سوق الناقة.... شية وشويات... ونسوان.....ورجال محترمين.... ولحم كيري....كل انواع اللحوم كيري...... اخر اجازة مشيت.......حمت فيهو..اكلت شيتو...قبيلة سوق الناقة....شي غريب...لحم وشية وبس... وشاي منعنع....ونضم مدلع.....وبخور مولع...حسي كان كل مرا..... بتقعد تتكحل وتشطف وتتجيه...وتهز كانونها لراجلها... وتضحك وتتنى وتحنى.... نسوان سوق الناقة ديل باقي لكم بياكلن عيش... ابدا..... لكن الرجال حليلكن منهم.... والغريبة يقولو لك والله سوق الناقة فيهو جنس شية.. شية شنو؟ دا علي منو دا؟ شية ؟ اهلا يا شية....بعدين راجلك ان دايرة تعرفيهو مشى سوق الناقة والله ما مشي..... فتشي هدومو عديل قطع شك تلقي لك. هبود رماد معلق في عمتو والله شالو والله بنطلونو.... لانهن النسوان ديك ... كل خمسة دقايق تقعد تهز في الكانون....وتقوم وتقعد تاني في البنبر.. عشرين مره..... وتشد توبها تحتها وان بقن كرعينها عاجبتنها.... تديهن مدا..وتكشف عن الساق...ويكون عاوز يحرق من الدخان والحنة مرسومة ومااااااااااشة لفوق.... هن اصلن دي شغلتهن بالنهار شية وفي الليل دخان......وكل كلمة والتانية...... قرقرقرقر......آآآآآآآآي مش كدا بالله؟....وهو لا كدا ولاحاجة...ولا ليهو علاقة بكدا.. لكن تقولو شنو؟... زيادة جلع ودلع.... وكل دقيقة تقعد تتمغا..وتشد السدر . والجماعة قاعدين يمشو... زرافات ووحدانا.... والغريبة نص الرجال المحترمين البيمشو هناك بيلبسو نضارات شمسية. للتنكر.. و المعاينة بالكُرُب....الواحد مقبل وشيهو على الشارع.....وعينو بجوا النضارة.... تتفسح في الشية وست الشية...وتلقاهو كل مرة يقول للمرا نارك دي باردة....ودي تقوم وتدنقر قدامو...كية للعواذل.. وتدي الكانون هزة..والتوب شدة والكرعين مدة....وهكذا لمن الشية تمرق..الغريبة شية البيت تمرق في خمسة دقايق...وشية سوق الناقة في خمسة ساعات.....مادام الكانون كل دقيتين يدوهو هزة... وفيهن نسوان... بنات لزينا...الواحدة تدفق الشطة فوق جلابية الزبون.... عشان تحلف وتتيمن الا تغسلها ليهو...وهو لابسها طبعا...والغسيل بالابريق......والدنقير يطول.....وان شاء الله تقيف علي الدنقير
انت عارف يا " سجيمان" بوستك ده ... نقر في الاوتار الحساسة ..وطبعا شبه " سوق الناقة ..كثير ....!!!لكن تعرف يا سجيمان ..كان البوست ..محتاج لشوية علامات استفهام وتعجب ..بين السطور والكلمات .عشان اللبيب بالاشارة يفهم!!!!!... لك التحية ..وانت تنشر البسمة ...بين جنبات الديار ..في هذا الزمن ...الردي..
والله ياسجيمان كلامك فى المليان ومقفل وجبت المجموع الكامل طبعا انا بقول كده لاتى داخل الفيلم. المؤلم ان كل العاملين فى سوق الناقه من جزارين وحقين السلطه والشويات والاولاد والبنات الصغار الببيعو المناديل والريحه ان قدروا باكلوا حدهم الفول والبهوات يضربوا فى الشية امام هؤلاء المساكين والحشاش يملا شبكتو وكله بحقو والله المستعان
سجمى ياسجيمان جبتها .....كبيرة مالها شيتنا بتاعة سوق الناقة ما احسن من اللحم المجمد دا.. ذكرات كنت ايام زمان بمشى سوق ليبيا لزوم السمسرة ولما ما القى لى بضاعة اشترى لى كيلو لحمة وهاك يامقيل.. لو الواحد كان فى السكة ديك كان بقى تمساح كبير لكن قلنا اخير نتمدن.. وواصلنا القراية وزملانا تجار الشنط الان ماسكين السوق العربى والبقى كوز فيهم والاكل الموز فيهم وانا من مطار لمطار لما اتمليت غبار وكرهت الترحال
بس سوالى انت وبت قضيم شغلوكم فى البلدية....من الكرنتينة الى سوق ليبيا
يا سلا م يا سجيمان أنا بمشي أجازنة كل سنة السودان بس سوق الناقة مشيتوا قبل 6سنوات بس ما كنت لابس جلابية وشال كنت لابس جينز وهدوم بتاعت صعاليق بس أن شاء الله أنا السنة حيكون ضمن برنا مج الحوامات بتاعتي
سيجمان تحياتي لهذه الوصف الراقي والتعابير الممتعة فانا كنت من المداومين جدا على الذهاب لهذا السوق باستمرار وبالذات يوم الخميس وكنت أذهب لصديق لي يعمل في سوق ليبيا وهو الآن من كبار تجار سوق القش وكنت ازوغ من شلتي في عمارة التبلدي الهندسية واحضر لصاحبي فوصفك السابق اعاد لي ذكريات مضت وايام خالدة في الذهن فشية سوق الناقة برغم مخاطرها الكثيرة الا انو الواحد كان بستمتع بيها وبالمناظر التي يشاهدها وحتى صاحبي في ايامي الاخيرة فكر في الزواج من احدي بنات العاملات في الشية فحاولت اقناعه بشتى السبل بعدم الاقدام على هذه الزيجة الا انه اصر بصورة مبالغ فيها وتم الزواج وهو الان لديه بنتين امورتين وانا من ديك قلت ليه لو انا قعدت معاك اكتر من كدي برضو حيسقوني بتاعك السقوقك ليهو وازوج واحدة من هنا ومن ديك وعيييييييقك
سوق الناقة دا سوق دعارة عديل ومستغرب ليه ناس النظام العام غاضين الطرف عنه قبل سنتين كنت ماشى لأعاين قطعة أرض لدكان فى أبوزيد القريب من سوق الناقة ومعى إبن عمى وأثناء عبورنا بالسوق إذا بواحدة من فتيات سوق الناقة تلحق بنا وتصر على دعوتنا إلى الإفطار رفضت بشدة ولإتخلص منها قلت لها إنى صائم فقالت لى تعال ريح شوية حتى وقت الإفطار ونعمل ليك الإفطار !!!!! هنا هربت بجلدى وإستغربت أن هذا يحدث فى وضح النهار فى دولة ترفع شعار الشريعة هن بائعات هوى يتخذن الشوايات واجهات
سيجمان بصراحة كده انت مشيت السوق ده قدر شنو بيني وبينك ده؟ لكن ياسيجمان الرجال ديل يلومهم من شنو ولاشنو نسوان سوق الناقة ولا بنات الملح ولا الموظفات العازبات ولا امات الطرح الحايمات البوم كله الماشه ليها معهد ولا ماشه جامعة مع كترة الجامعات والله البلد بقه حالته صعبة والبنات سعرو بسبب الحالة المادية تحياتي
والله يا سجيمان المشكلة انو البلد كلها بقت سوق ناقة كبير زي ما قالت هوزي.. وكلامك القلتو كلو صاح .. بس نصيختك شنو ليهن عشان ما يضطرن لي بيع لحمن مع لحم الناقة.. وبرضو الناس البتاكل هناك ، تقول ليهم شنو عشان يفرقو بين الاكل الحلال من الحرام؟؟!! ناس دايشة
انت ماشفت البنات البمشن يضربن الشيه هناك ولا شنو..؟ اها ديل يكونوا في رجال بيهزوا ليهم الكانون برضو ولا شنو..؟ والله ان كان فيها حاجه زي دي تكون شغلانه والبلد مدوره هز كوانين وخم رماد
وبعدين انت زااااتك مالك ومال اللحمه الكيري ماعارفه بتجيب المرض..؟ ولا عمتك ريحة الشيه .. والدنقيره الابديه
الله يستر الحاله بقت صعبه والاخبار البتجينا بقت تبكينا
الاخ عادل والاخوة الكرام السلام عليكم ورحمة الله وبركاته حقيقة الموضوع مهم للغاية ولكن كيف الحل حقيقة البلد من هذه الناحية لا يقدر احد ان ويصف الدهور الحاصل وقد لا تصدق ما يحصل امام العين حيث انا خرجت عن السودان ورجعت بعد أربعة سنوات ولم أصدق ما يدور ولكن اكثر ما المني هو قابلت أحد الباعت المتجولين وهو يحمل صور لبعض الفنانات حيث الاقبال الكبير عليها ولكن الادهي وامر هو بين هذه الصور يحمل آيات من القران الكريم تخيل صور فنانات عاريات وتكون وسطهن آية الكرسي وصورة الفاتحة وعندما تكلمت معه قالي يا اخي خلنا نشوف رزقنا
الرسائل والمقالات و الآراء المنشورة في المنتدى بأسماء أصحابها أو بأسماء
مستعارة
لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
ولا عمتك ريحة الشيه .. والدنقيره الابديه
