يمه ما عرفتيني ده انا الصادق!

Quote: بسم الله الرحمن الرحيم مسدار نيالا 1. يا ميدير سلام ما في الغمام ساسيتــــــي 2. تمانية ونص على سرج السحاب شديتي 3. قمتي مباركة وبالوكرة ما اتسميتـــــــي 4. يا الشايلة الإمام مع صحبه جيدا جيتي 5. شايلة نيالا يوم عرفة العظيم حجيتـــي 6. بسم الله الرحيم غربا صعيدو مشيتـــي 7. بي غصة حلوق بي حسرة فيك حلّيتي 8. بي عزما صميم بي فكرة فيك نويتـي 9. حداشر دون تلت يا السمحة جت ركيتي 10. اتلمّوا الصحاب كالدايرة لما دنيـــــــتي 11. قرنوا بياض بياض المتلو قط ما رأيتي 12. بياضا في التياب والنية بيها صفيــــتي 13. يوم موكبنا قام من المطار بي شوقو 14. رفرفت العلام من حولو أو من فوقو 15. لمّوا على الإمام الصح بدرّج سوقو 16. أدوه التمام من كل لون وعروقــــو 17. أخضرو جاه وأحمرو وأصفرو وزروقو 18. الخيل جقلبن ضاقن تمـــــــــام من زوقو 19. القول انسرج موزون وما مطلــــــــوقو 20. إرجاف الهرج في لحظة صار مفلــوقو 21. يا الترفي الوطن من توبه المفتــــوقو 22. من قيد العرق واللون تكسّر طـــوقو 23. تديه الأمان بي فكر طيّب ضوقــــو 24. ساحة المولد الشتلت تنمي عروقــو 25. قوم حيي الكرام عب الوطن نفضوه 26. من كل الإحن والشين عشان ينضوه 27. التني لو مضى ما ماضي ما يمضوه 28. سودان الجميع شرط الجميع يرضوه 29. خمسين في العدد جوهر أحاط بالدرة 30. صادق العزم واسط عقدو نجم مجرة 31. يظهر في نيالا الحين يعيد الكـــــــرة 32. بلد الأكرمين خيرم مرق وانشـــــــرّ 33. بلد الروح حباب بلدا تحق الشكـــــرة 34. للمهدي الإمام صدقوا العهد والنصرة 35. حباب بنيالا كان بمرادنا نحتل مـــرّة 36. ما قالو الحلو من عندو ما بنـــــــنترّ 37. كان زايرك زمان يلقى الثغور منفرّة 38. والطقس البديع من فيضك يلقى مسرة 39. غابة النيم هناك بين الأرائك مرة 40. أو في وادي بارلي يفوت يزيل الحرّة 41. ما كان البكان فيـــه الصقور في كرّة 42. والحال المريع في جيدك الشوك جرّ 43. قطع الليم وأرحامـــــك ضغاين مرة 44. وإبليس فيك تملــي يغز بذور الضرة 45. الزاير دحين من كلمـــــى لي أخواتو 46. دار النازحين بقى دارك أبـــدى سماتو 47. دار ناس التروبس القالو هم حمـــــاتو 48. ما حمو دارو بل زادوه فرح شمـــّاتو 49. في نيالا بنشوف الليلة صف ثكـــنــــتهم 50. وقولا مر مر عن فعلهم وصـــفـــــــتهم 51. اعتدا للنسا وفي السوق نشر خمــــرتهم 52. عدمــان من يضوق حين الفزع نجدتهم 53. ما بحموك ناس الاتحاد لو كترو 54. ما بحميك قط إلا البشيل في دبرو 55. من رايو الوسيع من كل غميسا خبرو 56. عبي وشمّري وحوشي الجهال الشبرو 57. في الفاشر طفوا المعنى البليقلك جهرو 58. دلّكو ساق زعيط ومعيط وكتّرو شكرو 59. جامع قالو والاسم انتفـــــض من ذكرو 60. دة الشين البحق لي كل نبيها نكـــــرو 61. دارفور ابتقوله جنقور في فاشر ولا عنده راي 62. غيّب لا جنايا وجيـــــــــــــــــــّب لا الضاراي 63. زوّر لا إرادتي وبنقـــــــــــــــــــض لا عراي 64. تشيف إما خزيتا عقدت لقـــــــــــــــــاي براي 65. مساء الوقفة أمسى بعابدين كم نالوا 66. في عرفة الجميع في الله صالوا وجالوا 67. في نيالا النوال من الله ليهم كالوا 68. ناس المؤتمر فاتحة فلاحهم شالوا 69. مبروك مؤتمر أحبابنا جلب الغبطة 70. في يوم السعاد عهد النحس فيه فطّ 71. الفتح المبين والغيث بدايتو النقطة 72. الباغي انتبه في عينو نترت شطّة 73. تبلدية الخريف ورقك يضلل لامي 74. وبرهان الرضا المن كل زينا تامي 75. إن حتاك صيف ساقك غليد متسامي 76. وضلك بالدوام يرجع يكون مترامي 77. قاموا يطاولوك ناس حسكنيت والقشة 78. ويوم الانتخاب كاسوا الكري والغشة 79. زوروا مافي زور غيّر حقيقة الركشة 80. وقطعا غير شكك للهينو هي بتنكشّ 81. الباع النفس بي ضيقة ما بنهشّ 82. والمبلول قبل ما ضرو عاد بالرشة 83. سبلنا العمل والروح زرع للحشّ 84. ليك يا المنجلك حرت الوطن ما تشّ 85. مرقت نجالا ليك كبـــــــّـت حليب أجواد 86. وميدان الهــــــــــــــلال بقى لبنة ما استاد 87. جيت في موكبك بين خيل تجول في جواد 88. وسمعوك بالقلـــــــب في عيد طبف أعياد 89. كبكب من تلس من كاس ومن تمبسكو 90. سيلا من برام زالنجي يصعب مسكو 91. فاشر وأم دخن وضعين منو بيحبسكو 92. قاصدين بلة الشوق للبيوصل نسكو 93. المــمــــــرور بقول قولا مشلّع وبالي 94. قال ما بفهموك من كونو لهجك عالي 95. الحضـــر الفهم في فمو من يا الحالي 96. غيـــرك والطرب هز العقول متوالي 97. الحكــــــــامة قالت من كلامك قولا 98. وقعت الفهم والناس جميع يصغولا 99. الهداي هدا وقـــــال العقول مشتولة 100. في القول اليــــحل بقجا يمحن دولا 101. قالوا يمسخوك بالشتمة والطعــــين 102. وقط ما بنج خوك البفدى ليك العين 103. مداهم رخوك وكتين يسموا سعــين 104. وظنوا بيلبخوك كتل البليم ولعــــين 105. الجاتو الملاريا المر بمر في ريقـــــــو 106. والبصرو انعشى ما بشوف عوج لطريقو 107. المنكر ضلام روحو الغمل لي فريقـــو 108. حين يسفرصباح لي قلبه يلوي حريقـو 109. بنشوفك فجر ضواي ونرجى سناه 110. بنشوفــــك درب لي الله يوت سرناه 111. الســـــــام النفس في الله شتّ جناه 112. بعــــرف كرفتك في الله تبقى مناه 113. ما بعرفوك ناس السلطة والدرهم 114. وما بعرفوك ناس اللجلجة التوهم 115. ما بعرفوك ناس قلبا حجر وأدهم 116. بيعرفك البراك لي النايبات مرهم 117. ناس خلطو الدسم بي سم وقالوا نصـــــيحة 118. وناس زردوا الوهم في راس ملايتو نبيحة 119. ناس عدموا الفهم بالمرة عدمة صحيحـــــة 120. وناس الله ختم قلبا سمع وقريحــــــــــــــة 121. ما بتهاتف السيم لو شراها الشــــــاري 122. بتدور الجهاز مشحون رصيد وبطاري 123. خلقة ربكم معروفة ليك يا الــــــــداري 124. لو عدمت مدد مولاها قطعـــت طاري 125. ناس بيضة أم قطيطي لقوها عاد في اللفة 126. العد ابتـــــــــدا وفي حيرة راسهـــم لفّ 127. كان شالوها لاهـــــــاي السجن والمنفى 128. وإن خلــــوها دك صدام وباقي الوصفة 129. ما بولاها غير التجدة ليه الحرفة 130. أداهم دبار لبلدنا كايس صرفة 131. حزبا من نشا لي وطنو عاشق يلفى 132. أدوه الصدود باكر تراب السفــــــّة 133. حزب الأمة هو القنديل يزيل البلفة 134. سيد خايل التياب والعمة سمحة لفة 135. سيد خير النسا سيد القلوب مؤتلفة 136. سيد همة وعزم والحكمة ثم العرفة 137. حزب الأمة جد يا أمة ليك المرفا 138. أديه القياد خلي الودار والجلفة 139. ناس سومة بلد حرقة حشاك والكلفة 140. ناس نهب الجيوب تش القلوب والأفة 141. أفضل يا نجقل تاخد معاش بي زفة 142. جنقورك قديم ما نافعو شاطر الرفّة 143. البـــــــلع الجغم ما بتبقى ليه التفة 144. في يوم الحساب رد الحقوق والسلفة 145. أفضل يا دقل خلي الفـــــوارع يلحقو 146. جنقورك كما الأسمال مواصل خرقو 147. البلع الجغم مخنوقبـــــــو في ود حلقو 148. في يوم الحساب ما بلفى بنكك حرقو 149. النـــــــــــدوة ابتدت في الساحة مالية ربوعها 150. جمعا واقفــــــــــــــة أو فوق الأرض مربوعة 151. واحدين في الكراسي وأخرى في حديد كوعها 152. يسمعوا في الحديــــــث اليهدي للناس روعها 153. النــــــــــدوة التلم كل الوطن مجموعة 154. من كـــــــل الفصايل تردا من ينبوعها 155. ناس الأمـة تسلموا يا التفرهدوا نوعها 156. تطربوا للمخالف حين يحش مشروعها 157. لونتو الكلام من كل بستان زهرة 158. هادين نيرين بالنصحة ما بالنهرة 159. النسا نصفكم في الشيلة أو في الجبرة 160. والمسك الختام قاد العقول لي سكرة 161. جوكم زي عجول مشتاقة لي أماتا 162. واصطنتو التقول خلقة بكم صمّاتة 163. كلمات للوطن ما مطعنة وشمّاتة 164. لي جوّا الجوا جبّارة ما شحّاطة 165. أحباب الإمام الدين دوام بجــــــــــلوه 166. نزلوا على العديل ساري العوج بدلوه 167. الفتنة أم قرون شيطانا تب قرنــــــوه 168. دارفور في سلام لو قولكم انتو جنوه 169. تالت العيد نشوف قلعتنا من تيرابنا 170. شتلتنا الحنين في عروقا دفّق صابنا 171. يا دارفور نعــــــود لو مد لينا كتابنا 172. ولو قدر البعاد طوّل بطولبو عذابنا 173. يا ميدير وصـــــــــــلنا مطار نيالا بسرعة 174. وشوقــــــــــــا مختلف بين القعاد والرجعة 175. البـــــــــــلا صاب نيالا ونحن أهل الوجعة 176. وفي أم درمان مقر الروح وطيب الضجعة 177. اتناشر وعشرة فوق قبلنا لأم درمان 178. بلدا بالعزم قامــــــت على الإحسان 179. حفتك القلوب بي شوق أبا البلللان 180. ثلاثة أيام ولو بمراد تكون حولان 181. فوق فوق السحاب الليلة جلست روحنا 182. بي ذكر الرسول الماحي غنت دوحنا 183. .أب زينب طريناه وشــــفينا جروحنا 184. نادينا القريض يجلس وسط في سوحنا 185. اثنين فوقا تلت اتدلت البتطير 186. وحمدلنا السلامة لكل قبايل الخير 187. لي وطنا كسير وجبيرتو في ميدير 188. دارفور لي دواها يشد رحالو يسير 189. دارفور الحريق الشب في أحشانا 190. ودارفور الحبيب الردنا منذ نشانا 191. دارفور الصميم في الله ديما شانا 192. ودارفور إن هجم زمن المحل هي عشانا 193. دارفور جففي الدم السكب في مرّة 194. والدمع الهطل من الحبايب جرّ 195. دفن الليل بنختاه أب كراعا برة 196. راجين الفجر وخيوطو حين تنترّ 197. لــــــو صقر الجبال يوم انكفت للفرّة 198. والأسد الهصور اتضارى من الهرة 199. لو نار اشتكت للنسمة من الحـــــــرّة. 200. خلـــــــوه النبيه يحسد ريالة العرّة 201. أب رايا سديد ما بباري ناس تنبلّة 202. والبحر الوسيع ما بردا من القلة 203. سيد الراية ما بخليها شان دلدلّة 204. واسطول القياد ما بنردف في ترلّة 205. دارفور أبنجيك إن ما كراع بي روحنا 206. بي نصرا مبين منك نعلــــــي صروحنا 207. وعد الله صدق في كتابو هاكي شروحنا 208. نصر المستضعفين باكر تضوي طروحنا 209. ربنا يحفظك من فتنة الشيـــــــطان 210. من مكر اليحيك تبقى العناية أمان 211. كل ما خطو سو يسدل عليك رحمان 212. تتطفطف حروب عطل النفوس ينصان 213. ترجعي زي عروس أو زي عريسا جرتق 214. يخضبك الحبور ما دم نشوفو مـــــــــدفق 215. هداك الطير نضم والقمري قوقى وحلّق 216. في شجرك مع الجميز نوارا فــــــــــتّق 217. يا ميدير سلام يا البيضا أزرق حرفك 218. يا التامة النظام لي الداني طيّب كرفك 219. طيّــارة المرام الزوق طقم في صفّك 220. حيّوك الكرام من كابتنك لي ضلفك 221. عدنا أم در خلاص بللنا شوقا شقق 222. لي طين القلوب لي روحنا تش وبقق 223. مولاي ينصر الدين لي وعودو يحقق 224. بي عجين الصدق في الله لخ ودقـــــق. .