هشام يازول... يارائع على قول الفنان ساطور...كنت كنت شغال كمسارى اذكر مرة فى نيودلهى..كنت نازل فى فندق كابلى_غير الفان- دخلت المطعم فوجدت عربى يشبهنى من ملامحه عرفت انه من ناس الجزيرة فسالته من وين ياخوى قال من المناقل...فقلت المناقل ذاتها لا مكتب 67 وين فى المكتب قال فى خضر قلت ليه خضر ذاتها قال لا من كترى بكسر الراء وانا قلت له كترا بفتح الراء قام قال لى انت ياخوى كنت شغال كمسارى ..فقلت ليه لا لكن انت القالك فى قرايه هنا منو فطلع اخونا بحضر دكتوارة فى الغابات وانا الجديد
هشام والله دا بحث طيب ابقوتة فيها 144 من قرية وكنبو بس كمان لو ذكرت جزء منها الناس ديل بزعلو منى لذلك سوف احاول اراسل المحلية ويدونة لستة بذلك... مرة كنت ماشى ابقوتة وراكب البص..اخدت لى نومة ولما صيت سالت االجنى وكان راجل نكة قلت ليه ما وصلنا ود الهبيل- دا اسم قرية-قام صاحبى قال لى اسكت يازول غيروها اسمه لى ود المؤدب...الهبيل نوع من الشجر وليس الصفة... ولك ودى
القائمة طويلة جداً- قري المغاربة بس في منطقة المناقل أكثر من 44 حلة حسب رواية عمي أمحدعلى، عليه رحمة الله: كترة، العتامنة أبعرف ديل جنبكم هناك عندنا ود أغيبش، ود حامد، القلعة، الجميلية، راس الفيل، القليع، الهميج، ود الجمل، ود الزين، العبدناب، ود سعدالله، الكمر، ود عبد النبي (مهيلة) عجب الدار (سابقاً) شندى الواصلاب، وووووووو
خالد يا أخوي كل المغاربة السكنوا السودان وسولوم حلال كُتر ،،، ما لقيتوا غير عقدتهم تسكونوها، الله يكفينا شر العقد؟؟
أقترح تغيروا الاسم لي (قعدة المغاربة)؟؟
++++++++ الموضوع عامة ممتاز بس أقترح إضافة تعريف مختصر يوضح مكان القرية وليس الاسم فقط (الموقع + الإقليم + أقرب مدينة إليها)، بقد المستطاع و>لك للتوثيق.
أما قريتنا فإسمها (الكنيسة) وغيروها ناس الإنقا> إلى (الصفا) وتقع على الضفة اليسرى لنهر النيل كآخر قرى منطقة القرير ، ريفي مروي ومقابلة لجزيرة مساوي ويقابلها بالضفة اليمنى قريتى المقل والحجيرً. الضفة اليسر هي الغربية واليمنى الشرقية بإعتبار اتجاه النيل دون اعتبار للإتجاهات الجغرافية الفعلية، وفي موقع قريتنا الإتجاه معكوس لإنحناء النيل.
يا هشام والله ما قصرت...تصدق...لا اعرف الا امكن عشرة اسماء من الذكرتها دي بالرغم من انني ضارب جذور اهل العوض...
اها الفي الكوت ديل قري بشمال غرب شندي...اذا بديت احشي ليك اسماء القري الفي النص بجيب ليك لسته قدر الذكرتها دي...هناك الناس متخصصين في اسماء القري...كل ناس يزهجوا من رفاقتهم والله الميجر ينكسر فيهم والله درب العربات يزح منهم والله يغني ليهم زول يقوموا يبرزو يسووا ليهم تلاته بيوت ويسموهن قرية...حلتنا كانت قرية واحده...جات الانتخابات ناس وقفوا مع الجبهة وناس وقفوا مع الاتحادي وناس وقفوا مع الامه ...طوالي فرزوا الكيمان وسمو رقبتهم...الشنو كدي التحتاني والشنو كدي الفوقاني...والشنو كدي حلة القوز والشنو كدي حلة الصهريج...حافظوا علي الاسم لكن كل واحد اضاف ليه الحاجة العنده كان دونكي كان سهم الشمال كان اشارة تحت وفوق...هذا عن خبر حلتنا وان سدرت معاك علي باقي الحلال لامن وصلت المكنيه عيييييييييك
لكن ما ليك حق كان تذكر كلي معانا هنا...والنوراب دي فيها اول مصنع نسيج في السودان علي الاطلاق وهي جدعة حجر من بيتنا الزمان وهسع ما بعرفو بقي شنو يكون روم قديم...نوع لمن طلل
بالمناسبة يا هشام حنتوب ماقريتي -- قريت فيها الثانوي اواخر الستينات -- قول صلاة النبي -- و هي تستاهل يكتبوها خمسين مرة مش مرة واحدة -- يعني كل ما تكتب تلاتة قرى تاني تقوم تكتب حنتوب بعدين حنتوب دي معاها توابع منهم التكيلات ما عارف نسيتها ليه
هشام العزيز صحي إنت كنت في تطوير القرى ولا في لجان كشوفات الناخبين ؟ قريتي هي ( قبة سليم الواقعة بين قريتى نلوة و أبوراقة جنوب جزيرة صاى و غرب صواردة و شمال قرية صلب ) تشكر
يا زوووووووووووووول والله ما قصرت وأنا أقول أنت لا كنت كمساري ولا سواق لوري أنت أكيد كنت شغال سلاكي (أيام خطوط التلغراف) وطفت المناطق كلها على ظهر بعير وفي أيدك العود الطويل أبو شعبة المهم أنا مبسوط لأنك ما فطيت قريتنا (كرمة) بس ما حددت وعشان ما يكون في زعل أنا أعدد ليك القرى على الضفتين شرق النيل من حفيرة، وأبته، كيد، والسرارية، وبيوض ،أرقو، الحضور ، الجلابة، ابو حجار، البرقيق، كرمة البلد، وادي خليل، كرمة النزل، كبرنارتي، وسقدان شرق، وأبوفاطمة، تمبس، كبدي، جزيرة بدين، جزيرة سمت ونرجع جنوباعلى الضفة الغربية للنيل السيال، أكد ، سروج، الحفير، مشو، بركية، دمبو، كيه، بنة ، مروارتي، موسنارتي، بلنارتي
يا راوية ركبتى كويسة ما عندها عوجة ، والظاهر ابوحراز بيتكلم مع زول تانى عندو مشكلة ركبة ، الله يشفيه ، يا ابوحراز حدد ، لأنى طوالى لمست ركبتى ، وقلت الجنا ده عايز يعوقنى ولا شنو؟؟؟؟
بكردفان ودارفور عزيزي هشام أرتال من القرى تحتاج لنفرة من أهل المنطقة لإحصائها منها على سبيل المثال وفقط على طول خط السكة الحديد وحوله :
الوساع أم كويكة سليمة الباح الله كريم دبرة الرجلة الزرقة أبو جفين أم نعام الهبيل جديد أبو ركبة أم دبيكرات الغبشة كدايس الفاوة الغبشة ودعشانا أم دم ود حامد العين النوى
إضافة لقرى أخرى أسماؤها لا تحتمل إيرادها على الملأ السايبيري
والله في البداية بقول زعلي على اهلنا الفي الشرق اروما وقر وبعداك بماانك ذكرت ام ضبان كان تحود على الشيخ مصطفى الفادني العيلفون ام دوم سوبا ( شرق النيل ) العسيلات ابو قرون
الرسائل والمقالات و الآراء المنشورة في المنتدى بأسماء أصحابها أو بأسماء
مستعارة
لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
