تماضر شيخ الدين مهكورة

Quote: نفسى إحتارت من نفسى ، أظنى فى حاجة لطبيب (نفسى) ، وطبيب نفسى أراه فى الجمال وفى الحلاوة وفى الرشاقة وفى الظرافة وفى خفة الدم وفى المحبوبة وفى ضفائر شعرها ، وفى دلالها ، وفى دلعها ، وفى شبابها ، وفى نضارتها ، وفى خشيمة ، وفى جضوما ، وفى نخرتا ، وفى ضحكتا ، وفى زعلا ، وفى فرحا ، وفى بكاها وفى ضحكتها ، وفى عوارتا ، وفى لتاختا ، وفى نوما ، وفى صحيانا ، وفى رقيصا ، وفى مذاكرتا ، وفى مدرستا ، وفى شارع بيتا ، وفى حلتنا ، وفى كواريكا ، وفى نشفان ريقا ، وفى حنتا ، وفى دلكتا ، وفى أصبع كراعا السغير ، وفى خصرها ، وفى أردافا ، وفى أكتافا ، وفى برتكان يافا ، وفى وسخا ، وفى حماما ، وفى فرشة أسنانا ، وفى هدوما ، وفى ريحتا ، وفى بلادتا ، وفى نوناتا ، وفى بت أم لعاب ، وفى اللعاب الجوة خشيمة ، وفى المنقة لما تبقى صفراااااا ، وفى الحنة لما تشيل ، وفى البوخة لما تمسك فى هدوما ، وفى خطها الشين ، وفى مخها التخين ، وفى الحب البيجى بلا سبب ولا مواعيد ، وفى قعادها وسط صاحباتا ، وفى غسيلها للعدة ، وفى نشيف هدوم أخوانا السغار وعليقهم فى الحبل ، وفى الهواء لما يرفع الفستان شوية ، وفى رقادا لما يجيها مغس ، وفى قعدتا فى حفلة العرس ، وفى مكياجا الأشتر ، وفى أكلها اللبان ، وفى وحما ، وفى عدم فهما ، وفى عنادها وفى صرة وشيها البتزيدوا الصرة حلا ، وفى حواجبها لما ترد عليك بى مزاج ، وفى حركاتا ، وفى سكناتا ، وفى قرايتها للجريدة ، ولما تتفرج فى سبيس تون ، ولما تغنى مع نانسى عجرم ، ولما تدق الدلوكة ، ولما تشغل ليك شريط مخستك ، ولما ترسل ليك جواب نصو ما مفهوم بسبب رداءة الخط ، ولما تغمض عيونا ، ولما تفتحهم تانى ، وفى رقبيتها الزى قزازة العصير ، ولما تقول ليك أدينى معاك نفس حق شيشة ، ولما تعوم فى البحر ، ولما تسك الجداد عشان تجيب واحدة للغداء ، ولما تتفنقل من العنقريب وهى نائمة من شدة البراءة ، ولما تشاكلك وتزعل منك وتحرد كلامك ، وتقبل على الحيطة ، ولما تركب معاك العربية ، وتقول ليك شغل لى ندى القلعة ، ولما تحاكى واحدة سغيلة مزهجاها ، ولما تغيب عن الميعاد ، ولما تكضب عليك ، ولما تقول ليك فسحنى أنا زهجانة ، ولما تديك شاكوش ، ولما أمها فجأة تجى داخلة وتقوم من جمبك زى الجاتا مصيبة ، ولما تعمل ليك كباية شاى ، ولاّ قهوة ، ولا تجيب ليك موية باردة وتلمس إيدا قبل الكوز ، ولما تقول دى شنو الهبلة دى وتلقى روحك مشيت ليهم تانى ، ولما تكتب ليك شعر ما موزون كلو كلو ، ولما تحكى ليك قصة حياتا المافيها شى مثير ، ولما تقول ليك ماشين السوق مع ناس حياة ، ولما تجى من السوق عرقانة وجيعانه ، ولما هدوما تكون وسخانة ، وفى باقى ملاح خدرة فى الإسكيرت ، ولما تأكل ملاح ويكة بى صوابعين سغاااااااار ، ولما تقول ليك ما باكل فسيخ ، ولما تضوق الشطة بالغلط وتقوم تتوحوح وتجرى على الموية جرى ويعتر ليها سلك التلفون ، ولما تقابل صاحباتا ولما تفتح ليك الباب ، ولما تمرق منهم يازول حكايتى عجيبة خلاص ، عليكم الله يا ناس بورتسودان ما تزعلو منى ، عشان الوصفتها دى من (بورتسودان) وما بيتلقى زيها فى أى حتة فى الدنيا