|
|
 السودان الجديد ...شديد !
|
ناس التجمع الوطنى الديمقراطى المعارض (نطو ) فى اخر لحظة من (البصمة ) على (فيش ) الحكومة قبال الدخول فى الحكومة الجديدة وقالت صحف الخرطوم اليوم – والنقل من صحيفة الراى العام –ان (المفاوضات تمر بمرحلة صعبة بعد تمسك التجمع الوطنى بضرورة منح قواته وضعية خاصة فيما تصر الحكومة على ان الحل الوحيد تطبيق البند (7 ) من نصوص اتفاقات نيفاشا بتخيير الفصائل المسلحة بين الانضمام لقوات الحكومة او الحركة الشعبية ) ... النقل انتهى ... اها وبعدين طبعا دا يا جماعة زى ما بيقولو اخوانا فى مصر المحروسة (جر شكل ) وهسة لو جا زول نصيحة وقال لناس التجمع انتو يا شباب (عساكركم ديل كم ) تجيك اجابات مضحكة .. وعشان ما نتكلم ساكت تعالو (نحسبها ).. اها حزب الامة القومى دا طبعا مرق زماااااااااااان من التجمع وشال (انصارو ) والمهاجرين والمجاهدين بتاعين جيش الامة وشتت مشى الخرطوم وشافو ليهم وظائف ومهام مدنية يا رجعوا مزارعهم يا رجعوا مكاتبهم يا رجعوا تجارتهم وفى ناس (جابت ) من الاخر وخلت السياسة والسودان القديم والجديد واتطلبو الله فى مناشط وحاجات تانية ، اها نقول قوات الفتح ودى القالو تتبع لمولانا (الميرغنى ) دى ما فى زول بيعرف ليها نشاط ولا عدد بس عندهم زول كدا كان زمان جنو تصريحات اسمو معتز الفحل غير كدا ما معروف ليهم عدد ولا نشاط ، طيب نمشى قوات التحالف ديل خلوهم ساكت ناس مع العميد وناس مع البروف وفى ناس من بروف لبروف طلعت اوف والمحظوظ منهم اللقى ليهو طريقة ترجعو السودان بالمسارقة وسهر الجداد وهسه لو الحكومة وافقت وقالت خلاص نعمل وضع خاص لقوات التجمع – ومن ضمنها قوات التحالف – اها نخش تانى في حيص بيص دى قوات منو ودا جيش منو يعنى يقولو مثلا السيد النقيب فلان الفلان جناح تيسير والنقيب علان الفلتكانى جناح عبد العزيز خالد ... طيب التحالف خلوهو نمشى تانى وين ...الحزب الشيوعي دا لو طلع عندو فصائل مسلحة بيكون (بالغ عديل ) لانو طوالى (الزملاء ) والرفاق فى حته فى الدنيا بس تدكش الزول ساى يقول ليك نحنا طلقنا الانقلابات وتانى (تب ) بندقية ما بنشيلها انشاء الله لو كانت خرطوش فى عزومة عرس وحتى الاستاذ (نقد ) فى مقالاته الاخيره النشرتها جريدة البيان الاماراتيه قال انهم من اواخر السبعينيات كدا خرطو يدهم من اى عمل عسكرى .. نهاااااااااااائى ... زى جمال عبد الرحمن ما بيقول ... اها فضل منو من ناس التجمع الاسود الحره وقوات البجا ديل اصلا (قدو السلك ) ومرقو من التجمع و(فرزو عيشتهم ) من بدرى بعد مخاشنات لفظية كدا مع مولانا ومعاهم برضو ناس حركتى العدل والمساواة وجيش تحرير السودان والتانية بالذات ما عندها كبير غرض بالشرق وعندها روابط وثيقة مع حركة قرنق وعشان كدا (مطنشة ) اصلا من خير يجيها من التجمع ولا اى تواجد ليها فى شرق السودان ... اها فضل منو يا جماعة – خايف انسى لى حزب يكون غاطس هنا ولا هنا – ما يبقى لينا الا الفريق عبد الرحمن سعيد وفاروق ابو عيسى وديل ناس كدا بتاعين تحلية للتجمع وما اظن تكون عندهم (قشة مره ) فى انو التجمع يوفق وضعوا قواته العسكرية لانهم اصلا عارفين بحكم خبرتهم انو المسالة ...ببح ... مافى .
فالتجمع الوطنى الديمقراطى دا حقو يخت الرحمن فى قلبو وما (يبالغ ) قوات شنو العاوز يوفق وضعها هو لو كان عندو قوات وحضور عسكرى فى الشرق كان قعد فى نيفاشا دى فى (الملاحق ) وادو الضلافين ولا كان (جون قرنق ) والحركة الشعبية مارست عليهو (الدلع ) الكتير داك .. يقولو ليك هيئة التجمع عندها اجتماع ... اجتمعو لسه فلان ما جا فلان اتاخر فلان عندو حمى فلان حجزو طلع مجلى ... وفلان يا جماعة جون قرنق ولو ما جا الاجتماع زاتو بيكون بايخ وما عندو قيمة .. ناس الجرايد بيودهو الصفحات بتاعة (خط ميه غرب ) ...
التجمع والاحزاب المنضوية تحتو انا شايف – ومسكين انا – انها تركز جهدها للعمل السياسى وتجى تخش جوه وتنشط احزابها المنتهية وتعمل ليها عمرة وصيانة لافكارها لانو السودان بقى بالجد جديد وشديد يعنى فى اجيال كدا لا بتعرف نقد لا الترابى لا الميرغنى ولا بتعرف حزب ولا حزبية اجيال وشباب (زى الورد ) اهتمامتو زاتها بقت خارج (صوتك ذمتك ) جيل كدا يمكن عشان ما نظلمو نقول انو يناسب عصرو جيل عولمة من الاكل والشراب والهوايات وديل لا شغالين بى حكومة ولا معارضة والشوية الفيهم العندهم ولاءات خصصوها لناس الهلال والمريخ والمطربين الشباب وفصلوحبهم على العجب والبرنس ومحمود عبد العزيز (حوده ) وامتدت الولاءات لاسماء عربية وغربية زى نانسى عجرم وكريغ ديفيد وتيرى هنرى وبالمناسبة الدورى الانجليزى والاسبانى الناس بقت تتابعو فى السودان بادمان عديل لدرجة انو فى ناس عندها كراسات ودفاتر فيها الفريق البحبوه لعب كم كوره وخسر كم والباكات بتاعنو (مكرتين ) كم مره ... تقولو لى وضعيه قواتنا وحقنا وحق الحكومة وحق الحركة الشعبية .... !
|
|
 
|
|
|
|
محمد حامد جمعه
فيس بوك
تويتر
انستقرام
يوتيوب
بنتيريست