|
|
 لا تـنـكـحـــــوا.........هــــؤلاء النســـــوة
|
ان بقيت بخيت.....ربنا يديك....مرا هدية ورضية.... السماحة ما ضروري لانو بعد شوية...... ما حتكون لك سمحة..... حتكون عادية....... نصيحة لك..... النسوان البقولن ديل اوعك تعرس واحدة فيهن.................
"الفنانة..........والحنانة........والحردانة,,,,,المدرسة.......والمدبرسة........والمفلسة
,,,,,, النوامة.......والحوامة......واللوامة,,,,,البوبارة......والكوُبارة.....والخبّارة
,,,, الممحوقة.....والمطلوقة.....واللايوقة"
طيب...اجي اوريك ليه؟
الفنانة...... حتمرق معاها وتقعد تحوم.....في الحفلات...وتشوف كرسي قدام. وتقعد فيهو..شايل عكازك....وسكينك في ضراعك....وعينك عليها.......ان راجل بشّر ساكت..... تتحنفش...وتقوم......الا يهجروك اتنين...علي الكرسي.....وتجو نص الليل راجعين اهلكم....والنهار كلو نايمين....
الحنانة........طول النهار برا البيت....تحنن في نسوان الرجال....وهي كرعيها يكونن ما شافن حنة ليهن سنتين...والنهار كلوانت تحاحي في الشفع ما يلمسو الصبغة....
الحردانة...... دي حتكرهك حياتك....اقل كلمة...تتقنّع توبها وتجري بيت ناس ابوها...وتلحقها انت.....وتلقى ابوها....تقعد في طرف العنقريب.... تطقطق...في اصابعيك.. ومدنقر في الواطة...وداير تراضيها ترجع البيت....... لكن احسن حل لك يا تسكنو مع ناس ابوها...ياتجيب ناس ابوها عندكم ....عشان توفر المشاوير والجري..........
المدرسة..........اول حاجة دي ما بتقدر تفرق بينك وبين الطلبة...... وحتقعد..... تعيد وتكرر في الكلام مليون مرة..زي برنامج من الامس الفي تلفزيون السودان....وممكن جدا تسرح وتقول لك فاهم يا شاطر؟
المدبرسة........تلقها طوالي زهجانة.....وشايله اخلاقها في طرف نخرتها...وان كلكلتها ما تضحك........في النهاية حتوديك التيجاني الماحي...... نزيل اكتئاب
المفلسة.........ما دايرة أي شرح
النوامة......... تجي من الشغل نص النهار وزهجان.... تلقها....تانية المخدة وخاته ايدها تحتها....وتشخر... وريالتها سايله...وحالتها بالبلا.....وتكره اليوم الفكرت انت فيهو في التكاثر........
الحوامة.........طول اليوم فوق كرعيها...في الحلة من بيت لبيت.....وتدخل البيت.. قبال ما انت تجي من الشغل بخمسة دقائق....وتجري تولع النار.......وتطبخ لك القطر قام....واول ما ينتهي الغدا .....تدخل في سفنجتها....استعداد لرحلة جديدة
اللوامة.....دا نوع مزعج جدا.....لو جبت سيرة اخوك ساكت....تفتح فيهو... الله بيسألني.......سنتنا ديك وقت انت خليتنا بلا قروش وسافرت.... يدخل ويمرق علينا مدلدل ايدهو...كويس موز ساكت ما بيجي شايلو.......ولو جبت سيرة امك...... هي والله امك دي اصلها ما بتريدني.....من توشفني تزعل والنيران تطلق فيها...وتمد قدومها.....ووليداتي ديل السلام.... يا الله ويا امين تسلم عليهم......
البوبارة.......دي تحملك فوق طاقتك...تشريك الما بينشري....وجيت ناس في البيت...تجري علي علبة الدهب...وتتعنكش علها من راسها لكرعيها....وتقعد تنضم..بايديها وكرعيها ورقبتها...واضنيها...عشان توري الدهب
الكوبارة........ دي تكبر أي موضوع...وتسوي ليهوتوم وشمار..... وتقول لك ناس القبور دقو الطنبور...... لو شافع من شفعك.....عتر ووقع...... تصرخ وتخت ايديها في نص راسها.....وبطول حسها.....ووووووووب علي ووووووووب علي ...مااااااات ...ماااااااااات........ يسمعوها في الشارع....والغريبة لو انت كنت نايم وسمعتها..... تقوم مخلوع.....وتمرق من الاوضة لحدي نص الصالة.....وانت بلباسك........اما لو كان عندك قلب مرضان....اللحظة ديك....من المهد الي اللحد
الخبّارة...... البي تدور الخبار..... لو في نضم تلقاها سكتت الشفع....ونهرتهم عشان تسمع.......الجيران مالهم بيهرجو وصوتهم عالي......ولو كانت بتكوي لك في هدوم.....قطع شك......قميص ولاّ جلابيه.....حيكون في عداد ضحايا الحريق.....وممكن الملاح...يحرق وممكن الجردل يكون في الماسورة.... يتملي والبيت يغرق من الفيضان......وحرمكم المصون واقفة فاتحة خشمها وتصنت للجيران........
الممحوقة ..............دي ان جبت دكان كامل وختيتو لها في البيت تكملو في يومين......تصوطو كلو فوق تحت...........لكن ممكن توديها لاصحابك الزعلان منهم لو عندهم مناسبة تطبخ لهم.... عشان....لما المناسبة تنتهي يشحدو وانت تتبسط........
المطلوقة...........واضحةو ضوح الشمش
اللايوقة..........دي حكاية تانية.... تمسك في موضوع يحلك منو الجليل الرحيم......يا...دا ....هوي يا دا..... الليله يا يمة.... طرشت؟...وقدرما تطنش هي مصرة.....وممكن تجي جنبك وتخجك.....خجة جامدةعشان تنتبه...... للنقة....
(عدل بواسطة سجيمان on 07-19-2003, 09:32 AM)
|
|
 
|
|
|
|
|
|
|
|
Re: لا تـنـكـحـــــوا.........هــــؤلاء النســـــوة (Re: سجيمان)
|
سي جي : تحياتي.
أسمح لي بأن أضيف إلى موسوعة سي جي للنساء الممنوعات من النكاح الآتية صفاتهن :
المرأة الريموت ( و هذه تنتظرك إلى أن تقول لها ما يجب أن تفعله و ما لا تفعله ).
المرأة الموسوسة : كان جاها صداع ، عاوزة تمشي الدكتور. كان شمت فيك ريحة فيكس تقول ليك الريحة دي من وين ؟
تسلم
| |
|
|
|
|
|
|
|
|
|
Re: لا تـنـكـحـــــوا.........هــــؤلاء النســـــوة (Re: سجيمان)
|
سيجى سلام
الشيخ فرح قال فيهن هشيم وفيهن رميم وفيهن دهب مخزون قديم وطبعا انا ما برضا ها في حقك تذكر الجانب السلبى فقط وتمسك في الهفوت اللفوت انت تجي من الخلا وهى تجي من البيوت ،لا تديك مقوت لا تخلي كلمة تفوت ، بس يا حليل البيوت ويا حيل الونسة وريحة الحلة الحرقانة والاسرة الدفيانة بقينا كلنا ندافر في الحلة ويا ريت تلحق
وهوبلس دا براو مدبرس شوف ليه اشراق شوية ،
| |
|
|
|
|
|
|
|
|
|
Re: لا تـنـكـحـــــوا.........هــــؤلاء النســـــوة (Re: سجيمان)
|
بسم الله الرحمن الرحيم
دكتور سجيمان
سلام وإحترام
كان ميلادي الحقيقي يوم قلبي ليها أختار
دخلت قليب أهلي قبال تدخل الدار
محبوبة من الجميع بتعرف حقوق الجار
كان جبت ضيوف إن شاءالله عشرة أنفار
تبسم في وجيهم لو حتى خالية الدار
هميمة كريمة عالية المقدار
تلقاها في المطبخ تخدم كبار وصغار
ما بتترفع ما بتتعالى ما بتعرف البوبار
رزينة صادقة أمينة تحفظ الأسرار
مي نمامة مي حوامة عند المغارب توقد النار
تعشي نسبها أول قبال عشا الأطفال
وكان شفتها مع نسيبتها أحلفلك يمين تحتار
همهن واحد وشورن واحد متطابق الأفكار
أها دي قولك فيها شنو؟؟؟
ما تقول لي أنكحها لأني نكحتها قبل 15 سنة
| |
|
|
|
|
|
|
|
|
|
Re: لا تـنـكـحـــــوا.........هــــؤلاء النســـــوة (Re: سجيمان)
|
سمعت رواية منولة أن أخد المشايخ أتينه بعض النسوة وطلبن منه أن ( يديهن الطريق ) وهو أمر متعارف عليه في الفكر الصوفي السوداني
فأمرهن الشيخ بالجلوس ، وقال لهن : قبل الطريق أنا عندي ليكن كلام
فاستمعن إليه باهتمام
فقال الشيخ
المرة تلاتة
مرة مرة
ومرة نص مرة
ومرة ولا مرة
قالوا للشيخ كيف ياشيخنا ؟
قال المرة المرة من عتبة بيتها ولي ورا
والمرة نص المرة بتمشي لي جيرانها بالضرا
والمرة اللا مرة ناس السوق جابو خبرها
سأقيس أم قاسم اليوم لأتعرف على قدرها
وكل واحد يقيس مرته ، خطيبته
وعلى النساء أن يجدن مسطرة لقياس أزواجهن
ولغير المتزوجات أنصحهن بعدم وضع شروط مسبقة
| |
|
|
|
|
|
|
|
|
|
Re: لا تـنـكـحـــــوا.........هــــؤلاء النســـــوة (Re: سجيمان)
|
سجمتهن تب يا سجيمان
بس وين الآفاكة ، والكضابة ، والنمامة ، والغيابة ، والبهاته، ، و والحقوده والحسوده ، والوشواشه
والبقرانه..........
وهلم جرا
اخوكم/ ابوساره
************************************************************************
المكتوب لك الدهب المجمر تتحرق بالنار دوام
| |
|
|
|
|
|
|
|
|
 Re: لا تـنـكـحـــــوا.........هــــؤلاء النســـــوة (Re: الزومـــــــه)
|
الاخ الزومة
السلام عليكم ورحمة الله وبركاتة
والله الخبير الدكتور ما خلا لينا شي كل ما نقول نشوف لينا عروس يطلع لينا بي حكمة قبل فترة قال واحد مرتو مقعداهو في الشارع قافله الباب ومتحننه قالت لمان الحنه تشيل حتي تفتح الباب
يعني لو طلعنا من العداهم ديل ح نقع في التسد الباب وما تفتحو حتي الحنه تشيل
| |
|
|
|
|
|
|
| |
سجيمان
ابو جهينة
Mayada
أناقاصد الحريم الفوق
nile1
benyya
nadus2000
عشة بت فاطنة
shiry
دورنقاس
بدرالدين شنا
ودقاسم
انور عمر
albagir altahir
فيس بوك
تويتر
انستقرام
يوتيوب
بنتيريست