|
|
 المـــرواد فـي المكحلــــة
|
عباس ود امحمد ود خبير....راجل طيب ويا الله يفك الخط... و شوية فيهو الدروشه....جاني وشايل هموم الدنيا كلها.....قال لي:-
يا سجيمان اخوي... انا والمرا دي ...مرتي فاطنة الما بتغباها...دي.... طلعت بظبورطاتنا.. في يوم واااااااااحد....وجينا البلد دي.... اتاريهم يا سجيمان اخوي..... كاتبين في بكان الاسم في البظبورطي حقي... كاتبين مهنة...فاطنة.....ربة منزل..... يعني انا اسمي في البظبورطي حقي ربة منزل.....وكاتبين بكان الاسم حق فاطنة كاتبين اسمي انا....عباس ود امحمد ود خبير. والصورة صورة فاطنة بت على ود خبير... شوفت جنس القولاب دا؟.... اها يا سيد اللمنتي لك.... مشيت السفارة وقلت اصلح الشي ديل..... مشيت لموظف كدي... وحدستو بالنضم كلو... باللوال البظبورطي حقي... قال لي تمشي تدفع رسوم تغير اسم... قلت لو سمح... سعالني الاسم دا ليهو كم في البظبورطي دا... قلت لو ليهو سنة كاملة..... قال لي يعني حال عليهو الحول؟.... خلاص تمشي تدفع زكاة اسم برضو..... مشيت دفعتهن كلهن وجيتو تاني.... والله يا سجيمان الولد ماشاء الله عليهو نجيض جنس نجاض.... ومتعلم جنس تعليم ... الله يحفضو بس. لا سعلني لا نضم معاي... الولد بي طرف القلم يشطب التاء المربوطة.... ويعاين لي ويضحك ويقول لي... انا ما عارف الزول الكتب الاسم دا قاري وين؟... انت ضكر مفروض اسمك يكون رب منزل....مش ربة منزل؟ انتاية كمان......؟.......
اها يا سجيمان انتهينا من البظبورطي الِليلي..... جينا في بظبورطي فاطنة بت علي عمي...... قال لي لازمن المرا دي تجي تحلف انو دا ما الاسم حقها ....قلت لو يا ولدي المرا حسي والدة يا دوب لها اسبوع.... قال لي خلاص عشان انا اسهل عليك... وما اتعبك.... تجيب لي اربعة شهود عدول يكونو شافو المرواد في المكحلة....دا حين انا جيتك يا سجيمان اخوي وداير معاك تاني تلاتة ... تمشو تحلفو على انكم شفتو المرواد في المكحلة... عشان نغير اسم المرا دي.........
عباس وقت انتهى من نضمو دا... انا درت الواطا دي تتفتح و تبلعني....وشعّرت جلدي كلبّت...وتاني كدسّت..وتاني كلبّت....وقلت لو.... يا عباس كدي انت امشي لو باكر تاني .... قولو انا بجيب لك اربعة شهود يكونو شافو المرواد بس.... المكحلة دي يا عباس اخوي شوفتا صعيييييييييييييييبة وقاااااااسية.....ان عصلج عليك ادخل علي القنصل واقع لو في واطة الله دي واشحدو يأجل لك المكحلة للسنة الجاية وحسي يقبل بي شوفة المرواد....بي يقبل... باقي هو راجل طيب وعديِّل...ولي السنة الجاية يا عباس اخوي لها مية فرج... يمكن المكحلة تقع من نصيب ناس قرنق في التقسيم البي يقسمو فيهو دا...ونكون ارتحنا وريحتنا..........لكن عليك الله يا عباس اخوي وخسمتك بالذي خلقك... ما تمشي البلد وتتربع في نص العنقريب....وتقول للناس .... ناس سجيمان شافو المرواد... النضم دا بي يدخلنا في لوم وشكر..ويسوينا في شيل حال.....
|
|
 
|
|
|
|
|
| العنوان |
الكاتب |
Date |
| المـــرواد فـي المكحلــــة | سجيمان | 01-11-04, 02:44 PM |
| Re: المـــرواد فـي المكحلــــة | أبوالزفت | 01-11-04, 02:56 PM |
| Re: المـــرواد فـي المكحلــــة | ابو جهينة | 01-11-04, 03:15 PM |
 Re: المـــرواد فـي المكحلــــة | ترهاقا | 01-11-04, 04:18 PM |
| Re: المـــرواد فـي المكحلــــة | سجيمان | 01-11-04, 07:29 PM |
| Re: المـــرواد فـي المكحلــــة | سجيمان | 01-11-04, 05:01 PM |
| Re: المـــرواد فـي المكحلــــة | Hussein Mallasi | 01-11-04, 05:13 PM |
| Re: المـــرواد فـي المكحلــــة | سجيمان | 01-12-04, 11:48 AM |
| Re: المـــرواد فـي المكحلــــة | مراويد | 01-12-04, 08:54 PM |
| Re: المـــرواد فـي المكحلــــة | سجيمان | 01-12-04, 09:16 PM |
| Re: المـــرواد فـي المكحلــــة | abas | 01-12-04, 12:13 PM |
| Re: المـــرواد فـي المكحلــــة | سجيمان | 01-12-04, 08:15 PM |
| Re: المـــرواد فـي المكحلــــة | tariq | 01-12-04, 12:17 PM |
| Re: المـــرواد فـي المكحلــــة | سجيمان | 01-12-04, 09:50 PM |
| Re: المـــرواد فـي المكحلــــة | sentimental | 01-12-04, 03:31 PM |
| Re: المـــرواد فـي المكحلــــة | tariq | 01-13-04, 07:56 AM |
| Re: المـــرواد فـي المكحلــــة | سجيمان | 01-13-04, 04:26 PM |
|
| |
سجيمان
فيس بوك
تويتر
انستقرام
يوتيوب
بنتيريست