|
|
 Re: اسمعني نشيدكـ كيفما اتفق (Re: خدر)
|
يا خدر خلى غناك السمح دا
فقد دلنى عليه منذ أمد مديد أخونا
بكرى الأحمر من أولاد مدنى القطينه
قطر كالقرى
لكن الشئ المحير االبنات السمحات
وقويات ديل كسرتهن فوق بوستك دا
كيف...يا خوى سكرك دا سكر شرق...ياخ
أصحابى لبنانيه شبكونى يابى
شو الحلا.
رائع ياخدر فنان من كلو
منصور
| |
 
|
|
|
|
|
|
|
 Re: اسمعني نشيدكـ كيفما اتفق (Re: HAMZA SULIMAN)
|
الملكـ الحافظ لسر بهاء التاج
شكرا كتير علي الدعوات الطيبات
ولكـ مثلهن يا فنان .. شاغلنا
بي تلفون ياخي او اجدع تلفونكـ نشاغلكـ
خلي المحَنه تطوف
منصور كنز المعرفه
شو الحلا انت والله ياخي
ويا منصور مالكـ علي داير تجيب لي تهمة
ده كلو من (الامي) والله
البنات السمحات الشايفن ديل كلهن جابن هو
الله يسعدنا بيهو
و يسعدنا بي مروكـ انت و اصحابكـ
حمزة صاحبي ..
يا المشتهنكـ وبالنا بيكـ ضُمة انشغل
وينكـ يا فنان ؟ الشوق الشوق بيناتنا
| |
|
|
|
|
|
|
|
|
|
Re: اسمعني نشيدكـ كيفما اتفق (Re: خدر)
|
الأخ : خدر أو أبوعبيدة أو كما ترصدنا ولبد لنا ساعة بطين وأذين
يريد هلاكهما معا .
أنا جديد في البورد
وقديم في المتابعة من زمان مباري رياحك العاتيات ( ماعارف حتوصلني وين)
المهم :
هنا أسمعني نشيدك ( البحر )
ومن هناك مريا ومحمد المرتضى ( البحر والجبل )
المقصود :
نقبل وين ؟؟
هو قلب واحد وقد أترع من هذا الفيض الخرافي .
يوم ستجدوا من انفرط قلبه هنا
المسؤولية على من ؟؟؟
أشهد ألا نساء إلا نساء بلادي
وكفى
بهاء
| |
|
|
|
|
|
|
|
|
|
Re: اسمعني نشيدكـ كيفما اتفق (Re: خدر)
|
خدر
و منعمشوف...
شكيتكم علي الكلاكلة التي انجبتكم...
بسمع بمزااااااااااااج..وكفي..
خدر يا اخي "اريدك".. انت..حتي حمام اخر...
بجيك هولندا اسمع وارجع...سمح يا كعب...
وتحيات عبد الخالق
سلم علي الاسرة
| |
|
|
|
|
|
|
|
|
|
Re: اسمعني نشيدكـ كيفما اتفق (Re: Ahmed El Gasim)
|
احمد القاسم
بجيكـ يا الله و تسألني
يازول انا و الكعوبيه
الثرا و الثريا ..
كدي تعال زي ما قلت و شوف براكـ
يا صديقي والله لازلنا نحتفل بأخباركم
كمن عثر علي كنز .. و ننفق ساعات في إجترار
ذكريات ليتها تعود
تحياتي لعبدالخالق و لكـ و للاسره
| |
|
|
|
|
|
|
|
|
|
Re: اسمعني نشيدكـ كيفما اتفق (Re: خدر)
|
الجميل معتصم .. لعناية بوست "اسمعنى نشيدك كيفما اتفق" رواية خدر
القطب خدر
الاغنية كائن شائك و مركب بقدر تركيب مفهوم الحلول عند المتأملين - ابن عربى و الحلاج .... او هى لحظة وجوديه تسمو على احداثيات الزمان .. المكان .. الزاكره .. الحب .. الخوف .. الرحيل .. وذلك الاحداثى المستحيل (المرأه) او ربما هي حقل الغام
بغض النظر عما يمكن ان تكونه الاغنيه -- كل الذى كان هو ان ساقتنى اقدارى ودخلت بوست بعنوان "اسمعنى نشيدك كيفما اتفق" فى موقع سودانيزاون لاين ثم كان التداعى الذى لا يمهل .. فلماذا بالله عليك؟
اكاد احس بالحالة التى انتجت هكذا بوست .. ربما لمرورى بحالات جذب مشابهه فى الفكره لكن ما استغربه حقيقة هو أن تعيش الجذب .. تعبر عنه احرفا ثم تاتى و ترسله غناءا شفيفا لا يعرى و لكنه يفضح .. هل تعلم انك متصوف .. اذا كانت الاجابة -لا- فلتدعنى اخبرك بان خدر فى هذا البوست كان كامل التصوف .. بكمال الانغماس فى حالة ما .. وتمام الانقطاع عما سواها - جملة اعتراضيه - الحالة المعنيه قد تكون دين .. مادية جدلية .. وله .. او وجد وحنين مبهمين .. والاخير هو ما رايته فى جبة المتصوف خدر
انا من الحريصين على تفادى الاغنيات الالغام .. الاغنيات التى تعبر الحد ما بين الوجود .. الحنين .. و البصيره ... اغنيات بعينها اعلمها .. بالطبع انا اقصد الاغنيات عندما تكون فى حالة محدده .. بطريقه محدده .. بصوت محدد .. فى ساعة محدده .. و اقدار محدده
يا اخى رجاءا ضع ما يفيد حتى اتحاشاك في المقبل من حياة
خاتمة
اياكم و اغنيات ك
سحابات الهموم -عود
املنا الباقى - عود
ادينى احساس بالامل - عود
و بوستات ابونا القطب خدر - عود
ثم
هل هناك علاقة بين خدر .. نبي الله الخدر .. اضابير زاكرتى السريه .. وهذا الوجد .. نعم هناك علاقه ما
ايضا
شكرا لهذا الحريق
عذرا للاقتحام - بكرى ابوبكر لم يترك لنا سوى التسول
المشاركة اعلاه ارسلها صديقي امجد العطا حابي يشارك نشيدك يا طارق
| |
|
|
|
|
|
|
|
|
|
Re: اسمعني نشيدكـ كيفما اتفق (Re: معتصم ود الجمام)
|
يا معتصم ..
انت ما جَياب السمحين دايما ياخي .. فشكراَ
اما انت يا امجد
فما عارف اقول ليكـ شنو يا فنان
لكن في العموم شُفت الفنون دي بتمرق الفنانيين كيف
و اهلنا زمان قالوا الدم بحِن
وانت دمكـ حَن و جانا دافق
اقول ليكـ شكراَ علي تكبد المشاق !!
قطع شكـ ما بتكفيكـ ولا بتوفيكـ
فياخي الله يجبر بي خاطركـ و يذيدكـ كتابه فنانه
زي دي
| |
|
|
|
|
|
|
|
|
|
Re: اسمعني نشيدكـ كيفما اتفق (Re: خدر)
|
فيصل نوبي
شكراااان ، والله يديك الفي مرادك وبالي ياخ
شايفة سيد البوست برضو ماقصر وتحت التهديد ختى اللنك الصاح
****
خدوري
انتو كان ما التهديدات كان مرقنا منكم بكل الغنائم دي ؟
عالم متربية على الدكتاتوريات والتهديد
****
تاج السر الملك
الشجن قتل العجوز( مثل يمني )
الشمار ما عندك لكن
بكلمك لمن تنزل بوست منفصل فيه عشرين صورة من صورك العجيبة ديك
عالم اصلان ما تطلع منهابي حاجة الا تحت التهديد
***
ابو مهيار
ود امي
وحياة محبتك
ما دخلت وسمعت الا وكنت حاضر
وكنت متيقنة انو رادارك ما حيفوتها
يفوتك السمح وين يا ود امي انت.
| |
|
|
|
|
|
|
|
|
|
Re: اسمعني نشيدكـ كيفما اتفق (Re: imad braka)
|
جندورة
الخمسه في الاتنين
البوست بوستكـ و شوفي لي سلمي مشت ويين برضو
تمادر ما منها خبر يا اخوانا
عاكف
والله من مني
ابوديه
والله بس كان ده اتحقق مع اساسي و دكين
فأنا السعيد والله
شكرا كتر يا سيدي علي المرور اللطيف
براكة ؟
شنو ؟
شايفكـ استعدلتها
لكن جايب لي اخوكـ الكبير معاكـ ليه
ياخي البيننا اكبر من كده 
| |
|
|
|
|
|
|
|
|
 Re: اسمعني نشيدكـ كيفما اتفق (Re: خدر)
|
جيبولي بس قلبي الوِدِرْ.... يا خوانا في (غنوات) خِدِرْ
أرجو أن تتقبل تحيات وإعجاب ودعوات
أخوك المُريدْ محمود ..
براكة حلج ليك الدنيا كلها كيفما اتفق؟؟؟
غايتو عوج دينا ساكت أنا قايل..
| |
|
|
|
|
|
|
|
|
|
Re: اسمعني نشيدكـ كيفما اتفق (Re: Mahmoud Mustafa Mahmoud)
|
خدر انت زول جميل ..
الجمال في الاختيار.. في بحة الصوت .. في رنة العود ..
أحي أنا من العود يا خدر ...
يوماً ما والدنيا (دُعاش) ..والسماء قريبة إلى أهل البلدة الطيبة التي كنت فيها .. سماء لونها أزرق حقيقي ...
وبساط أخضر ممتد بامتداد بصرك ....
اسمها (سفاوا) يا خدر ... 108 كيلو من القضارف ...
فيها يلتقي نهري سيتيت وبا سلام ... بلد زراعة ..
يبدأ المطر فيها من شهر أبريل ولا يتوقف إلا في شهر نوفمبر
بيوتنا (درادر) * وحوشنا (صريف)* قش ...
عندما تأتي السابعة مساء .... تحس بالحاجة إلى الصراخ .. والنداء إلى أشياء تحتاجها في تلك اللحظة ..
همبريب يا خدر .. تحس به في أرنبة أنفك ..
يدغدغ كل أحاسيس الحنان التي فيك ...
كانت ملاذاتنا وملذاتنا (مٌتعددة) ...
كان العود أهمها .... في وسط ذلك الهدوء كانت (الرنة) تُصيب في مقتل ..
من كان واعيا منا .. ( أو لاهياً ) .....
وكانت أسمعني نشيدك واحة لراحة غريبة ...
أصًوات متداخلة ... ليس فيها جمال ... الكورال الارتجالي كان (يُحِسن) أدائنا ...
نغنيها بذات اللحن ... وبكلمات جديدة في كل يوم ... والعود رفيق في كل الأحوال ....
نستمر في ذلك حتى الملل من التكرار .. فنكرر اللحن بالعود ..
عن حالى البى واحسبنى شهيدك ...... عن حالى البى واحسبنى شهيدك ... عن حالى البى واحسبنى شهيدك
والكل في استماع بمتعة وحنين وقليل من البكاء والأنين الصامت ..
كانت غربة داخل الوطن ( لصعوبة الحركة وسط الوحل الطيني اللزج )...
ولكني أردد الآن ما أحلى الغربة داخل الوطن ...
فمكوناتها ليست (الأسفلت والأسمنت والنيون ) ...
بل دندنة عود ... ورفقة حسنة .. وقليل من اللهو .....
لو الأيام لديارنا تعيدك ... لو الأيام لديارنا تعيدك ... لو الأيام لديارنا تعيدك ...
...
أحبك يا بني آدم ..........
ورفقاً أنت بقلبك ....
| |
|
|
|
|
|
|
|
|
|
Re: اسمعني نشيدكـ كيفما اتفق (Re: خدر)
|
Quote: صابحني ماسيني يا جالب الافراح .. لا تبقي ناسيني
سجعكـ بواسيني و رجاي فيكـ يا حمام .. كان مت ترثيني |
الكتراااابة
ذات غفلة ، دخلت هنا
وكان البوست يافعآ
أو طازجآ
داهمني الصوت المترع حنين
وردني إلى عهد موغل في الحنان
وكان القلب صبي
صدقني يا طارق
لم أملك غير ان الوذ بالهروب
حتى أحافظ على الوحيدة
الرويحة
لأنها ممكن تروح في حتات زي دي
مافي حاجة ممكن تخليني أفطس غير الحنية
والحنية شكلت صوتك
ويراعك
وروحك
هربت ، وعند باب الخروج لمحت أمل قدورة تحجل
نادتني
ومارديت
فالكل كان مشغول بأمر يعنيه
أو بالأحرى أن كان مشغول بتولة
والبقاء
امل قدورة لاتيأس ابدآ
فضلت ورائي تزين لي النار
وها أنا في أوج اللهيب
| |
|
|
|
|
|
|
|
|
|
Re: اسمعني نشيدكـ كيفما اتفق (Re: أبو ساندرا)
|
يا حاج خدر
كيفنك
ياخوي انا فترت من المساسقة ومتابعة هذا البوست من بدايتو.
وللاسف كل اللنكات التي توفرت والارشادات التي تطوع بها الشباب لم تفلح معي.
وحيث انني حريص على سماع الاغنية بصوتك ارجوك رسللي حقي صرة وخيط مع هذا الساعي:
[email protected]
ودمت شاديا ودام هناكا
| |
|
|
|
|
|
|
|
|
|
Re: اسمعني نشيدكـ كيفما اتفق (Re: Ahmed Yousif Abu Harira)
|
والله يا بهاء براكـ قلتها
المسئوليه علي بنات بلادنا ديل
جهجهو الامي و الليه بجهجهو فينا نحن
دي سماحة شنو ياخي دي ؟
انت يا محمود في غناي ولا في صورتكـ الحنينه دي
شكلها بعد الغداء و انتو في ونسه و سمر
الله يخليها ليكم و يرحمها و يرحمنا جميعا
اب حريرة
رسلتها ليكـ بي هناكـ اظنها وصلتكـ
ادعو لي الامي و ادعي لينا بي جاهو
| |
|
|
|
|
|
|
|
|
|
Re: اسمعني نشيدكـ كيفما اتفق (Re: أبو ساندرا)
|
عمران
همبريب و صريف و الامي و كمان صحبه حسنه
ده اسمو انتحار جماعي يا صاحب
رفقنا بقلوبكم و بنا من الذكريات البتعجل بالاجل دي
انت قايل نويحي ده من ويين ؟
من من فراق الصحاب و تشتتنا في البلاد البعيدة
حاسب علي قلبكـ
هنا منطقة مرور متكرر
يا بركات
هو انت غير المَحنه الفيكـ دي تاني فيكـ شنو ؟
لمن اتلاقينا في الدوحة قلت ليهم بركات ده انا شكلي بعرفو
من زمان .. قلبو ده انا شفتو قبل كده كتير
لمن السودانيين الجد جد كانو قاعدين
و امل قدورة الله ما يحرمنا من محَنتا
ولا من قلبها الحلو
ولا من استشعارها الملهم
| |
|
|
|
|
|
|
|
|
|
Re: اسمعني نشيدكـ كيفما اتفق (Re: خدر)
|
" لو ايدى فى ايدك
البس روحى ياحمام فى وريدك " ..
يا لها من عبارة .
تشبه الخرافات الحزينة التي ترعرعت على هامش أرواح العشاق الكبار منذ أزمان سحيقة .
وحين يحدث مرضٌ في الروح فإن الدواء هو التأمل الذي سرعان ما يعيد العاشق الى ذروة الطهر والتوهج ..
لا شيء يفسد العشق سوى الفلسفات ، لا سيما المادية منها ، التي تحدثُ ثقباً أسود في الرؤيا .
لكن الروح ليست عود ثقاب يتوقــّد لينطفئ ، إنها تتلألأ هنا كما لو أنها الصدى المحمول في وريد حمامة ..
والحمامة ـ كما رأيتها هنا ـ ليست "شخصاً " أحمق ..
إنها ذاكرة الجيولوجيا الروحية المتزلزلة بفنائها في المعشوق ،
وحيث قناديل الأزل تضاءُ تباعاً في قلب العاشق ..
أودية ، وصلوات ، وأزمنة .. في تلك السفوح التي قدتنا إليها بصوتك ، يا خدر،
وأنت تنشد واحداً من "أناشيد الزنادقة" ..
أدهشني الشعر، وأدهشني الغناء .
ولم يحدث ذلك صدفةً ، فقد كان نتاج صفقة عبقرية ، أو تقاطع عبقري ، بين النص وغنائك له بهذا التطريب المعذِّب والشجن العريض الذي أحسّه يتمشـّى في وريدي أيضاً ..
هذا "البوست" الذي أخرجني من صمتي ، كما لو أنه يدعونا إلى أن نجعل العالم عاشقاً (خاصة في السودان ، وبالأخص في سودانيز .. ) ..
وحينذاك ، لا يعود ضجيج المقابر ، ولا ضجيج الايديولوجيات المصنّـعة هو الغالب ..
بل اننا نكتشف أن أرواحنا التي أُرغمت على الأنين على ضفاف المستنقعات ، يمكن أن تقودنا ، حيناً ، إلى السنابل ، وحيناً إلى الينابيع ..
كل ما في الأمر ألا نضع أرواحنا الجميلة على الرف .
| |
|
|
|
|
|
|
|
|
|
Re: اسمعني نشيدكـ كيفما اتفق (Re: خدر)
|
العزيز طارق
هذا هو الغناء، عارفك من زمان ( راجل غنان ) جدا
لمن قلت :بحالي البيا ... تنفست روحي وانشرحت خواطر المتعبين من العشاق والسابلة،
فقلت : الله يلعن شيطان غناك ياطارق أبوعبيدة، دي جبتها كيف؟
ياخ شنفت أذن السمع، وجلوت سراميك الروح، من صدأ الغناء الماسخ المضرس
وصنوف الأذى الجسيم لبعض المغنين علي قارعة القنوات السودانية، مثل قناة : هروني ورموني.
آمنا .. وحقا إن بعد الضيق فرج حتى في الغناء الوطني.
سيف اليزل
| |
|
|
|
|
|
|
|
|
|
Re: اسمعني نشيدكـ كيفما اتفق (Re: خدر)
|
الصديق خدر.. حبابك
عارف.. الواحد داير يشكر روحو.. لأنها عرفت تجي بهنا..و لأنو الورد بيقدر يمرق روحو من وحل التواطؤ..و يتشابى لضي الشمس..
و شكر تاني لمطامير المحنة محل ما تكون و كيف ما تكون.. لأنها الوحيدة البتقدر تدي الكون توازن برغم الزعيق الهالك المستهلك..
اترك تهديدك..
و سلام للأمي في السمحين..
و سلام ليك يا خدر..
مش لأنك بتعرف بتغني و تكتب بس.. لكن لأنك برضك بتعرف كيف تلضم ليك عقيد محبة بأرواح الناس الطيبة..و تديهم رحمن ذات كمان..
بعد اذنك.. سلام مخصوص لبراكة..و اخبرونا ، أنه حتى في الصمت يمكن أن تزهر اشجار الحديد..
كبر
]blue]
| |
|
|
|
|
|
|
|
|
|
Re: اسمعني نشيدكـ كيفما اتفق (Re: Kabar)
|
يا نزار يا سمندل
يبدو اني سأصادق صوتي من جديد بعد ان هجرت امره زمنا
صوتي اهداكم لي
و صوتي اعادكـ الينا
ياخي يا نزار في ذمتكـ قلمكـ السنين ده نحن موش محتاجين ليهو برضو ؟
ياخي والله اريتني بعرف ازغرد
ارواحنا يجب ان تجلس في الرف
ارواحنا هنا .. في تواصلنا و تبادل تجاربنا
سعيد انا بي وجودكـ هنا يا سمندل
سيف عليكـ الله ما تغيب كتير
لو عاوز تعرف ليه بقول ليكـ كده
اقراء كلامكـ الاخير لي ده تاني
و حا تقتنع
المحبه المابتغبا ابواهلكـ زاتو
يا كبر يا اخونا في الحَنان
ما شفت سمندل قال شنو
قال والله ارواحنا بخير بس نحنا البنجني عليها
الله ينعل الرفوف و قسا الايام
انت و براكة برضكم في السمحين
الراجل اينع و اثمر و نال من البنون
(سرمد - تساب) و لاذال يعلفهما من حنانو الانت عارفو
غايتو فضل ليهو الطاحونه بعد ده
خلي قلبكـ هنا معانا يا كبر
| |
|
|
|
|
|
|
|
|
|
Re: اسمعني نشيدكـ كيفما اتفق (Re: خدر)
|
ويبدو كذلك ان فيروس محمد علي (الأمي) الذي أصاب طارق ابوعبيدة قد
اصابني فها أنا للمرات الكثيرات اجد نفسي نائحا به (مترنماً), منقبا عن
الشجن المخفي بمهارة خلف ذاك التجهم ...
أذن فالأمر فايروس ! يصيب الجميع بالنوح ، كُل من دخل هنا فهو نائح ، وأكيد
الاصابة برعشة ومشجنة وحنين وشئ في قلبه يشبه حالة تكون الدموع ...
...
...
قبل ساعتين ضرب لي واحد من الاولاد الملاعين ،اصحاب اليمين ، من لندن ، قال لي :
ياقرمبوز أسمعني الكرت ده قرب ما يكمل لكن داير اقول ليك شنو ياخ صاحبكم
الإسمو ابوعبيدة داك
: ابوعبيدة منو يازول؟
ابوعبيدة ياخ الفي هولندا الزول الظريف داك البغني !
ايواااا قصدك طارق ابوعبيدة ، اها مالو ؟ (والله شلت هم )
قال لي : عامل ليه غُنية بتشرط عديييل ! ضربت ليك قت تسمعوا !!!
تخيل ، تلفون من لندن الخرطوم ، لا فيه ويستيرن يونين ولا تحويلة
لا اكسجينج ولا مشتاق ولاناس بينكم ولا اي حاجة ، بس ياحمام الدوح أسمعني نشيدك ...
...
...
ياطارق :
بالجد جد شكلي عييت بالحكاية دي العيا الواحد حق الحُمى داك !
| |
|
|
|
|
|
|
|
|
|
Re: اسمعني نشيدكـ كيفما اتفق (Re: خدر)
|
ياجماعة الموهوب او الموهوم ده الى الان
ينبح او يصدح هنا؟؟
تشابهت علينا البقر فى زمان الغث الاسفيرى هذا..
طارق انا فاكر براى السكنت فى الخيط المسكون ده
لقيت الممكونين كثر...
طارق فتحت علينا طاقة الغنا الانسدا..
وشهيتنا ابو حمار..
الله لاتاجرك...
والمصحف يا طارق واسال ناس الرياض اظن طقس الرياض قد تجاوب معك..
مع اننا مفروض نكون فى صيف الرياض الحارق...
الا ان اليوم صار يبدا بصباحات بارده وينتهى بعشيات مستفزه
غيم ومطر.. ليس بالرذاذ ولا هو بالوابل ..بل كان بين ذلك قواما
كل ذلك يغرى بالنزق...
ولكن خمسين قصرت علينا الخطىء..
عموما عليك وزر ما نفعل عند ملامسة غناك الشغاف..
وفى ذكاؤنا من هم بعمل سئية،،،
| |
|
|
|
|
|
|
|
|
|
Re: اسمعني نشيدكـ كيفما اتفق (Re: صديق الموج)
|
انت يا قرمبا في فايروس الامي ولا في كتابتكـ الطاعمه يا قول عاصم
و العجب في القرقراب .. اقراء و اضحكـ
شي اكسجين و شي اكسجينج و ويسترن يونيون
ليكـ حق تخاف ..
العميري زمان قال
ليكي مليون حق تخافي
جبت ليكـ شبط هدية
واصلي طول العمر حافي
يا قرميبا ياخي والله نحن اعظم شعب في العالم في الحَنان
تخيل ؟ و اهو الحمدلله انو بقينا متميزين في شي
صاحبكـ ده قول ليهو لو قطعت البحر و جيتنا بنغني ليكـ لمن تدفق
وانت ذاتكـ كان جيتكـ قريب بغني ليكـ لمن تضعف
| Quote: وشهيتنا ابو حمار.. |
يا موج .. هجير الرياض مشا لي جو بديع و رزاز
تقول لي ابوحمار ؟ امال الكنابس دي يشربوها متين؟
يا فنان .. نوعكـ ده انا بعرفو مافي خمسين بتوقف حنانو
و حبو للناس و الحياة .. فياخي خليكـ في جنكـ البنريدو
نحن ده .. لانو الذ مافيكـ
المسدار قال
رمضان الكريم شِن قدركـ بي صومو
اكلي و اشربي و باكر بشيلكـ لومو
اها يا موج (انزق ) ساي
| |
|
|
|
|
|
|
|
|
|
Re: اسمعني نشيدكـ كيفما اتفق (Re: حسن الطيب يس)
|
براكة و عصام وراء بعض
يا لطيف يا لطيف
شنو يا فنانيين خلاص نويتو علي الدمار الشامل ؟
حسن يا اخانا الكبير في ارميكا
كيفكـ ياخي و كيف العيال الكبروكـ و كبرو
و كيف نذير و اولاده قول ليهو طارق قال ليكـ
فضل ليكـ اليافطه الكبيره بتاعت النذير و اولاده
و ماشاء الله
يا ابوعلي خليكـ معانا دايما ياخي نحن لاقينكـ ويين
مال
البس ساي آزول
و كلنا بنحب الحمام
| |
|
|
|
|
|
|
|
|
|
Re: اسمعني نشيدكـ كيفما اتفق (Re: حسن الطيب يس)
|
شكرا (لا ليهو حداً ولا ليهو عد) يا طارق
وصدقني لو علم الأمي انك ستظهر في زمنا ده لاودع النشيد دار القضاء العالي باسمك ، واوقف على حراسته شدادا غلاظ مع عبارة يسلم إليه يدا بيد عند بلوغه سن الرشد.
الملف ده تميمة طرب تجلبه عندما يعز الطرب،
بسويهو "حُجاب" وادرعو في ضراعي "ياعملات صديق ود اشيقر".
لو الايام لديارنا تعيدك !!
الله يسعدك ياخ
| |
|
|
|
|
|
|
|
|
|
Re: اسمعني نشيدكـ كيفما اتفق (Re: خدر)
|
الحبيب خدر
أدخل لهذا البوست واسمع هذه الأغنية مرات ومرات في اليوم
حفظك الله ، شغل ممتاز وعزف وصوت ماشاء الله عليك يا خدر
بالله أجدع لينا الأغنية على الإيميل دا
SIDDIQRAH(at)GMAIL.COM
ونستاذنك في نشرها عبر موقع كسلا لو لا مانع لديك
| |
|
|
|
|
|
|
|
|
|
Re: اسمعني نشيدكـ كيفما اتفق (Re: لؤى)
|
هلا أبو اللول
والله جد يا لؤي الموقع عندو طعم خاص برجعتك دي ياخ
الصومال شنو ؟؟؟ والله انا لو عندي سلطة أطلعها في بوركينافاسو وكوالا لامبور
وأوزعها على بائعي الكوسة والباذنجان وحتى الرجرجة والدهماء
معليش يا خدر الأخدر فرحانين بغنيتك وبرجعة لؤي الحلوة دي
| |
|
|
|
|
|
|
|
|
|
Re: اسمعني نشيدكـ كيفما اتفق (Re: جمال سعيد)
|
ود عدلان
صورتكـ شرط للارض او كما قالوا
ابو اللول
والله جيتكـ المنبر فعلا إضافه نوعيه
و ردة روح .. ياخي زي ما قال عصام
ابق هنا .. طويلا
وبلاش تفارق
صديق رحمة
المكتوب بطرفكم الان
و يا سيدي عن نفسي شيلوني انا ذاتي ودوني كسلا
بس شوفوا عمكم (الامي) رايو شنو
فرحي انا برضو بيكم كتير يا صديق
بارعة
مع اني كلمتو ما يباري الشفع ديل براكة ده
يوم غايتو بصبح الصباح يلقي روحو قندران
كدي النسألكـ
متين كتبتي هنا انت ؟
اليوم كلو ما شفتكـ فتحتي كمبيوتر
دفار يا صديقي .. بس .. قبضتكـ
يا شباب و يا شابات ضيوف البوست
الداير غنا لي مونا خدر يقبض في جمال سعيد ده
عندو غنا لي انا ذاتي ماعندي
ورطة قانونية ياابو الجيم
| |
|
|
|
|
|
|
|
|
|
Re: اسمعني نشيدكـ كيفما اتفق (Re: بارعة)
|
ووووووووووووووووووووووووووووووردلب !!
امانة مااااا وقع راجل ،،،
طارق ! الله يجبر الكسر ياخ ،، وما تشوف شر 
ـــــــــــــــ
بارعة ،، يا بارعة ،، استحقيت الاسم بجداره ،، أوحيييك !
هدف رائع ،،( فى شباك العدو دا) ......
ياستى كونى او كونوا هنا وهناك ومن بين ايديهم سدا ومن خلفهم
لعلكم تستطيعون ...
وتانى هارد لك ياخدر !!
غايتو البوست دا حرق ،، ما فضل فيهو غير الاغنية ،، شكرا يا بارعة
نحن ما شمتانين والله ،، بس بنشجع اللعبة الحلوة وكدا 
| |
|
|
|
|
|
|
|
|
|
Re: اسمعني نشيدكـ كيفما اتفق (Re: خدر)
|
يا بارعة مشتاقين
وا بحثى عن ( طفولى ) فى هذه الصورة
الاخ عصام عبد الحفيظ سلامات .. طبعا الصورة طلعت فى كوبر باريس
______________
حسن الطيب
___________
مشتاقين يا صديق
جمال سعيد اخبارك .. نزل اغنية لطارق
_____________
الاخ كبر
______
شكرا على التحيات
براكة
| |
|
|
|
|
|
|
|
|
|
Re: اسمعني نشيدكـ كيفما اتفق (Re: على احمد النعيم)
|
المعجون بماء الفن خدر..
ياخي كل يوم بفتح البوست مع جبنة الصباح والسجاره
اسمع وأعد في الناس الكانت مافي وجات راجعة دي؟
ياخي في ناس اناقريت ليها وفي ناس أول مره اشوفم؟
رغم أني متابع البورد من 2005؟
تسلم يا خدر ياجامع الشتات
| |
|
|
|
|
|
|
|
|
|
Re: اسمعني نشيدكـ كيفما اتفق (Re: ممدوح أبارو)
|
علي النعيم
يازول انتو الحنانكم و رهافتكم قطعت كبدي
الله يديكم العافيه كلكم
ممدوح يا فنان
ياخي حرام عليكـ توهط لي بت سمحة قدر ده في صدري
يازول داير تكتلني اظنكـ
والله انا ما عاجبني في البوست ده يا ممدوح إلا الضيوف الفيهو
ياخي ديل ضيوف فنانين كلهم
بكري ابوبكر زاتو الصباح شفتو رادي اخر زول و فتشت ليهو مالقيتو
الغايبين رجعتهم مفرحاني
لكن اظنهم إلا نلغم ليهم الصفحة الاولي بالاغنيات عشان يقعدوا معانا
شكراََ ليكـ و ليهم يا ممدوح
| |
|
|
|
|
|
|
|
|
|
Re: اسمعني نشيدكـ كيفما اتفق (Re: سيف اليزل الماحي)
|
خدر
انت قاصدنى عديييييييل
كدى ورينى كيف اعفى ليك ياخى نحنا مش اصحاب يعنى لازم تخلص الضحك اللى ضحكتنى ليهو
قصة غريبة
----------------
تيسير فى رد من ناس الحريق?
المطافىء ياعالم انا عاوزه المطافىء
| |
|
|
|
|
|
|
|
|
|
Re: اسمعني نشيدكـ كيفما اتفق (Re: خدر)
|
Quote: و لو استطعت
اعدت ترتيب الطبيعة
فهناك قلبي
و هناك عصفورة للانتباه
و نافذة
تعلمك الهديلا |
تعرف يا صاحب
كل يوم بالليل بجى براى ... معاى كباية فيها سائل اصفر تعوم فيهو تلجات ... اعلق السماعات في اضنى و بي صوت منخفض .... اسمع ...
لا ادرى لماذا يحتل الماضي الفؤاد
اسمعنى نشيدك
تجى اناشيد و صور ... اماكن و جوه و روائح و لا شئ
تختلط وتتداخل ... يختفي الفارق ما بين لمة في جخنوب الجلاد المهدم بلا كهرباء او اضاءة في الحاج ... و انفرادتنا في بلكونة معز ودعمك في جنيف النضيفة (تقول ولدوها الليلة)....
اسمعنى نشيدك
اترك تهديدك
بل اترك انت "فارغاتك"
و اقعد "اسمعنى نشيدك"
هل ستلتزم بلقاءنا الموعود في بشائر مايو؟
ل "تسمعنى نشيدك"
كيتا في : الاصحاب و نوبي (والاعور الجنبو) و .... دينا زاتو
| |
|
|
|
|
|
|
|
|
|
Re: اسمعني نشيدكـ كيفما اتفق (Re: esam gabralla)
|
تعرف يا عصام .. منذ ان نزلت بأرض الابيضين ( اللبن و الزبادي) هذه , لم احظ بنوم عميق كما
حدث في ليلة جنيف تلكـ .. كانت كما انكـ نائم و حولكـ تحوم انفاس كل الاصدقاء تحرسكـ .
وانا قادم الي هنا تناقشنا ودالمجذوب - الجلاد و انا حول لماذا اسافر الان بعد ان قطعت معهم معظم الشوط
قلت حُجتي ,, كانو يستمعون مُطرقين ,, وافق الجلاد لان ذاكـ خياري و همهم المجذوب رافضا و علا صوته محتجاَ
وسافرت ,, تسبقني تمنياتهم لي بالسلامة
لم يمر علي ذاكـ اللقاء عام حتي باغتني ميسرة بنباء رحيل (ودالمجذوب) كان الخبر صاعقا ..
الم تكف غربة الروح و البرد و صديقة ثرثارة في ليل امستردام الطويل !!
نحن ياصديقي خرجنا علي عجل ,, كان يجب ان نحمل معنا ليالي الداخليات و الحبيبات و الاصدقاء و الاقرباء
و كورة الشراب و خلافات الطفولة و كراسات الاملاء و اساتذه شداد غلاظ يتبعهم سدنتهم الاربعة الكبار بكل
مراحل التعليم السوداني (ناس كنبة وراء) الذين حملوناعلي وهن و سياط الاساتذه تحاول بجهد تقويم
ما اعوج من سلوكنا وفق فقة التربية و التعليم او كان يجب ان ننسي خلفنا كل ذاكـ و نحن يا صاحبي
وسط هذين الخيارين يغور و يخورن جرحنا و النصل يغوص اعمق طوال 720 يوما حتي كانت ليلة جنيف ,,
و تسألني الان لماذا اغني بهذا الشجن ياوهم ؟
ملحوظة.. شكراَ علي تلكـ الليله التي اعادت لي ما غاب من عطر الاصدقاء
____
الكلام ده كلو بنكرو باكر لو جبت لي سيرتو .. فأنا قادم من صلب شعب يخجل ان يعبر عن دواخله بهذا الوضوح
نتلاقا في مايو يا وغد
| |
|
|
|
|
|
|
|
|
|
Re: اسمعني نشيدكـ كيفما اتفق (Re: خدر)
|
Quote: شوفي لي سلمي مشت ويين برضو
تمادر ما منها خبر يا اخوانا |
سلمى كنت حتوقف ليها قلبها عديل
بس ربك ستر ، والدكتور قال ليها اوعى اشوفك حايمة بهناك
وتماضر حنيييييينة ما بتقدر على جنس دا
لكن اختك المصفحة ، كلللللللل يوم تفتح وتقعد تعيد وتجر في الحتة بتاعت
لو الايام لي ديارنا تعيدك
وفي البال تماضر الحبيبة
يارب تجمع لي بيها
***
شروق
مطافي يا كبيرة
ما تركزي يا بت
| |
|
|
|
|
|
|
|
|
|
Re: اسمعني نشيدكـ كيفما اتفق (Re: الجندرية)
|
امنه
دايره تسويني في عوه مع ناس امريكا مالكـ
يقولوا كتل بت الناس !!
| Quote: لكن اختك المصفحة ، كلللللللل يوم تفتح وتقعد تعيد وتجر في الحتة بتاعت |
يا اب قلبا حديد في الحوبه ما بتتفات
غايتو شكلي انا الحااموت من الضحكـ في ردودكـ دي انت و اشراقة
| |
|
|
|
|
|
|
|
|
|
Re: اسمعني نشيدكـ كيفما اتفق (Re: Alsadig Alraady)
|
والله جبت خبر يا صادق لكن
لي يومين بقراء في سودان إنكـ و كأنني مُمتحن
مبروكـ يا صديقي تلكـ الاصدارة عمل جميل شكلا و موضوعا
و سعيداَ كنت بمتابعة صاحب (الماء إذا تنفسَ)
شكرا يا صادق يا رضي و اريتا حسادتكـ حسادة الحبايب
| |
|
|
|
|
|
|
|
|
|
Re: اسمعني نشيدكـ كيفما اتفق (Re: خدر)
|
(خدر) صدقاً انا أحب صديقي الغالي الصادق الرضي حين يشعِر .... لذا جئت بعده مباشرة ...... وطارق أبوعبيدة حين يُغني وتهاني عبدالله حين تُمثّل ....
..........
.........
..........
لماذا أكتب ما تقرأ ؟؟؟؟
لا أدري ...........
ولا أريد !!!!
| |
|
|
|
|
|
|
|
|
|
Re: اسمعني نشيدكـ كيفما اتفق (Re: Ahmed musa)
|
| Quote: صدقاً انا أحب صديقي الغالي الصادق الرضي حين يشعِر .... لذا جئت بعده مباشرة ...... وطارق أبوعبيدة حين يُغني وتهاني عبدالله حين تُمثّل |
ولم اغفلت احمد موسي حين يكتب عن زوجته الصديقة ؟
خسئت يا صديقي .. انت يا وغد من النادرين
انظر فقط كم تفصلنا اعوام وانت لاذلت بذات النكهة نفسها
يا ود موسي .. قرمانين ياخي .. تصدق ؟
| |
|
|
|
|
|
|
|
|
|
Re: اسمعني نشيدكـ كيفما اتفق (Re: خدر)
|
خدر سلامات
أيوه كده..كتر من الحاجات الحلوه دى..بالمناسبه عندى ليك كم تسجيل بالاضافه للعمل ده..
الغريبه ناقشت أعمال مع أصدقاء(سودنين وخواجات) قبل حتى ماتسمع رأيي..وأعجبوا خالص ولك التحيه..
(فى واحده خواجيه كسرت تلج عديـــــــــل كده وقالت الزول ده لازم اسمعوا liveوأشوفوا ) 
| |
|
|
|
|
|
|
|
|
|
Re: اسمعني نشيدكـ كيفما اتفق (Re: محمد مكى محمد)
|
بهاء
والله تباري قلبكـ ده تودر ساي
يا فنان .. البنات ديل شكراَ ليهن والله
مرقن لينا الجمال ده كلو
وانت يا صاحبي
عليكـ بالسفر .. ففيه 8 فوائد
محمد مكي سلامات
ياخ شكرا كتير ليكـ و لي مناقشيكـ
| Quote: (فى واحده خواجيه كسرت تلج عديـــــــــل كده وقالت الزول ده لازم اسمعوا liveوأشوفوا ) |
الخواجية دي بتعمل فيديو كلب ولا شنو ؟
قول ليها ياستي نحن تحت امركـ و بركة الغنانا الحزين ده عجبكـ
شكرا كتير يا مكي و دام التواصل
| |
|
|
|
|
|
|
|
|
|
Re: اسمعني نشيدكـ كيفما اتفق (Re: AlRa7mabi)
|
يا رحمابي ياخي والله بالغت كمان
نحن هنا ياخي ما حلقومنا انشرط عدييل بنتهاتي بيكـ
كمان جاي تلوم في الجندرية
عفيت منكـ يا اماني .. اصلو ما تكلميهو
عشان يجي بقعد معانا هنا و يبادلنا الحنان
و الكتابه
ياخي ماتبقي بخيل يا رحمابي ياخ .. فاقدين كتاباتكـ
تعال راجع
| |
|
|
|
|
|
|
|
|
|
Re: اسمعني نشيدكـ كيفما اتفق (Re: خدر)
|
.
طارق
سلامات
في غنية مصرية مطلعها بيقول : عاجبني فيك أوي، حاجات كتير أوي.( سيبك منها)
عارف يا طارق
ما يعجبني في صوتك ..أنه يأتي طازجا دون محسنات أو لوازم بناء الكتروني،
كما يفعل الكثير من حبرتجية الغناْْء ممن برعوا في إستخدام أساليب
الضغط على الأسنان والأنف ... والأذن والحنجرة، وقيل إسلوب الضغط على المستمع زاتو!!
لكن رغما ذلك تجد(أمورهم) الغنائية ماشه: سهرات، لقاءات تلفزيونية، بوسترات، وكاسيت
ومعجبات، وانت سيد العارفين فالبنات السمحات طبعاجنهن مجاملات ، وده الحا يضيع البلد!
يافردة .. قاجين لينا بوست بهناك لعمك القائد سلفا، عندك خبر أظن!
* يا مان عملت لينا شنو في المداخلة الفوق دي؟
سيف اليزل
| |
|
|
|
|
|
|
|
|
|
Re: اسمعني نشيدكـ كيفما اتفق (Re: سيف اليزل الماحي)
|
الحبيب مولانا خدر وليس كما يناديك الوغد دكين
انا وكما تعلم ممدمن لصوتك العذب الطروب
ولاختيارك الجميل لاغنياتك المرهفة
ولا امل الاستماع اليك ابدا
ولكني دائما التفت متاخرا لبوستاتك
هل لسوء حظي ام لانك تملك تواضع الكبار
احبك يا رجل
زيدنا وفقك الله
| |
|
|
|
|
|
|
|
|
|
Re: اسمعني نشيدكـ كيفما اتفق (Re: تولوس)
|
| Quote: في غنية مصرية مطلعها بيقول : عاجبني فيك أوي، حاجات كتير أوي.( سيبك منها) |
يا طويل العمر .. اجمل ما فيكـعفويتكـ و إستهبالكـ
بعدين ياخي اعذر اخوكـ الكبر دخل
و غيابي عن المنبر كتير .. فلم انتبه
تولوس يا فنان
ياخي الله يجبر بي خاطركـ
و اريتو غناي يقدر يسد فرقة
عواطف جميله لي ناس بتحب زيكم
إذن انا وصلت تب يا قول المتصوفه
شكري كتير يا تولوس
| |
|
|
|
|
|
|
|
|
|
Re: اسمعني نشيدكـ كيفما اتفق (Re: حسن الطيب يس)
|
Quote:
ناس المطافي ديل قاطعين كهرباء اليومين ديل
الاحتياطي المركزي كيف معاكـ ؟ |
لحدى الكهرباء ماتجىء ياخدر مافى حل غير....
| Quote: اسمعني نشيدكـ كيفما اتفق |
ولو ماجات بنتصرف- تنطفىء ماتنطفى اتعودنا على النيران
حسع فى نار اكتر من غناك ده
الله يديك العافية يا اخوى غايتو
| |
|
|
|
|
|
|
|
|
|
Re: اسمعني نشيدكـ كيفما اتفق (Re: حسن الطيب يس)
|
علي النعيم
إنشاء الله ذكركـ مرفوع مع اصحاب اليمين ياخي
وانت و من تحب بألف خير
و اعذرني علي تأخر الرد
اووو كمندان حسن شخصيا
والله هلت البركة ..
شفت العيال كبرو كيف !!
و نفيدكم ان سرمد من هواة جمع السيارات
بدلا عن (الطوابع)
| |
|
|
|
|
|
|
|
|
|
Re: اسمعني نشيدكـ كيفما اتفق (Re: حسين محي الدين)
|
هذا البوست:
سبب رئيسي لطلوع الروح.. وفي رواية دخولها،،،
لم تراعي فيه أدني شروط السلامة (نار وزيت) وأشياء أخري مشتعلة،،،
خدر تاني ..
وبطل تهميشك ده..
تعرف انا جني وجن الحوامة لكن "البوست" ده عمل فيني عمايل عجيبة
أسمعني نشيدك .. لحن بدخلك توووش وبسكنك
وبخلي الزول يعيش نفس (حالتك) ديك .. أشبه ما تكون بحلقة ذكر عظيمة
أو دق الزار..
ياخ والله غلبني أقول شنو
لكن برضو أحسبني شهيدك..
والله يسامحك!
| |
|
|
|
|
|
|
|
|
|
Re: اسمعني نشيدكـ كيفما اتفق (Re: حسين محي الدين)
|
علي النعيم
سلامة كبادكم من القطيع ياخي
افرح و نحن بنفرح معاكـ
و اعتذاري عن التأخير
يا حسين
شكرا علي التقريظ ياخي
و شكرا لي عمنا الامي
ربنا يقبلوا في جنان عرضها السماوات و الارض
و يرحمو و يرحمنا
شكرا يا حسين يا صديقي الجديد
| |
|
|
|
|
|
|
| |
munswor almophtah
HAMZA SULIMAN
خدر
Baha Elhadi
صلاح أبودية
Ahmed El Gasim
معتصم ود الجمام
الجندرية
Tagelsir Elmelik
imad braka
Mahmoud Mustafa Mahmoud
عمران حسن صالح
أبو ساندرا
Ahmed Yousif Abu Harira
نزار عثمان السمندل
Kabar
Ibrahim Algrefwi
صديق الموج
عصام عبد الحفيظ
كمال سالم
لؤى
الملك
ابراهيم عدلان
Sidig Rahama Elnour
بارعة
جمال سعيد
دينا خالد
على احمد النعيم
ممدوح أبارو
Ishraga Mustafa
Alsadig Alraady
Ahmed musa
محمد مكى محمد
AlRa7mabi
تولوس
حسين محي الدين
فيس بوك
تويتر
انستقرام
يوتيوب
بنتيريست