أولا الدجاجة البيمعط فيها المتعافن دي أكيد تم فحصها مليون مرة وأكيد ما دجاجة زي الدجاج التاني. تانيا الزول دا أكيد إما هو وإما قريبا ليهو عندو شركة إنتاج دواجن وخايف على السوق أكتر من خوفو على صحة الناس. وهذه المسرحية البايخة سبقه إليها عضو مجلس شعب مصري حيث أخرج قطعة دجاجة من جيبه وأكلها تحت قبة البرلمان وتاني يوم المرض قرض الدجاج المصري كلو وتوفي عدد من الناس.
فهل يحاول المتعافن أن ينكر وجود انفلونزا الطيور في السودان أم يحاول أن يروج لسوقه.
خليهو يا لؤي اليمشي ياكل بوش لمدة ستة أشهر ويجي يقول البوش ما بيسبب فقر دم. وخليهو يمشي يشرب من موية الثورات لمدة ستة أشهر ويجي يدعي إنها ما بتسبب فشل كلوي. وخليهو يمشي يسكن في أمبدة أو السجانة تلاتة أيام فقط ويجي يقول بعوضة السودان ما قاعدة تسوي ملاريا بس بتدغدغ الواحد عشان ينوم.
بعدين هو منو القاعد ياكل دجاج في السودان قول ليهو يا وهم؟؟؟؟؟؟؟؟؟؟؟؟؟؟ والله بس يشوفوا في الشوايات ساكت ويتصوروا جنبو.
والله يا جماعة كان ترضوا كان تابو عبدالحليم المتعافي افضل من مرّ على الخرطوم من الاستقلال .. لكن برضوا حاسدك على الدجاجة دي ..!!اخخخ الشطه كيف كانت بالله ؟ ياخ لما تجي تمشي الخرطوم2 عشان تاكل ليك نص دجاجة استعداداتك بتبدا قبل ثلاثة ايااام ..
Quote: بعدين يا حرامي القاعد ياكل جداد منو في السودان ال90% من شعبو بيأكلو بوش
صدق أنا زاااتي كنت بقول كده، لحدي ما بقيت أمشي السودان سنوياَ!، اغترابنا في الخليج كان يميزه لوقت قريب عن السودان (الجداد) راح في حق الله!، وبقى اغتراب أوانطه بس اطرف تعليق سمعتو ، إنو جداد الكيزان مابجيهو إنفلونزا
Quote: صدق أنا زاااتي كنت بقول كده، لحدي ما بقيت أمشي السودان سنوياَ!، اغترابنا في الخليج كان يميزه لوقت قريب عن السودان (الجداد) راح في حق الله!،
القال ليك أنا قلت جداد في السودان مافي منو، لكن يا سيدي البقدر إشتريو منو، و البقدر يمشي سوق نمرة إتنين عشان يشتري الجداد منو؟؟؟؟؟؟؟؟؟، دكاكين الحلة دي قفلت ولا شنو؟ و البوش ده 90% من الشعب السوداني بيأكلوا فيو غصب نسبة للنهب و الفساد الصاحب ديكتاتورية مجرمي الحرب دي.
يا لؤي عمدة باريس المتعافن الحرامي الفاسد ده و نظامو هم اسوأ من حكم السودان منذ المهدية نسبة للفساد و السحل و التطهير العرقي و الإغتصاب و القتل تحت التعذيب و الفصل من الخدمة المدنية. و المتعافن حرامي حرامي أكان تابا إنتا أكان ترضى.
. غايتو عقليات الحكام عندنا تعيسة الهسي و الزمان أذكر أن حكومة الديمقراطية التالتة ناقشت موضوع صعوبة المواصلات و تأخير الموظفين عن العمل بناء على ذلك أها قام وزير أخو بنية قال عاوز يركب المواصلات دي تضامنآ مع الشعب تحرّكت فورآ عربتا تغطية أمنية و مشّـطـت المحطة الوسطى أم درمان قبل وصوله بنحو ساعتين ثم جاء ركبه الميمون مصحوبآ بأربعة جنيات آخرين راكبين عربية براهم برضو صعد اثنان أمامه و اثنان وراءه و خلقوا له ملاذآ آمنآ ليصعد البص و سط فلاشات الصحافة و كاميرات التلفزيون و قبل و بعد البص كانت تلهث سيارات الدولة و موظفوها للمتابعة! ياخ دة تفكير بائس
واحدة تانية؟
البشير مستعجل لمشوار لاحظ انو الكوبري لمن يكون ملخبت الزمبارة لا تجدي ..لأنو الناس من عدم ذوقها لا تسقط في الماء لتترك له فرصة المرور فقام مشى بالهيلوكوبتر..داخل الخرطوم هه هسع المتعافي دة بلغوا خبر الإصابة و الفراخ مات فقال الحل كدة؟ وسط اللحم الدجاجي متصور! ياخ ناسنا ديل تحف .
ياإخواني أنظروا إلي نصف الكوب المليان . ليه مانقول : ـ في ثورة الإنقاذ من إحدي إنجازاتها وفرت الدجاج بسعر 2500 جنيه فقط
.............................................................................................. مطبوزة:ـ بغض النظر عن الوسيله,المهم الغايه!!!(وجه ضاحك أو باكي -علي كيفكم)
.....أكلها نئية أم" نجيضة" ??? هذا المرض يصيب من يتعامل مباشرةمع الطيورةالحية.... وليس هناك ضررمن أكل طيور جيدة الطهي..... أذا أستعراض المتعافي الأعلامي هذا لاينفي عدم وجود مرض كما أنه لاينسحب علي الطيور الحية مكمن المرض الأساسي... هذا الرجل يوجه رسالة في غاية الخطورة يستخف فيه بهذا الوباء وينسف مبادئ الوقاية وأخذ الحيطة والحذر مما يعرض أرواح من يتعاملون مع الطيور بشكل مباشر للخطر..... أي عقلية يتعامل بها هذا الرجل? كمال
في حد بيسرق سفنجة وملاية وفي حد بيسرق خروف السماية وفي حد (لو تصدق) بيسرق ولاية وديّ القضية.. إن يلتهم المتعافي (الاسم سالم) دجاجة.. ما مشكلة المشكلة إنو يلتهم ولاية.. ليه الكاميرا عجزت من تصوير الأشياء التانية التي التهمها المتعافي؟ وبهذه المناسبة أهدي المتعافي أغنية (يا جدادتي كاك) لأنها تتناسب مع ذوقو وأقول ليهو محل ما يسري يخري (بكسر الياء وسكون الخاء) لكن يا لؤي بوستاتك دي حاتودينا في ستين ألف داهية..
* بعد دعوة الوالي للصحافيين لأكل الدجاج.. ولكون انهم استجابوا واكلوا.. فقد قررنا التغني لهم على نسق عجبوني الليلة جوا.. عجبوني رجال الصحافة أكلو «الجيكن» بي لطافة كملوا الذوق والظرافة والمتعافي القيافة دقسُن بكل حرافة
Quote: هذا الرجل يوجه رسالة في غاية الخطورة يستخف فيه بهذا الوباء وينسف مبادئ الوقاية وأخذ الحيطة والحذر مما يعرض أرواح من يتعاملون مع الطيور بشكل مباشر للخطر..... أي عقلية يتعامل بها هذا الرجل?
ممكن تكون استثماراته الواسعة المتعددة شملت الدجاج كماااااان ؟ استخفاف ولعب وضحك إلي متى متى أصبحنا نأكل اللحوم البيضاء أو الحمراء أو حتى الخضراء حتى يظهر لنا هذا وهو يلتهم الدجاج ؟؟ كفااااااااااية يرحمكم الله
الرسائل والمقالات و الآراء المنشورة في المنتدى بأسماء أصحابها أو بأسماء
مستعارة
لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
