|
|
|
 Re: يا جماعـــة انا عنــدي مشكـــلة.. اضانكم طرشا (Re: almulaomar)
|
الاخ العزيز الملا عمر
تمعنت جيدا في شكيتك...والتي كنت احسبها حلا لمشكلة اضنيا.. فوجدتك تشكي وتبكي... من جور الزمان عليك...وظلم الناس ....وانت توجهني ان احمس اضاني في لمبة فلورسنت...او ان ارقعها عند بنشرجي....مما جعلني اثق في رايك بعض الشي وليس كل الشي حيث ان كل الشي لا يتأتى الا لذي عليم وفير وحظ اوفر,, وانا لا علم قاطع فرقة وحظ مطلعني شمار في مرقة....اخي الملا سوف اعمل كل ما اوصيت به ولكنني احملكم المسعولية كاملة... لو قامت لي اضان جديدة... والله الموفق
| |
 
|
|
|
|
|
|
|
|
Re: يا جماعـــة انا عنــدي مشكـــلة.. اضانكم طرشا (Re: سجيمان)
|
أخي الدكتور عادل سجيمان
أرى أنك أخرجتني من الفصاحة والبلاغة بعد أن إستغثت بي أبو مروووه لتدخلني في حيص بيص بذكرك الشئ واللاشئ والتشيؤ ، فأنا لم أدخل شاكياً ولا متلصصاً وإنما دخلت توووش زي وزي أى غماية من غنم الإشلاق عنوة وإقتداراً لا يهمها كلب ولا ناس قاعدين بتونسو ولو قلت ليها تك بتعمل ما سامعه.
بس فات على يا سجيمان أن أسأل وأنت العالم في هذا الشأن بيقولو أضان الحامل طرشا فما هو رأي العلم في طرش الأضان وعلاقته بالحمل ، وما هو موقفكم يا دكتور وحالة طرشكم عطفاً على قاعد أضان الحامل.
بهذا أخي مسئوليتي عن أى ضرر أو تلف قد يصيب طبلتكم أو أذنكم الوسطى وماقلته هو فقط سمعته سمع ولم أجربه ولما لم أكن طبيباً إختصاصياً في الإضنين فلا تأخذ كلامي مأخذ الجد وإن كنت أنصحك بأن لا تركب في الحافلات بالقرب من الشباك فلن تسلم من رزاز التمباك وإن فعلت فأضانك.
أضنيك يا أعز الناس
إضنيك زي أضان جرقاس
إضنيك كبيرة ما بتتقاس
وإضنيك تسمع الرصاص
| |
|
|
|
|
|
|
|
|
|
Re: يا جماعـــة انا عنــدي مشكـــلة.. اضانكم طرشا (Re: سجيمان)
|
صديقي الملا عمر
اراك قد بلغ بك التأثر بما اصاب اضنيا من شتارة مبلغا عظيما... واكاد المح في عينيك الدمع يترقرق....ولنك لم تتأثر بما سبق واصاب ضلي من جن كلكلي...حتى انني خفت على ضلي من ان يتلحس.. واحوم انا وسط خلق الله ما عندي ضل...واقوم اشبك في ضل زول جنبي...وتكون الطامة الكبري..وتقوم الحرب.. حرب الضللا.......واخاف ان تتدخل امريكا.. وكندا....وموزمبيق....والامم المتحدة وجمعيات حقوق الانسان...ويقرو علينا المادة" من حق اي بني ان يكون له ضل وله كامل الحرية في التصرف في ضلو"
| |
|
|
|
|
|
|
|
|
|
Re: يا جماعـــة انا عنــدي مشكـــلة.. اضانكم طرشا (Re: سجيمان)
|
الدكتور عادل
عينك في الفيل وتطعن في ضلو (مثل بيطري/ كشف نظر)
ضل راجل ولا ضل حيطه (مثل بايركسي)
لا يستقيم الظل والعود أعوج (مثل حطابي/ فحامي/ صلاح عناقريب)
ضل وناصية في شارع ظلط مقابل جزارة (غاية العطاله)
ضل الضحى/ ضل الشاتي/ ضل العمود (ظلال في حياتنا/ ظلال لها إيقاع)
المهم في الضل يا سجيمان يا أخوي يبدو والله أعلم أن شمس النهار الحارة في وسط الخرطوم أصبحت برداً وسلاماً عليكم بعد أن كانت وإلى وقت قريب تكوي بنطلون الجينز المبلول وتنشفه في الحال فإذا كان ضلك إتلحس فعن الأصل دور.
ذات مرة أخي سجيمان لعبت في إستاد المريخ القاعد لي يوم الليلة أها ونحن واقفين كل واحد قازي كوعو في نصو من التعب والركب مرخيات والنفس يطلع وينزل قال في لاعب أصيب أثناء سير المباراة والحكم أوقف اللعب وإستدعي رجال الإسعاف وجو جارين شايلين ليهم ملة سرير منسوجه بي حبل بلاستيك أخدر المهم في أثناء هذا التوقف الإجباري سرحت مع السارحين وبعد شويه أشوف ليك لاعب من لاعبي الفريق المنافس عندو أربعه ضلله يسألني الله يا سجيمان شوف عيني ما قالو لي أتاريهو أنوار الكشافات الأربعة كانت ضاربه فيهو وكل كشافه بي ضلها وبدل ضل بقن ضلله. وإنت عشان يكون ليك ضل لازم تقف بي زاوية مناسبة للشمس وما تخليها تضرب في صنقورك لأنو في الحالة دي ضلك بكون تحت كرعيك وما بظهر إلا لمن تمشي وكل ما تمشي بتعفص ضلك بي كراعك عشان كده ما بتكون شايف ضلك وهذا الموقف عادة ما يتكرر في منتصف النهار. بعدين إنت الضل داير بيهو شنو عشان الناس تقول والله دكتور عادل ده راجل ليهو ضل.
| |
|
|
|
|
|
|
|
|
|
Re: يا جماعـــة انا عنــدي مشكـــلة.. اضانكم طرشا (Re: سجيمان)
|
سجيمان يا أخوي
إياك ومباراة الضللة ، يعني شنو لمن يقولو د عادل سجيمان آل سجيمان راجل ليهو ضل ، أين النعمة في هذا الأمر ، ما هو بيقولو الله يكفينا شر القوالة أنو الشدرة ليها ضل ، أها بترضي يقولو عليك شجره ، طيب خليني أبلعها وأقول أنو الشجرة لها ثمر وعندها فوائد وراسخة الجذور إلخ .. أها رأيك شنو لمن يقولو ليك القطية ليها ضل أو حله (قدر الطبخ) ليها ضل أو قروانه أو قيروانه (صفيحه) ليها ضل يعني في الحتة دي إنت كان رضيتها لي نفسك أنا ما برضاها ليك بحسب أخوتنا في الرضاعة السايبيرية أون لاين وأوف لاين ، وبرضو كمان السحابة بتعمل ضل لمن تمر أمام الشمس لكين بسرعه تفرتق ونحن الوهم نقعد نغني ليها : أبو الضليل ضلل لينا حمار أبوي كتلو الشمش ، وواحد فينا ساكت ما غني وقال عربية ابوي البورش أو الهامر أو حتى الكومر الشمش خربت بوهيتها أو لساتكها ، مع العلم إنو لا أبوي لا أبو اللمين لا أبو الهول ما عندهم حمير لكين أهو حتى ونحنا بنتمنى بنتمنى غلط وبفكر محدود جداً مش كل إناء بما فيه مش عارف إيه. يلا رجعنا الضل تاني ، بس ما قلت لي علاقة الطرش شنو بي الحمل ، أضان الحامل طرشا
| |
|
|
|
|
|
|
| |
Saifeldin Gibreel
سجيمان
almulaomar
فيس بوك
تويتر
انستقرام
يوتيوب
بنتيريست