|
|
 Re: ســــــجيمــان .. الاعـمــال الكــامـلة (Re: سجيمان)
|
قال لي ماشي امريكا...... خلاص يا فردة...مهاجر... لكن ما عارف هناك اسوي شنو؟...واشتغل شنو؟...... قلت لو بسيطة.... لا تشتغل ولا حاجة...............شوف لك عجوز لازم يكون عندها سكري وضغط..ومرض قلب...وروماتيزم...وحبذا لو عندها سيلطان..... ومغندلة..بعد داك ااتلزم واتحزم وحبها..حب للطيش.....يعني اول ما تحاول ترميها في شباكك... شوف المحل البتتردد عليهو...والبت لها هناك..واول ما تجي جنبك.... نط قدامها.فنترررررررروب.... هي حتتخلع وتقول ....اوه ماي قارد..... ماي قارد دي ترجمتها...وب علي.... باقي انت يخربك في الانقليزي.... رفع حواجبيك وعضي شلوفتك التحت... ودخل ايديك في جيوب بنطلونك... وارفع كتف وارخي كتف.... وقول لها.. اموت مكنكش في العنب المكرمش......طبعا في اللحظة دي هي حتقيف وتعاين لك.... استغل الفرصة وعرفها بي نفسك....وقول لها.... نحن بتاعين رقاد الحوش....وشراب الشاي بالقرقوش....يا غزال يا ما بتحس ارحمني قبل ما تتلحس........بعد شوية هي حتعمل فيها تقيلة وتمشي قدامك... انت هنا قولها.......آآآآآآآخ انا من البيتاتو يتاتو متل جنا الوزين...وخليك مراقبها لو غيرت مشيتها لي مشيت اغراء....خليك ثابت ما تطرطش... طوالي ادي من النوع التقيل...وقول لها...احب نيفاشا وخم القروش بالمكشاشة....اموت انا في الحليب قصير الاجل..كامل الدسم....واياك ثم اياك تبدل قصير الاجل دي بي طويل الاجل... تقوم انت تموت والناس كلها تموت وهي لسه حايمة....وتتاتي.........
بعد الزواج ركز تركيز شديد..انو حكويك تكون عن الموت...وسيرة ناس ماتو وشبعو فيهو....عشان تكرهها في الحياة.. وتوحي ليها انو الموت لذيذ...وحقا في الرقاب....
وماتنسى تدلعها......و طول بالك اتذكر انو دي فترة انتقالية .... ولو كانت النوع العندو كلب...وبيحب كلبو داك...الكلب برضو دلعو........ حميهو...وشامببو...ونشفو...وكل ما تشوفها هي جات اقع في الكلب بوس.....وحاول تضحكو وتكلكلو....وانضم معاهو...ولو في طريقة تجضمو؟....جضمو بس بي دلع شوية......ولو سالتك بتحب الكلب دا؟ قول لها دا كلامك؟... الكلب دا بحبو قبل ما اعرفو.....واي حاجة انتي تحبيها انا بحبها...واريدك اريدك واريد الناس البريدوكي ويريدو كلبك.....مناي ابقى عضُم ابقي لحمة..... ابقى شخت ابقى شحمة..بس يعضيني كلبك ويبلعني جب....و....جب
ساعة النوم...ما تنسى تجيب كباية فيها موية ... عشان تخت فيها طقم اسنانها...وجر عليها البطانية..وبوسها في جبهتها.... خلي بالك الجبهة دي هي الفيها القروش.... ما شفت الناس الباقين عشرة في الجبهة بقو كيف؟....وتندن لها قبل النوم......انت يا الابيض ضميرك صافي زي لبن الربيع..و..لاّ..... الاوصفوك.....لو انصفوك
خشمك خلااااااااااااااااااا
خشمك خلا
كفاية تبلع من غير تلوك
لو بالبصيرة تاملوك
وفي الحقيقة بادلوك
شكلك عروس
وكلك فلوس
وماليا.. البنووووووووووووك
......... يا حليو
ربنا يوفقك وتلاقي عجوز من النوع........ قصير الاجل كامل الدسم
تذكرت...هذه قصورهم وهذه قبورهم... قالها واحد متصوف لي خليفة من خلفاء بني العباس طلب منو الخليفة ان يهديهو...... واظنو نفس الزول لو لاقى صدام حسي..... كان قال ليهو هذه قصورهم وهذه جحورهم.....انا شفت الجُحر الاكان مدسي فيهو صدام..... في ضمة الامريكان..... لكن انا خاسة نفسي ما شفت غير كرعين زول راقد ولا بس لو باتا....وبعدين الجحور فاضيات.... وبعدين شفت صدام ومعاهو دكتور يفلي فيهو..... خايفو يكون قمّل من الرقدة الطويلة الفي الجُحُر ..دا.....ويفتش في خشمو يمكن يكون داسي فيهو سلاح كيماوي...والتسويهو تكريت في القرض تلقاهو في ولدا....
.بوش غايتو لي حسي لحق نفسو للانتخابات الجاية....... لكن اللحقة البصح... لما يجيبو لينا بلادن زول الجحور المو خمج.... في التلفزيون....ويورونا اضنيهو بس.... وهو لابد في الجُحُر..... ويورونا جحورو في تورا بورا..........قطع شك بوش يفوز....ولوموني بعدين ان ما جا الاول....
...نحن غايتو طلعنا ناس بتاعين جحور سااااااااااااااكت..... يعني أي رئيس يلف ويدور. ويكب الزوقة...ويكوسوهو الامريكان...... يفتشو محل الجحور وين....اهم حاجة أي رئيس قبل ما يمشي علي قصر االحكم..... يكون رتب جحرو.... وحفرو وجهزو..... كويس.... والدنيا مو معروفة..........
ولو قام انقلاب تتوزع الدبابات دبابتين للاذاعة ودبابتين لكل كبري و تلاتة دبابات للاستيلاء على الجُحر الجمهوري...ويبقى عندنا بعدين معالم تاريخية الجُحر الاكبر والجُحر الاصغر.. والجُحر الاوسط...... زي الاهرامات.....وجحور قدماء الحكام....وتكون معلم تاريخي وسياحي مهم....ويزوروهو السواح....ويسيحو جنبو لمن يفترو.....ويتباوسو العشاق عند الجُحر الاكبر وياخدو صور تذكاريه.. والعرسان المحظوظين يسمحو ليهم يقضو شهر العسل في واحد من الجحور دي....عشان العروس تتفشر بعدين وتحكي انو احلى ايامها كانت في الجُحر....وتغيظ باقي العروسات المبشتنات المقطعات القضن شهر العسل في الهيلتون........
.ويسوروها ويفرضو رسوم على زيارة الجحور الجمهورية......والدود القرقر وحبس الدرب...... يبقى الدود قرقر حفر الجُحر... والجُحر الجمهوري... يحرسوهو اتنين لا يرمشو ولا ينضمو.لا يهشو لا ينشو....واخر الشهر يدوهم ماهية...والله راحات!!!.....
.وبما انو نحن ناسنا الدايرين يبقو روساء كتاااااااااار....... اصلو مافي مشكلة....ان صفت النية الجُحر الوااااااحد يشيل مية......اما ناس سجيمان ليهم الله وعيشة الرواكيب......
انتو مسعولين من الخير.......نُقُد وين؟
الدنيا دي فيها جنس محن.......... تجنن الما يجن..... جاري بنغلاديشي...... سمين...وعندو كرش كبيرة...... كل ما يلاقيني عند السلم انا طالع ولا نازل.... يعاين لي عين حقارة...... من فوق لي تحت...... يا ربي الزول دا مالو معاي؟..... الزول دا مشبهني.... ولا شي؟......كلمت صاحبي عبد القادر وشكيت ليهو.... من البنغلاديشي السمين دا....وحقرتو بي.... وعدم سعالو فيني.....بما انو صاحبي دا متخصص في الهنود والبنغلاديش..... ضحك وعاين لي وقال لي..... يا سجيمان يا اخوي..... الزول دا فعلا حاقر بك......لانك ما عندك كرش.....والهنود والبنغلاديش ..... الزول كل ما كرشو بقت كبيرة... كل ما مكانتو الاجتماعية زادت وكبرت.....عشان كدا الزول دا شايفك يا سجيمان لا تسوى جناح بعوضة.........
الحقيقة انا.... راجعت الموقف كلو.... لقيت انو جاري دا... يحوز على احترام.....وتقدير كل البنغلاديش والهنود الفي العمارة..... لانو اكبرهم كرشا....وانا لاحظت انو لما يكون واقف.... يقيف بصورة تجعل الكرش ممدودة لاقصى حد...وخاصة لو واقف متعارض في السلم......وماسك الموبايل وقاعد ينضم...بقى يغيظني باتنين.... الكرش والموبايل....وحمكة ربنا اول مرة اشوف لي زول يضحك من كرشو..... الناس في الضحك بيفتحو خشمهم....دا لا.... دا تلاقي الكرشة بتاعتو تهتز...وتتحرك.... مرة مع عقارب الساعة....ومرة ضد عقارب الساعة...ومرة بصورة متموجة من فوق لتحت والعكس..... الخشم مقفول والوشي ما عليهو أي تعابير.....
من هنا انا عرفت...... انو الاله رام عند الهندوس.... هو اله الرمرمة..... والاله كريشنا.....هو اله الكروش....يعني أي واحد عندو كرش يكون راضين عنو رام وكريشنا.....
بقيت اشيل هم وانا جاي من برا وهو جاي معاي.... زولي اب كرش دا.... لانو شفعو..وليداتو... يفتحو الباب ويقعدو يغنو ليهو....
ناس كريشة.......جـــــو
جابو العيش.......وجــــو
ولو شافوني يقعدو يضحكو ويعاينو لي ويأشرو علي ويقولو....
انت يا........ الضبيّب
انت شن......... بتجيب؟
............... الضبّيب دي تصغير ضب..... يعني انا زي الضب لا كرش ولا قيمة.......
لكن من يوم الليلة....رمرمة جد.....واوريهم الكرش المو مسخرة......
هاري.........رام
هاري......كريشنا
اغاني البنات قاعدة تعبر عن التحولات السياسية والاقتصادية والاجتماعية الحاصلة......من ايام الحرب الكورية في الخمسينات.... الله لي كوريا يا شباب العوليا......وثورة اكتوبر... حرام يا جندي تعمل كدا ترصرص قرشي بالشكل دا....ولحدي ما وصلن الجمبة الموجعاهن وقالن الجمبة دي اهم شي....ومسكينات لي حسي ماسكاتنها...ويشكن....
نحن حسي في عصر جديد...وتحول جديد...عولمة وفلهمة.. سلام...وقرنق..وناس سافرت في كل الدنيا..من ركنها لي ركنها...ونحن اول ناس سبقنا امريكا في محاربة الارهاب الدايراهو دا...بقينا نلحن المدائح علي انغام التم تم.........والحان الديسكو...ونهجج بيهو..ونغنيهو...في حفلات راس السنة..واعياد الكريسماس....
علا شي واحد ما سويناهو ..وخايفين الناس يلومونا..ويطلعونا ارهابين..وناس عنصرين دينين... لي حسي مافي زول سوا لو مدحة فوق نبي الله عيسى...ولا نبي الله موسى..ولا حتى غنية واحدة بتاعت بنات... فوق فكي وفقير يهودي..ولا فكي مسيحي.. كل غنا بناتنا ومديح رجالنا.. فوق فقرانا وفكياتنا....المكاشفي والكباشي وحسن ودحسونة
وسيدي الحسن القبتو اللبنية.....واب شرا..
النضم دا ما من مصلحتنا....وبي يلومنا مع الناس..ويدخلنا في حيص بيص...وبعدين نكوس لي التخارجنا وما نلقاها....دا حين نحن نبداها من كُبارات المسيحين واليهود...ونخلي مثلا غنية بنات زي.....
برانا....وعرفنا سبب ازانا
يا ناس
يا امو يا... الجنة
وانا عقلي كيف جنا
والبابا .... يوحنا
تحنن القلبو ما حنا
يا ناس
وبرانا وعريسنا كاهانا
يا ناس
وبرانا بنعشق مستوانا
يا ناس
.............................
ولا في السيرة.... غنية بنات اول ما يدخلن بيت العروس..وهن مسيرات العريس...ويرشوهم بالبيرة بدل الموية.......
البتول....ام العروس.... بتول
جبنا ليك عريس........مسطول
ام العروس
سلام ..... ام العروس سلام
جبنا ليك ....عريس حاخام
ام العروس
..................
ولاّ غنية زي غنية الحمام نزل في الساحة البلوم قلع بالراحة... طوالي نقلبها وتبقى
الحاخام نزل في الساحة
الامام..... قلع بالراحة
الحاخام .نزل يا اهلنا
الامام.... ..قلع جننا
............................
وممكن البعيو.... يشارك برضو......وبدل ما هو خالعنا وقاطع قلبنا....وشابكنا.... تمساح الدامر...تمساح الدامر......يبدا بي رمية زي.....
خديدك حائط المبكى
ونهيديك... برتكان
فوقك رسول....مكة
وشيوخ... الفاتكان
....و.... حالو....ماكل .... بالو
يا ناس
انتو.....مالكم....وماااااااااااااااالو؟
يا قاصدين غرامنا يا دايرين خصامنا...شوفو غيري وغير حبيبي....دا محمد الامين ... الله يطول عمرو..... وحات الله زول قاصد يفتن بين محمد الامين وبين حبيبو... دا زول داير لو اربعين سوط.... بين اضنيهو.... لانو لو صبر شوية... براهم بيشكلو ويفرتقو.....ما دام حببيو جاهو اللوتري للهجرة لامريكا....وود الامين قابض في كرعيهو ويبكي ويغني قلنا ما ممكن تسافر.....وزول بيقصر العمر والاجل زي حببيب محمد الامين مافي..... الغريبة الساعة جنبك تبدو اقصر من دقيقة. يعني زول زي دا ما ح يعيش لو أي جنا يلداهو.....دا زول عليكم الله بسكن جنبو؟ خليكم من احبو؟.................
اتمحنت حد المحنة.... وانا اشوف في ياسر عرمان يضرّع في الخرتوم...ويقالد في الجماعة واحد واحد....وانا اشحد في الله يغتي عليهم كلهم....ويكفيهم شر العين...وشر العوازل.... والعزال...والعزازيل والعزالين.. وربنا يفك عرمة ياسر وما يتعرم تاني.... وان شاء الله يعرم عدوهو...ويحفضو هو وكل العرمانين الوراهو والقدامو.ولقيت نفسي اشحد في الله..وادعي.الله يحفض زعمانا واحد واحد,,ويكتر لهم الحفايض من كبيرهم لي صغيرهم.. والله يحفض امريكا.... وبوش وكلبتو....وكل البششه.... وقلوداليزا.... وكل اللززا..ويغتي عليها... ويسمن ويغلد كرعيها...وان شاء الله ما تتعوج في الدنيا دي...ولا تتحوج.....ويسترها...وما يلاقيها كلنتون في زقاق.........
علا مرا زي دي تقعد بلا راجل.؟... الحكاية دي موجعاني بالحيل....غايتو الله يهدي سيدي امحد عثمان ويستر عليها....ويجدع لو فوقا حبل وتبقى سترة وصُـلحة. ونناسب اليانكي....والسيرة تقوم من حلة خوجلي لي عن نيويورك.....وخلي تاني أي راجل يجيب سيرة السودان بالغلط ساكت...دعيت علي كولن باول...ورامسفيلد...اريت ربي يسهل عليهم....كل امرا قاسي.... ويقبضو بن لادن وصدام...الليلة قبال باكر..... وربي يرد لنا كل غايب.... يرد لنا نقد الشيوعية...وعوض الشايقية...ويرد لي موبايلي الاتسرق......وتبرد بطني و تسكتني من النبيح.....
موبايلي يا الغبت مني فجعة
خليتني للاسى.... والوجعة
في عصر الفضائيات المالية السماء و الواطا..... ومالية وقتنا وراسنا وبقت تربي فينا وتربي في وليداتنا.....يبكونا وقت يدورونا نبكي ويضحكونا في اي وقت.....قناة السودان وضرتها قناة النيل الازرق اكتر قناتين نسبة المطربين من كفيفي البصر نسية عالية..... حتى انو الواحد بقى لما يجي اي مطرب جديد يراهن الجمبو كان ما الزول دا عميان...... كفيفي البصر لهم الحق في ان يمارسو حياتهم ومواهبهم زيهم زي الناس..... لكن كمان بصراحة الحكاية بقت زايدة شوية.... وبقت مسألة بتاعت عاطفة وحنيّة من اهل الحل والربط... في قنوات الطرب والونسة والازعاج.....والضحك البلا سبب...... في يوم واحد صادف ان شاهدت واستمعت الي تلاتة مطربين من كفيفي البصر...... وفيهم واحد الله بيسعالني لا بيعرف يغني ولا الغنا جاي بيجنبو وبعد دا كلو شليق وكل مرة ناطي لي زول في حلقو.....لكن نسوي كيفين مجبور ين نعاين....ونسمع...العاطفة احيانا تجيب نتائج سلبية وزي الزفت.....انا اتعاطف مع فاقد البصر نعم.....لكن اعتقد وضع اليد على الموهبة الحقيقة ضرورية وتوجيهها التوجيه السليم ضروري..... الواحد بقى يتخيل ليهو انومعهد النور بقى ينافس معهد الموسيقى ....ما ضروري كل عميان يكون في قامة حنان النيل..... وما ممكن كل من فقد بصره يبقى فنان غصبا عننا.....ونقعدنحن نعاين ودمعنا يجري علي الخدود....وتجيش عواطفنا لا طربا ولكن حنية .....وكرُ يا يمة.... دي البنية ما بتستاهل ودا الولد حرام يكون عميان..... وننسى انو قاعد يغني....
اعتقد ان هناك مواهب كتيرة لدى هؤلاء غير الغنا..... صاح الغنا بيجيب قروش وبيحسس اهل الشخص انومنتج وهونفسو يحس انو ليهو دور في الحياة.....لكن ما كلهم بيغنو كويس والله ما كلهم............
ولوفتشوهم يلقو مواهب كتيرة مدفونة...... وممكن يطلع منهم مفكرين وكتّاب...... ينافسون طه حسين والمعري
من سعد الله ..... بالرياض.....الي الابنة عزيزة والزوجة المعكننة بت ابسكين.....الي الاخوة بالرياض.....من حسن والصفارة... الي صفارتو....وصفارات كل البلد.... بمناسبة العيد السعيد...سيداتي سادتي بسمة الموسم يهديها... عبد الله جبر الخاطر...الي اخوانو بام كدادة.... ويهديها لي كدادة بت ام كدادة....مشاهدي الاعزاء.... نهديكم رائعة .. الزعلان الذري...... سيوبر ستار العكننة والغدب... نهديكم بسمة الموسم للاستاذ بابكر حنين......
اعزائي المشاهدين........من محاسن... بالعلافون... الي الابناء... اب عراقي وابجلابية.وتوب....وجميع الاهل والاحباب....و.من شر حاسد اذا حسد الي الاهل بي ود اللحد...والاخ حسين عينو حارا.....والخالة بتول بت عيد حسين...وجميع الاهل والاحباب... سيداتي سادتي مع عوض ابراهيم عوض و غنية.. بدلتي الكحلية......بدلتي الكحلية....ومن فراق ماليزيا الفراقا قاسي عليا
اعزائي المشاهدين... بمناسبة العيد السعيد..... القلع عبد الحفيظ يهدي عِمتو الي كمال ترباس.. بمناسبة لفة الالفية التالتة.....وكما يهديها الي كل القلاليع.. والقلاعين بامبدة الردمية..... من حسن استنكاح بسجن امدرمان.... الي سعد تفتيحة بسجن كوبر.... وجميع المساجين الاعزاء...... كما يهيدها الي الشكرتو بت عمو... والمال ما بيهمو.. بابكر ود الجبل...... سيداتي سادتي الفنان الدكتور محمد وردي.... و...اغنية يا شيك يا طاير من بعيد.....واريدو ود الجبل الفكاني يوم العيد.........
اصعب حاجة في الدنيا... الديَن.... السلف.... تدين من زول قروش...واصعب لحظات.....لحظات البوح.. بطلب الديَن....وتنيــة الرقبة....وطرقيع الاصابعين..وحك ما ورا الاضان...والضحك في أي كلمة يقولها المدين....حتى لو كان دمو قرادة....والنوع البيحكي النكتة كأنو جايب لك خبر موت.....وعشان تكون زول... مستدين محترف....النصيحة دي احفظها حرف حرف.....اولا اختيار الشخص....مهم جدا ومريح جدا
اوعك من النضّام.... دا يمشي أي مجلس ويخلف كراع فوق كراع....ويشيل حالك..ويحكي لحظات اداك الدين وكيف انت حننتو....وحكيت ليهو عن ظروفك الزي الزفت....ومرتك.. الما عندها شغلة غير البوبار في بيوت الايجار....ونسيبتك ام شطور وكرش...كل يوم ناطه عندكم وتحرش في المرا...ونسيبك الديمة فاتح خشمو وداير منك....ووليداتك السبعة.... المن يوم كشحت الفاتحة فوق امهم...والمرا شغالة ولادة...وبنطلونك المفتوق.. بي ورا وناصل...ودقنك المشعّفة و مشقنّفة...
تاني شي.... اوعك تديَن من جارك.... دا يربط لك في الشارع اربعة وعشرين ساعة.....وان صادف يوم شافك جبت بطيخة لي وليداتك ساكت...... بعد شوية يرسل وليدو اب مخاخيت وفصيح و لديح.... عشان اول حاجة يطمم بطونكم من البطيخة وتاني حاجة..... يقول لك عمو سجيمان ابوي قال لك داير القروش الدايرن منك...وان قلت لو يا ولدي قول لي ابوك حسي ما عندي.... الوليد يعاين لك ويعاين للبتيخ في الصينة قدامك . وبي نظرة بوليسية وهو يأشر علي الصينية...ويقول لك نان البتيخ دا جيبتوهو من وين؟.....
برضو اووووووووووعك تدين من الشفقان..... ممكن تاني يوم يجي يسألك من قروشو.ويخليك تقول:
انا عمري ديَنك..... انت
وانت ديَنك عمرو قصير
....و برضو... يقعد يتخبر منك...وداير يعرفك قاعد وين....وبي تمشي وين........وقبال كدي ادينت من زول واكلتو؟......وان في زول قال لو انت ما بترجع القروش.... الله قال بي قولك..... كل يوم تلقاهو ناطي لك في البيت.....ويقول لك والله بس جابني الشارع وقلت ادخل اسلم.....وان قاعد تمشي تصلي الجمعة في صقط لقط....اول ما تسلم وتقول السلام عليكم...وتقبل تلقاهو لاصق في يمينك.... ويعاين لي جيوبك....ويخلعك ويهجمك...وتقرا في عيونو..بهاجر ليك وين ما كنتي
عجبتني اسيا..... سايقة باص حدادي مدادي.في قلب لندن....زمان يغنو لها اسيا بابورك في الاراك..... حسي اسيا بابورك في الهايدبارك.....احيّك يا اسيا....واسيتنا الركبت البابور من الاراك....ووقت وصلت كسلا.... سيدي الحسن حلف متين يمين الا يقوم ويصنقر...واسيتنا الساقت الباص في بلد العيونهم خضر.... وصلتها... قام سيدي بيق بن......والساعة زغردت..احيّك تاني.....
ما عجبتني جواهر.... دايرة تعمل الغنية السودانية عالمية..... وعشان تبقى عالمية... لازم تتكلم مصري...وكل الاغاني والكلمات تتحول لي مصري....وقواهر... تضرب وشيها اورنيش.... وتتحول .... الي ما اعرفش ازاي....وتغير غنية كانت عاملة ازمة..ما ليهاش لازمة. الشحم واللحم والردوم..وتبقى
ايه الشحمي... دا؟
ايه اللحمي..... دا؟
ولما تأبلو...أولو...
انا بحب.... البتِلو
طوطا.. يا.. طوطا
دي خدود ولاّ اوطا
...............و الكورس ينطط ويسوي في الطوط طوط
..... سيدة الغناء العربي .... قواهر... عاوزة... يعملو فيديو كليب لي ناس...وردي ...والكابلي....وعاوزهم يقعدو ينططو...وهو الواحد فيهم... يمشي بالدفرة...قواهر قالت هي وسيد خليفة راكبين في سرج واحد.....وبكرة ممكن تدفر سيد خليفة وتتحكر في السرج براها.....وتحول كل الاغاني الي لغتها العالمية..... يا ابشرا..... تسويها
بََري....بََري
يا اب كُشري
دي بيرة....ولاّ شري؟
يا اب كُشري
..... يا حقة قواهر.....نحن عندنا سقافتنا المميزة.....ومن فات أديمو تاه.....
و....
اتذكري يوم لحافك عتنيبة
ونعلاك من كوش الكريبة؟
لما كانت امال طلسم توقف الحركة.....ووهادية تهد الما بيهدو ار بي جي.....وتلت التلاتة.... تالتتن ..... واب عاج يهوش...ويبشر ...ويتنتر...ويتعنتر.... فوق خلق الله.....ويا دنيا مافيك علا انا.......
انت ما مجبور علينا نحن مجبورين عليك...... شفع..... يلملمو فيهم ناس تلفزيونا..... يلمو في الغنية يوروها الما بتورا....ويورمو فشفاش السادة المشاهدين....وكل يوم ضيف.....واي ضيف يخفف في دمو....ويمرضك مرض...وينكت ويحكي قصص لو واقف في الضل برا....تفوت بي وشيك وتخليهو ينضم في نضمو.....ومسابقة بين المذيعين..... يظهر في فايض في المذيعين عشان كدا بقو يخلوهم يقدمو البرنامج... جوز جوز....وهم يقعدو يتشالقو...وكل مذيع داير يقول انا اهو....
عوض ابراهيم عوض.... تلاتة واربعين بدلة.. و...خمسة وستين..... كرفته.....وسبعة انواع من الضحكات.... ضحكات سلم سباعي وضحكات سلم خماسي...وكل دقيقة يحكي لينا لما كان في ماليزيا....وهو قاعد يجبد في كرفتتو.....ويفك البدلة ويزررا تاني....ونحن مساكين... نعاين في عرض الازياء دا....ونبلع في ريقنا....ويا اب بِدل يا النشفت ريقنا....العجيب الاستديو نار الله الموقدة....والناس الفيهو عرقهم جاري...وعوض الله متشنط ومتجبص في بدلتو...
فنان شاب..... ما قادر يميز بين الداندرما والمايك...حاشر المايك في خشمو...وخايف بعد الحلقة تنتهي يسلمو ليهم عود......
بنياتنا المذيعات..... الوشي يلصف من الكريمات....والايدين غبش....وحاشاها نسرين.....
يا جماعة يا هوي يا انتو.... يا الجننتونا...دي قنوات فضائية...... يعني الدنيا كلها ممكن تشوفك....يعني يا ضيف ناس النيل الازرق...لو قعدت خمسة دقائق وكويت قميصك قبل ما تجي... الله بي يحاسبك؟.......... والله بي يسعلني وما بهتو..... فنان كبير.... يغني وريالتو سايلة....والكميرا مركزة عليهو والمخرج فرحان بي المطرب المريل دا... والمطرب ما كلف نفسو يقش شلوفتو من الرياله.....يغني في غناهو...ويلغف الريالة راجعة.....ونحن ندفع في السفارة حق القناة الفضائية
دعوة.... لي حفلة تاني ايام العيد.... يحيها الفنان نميري... نميري عديييييييييييييييييل كدا......شفت البقت عليك يا ابعاج؟... بعد ما كان يغنو لك .... بقيت تغني
|
|
 
|
|
|
|
|
| العنوان |
الكاتب |
Date |
| ســــــجيمــان .. الاعـمــال الكــامـلة | khider | 02-23-04, 09:26 PM |
 Re: ســــــجيمــان .. الاعـمــال الكــامـلة | Amin Elsayed | 02-23-04, 09:44 PM |
| Re: ســــــجيمــان .. الاعـمــال الكــامـلة | سجيمان | 02-23-04, 10:57 PM |
| Re: ســــــجيمــان .. الاعـمــال الكــامـلة | khider | 04-20-04, 11:08 PM |
| Re: ســــــجيمــان .. الاعـمــال الكــامـلة | AlRa7mabi | 02-24-04, 07:03 AM |
| Re: ســــــجيمــان .. الاعـمــال الكــامـلة | Ahlalawad | 02-24-04, 07:48 AM |
| Re: ســــــجيمــان .. الاعـمــال الكــامـلة | ست البنات | 02-24-04, 02:41 PM |
| Re: ســــــجيمــان .. الاعـمــال الكــامـلة | ست البنات | 02-24-04, 02:41 PM |
| Re: ســــــجيمــان .. الاعـمــال الكــامـلة | شرير والبرتقاله | 02-24-04, 03:01 PM |
| Re: ســــــجيمــان .. الاعـمــال الكــامـلة | سجيمان | 02-24-04, 03:08 PM |
| Re: ســــــجيمــان .. الاعـمــال الكــامـلة | khider | 02-24-04, 07:09 PM |
| Re: ســــــجيمــان .. الاعـمــال الكــامـلة | khider | 02-28-04, 03:07 PM |
| Re: ســــــجيمــان .. الاعـمــال الكــامـلة | عبدالأله زمراوي | 03-10-04, 12:56 PM |
 Re: ســــــجيمــان .. الاعـمــال الكــامـلة | Raja | 04-21-04, 01:01 AM |
|
| |
khider
فيس بوك
تويتر
انستقرام
يوتيوب
بنتيريست