديك الدرب، وكل زول يحلف عليهن لآزم يضوقوا شاهيهو، وزلابيتو، وهم طبعاً أسكت كِب. ضربوا تمآآآم إندفسوا، وبقو مندلين علي البحر... بدأت حالة الرباط من جديد تحت ضوء القمر، الذي أطلّ في تلك الساعة من خلف النخيل جاعلاً جزء من ظلالها ممتد علي الرمال البيضاء، والجزء الآخر منعكس علي صفحة النهر. القمر متسلل للأمام، والظلآل متراجعة للخلف، والقرنتية لم تظهر بعد، حتي تناقصت الظلآل وإختفت، وأصبح القمر بلونه الفضي منعكس علي صفحة النهر. حان موعد العشاء... الجماعة حقبوا بنادقهم وبقوا سادرين. كمية غير عادية من الفطير باللبن، والقُرآصة بالسمن والسكر، وقُرآصة التمر كانت في إنتظارهم. ضربوا تمآآآم، وكل وآحد كتحلوا كورية لبن، ورقدوا ناموا... الصباح عيونهم فتحن فوق براريد الشاي وقُدآحة الزلآبية. لهطو تمآآآم ما قصّروا تب، وبقوا مندلين علي البحر. ثلاثة أيام بالتمام والكمال وهم علي هذه الحالة، والقرنتية كأنها ما وجدت ولا خُلقت... يوم في ساعة الغداء. البروش مفروشة، وعليها كمية من صواني الأكل عليها لاتجد كميتها في أجعص دكان عِدّة في البلد، والجماعة عرقانين، وشغالين عِدّة لهِط نضيييف. وآحد من ظرفاء البلد علّق قائلاً: والله يا جماعة، الأكل الأكلوهو الجماعة ديل، القرنتية زآآآتها من ربنا خلقا ما أكلتو... ود المدير...

Quote: من اجمل ما سمعت عن حكاوي امي نور الشام بت شيخ الجنيد رحمة الله عليها حبوبتي ام امي حكاويها التي تحكيها لنا بفخر وإعجاب عن والدها الشيخ الحاج ود الجنيد اذكر من اشهر قصصها وطبعا الحكاية زاتها فيها وصف وفيها تمثيل قالت لي يا بت سومي في حكم عن جدودنا إنتو ابواتكم واماتكم ما شافوها ولا سمعوا بيها قلت ليها زي شنو ؟ قالت لي جدك الحاج ود شيخ الجنيد نوموا قليل , كان غمض عيني شوية يصحا يتشهد ويستغفر ويجري يتوضأ قالت تسأله تقول لي يابا مالك صحيت ؟ يقول ليها الله ينعلوا إبليس بدور يشبعني نوم واقطع وضوي اها قالت لما يصحا صلاة الفجر للصلاة بعدها ما بنوم بقعد يقرأ ويرتل لغاية الشمس ما تطلع بشيل دوايته وبمشي تحت شديدرته اللت النيمة الكبيرة بخت فروته ودوايته ويبدأ كتابته ما شاء الله خاطي المصحف الشريف بخطين بي خط يدوا وهسة موجودة النسخ دي عندنا في الجنيد اها قالت لي بحلق راسه صلعة دائما وعنده خلطه زي العصيدة بتعملا ليه حبوبتنا امنة ام حبوبتي نور الشام قالت لي العصيدة نص غستواء بعد تبرد يختوها ليه زي الوقاية في نص رأسو ويعلوها شوية لي فوق تبقى زي الحفرة ويجيبوا السمن البلدي يكبوا ليهو زي نص كباية وهو يقعد يكتب قالت لي لما يجهز الفطور نقطة سمنه ما بنلقاها في راسو يعملوا ليهو نفس الحركة بعد الفطور ويستمر يكتب لي وقت صلاة الضهر بكون كمل باقي الكباية ويقرأ في الخلوة شوية ويكرر نفس الطريقة لي وقت صلاة العصر لما يصلي العصر بكون كمل كباية ونص كل يوم قالت لي لامن مات الله يرحمه لا شكا من عيونوا ولا من رأسو يحمد سيدوا يا سلام يا إسحق اخوي ديل ناس براهم وزمنهم براهو وحياتهم براها عاشوا وماتوا نضيفين قلب وبصائر استمتعوا بدنيتهم وكسيوا آخرتهم شكرا للإضافة القيمة وتسلم كتير اخوي إسحق ,, فيك الخير والله