|
|
|
 Re: دفتر الغياب ... السمع اسمو يقول نعم (Re: alfatih)
|
فيك الخير يا الفاتح
عن أبكر أظن أنه موكر عديل كده في بلاد الفرنجه
وبدر الدين شنا قفاه أعوج ومناحلته ومناقرتو للخواجات قطعت منو النت وأدوهو وورنق ليتر من الصباح وقالوا ليهو يا البدري لو واحد بالغلط دخل أى شات رووم بي إسمك حا نعمل ليك تيرمنيشن يعني النت ده إلا في تربيزة البينق بونق تاني وموبايلك زاتو حا نشيل منو النت ونخليهو بره النت حتي لو دخلت حلف النيتو ذاتو
وأهل العوض بطنو طامه من الحاصل وربنا يعد الحال بعد محادثات السلام وتوقيع الإتفاقية التي قد يكون الشيطان مختبئاً في تفاصيلها.
والرحمابي يظهر مره ومرة ومرة وآه وآه لو تنفع آه
وهناك بت قضيم التي تمصلت فردة الباتا خاصتها وهي تنط خور أب عنجه ففقد إحدى خفيها ورجعت بخف واحد.
وأخونا عكسو يقال والعهدة على الراوي أنه يقوم بعمل اللمسات الأخيرة للحجيج ليوم النفرة من عرفه وهو الذي لم يتسطيع أن يتخارج من ستاد الخرطوم بعد مبارة في كرة القدم للهلال والمريخ.
وعاطف عبد الله الذي ظهر ظهورا مشرفا بموضوع غاية في الأهمية وأختفي بنفس السرعه
وتقريباً معظم الذين شملهم التسجيل مؤخراً يعني نظام الواحده/ الواحد يظهر وبعدين يدفن دقن وهناك الغائب أبداً منذ فترة يحي بن عوف وتوما هوك وكثيرين.
| |
 
|
|
|
|
|
|
|
|
Re: دفتر الغياب ... السمع اسمو يقول نعم (Re: alfatih)
|
مولاى الملا عمر ... طيب الذكر
الله يجهجه الخواجات كان جهجهوا لينا بدر الدين دة ... نحن نبحث عن الشناة اينما حطت رحالها ولكنهم اولاد الذين ارادوا ان يحرموننا من عشقنا الذى نهوى ...سنرسل له شفرة التواصل عبر الاسلاك الحايمة فى الفضاء والتى شربكت سير الطائرات وطلعت عين السائقين ... اما عن العزيزة توما ( هوك ) ففقدها كبير .. ويا توما وين انتى ايتها المجندلة برصانة التعابير ... يا كلك جمال زيك .. عودى بسرعة عليك العشق البين مسامك ...سأتحدث مع وكالة البحث والترقيع للاستجداء على خُف العزيزة بت قضيم والذى ضاع اثر علة لم تمهله طويلا ... بس اذا كانت عادت بخف حنين فمطلوب ارجاعه للسيد حنين والعودة الينا بخفها الخفيف الظل ورشاقتها الحميمة بيننا ... بت قضيم ياخ انتى ليه بتعملى فينا كدة ؟ ..لكن ما ليك حق يا اهل العوض .. تغير عندنا طعم فاكهة الشتاء .. لذلك عليك ان تعود على بساط الوحشة الفاقداك ... واقول ليك سر .. تعال وما تدخل فى شارع بروكلين ... هناك فى شوارع جميلة بتشبهك ... امشيها ونحن بنشوفك برانا ... ارجع يا اهل الرأى السديد ... والبطن كان طمت عليك بالمرحبيب فى عيون مشتاقة تقراك ...
وليم اندريا
كم سعدت بعودتك ايها الجميل
بس ما تغيب تانى عليك الناس الدايرين يشوفوك هنا ..
واها راجين قلمك معانا ..
تسلم
العزيزة الرائعة عشة بت فاطنة
حمد لله على سلامتك
وكل سنة وانتى طيبة ...
العام دة دايرنو خالى من الكلسترول ..ونحن بنفرح معاك برضو ... ما تزهجى .. دوما هناك شُتر حتى فى حصة الفنون ... وبرضو لازم يكون هنالك حموضة بس الجميل انو الناس كيف تتعامل معاها ... نحن برضو بطنا طمت من الحصل فى العام الفائت بس اكلناها فى الدواخل بالشطة ودموعنا جارية لحدى ما بردت ... راجيين قلمك البيشبه حروفك يا اصيلة ...
العزيز ود شاموق
كل سنة وانت طيب
ما تطول الغيبة ... انتو العشم فيكم
بعدين دة ما ود شاموق الانا بعرفوا .... شيل الدواية من خلفك وجيبا قدام الفروة وشخبط لينا جمالك الجواك .. فاقدنو جدا ... تحكى منك ابتسامة يا المعاك غاية مرادى ...
تسلم يا جميل
استاذنا الجميل الكتيابى
كل عام وانت الحب
شكرا جميلا يشبهك ...
اهديك صديقك عبد العال السيد ..
وبقيت اعاين فى الوجوه
واسأل عليك وسط الزحام قبال اتوه
يمكن الاقى البشبهك
ما الليل براح والشوق تعال بيندهك
ننتظر قلمك خلف الوحشة والدهشة الخليتنا فيها ... يا براك ...
تسلم كتير لاجابة النداء
| |
|
|
|
|
|
|
|
|
|
Re: دفتر الغياب ... السمع اسمو يقول نعم (Re: alfatih)
|
أخي الفاتح
أحمد لله جلت قدرته أن يكون بوستك هذا في يناير كانون الثاني وليس في سبتمبر حتى تصبح أنت والشهر ثورة حتى النصر يقودها العقيد يحكم في الشهب نفسه بنفسه ، لا عليك ولا علينا ، يقولون أن بدر الدين شنا هو الذي جهجه الخواجات جهجهة وطلع لهم في الصفائح وأخرج لهم الفضائح وأسمع من به صمم ، فقد فرد ريشه وأخرج من عليبته السيجار وقال مخاطبنا مستر كوكس باشا أننا أدبنا الخواجات أدب المدايح أيام أن كان المديح على السلم الرباعي بدفوف وكفوف قبل أن يدخل عليها جيل اليوم الآلات الموسيقية الحديثة فينقلب الطار بقدرة شيخنا إلى بيز جيتار ، فقد زعم البدري أن أجداده لأبيه كردو الخواجات في معركة كرري من أمدرمان لغاية كلية التربية ومن كلية التربية حتى محطة شقلبان ومنها إلى قهوة خلف الله الشهيرة بسوق أمدرمان بالقرب من زنك الخضار ، وأن ذلك البارتي الذي راح فيه إسماعيل باشا في المتمه كان بتخطيط وتكتيك من جد بدر الدين الرابع عشر والذي وضع هذه الخطة في الهواء الطلق تحت شجرة مباركة بقرية الحلاويين وأرسلها مع أحد الخيالة إلى شندي لتعذر وصول مكالمته الهاتفية وخوفه من أن يرسلها بالفاكس فتقع في أيدي الأعداء قاتلهم الله – ولما عرف الخواجة موقف أجداد بدر الدين شنا من الإستعمار الإنجليزي وبالضرورة من أجداد الخواجة لأمه السيدة مارجريت الرابعة نشأت بين بدر الدين والخواجة العدواة والبغضاء ، وأصبح الخواجة يتربص ويتحين الفرص للإيقاع ببدر الدين والأخذ بثر أجداده.
| |
|
|
|
|
|
|
|
|
|
Re: دفتر الغياب ... السمع اسمو يقول نعم (Re: alfatih)
|
مولاى الملا عمر
اتكيفتا كيف لو قدروا لى ان ا تناول مثله فى اى بقعة من بقاع العالم لما استبدلته الا بالبقعة المباركة التى كرد فيها اجداد بدر الدين الخواجات شر كردة .. وجاء كيفى هذا بناءا على الخبر الذى ساقته اياديكم الطاهرة وصافية كحليب السعودية او كحليب غنمايتكم المكشوشة عنوة من قبل ناس السغافة فى الخرتوم ...والذين يريدون اشراكها فى مسابقات الغنم الهجنية ... او الملخبتة فى رواية اخرى ... الله يجهجه الخواجة كوكس باشا ويصيبه بالبرص والبهق كان داير يتربص بالسيد شناة عليه السلام اينما حلّ ... لكن يا مولاى انا سمعت قصة الكردة بتاعة الخواجات قالوا لغاية سوق العناقريب ولا سوق الموية ما بعرف ... وليت الكشة او الكردة كانت لغاية الدباغة ليوصموهم بكميات من القرض ويشلخوهم حرف اتش تيمناً بالعلم البريطانى حتى لو رجعوا الى الملكة مارجريت الرابعة عشر تشهدت وقالت ( سجمى دة شنو دة ) اجى يا بنات امى ؟ ... وتحزمت بالقرمصيص وطقت السكلى حزنا على احفادها ... لذلك من هذا المنبر نحييى اجداد شناة وحفيدهم ونحن اذ نقف خلفه ونستل كلما بأضرعنا من سكاكين تجقد من تطاول او يلينا .. ونقول له لا تخف تربص الخواجة اريتوبالبرص , ولخبت ليهم الديسكات فى عيونهم ... نريدك يا شناة ان تسمع قولنا هذا او استرق النظر ان استطعت من خلف البلكونة المطلة على كيبوردكم الميمون .. ولتتحدى هذا الكوكس باشا يبوشو بالقرض كرب الله وجهه ... وتأتينا لتنقز فى سهلة المديح الذى اضحى بالسلم البيز جيتارى بدل السلم الطارى ... ولو فى طار عندك ممكن ينزل لينا برضو
وتعال خالى الوفاض حتى ولو بخفى حنين .. دة اذا ما لقيت حنين صاحى
| |
|
|
|
|
|
|
|
|
|
Re: دفتر الغياب ... السمع اسمو يقول نعم (Re: alfatih)
|
العزيزة دكتورة ايمان
كل سنة وانتى طيبة يا اعز الناس
جيتينا شايلة الفرح ميزان بنفسج
وبالتساوى للعيون .. تتشابا تقراك وبتدمع
كانت عيون البيت المنفى والاشواق ... ولقيتك فى زمن ضائع ... صرخة فى الماضى الخرافة
| |
|
|
|
|
|
|
|
|
|
Re: دفتر الغياب ... السمع اسمو يقول نعم (Re: alfatih)
|
صــديقي الفاتــح ..حبـــابك
كل سنة و انت طيب .. و كتر خيرك على الســؤال..
الغياب ما بالخاطر.. البرد.. الجليد.. المغصة.. و تحت التحت..جرسة ضمنية
اصلك كنت داخل لي في مشروع صغير.. أن ترى شهد النيل..التبلدي..الأرض..الجبل..طيبة البيارة.. و دواليك..
هي الآن تحكي عن أعجوبة الآكل الجماعي في الصينية..أرأيت يا صديق كيف هي قاسية هذا الحياة؟.. نهرب بأحلامنا الصغيرة.. نقتات اســانا على مداخل الحزن المجاني ..تلك المشرعة على كل النواحي.. و بعدها يغدو الوطن اعجوبة من عجايب الدنيا العشرة..
شكرا يا الفاتح.. و اتمني أن اتواصل مع المنبر.. فهو..على رأي الماهري..وطن في زمن اللاوطن..
كل سنة و انت بخير..
و دمت
كبر
| |
|
|
|
|
|
|
|
|
|
Re: دفتر الغياب ... السمع اسمو يقول نعم (Re: alfatih)
|
العزيز استاذ منعم شوف
انا دايرك تتونس معانا وتجيب بنبرك لتزاحم فل اللحظات السعيدة والدفق الجوة
الحوش السايبيرى دة ...
قالوا الزول البرااعى دة بيدوهو اخر الفنجان البكرى ... وريحة القلوة بتفوتو
ليك الوحشة يا جميل ..
| |
|
|
|
|
|
|
|
|
|
Re: دفتر الغياب ... السمع اسمو يقول نعم (Re: alfatih)
|
العزيز محمد كبر
استرق دقسة الامنيات الطيبة وخش بين مساماتا وتعال ..مرة مرة
النخيل الشايفو قدامى مع الاحلام يقبّل اشجار الدليب وصوت ترانيم بعيدة
من بيارة اللقيا يشجيهم على الذكرى ...انا عارف كيف بتكون حريف فى المدارقة
بالحرفنة زاتا ممكن تجينا وتمنح لوحتنا بريشتك الديمة تمطر لون ارجوانى
اها .. فى الصفحة التانية ربنا يتم ليك مشروعك دة ويخلينا نفرح بيهو
وبركة الشفناك طيب يا عزيز الامنيات ..
| |
|
|
|
|
|
|
|
|
|
Re: دفتر الغياب ... السمع اسمو يقول نعم (Re: alfatih)
|
الاستاذ صلاح غريبة
لك الحب ..
وانت تتفقد جناحات الشوق المفقودة
معك انادى بأعلى صوتى
الدكتور كرار التهامى
العزيز عمر الفاروق
تسيبنى بس لمين ؟
عليك العيد ما تخلينى براى
عشان الخوف مالينى من الوحشة
كل سنة وانت طيب
العزيز عبد الرزاق عيسى الطالب
شكرا لحضورك المشرف
ونورتا المنبر بأطلالتك المشرقة
وكل عام وانتم بخير
| |
|
|
|
|
|
|
| |
alfatih
willeim andrea
almulaomar
عشة بت فاطنة
ود شاموق
عبدالقادر الكتيابي
إيمان أحمد
منعمشوف
Kabar
ghariba
A.Razek Althalib
معتز تروتسكى
محمد عبدالقادر سبيل
abdelgafar.saeed
adil rahman
فيس بوك
تويتر
انستقرام
يوتيوب
بنتيريست