واحد من جماعتنا الله يرحمه كان حايم بين قرى حلفا في زيارة صديق وفي رجعتو زرتو ليك مطرة في الشارع قام أنكمد ليهو في بيت طرف حلة من الحلال ولي سوء حظة كان بيت واحد فقير (فكي) والمكان الدخلو دا كان مربوط فيهو مجنون وتعال شوف الجري داخل الغرفة والمساكاكا زولنا قلبو إنقطع وقدر من يبعد في ركن يحصلو المجنون أها الفكي سمع صوت الدفسي والرفسي قال يشوف الحاصل شنو لقى زولنا يرجف قال ليهو إنت منو والدخلك هنا شنو؟؟؟ زولنا قال ليهو خليني أنا منو والدخلني شنو إنت زولك المجنون دا طالقو في نجيلة ما تقصر ليهو الجنزير دا قطع قلبنا لا حولالالالالالالالالالالالالالالالالالالا
بمناسبة المجنون المطلوق في النجيلة ياخ في ناس بفتحو ليهم بوستات يطلقوها فينا ويفوتو إنتو قايلن دي دار البوستات والمسنين
ياخ أنا كان مالي ومال الشامبو بالله كل ما اسويهو يدخل لي في عيني يا ربي بسوهو كيف؟؟؟ أها بعد اسويهو بحتاج تاني أغسل راسي بالصابون؟؟؟ هو مكتوب عليهو (هيد آند شولدرز) يعني غسل الراس إلى الكتفين؟؟؟ ياخ والله اسع أدفقو
أها شفت الشاي بالبسكويت دا صراع براهو كان شلت جغمة مع ترمة البسكويت بتشتش لساني وكان قلت أبل البسكويت في الشاي الترمة بتقع جوة الشاي والله أسع أدفقو
الخواجة العجوز مسوي ليهو شريط ضاغط في ضهرو فوووق جنب الصدر والله تشوفو بي ورا تقول الراجل دا لابس ليهو ستيانة
أها نشوفكم
(عدل بواسطة بدرالدين شنا on 05-05-2006, 01:29 AM) (عدل بواسطة بدرالدين شنا on 05-05-2006, 06:44 AM)
05-05-2006, 01:25 AM
bayan bayan
تاريخ التسجيل: 06-13-2003
مجموع المشاركات: 15417
ضحكتني.. تذكر قصة ...... في حصة الازياء لما الاستاذة قالت اي زول يجيب خيط وابرة.. مشى ليها اخدها على طرف قاليها هيع انارزيقاتي و عيب الراجل يشيل ابرة..ولا يخيط... خياط دا بنسميه (حاجة ما مذكراها اسع) قامت قالت ليه بكل السقالة الشايقية بصوت عالي.. امشي شوف ليك ابرة وخيط بطل الكلام الفاضي.. قام جماعتوا* بكل فرح قالوا ليها اها دي ابرة وخيط... ادتها ليه وقالت امشي شيل القماش خيط الحاجة البتقع ليك جماعتو وقعوا ليه ستيانة.. يخيط ويبكي ويمخط لما المحاضرة انتهت...
*في اي فصل في المعهد في ناس جماعتوا ديل يدبروا في المقالب والسقالات على خلق الله...البدري دا كان من جماعتوا بتاعين فصلنا علا بعد حجة اسع راق..
دكتورة بيان يا دفعة سلامي لك وللأسرة الهنا والهناك
دائما مداخلاتك غنية وما شاء الله تتمتعين بذاكرة قوية وحقيقة باينة أن المعهد شكل جزء مهم في حياتك وكانت لك نظرة ثاقبة وواعية وفاحصة درستي من خلالها كل زملائك في المعهد وهذه النظرة والحاسة التي تتمتعين بها أكيد ساعدتك كتير في مجال تخصصك وأنا سعيد بذلك
Quote: في اي فصل في المعهد في ناس جماعتوا ديل يدبروا في المقالب والسقالات على خلق الله...البدري دا كان من جماعتوا بتاعين فصلنا علا بعد حجة اسع راق..
هوي أنا بقيت اصلي الصبح في الجامع
05-05-2006, 03:02 PM
Mannan Mannan
تاريخ التسجيل: 05-29-2002
مجموع المشاركات: 6701
ياشنا اعمل حســـــــابك زوجتي حلــفـــاوية والله تسمعك ياكا المداخل بيتنا وماتنسى انت جاي افتتاح العرض الاول صلح الكلام ده بسرعة انا لحدي بكرة ما بخليها تشوف الكاتبو ده ياشين ياثقيل تقول كان في حلفاوي اثقل مني ..قالوكحافاوي عجوز راكب في الدفار في طرف السلم برجل واحده واليدماسك بيهاالباب جاء واحد جاري محصل الفار عايز اركب وهو بصيح : الدفار ده ماشي وين ؟؟؟؟؟؟؟ الحلفاوي قال ليه لنفرض رايح بيتكم حتركب وين ؟؟؟؟؟؟؟؟؟
05-05-2006, 11:48 PM
بدرالدين شنا بدرالدين شنا
تاريخ التسجيل: 07-30-2002
مجموع المشاركات: 3514
Quote: ياشنا اعمل حســـــــابك زوجتي حلــفـــاوية والله تسمعك ياكا المداخل بيتنا وماتنسى انت جاي افتتاح العرض الاول صلح الكلام ده بسرعة انا لحدي بكرة ما بخليها تشوف الكاتبو ده ياشين ياثقيل تقول كان في حلفاوي اثقل مني
خلاس أنتهيت من شتات وقبلت علي أنا المسكين يازول ما تسوي لي مشاكل أنا الحلفاوين ديل برتاح ليهم شديد وخلني أحكي ليك قصة صاحبي الحلفاوي في مدينة صلالة كنا مجموعة مساهرين ونغني وكان هناك من يعاقر الخمر (حلوة يعاقر الخمر دي مش؟؟؟) المهم بعد الجماعة طشموا فقدنا العشاء لقينا مافي عشا فركب صاحبنا الحلفاوي مع واحد وحامو صلالة بي لستك كلب وجو راجعين بخفي حنين أها الحلفاوي قال ياخي لفينا ما خلينا صلالة الجنوبية ولا صلالة الشرقية ولا صلالة وسطى ولا (صلالة جاوزت) زاتو
عليك الله سلم لي على المدام قلت بالنسبة للعرض المسرحي تذكرة الطيارة رسلتوها لي ولا لسع مش الحكام ومراقب المبارة وديل برسلو ليهم تذاكر
والله يا سني ناوي أبيت في الدوحة في طريقي إلى الخرطوم أو في عودتي من الخرطوم
مشتهيك يا لذيذ
05-05-2006, 11:47 PM
بدرالدين شنا بدرالدين شنا
تاريخ التسجيل: 07-30-2002
مجموع المشاركات: 3514
- لماذا عندما تكون بطارية الريموت كنترول ضعيفة نقوم بالضغط بقوة على الأزرار؟؟ يعني كدا بنشحن البطارية؟؟ - لماذا نخفض صوت المسجلة أو الراديو بالسيارة عندما نشعر بأننا دخلنا بالطريق الخطأ؟؟؟ يعني كدا بنصير نعرف الطريق الصحيح؟؟ - لماذا نقول هدية مجانية؟؟ و هل يوجد هدية غير مجانية؟ - لماذا عندما توقف سيارتك في موقف خالي تماماً من السيارات يقوم السائق الذي يأتي بعدك بوضع سيارته بجانب سيارتك؟؟ يعني بيترك الموقف كله وبيوقف جنبك! - لماذا عندما يتأخر المصعد نضغط عدة مرات على الزر؟؟؟ يعني كدا بيحس على دمه و بيستعجل؟؟ - لماذا عندما تكون منتظراً المصعد و يأتي شخص آخر تجده يضغط أيضاً لطلبه؟؟ يعني مو شايفك بالمرة! - لماذا نفتح فمنا عندما نقوم بإطعام الطفل الصغير ؟؟؟احنا اللي ناكل و لا هو؟؟ - لماذا نشعر دوماً بأننا بحاجة إلى 10 دقائق نوم إضافية كلما استيقظنا صباحاً؟؟ - ليش لما بتكون قاعد بمكان عام وبتمسع رنة موبايل فورا تنظر إلى موبايلك .. ليه حضرتك كثير مهم لحتى يرن موبايلك بين كل هالبشر.
05-05-2006, 03:39 PM
jini jini
تاريخ التسجيل: 02-05-2002
مجموع المشاركات: 30716
بس سؤال ليه ارتبط الحلفاوين بعادة سب الدين ( والعياذ بالله) ويا ربى العادة دى هسى انتهت ولا لسة شغالة باقى طولنا بالحيل من طريق حلفا وصلتنى هسسى بالصدفة وانا بطالع هذا البوست نكتة عن الحلفاوين مرسلها صديق من داخل السودان بتقول حلفاوى استاذ فى السعودية الطلبة شابكنو يا عب يا سودانى وهو ما قادر يسب ليهم لانه فيها اعدام قام كتب فى السبورة الحصة دين وقال ليهم ده دينا ولازم نحافظ عليه لانو دينكم ودين ابوكم ودين الملك فهدودين السعودية
05-05-2006, 11:48 PM
بدرالدين شنا بدرالدين شنا
تاريخ التسجيل: 07-30-2002
مجموع المشاركات: 3514
Quote: بيان انتى حلفاوية واللا شنو؟ السقالة ام الثقالة؟ ذكرتينا الحلفاوى الرد على القاضى: ايوة انا متزوج مرة فسأله القاضى وهل فى حد متزوج راجل فرد عليه: ايوة.. مثلا خد عندك اختى فاطنة... قرقرقرقرقرقرقرقرقرقرقرقرقرقر الخ الخ الخ.....
منان the bored man
تعرف يا "هزاكسلنسي" عندي لعبة بتخيل الناس وشخصياتهم في البورد اها انت دائما بيتخيل انك راجل عندك حالة مستعصية بتاعة ملل.. ما عارف تعمل شنو. الايام دي شايفة شغال بي وكدا.. تصلح لي في لغتي مافي مشكلة سبويه ذات نفسو كان فارسي يعني عجمي,, تعرف يا "هزاكسلنسي" ممكن بشوية كدا تكون زول مرح شوية تفك الكرفتة وتسترخى وتنسى كلام انك سفير وكدا تجي تبقى زول عنقالي..تكتب عن "الاثارات" تفك الملل وتشاكس بيان التي تشكرك على انه نبهتها انه سقالة بالثاء زمني دا من اكلت الكسرة مو قريب قايلاها بالسين. الله يغز فيك العافية..برضو نكتتك حلوة شديد والرسالة وصلت تب مافي مشكلة اصحابي يتعاملو مع ذي خد عندك اختي فاطنة ..... ودا بيريحني جدا جدا.. عندما كنت طالبة نصحني زميلي ان اعمل منكير عشان لو حصل حادث ما يلمو كرعيني مع كرعين الرجال..
فتك بعافية ايها الرجل الذي يقتله الملل...
تنشيبة خلي بالك انا بهظر معاك يا هزاكسلنسي ما تقلبو جد
05-06-2006, 00:50 AM
almulaomar almulaomar
تاريخ التسجيل: 07-08-2002
مجموع المشاركات: 6485
أبو أواب الله يديك العافيه ويمسحك بي زيت عافيه ويديك قروش ما تقدر تحسبها وركشات بعدد شعر رأسك ويسلط عليك ناس الزكاة عشان ياخدوا حق الله وحقوقهم لأنهم من العاملين عليها ، وإن شاء الله يا بدر الدين شنا الله يبتلي بلدنا بأن يجعل في كل إقليم من أقاليمها واحد شين زيك - طالما الشنا بتعمل كده - عشان ينصلح حال البلد ويبتلي منبرنا هذا بثلاث على شاكلة بدر الدين شنا حتي يحلو الكلام. كتر خيرك كتر خيرك يا زهجان ومضحك غيرك كتر خيرك مع الإعتذار للشاعر الكبير الحلنقي
05-06-2006, 01:44 AM
بدرالدين شنا بدرالدين شنا
تاريخ التسجيل: 07-30-2002
مجموع المشاركات: 3514
أخي وحبيبي الظريف المتعة عمر سلام بعدد المسافات التي تقطعها وأنت تؤدي عملك الحلال الذي يقتات منه ناس أحمد وأم أحمد وإخوة أحمد
Quote: كتر خيرك كتر خيرك يا زهجان ومضحك غيرك
إنت عارف أنا بعض الأحيان بكتب بوستاتي كيف؟؟؟ بقوم أعاين في المتواجودن بالمنبر الآن ... مثلا أمس لمن كتبت البوست أعلاه عاينت لقيت شخصكم الظريف ودكتور بيان وبعض الزملاء اللذين لا أعرفهم عن قرب المهم قلت أنا أفك زهجتي في الإتنين ديل وبعد داك نشوف البحصل شنو .. أها ربك رب الخير فكيت البوست وبقيت أنتظر ساعة ساعتين ما عبرتوني بعد داك القلابة قبضت بيان قلت أخليها لغاية بكرة أها اليوم من الصباح لقيت العدد زاد وكل ما يزيد العدد زهجتي بتتفرق بين القبايل حتى جاء مقدمكم الكريم تتقدمه حروف زاهية ممتعة لا تخفى على شخص سوي
لك خالص حبي وريدي الذي لا يزاحمك فيه غير أولادي وأهل العوض
05-07-2006, 00:52 AM
almulaomar almulaomar
تاريخ التسجيل: 07-08-2002
مجموع المشاركات: 6485
إنت قايلني سيدنا يعقوب ولا شنو أخوة دي إلا جماعة سيدنا يوسف عليه السلام ونحن أخوان وبالمصري إخوات وأنا أون لاين 24/24 ساعة يومياً زي الأجزحانه وفي رواية أخرى الصيدليات المناوبه المهم ن شاء الله كل ما تسترق النظر أو تتاوق لي الناس المتواجدون في المنبر الآن تلقي أبو جهينه وقرجه وأب حراز وتظهر ليك شيري وأبكر آدم إسماعيل وأهل العوض وقرشو والرحمابي وتوما وبت قضيم وطارق جبريل وكل الحلوين في المنبر عشان تزداد لقاً وإبداعاً. === ما قلت لي دعواتنا الأهدرت كل باندوثات المنبر الحر في شأن إبنتكم غادة هل جابت نتيجه ولا الإمتحانات أجلوها بسبب زكمة الجداد ولا ما عاوز تعمل لينا عزومه أون لاين.
05-06-2006, 01:38 AM
ودقاسم ودقاسم
تاريخ التسجيل: 07-07-2003
مجموع المشاركات: 11146
بدر أنا عارف البوست لا يستهدف الحلفاويين ، بس كيتاً في شناتك دي كان أحكي الحكاية دي :
واحد ما بيحب الحلفاويين ، قام أخوه اتزوج حلفاوية ، وبعد فترة ولده اتزوج حلفاوية ، قامت زارته مرة حلفاوية لها علاقة صداقة بأسرته ، فوجدته يجلس على كرسي في ضل العصرية ، سلمت عليهو ، وقالت ليهو : أها يا ابراهيم طول عمرك ما بتحب الحلفاويين ، عشان كده قاموا الحلفاويين جوك جوّه بيتك ، أخوك عرّس حلفاوية ، وولدك عرّس حلفاوية ، بتفوت منّهم وين ؟ قال ليها : عليك الله خليني من نسوان الحلفاويين ، والله ما منّهم فايدة غير إنّهم بيتجلعوا بالرطانة ...
05-06-2006, 01:54 AM
بدرالدين شنا بدرالدين شنا
تاريخ التسجيل: 07-30-2002
مجموع المشاركات: 3514
الخال ود قاسم كيف حالك بالبنطلون؟؟؟ شكلك ظريف ايوا ودمك خفيف أيوا ياخ مشتاقين
Quote: عليك الله خليني من نسوان الحلفاويين ، والله ما منّهم فايدة غير إنّهم بيتجلعوا بالرطانة ...
ههههههههه بمناسبة يتجلعوا دي عندي نسيبي هلالابي شديد أها لمن الهلال يكون فايز تاني يوم يقول ليك آ جنا جيب الرادي النسمع عالم الرياضة والله الليلة تلقى عبدالرحمن عبدالرسول (جلَّع) ليك اللغة العربية دي جنس تجلِّع طبعاً عبدالرحمن عبدالرسول افضل من يكتب تقرير وتحليل للمباريات ... بس على شرط يكتب بس ما يتكلم
بمناسبة المجنون المطلوق في النجيلة ياخ في ناس بفتحو ليهم بوستات يطلقوها فينا ويفوتو إنتو قايلن دي دار البوستات والمسنين
بدرالدين الما شين
تحيات نواضر
حسه اشوف البوست ده متوجه بقدرة قادر ناحية الحلفاويين ... طبعامن منطلق الانتماء وكده نحنا الحلفاويين ديل بنطلع في سبيلهم مظاهرة .. ونقلب ليهم حكومة جبهة ووحدة وطنية ..شفت التعنصر ده كيف ؟؟؟ لووووووووووول وجه حلفاوي متعنصر لقيتني كيف .. استخدام جيد لمصطلحات البورد الثقافية .. عنصرية لاهلنا مباااالغة..
وفتك بعافية
05-06-2006, 03:03 AM
بدرالدين شنا بدرالدين شنا
تاريخ التسجيل: 07-30-2002
مجموع المشاركات: 3514
بيان قالت: عندما كنت طالبة نصحني زميلي ان اعمل منكير عشان لو حصل حادث ما يلمو كرعيني مع كرعين الرجال.. ليه اصلو كراعك ما بتتفرز من كراعين الرجال واللا شنو؟ ياخى صحبك بالغ.. قال الحلمنتيشى: القيردون يا جماعة كالقنفد الملتاعة مجهبز نضارة وساعة وراكن فى جيبه ولاعة ... الى ان يقول: فى زحمة الطريق شافه الكدمبس .... حتى الكدمبس عرف القيردون بينما صاحبك ما قدر يفرز بين (الكوارع) النسائية والرجالية واختلطت عليه (الكوارع) او (الكراعات) كقول بعض اهلى الاعاجم.. وعلى ذكر الكوارع قال صاحبى جاغوم رحمه الله:
الجدول الهيمان والضفادع والسير فى ميامن الشوارع والحب مثل شربة الكوارع لكنه فى بعضها مسيخ.. ... والقصيدة طويلة ولكنى اتوقف عند شربة الكوارع.. والتى ليس لها علاقة بكوارع البنى أدمين..
مع ودى لك يا بيان(ات)..
منان
05-06-2006, 02:57 AM
انعام عبد الحفيظ انعام عبد الحفيظ
تاريخ التسجيل: 12-07-2005
مجموع المشاركات: 8738
Quote: أها شفت الشاي بالبسكويت دا صراع براهو كان شلت جغمة مع ترمة البسكويت بتشتش لساني وكان قلت أبل البسكويت في الشاي الترمة بتقع جوة الشاي والله أسع أدفقو
عشان كدة يا أبوالبدور طول عمري ما شربت شاى ساخن .. بيبردوهو لى مع الشفع .. و أكتح الكباية على دفعتين تلاتة و أفرتق ..
05-06-2006, 04:23 AM
Muna Khugali Muna Khugali
تاريخ التسجيل: 11-27-2004
مجموع المشاركات: 22503
أها بقى ديل اصحابي شديد وأتذكر فترة المعهد كل جمعة بعزموني الشوايقة رحلات وبرقص معاهم بي إيقاعهم الجميل وكان عندي منهم شلة كبيرة في جامعة القاهرة فرع الخرطوم وأعتقد كلهم من منطقة تنقسي الجزيرة
ما مشكلة البوست الجاي يكون عن شوايقتي بقولكم
05-06-2006, 04:57 AM
عشة بت فاطنة عشة بت فاطنة
تاريخ التسجيل: 01-06-2003
مجموع المشاركات: 4572
سؤال لمن انت من الحلاوين مسمي نفسك شنا في شان شنو واحد قريبنا شغال في المطار جاء واحد صيني ومد جواز السفر فقال ليهو اسمك منو فرد ليهو في شان شنو فرد ليهو بزهج في شان ادق ليك تدخل لا جوة
05-06-2006, 09:58 AM
ترهاقا ترهاقا
تاريخ التسجيل: 07-04-2003
مجموع المشاركات: 8414
Quote: الجدول الهيمان والضفادع والسير فى ميامن الشوارع والحب مثل شربة الكوارع لكنه فى بعضها مسيخ..
اجمل مافي البوست بعد البدري ابنكنبة انه "هزاكسلنسي" فك الكرفتة بقى عنقالي يا له من عنقالي ختري عديل حافظ الشعر الحلمنتيشي,, نتمنى ونرجو بعد الارشفة تفتح بوست شعر حلمنتيشي من سنيين مافي زول فتح واحد.. خلاص اتفقنا؟ وقصة كراعي انها تشبه" الاثارات" مليانة ضريب وجريح من ركوب العجلات والوقيع من الحيط.. والنخل لاني كنت بقدر اطلع ودائما عندي مشكلة في النزول. عشان كدا عندي كلوكشان حق "اثارات" ودي لك ايوة فكها وخليك ظريف كدا نقدر نتفاهم..
05-06-2006, 11:40 PM
بدرالدين شنا بدرالدين شنا
تاريخ التسجيل: 07-30-2002
مجموع المشاركات: 3514
Quote: اها واحد حلفاوي شاف صورة بتك دي، قالوا ليهو: دي بنت بدر الدين شنا وفي السوق قال: والله دي الا يدوها دفرة بي رقشة والا كشك في سوق ليبيا حتى تتخارج!!!
مش بتي دي أنا دايرة سِّعاية أها شوف ليك زول يشرح (سعاية) دي وتحياتي لجميع الحلفاويين فأنا أحبهم وارتاح لغفشاتهم الحلوة
05-06-2006, 11:40 PM
بدرالدين شنا بدرالدين شنا
تاريخ التسجيل: 07-30-2002
مجموع المشاركات: 3514
معذرة ابوالبدور وزوار هذا البوست.. هذه رسالة موجهة الى اختى بيان(ات)
شكرا على إطرائك للحلمنتيش ودردشتك الحلوة عن (الكوارع) والطلوع فى النخل وعدم القدرة على النزول.. كان الحلمنتيشى يقف تحت السلالم وينظر الى الطالعين والنازلين والطالعات والنازلات من السلالم.. قال مرة: يا طالع السلالم قف واجمع البرالم فالحيزبون قادم وانظر الى البلوم من اسفل السلالم عوالم .. عوالم اشياء لا تقاوم يا طالع السلالم
وسأتيك ببقية القصيدة لاحقا.. المهم فى الامر ان ذلك الحلمنتيشى لم يراك طالعة فى النخل وإلا لكان عض سرواله وطلع ونزلك ولقال فى ذلك شعرا .. مشكلته انه كان متخصصافقط فى طالعى السلالم وليس طالعى النخل.. فى الاقاليم.. وسلامة الكراع من (أثارات) الخربشة .. عليك بالمنكير فانه يغطى (أثار) العدوان (سورى اقصد الخربشة).. بيان أخير: Is it boring مثل بيانات انقلاب الجبهة؟؟؟ إن من ال (بيان) لسحرا..... المرة الجاية ساحكى لك بالنوبى لآننى اجيدها اكثر من إجادتى للعربية.. وكنت اقول لصديقى الدبلوماسى من جنوب السودان انه سيجيء يوم نكتب فيه لغتنا النوبية فقد تعبنا من عنصرية العرب (السود) الذين يراقبون لحننا ولكنتنا ووصفهم لنا بالبرابرة.. هذا موضوع طويل وممكن نفتح ليهو باب بلغتك العربية عشان نستفيد من خبراتك يا (بيان) فانا اعجمى واقول مثل ذلك العربى الذى تهكم منه سيبويه حين قال: اكلونى البراغيث.. ومازالت بى لكنة تركت فى لغتى (أثارات).. ولكنها بعلاتهاافضل من لغة بيان الدارجية المكسرة والتى تحاولين تغطيتها مثل محاولة تغطية (كراع) مكشوفة ومزلوطة بفستان قصير.. حتى يطق الفستان!! مرحبااختى بيان.. إننى ادعوك الى ملف منفصل للمساجلة والحوار باللغة التى تريدينها وتحذقينها..وفى شتى المواضيع.. ومنكم نستفيد..
حاشية: انا صاحب فكرة هيئة حلمنتيش العليا فى جامعة الخرطوم فى مطلع السبعينات ومحرر صحيفة سلامات (أثارات) مع الدكتور محمد عبدالله الريح وانضم الينا كوكبة من الشعراء لاحقا.. وكنا عنقالة كما تقولين ثم التحقت بالسلك الدبلوماسى واحالنى نظام الانقاذ الظلامى للتقاعد فعدت الى العنقلة وهذا هو السبب واشكرك على هذه (ألاكتشافات الاثرية)..
نجي "لهزاكسلنسي" انا كل يوم بصلي بدعو وزارة الخارجية ترجع المفصولين تعسفيا عشان صاحبي "شرمة" يا رجع.. من الليلة حادعوا لصاحبي منان وشرمة يرجعوا ولدي صديق سفير معذباه بالسؤال هي انتو بترجعو "شرمة" متين؟ اسع تاني بجننو هي انتو حترجعو شرمة ومنان متين؟
سعيدة انك كنت في هيئة حلمنتيش العليا.. اتمنى لو فتحت بوست حكيت للجيال الجديدة عن الجامعة والاشراقات الفيها..
وذلكم الزمن الالق الجميل... باي لغة تختارها بس رسل لينا دكشنري نوبي. ويستحسن تعمل فوت نوت في ناس بتكره الدكشنري.. تعرف انا زوجي اعجمي من قريب عندكم اها انا طوالي مسطحة في لماتهم التي تدار بلغتهم.. ما علينا بعد الارشفة نعمل بوست حلو ان شاء الله ومودتي لك..
05-06-2006, 02:32 PM
معتصم دفع الله معتصم دفع الله
تاريخ التسجيل: 12-18-2003
مجموع المشاركات: 12684
اسه برضو داير ارد على اسئلة الاسئلة الجابها الاخ عاطف عمر
Quote: - لماذا عندما تكون بطارية الريموت كنترول ضعيفة نقوم بالضغط بقوة على الأزرار؟؟ يعني كدا بنشحن البطارية؟؟
لا ، بس لمن تضغط بقوة بتدى التيار فرصة اكبر فى المرور لوقت كافى.
Quote: - لماذا نخفض صوت المسجلة أو الراديو بالسيارة عندما نشعر بأننا دخلنا بالطريق الخطأ؟؟؟ يعني كدا بنصير نعرف الطريق الصحيح؟؟
لا ، بس احتمال الزول القاعد جنبى او فى الكرسي الورا يكون عارف الطريق و لمن الصوت يكون عالى قطع شك ما حاسمعو
Quote: - لماذا نقول هدية مجانية؟؟ و هل يوجد هدية غير مجانية؟
فى هديا ما مجانية طبعا، و هى تلك التى تكسبها فى العاب النيشان و الحرفنة لانك بتدفع و حسب حرفنتك بتكون جائزتك
Quote: - لماذا عندما توقف سيارتك في موقف خالي تماماً من السيارات يقوم السائق الذي يأتي بعدك بوضع سيارته بجانب سيارتك؟؟ يعني بيترك الموقف كله وبيوقف جنبك!
عشان لازم العربية تكون واقفة بين الخطين الابيضين، و لمن يوقف جنبك بيكون الموضوع اسهل لانو القياس بيكون اسهل بالطريقة دى
Quote: - لماذا عندما يتأخر المصعد نضغط عدة مرات على الزر؟؟؟ يعني كدا بيحس على دمه و بيستعجل؟؟
لا بس فى احتمال مع تكرار الضغط، المصعد يطنش الوقوف فى المحطات الاخرى
Quote: - لماذا عندما تكون منتظراً المصعد و يأتي شخص آخر تجده يضغط أيضاً لطلبه؟؟ يعني مو شايفك بالمرة!
الحقيقة دى بتحصل لى كتير، اجى و القى زول واقف و ما دايس الزر، ما عارف منتظر شنو
او مرات بيكون بتكلم فى التلفون ، فاقوم ادوسو انا
Quote: - لماذا نفتح فمنا عندما نقوم بإطعام الطفل الصغير ؟؟؟احنا اللي ناكل و لا هو؟؟
الاطفال بيتعلمو عن طريق المحاكاة، لمن تفتح خشمك هو برضو بفتح خشمو
Quote: - لماذا نشعر دوماً بأننا بحاجة إلى 10 دقائق نوم إضافية كلما استيقظنا صباحاً؟؟
النوم سلطان
Quote: - ليش لما بتكون قاعد بمكان عام وبتمسع رنة موبايل فورا تنظر إلى موبايلك .. ليه حضرتك كثير مهم لحتى يرن موبايلك بين كل هالبشر.
حسب المكان العام، احتمال مستشفى ، عشان كده بتعاين عشان تخلى الموابيل على
خاصية الصامت، و بعدين اسه كل زول رنة بتختلف عن التانى ، و نسبة تشابة الرنات
اقل من 20% ، عشان كده اعتقد الناس بطلت الحركة دة
05-06-2006, 04:59 PM
sadiq elbusairy sadiq elbusairy
تاريخ التسجيل: 07-30-2005
مجموع المشاركات: 670
و الله يا بدر لمن قريت العنوان قلت بدر سيكشف لنا عن سر التسمية رغم اني و بدون مجاملة بقول الزول السمح ده سموه شنا ليه لقيت عزاء في انه عادة السودانيي بيقلبنوا الكلام ( و الله سمح لمن غلط ...و على هذا النحو قلت يكون سموك)
و لا راي الاخوان المتداخلين شنو ما بتتفقوا معاي
اخوك الصادق البوصيري
05-06-2006, 05:07 PM
Muna Khugali Muna Khugali
تاريخ التسجيل: 11-27-2004
مجموع المشاركات: 22503
مش أنا إسمي بدرالدين كان جبت لي ولد بسميهو صلاح الأمير مبروووووووووووووووووووووووك وعقبال الأهلة اليوم لك حبي وقول لي راكوبة يلحقني بالمعلوم إن شاء الله في المسنجر
05-07-2006, 05:28 AM
بدرالدين شنا بدرالدين شنا
تاريخ التسجيل: 07-30-2002
مجموع المشاركات: 3514
المتعة عمر حبيبي العتب على النظر المداخلة دي ما شفتها قبل الحين
Quote: ما قلت لي دعواتنا الأهدرت كل باندوثات المنبر الحر في شأن إبنتكم غادة هل جابت نتيجه ولا الإمتحانات أجلوها بسبب زكمة الجداد ولا ما عاوز تعمل لينا عزومه أون لاين.
البنية أمتحنت تب وراجيين النتيجة قالوا شهر ستة شكري وتقديري على إهتمامك وسؤالك
05-07-2006, 05:38 AM
Tumadir Tumadir
تاريخ التسجيل: 05-23-2002
مجموع المشاركات: 14699
حبيبتي تماضر البركة فيكم يا بت أمي وأنا المرحوم دا بكون شفتو قبل كدا لأني مشيت معاكم بيتهم في القضارف لكن الرقيص في الوكت داك ما خلاني أشوفو كويس عشان هو نام بدري وما حضر الحفلة بس أتأكد إنو الجزارين والطباخ جو وأداهم العدة والشوالات وبعد داك نام الله يرحمو ويغفر ليهو وأنا وجعني شديد لأنو أنا لغاية اللحظة دي قايل روحي ولدكم
******* بدر .. الشوق علينا اذداد .. والسكتة شينه.. لية سوحت ابراهيم.. لمتين مشينا.. .............. ............ (من المديح).
انة لمن محاسن الصدف ان اكون هناك .. في ذلك اليوم ..واكون لهم بالمرصاد .. الخواجات اصحاب العيون الخضر.. ديل يسرقوا الكحل من العين.. لقد كشفت السرقة وقيدت بانها سرقة ادبية.. والسرقات الادبية في القانون السودانى مافي .. وما ظنيت ليها مكان .. اصل الحكايه صديقى .. هو موضوع الشنا .. وذى ماانت قلت .. عن شناتى انا بقول لكم.. ويلا صفقوا كلكم.. .... يتبع ....
****
05-08-2006, 01:39 AM
bayan bayan
تاريخ التسجيل: 06-13-2003
مجموع المشاركات: 15417
مافي اي مشكلة الله يحت اهلي حت البرم يعدمهم نفاخ النار ما بنفضحك* كان قصيت قصة عن شناتك مخالفة للحقيقة انا والسني دا حنسكت رغم انه السني دا هو السبب في الاسم ..
نحكي حاجة عن بدر الدين.. زمان لما كنا في سنة تانية كنا بنمتحن في مسرحيات عصر النهضة.. المهم قامت في شلة من اولاد فصلنا "غررو" ما يدخلو في مشهدهم اي انتاية اها البروفات حقتهم كانت في الداخلية.. قامو اختارو مشهد على ما اعتقد من مسرحية هنري الخامس(هى ما متأكدة المدة طالت ما يجي زول يغالطني) مشهد منظف المداخن الادعى عنده دم ازرق وعايز يثبت حقو في العرش ولامي شلة صعاليق. اها كان دور منظف المداخن دا ادوه لمحمد محي الدين اكبر صعلوق في الفصل.. بس عمر السنوسي اقل منو بشوية قدر النملة( الاثنين من مدني بتكون عرفتو سر الصعلقة ) المهم يوم البروفة الاخيرة جو لابسين هدومهم العادية قالو دورهم دون اشراقات ذات بال... يوم العرض كبسو الازياء. لبسو وركبو البواريك طبعا كانت بنطلونات عصر النهضة التحت الركبة المنفوشة ديك المهم عشان يطلعو صعاليق بالجد لبسو لبس عجيب وعملو عمايل.. يلا اتنافسو في العوارة و"العضارة"* اها ان انسى لا انس اللبس الاختارو البدري. الصديرية لونها بمبي وسكر سكر( كان اهلو اقامو الحد عليه لو شافو) والبنطلون برتقالي وكرعينو قوسين الساق تصيح لساق.. بعدين زيادة في العضارة ربط راسو بشريط سيتان مدلدل بشراشير بمبية.. دورو في المشهد هو اثارة همهمات الاستحسان والرضا والاعجاب بين الجماهير في خطبة منظف المداخن المفوهةز وعشان تكون همهمات كثيرة كان عليه الجري من هنا لهنا. بعدين هو اضافة منه للعضارة عامل فيها اعرج. بكراع مقصرة. متخيلين ردا وكرعين قوس واحدة مقصرة؟ كل الحاجات دي استدعت نقلي الى المستشفى بالازمة واعطائي حقنة "امنويمفيلينق" ومن الضحك ما قتل والله يجازي الكان السبب..
البدري نفتو؟ لو قال نفتو حنسالو من اول حب ليه في المعهد... قرقرقرقرقرقر
الحليفة المفضلة للبدري قبل الحج اي عندما كان من ناس جماعتو * كلمة عضارة هي كلمة معهدية تقبل كل اللتصريفات اللغوية.. وتعني العضارة
05-08-2006, 02:17 AM
فيصل محمد خليل فيصل محمد خليل
تاريخ التسجيل: 12-15-2005
مجموع المشاركات: 26041
صديقتي ودفعتي التي بها افتخر د. بيان سلام وشوق بحر
Quote: اها ان انسى لا انس اللبس الاختارو البدري. الصديرية لونها بمبي وسكر سكر( كان اهلو اقامو الحد عليه لو شافو) والبنطلون برتقالي وكرعينو قوسين الساق تصيح لساق..
شديتك فوق الله آ بيان غايتو ما شاء الله بي ذاكرتك دي يوم بتكتلي ليك زول
أها وقصتي بتاعة الشنا الحكيتها للصادق البصيري دي ما أقنعتك تكوسي لي في قصص غيرها؟؟؟
05-08-2006, 02:22 AM
بدرالدين شنا بدرالدين شنا
تاريخ التسجيل: 07-30-2002
مجموع المشاركات: 3514
بدرالدين الحلاوى الاحلى من الحلو زميلنا بالمكتب حلفاويا لسانو طويل قال لى قريبك دا وكت شين لزوم كشف الحال شنو ملصقها فى اسمو وحلفنى ابلغك ليها قريبك من ناس ابوفروع
قريبي المن ناس ابوفروع محمد أحمد سعيد سلامي وإحترامي وتحياتي لأهل أبوفروع وأخص منهم بيت عبدالقادر النويري وزوجته صلحة وولده فضل الله أتمنى كل من ذكرت يكونوا بخير لأن عهدي بهم قبل أكثر من عشرين عاما
Quote: زميلنا بالمكتب حلفاويا لسانو طويل قال لى قريبك دا وكت شين لزوم كشف الحال شنو ملصقها فى اسمو وحلفنى ابلغك ليها
بالله بي حليفتها كمان؟؟؟ خلاص ببلغا براي بس أديني موية أبلغا بيها تحياتي لكل الحلفاويين
05-08-2006, 12:49 PM
sumah sumah
تاريخ التسجيل: 08-27-2002
مجموع المشاركات: 1737
بدر .. الشوق علينا اذداد .. والسكتة شينه.. لية سوحت ابراهيم.. لمتين مشينا.. .............. ............ (من المديح).
انة لمن محاسن الصدف ان اكون هناك .. في ذلك اليوم ..واكون لهم بالمرصاد .. الخواجات اصحاب العيون الخضر.. ديل يسرقوا الكحل من العين.. لقد كشفت السرقة وقيدت بانها سرقة ادبية.. والسرقات الادبية في القانون السودانى مافي .. وما ظنيت ليها مكان .. اصل الحكايه صديقى .. هو موضوع الشنا .. وذى ماانت قلت .. عن شناتى انا بقول لكم.. ويلا صفقوا كلكم.. يقول الراوى ... شاهد عيان... اتمدد القرع.. في كل المزارع والشوارع .. المدارس بدأت الرحلات لمزارع القرع .. ويااللا ياولاد المدارس ارسموا القرع ولونو.. والناس تروح مزارع القرع تاخد حبة وتطلع .. وقرقروا.. وخرموا .. وزينوا .. دى شنو العملوا فيهو كدة دى .. دة القرع ... ومن يومها.. والصين تصدر ملايين القرع البلاستيكى الى امريكا... ................... يتبع..........
****
05-08-2006, 11:28 PM
بدرالدين شنا بدرالدين شنا
تاريخ التسجيل: 07-30-2002
مجموع المشاركات: 3514
ما تسمعوا الكلام دا. البدر اسم على مسمى. يوم خطوبتو اتنين من بنات الحلة جابوهن من الكنار دايرات ينتحرن لانه املهن فيه ضاع. واحدة لى هسع بايرة وخلت العرس بعد ما راح منها البدر. دا غير الكانن بموتن فيه لكن دافنات الريد فى جواهن وما معروفات كم. وبعد دا يقولو شنا؟ اريتها شناتى وشنات عرسان بناتى
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
بدرالدين شنا
bayan
Mannan
محمد سنى دفع الله
عاطف عمر
jini
عاطف محمد أحمد زكريا
Mahmoud Mustafa Mahmoud
Mutwali Malik
almulaomar
ودقاسم
انعام عبد الحفيظ
اساسي
Ehab Eltayeb
ابو جهينة
Muna Khugali
عشة بت فاطنة
Dr. Moiz Bakhiet
Hisham Ibrahim
ترهاقا
معتصم دفع الله
محمد الامين احمد
sadiq elbusairy
sumah
Tumadir
manubia
عبدالكريم الامين احمد
فيصل محمد خليل
Mohammed Ahmed Saeed
المعتمد
فيس بوك
تويتر
انستقرام
يوتيوب
بنتيريست