من كباروس إلي أنور كينج .. مع مودتي

Quote: صديقي العزيز مظفر، لقد قرأت بالصدفة محاورتك مع أنور التي نشرت بموقع (سودانيز اون لاين) لماذا بالصدفة لأنني للأسف غير مواظب علي فتح هذه المواقع. برغم صدمتي الشديدة بكلامك لكن لا بد وان أرد عليك. صدمتي الأولي في فشلي كصديق لعدم مقدرتي استخراج كل تلك الأحاسيس منك وسماعها منك بصراحة وفهمي الخاطئ لك وقد ظننت أني قريب منك بما فيه الكفاية. ثانيا بكلامك هذا عن السودان والسودانيين ولكنك وضعت يدك علي أحاسيس أنا شخصياً حاسيها ولو قلتا غير كدة ابقي منافق وممكن اجزم انو كثيرين مننا ألظروفهم مشابهة لظروفنا حاسين بيها برضو. وعايز أقول ليك انو أنا معاك في أغلب كلامك غير أني لا اتفق معك في فكرة الهروب أنا لما فكرتا في السفر فكرتا إني اجمع ثقافة وعلم وقروش وارجع في يوم من الأيام للسودان. يمكن فكرتي رومانسية زيادة عن اللزوم يمكن. يمكن كمان ما عندي خلفية تامة عن السودان والسودانيين كالتي لديك يمكن. لكن عايز أقول ليك إني برغم كل الظروف الانا شايفها هسة والانت تعرفها تماما والانت ما عانيت ظروف مماثلة ليها. إلا إني أحس وخصوصا في فترة قعدتي في البيت السنتين الفاتت زاد فيها حنيني للسودان وبقيت ما قادر اسمع غير غناء سوداني وما قادر أحس بأي غناء غيره للأسف دا كل ارتباطي بالسودان المتاح لي هسة وفي الوضع الحالي. قبل كدة قولتا لي انك ما بتسمع غير أغاني سودانية وقايم نايم عليها فهل هذه فترة عدت عليك وبعدها مرحلة اليأس الشديد الواضح في كلامك وبما إننا متشابهين في الظروف (اقصد التربية خارج السودان) فهل أتوقع أني حأصل لنفس المرحلة الانتا فيها بعد المرحلة الانا عايشها هسة كترتيب منطقي؟ اتفاقي معاك في كثيير من النقاط يرجع لتشابه ظروفنا لكن بالنسبة عن رأيك في السودانيين وعاداتهم التي وصفتها بالبائسة فما أقدر أرد عليك فيها لان احتكاكي بسيط بالنسبة لقرار نهائي بالشأن دا. لكن علي الأقل يا مظفر لازم يكون عندنا أمل والأمل الوحيد في السودان عشان يلمنا إحنا عشان علي الأقل ما نبقا فقدنا كل شئ لازم يكون عندنا أمل إحنا المشتتين حتى ولو عملنا مجتمع خاص بينا إذا لم يقبلنا أهلنا في بلادنا بأفكارنا التي اكتسبناها في الغربة والشتات ونحاول نأثر عليهم ونقنعهم ويمكن يمكن يبقي فعلاً في سودان جديد بمعني الكلمة بعادات جديدة وتقاليد جديدة خصوصا انو المشتتين كادوا أن يكونوا أغلبية. ولولا الأمل لما كان عبد الرحمن الذي تحسده علي وطنه الركيك باقي في هذه البلد ويرفض الهروب منها رغم أن فكرة تحسينها بعيدة بما فيه الكفاية للتخلي عنها واعتبارها مستحيلة ولا أمل فيها. أرجو أن تكف عن لعن الظلام وتوقد شمعة. بالمناسبة عيد ميلادي العشرين كان امبارح شوفتا عجزتا كيف.