|
|
 حبيب نورة – معتز تروتسكى – عشة بت فاطنة - يا بورداب كوسوها معاى
|
اعتراف
المكان ... على بعد كيلو تحت سطح القلب ...
التوقيت المحلى ... يشير الى دقات الآهة التى كبلتنى تحت التهديد ...
نوع الجريمة ... متلبساً بالحب ... يتوشح عباءة البنفسج الليلى ورذاذ يستدير فى اشكال متناهية للوعى ...
يا انسانة ... وينك قبال تجينى ؟ ...وين انا قبال ابتديك ؟ ... ورغم انى مشتهيك ... داريتك فى الوجدان لخوفى عليك من نفسى ... وظنى من وهج الخلاص البين عينيك يشيل شقاى الفينى ليك ... وينك انتى ؟ .. ارتكبت عشانك تجاوز ريد ... لفحتنى فى الرؤيا شموس الوهج الطالع من مسامك وجاينى من دون اعتراض ... مرة افتكرت الاندهاش سايل من مجارى السطح البُعد كيلو من سطح الريد ... استرقتك بين ملامحو وخلسة شفتك دانية من جواهو شوف ... يا تعب الشهيق ... مالك ... ولو لا المسافة الفاصلة فى خط العيون كنت ساسقت تحت الانسراق وهويتك من زمان ...بس ... ولكن ...انتى ياها زاتا ... يا ناس ... الاستدارة ... وجع الدوار جوة القلب الشايف براهو وما براهو ... افلت من جند الحراسة الديمة جنبك وقفزت للاعلى كى ابتحر جوة المياه شان اوصلك يا عنيدة ... ربنا يدنى قوة الاحتمال للمذيد ..
مافى زول ادانى دفرة ... اجتهدت براى يا سمحة يا سارقة نومى بالاحلام ... جرستى فينى الهلوسة ... وما لقت غير عيونك السارحة قاصدانى وابكيها للذفرات والمحنة ... يا سودانية انتى ... اقيفى هنا ... للادانة والاتهام قانون هلامى ... وللاعتراف فوق التسامى ... الريد مقسم للمسامات البراها تنضح للعواطف ..المسامات الجننت اوركسترا الامنيات ( تعرفى ... قالت ليها هو بريدك حتى ذراتك الدقاااق) ماذا لو بكن العيون فى حصة التوبة ... والاعتراف بالذنب جريمة !! ... ماذا لو اجتزت فواصل الاهات واحتكرتك لى غنيمة !! ... ما اظنى جنيت عليك ... الا شوقى يصبح فى مقامك هزيمة ... اشتهيتك دون الهضربة والوحيح ... والسم الهارى ... الماخد شكل الالفة معاى صيوان ومجارى ... ما قلبى بينزف شوق طوالى عليك ... وبيندهك بالصوت الخافت فى دموعو ... من الجرسة ... يا شدة رغم المواجع الفينى كايسك لى زمن ... مكسور خاطرو بى فاس الامنيات ... يا بحرية العينين ... ويا لؤلؤ الدمعة النرجسية .. زول معتٌق بالهوية ... واعترف جواهو ريد .. وما نكرتك يا قضية ... اتهامى عليك شوية ... شفتى كيف بقدر بحبك ؟ ... بحبك شوق ... واحبك زوق .. وللفرح كمان .. بحبك للناس ولى براى .. من وجهة نظر انتى براكى ... وللانصاف كونى زيّك برضو بدون رتوش ... يا جالسة فى حضن القوافى ... وقاصة للاشعار مريلة من وهجك اظن ... ادينى منك حتة حتة ... امسكينى من جواى .. ما الرعشة استباحت كيان الزول الداير يقول ليك انتى يا بت ... يا ... وسكت ... التعابير سكنت حروفو وكبح آهة النزف الطراها جات ... انقشينى فى الابعاد مناديل للغيوم ... اطرحينى فى الاسواق محنة وماركة لونك ارجوانى ... للمزادات فى الموانئ ... ما ريدك عّطش سفوح وهضاب الشرايين السكتت فجأة بدون تعليق ... وزى كأنك لا شفت زيك قبال كدة ... لا عرفت خوفك فى الصدى ... ارحل بعيد يا اشتر ... نعم بعترف بالشترة فى حضرة جنونك ... وقلما اعود ... اعود كيفن عاد !! .. ما السنين دحرت ليالى الزاد ... والافتكرتو تواصل للنسيان جاب مواعينو وقعد ... يطرقع بالاحتجاج .. ما تجى ... لا تعال ... ما تجى ... لا خلاص ... وبقيت اتاوق للشرايين التعرفك زى حسيس اللحظة وزى عيونك ... كوسوها معاى ... للفائزين تذاكر شوق ... للرابحين رحلة زوق ... وللطافشين فى الامتحان وجع الانتظار زى سؤالى عليها ... يا براكى .
|
|
 
|
|
|
|
|
|
|
|
الفاتح00ان حبك طوق أفق دمى .... كيف شوقك لايتعرى ؟؟ (Re: alfatih)
|
عزرا ايها الرائع ولكن القلب مسخن بيك وبى زولك حبيب نورا وبت عشه كمان 00
اما قبل
علمينى الاحتمال
لم يكن فى احتمالاتى ان التقيك وها انا اليوم اعتبر ان هذه هى هديه عيد الميلاد
الفاتح
يا سلافه الاحباب00 سلام
ايها الرائع حد الروعه ها انت تجلعنا نستمد منك كل ماهو جميل واعتزر بشده لتاخير ردى لكان المانع كان سببان زحمة هذه الحياه التعسه وانشداهتى لرسالتك فلم استفيق من تلك الانشداهه الا الان صدقى فرح بك فرحا يمحو كل بؤس سنين عمرى السابقه ها انا استعيد بك كل علاقاتى وحلمى با
الصديق ها انا ارى فيك كل اصدقائى ايام الزمن الجميل ومنهم من ؟؟؟؟؟؟ ومنهم ما ؟؟؟؟؟؟؟؟؟ اليوم ارى فيك كل رفاق دربى فمرحا لى اليوم ارى فيك
ها نحن نلتقى تانى فى وجود الفنان فى الدواخل وانا كنت متاكد من ان كل كتاباتك تحمل تمرد فنان والفنان اكثر احساس من اى شخص اخر
اما بخوص عدم توفر الوقت للمارسه فكلنا الان بعد ان كان الحلم دراسه الاخراج كمحترفين بعد ان درسناه هواه الان نفكر فى داسه اداره الفنون لنخدم قضيه الفنون التى تشكل هاجس فى الدواخل
ايها الزميل البلسم هذا الحزب لنا وليس لهذه القياده الدهريه ولكن نتفق الان يجب ان نقاوم سرطان الاخوان الظلاميين وبعد داك نتفرغ الى البرجوازيه الصغيره داخل الحزب التى حمت نفسها بالتخلص من اكثيرين
تنظيميا
( طبعا راسك لفه ى الكلام ده) وده الدايرنو عشان نسكر معاك حتى الصباح وتصدح لينا ايام الابيض الجميله وحبيب نورا بى غادى يتاوق ويصب00
الحلم ان تسمتمر علاقتى الراقيه هذه بك هذا هو حلمى انا وهاجسى الان اصبحت تثاورنى الهواجس لان هذا الزمن معتاد ان يسلبنى كل ما هو جميل فهذه هى مخاوفى00
لكن لن تسلبنى تخاريف الزمن الاجوف شى من تلابييبكم لن ولن يالفاتح لان مابين دابك الحلمى ومساحات العشم التى تتبلل بى دموع لعفة شوقنا الى تلك الايام يا راجل 00 الفتح كتير علينا ان ناتى ضمن سطورك وفى حضرة بت عشه وحبيب نورة 00 يبقى محاصر شوق اعصار وزلزال من يوماتى لى باكر عشان يبقى جواى شى من حزنى النبيل القام شبة عليكم ياالفاتح شكرا حزينا وبيكم لابينتهى مطر السماء لا انا بقدر اشوف ابعد من رؤاكم 00
الملكة بت عشه 00
ومابين ممسوخين (نورة 00 وافتحى)00
ابدا يومى بان اتلو ملامح صورتكم ويبقى باقى اليوم 00شيتا متل هيك00
انا منكم
احبائى انا منكم
انا من نبعكم قطره
انا كلمه
وبنا تتكون الجمله
انا مانتم ضمنا
احمرار الغروب الحريق00
انا قلبى لاينبض بدونكم
لايسير وحده فى الطريق00
انا منكم
انا ونفسى بعدكم
لاتسوى شيئا00
انا والمكان نبكى
عليكم حتا00
انا منكم
انا من دمكم
قطره00
انا وانتم
نكون القلبا00
انا منكم
*اعتراف00
ان حبك طوق أفق دمى .... كيف شوقك لايتعرى ؟؟
| |
|
|
|
|
|
|
|
|
 Re: حبيب نورة – معتز تروتسكى – عشة بت فاطنة - يا بورداب كوسوها معاى (Re: alfatih)
|
معتز تروتسكى ...
قالوا المحتاج بفتح خشم البقرة ..
تصدق انا كايسا فى الزحام كما الغبار عندما يريد ان يقتحم الاسواق بحثاً للتنفيس ...
هذا الغبار حتما سيلاقى من يرشرش ذراته بشوية ماء ... لكنه مصّر على مواصلة بحثه عن الضالة ..
سترصد اجهزة الستلايت المخلوفة عندكم دقاق الاشياء ... زى مرة كدة نزلتوا طائرة امريكية محملة بالجنود اكلى الهامبرجر ومدخنى المارلبورو ... الفضاء ملئ بكل الابعاد ... والغبار الداير يزحم الاسلاك فى البحث ايضا سيراود الفكرة الجهنمية للتلاقى .. عسى ان يكون قد وصل خشم البقرة ... ربنا يلمنى فيك يا مترع .. ويلمنى بيها الحلوة المعفنة ... دلنى احدهم ذات مرة على شكل حديدى يقال له المغناطيس ... انجذبت حبيبات الشوق .. وفضلت ابحث معه حتى كادت الرؤيا ان تتدثر من خوفها ... لكن لقيتك فى زمن ضايع .. صرخة فى الماضى الخرافة ... جيتنى من عمق المواجع ... يا شقا سنينى وجفافا ... كلما ألقاك وحاتك القى دى السكة البخافا
لقيتك ...... كما قال صاحبى الملهم ربنا يخليهو لى ... للابيض مذاق خاص .. مشكل بالحموضة التى اهواها وفوق ذلك تتورد بالبنفسج فى ليلها الدفاق شذىً ... تصدق ناديتا وناديتا لحدى ما حسى انقرش .. وكت جاتنى لقت الضياع فى الصوت .. يمكن قوة دفع الريد تفجرت مدينة فيها الاسمى وفيها الناس بعدما تجى من الدور التانى تفلى القلب بالحب والمؤانسة والجياع يزداد هواهم للنغم الجميل والتطريب ... لذلك يا معتز .. انت الابيض اما بحثى عنها اريدكم ان تمشطوا خلايا الذاكرة جيدا حتى لا تسقط منكم ذرة ... فالذرة تساوى وطن بحجم الكرة الارضية يا انسان ... ما تشيل الكفاف براك ... نادى حبيب نورة معاك ... وقول لعشة بت فاطنة حلينى من اسى الوحشة الشايفو فيها فى رحاب دنيتنا مافى ...
وما اروعك فى الاخراج يا تروتسكى ... ناديتك عشان سيناريو الوحشة يترتب ... زازيتك عشان حوار الحلقة يتهذب ... ما المخرجين ديل قالوا مسلطين خلاص ... بيسووا الحاجة من مافى ... فشعلقتى فيك يحلنى منها الحلة جردل ولا الحلة كورة ما عارف يا ممسوخ ...   
| |
|
|
|
|
|
|
|
|
|
Re: حبيب نورة – معتز تروتسكى – عشة بت فاطنة - يا بورداب كوسوها معاى (Re: alfatih)
|
حبيب نورة
حيييى من الدنيا دى ... عاضى عليها بالنواجز
وكلما تجينى ماشة تدينى من جواها التعب ... واكون قداما عاجز
حبيبا ... وشحتفة القلب المشتهيك ... ياخى خلينى احدق فيك بدون ما تمسح عن جبينك الوسامة
وبدون ما تركز للثبات وشوشنى عليك بالقطاعى او اى مقياس تراوده ... شكرا جزيلا يشبهك
انت عارف صاحبك الممسوخ داك ( تروتسكى ) انا كتبتو فى دفتر المهرجلين والغياب .. لقيت
نفسى انا برضو غايب ... ليه كدة لكن ؟ ... فى ذمتك الحالة دى مش احسن منها تمسك ليك زول
تجضمو ؟ ...
والله داير تخلينى اجى تانى ... افوتكم اقبّل وين ؟ ... واسيبكم انتو بس لمين ... وقال :
لقيتك فى زمن ضايع
صرخة فى الماضى الخرافة
جيتنى من عمق المواجع
من شقا سنينى وجفافا
كلما القاك وحاتك
القى دى السكة البخافا
الله يديك قدر نيتك ... وقدر وكت تحلم براك تلاقى الحلوة تفرح بيك فى عز المنام ..
تخريمة :
جاينييز الوداع دى خطيرة
| |
|
|
|
|
|
|
|
|
|
Re: حبيب نورة – معتز تروتسكى – عشة بت فاطنة - يا بورداب كوسوها معاى (Re: alfatih)
|
Quote: لقيتك فى زمن ضايع
صرخة فى الماضى الخرافة
جيتنى من عمق المواجع
من شقا سنينى وجفافا
كلما القاك وحاتك
القى دى السكة البخافا |
شكرا ليك يا تروتسكي لتنبيهي لهذا الانسان الجميل الرائع المسكون بالابداع حد الجنون ، أدون حزني يا صديقي لانك حين حضرت كان قد غيبني القبح عن هذا البورد فشغلني عن قلوب عامرة بحب الخلق ونفوس يفنيها العشق فتسمو عن عالمنا الملوث ، فليتك تعود وتواصل فنحن نفتقدك يا لوحة نيلية من دعاش البلد . وكل الشموع نوقدها على دربك حين تعود ولوحة من الازهار نزين بها ممرات البورد حيث تنسرب الينا شعاعا . وهمسة أخيرة عشان خاطرنا ترجع .
| |
|
|
|
|
|
|
| |
alfatih
حبيب نورة
معتز تروتسكى
عشة بت فاطنة
فيس بوك
تويتر
انستقرام
يوتيوب
بنتيريست