يا حبوبة عليك شيخك اب قفاطين ما تقولى كدا .. وما تفضحينا اكتر من العلينا ... فى ذمتك كلامك البتقولى فيهو دا ... فى زول بيصدقو هسى ؟ ! ... انا قريت علوم ما وراء البحار وما تحتها وقريت علوم الشدر من النيم والذى اكلته مرارا وتكرارا حتى صار احدهم يقول لى ... انت اكلت نيم ... وانتهاءا بشدر اللالوب والطلح والشاف .. لكن حديثك القلتيهو دا ما لاقانى لا فى سما ولا واطة ... انتى الكلام دا بتجيبيهو من وين ؟! .. شوف يا ولد يا ممسوخ الفلفسة والفلقصة وبنطلونك الشاكيهو لحدى الحجاب الحاجز دا احسن تخلوهو وتسمعوا كلامى انا دى ... عحوز آآى وشمطاء يمكن .. وبشوف طشاش طشاش ومرات نضاراتى الزى قعر الكباية ديل بنشوف احسن منكم كلكم ... وبنقرأ الكف والفنجان والقلاى والبنبر ... وبنقراها طايرة برضو مش انتو بتقولوا كدى ؟ ... لكن البتسووا فيهو انتو دا كلام فاضى وما بتقتنعوا لكلام العجايز وبتعتبرونا خردة وزيادة عدد ما منها فايدة ... هسى الزول الكبير كان مدير ولا غفير بعرف الدنيا دى فجة فجة وانا القدامك دى سنة الهبوب الحمراء جدك المر .. قال لى يا بت الفاكوكى شايفا شنو فى الفنجان ... اها قلبتو كدى وشغلت اغنية من اغنيات حقيقة الفن وصحى الفن حقيقة ... الناس تقرأ الفنجان بالقهوة وانا اشوفو بالاغانى لابو مركوب الاسوانى ... اشوف ليك هبوب كتيرة وكبيرة ولونها احمر زى الحصل فى اسيا دا اسمو ناعومى كامبل ... يا حبوبة اسمها تسونامى مش تعومى والله تغرقى لاضنينك ... اسكت يا ممسوخ ... اها كلامى ما تميتو الراكوبة وين ؟!! .. ألقاها ليك مطروحة ارضا زى مركز التجارة الدولى ... والراكوبة دى اذا ما وقعت ليك بالترجمة الحرفية معناها الكشاشة بلغة اليوم ... وتانى شئ السخيلات والحمير والكديسة كلهن اتجمعوا فى مكان واحد وهاك يا احتجاج ... مظاهرات نادرة اول مرة اسمع بيها ... وجدك المر لقيناهو معلّق فى راس الشدرة وشايل ابريقو ما قادر ينزل الا جبنا ليهو ناس المطافى ... حتى نزلو .. قلت ليهو يا ابو الطيب ما تنزل خلاص .. حلف ما ينزل الا يدقوا ليهو الريحة عشان الشئ الركبو فوق دا يكون شواطينو تآمروا عليهو ... ومن ديك بقى يعرف انو قرايتى للفنجان اضحت شئ واقعى وحقيقة زى حقيقة الفن ... تجى انت تقول لى كلامك دا كلام ساكت !! .. اها النحدثك ... الطريفى امام الجامع وكت انحرف وبقى يلبس اردية ... فى زول قال ليهو انت مشوطن ؟ .. ما انا الوحيدة العرفتو ليهم وطردت شواطينو ما جحورا ... وحات نظرى وشيخى اب قفاطين تسمع كلام الناس العوج دا الا يغطسوا حجرك وحجر الفلفسة .. يا حبوبة انا بعتبر دى خرافات ساى وانتى بتؤمنى بحاجات اليونانيين زماااان خلوها وبقوا متحضرين واخر مرة شالوا كاس اوربا فى كرة القدم .. وانتى لسة قاعدة لى فى قراية الفنجان وقراية الشيطان وهبوب حمراء وبعد شوية تجى تقولى لى سيجارة خدرا بقت ارسال للرادى ... انتى خرفتى وبقيتى تهضربى زى الزول الطلعت ليهو الملاريا فى راسو ... يا ولد تطلع فوقك كراكة شندى ... انا تجينى ملاريا قايلنى عندى فقر دم وفقر عضم !! هيييى انا بتك يالفاكوكى ... شربت المرحبيب ومضغت شدر المهوقنى واتبخرت بالتيمان واكلت القرض وسفيت القنقليز وصفيت السمن .. ويا يمة اللحم دا الا اجدع باقيهو للكلاب ... تقول لى تمسسك ملاريا !! .. تمسكك رجفة ريغان يا يمة وما يعرفوا ليك علاج الا يبوشوك بالشاى والظهر ... الملاريا تجيكم انتو اولاد الزمن ديل .. اولاد الايسكريم والحنابيك والركشة ... انا مما قمت الدكتور دا ما بسمع بيهو الا فى الرادى ... واقول ليك شئ انت حر تصدق ولا ما تصدق انا ما عندى دخل بيكم ... يعنى يا حبوبة دايرة تقولى لى انك قريتى ميتافيزيغيا ؟!! .. يا ولد التفتة التقلب لونك ... تنبزنى كيفن ؟!! .. يا حبوبة دا علم الماورائيات .. ولا ورائيات ولا قداميات وما تتفلفس فوقى ... انا حدى الفنجان دا والقلاى ... والبشوفو فيهن الالوسى ما شافو ... هسى انا امبارح دى جانى خبر من القلاى والبنبر انو السودان دا مسكون ... طبعا مسكون ويعنى يا حبوبة حيكون فاضى !! .. يا ولد مسكون معناهو الجنون ساكننوا وحلفو ما يطلعوا الا يضبحوا ليهم زول كبيير ... واها الزول دا ما قالوا ليكى هو منو ؟ ... بصراحة انا الزول دا ما جانى فى القلاى لكن يمكن الليلة اذا قليت البن ممكن اشوفو هو منو ... بس يا حبوبة بى قلايك دا ما تقلينا فى النار ... يا ولد يا ممسوخ فى ناس مقليين تانى يقلوهم !! ..
03-14-2005, 09:24 AM
معتز تروتسكى معتز تروتسكى
تاريخ التسجيل: 01-14-2004
مجموع المشاركات: 9839
تروتسكى ... الزول الانسان المستف وحيح ومقلى على قلاية البعاد
المشغلك تلفونات وفاكسات دا منو الممسوخ فى زمن الشلهتة دا ؟!! ولا يا ربى اشتغلت فى كباينة النصف الحلو .. نص حلو مر اسمعنى ناولنى كباية موية ارش بيها نار البن عشان القلاى دا ما يحرق الجمهورية اوعك تدقس تدينى موية نار زى الجماعة ما عملوا
03-15-2005, 08:21 AM
alfatih alfatih
تاريخ التسجيل: 02-04-2003
مجموع المشاركات: 1150
العزيز جدا عبد الغفار سعيد سلام يا اصيل .. ووالله الشوق بالكتابة لا يروى ظمأ اللحظات لديكم مشتاق لحد الغيبوبة .. وكلما اتذكركم بتجينى كوفارة من سؤالى عليكم يا اعزاء
تخريمة : قلت لى مفروض يضبحو ليهو 51 زول !! ديل ما شوية عشان يطلع جنوا دا ؟ بالمناسبة حبوبة قالت احتمال تشوف تانى القلاى الجديد عشان القديم صابو الكفاف وبقى يشوف طشاش . تسلم عزيزى وتقبل تحياتى
راجع الماسنجر
03-15-2005, 08:35 AM
alfatih alfatih
تاريخ التسجيل: 02-04-2003
مجموع المشاركات: 1150
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
alfatih
معتز تروتسكى
abdelgafar.saeed
almulaomar
فيس بوك
تويتر
انستقرام
يوتيوب
بنتيريست