|
|
 الشرف أصبح قروش !!!!..
|
زمنن كعب .. زمنن كعب
زمن المصايب والتعب !!!..
زمن الفرح أصبح عدم
زمن الخوازيق والندم !!..
زمن التنابل والكروش
زمن المساحيق والرتوش
زمن الكواسر والوحوش
زمن الشرف أصبح قروش !!!..
يا حليل زمنن بشوش
زمن الرواكيب والبروش
النفوس الصافية نامت
والدريب بالخسة مفروش
حمد أحمد جاري مربوش
بالنهار والليل يكافح
رزقو ما قادر يحوش
لا وليدات في المدارس
لا حوشو تام لا بيتو معروش
يلعن الزمن القبيح
زمن التنابل والكروش
زمن المساحيق والرتوش
زمن الكواسر والوحوش
زمن الشرف أصبح قروش !!..
وياحليلو عاد زمنن بشوش
زمن الرواكيب والبروش
زمن الضماير حية كانت
ومافي عشرة علينا هانت ..
والليلة يا ست الحبايب
كلو رايع فينا غايب
والزمن أصبح تعيس
زمن العجايب والغرايب
زمن الخوازيق بالردوم
زمن الحرايق والخرايب
وكل زولن جاري مهموم
سالي سيفو وحيد يحارب
القبيح أصبح سماتنا
والجميل الفينا غايب
نجري ماعارفين بقينا
زي بهايم في زرايب !!!..
و يابلدي التعيس وحزين
أنا المشتاق وليا سنين
أفتش في دريبك وين
أتاريك يا صباحي الزين
ساكنة معايا ضي العين ..
وأنا الكايس تملي رضاك
شايفك دنيا حاوية ملاك
كم شابيت في المجهول
وكم سافرت في دنياك
كم غامرت في العتمة
وعبرت محيط عشان ألقاك
لقيتك جوا في ذاتي
ومفرهد بين ضلوعي هواك
قولي لي كيف أنساك
ووين القاكي
وين ألقاك
يابلدن وحشني لقاك ..
مع تحيات : خضرعطاالمنان
[email protected]
|
|
 
|
|
|
|
|
| |
خضر عطا المنان
فيس بوك
تويتر
انستقرام
يوتيوب
بنتيريست