|
|
|
 Re: فرقة جاز وليم اندريه (Re: برهان تاج الدين)
|
بــــرهان ..
ما طالبني حليفة .. قدرما حاولته وحاولته أني اللقي حتى لو بصيص أمل في وليم اندرية ما قدرته ..
كل السمعتو ليهو ... كفاية مزاح .. بالتسجيل القديم في تلفزيون السودان .. ومباراة في كرة السلة ..
فتشت كتير جدا هنا في اسواق الكاسيت والفيديو وبعض الاصدقاء ما لقيت ..
وليم اندريه وفرقته .. وجاز الديم .. وفرقة العقارب .. وحاج عبدو .. فرق مرت على ذاكرة الاغنية السودانية في زمن جميل جدا بالرغم من اننا ما عشنا تفاصيلو إلا أنو معالمو كانت واضحة جـــدا ..
وين المارشال كوستاوي ؟؟
اكيد زمان ما كان بيفوت حفلة لي وليم أندرية..
وين الناس دي ؟؟
| |
 
|
|
|
|
|
|
|
|
Re: فرقة جاز وليم اندريه (Re: tmbis)
|
تامبا ازيك
| Quote: وليم اندريه وفرقته .. وجاز الديم .. وفرقة العقارب .. وحاج عبدو .. |
الكريسداس .. Blue Stars .. Waves
كميات من الغنا راح ساااكت .. لم يصمد منهم غير شرحبيل
و المفلهم التانى داك .. جيلانى الواثق.
( لكن لقيتك قديم كيف  )
فى انتظار المارشال كوستاوى ..
تحت تحت دينق عندو شوية تسجيلات لكن عامل مجنون .. كدى نشوف اخروا ..
| |
|
|
|
|
|
|
|
|
 Re: فرقة جاز وليم اندريه (Re: برهان تاج الدين)
|
| Quote: الكريسداس .. Blue Stars .. Waves |
..
عليك الله في اقدم منك حسع يا برهان .. تعرف الناس ديل أبوي زاتو ما يكون متذكرهم
غايتو انا لحدي الآن بتذكر التسجيل بتاع وليم ده لما كان التلفزيون واحد بس في الحلة ولازم يكون ابيض واسود .. الكلام ده يا برهان في بداية التمانينات طبعا شان ما تسرح بي
..
| Quote: تحت تحت دينق عندو شوية تسجيلات لكن عامل مجنون .. كدى نشوف اخروا .. |
المارشال كرمبا ما عندو قشة مررهـ بتحنك بسرعة كان جاء ماري بي هنــا بس إلا يكون اتعلم ليهو حركات جديدة ..
لكن دينق والله ( تفطس ) هنــا ما يهببو ليك وكان ربنا هداهو وجاك داخل بيجي ( يشدها ) ليك .. لكن شايفو مركب مكنة رومانسي في بوست معتصم ومتجدع في خوجلي عثمان ..
| |
|
|
|
|
|
|
|
|
|
Re: فرقة جاز وليم اندريه (Re: برهان تاج الدين)
|
لا اعرف ان كان الموضوع مرتبطا بيوم ان قتل وليم اندريا في الخرطوم غرب بيد احد جنود القوات المسلحة بعد فشل انقلاب المرحوم محمد نور سعد في الثاني من يوليو 1976 ولقد ثارت حينئذ اشاعة بان حركة محمد نور هي غزو ليبي ثم قيل غزو حبشي واريتري واختلط الحابل بالنابل في الايام الاولي وانتشر القتل العشوائي وكان وليم احد ضحاياه ,, وليام كان لاعبا لكرة السلة بارعا وفنانا عظيما
| |
|
|
|
|
|
|
|
|
|
Re: فرقة جاز وليم اندريه (Re: abubakr)
|
| Quote: لكن دينق والله ( تفطس ) هنــا ما يهببو ليك وكان ربنا هداهو وجاك داخل بيجي ( يشدها ) ليك .. لكن شايفو مركب مكنة رومانسي في بوست معتصم ومتجدع في خوجلي عثمان |
كدى يجى يجدع لينا حاجة من وليم .
بعداك اليشدها زى ما يشدها . يمين افوت ليهو البوست كان داير .
المارشال كرمبا داك غايتو زولك ..
| |
|
|
|
|
|
|
|
|
|
Re: فرقة جاز وليم اندريه (Re: برهان تاج الدين)
|
الاخ ابوبكر .. شكرا للمداخلة
| Quote: لا اعرف ان كان الموضوع مرتبطا بيوم ان قتل وليم اندريا في الخرطوم غرب بيد احد جنود القوات المسلحة بعد فشل انقلاب المرحوم محمد نور سعد في الثاني من يوليو 1976 ولقد ثارت حينئذ اشاعة بان حركة محمد نور هي غزو ليبي ثم قيل غزو حبشي واريتري واختلط الحابل بالنابل في الايام الاولي وانتشر القتل العشوائي وكان وليم احد ضحاياه ,, وليام كان لاعبا لكرة السلة بارعا وفنانا عظيما |
نعم هى نفس الحادثة للاسف . نحن طبعا جيل مايو - تامبا دة اقدم شوية كدة - وعرفناها (حركة المرتزقة).
و قتل وليم اثناء الاشتباكات . لماذا ؟ و اين كان ؟ و الجندى دة صحى دخل ليهو جوة البيت ؟ ...
و اسئلة كثيرة يا صديقى عن حادثة ضبابية راح ضحيتها فنان عظيم كما تفضلت .
| |
|
|
|
|
|
|
|
|
|
Re: فرقة جاز وليم اندريه (Re: برهان تاج الدين)
|
انتشر حينئذ ان المرتزقة هم ارتيريون فقبض علي كثير منهم وكان العسكر يطرق الابواب ويداهم البيوت وحتي يطلق علي بعض منها حمم مدافع (كما حدث في مربع واحد الصحافة) بحثا عن مرتزقة (ليس لهم وجود اصلا ولكن كل بيت به عزابة مثلا ولا يعرفهم الجيران يكون حينئذ مشبوها ).. كان الجنود العسكر في تشتت وتعب شديد وكن طلق النار دون تركييز شائعا ويقال حينئذ وفي منزل في الخرطوم غرب طرق العسكر او داهمو منزلا كان به وليم واصدقاء فخرج اليهم وليم وكان ذو سمة تشبهه باهلنا في الشرق - الارتيريين- ويقال انه دخل في نقاش او ما شابه ذلك مع العسكر فاردوه قتيلا ظنا منهم انه من المرتزقة.. كثيرون مثله قتلو دون ذنب حين اختلط اهل الانقلاب بالناس والجيش السوداني وكانت ايام شد عصيبة .... بقي من فرقة وليم حينئذ اخاه -كنت اعرفه شخصيا ولكن غاب اسمه عن ذاكرتي الكهلة - وكان لايشبه وليم في سمته وفنه وبقيت كذلك اخت له ولا اعلم اين هم الان ...
| |
|
|
|
|
|
|
|
|
|
Re: فرقة جاز وليم اندريه (Re: abubakr)
|
| Quote: بقي من فرقة وليم حينئذ اخاه -كنت اعرفه شخصيا ولكن غاب اسمه عن ذاكرتي الكهلة - وكان لايشبه وليم في سمته وفنه وبقيت كذلك اخت له ولا اعلم اين هم الان ... |
العزيز أبوبكر .. فعلا شقيق وليم اندريـــه على ما اعتقد هو من تولى امر الفرقة من بعــده .. ومازلت اذكر ملامحو من خلال تسجيل أغنية كفاية مزاح بالتلفزيون السوداني وعلى ما اعتقد الآن لا وجود لهــا..
| Quote: تامبا دة اقدم شوية كدة |
برهـــان ..
يازول مافي طريقة ليك .. ايام مايو بتذكر كنا صغااااار بنقيف في خور ابوعنجة شان نشوف الالعاب النارية الوكت داك بتكون أنت كنت في الطلائع والرواد ..
كدي انداح شويـــة انا خايفك بعدين تكون لعبت مع المرحوم في الفريق القومي بتاع كرة السلة.. يا كنت بتوصل الفرقة بالحافلة بتاعتك وجاي تعيد لينا شريط الذكريات
| |
|
|
|
|
|
|
|
|
|
Re: فرقة جاز وليم اندريه (Re: tmbis)
|
يابرهان تاج الدين تسلم كتير ياخي ... انا بحب وليم اندرية دون ان اراه او اسمع له الكتير بس بفكرة انه من رواد التجديد في الموسيقي السودانية خصوصا الجاز ....عنما كنت في الجامعة غنيت في فرقة سلام الموسيقية وتزامن ذلك مع وجود فرق مثل ( القلب النابض وفرقة لوماريكا وهم ناس غنو بنفس الاحساس القديم في لونية الجاز السودانية ..انا حاديك اسماء ناس اعتقد انهم حيكونوا بعرفوا وعندهم اشياء لوليم اندريه منهم الاخ محمود السراج من سلام الموسيقية وايضا الاخ عاصم الزين وهو من رواد (البلوستارز ) موجود الان في السعودية والاخ ممدوح طلعت فريد دة لو كان لسه في السودان ....
طبعا دة حسب مكان تواجدك انت وانت وين اراضيك ....
التحية ليك .زاقترح في زمان ما ومكان ما ان يقام مهرجا نموسيقي يكون ثابت علي شرف اراحل المقيم وليم اندريه.
دمت وتحية لجميع المتداخلين
الهام عبد الخالق
| |
|
|
|
|
|
|
|
|
|
Re: فرقة جاز وليم اندريه (Re: TahaElham)
|
للتوثيق : كانت هنالك فرقة اخري تقاسمت ليالي الخرطوم(في اندية الجاليات : ابولو والايطالي والسوري والقبطي...وسانت جيمس الخ) - منذ نهاية الستينات حتي مننتصف السبعينات - مع فرقة وليم اندرية (ذات الصبغة العائلية ) تلك فرقة سام اليكس ( سمير اسكندر) وكان ابن تاجر معروف يبيع الرخام .. فرقة سام الكس بلغت ذروة شهرتها في العام 71 واذكر ان بداءنا بها في قسم المعمار بجامعة الخرطوم اولي حفلات المعمار في نادي ابولو-الاغريقي-في ديسمبر 71والتي صارت فيما بعد حفلة سنوية ..واذكر انن ذهبت اليه في منزلهم في العمارات للاتفاق معه وكان ياخذ مبلغا خرافيا بحساب ذلك الزمن جمعته من ريع تذاكر الدخول وريع عرض ازياء تبرعت به اول عارضة للازياء وربما اخر واحدة عائشة عمر ...كلتا الفرقتيين كانتا راقية ومنضبطة ومجددة في زمن لم تظهر فيه قنوات فضائية ولكن كانتا مواكبة لعصرها
| |
|
|
|
|
|
|
|
|
|
Re: فرقة جاز وليم اندريه (Re: abubakr)
|
الاخت العزيزة الهام .
شكرا كثيرا لمداخلتك الحلوة .
سعيد جدا بمعرفة انك كنت احد اعضاء سلام .. لوقت قريب كنت احتفظ باداءكم الرائع لاغنية ( صدر المحافل ) .
شكرا شديد يا الهام على الاسماء .. فى الحقيقة اعرف ميسرة من بعيد لى بعيد .. و حتما سالجأ له فى هذا الموضوع .. انا مقيم بين دبى و اثيوبيا ... و لكنى اعدك باستهداف هذا الموضوع فى اول زيارة للاخ ميسرة و كذلك لدى الان اسم شخص يعمل فى محل بشارع الجمهورية يقال انه كان احد اعضاء فرقة وليم اندريا و يمتلك الكثير من التسجيلات .
و انشاء الله نقدر نلم حاجات للناس اللى جو قبل زمنهم ديل . يعنى هسة من المفارقات انو وليم اندريه كان معاصر ناس ابوى و جدى ادريس - و يمكن تامبا دة لمن كان صغير .. و ديل شايفين الغنا بتاع ناس وليم دة زى كلام الطير .. و نجى نحن نبحت و نفتش .
غايتو ربك يهون ..
شكرا تانى يا الهام يا ذوق .
| |
|
|
|
|
|
|
|
|
|
Re: فرقة جاز وليم اندريه (Re: برهان تاج الدين)
|
| Quote: للتوثيق : كانت هنالك فرقة اخري تقاسمت ليالي الخرطوم(في اندية الجاليات : ابولو والايطالي والسوري والقبطي...وسانت جيمس الخ) - منذ نهاية الستينات حتي مننتصف السبعينات - مع فرقة وليم اندرية (ذات الصبغة العائلية ) تلك فرقة سام اليكس ( سمير اسكندر) وكان ابن تاجر معروف يبيع الرخام .. فرقة سام الكس بلغت ذروة شهرتها في العام 71 واذكر ان بداءنا بها في قسم المعمار بجامعة الخرطوم اولي حفلات المعمار في نادي ابولو-الاغريقي-في ديسمبر 71والتي صارت فيما بعد حفلة سنوية ..واذكر انن ذهبت اليه في منزلهم في العمارات للاتفاق معه وكان ياخذ مبلغا خرافيا بحساب ذلك الزمن جمعته من ريع تذاكر الدخول وريع عرض ازياء تبرعت به اول عارضة للازياء وربما اخر واحدة عائشة عمر ...كلتا الفرقتيين كانتا راقية ومنضبطة ومجددة في زمن لم تظهر فيه قنوات فضائية ولكن كانتا مواكبة لعصرها |
والله يا باشمهندس دة كلام ممتع جدا ..
استمعتم بالخرطوم فى ايام جد كانت حلوة ..
عروض ازياء عديل كدة .. و الله انتو ناس راقيين .
على العموم ارجو ان تواصل فى التوثيق .. ولنحاول اكمال هذا البورتريه المثير للخرطوم فى عصرها الذهبى .
| |
|
|
|
|
|
|
|
|
|
Re: فرقة جاز وليم اندريه (Re: TahaElham)
|
اثر الجاليات الاجنبية وما تركه الانجليز من اندية وقاعات للتسلية محدودة استمر حتي منتصف او نهاية السبعينات ...العاصمة لم تكن بحجم اليوم حتي نهاية الثمانينات فلذا فان تلك الاندية ةالقاعات كانت كافية لاستيعاب اعداد ترتادها يوميا للعشاء والاستماع الي موسيقي فرق سودانية او اجنبية ..قاعة او ملهي سانت جيمس في الخرطوم شرق كانت كثيرة الرواد ولكن باتزان ..صالة غوردون في الخرطوم غرب كانت لفئات قادرة علي كلفتها العالية حيث كانت الصالة تاتي بفرق للرقص والاستعراض من كل انحاء الدنيا.. اندية الجاليات عرفت وصنفت وفق ما تقدمه من وجبات ومنها من كانت تاتي بفرق غنائية يومية او اسبوعية او موسمية ( راس السنة والكريسماس ).. كان نادي التنس كذلك من الاندية التي تاتي بمثل ذلك ... معظم الفرق الغنائية كانت سودانية التكويين غربية الاداء والغناء الا شرحبيل احمد وربما كمال كيلا في بعض اغانيه ...
وليم اندرية كان نتاج لهجيين سوداني اغريقي اثيوبي فجاء فيه من كل ذلك و كثير من الملامح الاثيوبية وكان رشيق القامة رياضي الجسم (ليس كاخيه ممتلئ الجسم ) بارعا في لعبة كرة السلة كبراعته في العزف والغناء... سمير اسكندر لم يكن رياضيا ولكن بارعا في عزفه وغناءه يحاكي فرق الغرب المعروفة حينئذ.. كانت هناك مغنية صغيرة من غرب افريقيا تاتي الي الخرطوم بانتظام - ذهب اسمها عن ذاكرتي -وتقييم شهورا وكانت كذلك ماريام كيباموجودة باستمرار والتي رايناها عجوز في فبراير الماضي تحضر المؤتمر الافريقي في الخرطوم .. كانت الفرق الاثيوبية والصومالية في تواجد مستمر حيث يعشق غناؤها سواد الشعب السوداني .. ووسط كل هذا كان للفنانين السودانيين المعروفين حينئذ في هذه الانديةتواجد ظاهر في المناسبات العامة ...كانت بعض الحدائق العامة-حديقة بحري -الريفيرا ..الخ - تاتي بفرق وفنانيين في المناسبات ولكنها كانت ملاذ التجمعات الصغيرة من طلاب وموظفيين ياتون للعشاء وفيهم صاحب صوت جميل يغني او تاخذهم نشوة فيصدحون كلهم بغناء ثم ينفض السامر دون ضجيج سيرا او محشوريين في سيارة واحدة ...
لم يكن لهوا ماجنا وكان فيه كثير من الاستمتاع الهادئ حاله حال اهل السودان حينئذ ..كانت اصوات الموسيقي تتسرب بايقاعاتها السودانية الغربية الافريقية المختلفة من تلك الاندية والصالات الي ليل الخرطوم الهادئ " الليل الهادي كما يغني شرحبيل "...
| |
|
|
|
|
|
|
|
|
|
فرقة جاز وليم اندريه (Re: برهان تاج الدين)
|
كان وليم اندرية اسما لامعا فى مجال الموسيقى و الرياضة -كرة السلة- و كان من ابرز اللاعبين فى السبعينات فى كرة السلة. و قتله بعض الجنود جوار منزله ظنا منهم انه من (المرتزقة)!!
تلك الفترة كان مع وليم اندريه اخوه عازف الجيتار بوب اندريه. و له كثير من المؤلفات لكن للاسف فان تسجيلاتها كلها شخصية و لم تهتم الاذاعة بالتسجيل لفرق الجاز فى تلك الايام..
كان هناك فرقة اخرى تضم طلاب من جامعة الخرطوم و اعتقد انها (الرير ايرث) و كانت تضم طونى اسود و شاشاتى من كلية الهندسة فى ذلك الوقت.
اما فرقة (البلو ستارز) فكانت تضم عاصم زين و السر و ابورزقة والدرديرى و هى الفرقة التى عزفت مع جيمى كليف عندما حضر للسودان فى منتصف السبعينات.
و تلك كانت بدايات الجيلانى الواثق الذى برز باسلوب جديد على الساحة الفنية باغنيات مثل ( يل عيونك .. ولا واحة .. ولا للشوق استراحة) .
و المرحلة التى تلت ذلك برزت فيها فرقة (العقارب) و غيرها فى الخرطوم بحرى و برز فيها العازف المرحوم تيسير و نادر و فاروق و ناجى .. و انتقلوا الى مصر فى نهاية السبعينات ليعزفوا فى فندق الليدو..
اما ممدوح طاهر فريد و الذى يعمل الان استاذا للموسيقى و الذى كان امتداد لمدرسة المزداوية باغانية السودانية و التى الفها حين كان طالبا باليونان مثل ( فى الغربة يمه شفت الويل.. ) فهو مدرسة متفردة فى التلحين و العزف على الة الجيتار و كان يؤدى اغانى فرقة دير ستريتس بمهارة يحسده عليه مارك نوفلر عازف الجيتار فى الدير ستريتس ..
و المذهل فى هذا الامر ان تلك الفرق كانت تغنى و فى نفس الاسبوع اغانى التوب تن الاوربية .. و سمعنا منهم اوتيل اوف كاليفورنيا و اغانى البنك فلويد و البالمى بروزرس و ليو رولس You never find و اغانى رود ستيوارت Iam Sailing و التون جون و الرولز رويس و مارفن قاى Lets get it on و اغنيته Whats going on و اغانى ليو سيرHow much love و دونا سمر و جلاديس نايت و العشرات غيرهم..
كانوا جميعا و العشرات غيرهم اصحاب مواهب فذة و ساهموا فى ان يعرف السودانيين الموسيقى الغربية و الروك و الكانترى و البلوز حين كانت شعوب كثيرة من حولنا لا تعرف ..
لكن للاسف اندثر كل هذا .. و تقوقع العازفين الافذاذ .. و تدجن من بقى منهم فى الساحة و هم قلة..
و للحديث بقية !!
| |
|
|
|
|
|
|
|
|
|
Re: فرقة جاز وليم اندريه (Re: برهان تاج الدين)
|
كنا نسعد برؤيته كل يوم جمعة بدار الكشافة البحرية...عند تجمعنا الاسبوعي..وكنا حينها في فرقة الاشبال بالكشافة...كان يضع دوماً
قبعة كبيرة على رأسه ويقود سيارة جيب كاشفة...
وبهذه المناسبة ..من الفرق التي كانت تعطر سماء سبعينيات العاصمة...فرقة الكشافة البحرية...
| |
|
|
|
|
|
|
|
|
|
Re: فرقة جاز وليم اندريه (Re: برهان تاج الدين)
|
الاخ الفـاضـل،
بـرهـان
التـحـية لك وانت توثق اشـخـاص وذكـريات .
اخـوك كاتب هـذة السـطور، عاش سـنوات السـتينيـات في منطقة الـخرطوم غـرب، والـتي كانت الـمنطقـة السـكنيـة لـمئـات الاسـر الـقبطيـة، وكـانت عـلاقات حـميـمـة شـديـد تربط الاســر الـمسـلمة والـمسـيحـيـة، وكـانت هـناك الـمدرسـة الانـجيـليـة، والكلـيةالقـبطيـة للـبنات بشـارع عـلي عبداللطيـف، والكلـية القبـطيـة للاولاد، وعـلي بعـد خـطوات ،كانت مدرسـة الخـرطوم الثانويـة الـمصـريـة. فـي هـذة الاجـواء في زمـان دراسـتي بالخـرطـوم الثـانويـة الـمصـرية، تعـرفـت عـلي اندريـة،وكـان شـغـوف بالـموسـيقي(الـجـاز).
كـانت هـناك ثـلاثـة فـرق جـاز مشـهورة في الـخرطـوم في ذلك الـوقـت، فـرقة كـمال كـيلا، فـرقـة شــرحـبيــل احـمد، فرقـة ولـيم آندريـة، اما فـرقة جـاز الـديوم الشـرقـية فقـد كانت تعـاني من غيـاب طـويـل في بعـض الاحـاييـن. شــهـرة فـرقـة ولـيـم آندريـة، ان كل اعـضـاءهـا الـموسـيقـييـن،كـانوا مـتفرغـيين تمامـآ لـهـذة الفـرقـة الفـنيـة، عكـس الفنان شـرحبيـل، الذي كـان يعـمل بوزارة الـتربيـة والـتعلـيم، والفـنان كـمال كـيـلا كان طالب بجـامعة الـقاهـرة-كلـية الحـقـوق.
فـرقة ولـيم، كانت تحـي حـفلات السـفارات الاجنبيـة في الخـرطوم، وللجاليـات والـنادي القـبطي والكاثوليـكي. والتـدريـبات كانت فـي مدرسـة كـمبـوني.
لـم يكـن لة آي نشـاط سـياسـي، ولايـخـوض الكلام حـول الاوضـاع السـائـدة في البـلاد، هدفـة وان يكـون محـائدآ مع كل الـوان الطيـف السـوداني.
| |
|
|
|
|
|
|
|
|
|
Re: فرقة جاز وليم اندريه (Re: بكري الصايغ)
|
أبوبكر ، الشايقى ، حليم ، بكرى الصايغ
التحية لكم و الشكر اجزله ، و ما اجمل ان يتحول البوست للتوثيق لجميع فرق السبعينات و بداية الثمانينات ،
كل هذه المعلومات الثرة نتمنى ان تتوج ببعض التسجيلات ، قريبا باذن الله ،
اتصل على احد الاخوة عارضا مجموعة من التسجيلات النادرة لوليم و الساوندرز ، للاسف لايملك لا المعرفة ولا الوقت لتحويلها الى النسق الرقمى ساتابع معه حت اتمكن من تنزيلها هنا .
شكرا لكم مرة اخرى .
.. حد عندو اى صور ؟
| |
|
|
|
|
|
|
|
|
|
Re: فرقة جاز وليم اندريه (Re: برهان تاج الدين)
|
عزيزي برهان ...نامل لمنتدياتنا ان تتخطي حاجز الاخبارية الي تناول السودان ارثا وثقافة وتوثيقا ...ربما ليجد من يشاء من ابانائنا من الاجيال الصغيرة والتي لم تري السودان شيئا يساعدهم لمعرفتها بواسطة معطيات وادوات عصرهم من تقنية
انا بعيد عن السودان لعقود ثلاث وما ذكرته من ذاكرة احتفظت ببعض من ايام بعيدة
ابوبكر سيداحمد
دبي
http://thenubian.net
| |
|
|
|
|
|
|
|
|
|
Re: فرقة جاز وليم اندريه (Re: برهان تاج الدين)
|
| Quote: و المذهل فى هذا الامر ان تلك الفرق كانت تغنى و فى نفس الاسبوع اغانى التوب تن الاوربية .. و سمعنا منهم اوتيل اوف كاليفورنيا و اغانى البنك فلويد و البالمى بروزرس و ليو رولس You never find و اغانى رود ستيوارت Iam Sailing و التون جون و الرولز رويس و مارفن قاى Lets get it on و اغنيته Whats going on و اغانى ليو سيرHow much love و دونا سمر و جلاديس نايت و العشرات غيرهم.. |
الكلام ده كلو كان فى السودان !!
| |
|
|
|
|
|
|
|
|
|
Re: فرقة جاز وليم اندريه (Re: AMNA MUKHTAR)
|
العزيز برهان..
وكانت تلك الخرطوم ودفء ليلها الطويل..حيث كانت الموسيقى تصدح فى الانديه المنتشره لمختلف الجاليات.. ونبدا بالمكتبه القبطيه...وخصوصية الخرطوم نمره2..ونادى ابولو
والنادى الاغريقى والنادى السورى والنادى العربى..وكوبا كوبانا .وسانت جيمس وغردون ميوزك هول..حيث كانت الفرق المحليه والفرق العالميه تعطر ليل الخرطوم وهى تحيى احتفالات اعياد الكريسماس وراس السنه..
الفنان الراحل والرياضى المطبوع وليام اندريه...
عرفته بواسطه زميلنا ادماث بيتو.وهو اثيوبى الجنسيه وكان يغنى وله صوت جميل درسنا معا فى التجاره الامريكيه واعتقد انه كان يمت له بصلة القربى..ومعه زميل اخر هو اسملاش بطرس...وسمير يوهانس...
التقينا وتعارفنا بعد مباراه لكرة القدم ضد التجاره الامريكيه وكمبونى..بعد نهاية المباراه التقينا وتم التعارف .ومضينا معا تلك الامسيه..زمنها وللتوثيق ان شرحبيل احمد هو اول من كون فرقه للجاز فى كل افريقيا. 1958. وبعده بمضى عشرة سنوات بدا.ظهور البلو استارز ..ومن ضمنها الدرديرى ومحجوب مصطفى شقيق الفنان صلاح مصطفى واخرين..غابت عنى الاسماء..و عباس دراج الذى كان يقلد شرحبيل فى ملابسه وتربيه ذقنه واى شىء وهو يشبهه غاية االشبه..ثم عثمان المو شكل له فرقه جاز..ثم بلو استارزوالعقارب والديوم الشرقيه..ومعهم عازف السكسفون الشهير عمر ..رحمه الله قد توفى فى حادث حركه..ثم كمال كيلا..ثم نعوم عبد الكريم.. وكانت له فرقهثم ديفيد قروب...احمد داؤود وهو كان يعزف الايقاع لشرحبيل
وليام اندريه...وشقيقه بوب اندريه.ومجموعه من اقربائهم من الاثيوبيين...وليم والدته اثيوبيه.والده اغريقى.وهو ولد فى السودان لان والده تواجد فى السودان واستقر فيه.وتعلم عزف الجيتار مع مجموعه من الاثيوبيين..وهو كان يشكل تفاعل فنى يتمازج مع موروثه الاثيوبى.وهضمه للموسيقى العالميه ..وهو كان يقدم عروضه مع فرقته فى الفنادق والانديه ومناسبات الجاليات الاجنبيه..فى المكتبه الامريكيه..ولانه هجين قد برع فى ابراز كل ذلك الانصهار فى ابداع وجمال وارتقاء
ونواصل
| |
|
|
|
|
|
|
|
|
|
Re: فرقة جاز وليم اندريه (Re: برهان تاج الدين)
|
تصحيح بعض المعلومات الخاطئة التي وردت هنا.
وليم أندرية فايز نصار هو ابن الاستاذ والمربي الجليل أندرية فايز نصار.لقد كان والده من كبار المدرسين بالاستوائية في جنوب السودان.
جدهم الكبير هو الدكتور فايز نصار, طبيب لبناني هاجر لجنوب السودان وتزوج هناك من مواطنة سودانية في الجنوب.
أشقاء المرحوم وليم أندرية, هم جوزيف أندرية الشهير ب بوب أندرية وشقيقهم الاصغر فايز أندرية الذي كان يعمل موظف كبير في السفارة الامريكية لفترة طويلة في الخرطوم. وهم الان يعيشون في الولايات المتحدة الامريكية. والدة المرحوم وليم هي الاستاذة مريم زودي. أطال الله عمرها ,هي سودانية من أصل أثيوبي. هي شقيقة ضابط الشرطة الشهير عوض زودي الذي توفى من حوالي ثلاثة أشهر تقريبا.ولقد كان من قدام ضباط الشرطة في السودان.
كان وليم أندرية كابتن فريق السلة السوداني الذي أحرز البطولة العربية, ولقد أطلق عليه العرب في تلك الدورة لقب"الغزال الاسمر" وذلك لقفزه العالي وسرعته الفائقة.لعب وليم أندرية في فريق الاولمبي بالنادي الكاثوليكي في الخرطوم وأحرز عدة بطولات في السودان.
كان المرحوم وليم يلبس الرقم 13 ولقد ولد يوم 13 وتوفى في يوم عيد ميلاده يوم 13 .
دينق.
| |
|
|
|
|
|
|
|
|
|
Re: فرقة جاز وليم اندريه (Re: برهان تاج الدين)
|
Quote: يا دينق
سلامات
إنت جيت من وين ياخى، أنا بكتب فى مقال عن وليم واذا بك (تنط) فى الموضوع والفنلة13. كفاية كدة يا حكومة. |
يا هاشم
سلامات.
كيف أنت وكيف الاهل والعيال؟
أنا رسلته اللنك بتاع البوست ده لفايز ولبوب أندرية ومستني أسمع منهم.
المهم ح أرسل ليك التلفون بتاعي في الماسنجر.
دينق.
| |
|
|
|
|
|
|
|
|
|
Re: فرقة جاز وليم اندريه (Re: Bakhaf)
|
شكرا هاشم بدر الدين .
بالمناسبة يا هاشم .. لاول مرة يطلع الكثيرين على صورة وليم..وكمان معاها كلماتك المعبرة عن الشاب الموهوب .
* يرجوك الصديق وليد دوكة انزال اى صورة مهما كانت باهتة.
شكلنا ح نقلب ما يطلبه المستمعون
| |
|
|
|
|
|
|
|
|
|
Re: فرقة جاز وليم اندريه (Re: Bakhaf)
|
العزيز عصمت
| Quote: بلو استارزوالعقارب والديوم الشرقيه..ومعهم عازف السكسفون الشهير عمر ..رحمه الله قد توفى فى حادث حركه..ثم كمال كيلا..ثم نعوم عبد الكريم.. وكانت له فرقهثم ديفيد قروب...احمد داؤود وهو كان يعزف الايقاع لشرحبيل |
شكرا كثير
الغريب ان كل فرق الجاز خارج التوثيق . ما عدا البوم واحد لفرقة كريسداس و التى حولت اسمها الى (السودانيين ) هم الوحيدين الذين انتجوا البوم متداول .
اذا .. بعد وليم .. وجب التوثيق لعهد كامل من الموسيقى الجميلة . شكرامرة اخرى .
| |
|
|
|
|
|
|
|
|
|
Re: فرقة جاز وليم اندريه (Re: برهان تاج الدين)
|
بخاف ...
الخواض ..
منورين البوست يا شباب ..
حقيقة لا يوجد ما يمنع ان نختلف .. نتعارك .. ثم نجلس سويا لنوثق .. نتحاور .. و ننعش بعضا من الذكريات الجميلة كلما علاها غبار النسيان ..
و نرجع نتشاكل تانى
تانى حبابكم عشرة
| |
|
|
|
|
|
|
|
|
|
Re: فرقة جاز وليم اندريه (Re: برهان تاج الدين)
|
خليط عجيب هذا ال(وليم اندريه)
كل هذه الثقافات جرت فى دمه ..
(كفاية مزاح ) تشابه فى تركيبه الداخلى و دوارنيتها اغنية (Exodus ) للملك بوب مارلى ..
ايهما اتت اولا .. لا ادرى .. و لكن الاصل واحد .
لا اتحدث عن نقل او نسخ او ما شابه .. فقط روح الاغنية .
لعلها اثيوبيا .. موطن الراستافاراى ..
و بعض من دماء وليم .
على العموم .. نجيب الاغنيات ..
نعزم المختصين ..
و نسمع منهم .
| |
|
|
|
|
|
|
|
|
|
Re: فرقة جاز وليم اندريه (Re: برهان تاج الدين)
|
سلامات تاني
بما انو في ناس بتعرف وليم بصورة كويس في البورد
سالت ناس من اصول حبشية كان سمعتهم بتحدثون عن وليم قديما ، عشان القى لي حاجة اشارك بيها في البوست العاجبني ده ، وطلعت بي كلام غريب .
بيقول الكلام ان وليم اندرية مات عن قصد ، يعني الضابط الكتلو كان عندو معاه مشكلة شخصية واستغل موضوع المرتزقه وصفاه
يعني زي قصة الحردلو بتاع الثورة داك
كمان صفاه داخل المنزل موش خارجه
وكمان اتعرض اخواته بالضرب بالدبشك حينما حاولن الدفاع عنه
عليكم الله اتأكدوا لينا من المعلومة دي صحيحة ولا غير صحيحة
مع الود
| |
|
|
|
|
|
|
|
|
 Re: فرقة جاز وليم اندريه (Re: Deng)
|
| Quote: اتصل على احد الاخوة عارضا مجموعة من التسجيلات النادرة لوليم و الساوندرز ، للاسف لايملك لا المعرفة ولا الوقت لتحويلها الى النسق الرقمى ساتابع معه حت اتمكن من تنزيلها هنا . |
برهـــان ..
لو في امكانية تقديم اي مساعــدة جاهز .. الايميل
[email protected]
| |
|
|
|
|
|
|
|
|
|
Re: فرقة جاز وليم اندريه (Re: برهان تاج الدين)
|
بوست 
شكراً يا برهان
على فتح الباب للتوثيق لسيرة (وليم أندريه)
لأنو فنان جد
عشان كدا الزيو دا لازم يتكتل
يعيش كيف يعني ؟
زول مبدع كدا ..
ياهو دا حالنا
وشكراً لكل من أضاف معلومة عنه هنا ..
متابعاكم
واصلوا عليكم الله ..
| |
|
|
|
|
|
|
|
|
|
Re: فرقة جاز وليم اندريه (Re: تيسير عووضة)
|
هذه سيرة الخرطوم الجميلة .. حينما كانت خرطوم بالجد ..
برموزها الكبيرة ناس وليم أندرية ..
زمان كنا بنمشي نتفرج عليه ، وكأنه نازل من كوكب آخر ..
وفعلاً يا دينق سمعنا حكاوي كتيرة حول إغتياله ، لكن الظاهر انو عندك الخبر اليقين .
| Quote: Be careful. Some of the information you wrote here is incorrect |
الزعيم هاشم ..
ده منو المشارك وليم في رقمو وتاريخ ميلادو ؟
| Quote: لاعب السلة بنادى الهلال (صديق وليم)الذى كان يلبس الفنلة رقم 13 و مولود أيضاً فى يوم 13 مايو. |
نتمنى من دينق وهاشم يحكوا لينا أكتر عن الأسطورة وليم .
في واحدة من اجازاتي قابلت أخوه قبل عدة سنوات وكان يعمل بالامم المتحدة أو السفارة الامريكية (لا أذكر) ساهرنا سوا ، وذكر لي أنه ما زال يسكن الخرطوم غرب ، وأنه رغم العروض الكثيرة التي تلقاها للسفر خارج السودان ، إلا أنه يفضل البقاء فيه ..
ولكن يبدو أن الجماعة مارسوا معه سياسة التطفيش ..
| |
|
|
|
|
|
|
|
|
|
Re: فرقة جاز وليم اندريه (Re: برهان تاج الدين)
|
هل يعود ذلك الزمان؟
زمان النفوس الحرة. والوجدانات المبدعة الطروبة.
اتذكر كم تكبدنا المشاق لادخار تذكرة حفل من مصاريف المدرسة.
كانت الدنيا راس سنة. وكان بالخرطوم كازينو اسمه كازينو الشباب على النيل.
وكان المغنى عباس تلودى اوائل ظهوره، وبالخرطوم همس به وبطلاقة صوته.
وكانت الخمائر المعلبة والمفيدة للكلى حلال بلال!
وكانت البنات الخرطوميات يقلن للقمر قوم وانا اقعد مكانك!
ذاك زمان البراءة والجمال وزهو الصبا.
ذاك زمان تصالح السلطة مع نفسها. لم يكن فقه الضرورة برز بعد.
ولم يكن لبنك فيصل الاسلامى فرع فى السودان!
والبحر الاحمر كان مسافة حجة او عمرة وعودة.
وكانت مروى بوكشوب تبيع الكتب باللغة الانقليزية.
وكانت بانوراما تبيع الكتب والمجلات السوفيتية باللغة العربية.
وكانت البنات يسرقن النظرات والقبلات والجوابات فى غفلة رقيبى!
| |
|
|
|
|
|
|
|
|
|
Re: فرقة جاز وليم اندريه (Re: Adil Osman)
|
برهان..العزيز
كدى سؤال عقل..؟؟
الراحل وليام اندريه انتقل نتيجه لظروف ملابسات فى زمن حركة العميد محمد نور سعد.يعنى 1976 ولقد مرت ثلاث عقود...اعظم ان لم يكن كل المتداخلون هنا..كانوا فى عمر الزهور...يعنى بين 10 اعوام و 14 عاما .حسوما..!!! فى ظروف السودان تلك .ززاين هم من غردون ميوزك هول.وسانت جيمس .وكوبا كوبنا والاتنى..وشارع الجمهوريه والبون مارشيه..تلك هياكل دنسوريه فارهه الارتقاء شرف وزمن وايقاع تلك المرحله
يعنى فى تلك الظروف الا الجهابزه من يعرفون خبايا واسمار نمره 2 والخرطوم غرب..وشارع كاترينا..وحوارى الخرطوم بالليل
واحمد جريمه..؟؟
من منكم يعرفه...؟؟ سؤال تحدى
وهنا تسقط كثير من الافادات..لانها سماعيه..!!
وليحق الحق.على كل متداخل عاصر ذلك الزمن ان يذكر تاريخ ميلاده موثقا.بالشهاده ..الباسبورت لا يعتمد..واى شهاده تحمل تاريخ واحد.واحد.اى انها تعتمد.لانها تسنين وهى تكشف عن انياب المتسنن,وزمان عمره...
وليم اندريه اسطوره..
لكم الجمال
| |
|
|
|
|
|
|
|
|
|
Re: فرقة جاز وليم اندريه (Re: عصمت العالم)
|
كان سؤال التحدى
عن شخصية احمد جريمة.. و هاك الاجابة
هل كان يسكن الخرطوم 2
له اخ بالجيش
و لهم نسب بناس مشهورين من نمرة 2
هو نفسه لفترة كان بالامارات
اعتقد ان الاجابة صحيحة
و ممكن اضيف دى اجيال ابيض، محمد عطالله رحمه الله،ود النونو، الليثى، جيرك، سامى المك، اولاد طوبياو ناس التنس، .. و العشرات غيرهم من ابناء الخرطوم اللامعين ذلك الوقت..
تجدهم فى كل سهرات الخرطوم الانيقة..
لكن الموضوع وليم اندريه
اعتقد انه من المناسب و المهم ان يحاول كل من لديه تسجيل او لحن تنزيله فى هذا البوست.. تكريما لرواد الفن و الرياضة..
| |
|
|
|
|
|
|
|
|
|
Re: فرقة جاز وليم اندريه (Re: haleem)
|
شكرا لكم جميعا ..
سمعت ان يوسف شدياق كان لاعب الدرامز الاساسى فى فرقة و ليم ..
بتاع شركة شدياق للانتاج الفنى .. من رواد شركات الكاسيت فى السودان ..
لا ادرى لماذا لم يحاول التوثيق لاغنيات وليم ..
ايضا .. كان معه شاب اثيوبى يعزف الساسكفون .. اقسم لى صديقى العجوز مرتضى - فى مكالمة مخصوصة لهذا البوست - انه عندما ينطلق بالساكس ..تتخيل نفسك فى احدى حانات نيواوليانز .. امام احد عجائزها من فطاحلة الجاز.
و لكن حتى الان ..
ولا نص غنية 
| |
|
|
|
|
|
|
|
|
|
Re: فرقة جاز وليم اندريه (Re: برهان تاج الدين)
|
تحياتى يا برهان
لك ولجميع الأعزاء هنا
وليم كان جارنا فى الحى، وكانت بيوتنا فى المربع الذى يقع إلى الشمال مباشرة من محطة السكة الحديدن وشرق داخليات كلية الطب
كنت أراه كثيرا بقامته الفارعة وملامحة التى تذكرنى دائما ب "أولاد هارلم" ولم يكن لنا إتصال مباشر به بحكم السن، فقد كنت أنا، فى تاريخ حادثة موته مثلا، فى السادسة عشر، وكان يكبرنا بأكثر من عشر سنوات
أعرف السيدة والدته جيدا وكنت أقابلها كثيرا
كنت أنا أدرس خارج العاصمة وشاءت الأقدار أن أكون متواجدا فى الحى فى نفس يوم الحادثة بل وشهدت بأم عينى نهايتها
فقد كان الوضع كما اشار الزملاء يمتلئ بالفوضى وعدم التحكم فى كل الأمور، حتى منزلنا نحن تعرض للتفتيش أكثر من خمس مرات، وكذلك كان الحال فى معظم بيوت الحى والسبب الرئيسى فى ذلك هو وجود جالية كبيرة من الإثيوبيين فى داخل وأطراف ذلك الحى
فى صباح نفس اليوم، تعرض إبن أختى لطلقة طائشة أسفل البطن وهو داخل المنزل، ورايت حجم المعاناة التى عاناها والدى مع اثنين من ابناء عماتى لنقله إلى مستشفى الخرطوم، وكان قريبا جدا ولكن ذلك استغرق حوالى الساعة للوصول، وكنا نحن موجودين داخل المنزل، وإن لم تخنى الذاكرة فإن الحادث وقع فى اليوم الثالث من بداية الأحداث
سمعنا بعد ذلك هرجا شديدا وأصوات سيارات ضخمة تأتى وتذهب ولم نعرف بموت وليم إلا بعد حين، فقد كان الخروج من البيوت مجازفة فى حد ذاته
وقد استمر وجود اسرة وليم حسب متابعتى والتى انقطعت بعد ذلك، أى بعد رحلينا من الحى، حتى نهاية السبعينيات، ولم أعرف عنهم خبرا بعدها
وفى نهاية السبعينيات ونحن فى ذروة شغفنا بالموسيقى والسعى الدائم للحصول على كل إصدار جديد، سمعت وأنا داخل محلات "منصفون" فى محلهم الصغير الموجود فى الدور الأرضى من فندق صحارى فى الجهة المقابلة لشارع الجمهورية صوت وليم اندريه ينبعث من "شريط كاسيت" وكانت فى بدايتها وعرفت بعد ذلك أن ذلك الشريط لم يكن معدا للبيع بل كان تسجيلا لحفل من احد الأندية، وكانت أجهزة التسجيل فى بدايتها ايضا وحاولت الحصول، ولكن دون جدوى، على نسخة منه، وكان ذلك آخر ما سمعت من صوت وليم، وإلى الآن لا يرن فى أذنى سوى صوت وليم وهو ينادى على واحد من اخوته أو يحى بعض المارين فى الشارع
لنا الله يا برهان
فنحن قوم مولعون بقتل الجمال ووأد الإبداع
ولا أظن أن لوليم أى تسجيل بالإذاعة ناهيك عن التلفزيون
وإن كان التلفزيون لا يمتلك سوى عمل أو اثنين لعبد العزيز داود والكاشف
فما بالك بوليم اندرية والذى ربما لم يكن معترفا به من قبلهم
وأجدد التحية وأعتذر للإطالة
| |
|
|
|
|
|
|
|
|
|
Re: فرقة جاز وليم اندريه (Re: Adil Osman)
|
الاخ العزيز اباذر
شكرا على مرورك الجميل .. البيت بيتك ياخى .
فوضى غريبة ضربت ارجاء الخرطوم يومذاك.. و راح ضحيتها الكثير كما علمت ..غير وليم .
اقول ليك حاجة ..
حسب المعلومات التى اخذت تتدفق هنا ..فالرجل كان يعيش حياة اجتماعية خصبة .. يعنى الكثير الكثير من الاصدقاء و المعارف .. مما يزيد اصرارى على متابعة البحث عن اعماله ..او بعضها .
تحياتى .
| |
|
|
|
|
|
|
|
|
|
Re: فرقة جاز وليم اندريه (Re: برهان تاج الدين)
|
عمالقة .. لا يعرفهم الكثيرين
و لمن عرفهم و سمع اعمالهم .. تبقى محفورة فى الذاكرة الى اخر العمر
قدموا الكثير لنا ..
و على الاقل صار الذهن اكثر تفتحا و استيعابا للفنون الغربية و الافريقية المختلفة..
كانوا مدخلا جيدا بفهم العالم من حولنا ..
ما قدموه من الحان و كلمات و مساهمات سمت بالذوق كثيرا ..
لا بد أن احد ما من أبناء تلك الفترة .. و ابناء ذلك الجيل و فى وقت ما .. قام بالتسجيل و التصوير ..
هى دعوة لتوثيق اعمال الراحل العملاق
وليم اندريه و ليقودها اخوه بوب حيثما كان ..
الراحل الزعيم الفنان محمد اسماعيل الازهرى
العملاق ممدوح طاهر فريد الاستاذ الشامخ .. و ليقوم هو بتوثيق اعمال محمد الازهرى ووليم اندرية.. و اعماله التى لم يسمعها الكثيرون..
يجب أن لا نهمل هؤلاء ..
فهم تاريخ مشرف و ناصع و مذهل و يفيض عبقرية و عذوبة..
هل سمع احدكم كيف حول الزعيم الراحال الفنان محمد الازهرى اغانى الحقيبة الى تحف فنية يستمتع بها الامريكى و الهندى و الافريقى..
لكم جميعا الاحترام و التقدير..
مداخلة للاخ هاشم بدر الدين..
شكرا كثيرا لك ..
كنت فى سالف العصر و الاوان احضر الى فندق الهيلتون
و احيانا الى الحدائق امام الهيلتون ..
و تأتى الينا للسلام ..
حين كان هناك الزعيم الراحل احيانا كثيرة ..
و اخونا على هاشم بالهيلتون..
كانت ايام ..
متعكم الله جميعا بالصحة و العافية..
و على الخير نلتقى
..
| |
|
|
|
|
|
|
|
|
|
Re: فرقة جاز وليم اندريه (Re: برهان تاج الدين)
|
اه لو الأه بتفيد مجروح
كلكم تزرعون تشتلون (الورد) على مقابر (الخرطوم) وانا (بحبكم) هكذا كان يصيح وليم حينما يبلغ قمة التواصل والبهجة والليل والناس والخرطوم والغناء (الحميم)
الأستاذ هاشم بدرالدين وصل الى (عتبة) الحقيقة لمشهد النهاية,,
ابوبكر عمنا المهندس (الفنانة هى فكى بلين ومن قامبيا)
احمد جريمة خلاص الزول جارنا وبقت مكشوفة ,,
الفونس عزيز دحدوح هو بتاع فرقة العقارب
وكانت فرقة اضواء بحرى بقيادة بدرالدين والد الفنانة منال
فرقة جاز المدرعات بقيادة (بندره) ويحافظ على لصقة فى صدقه من جنوب بلادى ويتحدث النوبيه كحلفاوى
فرقة جاز عطبرة بقيادة عبدالله دينق (ومانسونا) الأغنية الأثيرة
سودان هرامبى والدكتور (مقبول) موجود فى امريكا وعصام الجنيدابى توفى فى دبى يرحمه الله,,
زيارة (جيمى كلف) للسودان كانت بالصدفه حيث نزل (كونكشن) بالخرطوم وسال عن فندق عالمى (ودلوه) على لمرديان ..فى الصالة كان يجلس بزيه المعروف وكانت (البلوستارز)فى قمتها وتبهج ناس المرديان ألأخ عاصم على ما اذكر شاهده فى الصاله (وشبهة) وذهب الية متساءلا وانبهر بالحقيقة ودعاه الينا فى الصالة واذكر ان (جيمى) انفعل تماما بمهارة الفرقة وانفعل اكثر بحفظهم واجادتهم لأغانية ...مدير الفندق فوجىء بالحقيقة وتنازل تماما عن تكاليف اقامة الفنان (جيمى) تبرع بالحفلة وكام يوكا رائعا والقصة طويلة و(عوض جبريل) والتلفزيون والمقابر واماكن (النوبة ) يالها من ايام,,
على بوب شقيق وليم يظل يفدم حفلاتة بمقدمة(اغنية لروح وليم اندرية) وبوب نفسة عظيم الخلقة والأخلاق,,,
ولنا عودة
| |
|
|
|
|
|
|
|
|
|
Re: فرقة جاز وليم اندريه (Re: kofi)
|
كوفى ..
واحدة واحدة عليك الله .
دة كلام دسم شديد وداير ليهو شوية موية نحلو بيها .
ما رايك بمقال لكل فرقة .. لو سمح وقتك .
جاز عطبرة كان معاهم فؤاد بلاش .. من اخطر عازفى الاورغن المرو على السودان .. مرات كان بيعزف مع مصطفى مضوى :
ودعت هواك بلا حزن .. وغدا انساك و تنسينى
لم يبقى منه بذاكرتى ..حلم او طيف يشقينى
لا كلمة شعر اكتبها ....لا لحن بعدك يشجينى
يا من اهديت لها عمرى .. ماذا بيديك لتهدينى
شفت الغنا دة كيف ؟
شكرا لمرورك الجميل .
| |
|
|
|
|
|
|
|
|
|
Re: فرقة جاز وليم اندريه (Re: kofi)
|
كوفي ..شاكر لك تذكير كهل باسم فيكي بلين وسردك لعقد من الذين جعلو ليالي الخرطوم ومدن سودان اخري متوهجة مبتهجة والشكر لبرهان صاحب المكرمة والعقد الجميل الذي ما بخل بسرد ما عنده من تلك الايام وعرفان لشاب رائع كوليم اندرية راح سنبلة ...شئ جميل ان تجدد خلايانا المرهقة بالكم الهائل من السياسة ولزوم ما لا يلزم بجرعات مثل هذه ..ودمتم
| |
|
|
|
|
|
|
|
|
|
Re: فرقة جاز وليم اندريه (Re: برهان تاج الدين)
|
عزيزى برهان شكرا
وهنالك العديد من المبدعين من ابناء وطننا الجميل (احرقوا) او (احترقوا) او حتى (صلبوا) فى محراب الفن ,, وقد كانت الخرطوم على ابواب ان تكون المدينة (الأم) لكل ابناء البلد وكانت (تتنفس) ابداعا وعرفنا باكرا (افريكانو) الراقص المجيد و(سابو) العائد من رحلة (الشقاء) الطويله فى الغرب البعيد وشتاءه (اللعين) ,,ومع رياح الثورة الثقافية فتحت الخرطوم (اشرعتها) لنسافر عبر (جوقاتها) الموسيقية وصارت للمدارس (فرق) تعرف الجاز و(البلوز) و(الكنترى سونق) وغنى (السمؤل)الضابط الكبير الان (ياحباة روحى)فرقة الخرطوم الثانوية والى (قرن شطة) ومتعة الساكس وتعريجات (لوى ارم استرونج )
لو تحدثنا عن المركز الثقافى الامريكى والفرنسى والفرق الزائرة وروعة البرفسير الماحي اسماعيل ومعهد جوتة (حاطلع من الموضوع),,
كنت اظن فى ذكرى الراحل (الحبيب) ان نطلب من تلفزيون السودان تسجيلات الدورة العربية فى الكويت من تلفزيون الكويت او مصر وهى موجودة حتى يستمتع ابناء السودان بابن فذ من رحم الوطن الجميل اهدانا لحظات انتصار فارقناها فى هذا الزمن (المجدب) لكم مودتى
| |
|
|
|
|
|
|
|
|
|
Re: فرقة جاز وليم اندريه (Re: برهان تاج الدين)
|
الأخ برهان
اسعدنى الدخول لهذا البوست .... فمااحوجنا فى هذا الزمن للتوثيق لمثل هؤلا المبدعين....
نتمنى ان يحاول كل من لديه تسجيل تنزيله فى هذا البوست.. تكريما لهذا الرائد فى مجال الفن والرياضة فقد كان وليم اندرية وكما
ذكر معاصروهو مجموعة من المواهب ..
الشكر لك ولكل الذين أسهموا فى هذاالبوست....
ولك التحايا..
| |
|
|
|
|
|
|
|
|
|
Re: فرقة جاز وليم اندريه (Re: برهان تاج الدين)
|
شكراً برهان تاج الدين ..
وجميع المتداخلين على هذا البوست الرائع والتوثيقي لسيرة الراحل وليم أندرية ..
أعتقد بأن شهرة وليم الرياضية طغت على شهرته الفنية ..
لذلك لا نجد له توثيق وأعمال فنية أو بماذا نعزي ذلك ..
وعلى حسب علمنا تلك الفترة كانت تضج بالفرق الفنية وكانت فترة زاهية ..
حقيقة جيلنا نحن مظلوم ولا نريد أن نتحسر على تلك الفترة ..
ولكننا نحتاج لمثل هذا التوثيق لزيادة المعرفة ..
محبتي ..
| |
|
|
|
|
|
|
|
|
|
Re: فرقة جاز وليم اندريه (Re: برهان تاج الدين)
|
هاشم بدر الدين... صورة مايكل بنيامين قويه.... ياسلام ياخي والله رجعته لي صور من الماضي الف شكر ... بالمناسبه سمعته ان مايكل هو مدير المجمع دي الوقت.. وما متاكد من المعلومه دي .. وبالمناسبه انا كتبه شويه عنه في اعلا البوست
| |
|
|
|
|
|
|
| |
برهان تاج الدين
tmbis
abubakr
Al-Shaygi
AMNA MUKHTAR
Deng
Hashim Badr Eldin
Bakhaf
رأفت ميلاد
Adil Osman
فيصل محمد خليل
أبوذر بابكر
willeim andrea
معتصم دفع الله
عبدالكريم الامين احمد
محمد المرتضى حامد
فيس بوك
تويتر
انستقرام
يوتيوب
بنتيريست