|
Re: ود وبت الجيران.. (Re: Ahmed El Gasim)
|
Quote: بيـــان أوعـى يكـــون هــو أل ...... يـــاربي ؟؟؟؟؟ |
لوووووووووووووووول @ واسبة
ايام بوست الامتداد جا قراه سالتو بتعرف مني خوجلي.. قال يا سلام ابوهم راجل فاضل.. شوفت الزول دا مؤدب كيف.. بذكر الحاج بس..
منى شنو ياخي تدسي مداخلاتك ام صمغ جوة.. يلا يا واسبة مايدنك الامان اكتب قصصك براحة. بس ما تجي تقول الباسورد مع زوج بيان الان.
| |
|
|
|
|
|
|
Re: ود وبت الجيران.. (Re: Muna Khugali)
|
شايف البوست ده كله اولاد جيران بنات جيران غير صاحبة البوست والحبيبة بيان
وباقي بنات الاون كلهم زايغين
جبانااااااااااااااااات بس فالحين لي في انه المراة مهمشة هسي البكا ده كله الكبوهو اولاد الجيران وبرضو مهمشين
مودتي بلا حدود
| |
|
|
|
|
|
|
Re: ود وبت الجيران.. (Re: د.محمد حسن)
|
Quote: والله كان منجضنا نجاض |
صدقني من شدة خوفي منهم.. لو كنت بمضغ في لبانة وقابلني واحد منهم ... كنت ببلعها طوالي
بيان
غايتو شباب عطبرة كانوا بيربطو مواعيد الغرام مع وقت المسلسلات .. حيث لاخوف على الحبيبة إلا من
كلاب الخلاء
| |
|
|
|
|
|
|
Re: ود وبت الجيران.. (Re: Muna Khugali)
|
Quote: زمان أيام كنت في الإعدادي في الكلية القبطية..كان في ولد من الإمتداد أكبر مني شـوية.. هو مامن الجيران بس من الإمتداد.. كان مشترك في نفس بص المدرسة.. الولد ده واسمحوا لي اسميه "بزفت الطين" كان مضايقني جـدا بحركاته..بعدين كان دمه تقيل خالص.. مرات بص المدرسة كان بيتعطل..وعمك الخليفة عوض خوجلي بيصادف برضه انه مابيقدر يجي يرجعنا.. يعني كان لازم نرجع لوحدنا او مع زميلاتنا بالمواصلات.. طبعا من المدرسة للمواصلات كان مشوار بتاع ربع ساعة... في إنتظار بص المدرسة أوأثناء الإنتظار للعربيه ...زفت الطين كان بيتنيل علي عينه يقيف قدام المدرسة يعاين..وطبعا دي كانت حركات اولاد الكلية القبطية بنين وجمال عبـد الناصر.. وفي مره مرتين من المرات.. لما كنا بنمشي نركب فيها المواصلات.. بقي يضايقني بالمشي وراي والمعاكسة..اتضايقت منه شـديد وأول ما وصلنا وسط زحمة لقيتها فرصة قويه اهزئه فيها.. وأوبخه قـدام الناس علي معاكسته مستعملة خطابة ذلك الزمان..
مامكسوف علي دمك تعاكس في بنات الناس..
ماشي ورايا ليه من قبيل انت ماعنـدك أخـوات..
وطبع أفظع شتيمة تكون.. يا أخي امشي ذاكر وانجح بدل العوارة دي..
صـاحبنا اتهجم من موقف الفضح ده قـدام الناس..وقرر ينتقم من بت حلته تفتكروا ياجماعة يا الراجيين حكايتي عمل شنو?'
أسألوني وبوريكم.. |
نكمل قصة زفت الطين الغايظني لي أسه..
أنا الوقت داك ياخوانا صراحة وقتي مليان بتمارين موسيقي في المدرسة.. وغالبا مابتكون في أيام الإجازات ..واجازة المدرسة كانت جمعة وأحـد.. ده غير تمارين السباحة في دار الثقافة وسلام مرسل لأستاذ بيومي..
وتمارين السباحة كانت يومين في الإسبوع من الساعة 4-6 .. الغرض ..إنه الزول ده كان متابع طلعتي ومواعيـدها.. زفت الطين زعل جـدا من تهزيئي ليه قدام الناس..خاصة الطلبه اصحابوا.. وقرر ينتقم مني..عارفين الجبان عمل شنو??
كتب جواب غرامي عجيب..بيعاتبني فيه علشان ماجيته في اليوم السابق زي ماكل مره بجي أقابله!
وطبعا كتب عبارات توحي لمن يقرأ الخطاب اني فعلا بقابله..زي يذكر بالضبط المواعيد البكون فيها بره البيت..شكل ملابسي..مواعيد رجعتي... وكلام زي.. تتذكري المرة الفاتت لما كنا سـوا وقلت ليكي وقلت ليه..وهبل زي ده الله يخرب بيته علشان انا لسه زعلانه منه.. وختم جوابه بكلام عليك الله تواظبي علي مواعيـدنا وماتزعلي مني..والحب البينا لازم يعيش!
الجبان جه جنب البيت ورمي الجواب من فوق الحيطة..وقومي يا خالتي ألقي الجواب.. وشيليه علشان ماما جارة تقراه!
كان يوم اسود! تحبوا احكي ليكم الباقي ولا بلاش?
| |
|
|
|
|
|
|
Re: ود وبت الجيران.. (Re: Muna Khugali)
|
ليوم داك انا لما رجعت البيت لقيت أمي وخالتي عليهم تعابير عجيبة في وجوههم.. بعد شـوية كده قاموا نادوني براي..عاملين فيها ظراف وفاهمين!!
مدوا لي الجواب وعيونهم فيها نظرات عجيبة.. سـألوني..
ده شنو الجواب الجاييك ده?
تعرفي الزول ده? فتحت الورقة مافهمت حاجة ..أعاين في الورقة وارجع اعاين ليهم.. طبعا انا كنت مهجومة وناسية تماما زفت الطين!
رديت بالحقيقة.. انا ماعارفة حاجة عن الجواب ولا الزول الكاتبه!
طيب هو عارفك كويس??! وأنا أكرر في ماعارفة..
وطبعا الوقت داك انا دوبي عمري 13 سنة يعني ماقادرة ذاتي استوعب الموقف..ومن الزعل قعدت ابكي شديد.. وأكتر حاجة زعلتني اني فعلا صادقة وهم لسه بيسألوني!
الله يسامحك ياماما جارة ويا أبله زينب.. كده تشـكوا في مني?
المهم يبدوا انهم لعنوا الشيطان وابتدوا يصدقوني..وندموا علي سـؤالهم..بقوا يسكتوني ويحنسوني علشان اقوم آكل وأشرب..بس أنا الزعل استمر معاي..بقيت ابكي باقي اليوم والليل.. ماهانت علي نفسي!
المهم بعد يومين..وانا راجعة من المدرسة اشوف زفت الطين جـه ماشي جنبي
وبصوت عالي فيه نبرة انتقام عالية قال لي..
استلمتي جـوابي أول أمس??
| |
|
|
|
|
|
|
Re: ود وبت الجيران.. (Re: عبد اللطيف بكري أحمد)
|
بت الجيران ... فصل من مسرحية صامتة في حياتنا أجمل أوقاتي كانت لما تقطع الكهربا في وقت (المسلسلة) - ابوها كان عندو عربية ولما الكهربا تقطع بيطلع بطارية العربية يشغل بيها التلفزيون – حضور المسلسل عندهم كان ليهو لون وطعم ورائحة. أجمل أيامي – يوم صرف سكر التموين في دكان التعاون – الكلام ده في بداية التمانينات يعني ما تقولوا الزول ده عجوز أجمل الشهور شهر رمضان لما كنا بنمشي نجيب التلج مع بعض – كانت فرصة تكون فيها عنتر زمانك فتاتيها منتصرا وانت تحمل كيس التلج من وسط الزحام ولسان حالك يقول: عبلة تناديني فالحديد لا يقاويني
اما أيام العيد فكانت عيد فعلا – أيام لا نخاف فيها من عين الرقيب وندخل ونطلع زي ما عايزين
الغريب في الأمر انه كل شيء كان بيتم على الورق - تشتري كتاب أجمل الرسائل من المكتبة وحزمة ورق رسائل ملونة وكل مرة تكتب جواب – الرد كان عبارة عن ابتسامة عريضة لما تلاقيك بعدها – الواحد بينبسط ويمشي يفكر في موضوع الرسالة التانية – ما حصل قلت ليها كلمتين على بعض شفتو الجبن ده كيف.
استمرت الحياة جميلة إلى ان فاجأني يوم اكتشفت فيه انها أصبحت عروس وانا لسه بيدوني مصاريف المدرسة لكن برضو كانت روحي رياضية عملت كل ما طلب مني من مراسيل في فترة العرس وفي الحفلة كنت مبسوط وقعدت لحدي ما لمينا الكراسي نقطة – سطر جديد – بنت جيران أخرى أيام ليتها تعود
| |
|
|
|
|
|
|
Re: ود وبت الجيران.. (Re: Dr_Bringy)
|
الفاضلة / منى
مراهقتنا كانت بريئة ولذيذة لكنها أيضاً كانت عويرة إلى الحد الذي لا يمكنك فيه إعلان عواطفك المكبوتة تجاه إحدى بنات الجيران و الحلة إلا سراً عبر خطاب تنتقي له الكلمات إنتقاء حبات المسبحة في تناسقها و ذلك كله ( عشان تقتنع ) . لا أنكر أنني كنت من بين أولئك الذين أخذتهم الهاشمية على حين غره ( دي معناها شنو ؟؟ ) و حينما قررت أن أكتب خطاباً لبنت جيراننا أردته أن يكون أكثر إقناعاً لأني أعرف من أين يؤكل كتف حبها ، بعد جهد جهيد في إنتقاء عبارات مثل ( هانذا أقدم أوراق إعتمادي سفيراً فوق العادة ومفوضاً من مملكة الحب إلى قلبك ) كان أن كتبت خطاباً خترياً و أرفقت معه هدية حتماً سترضي غرور تلك البنت ،، هدية كانت علبة بسكويت ( كرم ) فقد كنت مييقناً أن فارسة أحلامي سوف تحبني كما هي تحب البسكويت بجنون . في الطريق إلى بيت المحبوبة ـ لتسليم الرسالة الأولى ـ تختلج في رأسي الأفكار و أسرح بها إلى حيث عوالم الحب المدهش ،، أستيقظ على صورة أمها تلك الشايقية البيور بلكنتها المميزة و هي تفتح لي الباب و تكاد تزأر مثل لبوة في وجهي ، لكني تفتيحة و عامل حساب لهكذا موقف .. لذا أعلنت لها بلا تردد أن الغرض من زيارتي ( كنت عايز كتاب جغرافيا من هناي ) و ينجلي موقفي آماناً حينما تردني فقط بالقول ( إتا كتاب الجغلافيا الليلك وديتو وين ؟؟ ) حتى أعاود الكرة مرة ثانية بعزم المحب الولهان كان يتعين عليّ إستئجار أحد شفع الحلة و بعد أن برمجته وفق ما أبتغي أرسلته في إثر حبيبتي يحمل رسالتي و صندوق البسكويت الذي وددت لو أنني دغمست منه حبة واحدة .. ما ألذ بسكويت ذلك الزمان .. كان مرسالي يحمل بسكويتي في يديه ، و أنا أمطق وأحمل آمال مراهق وله بين ضلوعي المكشوفة إلا من بعض جلد . بعد مدة تتجاوز الساعة و النصف ، و بعد بحث مضن وجدت مرسالي الذي تراءى لي أن في حواف فمه بقايا من بسكويت حبي .. لكنه تجاوز تحديقي في وجهه بأن أكد لي أن الرسالة قد تم إستلامها من حبيبتي شخصياً و أنها ( قالت ليك كان عندك جواب تاني برضو أديني ليهو أجيبو ليها !! ) يا لحبيبتي الولهى مثلي . عندما عدت إلى بيتنا بعد مدة وجيزة تناهى إلى سمعي صوتاً أعرفه معرفة جوع بطني كانت تلك الشايقية جارتنا و صوتها يشق عنان حوش بيتنا ( نان الولد مرسللو جواب للبنيي مسويلها حبينى و أحبك عاز يبوظ لي بنيتي و تقوليلي معليش ) و صوت آخر يقاطع ( خلاص يا صفية خليهو يصبر لي و لما أبوه يجي أنا بكلمه ليهو ) كم هو حرج موقف أمي إذ تحاول جهدها أن تصلح ما أفسدته انا و هي تعتذر ( ما هم أولاد صغار و بكرة يكبروا يعقلوا ) و لكن صفية تتمسك بموقفها ( ما تقوليللي صغار و الله أن طقاها فرد طقة يحملا ) .. يا لهوي .. لماذا ذهبت أمهابعيداً هكذا ؟؟ تداركت أمي الأمر و إنتهى مشوار حبي الأول مع بنات الجيران بتوبيخ ـ أحسبه ـ جائر نالني ، لكن هذا التوبيخ لم يحرك فيني ساكناً و أنا أتميز من الغيظ حينما أتساءل : أين ذهب البسكويت ؟؟ تأتيني الإجابة حينما يترائى لي طيف حبيبتي بت الجيران و هي من وراء أمها تقضم بسكويتي كفأر مذعور .. و أنا من مخبئي غير المنظور أغمغم ( إن شاء الله ما ينفعك ) !! ــ .. أقلب الصفحة ..
| |
|
|
|
|
|
|
Re: ود وبت الجيران.. (Re: Dr_Bringy)
|
Quote: الغريب في الأمر انه كل شيء كان بيتم على الورق - تشتري كتاب أجمل الرسائل من المكتبة وحزمة ورق رسائل ملونة وكل مرة تكتب جواب – الرد كان عبارة عن ابتسامة عريضة لما تلاقيك بعدها – الواحد بينبسط ويمشي يفكر في موضوع الرسالة التانية – ما حصل قلت ليها كلمتين على بعض شفتو الجبن ده كيف. |
غايتو انا عايزة بعد ما أموت الله يخلقني تاني علشان أحب زي الحب ده
يادكتور برنجي..
باقي ليك في أمل?
حكمة ليها مده طـويلة معاي..
كلما زادت تجاربنا كلما قلت فرص السعادة
| |
|
|
|
|
|
|
Re: ود وبت الجيران.. (Re: عبد اللطيف بكري أحمد)
|
Quote: يعني يابت العم ود الجيران الرئيسي يغيب وماتسألي؟؟
الجيران كبسو علينا وقالو حقوق النشر محفوظة وبطلنا نشر،، |
اذا عباللطيف حب وعرس بت الجيران
عبداللطيف أخوي الله يسألني سألت منك اكتر من مره.. لكن قلت الله بس يسـتر..والحمد لله الظاهر من رجـوعك سـتر.. أها نان وينا الحكايات?
ياحليل العصريات والأمسيات والمسلسلات.. بمناسبة المسلسلات.. جـدي عثمان الحسين..كان معذبنا في افلام السهرة والمسلسلات..وما يحلا ليه يجي الا لمايكون في منظر من المناظر اياها..
ناخد شتيمه مرتين..مره منه هو يعقبها اغلاق للتلفزيون بعد نهرة للكبار المشاهدين معنا زي أمي وخالتي وأختي الكبيره ..وتوبيخ زي
خلاص الأخلاق انتهت? مافيش مدارس بكره? قلة أدب!
وبعـد يمشي ناخد احنا شتيمه من الأكبر مننا..متغاظين طبعا ماقدروا يتابعوا المسلسل ولا الفيلم..
امشوا نومي انتي وهيه..وغالبا هي دي بتكون أنا..انتي بتكون ماجده.. جبتوا لينا الكلام!
عالم مفترية..موش?
| |
|
|
|
|
|
|
Re: ود وبت الجيران.. (Re: Muna Khugali)
|
العزيزة منى الفاضل واسبة الرائعة بيان العطبراوي وكل التشكيلة من ودالموج ولا فوق سلاااااااااااام للروائع والدرر ... منى انا منتظر دوري بعد غياب طوووووووويل لكن متابع وبصراحة اول مرة اضحك وانا بقرأ هنا زمان الواحد كان يدخل مكشر ومبيت النية للمصادمات لكن البوست ده شوية بقى متنفس لإستنشاق الحيتة لكم جميعكم التحية وكم اتمنى مشاهدة وجوه جديدة هنا لإثراء التلاطف ... عمومآ فصول قصتي ستبدأ حالما نوصل مع منى وزفت الطين وفاصل ونواصل ومعذرة لإنقطاع التيار .
Quote: العطبــراوي الرفـــاعي .. لك التحية ولي عطبرة الجميلة .. وتحية للإعلام .. وتلفزيون عطبرة .. وإذاعة عطبرة .. والبلوتين.. قلته لي من الدرجة .. بت جيرانا يعني ... تخلوا بنات جيرانكم وتجو تزاحمونا في بنات جيرانا ..بنات الراحات .. عشان كده خليتوه يفتروا علينا . لك التحية مرة أخرى .. ولي عطبرة ألف تحية . خالد الأرباب |
انا عطبراوي الهوى والحنين فقد قضيت جميع اجازاتي المدرسية منذ العام 80 حتى بعد الزوج تقريبآ في عطبرة ولكن تصاريف الحياة والبلاوي التى رمتنا بها مؤامرت الثلة المعتوه فرقت بيننا والحياة الخالصة للحياة والجمال فحبي لعطبرة من امبكول ومسجد البرهانية والموردة كشك او فتحة الشباك داك الفي الخور البيبيع الباسطة بريال والله اقل زماااااااااان والعجلة اللي عملت بيها حادث مع ابو واحد كان يادووب أعرفهوربما كانت ستثمر صداقة ولكن.... ومرورآ بالسكة حديد واللاعب سرتانا والدحيش ولوفا والسوق والملتقى والهدف والامل والشبيبة وناس علي كشك وعصام الجزار وعمر الجزار عليه الرحمة وحتى الامتدادات وشمسون (ده في الحساب عمي) ما عارف في الجغرافيا ح يكون شنو فله التحية والحصاية وحتى حي المطار اليادوووووووب شب وماقام ولك مني ولعطبرة ملاااااااين الحب والتقدير والسلام.
| |
|
|
|
|
|
|
Re: ود وبت الجيران.. (Re: khaleel)
|
Quote: كان يوم اسود! تحبوا احكي ليكم الباقي ولا بلاش |
منى الرائعة سلام بتخيل فيك انت جارية والسفنجة فر فر فر فر وراك في ضهرك
احكي فاتحين خُشومنا ألتقول مَسَلْسل ... ومنظرين
| |
|
|
|
|
|
|
Re: ود وبت الجيران.. (Re: خالد علي محجوب المنسي)
|
Quote: عندما عدت إلى بيتنا بعد مدة وجيزة تناهى إلى سمعي صوتاً أعرفه معرفة جوع بطني كانت تلك الشايقية جارتنا و صوتها يشق عنان حوش بيتنا ( نان الولد مرسللو جواب للبنيي مسويلها حبينى و أحبك عاز يبوظ لي بنيتي و تقوليلي معليش ) و صوت آخر يقاطع ( خلاص يا صفية خليهو يصبر لي و لما أبوه يجي أنا بكلمه ليهو ) كم هو حرج موقف أمي إذ تحاول جهدها أن تصلح ما أفسدته انا و هي تعتذر ( ما هم أولاد صغار و بكرة يكبروا يعقلوا ) و لكن صفية تتمسك بموقفها ( ما تقوليللي صغار و الله أن طقاها فرد طقة يحملا ) .. يا لهوي .. لماذا ذهبت أمهابعيداً هكذا ؟؟ |
لووووووووووووووووووووووووووووووووووووووووووووووووووووووووووووووول
مبالغة يا دهب لو جاتني ازمة انت مسؤول.. نجضت اوكسجيني نجاض..
| |
|
|
|
|
|
|
Re: ود وبت الجيران.. (Re: bayan)
|
Quote: بيان
غايتو شباب عطبرة كانوا بيربطو مواعيد الغرام مع وقت المسلسلات .. حيث لاخوف على الحبيبة إلا من
كلاب الخلاء |
يا بوكومش اسع في ولد في عطبرة ديك كلها يستحق افوت ليه المسلسلة لا باللاهي...
بيان فرحانة عشان اولاد جيرانها ما حبوها والا كانت فوتت المسلسلة هيع فشر
| |
|
|
|
|
|
|
Re: ود وبت الجيران.. (Re: Muna Khugali)
|
Quote: نان الولد مرسللو جواب للبنيي مسويلها حبينى و أحبك عاز يبوظ لي بنيتي و تقوليلي معليش |
مبالغة يا ود دهب والله علي قول اختنا بيان نجضتنا نجاض من الضحك وذكرتنا الحاجة (عائشة ابوديةالشايقية) والدتنا لمن تقوم تجوط فينا
| |
|
|
|
|
|
|
Re: ود وبت الجيران.. (Re: طارق جبريل)
|
Quote: وناسية تماما زفت الطين! |
اللا ترى اساليب الاولاد دي متكررة في كل مكان
صديقتي في الدامر وصلتها رسالة حمراء عديل كدا ببريد المدرسة والزول الكاتبها موصفها ليك بعداك حاكي ليها عن لحظات حميمة شديد رسالة تودي في الحديد لو الاهل راقين وتسكن الترب لو ذي ناس جيران دهب.. اها طبعا المدرسات فرحو فرح السنين.. البت قالت نهائي ما بتعرف الكتبها.. المهم نادوا الابو وكان زول متعلم جدا وفاهم قاليهم اي زول عارف انه في المتوسطة بفتحو الرسائل الرسل الجواب دا عايز يرمي بتي في مشكلة احتمال عشان رفضتو.. وطلع زفت طينها ولد كريه وسنيح مرة رسل ليها جواب لانها بت مؤدبة رفضت تشيلو من المرسال.. وهو حس بالاهانة.. والله يا منى اتخيلت منظرك..تعاطفي التام معط الهجايم دي بطالة شديد ..
| |
|
|
|
|
|
|
Re: ود وبت الجيران.. (Re: bayan)
|
Quote: اللا ترى اساليب الاولاد دي متكررة في كل مكان |
شوفتي يانجاة زفت الطين طلع مزفت لياتو درجـه? كل فترة كده بتذكر الحكاية دي واتغاظ! واتغاظ اكتر اني ماعارفه عنه حاجة غير شكله وانه من اولاد الإمتداد.. كان أسه الزول انتقم منه بمقلب كباراتي معتبر يخليه يعترف بفلطه..
أقول ليكم كلام..
أنا لا مسامحاه ولا حـاجة.. وبكره أمي تجي من السودان وأطالبها بإعتذار رسمي هي وخالتي في أمريكا.. ايه يعني فايدة التحانيس والدلع بعد ما استجوبوني!!
عالم غتيته..لو فاتت 100 سنة علي الحاجة الحصلت..تلقاها لسه شايلاها في قلبها!!
طيب أنا عنـدي تاني حكايتين بس برضه لازم تشجيع فظيع
| |
|
|
|
|
|
|
Re: ود وبت الجيران.. (Re: Muna Khugali)
|
لا ..لا انا قاعد ومنتظر تعرفي انا كنت من سكان الامتداد مربع 7 ودرست الابتدائي في مدرسة مازال الحنين يقودني لها متى زرت السودان هي مدرسة الامتداد 5 الابتدائية بنين بس مستحيل اكون زفت الطين ده لانو في حياتي لم اكتب رسالة لاي بنت كانت وبرضو حبيت بس بالشوف والرجفة بنت جميلة تزوجها اخو صديقي الكبيييييييييييير وهي في اولى ثانوي يعنى يادووووووب كدا قلنا بسم الله وياقلب انطلق وحب كما يحلو لك الاوهي بتتزوج والان الحكاية الاصلية ح نأجلها لحين انتهاء منى من زفت الطين ومقطوع الطاري القادم .......كل جمعة وانتو بخيرررررررررررر يانساء المنبر .
| |
|
|
|
|
|
|
Re: ود وبت الجيران.. (Re: الرفاعي عبدالعاطي حجر)
|
لكن يا منى قلبتي علينا جنس مواجع .. مرة كان عندنا بت في حلتنا .. يعني معانا في حي واحد لكن ما جيرانا .. البت دي لمن تجي ماشا المدرسة بتجي تنتظر البوكسي البوصلهم المدرسة ( البرينسة ) مع بنات جيرانا في العمود الفي رأس شارع بيتنا .. بعدين البت دي يا منى كان بتلبس كبك .. أهة الكبك البتلبسو دا بس يخلو ليها .. أنا مع أصحابي في المدرسة كنا بننتظر لحدي ما العربية البتشيل البنات ديل تجي و تشيلهم حتان نمشي المدرسة .. خلاص لما فاض بي قمت قلت أرشها بي جواب .. قمت عرضت الفكرة على ميرغني صاحبي و ود خالتي فأيد فكرتي و أستعد بدعمها بأن يقوم بتسليم الجواب لواحدة صاحبتو بتقرأ مع البت في نفس المدرسة عشان تسلموا ليها .. المهم أنا قمت اليوم داك مشيت المكتبة جبت ليك ورق رسائل فيهو زهور و قلوب و حاجات بتاعات حبكانات كدا و ظبطت ليك خطاب يجيب رأس غليص ذاتو و بعد داك جا ميرغني صاحب قام قرأ الخطاب لمن هو ذاتو إتكيف .. المهم شال الخطاب عشان يسلمو ـ لصاحبته التي سوف تقوم بتسليمه لزولتي ـ حسب ما أتفقنا .. يوم السبت الصباح مرقت الشارع قبل شراب الشاي ذاتو عشان عايز أشوف الحنان شعورو كيف بعد ما أستلم جوابي ؟؟ و الحاجة الغريبة لما مشيت رأس الشارع لقيت ليك زولتي أول واحدة جات من البنات في المحل البنتظروا فيهو البوكسي .. و بمجرد ما شافتني من بعيد أشرت لي .. و الله يا منى أنا اللحظة ديك من الفرح قربت أطير ذاتو .. حسيت ليك بقلبي دا وجعني شديد خلاس ،، لما وقفت قدامها قلت ليها بصوت متهدج كدا .. ص ص باح الخير .. قامت طوالي دخلت يدها في شنطتها و مرقت لي ظرف منفوخ كدا ما مكتوب فيهو من برة أي حاجة .. أنا شلت الظرف و زغت طوالي و جرية على البيت .. ختيت الظرف تحت المسند بتاع الكرسي في الصالون و مشيت جبت لي كباية شاي بي لبن عشأن أقرأ ردها الكتير دا .. طبعاً إتخيلت ليك إنو البت دي تكون ما خلت ليها كلمة بتاعت حب ما كتبتها لي .. لما فتحت الظرف ألقى ليك جوابي الكتبتو ليها بذاتو و صفاتو و معاهو ورقتين تاني .. أفتح ليك الورقتين ألقى ليك جواب زي جوابي منقول بضبانتو كاتبو ميرغني ود خالتي لبت تانية في نفس المدرسة .. تتخيلي ميرغني نقل الجواب بتاعي كلو و ما غير إلا الأسماء و أتذكر أنو في حتة كدا أنا عبرت فيها عن إعجابي حتى بالكبك بتاع البت ، ميرغني برضو كتبها زي ما هي !! .. طبعاً أنا قعدت في الصالون داك فكيت لي بكية كدا في حناني .. ما عشان البت شوكشتني و طارت و بس .. لكن عشان ميرغني أدى واحد صاحبو نقل ليهو الجواب بتاعي و كان خطو جميل جداً و أحسن من خطي .. و أكيد البت حتقول أنا نقلت الخطاب من ميرغني عشان هو خطو أسمح من خطي .. لاحقاً علمت أن البت التي أرسل إليها ميرغني خطابه المنقول من خطابي ، و البت التي أرسلت إليها أنا كانتا فردتين حميمتين .. و بسبب ذلك الموقف حرمت التعامل مع ميرغني في مثل هذه المسائل الحبكانية نهائياً ..
| |
|
|
|
|
|
|
Re: ود وبت الجيران.. (Re: عصام دهب)
|
Quote: و بمجرد ما شافتني من بعيد أشرت لي .. و الله يا منى أنا اللحظة ديك من الفرح قربت أطير ذاتو .. حسيت ليك بقلبي دا وجعني شديد خلاس ،، لما وقفت قدامها قلت ليها بصوت متهدج كدا .. ص ص باح الخير .. قامت طوالي دخلت يدها في شنطتها و مرقت لي ظرف منفوخ كدا ما مكتوب فيهو من برة أي حاجة .. أنا شلت الظرف و زغت طوالي و جرية على البيت .. ختيت الظرف تحت المسند بتاع الكرسي في الصالون و مشيت جبت لي كباية شاي بي لبن عشأن أقرأ ردها الكتير دا .. طبعاً إتخيلت ليك إنو البت دي تكون ما خلت ليها كلمة بتاعت حب ما كتبتها لي .. لما فتحت الظرف ألقى ليك جوابي الكتبتو ليها بذاتو و صفاتو و معاهو ورقتين تاني .. أفتح ليك الورقتين ألقى ليك جواب زي جوابي منقول بضبانتو كاتبو ميرغني ود خالتي لبت تانية في نفس المدرسة .. تتخيلي ميرغني نقل الجواب بتاعي كلو و ما غير إلا الأسماء و أتذكر أنو في حتة كدا أنا عبرت فيها عن إعجابي حتى بالكبك بتاع البت ، ميرغني برضو كتبها زي ما هي !! .. طبعاً أنا قعدت في الصالون داك فكيت لي بكية كدا في حناني .. ما عشان البت شوكشتني و طارت و بس .. لكن عشان ميرغني أدى واحد صاحبو نقل ليهو الجواب بتاعي و كان خطو جميل جداً و أحسن من خطي .. و أكيد البت حتقول أنا نقلت الخطاب من ميرغني عشان هو خطو أسمح من خطي .. لاحقاً علمت أن البت التي أرسل إليها ميرغني خطابه المنقول من خطابي ، و البت التي أرسلت إليها أنا كانتا فردتين حميمتين .. و بسبب ذلك الموقف حرمت التعامل مع ميرغني في مثل هذه المسائل الحبكانية نهائياً .. |
| |
|
|
|
|
|
|
Re: ود وبت الجيران.. (Re: Muna Khugali)
|
دهب ياخي انت مبالغة.. انا عندي ود عمتي الله يرحمو ويغفر له صنع سمعة من الرسائل ديل.. ينفق كل وقته في ارسال واستقبال ولاني كنت فردتو كان بوريني الرسائل البتجيه.. اها مرة جاتو رسالة سممممحة نوع اللازورد والبنفسج وشنو.. المهم الرسالة دي فيها وصف دقيق جدا.. وفيه نهداك ارنبان مزعوران,, طلع منقول من كتاب الرسائل العصرية والبت ذي ميرغني دا نقلتو بضبانته دون تصرف..وقضيت ردحا من الزمن اكاويه بهذه الارانب المزعورة..
| |
|
|
|
|
|
|
Re: ود وبت الجيران.. (Re: bayan)
|
د. بيان تحيات و سلامات لقيتني كيف يا دكتورة .. مسكين المحبوبة تأكل بسكويتو صاااح ..
Quote: اها مرة جاتو رسالة سممممحة نوع اللازورد والبنفسج وشنو.. |
عندي صاحبي يا دكتورة نفس الملامح و الشبه يعني تخيلي نحنا في الأبيض و يكتب لحبيبته يقول ليها ( ثلوج كانون و دفء الصنوبر و عبق اللافندر و شنو كدا ما عارف الأريكة و الأيائل ) و الغريبة البت كانت متكيفة من كلامو دا التقول عايشة في تولوز ..
Quote: المهم الرسالة دي فيها وصف دقيق جدا.. وفيه نهداك ارنبان مزعوران,, |
تخيلي واحد كمان صاحبنا كان بكتب للبت ( قطتي الأليفة ) و هي كمان مبسوطة ترد ليهو ( أسدي الوديع )
Quote: وقضيت ردحا من الزمن اكاويه بهذه الارانب المزعورة.. |
تخيلي تعبير الأرانب المذعورة دا حيكون أقنع البت دي !!
| |
|
|
|
|
|
|
Re: ود وبت الجيران.. (Re: عصام دهب)
|
Quote: عندي صاحبي يا دكتورة نفس الملامح و الشبه يعني تخيلي نحنا في الأبيض و يكتب لحبيبته يقول ليها ( ثلوج كانون و دفء الصنوبر و عبق اللافندر و شنو كدا ما عارف الأريكة و الأيائل ) و الغريبة البت كانت متكيفة من كلامو دا التقول عايشة في تولوز .. |
ولا ديلاك شعرك الاسود الحرير يذكرني بالليل البهيم... وهي يخربها ذي حالاتي شعرها يقصو بالضفارة.. فمك مثل اكمام الورد في نعومته وهي الشلاليف مجاري خريف... اولاد الجيران بحبو خيالهم ويسفطو على اقرب بت.. يقعدو يدبجو الانشاء..
| |
|
|
|
|
|
|
Re: ود وبت الجيران.. (Re: Muna Khugali)
|
نت اتميز عن اقراني باو خطي يعتبر جميل واسلوبي في رقة وشاعرية ( حلوة شاعرية دي ) فكانو بيطلبوا مني اكتب ليهم الجوابات لحبيباتهم وانا كنت ما بقصر معاهم بس الجوب بي شلن
| |
|
|
|
|
|
|
Re: ود وبت الجيران.. (Re: د.محمد حسن)
|
Quote: لكن ليك انت يا منى بي شلن انجليزي ويبقي سر بيناتنا عشان امك وخالتك |
خلاص أكتب لي انت جواب غشني..قول فيه انك ود جيرانا..وبتحبني من مده وسلمه لي جنب دكان عبـدالله في كتاب التاريخ.. ولا لأ..أحسن كتاب حل مسائل الحساب..عشان أنا محتاجه ليه شديد.. أنا أشيل الكتاب وأجري...علشان أذاكر
| |
|
|
|
|
|
|
Re: ود وبت الجيران.. (Re: Muna Khugali)
|
Quote: اذا عباللطيف حب وعرس بت الجيران
عبداللطيف أخوي الله يسألني سألت منك اكتر من مره.. لكن قلت الله بس يسـتر..والحمد لله الظاهر من رجـوعك سـتر.. أها نان وينا الحكايات?
|
يسأل منك الخير يا أم آية وشكرأ على حفظ حقوق الجار،،
لا تفتكري أن كل الناس بمثل شجاعة عصام دهب،، دا ولد شقي وبعدين محامي لسانو متبري منو ،، يعني مجهز نفسو لعاديات الزمان وردوده مقنعة،، == أستمتع بالبوست الرائع ،، وأستمتع بمهاراتك في إستخلاص المعلومات بإبتسام ودون تعذيب وياليت ناس الأمن يتعظون،، على كل سيأتي يوم أتحلل فيه من الرجفة وأتشدع وأحكي ليك لغاية ركوبنا قطار الغرب هي للعمل في بنك الخرطوم وأنا للتقديم للجامعة ، وهنا كتب لنا المصير أغنيات أخرى جديدة ومفرحة ولكن أغنية : يدوم سعدك مع غيري وتملأ شبابك العافية مازال صداها يهز البدن،، == ملخص ظريف موش؟؟ على فكرة أنا متزوج من بنت الجيران ،، أم خالد رعاها الله،، وكانت في لحظة الميلاد بعيدة عن دائرة الضوء صغيرة لم تشهد لنا أمجاد شقاء ، ولم تحدثني حتى اليوم عن إحدى هذه الوقائع ،، فهل هي تدري ولا تريد أن تقول ؟؟ لست أدري،، فعقدة الذنب عندي تفضح كل تاريخي اللعوب ،، وهذا مايقلقني بعد طاشر سنة زواج ،، == شنكل من ناذر،، أجمل اللحظات تلك التي يتسرجع فيها المرء ذكريات جميلة،، شكراً على البوست مرة أخرى ،، وسأظل وفياً لهذه الذكري الرائعة فهي التي اسهمت الكثير في تشكيل علاقاتنا الحاضرة،، سلام،،
| |
|
|
|
|
|
|
Re: ود وبت الجيران.. (Re: عبد اللطيف بكري أحمد)
|
Quote: أغنيات أخرى جديدة ومفرحة ولكن أغنية : يدوم سعدك مع غيري وتملأ شبابك العافية مازال صداها يهز البدن،، |
الأخ الفاضل / عبد اللطيف .. لكن الغنية دي ذكرتني حاجات في حناني ذاتو ..
لكن برضو شكراً ..
| |
|
|
|
|
|
|
Re: ود وبت الجيران.. (Re: عصام دهب)
|
Quote: الغريب في الأمر انه كل شيء كان بيتم على الورق - تشتري كتاب أجمل الرسائل من المكتبة وحزمة ورق رسائل ملونة وكل مرة تكتب جواب – الرد كان عبارة عن ابتسامة عريضة لما تلاقيك بعدها – الواحد بينبسط ويمشي يفكر في موضوع الرسالة التانية – ما حصل قلت ليها كلمتين على بعض شفتو الجبن ده كيف. |
والله انتو أولاد جريئين جنس جرأة وشياطين جنس شيطنة...
لا أحد يمكن أن يصدق إني لم أكتب خطابا في حياتي لبنت !!!
ولم أعاكس بنتا في حياتي ,,,,,,,,ولم أقل لبنت إني أحبك !!!
كنت شديد الكبرياء والاعتزاز بنفسي ......
لهدا لم أدخل نفسي في أية زاوية ضيقة يمكن أن تمس اعتزازي
بنفسي وكبريائي وكرامتي ....
ولكني .. وأصدقكم القول ... أحببت وأعجبت ببنات كثر ...
ولكني كنت بقطعه في حناني (ظاتو)
| |
|
|
|
|
|
|
Re: ود وبت الجيران.. (Re: فاروق حامد محمد)
|
Quote: وسلمه لي جنب دكان عبـدالله في كتاب التاريخ.. |
لوووووووووووووول يا منى كانت جارة قالت ليك كتاب الطاريخ الليلك وينو تشيلي من اللولاد
يا حيدر وين قصص الجواب الفي الكوشة؟
| |
|
|
|
|
|
|
Re: ود وبت الجيران.. (Re: abubakr)
|
Quote: عندي صاحبتي كانت بتحب ولد اها الولد جاري عجلتو وماشي وراها شوية عشان ما يظهرو ماشين مع بعض بس اخوها الما يغباها ظهر نهاية الشارع.. اها صاحبتي اتجهجت شديد بس اخوها جا جاري يا فلانة الولد دا قاعد يشاغل فيك؟ لقت نفسها في محك صعب شديد لو قالت ما بشاغلها معناها بتتكلم معاه ولو قالت بشاغلها اخوها كتال كتلة.. قامت سكتت بس اخوها طيران على الحبيب قاليه بتشاغل اختي وطاخ بنية انهت تلك العلاقة وقتلتها في ساعتها الى الابد...
وهي بقت تقول لاخوها لاي يا فلان ما تدقو الزول دا ما قالي حاجة في ما بعد قالت دا احرج موقف مر بيها في حياتها.. |
بيان أنا عنـدي حكاية رهيبه عن العجله وسيد العجله الكان بيكتب لي جوابات بالورق الفلوسكاب..لكن مشكلتي انتو ما مشجعني شديد عشان أكتب! ياربي ليه انتو حارمني من الكتابه?
لازم تساعدوني بالصفقه والكلمات الحماسيه.. زي راجينك.. يامني شنو ياخ ماعلقتينا.. يعني أعملوا حبة حركات.. وهمتكم خلوها معانا شـويه
| |
|
|
|
|
|
|
|