|
|
 Re: ضرب شديد من اجهزة الامن و الشرطة ... واعتقالات واسعة في الخرطوم (Re: Waly Eldin Elfakey)
|
قصيدة: أُغنية للشوارع (هاشم صديق)
إتعلمت منك يامُدَرِسَّة
يا شوارع
كيفن أجمع وعي وفكرة
وتبقى مبدأ
وكيفن أدرس
كيفن أحسب
قبل أبدا
وكيفن أطرح
كلُ خاين فى بلدنا
من عددنا
وكيفن أسمع
وكيفن أقرا.
***
إتعلمت منك يا مُدَرِسَّة
يا شوارع
كيفن أسأل لما تغلبني المعاني
وياتو مرجع من دروسك
بلقى فيهو المعنى تاني
وكيفن أصمُد
لما تجتاحنا العواصف
وكيفن أحمل راية إسمك
بيها صابر وديمة واقف.
***
إتعلمت منك يا يا مُدَرِسَّة
يا شوارع
كيفن أضحك للبنادق
لما تعدل طلقة طلقة
وكيفن أبصُق فى المشانق
لما تَختَا
وكيفن إختار البعجبك
وكيفن أرفض
وكيفن أبقى.
والليلة مالك
يا مُدَرِسَّة يا شوارع؟!
ساكتة مالك؟!
هيجي .. موجي
إتحركي .. إتكلمي
عيدي عرسك يا شوارع
وبي دمانا إتحنني
وما تحزني
ما تحزني
ما تحزني
الدم حريرتِك
والهتاف إيقاع رقيصك
والغضب كُل الغضب
تاجك ضريرتك
***
ساكتة مالك
يا شوارع يا مُدَرِسَّة
والكلام حقك كتابنا
وسيفنا ده البعرف خلاصنا
ساكتة مالك؟!
والكلام أصبح رخيص
جوه الدفاتر
للبزيفوا والمنافقين
والعساكر
وللزمان كان فى صفوفنا
وباع قسمنا وفاتنا ناكر
***
يا شوارع يا مُدَرِسَّة
زيدي درسك وعلمينا
وأبقي ديمة المعنى فينا
خير يدفق
ونور بيشرق
فى البوادي وفى المدينة
وقولي لي تاريخنا سجل:
ولو غلطنا
تاني صححنا وصحينا
ولو زمان سوونا مُتنا
حِصة من درسك حيينا
بس يا شوارع فتحي
وإتكلمي وإتفجري
وهُزي المدينة.
***
يا شوارع يا مُدَرِسَّة
ياما إتعلمنا منك
التجارب هي الإجابة
والمباديء معنى حاسم
وماها ترنيمة كتابة
والخزاين فى قصُور السادة
خيرك
وإنتي خيرك للغلابة
والشرف حقك إسمنا
وليهو بنخوض الحرابة
ولسة قولي وعلمينا
الدروس الليلة واجبة
وإنتي فى دروسك أمينة
إتحركي وما تخذلينا
إتكلمي وماتخذلينا
هزي سيفك وخلصينا
من لصوص آخر الزمان
الهاصو فى جامع
المدينة
وريحينا
يا شوارع
يا مُدَرِسَّة
يا أمينة
| |
 
|
|
|
|
Waly Eldin Elfakey
Mustafa Mahmoud
فيس بوك
تويتر
انستقرام
يوتيوب
بنتيريست