لحظه من فضلك..3

Quote: قررت أن لا افكر كثيرا في امر فتوي الرضاعه هذه! الموضوع مالقيت كلمه يمكن أن توصفه غير انه "بيهجم"! وبيهجم دي بطريقتنا السودانيه..تتقال ومعاها خبطه علي الصدر ثم فغر الفاه في هجمه حقيقيه.. ومعاها كلمة سجمي! وبعدها يحصل تشويش في الراس وتجي نوع اسئله غبيه زي دي.. يعني هو زميلها المفروض يرضع ده ..يعني هو طفل بس اتعين من بدري وهو صغير شديد؟؟ وهي الزميله دي يعني لما يرضع منها ..الكلام ده بيكون في الوزاره والمكتب قدام ناس تانيه ولا كيف؟ والناس التانيه دي شروط حضورها يكون شنو؟ أخواتها برضه من رضاعه من زمان؟ محرمين يعني ولا كيف؟ ولا هايكونوا براهم؟ طيب لو كانوا براهم مش اسه دي كانت بتكون خلوه محتاجه لتحليل؟ طيب لو المدير جه وطلع مفتري وقال ليها.. انا الوحيد هنا البستحق أكون أخوكي! جايز.. لأنه لو مابقي أخوها زي ما هو عايز ممكن يرفدها..وليه هي تقطع عيشها مادام العلماء قالوا حلال؟ طيب الناس البترضع منها دي..قولوا مثلا فلان الفلاني رضع من فلانه الفلانيه..ينفع بعد كده بعد ما يكبر شويه.. وينسخط زي الرجال الكبار البيعرسوا بعد مايعجزوا بس عشان قروشهم كتيره..ينفع يعرس بت بتها؟ ولا حتي بت بت بتها؟ حكم الشرع شنو هنا؟ اتخيلوا بقي مجموعه بتاعة موظفين قالوا عايزين يكونوا أخوان سهام بس..علي الرغم من انه سهام معاها زميلات تانيات.. اختاروا سهام لأنها زميلتهم البيرتاحوا ليها في المكتب.. وبعدين سهام حلوه وهم بيحبوا أخواتهم يكونوا حلوات ..مش زي وفاء.. ولا زول عايز يكون معاها لا في المكتب ولا حتي في الشارع..وكذلك نهي.. الموقف يكون كيف؟ هل تجبر الفتوي الزميل علي أن يرضع من وفاء كما يرضع من سهير؟ وان رفض ..ما هو موقف الاداره من رفضه؟ هل ترفته من عمله؟ تجازيه اداريا بخصم مرتب 15 يوم مثلا؟ أم تنقله للعمل بالبوفيه الرجالي الصغير الذي يشبه الكشك ..والذي لا يتحمل ان يعمل فيه اثنين.. دعك من اتنين ومعاهم شيطان؟ ولا تحوله للعمل كسائق علي الرغم من شهاداته المتخصصه في غير ذلك؟ هل يصير كل العاملين بشركه أو وزاره أخوانه بالرضاعه؟