|
|
 وجهة نظر.. يا بكري
|
الاخ بكري
بداية
من يوم ما تم اقتراح قوانين المنبر ثم بعد ذلك تم تعليقها في خشم الباب
لمدة اربعة وعشرين ساعة بالتمام والكمال وحتي تم العمل بها .. وانااجي كل
يوم واقراها من الالف لي اليا ولا اتوقف الا عند المادة الرابعة عشروتحديدا هذه العبارة
Quote: كما يحق لها سحب العضوية أو اى موضوع و مداخلة فى اى وقت .
|
ولا اجد لها تفسيرا سوي انها لا ئحة قائمة بذاتها .. لانها تجب القبلها والبعدها من مواد
ما دام الادارة عندها الحق دا والمكتوب بالخط العريض الاحمر لزوم اللوائح شنو
نعم يابكري انت من اسس المنبر (وهذا الجهد لا ينكره الا جاحد ) لكن هذا المنبر منبر باعضاءه وهو منبر حر وهو وطن من لا وطن له .. وطالما هو كذلك فلا بد من المشاركة الفاعلة من قبل الاعضاء في كل ما يخص المنبر وبشكل ديموقراطي شفاف .. الا اذا رايت انت عدم احقية الاعضاء في تلك المشاركة في شان المنبر ووقتهاتكون قد قضيت علي المنبر الحر و يمكن لك ان تسميهو منبر بيان للنقاش او اي اسم اخر بخلاف المنبر الحر او الوطن المصغر وما الي ذلك
تانيا
عشان كل الكلام الفوق دا( وخصوصا المقطع الانا عامل ليهو كوتيشن من اللائحة)
وعشان ما نجي كل يوم داخلين البورد وفي امان الله عايزين نشارك (كان بالقراية ولا الكتابة).. و نلقي الصايح حايم (اروروك يا ناس الحلة فلان الفلاني راح في حق الله )
وتبدا العكة .. يا اخوانا مالو امبارح ما كان كويس وبيكتب في امان الله وما غلت علي زول اصلو .. والبيقول ليك يستاهل هو ما كتب كدا وكدا ويجيبو ليك مية كوتيشن عن افاداته التي ادت الي موته بالسكتة اللائحية ويجو التانين يجيبو ما عن لهم من كوتيشن برضو تبريء ساحتو ... ويطفح جبل الجليد .. والشايفنو بي فوق اقل من المستخبي وتبدا التحليلات والتخمينات واخماس في اسداس والكل عاوز يعرف التحت الموية شنو .. والعجاج يقوم في البورد ويبقي امسخ من الجير الابيض .. وهكذا دواليك
عشان دا كلو انا بقترح اقتراح متواضع جدا
يا بكري لو شفت اي واحد مخالف لي لوائح المنبر اخسر ليك عشرة دقايق واكتب عنو بوست ( او خيط كما يقول البعض) وقول لينا انو يا اخوانا فلان دا عمل كيت وكيت وقال كذا وكذا وخالف المادة الفلانية والفلانيةوجيب ما ما راق لك من كوتيشن تدعم كلامك ووقول لينا انا قررت ( احظرو.. اوقفو..او حتي اعدمو)
ورايكم شنو ؟
وتعمل فورم جاهز بتاع تصويت ( وهو امر سهل علي حسب علمي ) فيهو خانتين فقط لا غير( اوافق اولا اوافق.. نعم او لا) والعضو ما عليهو الا انو يعمل كليك علي الشايفو صاح .. ويستمر التصويت يومين تلاتة اسبوع حسب الضرورة وبعد داك يتم التنفيذ حسب ديموقراطية الاغلبية .. ووقتها الكل حيكون ملزم ومافي زول عندو الحق يتكلم ( ما حنقول الانتخابات مزورة ) ونرتاح من اللت والعجن وترتاح انت من قولة بكري ظلمني وبكري ديكتاتور لانو يا اخي الشفافية هي لجام كل زول
الشفاااافية يا بكر ي
ثالثا
موضوع ود الشيخ انا شايف فيهو الكتير من التجني ( ودي وجهة نظر معظم من كتبو بخصوص الامر دا) بغض النظر عن اختلافي او اتفاقي مع ما كتب ود الشيخ .. فالمسالة في المبداهي كلمة الحق
طالما ارتضينا اللوائح للمنبر فلا حساب لما قبلها.. الا اذا كانت هنالك نية مبته لهذا الحساب .. وطالما ود الشيخ تم حسابه علي ذلك فليكون الحساب للجميع بمن فيهم الذين كتبو اسوا العبارت والتي كانت ( في ظني ) هي ما جعل ود الشيخ ينقلب مائة وثمانون درجة في الردود عليهم ( مع احتفاظي برايي في طريقة رده )
نرجو اعادة النظر في كل احوال البورد حتي يعود اليه من هجره ... وحتي يرجع منبرا حرا يسع الجميع
وبرضو بالشفاااافية
خارج النص
اقترح ان تلغي تلل العبارة المكتوبة بالاحمر العريض في المادة اربعتاشر من اللوائح
وكثيف ودي واحترامي للجميع
|
|
 
|
|
|
|
فيس بوك
تويتر
انستقرام
يوتيوب
بنتيريست