من كباروس إلي أنور كينج .. مع مودتي

عفوا ... الفقرة السابقة لا تتحدث عن التجمع الوطني ولا أي حزب من أحزابنا .. وجب التنبيه حتى لا يلتبس الأمر عليكم..

بل تتحدث عن مشروع قام به شباب زي الورد المفروض أنهم أمل السودان .. والمشروع جمعية كمبيوتر .. يعني رياضيات وخوارزميات وكود .. مافي طريقة للتنظير ..

صح ... غلط ...

العزيز أنور .. سودادف هي حزب سوداني .. سودادف هي أكبر دليل على كلامي .. على أنه الغلط فينا ,, علمنا مجرد قشرة نغطي به على رداءتنا ..

سودادف صارت جمعية لمنظراتية الكمبيوتر .. وللأسف أنه محمد عبد الله ما منظراتي .. أحب أقول ليك أنه السودان محتاج محمد عبد الله أكتر من المشاهير "المبدعين" زيي وزيك .. حتى لو كان جالية وما بيعرف يتكلم جملة سوداني .. محمد عبد الله وهو لمن لا يعرف مبرمج سوداني في صخر، محمد يتحمل مسؤولياته منذ كان في التاسعة عشر فما تجي تقارنوا بي.. على الأقل حتى أتوقف من أخذ مصروفي من أهلي ... وما تقارنوا بيك ... لأنه ببساطة ما منظراتي كمبيوتر ..

أنور - بسبب تشتتك برضه – تحولت إلى منظراتي كمبيوتر .. والدليل أنك منذ صممت أنوركينج لم تتطور في هذا المجال، أنوركينج نفسه دليل على تشتتك .. أنا مصمم صفحة، وأنت صفحة والشريف جزء وبشير جزء ... موقع مشتت كصاحبه .. عشان كده ما تجي تقول لي سجية وما سجية، لو علمك ده ما مؤثر في شخصيتك مافي فايدة .. لو ما اعترفت بعيوبك وحاولت تصلحها ما في فايدة ..

وإلا سنتحول إلى جيل من المنظراتية كمن سبقونا .. مع اختلاف المجالات، احنا منظراتية كمبيوتر وهندسة وعلوم .. وهم سياسة وقانون وزراعة .. برضه الزمن بيتطور

وفي الحالتين .. في الحالتين أنا ضايع وما لاقي البينصفني

وأنت بشكل شخصي، مريض بداء التكليف .. منظراتي كبير، تنظر وبعد كده تكلف الشباب .. أنور، أنت ما عاجبك فهمنا للعمل الطوعي، وأنا ما عاجبني فهمك للعمل أصلا .. ولو ما عندك استعداد للتخلص من عيبك الأساسي .. أها لسه ما ملاحظ الشبه بيننا وبين الأحزاب السودانية؟؟

ممكن أسألك سؤال ... ليه مافي زول في سودادف بيهتمها بالموضوعات بتاعة الدوت نت والبرمجة الرسلتها .. ليه ما في زول داير يتعلم حاجة جديدة .. كلهم متلمين في البورد بتاع تصميم المواقع .. عشان دايرين يعملوا موقع زي أنوركينج ولا كباروس ويبقوا من "المشاهير" والسودانيبن يقولوا ليهم "المبدع الفنان الفتح الكشف العظيم" .. ليه، لأننا حنفضل سودانيين .. على السجية ..

أنور ... طالما أنه زول زي محمد عبد الله ما قادر يلاقي بيئة مناسبة ... معناها العيب فينا ما فيه هو ..

وطالما نعرف عيوبنا لكننا نغيظ بعضنا بأننا عاجبانا روحنا كده .. يبقى ما في أمل ..

الفقر والجهل والهجرة وعدم الانتماء .. نتائج لرداءة السوداني ... ولن يتقدم السودان إلا إذا اعترفنا بعيوبنا وتغلبنا عليها .. وإلا سيبقى مالنا وعلمنا وانتماءنا مجرد تنظيرات .. قشرة ..

البشير والترابي ونميري والميرغني والصادق ومثفونا ومتعلمونا .. وكل القائمة ... هم نحن .. نحن الامتداد الطبيعي لأجيال رديئة