|
|
 احزابنا ماوعت الدرس ...احزابنا عايشة علي السراب...
|
احزابنا ماوعت الدرس
احزابنا عايشة علي السراب
احزابنا ما احزاب بناء
احزابنا تعمل في الخراب
احزابنا في الخارج شكل
من جوة فوضي واضطراب
احزاب تضيع في الزمن
احزابنا ادمنت الغياب
*********************
احزاب بعيدة عن الهموم
جوة الوطن عايشة اغتراب
هم المواطن جد بسيط
عايز اكل داير شراب
والله لو كان لاقى عيش
ماكان بنسمع باغتراب
والله لوكان لاقي عيش
ماعاني فرقة واحتراب
والله لو كان لاقي عيش
ماكنا سافين التراب
*****************
في شمالنا قهر وجوع وظلم
وجنوبنا سالين الحراب
في شرقنا سل نخر العضم
وغربنا فرقة واحتراب
***********************
خرطومنا..... داخلك نيل حزين
شايف البلد... عايشة في عذاب
عانت ضفافو من الالم
شاقي الدروب من غير اياب
في رحلة عبوره السرمدى
مليان زهو ومليان شباب
لمن عرف حالة الوطن
غادر حزين صابو اكتئاب
*******************
وشباب مغادرين الوطن
من بعد ما عانوا العذاب
مليون ونص في مصر دي
وكمين وكم في مدن ضباب
ورحلات عبور للاطلسي
لمدن هناك فوق السحاب
وشباب مغادرين الوطن
من بعد ما عانوا العذاب
فقدوا الامل لما الوطن
باعوه بصكوك اكتتاب.....
باعوا النخيل والنيل كمان
باعوا الحجر باعوا التراب
واحزاب بعيدة عن الوطن
جوة الوطن عايشة اغتراب
**********************
محزون انا واه ياوطن
من العليك صابك مصاب
منحوسة يابلد الجدود
محكومة بي مركوب وكاب
نوفمبر 2006
|
|
 
|
|
|
|
|
| |
wesamm
فيس بوك
تويتر
انستقرام
يوتيوب
بنتيريست