|
|
 Re: حاجات زمـان (Re: منصوري)
|
.
almulaomar
.
تاريخ التسجيل: 08-07-2002
مجموع المشاركات: 2848
Re: حـاجات زمـان (Re: منصوري)
الأخ منصوري موضوع شيق وجميل بس مصيبتنا إننا أصبحنا أمه تبكي وتتباكي على ماضيها سوف أعود أخي بعد قراءة ثانية لهذا الموضوع المضمخ بعبق التاريخ
30-11-2004, 08:07 ص
منصوري
.
Re: حـاجات زمـان (Re: منصوري)
شكرا الأخ الملا.مرورك مرة ثانية من هنا يفيدنا.. نحن من المتابعين لعطائك الثر في المنبر عامة... صاح
أصبحنا أمه تتباكي..يعني الجديد أقل والقديم كثير..أو القديم جيد والجديد ضحل وبالى.. وعندي برضو هذه علامة صحة.لأنو بتخلى الإنسان محتشد.عشان يعمل حاجة للمستقبل اجود من عظمة الماضي وجدودنا قالوا( النسى قديمو تاه)
30-11-2004, 09:15 ص
منصوري
.
)
أساتذتي الزمان:
محمد عثمان موسي:-
لو كنت المسؤول لمنتحه درجة الدكتوراه..معلم إبتدائي ولكنه بمقاييس اليوم ليس له شبيه.كان يدرسنا التأريخ في المدرسة الأولية..وكان أستاذ الرياضة ورئيس فريق الكورة..جعل من المدرسة بؤرة نشاط.. وخلق البرامج التي تجذب الأهالى، حول المدرسة الى نادي..وأشعر الأهالى حينما يدعوهم للمهرجانات التي تقيمها المدرسة الأولية أشعرهم بثمرة التعليم في أبانئهم..المدرسة الأولية كانت تقيم مهرجانات ضخمة فوق طاقتها..كرة قدم..كرة سلة..فولي بول..مضارب تنس.. جر الحبل..لعبة الكراسي.. مسابقات وبرامج فكاهية يشترك فيها النساء والرجال والطلبة ..كان المنظر مضحكاً حينما يدعو مزارع مغمور وعمره يناهز السبعين ليلبسه بدلة وبنطلون وكرفته وجزمه رباط ويأمره أن يمر على جموع الحاضرين.. والمهرجان دائماً تصحبه ليلة ساهرة تمثيل..طنابير..غناء..لقد ملأ لأهالى المنطقة وقتهملعقود طويلة..كانت المدرسة رائدة النهضة في المنطقة، تحتفل بالمناسبات الوطنية ونخرج مسيرات تجوب المنطقة ونتفاعل مع الأحداث التي تدور في العاصمة..خرجنا مواكب في ثورة أكتوبر.. وكتب لنا محمد عثمان موسي الأستاذ المعني..لافتات الدبلان مكتوب عليها بالخط العريض بخط النسخ.( دماء الشهيد تنير الطريق)وكتب( بابكر حسن عبد الحفيظ شهيد الثورة الثاني وقود للثورة) كان يجيد خط الرقعة لم اري مثله حتي الآن من يجيد خط الرقعة مثله ولو من خريجي كلية الفنون الجميلة وكان يشيد بخطه..نائب مدير كلية الفنون الجميلة ابن المنطقة السيد سليمان..عديل الموسيقار على ميرغني.. كان محمد عثمان موسي.. يحضر لنا الطمبور في حصة التاريخ ويعزف عليه أي ينقرشو.. حينما كنا في درس ( الفريد ورجال الشمال) ويقول لنا الفريد كان يحب الموسيقي.. كان وقتما يجوع بالليل.ياخذنا بالليل الى ضفاف النيل ويحمل شبكته الجداعة الشبكة ذات الرصاص معاهو.نصطاد ونشوي على ضفاف النيل..كان بارعاً موهوباً قوي الجسم.متواضع..
30-11-2004, 11:06 ص
منصوري
.
Re: حـاجات زمـان (Re: منصوري)
حلويات زمان:-
الحلاوة زمان طعمها غير حلاوة هسه..(حلاوة الحلقوم)(راحة الحلقوم)( حلاوة لكوم) هكذا كانت مسمياتها..كان يجيبوها في صندوق مغلق ومقرطس.. العجيبة..الباكنق..زمان كان مستواهو أحسن من هسه.اي التغليف..جميع الأشياء تغليفها وإخراجها وصناديقها.. حلاوة لكوم كانت نوعين لكوم احمر ولكوم ابيض..تشتري الصندوق والطلبة في المدارس الأولية كانوا يتاجرون فيه..الحبة بي تعريفة..تطلع في النهاية ربحان.قرش ونص في الصندوق..ويكون فاضل معاك الدقيق الفي الصندوق..حلاوة لكوم كان لها رائحة وعبير
حلاوة كريكاب:-
كانت أنواع
صندوق حلاوة شيكولاته.. مربع ومقرطس وفوق صورة بت موضة شايلا ليها كديسة ومكتوب عليهو( دايماً على بالي)
وتاني في نوع من حلاوة الشيكولاته:-
زي رفيقو.. اسمو( كريمة) عليهو بت مشلخة شلوخ طولية رفيعة وممشطة.واضعة يدها على خدها ولونها أسمر فاتح.. برضو حلاوتو حلاتها لا توصف..ومن جوة مقرطسه زي الماكنتوش هسه وكمان أحسن من قرطسة الماكنتوش
30-11-2004, 12:54 م
منصوري
.
تاريخ التسجيل: 28-09-2003
مجموع المشاركات: 448
Re: حـاجات زمـان (Re: منصوري)
الشدة
الشدة أول ما بدت ما كانت زي شدة اليوم.. الشدة نوع من الأحذية البلاستيكية ولكن اي بلاسبيك..موش زي بلاستيك اليوم دا..المأخوذ كلو من اكياس القمامة والكوش..هسع الشدة ذاتا أظنها في طريقا الى الإنقراض.لأنو اصبح لايلبسها إلا أوباش الناس ,واصبحت قوية وقاسية وذات بلاستيك قوي وضار بالرجل وقد يصيبك مداومة لبسها بالسرطان القاتل..زمان كان يلبسها الموظف قبل الرجل العادي. لجمال ألوانها.ألوانها كانت زاهية.. وبلاستيكها..كان من الروعة بمكان ومن اللين بمكان وهندستها وقوالبها المصنعة منها كانت في غاية الإحكام... أنا عرفت أن خامة بلاستيكها كانت تأتي خصيصاً من لندن..كانت لينة وطرية ولها رائحة بلاسيتك مميزة حتي لما تكون جديدة وتشمها تشعر برائحة خاصة لها.. على الأرض لها درب راقي يميزها عن غيرها من الأحذية..والشدة لمتانتها سميت الشدة.. وقد كانت شدة بحق وحقيقة.زيمكن أن تعيش الشدة مايزيد عن عامين ..بلاستيكها كان تشعر به مرن تحت رجلك ليست من القسوة في شي..مفتوحة من قدام مقابل الأصبع الكبير والجمبو.. ولها أخرام بيضاوية من جهة الأصابع الثلاثة المتبقية.تزيدها رونقاً وجمالاً..وعلى ضهرها ضفيرة زي ضفيرة البرش معمولة بشكل هندسي منساب في شكل مستطيل عرضة واحد حوالي اثنين سم والآخر ثلاثة سم بطول اربعة سم..ربطة الرجل عليها بالقرب من الكعب.كانت في غاية الرونق..كان مكان تزريرها بالرباط مصنوع من حديد الإستيل المطلي ضد الصدأ..لايصدأ ولا ينكسر بسهولة..أو في بعض الأحيان مصنوع من البلاستيك الأبيض الصلد..وقد تفنن الموظفون في لبسها مع الشراب القصير.كانت عملية ومقاومة للماء..
أول من احضرها الى منطقتنا..محمد(كركاب) كان طالباَ بالثانوي عطبرة.. كان لونها اصفر.وأول من استعمل معها الشراب في المنطقة..رأيته مرة يحدث المدرسين ويقول هو قد رأي مستر مايك الخواجة الإنجليزي مدرس الإنجليزي يلبسها بالشراب وعنده راقية..كنت معجباً بها واتمني أن تكون لى جزمة شدة بالرغم من أن حالنا كان ميسوراً.. ولكنها كانت غير موجودة في دكاكين المنطقة كلها ولا حتي في كريمة ولاعطبرة..كانت تحضر من أم درمان ولحلاوتها وجمالها كان الناس يتلقفونها ويشترونها أولاً بأول.. كل ما تصنع كوتة تشتري.. ومقارنة بالأحذية الأخري قد كان سعرها مرتفعاً بعض الشي.. قلت للوالد اريد جزمة شدة.ز أعشقها. أموت فيها.. قال لى( هي جلد عفريت تسوي بيها شنو.) عرفت أنه يريد أن يصرفني.. ولكنه لما ذهب الى أم درمان لمآرب له هنالك قد احضر لى واحدة لونها بني وأحضر لشقيقي عمر واحدة لونها اصفر فاتح.. وأحضر لنفسه واحدة صفراء..فكنت هكذا خامس شخص احضرها في المنطقة.. قبلنا احضرها محاسب في ديوان النائب العام.. وقبلنا احضرها طالب والده تاجر وقبلنا احضرها بلون اسود شديد السواد على اللسيدي كان بني طين يسافر الى الخرطوم..النابغة حامد نصر الدين ثاني شخص يلبس شدة في المنطقة كلها .كان يتبختر بها في الأعراس والملمات، كانت موضع نظر الناس وهي في رجله.. لا أحد يقدر يتصور الآن كيف كانت الشدة بهذه العظمة اللهم إلا من عايش نشأة تطور الشدة وعاش تلك الفترة وعرف الفارق بينها وجودة إنتاج المصانع وقتها.. لقد لبست الشدة وعمري لم يتجاوز الثلاث سنوات..كانت الأشياء قيمة والهامش الربحي مقدر ومعقول لأصحاب المصانع والبقاء للاصلح والذوق السوداني وقتها قد كان بكراً لم تشوبه شوائب الطمع والحرص والشره.. ونزوة الغش لم تكن موجودة ويمكنك أن تقيس هذا المثال البسيط في هذا الحذاء الشعبي بباقي السلع والبضائع والمنتوجات.. كانت الجودة شعار كل شي..
30-11-2004, 06:57 م
منصوري
.
Re: حـاجات زمـان (Re: منصوري)
زمان تشيل ليك قروش بسيطة تملا بيها قفة..هسه بقي تشيل ليك قروش في قفة تجيب بيها حاجات بسيطة
30-11-2004, 07:54 م
Ahmed Elsharif
.
تاريخ التسجيل: 30-10-2002
مجموع المشاركات: 220
Re: حـاجات زمـان (Re: منصوري)
ليك الشكر أخى على السرد الجميل وتسلم
Quote: المدرسة الوسطي دي ما كان كل واحد بيقدر يخشها.. بالرغم من مجانية التعليم.. ليه.لأنو لو إنت ما ممتاز في المواد كلها ما حاتقدر تخش الوسطي على الإطلاق حتي لو عدتا مرتين او ثلاثة....مثلاً.. كنا نمتحن تسع مدارس إبتدائية أولية.. ديل بس..
اتخيل لى انو دى واحدة من الحاجات الادت للواقع المرير الحالى. ضيق فرص التعليم ادت لمشاكل ماليها نهاية بدءا من حرمان كمية كبيرة من الناس من حق التعليم العالى بادعاء عدم اهليتهم وانتهاءاً بوجود طبقة من ذوى التعليم العالى نسبياً يعيشون فى واقع غير واقعهم ومنفصلين تماما عن كل مايمت الى مجتمعم بصلة لانو تمت معاملتهم معاملة الملوك فى زمن كان السودان محتاج لايدى عاملة مش لملوك كل مرة يذكروا حسن تعليمهم على أيدى الاتجليز مع اننا لم نرى شواهد حسن التعليم هذا على واقع السودان خلال اربعين سنة. فى أمريكا من حق أى انسان ان ينال تعليم جامعى و 90 فى المائة من هؤلاء من ذوى الذكاء المتوسط والحاجة دى بدت من بداية القرن وهذا هو واحد من الاسباب الادت لتقدمهم وانهيارنا تماماً برغم ثراء الطبيعة فى البلدين (السودان طبيعتو اسهل من امريكا فى التعامل لعدم وجود الجبال و الجليد القاتل والغابات التى تعوق الزراعة)
30-11-2004, 11:42 م
منصوري
.
Re: حـاجات زمـان (Re: منصوري)
فعلاً يا أحمد الشريف. من ضيق فرص التعليم نشأت طبقة والشعب عاملهم معاملة الملوك.لثقته في متعلميه.شعب بسيط طيب مصداق.حاجة طيبة في أمريكا ان يكون التعليم الجامعي حق لكل زول متوسط في تحصيلو..هو هسه بقي كدة في السودان. مرور بس ممكن تدخل جامعة..لكن كل هذه ظلال..هي الأزمة ازمة أخلاق ومنهاج تربية وحرمان طويل وبعض الأشياء المتشابكة تولدت منها شخصية اليوم الغير سوية والضرر اصبح بليغ..لكن تعال شوف المتعلمين فرطوا في شعبهم وهو كان يعاملهم معاملة الملوك الليلة انقلبت على المتعلمين نفسهم من ناحية مادية صار ليس لهم وزن وهذا المنعطف من تأريخ الزمان مادي مهما رفض البعض ذلك..أصلاً هي نعمة الله يديك ليها يريدك كيف تتصرف فيها وتعدل.. والمحاسبة حاضرة على التصرف في كل دقيقة من الذي يستغل النعمة أو يحسنها.حاضرة من رب الكون وإن غفل عنها الغافل..
30-11-2004, 11:50 م
ابو جهينة
.
تاريخ التسجيل: 20-05-2003
مجموع المشاركات: 4240
Re: حـاجات زمـان (Re: منصوري)
منصوري
تحياتي لك
و كل سنة و إنت طيب
أرجو أن تواصل هذه البانوراما الممتعة ..
يديك العافية
01-12-2004, 00:33 ص
الكيك
.
Re: حـاجات زمـان (Re: ابو جهينة)
والله يا منصورى رائع رائع
رجعتنا ثلاثين سنى لى ورا ولمن وصلت حتة اللكوم واقيق ضحكت لمن سالن دموعى لانك كنت تعبر عنى بدقة متناهية وانا كنت ابيع اللكوم فى الابتدائية ..والله الواحد يحسدك على الذاكرة الحديد ودى ما غريبة على واحد منصورى انتم اذكى رجال السودان على الاطلاق ..
ربنا يقويك واصل المشوار
01-12-2004, 12:26 م
منصوري
.
Re: حـاجات زمـان (Re: منصوري)
الأخ ابو جهينة.. وعند جهينة الخبر اليقين....شكراً لك على المرور من هنا..وشكراً للكلمات الطيبات...
الكيك
بالله يا أخونا الكيك أتاريك كنتا بي تبيع اللكوم وما عارفين..؟إنتا عارف أنا بضوق في بوستاتك طعم اللكوم من زمان...
...................................
أها في المواصلة..تعرف يا أبوجهينة والكيك.. زمان لما يقولوا المفتشين جايين المدرسة الإبتدائية البلد كلها تعرف والحفاوة والإستقبال.ز الأهالي كان يقولوا ناظر الناظر جا..وكانوا يشوفوا الناظر وهو أكبر وظيفة حكومية عندهم كبيرة كانوا يشوفوهو كبير فما بالمفتش..مرة جونا مفتشين من الدامر عاصمة المديرية الشمالية كلها.. وكانوا شايلين معاهم مسجل(قروندنق) ومسجلات قروندنق دي كانت تقليعة وما كل بيشتريهو..زاروا مدرسة (كبنة ) قبلنا.. وهي قرية تبعد عنا حواي 25كيلو..اتكيفوا من الطلبة.. وقتها كنت في أولى ابتدائي.. لقو طالب في هذه القرية صوتو جميل اسمو محمد خليفة..كونوا المفتشين معه مجموعة واعطوهم نشيد اسمو النيل.ما كان مقرر بس في كتب المطالعة.. الطلبة جودوا هذا النشيد.. المفتشين قالوا لهم دا شي رائع لازم نسمعوا حكومة الإقليم في الدامر.. لما جوا مدرستنا..طابور .طابور.. وقفوا المدرسة كلها برة وفتحوا المسجل والمسجلات وقتها بكرات كبيرة موش كست كما تعرف.. من ذلك الوقت علقت بذهني هذه الأبيات منه . كانوا بيشجعوا الطلبة بأشياء جاذبه..للحفظ اضغط هنا..قصيدة النيلhttp://www.assaloon.org/audio/alnil234.mp3
01-12-2004, 09:05 م
منصوري
.
تاريخ التسجيل: 28-09-2003
مجموع المشاركات: 448
Re: حـاجات زمـان (Re: منصوري)
لو كان من ما طلعوا الإنجليز ، ولغاية الآن، لو كان همنا كله وهمنا الكبير هو السودان فقط ..ولو كان كل حاكم جاء وضع طوبة على طوب التاني، وأكمل البناء ولو كان الناس تركت أيدلوجياتها القواصر ورضيت بالمصلحة العامة من توفير الأكل والشرب والبناء، لو كان ذلك كذلك لما وصلنا الى الحالة التي نحن فيها..ولكن كل واحد يجي، يسمي القبلوا العهد البائد، وكل واحد يجي عايز ينقض ما بناهو التاني، وكل واحد يجي عايز يخت ناسو ويطرد الباقين من الخدمة المدنية وكل واحد يجي عايز يطبق أيدلوجياته على جسد الشعب المسجى في غرفة العمليات..
02-12-2004, 09:58 م
منصوري
.
تاريخ التسجيل: 28-09-2003
مجموع المشاركات: 448
Re: حـاجات زمـان (Re: منصوري)
العاصمة..ماكان كل زول وكل من هب ودب يجي.يترمي في العاصمة..كل واحدين مدينتهم الإقليمية كانت تكفيهم وزيادة وهم لايبدلونها بغيرها ولايطيقون السكن في غيرها..لمان هسه عجزت الوزارات عن تقديم الخدمات الراقية للمواطنين في أماكنهم..جو إتكبو ليها في خشما في العاصمة..قريب..وكونوا الحياة الهامشية التي جلبت الويل.. وخلت العاصمة زي كوشة كبيرة ليست بعاصمة على الإطلاق..
02-12-2004, 11:53 م
منصوري
.
تاريخ التسجيل: 28-09-2003
مجموع المشاركات: 448
Re: حـاجات زمـان (Re: منصوري)
واحد عمنا .ذو معرفة..ما ساهل..عندو بعد نظر..قال البلد دي كل مقومات الحياة الكريمة فيها... بس الله مجهجها براه..لشئ يعلمه هو)..أرض حدادي مدادي.ارض ما محتاجة لمثقال ذرة من الأسمدة والكيماويات..في ارض من ماخلقو سيدنا آدم ما اتزرعت..تنادي للبزرعه ويفلحا.. موية عذبه شاقا البلد من أولا لى آخرا..من جيهتين واحد أبيض للموية المعادلة كيميائياَ.. وواحد ازرق يجي جارف معاهو كل معادلات أملاح الصخور.. عشان يكون صالح للإنبات.. الطمي والطين الجايبو شدة حلاوتو وريحتو..تغرف من نص البحر وتشرب. دا غير الأنهر الفرعية والمصبات والروافد والرهود والترع المطرية الموسمية والمياه الجوفية القريبة.......... التربة هسه البزرعوها في بعض ولايات أمريكا من شدة ما يضيفوا ليها مواد زراعية كيمائية ومن شدة ما باصروا فيها مئات السنين وقولبوها عنصر التربة الأساسي ذاتو إتفقد.اي بقت ما تربة... برضو مع كدة يزرعو ويرعوا..الكاوي بوى راح .. الكاو بوي جاء.. الكاوي بوي الغني .دخل بي حصانو البار والنادي الليلي. سعر البورصة تأثر.. وسهول الأمزون الغناء محاصيلها قفزت بالورصة .. مع أنو نحنا عندنا مليون أمزون..الجزيرة ومشاريعها.. الشمال والقمح.. الرهد.. منقة ابو جبيهة..مشاريع الجبلين وكوستي والرنك الزراعية.. التوج والأتاتوج..دي قد يكون ما سمعوا بيها ناس.. زمان يقول ليك ( والله أضربك بنية هسه أوديك التوج).. ويقول ليك( خلاص أنا رحت التوج.. ورقة الرياضيات دي ما حالي فيها كويس)...حاجات زمان كلها...
03-12-2004, 08:03 ص
منصوري
.
Re: حـاجات زمـان (Re: منصوري)
كافتيريا ( أتني)
كافتيريا أتني بالعاصمة.. بالسوق الأفرنجي.. كانت في حاجات زمان..كافتيريا تنافس محلات عالمية.. من حيث الرقي والمشروبات التي تقدمها والمأكولات والمعجنات ونوعية الطبقة التي ترتادها.. ونقاش المواضيع الثقافية والعلمية.. مرة لقيتا تحولت الى كافتيريا تبيع ( القراصة بالروب) هسه ما عارفا تبيع شنو؟
04-12-2004, 04:11 ص
منصوري
.
تاريخ التسجيل: 28-09-2003
مجموع المشاركات: 448
Re: حـاجات زمـان (Re: منصوري)
زمان كان في مساحات في الزمن، والأرض والمدن.. الآن الأحزاب كررت نفسها والشعب زي يئس منها وما منتظر الجديد الذي تبيض به وجهها.. وجربها طبعاَ..الناس مصهورة صهر الحديد..تحريق..تشميس..مامهم الغشاوة التي بدلتهم في السنين الأخيرة.. الحريق والعذاب
والمعاناة ماشية عشان تصل جوهرهم الداخلي المطلي بحاجات ضارة كثيرة وهو جوهر الفرد السوداني المتفرد فيه عن باقي الشعوب.. وهذه هي الضريبة الكبيرة التي تستاهل الخير الوفير العميم.. البيت الكان صينيتو في الغداء خمسة اصناف بقي صنف واحد.فتة وبس..والفئات التي تعيش على الفن والغناء جاعت لأنو اصلاً بضاعتهم عجيبة لا ترقي لمستوي هذا الشعب وبعدين هم ماناس يقدروا يضربوا الطورية..والناس المتعلمة بدل علمها يكون مصدر سعادة لهم انقلب وانكفأ وصار مصدر تعاسة.. والحريق مستمر وسوف يستمر الى أن يعرف الشعب السوداني قدراً من حقيقته تؤهله لإرتياد العصر الجديد..
04-12-2004, 11:30 م
منصوري
.
تاريخ التسجيل: 28-09-2003
مجموع المشاركات: 448
Re: حـاجات زمـان (Re: منصوري)
صدقة الميتين كانوا يقسموا فيها التمر...الرجبية ..كومك في اللحم( الضباح) الذي يمر في البلد من مشرقا لى مغربا.زيقول حلموه في المنام يذبح كل بيت عتود في السنة تكافي البلاء......كرامة الكنتوش( بليلة الكنتوش) يقولوا بخارا يصعد للسماء الحبوبات...الشهور ذاتا ما زي شهور هسه أسماءها
1الفطر
2 الأعياد اتنين
3 الكرامات اتنين
4 الموالد اتنين
5 الوحيد سايق الضحايا
6 صفر الخير
7 رمضان
8 شعبان
9 رجب
04-12-2004, 11:41 م
lana mahdi
.
تاريخ التسجيل: 07-05-2003
مجموع المشاركات: 4530
قول للزمان ارجع يا زمان (Re: منصوري)
من الحاجات الكانت بتستهوينى زمان يا منصورى
"صللللللللح سراير حدييييييييييييييد"
كنتا بشوف صلاح السراير يجوب شوارع المزاد حيث بيت حبوبة
كنتا بحب جدا اتفرج عليهو و على سيد النبق "نبببق نبببببببببق نبببببببببببق حرججججججججججججججل" الذى كان يجوب بحري ايضا على صهوة ناقة
حكوا لى خالاتى ان المزاد زمان كان اسمو غابة الهنود و كان مزروع مسكيت و كان مسكون بفهم سكنى الجان
احب كل ما يتعلق ب "زمان" وريحة"زمان"فنحن اجيال لقنا ان "زمانكم دة ما زمان ،،الزمان كان زمان"
حتى احببنا ان نكون من ناس "زمان"
محبتى
05-12-2004, 06:27 ص
منصوري
.
تاريخ التسجيل: 28-09-2003
مجموع المشاركات: 448
Re: حـاجات زمـان (Re: منصوري)
شاعرتنا وأديبتنا الأخت لنا مهدي.. ذكرتينا والله أصوات محببة الى النفس كانت تنادي في العصرية.بتاع الحرجل والنبق والمحريب.. أما بتاع (أصلح سراير الحديد) دا كان يمر بالصباح ودا مثقف شوية وعادة ما يكون راكب عجلة....طبعاً جاء بعد ديل..بتاع( ترمس ..ترمس..كبكبيه) وكمان جاء بعد دا صوت بتاع الداندرما ويجر عجلة..هسه ما عارف جاء شنو..المصرين عندهم حاجات قريبة من دي برضو..بس ضيفى ليها(أصلح بوابير..الفنية.كباس) ودي ذاتا تطوروا منها الي( أبيع اسطوانات غاز)ودا بي عربية..الكباسات والفنية دي قطع اسبيرات لوابور يطبخوا عليها موش زي بتاعة الجاز أم شرايط اللي كانت عندنا في السودان.. دي تكبس بالهواء ونارها قوية زيادة..
................................
بما أنك يا لنا.حتي الآن آخر المتداخلين.. فأهديك هذه القصيدة .الأنشودة بصوتي وقد كنا ننشدها في ثانية إبتدائي..أولية.. وقد قمت بتلحينها منذ ذلك الوقت ولا تزال بذهني عالقة هذه الأبيات منها وفي لحنها شبه من ألحان الفنان أحمد المصطفي القديمة..
05-12-2004, 09:58 ص
منصوري
.
تاريخ التسجيل: 28-09-2003
مجموع المشاركات: 448
Re: حـاجات زمـان (Re: منصوري)
قلتي يا أخت لنا مهدي.. من شدة ما كانوا قاعدين يشكروا لينا ناس زمان حتي تمنيت ان أكون من ناس زمان...
صاح.. لكن.. شنو هسه كدا إنت من ناس زمان..موش العبرة بي زمنهم.. العبرة بأننا نأخذ منهم الدروس وننطلق بها الى حاضرنا..تظل تجاربهم مخزونة في جوفنا وتندك وتكون طوبة واحدة قوية وسميكة ومتينة وصلدة في بنيان المستقبل كأساس متين.. الحقيقة كل تجارب البشرية مخزونة في النفس البشرية.. فإذا نظرت لأحدنا مثلاً.. هو نتاج من أنثى وذكر.اي من أمه وابيه.. وابوه كذلك نتاج من جده وجدته.. لغاية وصولنا الي الست بربكم.. حيث نذكر شهادتنا بذلك..( ولقد يسرنا القرآن للذكر فهل من مدكر) هذه هى قصة النفس البشرية.. وليس العبرة بأن نعيش في ماضيهم وإنما العبرة بإستقصاء الدروس وتذكرها..وكلما كانت سلسلتك البشرية ذات مجد تليد وتقوى وعلم وورع ومحبة للناس.كلما كانت قابليتك كبيرة في القيم ولذلك نبينا عليه افضل الصلاة وأتم التسليم قال تخيروا أين تضعون نضفكم.فإن العرق دساس).. العرق يعني هذه السلسلة..
05-12-2004, 08:31 م
Ahmed Elsharif
.
تاريخ التسجيل: 30-10-2002
مجموع المشاركات: 220
Re: حـاجات زمـان (Re: منصوري)
واحد من أجمل البوستات القريتا مؤخراً بلا مجاملة , و السرد أكثر من رائع . أرجو أنك تواصل.
مع التحية
(عدل بواسطة Ahmed Elsharif on 05-12-2004, 08:41 م)
06-12-2004, 02:45 ص
منصوري
.
تاريخ التسجيل: 28-09-2003
مجموع المشاركات: 448
Re: حـاجات زمـان (Re: منصوري)
أحمد الشريف..تسلم.. والله ربنا يقدرنا نواصل أو نقدم حاجة ترضي طموح القراء.. الناس هنا الناس كتاب وعلماء وأدباء وفنانين وأصحاب ذوق وكمان برضو في طائفة الهزل وعدم الجد.. ماهو حالنا عاد.. واقع والواقع الواحد ما بيتبرأ منو. ما بيبترو...بيدلى فيه بدلوه..لأنو نتاج المجتمع.برمته .بحذافيره... الموقع هنا لما يكون حديقة.كل صاحب هوي يجد فيه.. شى بيكون أحسن..من الرائحة الواحدة..
07-12-2004, 07:11 ص
بلدى يا حبوب
.
تاريخ التسجيل: 29-05-2003
مجموع المشاركات: 3169
Re: حـاجات زمـان (Re: منصوري)
منصورى
بوست شيق يجبرك على قراءته اكثر من مره وهو بمثابة تاريخ لفترة عاصرتها بعض الاجيال ولكن لماذا نحن دون شعوب العالم فى كل شىء تكون بدايتنا منظمة ومتطورة وما ان تمر السنين تفقد بريقها ونتسامر فى مجالسنا ونغنى ونقول حليله بينما العالم من حولنا يسرقها ويعمل على تطويرها .
ايعتبر الانسان السودانى سبب فى ذالك ام الساسة اللذين مروا على حكم الوطن هم السبب فى ذالك ام ماذا ومنك نستفيد
تخريمة على منوال رجاء العباسى
Quote: جلابيتو التي كانت سيدة الجلاليب في بيوضيتها وجدتها وعمودها اليوم رثة مقطعة..شربانة وسخانة.. محمرة من الكتاحة والغبار. زرايرها مقطعة.. بس مثبتها بي زرارة من فوق جنب رقبة الجلابية. والزراير الباقيات مافي لأنو مهمتهم أصبحت ثانوية.. او قطعهم هو بفعل فاعل عملهم لجلابية تانية...البنطلون كمان بقى زي التحلية ..ما كل مرة بيقدر يشتري بنطلون.. تلقي البنطلون .ضارب من تحت.. ومرة مخيتو بي خيط ابيض. ومرة بي خيط أخضر.. ومرة بي خيط أحمر.. المهم الخيط البيلقاهو قدامو عند خديجة
لكن البهدله ده اكيد خديجة بتلعب دور فيها وطبعا ده براه بوست لكن مجرد تخريمه
وافر الشكر والتحايا
09-12-2004, 03:56 ص
منصوري
.
تاريخ التسجيل: 28-09-2003
مجموع المشاركات: 448
Re: حـاجات زمـان (Re: منصوري)
ناس العاصمة زمان:-
ناس العاصمة في الستينات ولغاية اواسط السبعينات كانوا منارة هدي لناسهم الجايين من الأقاليم.أصلو كل الناس العاصمة هم ناس من الأقاليم جابتهم ظروف العمل والمصالح الحكومية والتجارة للعاصمة أي كلهم عنهم جذور من الأقاليم.لذلك ناس الأقاليم كان لما يجوا العاصمة لذويهم ولصلة رحمهم ولأقاربهم كان يجدوا كل الحفاوة والترحيب والكرم واصلاً هم ناس الأقاليم ما بيحبوا العاصمة بس مرة في السنة مرتين في السنة.يا جوا لى علاج.. يا ولد قبلوهو في الجامعة.. يا مناسبة عرس يا زول عيان من اهلهم ناس العاصمة جايين يشوفوهو.يا زول مشى الحج من ناس العاصمة عايزين يجوا يباركوا ليهو وكدة.. وناس الأقاليم كانوا يفتخروا بأنه ليهم طرف في العاصمة وناس العاصمة يفتخروا بأنو ليهم جذور في الأقاليم.. حتي يقول ليك إنتا قايلنا مقطوعين من شجرة هنا في العاصمة؟ لا نحن لسه جذورنا في الأقاليم وحقنا هناك وتمرنا كل سنة يجيبوهو لينا.. وناس الأقاليم كان لما يمشوا العاصمة ويجوا راجعين..يجونا في الأقاليم ريحتهم عاصمة عاصمة..ريحة هدومهم مريحة بي ريحة غالية.. وهدومهم مكوية مكوة راقية وكمان أهلهم في العاصمة ما بيدوا هدومهم الغسال يبقي ليهم عيب كأنوا هدومهم دي فيها جدري لمان يدوها ليهم غسال الحلة..لا بيغسلنها بنات البيت في العاصمة البنات المتعلمات ويكونها بي مكوة الكهرباء موش عندنا في الأقاليم مكوة الفحم.. وتتكوي على تربيزة السفرة وتربيزة سفرة دي براها معلومات جديدة عند ناس الأقاليم هو صحن قراصة بس يختوهو في ا########## ويتلموا فوقوا. او إذا جاهم ضيف عزيز يكون تربيزة صفرتهم برش.. لكن حكاية تربيزة صفرة وحوليها إطناشر كرسي أو ستة وتربيزة صفرة يفردوا لها مكاناً خاصاً في الصالون وليها فرش مشمع من فوق وفوق المشمع بنات البيت مخيطات فوط ومطرزة بي إبرة كوررشي دي كانت حاجة تانية وكمان غير فوطة التربيزة الكبيرة هنالك فوط صغيرة على الكراسي عشان رقبتك ما توسخ الكرسي.. ومخيدة مخدة صغيرة كدة تختها تحت صلبك..الحاجات دي كلها كان ثقافة جديدة على ناس الأقاليم ناس الزراعة .عشان كدة كانوا بيجوا ملمين بمعلومات جيدة.حتي أولادهم البيكون ساقوهم معاهم العاصمة بي يجوا حالقين حلاقة ناس الصعيد في الصالونات بالمكنة ومسحوا ليهم بالبودرة والكولونيا.ريحة البدرة لسه في رقبتهم حلاقة غريبة نجي نتفرج فيها ناعمة من تحت ومن فوق (قجة) ومواسية شديد مافيها اثر مقص ظاهر زي حلاقة البلد( الكارييه) يحلقوا ليك بي(توريق) وتتجرح مليون جرحة.. بعدين ناس الأقاليم لما يمشوا العاصمة يمشوا لى ناسهم محملين بالسمن البلدي.. والتمر.. ودقيق القمح البلدي الأحمر الخالص ويمكن يجيبوا ليهم خروف الضحية معاهم من البلد ماكل قش الجروف والتمر لحمو سمح وطاعم مازي خرفان الصعيد لحمها لمان يغلوهو يفور رغبة ويملا الحلة لأنو السمساري مديهم ملح عشان يتنفخوا ويبيعهم.. وكمان رب الأسرة في العاصمة يعزم بعض المقربين له ويقول ليهم تعالوا افطروا معانا ضحيتنا خروف بلد لحمو هش. ما اصلو أبوهم هو متربي في البلد لغاية ما كبر وجابو قدروا العاصمة لذلك هذه الحاجات تجري في دمو. وناس البلد لمان يجونا من العاصمة يجوا جايبين معاهم..خبيز وكعك.. وأبري أبيض.. وطواقي ومناديل..وقزاز عصير..وحلاوة( ريا) وحلاوة(بريمة) وحلاوة(حب) وحلاوة حربة) قالوا سيد المصنع بتاعا من الأنصار أنصار مهدي الله... وينتظر حسن بي فارق الصبر عشان اخوهو واخواتو يجوا من البلد ويتمنى تجي مناسبة عندهم في الخرطوم تجيبهم ويخلق مناسبات عشان يجوا.. هو موش محتاج ليهم ولاهم محتاجين ليهو بس هو عاوزهم عشان اللمة والونسة ويسال من ناس البلد والعجايز والكبار وفي الدميرة البحر وصل وين.. وصل (شجرة الزلال) والله وصل ( دومة مستورة) والله وصل ( درب الرعاوية) والخور في الدميرة طلع سدر لغاية وين( درب التمر) والله ( الدرب الفوقاني) وناس فلان جابولهم وابوؤ زراعي.. وناس فلان لسه يسوقوا بالساقية وبقرهم مربطات.. والضهراوي والعشاوي والفجراوي...وفكا( التتق) وطلق ( التتق) بتشديد وتضعيف التاء الثانية.... كان أبوهم في العاصمة يحب يسأل أخوهو الفي البلد عن الحاجات دي... بعدين ناس البلد اصلو هذه السنة كانوا مزنوقين في حصاد التمر ...حش التمر.. لكن ولدهم الفي الثانوي ضغطهم شوية عشان يمشوا لى عمو وعندو غرض في المسألة دي ولكن أبوهو وأمه مافهمين حاجة.. الولد زي بدأ ينبض قلبه بحب بنت عمو الشى المفقود في البلد.. لأنو بنت عمو المرة الفاتت لما ودعتوا.. أدتوا ستة مناديل من قماش( البوبلين أبو تفاحتين ) الخالص.. وكل منديل عليه قلب خافسوا سهم ومنديل تاني عليهو قلبين مشبوكات مع بعض.. وكل منديل لون الخيط يختلف ولون القلب يختلف..حرف المنديل من تطريزو ( مشرشر) يشبه حرف البسكويتاية من برة معمول باليد بي إبرة كورشي خيط( دجة) تشديد الجيم.. الأم ما ناقشة حاجة.لكن شاهدت سوسن وعلى دايماً بيجلسوا على تربيزة السفرة. وخاتين جنبهم كتب مدرسة للتمويه. وهي بتخاف من تربيزة السفرة وما بتعرف تأكل عليها ولا بتحب الجلوس على كرسيها. وسبب لها ذلك كراهية من تربيزة السفرة.. نفسها.حتي الغداء زي بقت تكره لما يختوهو على تربيزة السفرة..حتي ماها قاعدة تشبع .لأنها بتكون عاملة حسابها ومتوجسة خيفة.. ما ترمي ليها فوطة والله توسخ لها كرسي بي عضم والله تقع هي من الكرسي نفسه والله تقع سكينةأو شوكة على كراعا تجرحا. وإن كان هي من أول مرة قد ابعدت الشوكة والسكين عن دائرتها الضيقة وحذرت وأنذرت وكررت وأرغت وأزبدت وحذرت من يحضرهن لها.. وبالرغم من ذلك مرات كانت تجلس جنب على وسوسن في السرير وهم على تربيزة السفرة وكانوا لما يرونها تحضر ترتفع اصواتهم وتتكلم سوسن وتقول السنة دي الشيوعين والمستقلين أخدوا الإتحاد من الكيزان.. وآخر كتاب قرأته.؟تنصرف الأم وقتما تطمئن لأنو على تعلم وهي كانت عايزاهو لي بنت أختا الفي البلد لأنو بنت المدن دي تطفش وليدها الوحيد منهم وقطعاً ما بتجي تعيش معاهم وبنت أختا مريم تجي في الحلة في البلد تمسح ليها كريعاتا بي دهن كركار(دهن غسيب) وتعوس لها غداها لمان تكون راحت الحلة التانية ترفع فاتحة وتأخرت...نحن في البلد لما على عاد من الخرطوم.جينا نسلم عليهو ناكل حقنا في الحلاوة ونتفرج في حلاقة الصعيد في رقبة وراس على.. لقينا على راقد جوه.. ابوه قال لنا( على الهواء غير معاهو من ما جاء من بحري) الوالد نفسه سيد أحمد تعلم كلام الخرطوم...كيف يعني الهواء غير معاهو.هو الهواء قاعد يغير مع زول؟ ما الهواء هواء يدخل بالنخرة وخلاص تاني شنو؟ وفهمنا مؤخراً جدا أن الهواء غير معاهو.. اي طقس الخرطوم لما اختلف عن طقس البلد.غير معاه اي أصيب بنزلة برد.. أو إنفلونزا. أو نزلة شعبية.. نحن هنا نسميها( زكمة) مع أن كلمة زكمة نفسها أفصح عربياً( جيفة رائحتها تزكم الأنوف)...
[
(عدل بواسطة منصوري on 04-01-2005, 03:10 PM)
(عدل بواسطة منصوري on 04-01-2005, 04:05 PM)
|
|
 
|
|
|
|
|
| العنوان |
الكاتب |
Date |
| حاجات زمـان | منصوري | 04-01-05, 02:52 PM |
| Re: حاجات زمـان | منصوري | 04-01-05, 02:59 PM |
| Re: حاجات زمـان | منصوري | 04-01-05, 03:58 PM |
| Re: حاجات زمـان | هشام مدنى | 04-01-05, 04:09 PM |
| Re: حاجات زمـان | منصوري | 04-01-05, 08:35 PM |
| Re: حاجات زمـان | منصوري | 05-11-05, 03:44 PM |
| Re: حاجات زمـان | منصوري | 05-11-05, 03:59 PM |
| Re: حاجات زمـان | منصوري | 05-12-05, 07:42 AM |
| Re: حاجات زمـان | منصوري | 05-12-05, 11:34 PM |
| Re: حاجات زمـان | المسافر | 05-17-05, 03:28 PM |
|
| |
منصوري
فيس بوك
تويتر
انستقرام
يوتيوب
بنتيريست