|
هيــع.... بنـوت الخــرتـوم
|
الفكي ود عمتي التاية.... جانا زمااااان زيارة في الخرتوم.... قال جاي عشان يتفسح....وديناهو جنينة الحيوانات لانو كان مصر اصرار شديد يشوفا....مقضي نهارو كلو مقابل الفيل...كل دقيقة... يصفق اديهو مستغرب فيهو ويقول....ابووووووب حلالي... الغول...ابوووب حلالي دي متعود يقولا كل ما تكيف وتبسط من شي....وقدر ما حدستو انو دا فيل ما غول برضو مصر انو غول......مشكلتي معاهو كانت كيف يقطع شارع الزلط.....انا اقطع الشارع وهو واقف بهناك وكل ما تجي عربية ماشة... يكورك لي ...آ سجيمان الخراااااااابة والله النصيبة كاتحة كتح... كاتحة يعني جارية بي سرعة....وكل ما يشوف لو بنات جايات يقعد يقول...هيع بنوت الخرتوم! زمن الدنيا بي خيرا متعودين نشرب شاي الصباح مع اللقيمات..والفكي كان بيريد اللقيمات ريدة شديدة....اول ما نجيبا يصنقر فوق العنقريب...ويفرك ايديهو ويقول ابووووووووب حلالي اللقيمات....ياكل الصحن كلو وبعد داك يسعلني....آسجيمان حسي باقي لك بعد الزردة دي في طريقة نفطر؟...... قال لي بنوت الخرتوم المملسات ويلصفّن ديل؟.... ما بنلقى لنا واحدة نسعاها؟....يعني نحبها.... قلت لو بتلقى علا يا الفكي اخوي...جنس نضمك دا يطفش ويطير البلد كلها... ان بقيت داير تغير نضمك..وطاقيتك دي ترجعها من جبهتك ورا شوية....وقول نضم حلو وسمح.... علمتو النضم الانا اتعلمتو برااااي من الجماعة.....لبس عراقيهو وجزمتو الباتا وقال لي امرقاكا...مرقنا وشايفين واحدة قدامنا....والفكي يتلفت علي...ويسرع في مشيتو ويقول لي يا جنا الكع الكع...نلحقها... بقينا قصادا.... كانت شايله قرطاس تسالي تاكل فيهو...وقلت للفكي يلا اتوكل علي الله...الفكي جا جنبها....وبدا يغازل.... وووووووووووين يا؟ احي انا......وين كدا ما ظاهرين...؟ احي انا..... لا بسين البمبي دا وما جايبين خبرنا؟ احي انا....بس تاكلو في التسالي دا برااااااكم زي القرود كدا؟ ما تدونا فص ولاّ فصين.... احي انا.....البنية اتبهطت واتهجمت واتحيرت في الزول البي يقولها وين ما ظاهرين دا و اللا ايدا لا كراعاطلعها قرد.....
|
|
|
|
|
|
|
|
Re: هيــع.... بنـوت الخــرتـوم (Re: سجيمان)
|
يا دكتور سجيمان هبع بنوت الهرتوم عندنا جارنا شرفى عوض تم تعين على ايام جنينة الحيوانات موظف الاستفبال فى الجنينه فرد عليه زوج خالته اه ياشرفى واكت اشتغلت في جنينة الحيوانات ننا تتفسح وين تانى
| |
|
|
|
|
|
|
Re: هيــع.... بنـوت الخــرتـوم (Re: almohndis)
|
إتخيلت شكل الطاقية فى راس ودعمك ده
تعرف مرة عندنا واحدة جات لى ولدها فى الخرطوم اول مرة وهى راكبة مع ولدها جو فى تقاطع قامت قالت لى ولدها اقيف خلى العربات تمشى، قام ولدها قال ليها يمه الشارع حقى قالت ليهو من متين؟
| |
|
|
|
|
|
|
Re: هيــع.... بنـوت الخــرتـوم (Re: ترهاقا)
|
سي جي الوارف صباحك بنكهة الغزل البريء
( ...الفكي جا جنبها....وبدا يغازل.... وووووووووووين يا؟ احي انا......وين كدا ما ظاهرين...؟ احي انا..... لا بسين البمبي دا وما جايبين خبرنا؟ احي انا....بس تاكلو في التسالي دا برااااااكم زي القرود كدا؟ ما تدونا فص ولاّ فصين.... احي انا )
غايتو الفكي دة لو كان قاعد في الخرطوم ، كان فات كازانوفا و كان بقى دون جوان خطير. و أنا شايف إنو الغزل بتاعو دة نابع من بيئته الريفية العفوية و لا غبار عليها ، إنت ما بتتذكر الشاعر كثير عزة قال شنو لعزة حبيبتو ؟ قال ليها : ألا ليتنا يا عز بعيرين نرعى في الخلاء و نعْذِبُ
يعني عاوز ينفرد بيها في الخلاء و يبقوا حيوانات عشان الناس ما يؤاخذوهم بتصرفاتهم.
أهم شي إنو ود عمك بعد كلمة أحى أنا ما قام ( جضم البنية ) لأنو كلمة أحى أنا دايما بتتبعها قرصة في الجضوم. أرقد عافية
| |
|
|
|
|
|
|
Re: هيــع.... بنـوت الخــرتـوم (Re: ترهاقا)
|
ترهاقا
Quote: قالت ليهو من متين؟ |
تعرف يا ترهاقا واحد بلدياتكم سواق تكسي في بورسودان....سايق قدامو ولد وقاعد يلعب بالعربية في الشارع....زولكم دا زهج منو وسكاهو..ووقفو ونزل عليهو.....وقال ليهو......ازيك يا ابني مبروك الشارع.... بكم اشتريتو؟
| |
|
|
|
|
|
|
Re: هيــع.... بنـوت الخــرتـوم (Re: سجيمان)
|
سجيمـان، أتـم شنـو واللا شنـو.. رحلـة الخـرتـوم للمـرة الأولى، واللا رحلـة باريس العجيبـة، واللا لما ضبحنـا الرغيقـة فى بيت الشبـاب.. واللا عايزنى أحكى ليك لمن شغـلونى مترجـم لواحـد عربى زائـر فى ألمانيـا!! بس خلينى أحكى ليك حاجـة سـريعـة من رحلتى لإيطاليـا سنـة 1987 الضباط فى المطـار أبـو يدخلونى لمـدة خمســة سـاعات، لحـد ما مشيت السيــر وطلعت الشنطـة وفتحتهتأ ووريتـوم الشيكات.. ولما جيت أرجـع تانى يوم أبـو يسـفـرونى، لأنى ما قضيت أيام كفايـة، شفت جنس المحنـة دى (طبعا دى كانت شركة الطيران والتذكرة كانت مشـروطـة بشـروط معينـة). المهـم مشيت لمـدينـة جامعيـة صغيـرة فى شمـال/وسـط البلاد، إسمهـا بيروجيـا.. لما جيت أرجـع، سـألت الناس فى المحطــة عن القطــر الماشى رومـا.. واحـد قال لى أقطـع القضيب الأول ، وإستنى فى الرصيف التانى.. والقطـر حيجى من ناحيـة اليمين.. بعـد شــويـة قرب مننا واحـد، وقال لى، الزول دا أدانى معلومات غلـط، لأن القطـر الماشى رومـا حيجى ماشى فى القضيب دا زاتـو، وعلى فقـط الإنتظــار.. الحصل بعـد دا إنـو النفـرين ديل إتشبكـو مع بعض، كل واحـد فيهـم يدافـع عن وجهـة نظـرو بصـوت عالى، وأنا ما فاهـم أى حــاجــة.. بلا بلالا... بلا بليللو... بلا بالوللللا.... بـرررررراكــو!......ماروديانى.... بعـد شـويـة جات واحـدة قالت لى انت ماشى رومـا؟ قلت ليهـا أاى.. قالت القطـر بتاع روما حيقيف بعـد دقائق هنا.. وفعلا جا القطـر، وكتوب عليـه رومـا وفى الواعيـد اللى حددتهـا المرأة بالضبـط.. لكن جماعتى يكوركـو فى شنـو ما تعـرف بعـد القطــر ما إتحـرك، وأنا أعاين ليهـم بالشبــاك، ولســه يكوركـو فى بعض!!
| |
|
|
|
|
|
|
Re: هيــع.... بنـوت الخــرتـوم (Re: سجيمان)
|
سجيمان ازيك..
نحن برضو عندنا فكى زى العندك...ده ود الخال جا عندنا فى الخرتوم مشى مع الشفع السوق الشعبي وٍسأل العربي بتاع العجلات:
عجلن تود ديه بيكم ؟ (ده برطانة الدناقلة و معناها العجلة الصغيرة دى بكم؟) اها دى بس انا السمعتها فى الجواب ..الله اعلم كان عجبتو بت الجيران ولا لا؟...
شكرا للطرافة سجيمان
| |
|
|
|
|
|
|
Re: هيــع.... بنـوت الخــرتـوم (Re: سجيمان)
|
سجيمان الفكى حقنا نحن...واقف جنب جامعة القاهره من الصباح
ومعاه ود اخوه ..كلما يجوا يمشوا يجى سرب من بنات الجامعه
وزولك حارن قبلوا ...لما الساعه بقت اتناشر..قام ود اخوه قال
ليهو يا اخوىالموظفين ديل كان مرقوا ما بنلقالنا مواصلات تانى
قام الفكى حقنا قال ليه: والله بنات الخرتوم ديل متل الرغيف الزول
اصلوا ما بشبع منهن،،،،،،
| |
|
|
|
|
|
|
Re: هيــع.... بنـوت الخــرتـوم (Re: سجيمان)
|
Salam Ya C.J by the way C.J di 3ala wazn D.J as it seems you are D.J of the board by making funny and intersting short stories.
Quote: <والله قرفان جنس قرف.........كعب خلاس |
| |
|
|
|
|
|
|
Re: هيــع.... بنـوت الخــرتـوم (Re: سجيمان)
|
سجيمان،
دى قصة واحدة من "بنوت الخرتوم" من بوست فرانكلى.
سعدية ---------
Quote: مقتل اشهر بائعة شاى تتحدث اللغة الانجليزية بطلاقة فى شارع الجمهورية Wednesday, March 31
سجلت الدار زيارة إلى محلية جبل أولياء منطقة دار السلام حيث يقام سرداق العزاء في وفاة الزوجة الخلوقة > أم جمعة عباس سليم < التي إنتقلت إلى الرفيق الأعلى بعد صراع مع الألم امتد لأكثر من عشرين يوماً وذلك على إثر إقدام المتهم > ···· < على تسديد طعنات لها نقلت على إثرها إلى حوادث الخرطوم حيث أجريت لها ·
عملية جراحية عاجلة وظلت بالإنعاش لمدة ثلاثة أيام وحولت إلى العنبر وظلت تتلقى العلاج إلى أن أسلمت الروح إلى بارئها نشأت أم جمعة في منطقة الكلاكلة وكانت طموحاتها أن تواصل تعليمها إلى آخر مرحلة نسبة للذكاء الذي تتمتع به ووصلت إلى المرحلة الثانوية وكانت والدتها تقوم بإعداد الشاي في نفس المكان الذي قتلت فيه ونسبة لعامل السن وصعوبة الترحال قررت الراحلة أن تواصل رحلة الكفاح واستلام العمل بدلاً عن والدتها وظلت تتكبد المشاق يومياً بالحضور في الصباح الباكر من جبل أولىاء دار السلام وتقوم بإيقاد النار وبيع الشاي للزبائن حتى أصبحت أشهر بائعة بشارع الجمهورية نسبة لتعاملها الأخوي مع المحيطين بها ·· وبحكم تواجدها تدخل في حياتها المتهم وحاولت مراراً منعه إلا أنه كان عنيداً حيث ظل يفرض نفسه رغم ما يحدثه لها من مضايقات وكانت تمني النفس بإنتهاء هذا الكابوس من أجل ولديها منتصر عمر الذي يواصل دراسته بالصف الثامن الإبتدائي وفائز الذي يدرس بالصف السادس وتطور الأمر أن عرض عليها الزواج وأخبرته بأنها مرتبطة وسوف يتم عقد قرانها وهي لا ترغب في الزواج وتود أن تعيش من أجل ابنائها والصعود بهم إلى أعلى مرحلة تعليمية ورغم ذلك لم تنته الأمور عند هذا الحد ·· وفي يوم الحادث حضرت أم جمعة إلى عملها كالمعتاد في حوالي الساعة السابعة صباحاً وكانت وقتها توقد النار استعداداً لبدء العمل فحضر المتهم وتحدث معها ودون مقدمات سدد لها طعنتين بالسكين التي كان يحملها وسط صيحات الألم التي انتابتها بعد ذلك حاول الفرار من مكان الحادث بالصعود إلى إحدى الحافلات إلا أن العاملين بمطعم البربري وأفراد الشرطة بالعلاقات البينية تمكنوا من إلقاء القبض على المتهم وإقتياده إلى قسم الشرطة شمال حيث دون في مواجهته بلاغ تحت المادة >139< الأذى الجسيم وقام الشاب يعقوب حسن تاور مع بعض العاملات في مطعم البربري بإسعافها إلى حوادث الخرطوم وظل مرابطاً إلى أن خرجت من العملية وبعدها إلى العنبر ·· ونسبة لما تتمتع به من سمعة حميدة وأخلاق فاضلة وكانت الراحلة تتمتع بإجادة اللغة الإنجليزية بطلاقة وكان الأجانب من السياح يرتاحون إلى الجلوس معها لساعات طويلة ويتحدثون معها وهم معجبون بلغتها واجادتها اللغة الإنجليزية وحتى عندما علموا بإصابتها سجلوا لها زيارة في المستشفى متمنين لها عاجل الشفاء إلا أن الأقدار كان لها رأي آخر حيث فاضت روحها الطاهرة إلى بارئها مخلفة ورائها ألماً وحزناً وجرحا محال يداويه طبيب وحتى قبل أن تفارق الحياة كانت توصي الزائرين على ابنائها إذا حدث لها مكروه ·
وداخل سرداق العزاء وبصحبة أخوها في الله يعقوب حسن تاور مع سائق أمجاد اسماعيل حسن عبد القادر التقينا بأشقائها عبد الوهاب وعبد الخالق حيث كانت علامات الحزن تطل من أعينهما وأفادنا عمر محمد خميس بأنه سبق وأن حذر المتهم من معاكستها وكاد الأمر أن يتطور إلى مشاجرة ، وأفادنا بأنه كان ينوي الزواج منها إلا أن الأقدار اختطفتها في لحظة كان الجميع في حاجة لها حيث كانت تمثل لأفراد الأسرة الرمز الشامخ في الكفاح من أجل اللقمة الشريفة كما تسابق العديد من أخوتها في الله إلى سرداق العزاء عند سماعهم لهذا النبأ الأليم ·· وكان مندوب صحيفة > الدار< قد سجل لها زيارة في المستشفى وطلبنا منها أن تروي لنا أسباب الحادث فقالت إنها سوف تروي كل شئ عند خروجها من المستشفى إلا أن يد المنون كانت أسرع وعن حقيقة مبلغ التسعة ملايين سألها أخوها في الله إن كان المتهم قد صرف عليها هذا المبلغ فأجابته إذا كنت أملك هذا المبلغ فلماذا أبيع الشاي؟!!· بعد ذلك غادرنا هذه الأسرة المكلومة بعد أن رأينا مدى الحب الذي تتمتع به الراحلة ويعكف المتحري في البلاغ على متابعة الإجراءات بعد وفاة المرحومة لتحديد وجهة سير البلاغ والمادة بعد أن تكتمل كافة الإجراءات لها الرحمة والمغفرة ولآلها الصبر والسلوان · >إنا لله وإنا إليه راجعون< ·
عن اخبار اليوم السودانية |
| |
|
|
|
|
|
|
Re: هيــع.... بنـوت الخــرتـوم (Re: Raja)
|
رجا
Quote: لغاية ما البت وقفت جنب قفص الزرافة، قام قريبك قال بصوت عالي: الله على الفيل ده. |
طيب الفكي ما قال للفيل.....غول؟....ومافي ولا واحدة صلحتو....والله جنس اضطهاد
| |
|
|
|
|
|
|
Re: هيــع.... بنـوت الخــرتـوم (Re: سجيمان)
|
Quote: طبعا لي يومين بحوم حوالين بوستك الممسوخ ده بتاع المشاغلات |
رجاء كلامك صحيح و الله:
البوست ده يكرس للقوالب النمطية حول "بنات الخرتوم" و ايضا "قوى الريف"! وواحد اختزلهن الى "رغيف" عديل كدة!!!
سعدية النكدية
| |
|
|
|
|
|
|
Re: هيــع.... بنـوت الخــرتـوم (Re: سجيمان)
|
انت يا زول لسة من زمن الفكي البجيب الرجال وبزيد المال هسة الفكي بقي بجيب الهوا.. والله انا مشيت لي واحد من شيوخ البلد دي كان أفك العارض وبعد ما أديتوا البياض مية ريال سعودي والراجل فتح الكتاب يادوب...الساعة الخشوا علينا ناس الهيئة بي دقونهم الكبيرة دي وشيخنا كب الزوغة وانا بقيت في حيص بيص ومرقت بي الجليل الرحيم..عليك الله فكنا من السيرة دي وخلينا فوق جنينة الحيوانات دي ...وانت مسعول من الخير ياخي الجماعة ديل ما باعوها؟؟؟
| |
|
|
|
|
|
|
Re: هيــع.... بنـوت الخــرتـوم (Re: سجيمان)
|
Quote: ندى امين
Quote:
رجاء كلامك صحيح و الله:
البوست ده يكرس للقوالب النمطية حول "بنات الخرتوم" و ايضا "قوى الريف"! وواحد اختزلهن الى "رغيف" عديل كدة!!!
سعدية النكدية |
يا سجيمان حسه ندى أمين دي فتحت خشما؟ غايتو شد حيلك دي طوالي شكوى حاره لبكري عشان ترصد سجيمان لي بسب و بدون سبب يلا استعد الايقاف لأجل غير مسمى جاييك من بكري حسع دي
و أحي يا ربي بتين نشوف الخرتوم!
| |
|
|
|
|
|
|
Re: هيــع.... بنـوت الخــرتـوم (Re: maia)
|
مايا
Quote:
لكن المشاغلة ما عند الفكي ود التاية ، قطع شك الزول ده من زمن كازينو حماد العايم |
ايوا هو من الزمن داك..... لكن ما كان عندو شغلة علا يوم والتاني ناطي ماشي جنينة الحيوانات....... كل زول وسغافتو
| |
|
|
|
|
|
|
Re: هيــع.... بنـوت الخــرتـوم (Re: سجيمان)
|
سجيمان يا رائع والله زكرتني المراة الشايقية الجابوها افسحوها في جنينه الحيوانات وكل ما تشوف ليه حيوان تسال والدها دا شنو يا ولد؟؟ اقول ليه دا القرد يمة تقول ليه حلاته ما تجيبنا لينا واحد زي دا نسوق معانا البلد....دا شنو يا ولد؟؟ دا الغزال يمة... تقول ليه حلاته عليك النبي تجيب لنا واحد زي في البلد يا محمد ... ولمن وصلت عند الزرافه قبلت وشها منها قادي وقالت بس ولدها قال ليه دي مالك ما سألتي منها يمه؟ قالت ليه دي ما بنتفع معانا.. بتخرت التمر
| |
|
|
|
|
|
|
|