شلاقة فحص الايدز في السودان

شلاقة فحص الايدز في السودان
العندو وقت .. يدخل .. والما عندو ،، يتخارج ، وقشة ما تعتر ليو.. واعملو حسابكم من (أبوإدريس) .. مررت بتجربة سببت لي رعباً لم يفارقني لزمن .. وودت أن أنقلها لكم هنا ... عشان تشوفو شلاقتي ، القربت تقوّم قطري .. قبل أقل من عامين ، قررت الزواج ، فحملت ما استطعت وتوكلت على الحي الذي لا يموت ، وتوجهت نحو السودان ... السودان .. هذا البلد ( المسكين ) مفتوحة حدوده مع كل دول الجوار (زينها وشينها) .. ومع التردي المريع ( في كل شئ ) لا يمكنك أن تلومه ، لعدم توفر هذا أو ذاك .. المهم .. سالت عن أنسب المستشفيات التي يمكن أن اجري فيها فحصاً شاملاً ، وبالاخص ( الأيدز) على الرغم من أنني متبرع دائم بالدم ، ولدي شهادة بذلك ، وبطاقة تبرع مذكورة بها كل البيانات عن حالتي الصحية (طبعاً هذا الكلام خارج السودان) ... نصحني البعض بمستشفى سليمان فضيل ، والآخر ذكر أن فحص الايدز بالذات لا يمكن أجراؤه الا بمستشفى (الذرة سابقا) أو معمل ستاك .. مستشفى سليمان فضيل افادوني بعدم وجود هذا النوع من الفحص لديهم .. ووجهوني لمستشفى الذرة .. ظللت لمدة يومين اراجع كل المكاتب ، وأخيراً عثرت على ضالتي .. أقسم بالله أن المعمل والصالة الملحقة به لا يصلحان أن يكونا ( دكة شاي ) في محطة أم الحسن بطريق دنقلا .. الصالة بها أحد عشر مقعداً مهترئة مساندها الاسفنجية .. وبها عدد من الخرائط ( السائلة ) .. الأرضية قذرة .. قذرة .. وعلى اطراف الحائط بقايا (بصاق ) وسوائل أخرى لا أعرفها .. وكم سفة ( صعوت ) .. يجلس بالصالة ثلاثة أشخاص تتراوح أعمارهم بين الخامسة والعشرين والخامسة والاربعين .. ألقيت عليهم السلام .. ولبست نظارتي ( السوداء ) حتى أتمكن من النظر اليهم بحرية .. أشخاص موجودين هنا لفحص الأيدز .. مؤكد أن أحدهم يحمل هذا الفيروس الفتاك .. في لحظة قررت الهروب من هذا المكان .. هو أنا أصلاً الجابني شنو هنا ؟؟ بس شلاقة مني ساي .. الود عامل فيها مهتم بالفحص قبل الزواج .. كلام فاضي .. يا ود قوم اتخارج قبل ما واحد من الجماعة ديل تهف ليهو يقوم يديك (عضة) مقصودة ويديك شوية من دمو وتروح في حق الله .. استغرق تفكيري في الوصول لقرار الهروب حوالي عشرين دقيقة .. وفي لحظة تنفيذ الخطة سمعت أسمي ( اتفضل يا استاذ ) قالتها الممرضة ، والتي اكتشفت فيما بعد أنها ليست ممرضة بل ( فنية معامل ) .. دخلت المعمل ، الذي هو عبارة عن غرفة عتيقة ، وأجزم أنه لم تطالها يد التجديد والصيانة منذ افتتاح هذا المبنى .. نظرة سريعة للتأكد من نظافة وصلاحية المكان (الموضوع فيهو أيدز مش لعب).. دواليب حائطية مصنوعة من (الخشب) تلف الغرفة في ثلاثة اتجاهات .. خشب داخل معمل ؟؟ الارضية لا تختلف كثيراُ عن أرضية الصالة في شئ ، باستثناء عدم وجود (الصعوت) .. طاولة ( خشبية!!) مستطيلة تشغل الجزء الأكبر من وسط الغرفة .. سطحها يدل على مرور دبابة أحالته الى تلك الحالة .. وضع فيها صندوق مربع يحتوي على حاويات مليئة بالعينات !!! مكتوب على كل حاوية اسم الشخص ، ورقم مسلسل .. في الدولاب المغبّر الواقع خلف الفنية الشابة ، توجد أدوات الفحص .. لم توضع داخل الثلاجة المتهالكة الموجودة والتي تفتح بمقبض أمامي ( ذكرتني بثلاجة دكان عمي عبدالله ) حينما كان عدد الثلاجات في الديم لا يتجاوز ستة .. يا جماعة أدوات فحص في دولاب مغبر ؟؟ أنا كان مالي ومال كده .. والله لو ما عندك أيدز خوف ساي يجيك ايدز وشلل أطفال كمان !! وبعدين الفلبينية طمنتني في الدوحة في آخر تبرع للدم لي ، لمن قلت ليها أنا ماشي اتزوج ، وح أعمل فحص .. والله طمنتني .. ياخ هي ما طمنتني ، هي قالت لي عديل كده لو عندك ايدز نشيل منك دم نعمل به شنو؟؟ والله عندها حق .. لكن الجماعة ديل البيقنعهم منو ؟؟ يا خ أنا الجابني شنو هنا ؟؟ يا الله . الفني الشاب ناول الفنية الشابة حقنة من النوع الذي يعاد استعماله أكثر من مرة .. ( تخيلوا أن فحص الأيدز يتم بحقنة معدنية تستعمل أكثر من مرة!!!!) وناولها قطعة مطاطية شفقافة ، وحاوية صغيرة لأخذ العينة .. وهنا كان أول اعتراض .. طوالي وقفت على حيلي وقلت ليهم ( أنتو دايرين تشيلوا دمي بالحقنة دي ؟؟ ) .. يا أستاذ نحن عارفين بنعمل في شنو .. يعني أنت بتعرف شغلنا أكتر مننا ؟؟ . حاشا لله ، أنتو أعرف ناس في الدنيا ، لكمن البعرفو أنا أنكم ما ح تاخدوا دم مني بي حقنتكم دي .. يا فلانة بالله استعملي حقنة بلاستيك خلينا نخلص .. هات يدك يا أستاذ . . وضعت يدي باستقامة على الطاولة وأنا جالس على كرسي .. راقبت يديها جيداً وتيقنت من عدم وجود جروح عليها (مداراة المؤمن على نفسو حسنة).. تستطيع بكل سهولة أن تشم رائحة الغبار وتتلمسه على الطاولة !! الشابة الفنية عارية اليدين (بدون قفازات) .. ربطت يدي بالقطعة المطاطية ، وأحضرت الحقنة (تحت مراقبتي الشديدة) وسحبت دمي .. أعطتني قطعة قطن ، اعتذرت بأدب عن أخذها .. ياخ قطن قاعد في السهلة البيخليني أشيلو شنو ؟؟؟ خلاص يا أستاذ تراجع بعد ثلاثة أيام الجنوبي ، هناك بيوروك النتيجة .. و ما تحاول تتصل بالتلفون لأنه ما ح يقولوها ليك الا تجي بنفسك .. شكراً .. ثلاثة ايام !!! وأنا حنتي بكرة !!! طيب وبعدين ، المفروض أعرف النتيجة قبل كده عشان كان في حاجة لا قدر الله (أتخارج سريع) .. والله أنني لم احمل هم الأيدز والفحص الا بعد سحب دمي بتلك الصورة ... الجماعة يدقوا في الدلاليك وفرحانين ، وأنا والله في دنيا تانية .. ما قدرت انتظر تلاتة أيام ، وينو الصبر ، مافي .. والقلق زاتو كتلني كتل .. في نفس يوم الحنة ذاتو ، دورت عربيتي وبي حنتي وجلابيتي الما خمج ،، وجري على المستشفى .. يا أخوانا الجنوبي وين ؟؟ شايف المبني الهناك داك .. آي .. بس أمشي هناك .. مشيت ، قابلت شباب حلوين زي الورد ، منتظرين ، طبعاً أفتكرتهم جايين يستلموا نتيجة السجم دي زيي أنا ، أها بعد الونسة اكتشفت أنهم حاملين للبلوة دي .. إذا صادفك احدهم في الشارع فلن تستطيع (وأن فعلت) أن تتصور أنه مصاب بالايدز ... هنا ( الجن ركبني ) خاصة بعد أن رأيت أحدهم وهو من دولة مجاورة مصاب (باسهال شديد) ووجهه يبعث في أعتى الفرسان رعباً قاتلاً .. الباقين (سودانيين) عديل وشباب والله لم يتجاوزوا الثلاثين .. يا استاذة أنا جايي عشان اعرف النتيجة .. طيب اتفضل اقعد .. لا .. لا شكراً ، الحقيقة أنا مستعجل شوية ، وطبعاً أنتي شايفة الحنة وكده ..(أقعد وين ؟ وهو ده مكان بيقعدو فيهو؟ قال اقعد قال ) .. الشباب ديل قصتهم شنو ؟؟ حكت لي ( وليتها لم تفعل ) معقول ، الشباب ديل شايلين البلوة دي وحايمين بيها ؟؟ داخل المكتب ثلاثة شباب في منتهى الفتونة والعنفوان .. ورابع في نفس عمرهم ، بدأت تظهر على ملامحه آثار الكارثة .. هزال واضح ، ووجه يخلو من الحياة ، يشكو (برعب واستجداء) من الاسهال الشديد .. الاخرين يشكون من أعراض أخرى .. من أين جاءوا بها ، وعلى من وزعوها ؟؟ زاد رعبي وخوفي على بلدي ، الهامل الماعندو وجيع ، وشعبنا المسكين ، وتذكرت عندها قول (وزير الصحة - سابقاً) د. بلال في احدى المقابلات التلفزيونية قبل سنوات أن حالات الايدز المسجلة بلغت خمسمائة الف (على ما أذكر) تري كم وصلت الآن ، وكم عدد الحالات غير المسجلة ؟؟؟؟ زادت رغبتي في الخروج سريعاً من هذا المكان الذي يصيبك بالغثيان .. تفرست في ملامحها ، وسألتها انت أخت (فلان) انت بتعرفني؟ لا بس كان زميلي في الجامعة .. آي أنا أخته .. (فرصة لا تعوض) بالله هو كيف وأخبارو شنو؟ والله كويس الحمد لله .. أها النتيجة كيف عشان أنا مستعجل شوية .. من شكلك كده انت جايي من بره .. آي الله .. وأنت طبعاًما محتاج أكلمك عن الايدز لأنه أكيد أنت عارف عنه حاجات كتيرة !! الله يا ربي أنا خلاص رحت شمار في مرقة ؟؟ هنا انتابتني شجاعة ، من وين ! ما عارف .. يا أخت شوفي أنا زول مؤمن وجاهز لتلقي أي خبر مهما كان قاسي ، فرجاء ما محتاج أنه أعصابي تبوظ أكتر من كده .. قولي العندك وخلصيني .. لا يا أستاذ ، إنت فهمتني غلط ، أنا في الحقيقة باحثة اجتماعية ، وشغلنا أنو نحاول نستفيد من الناس المصابين في أنه ينشروا لينا الوعي وسط المجتمعات المختلفة ويبينوا ليهم مخاطر الايدز ، ونحن .. هنا تأكد لي أنني مصاب .. مصاب .. لا أستطيع وصف الحالة التي كنت عليها حينئذ .. خلاص أنت ميت عندك أيدز ، كيف تقابل أهلك ، اصدقائك ، ناس الحلة ، مستقبلك ، والصيوان الداقينو ليك ده ؟ تقبلوا صيوان بكاء يعني والا شنو ؟ .. تتخارج ترجع محل ما جيت ؟؟ تشرد من البلد وتشوف ليك مدينة تانية ؟ تنتحر ؟؟ تعمل شنو ؟؟ ، كيف تعيش مع هذا المرض ؟؟ هواجس ، ضياع تام .. يا رب ألطف بعبدك الضعيف .. يا أخت أنا والله على استعداد أنو أخدم برامجكم كلها ، ولو عايزين أديكم محاضرة هسي عن الايدز وطرق انتقاله والوقاية منه وكيفية التعامل معاهو .. بس أرجوك وريني نتيجتي وخليني أمشي .. مبروك النتيجة ايجابية .. من الفرحة ، الزعل ، أعمل ليك شنو هسى .. أمسكك أديك بوسة هسى ؟؟ وألا أقطع ليك كف في جضمك السمح ده ؟؟ الحرية ، الجري ، الكواريك ، يا جماعة هوي أنا ما عندي أيدز .. والله كلها مرت بخاطري لحظتها .. أحسست لحظتها أنني قد ولدت من جديد بعد هذه المحنة التي استمرت بضعة أيام ، وتلك الحالات التي رأيتها .. وفرحت كأنني كنت مصاب بهذا المرض اللعين ، وشفيت منه .. عدت الى مقر عملي وما زالت تلك التجربة تسبب لي رعباً كلما تذكرتها .. وبدأت في نشر ثقافة (عدم فحص الايدز في السودان ) بين السودانيين ، والعايز يفحص ، أخير يفحص هنا قبل ما يمشي ، لأنو فحص الايدز في السودان يمكن أن يصيبك بالايدز والجنون ، والوسواس القهري ، والإشقدي ، وأب عديلات ، وأمراض تانية حامياني .. ولك الله يا بلدي المسكين .. (عدل بواسطة Salah Abdulla on 06-18-2006, 05:41 PM)

العنوان	الكاتب	Date
شلاقة فحص الايدز في السودان	Salah Abdulla	06-18-06, 05:01 PM
Re: شلاقة فحص الايدز في السودان	banadieha	06-19-06, 01:07 AM
Re: شلاقة فحص الايدز في السودان	Salah Abdulla	06-19-06, 07:27 AM
Re: شلاقة فحص الايدز في السودان	عاطف عبدالله	06-19-06, 01:12 AM
Re: شلاقة فحص الايدز في السودان	Salah Abdulla	06-19-06, 07:38 AM
Re: شلاقة فحص الايدز في السودان	othman mohmmadien	06-19-06, 01:26 AM
Re: شلاقة فحص الايدز في السودان	Salah Abdulla	06-19-06, 07:47 AM
Re: شلاقة فحص الايدز في السودان	abas	06-19-06, 01:33 AM
Re: شلاقة فحص الايدز في السودان	Salah Abdulla	06-19-06, 08:09 AM
Re: شلاقة فحص الايدز في السودان	محمد أبوعاقلة الطريفي	06-19-06, 07:41 AM
Re: شلاقة فحص الايدز في السودان	newbie	06-19-06, 08:22 AM
Re: شلاقة فحص الايدز في السودان	Emad Abdulla	06-19-06, 08:30 AM
Re: شلاقة فحص الايدز في السودان	Tragie Mustafa	06-19-06, 09:02 AM
Re: شلاقة فحص الايدز في السودان	Tragie Mustafa	06-19-06, 09:09 AM
Re: شلاقة فحص الايدز في السودان	sudania2000	06-19-06, 09:44 AM
Re: شلاقة فحص الايدز في السودان	مهيرة	06-19-06, 10:33 AM
Re: شلاقة فحص الايدز في السودان	مهيرة	06-19-06, 10:38 AM
Re: شلاقة فحص الايدز في السودان	النصرى أمين	06-19-06, 11:18 AM
Re: شلاقة فحص الايدز في السودان	noon	06-19-06, 03:00 PM
Re: شلاقة فحص الايدز في السودان	sudania2000	06-19-06, 03:26 PM
Re: شلاقة فحص الايدز في السودان	محمد الامين محمد	06-19-06, 03:32 PM
Re: شلاقة فحص الايدز في السودان	ombadda	06-19-06, 03:44 PM
Re: شلاقة فحص الايدز في السودان	محمد الامين محمد	06-19-06, 04:06 PM
Re: شلاقة فحص الايدز في السودان	Salah Abdulla	06-19-06, 04:34 PM
Re: شلاقة فحص الايدز في السودان	Salah Abdulla	06-19-06, 04:29 PM
Re: شلاقة فحص الايدز في السودان	Salah Abdulla	06-19-06, 04:15 PM
Re: شلاقة فحص الايدز في السودان	ودالعباسية	06-19-06, 06:26 PM
Re: شلاقة فحص الايدز في السودان	wedzayneb	06-21-06, 08:19 AM
Re: شلاقة فحص الايدز في السودان	Muna Khugali	06-21-06, 09:58 AM
Re: شلاقة فحص الايدز في السودان	noha_g	06-21-06, 10:46 AM
Re: شلاقة فحص الايدز في السودان	zola123	06-24-06, 11:49 AM
Re: شلاقة فحص الايدز في السودان	Salah Abdulla	06-24-06, 03:21 PM
Re: شلاقة فحص الايدز في السودان	Tumadir	06-24-06, 04:05 PM
Re: شلاقة فحص الايدز في السودان	Zongiya	06-24-06, 04:41 PM
Re: شلاقة فحص الايدز في السودان	Salah Abdulla	06-24-06, 05:20 PM

[رد على الموضوع]

صفحة 1 „‰ 1: << 1 >>

احدث عناوين سودانيز اون لاين الان

اراء حرة و مقالات	Latest Posts in English Forum
Articles and Views	اخر المواضيع فى المنبر العام
News and Press Releases	اخبار و بيانات

الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة

About Us
Contact Us
About Sudanese Online

اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين

News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums

If you're looking to submit News,Video,a Press Release or or Article please feel free to send it to [email protected]