|
Re: الفنان البيجاوي محمد البدري دبايوا..و القومة ليك، فلنوثق له هنا (Re: Murtada Gafar)
|
عندما عاد صديقي العزيز شوقي اسماعيل من السودان إلى أدنبره صيف العام الماضي اتصل بي قال لي جئت إليك من السودان بلحن و حزن فالحزن أنا كفيل به و أما اللحن فيمكن أن نتشاركه معا، كانت هي ذي كلماته لي، فارسل أغنية "بفرح بيها" فيديو كليب للفنان الكبير الهادي حامد و كان يعلم كيف أنا و هو و آخرون نعزهم معا كم نحب هذه الأغنية خاصة عندما يصل الهادي حامد إلى المقطع الذي يقول فيه:
جايا من فوق البنية
أو ذلك الذي يقول فيه
دي شوقا نص الليل بصحي
و لطالما رددت معنا حيطان البركس و شوارع الجامعة في رحلة العودة إلى البركس هذه الأغاني و أغاني غيرها لحبيبنا الهادي حامد و لغيره أيضا، فمثلا إفتقدتك يا صبا عمري و شبابي و مثل طفلة العصافير الموسمية لمجدي النور و ساورا و الهادي جمعة و عبد الوهاب محمد عثمان و وليد يوسف عندما ياتي على "قالت الأرض الميتة" و تردد من ورائه هناء نفس المقطع، عموما يا صديقي إليك هذه اللحن مبرأ من أي حزن و ساعمل على إنزال أغانيه تباعا و إلى آخرين أيضا سآتي على ذكرهم واحدا واحدا، و إلى متصفحي سودانيزآونلاين أيضا أهديه، و إلى ثوار شرق البلاد الحبيب من اجل حوارثقافي عادل و من أجل وحدة في إطار التنوع أو أي شئ آخر يكفل الإحترام، و قناعتي دائما أن أغنية الهامش أغنى بكثير من اغنية المركز
لي عودة
| |
|
|
|
|
|
|
Re: الفنان البيجاوي محمد البدري دبايوا..و القومة ليك، فلنوثق له هنا (Re: tmbis)
|
الأخ العزيز تمبس
لك كثير التقدير على المرور و على تحميل هذه الأغنية التي لم تشتغل معاي -حتى الآن- لكن يا تمبس شفتا الكاسيت الأنا منزل صورة الفنان محمد البدري منو ده لو نزلتا لينا منو شغل شغلين تكون ما قصرت لإنو أصلا تحميل الأغاني ده ما لفق معاي.
أبقى معي هنا و أنا جاي بس عندي قائمة طويلة من الإهداءات داير أعملها.
مرتضى جعفر
| |
|
|
|
|
|
|
Re: الفنان البيجاوي محمد البدري دبايوا..و القومة ليك، فلنوثق له هنا (Re: Murtada Gafar)
|
على الرغم من وطننا يقدم فيه الموسيقيون اعمالا تظل هي كما النجوم في لمعانها و على الرغم من أن آلة العود قد عزف عليها الراحل حسن عطية كأحلى ما يكون العزف و كذلك الراحل برعي محمد دفع الله و الأستاذ محمد الامين و الاستاذ بشير عباس و الأستاذ عوض حمودي إلا أن عمر طمبل و حسب شهادتي ينتمي إلى هذه الفئة من العازفين على آلة العود خاصة عندما يعزف هل تدري يا نعسان أنا طرفي ساهر و أيضا عندما يعزف رائعة العطبراوي سوق يا سواق بي شارع السوق، عمر طمبل عرفني على محمد البدري في فترة ضمنا ذلك البيت العجيب في بري اللاماب مربع ستة ذات صيف-شتاء-خريف و غبار كثيف من الأحداث التي شهدتها البلاد في العام 1997 في جملة ما ظلت تراه من عجائب منذ يونيو 1989.عرفني على هذه العالم من الإبداع عمر طمبل من أبناء الشايقية لكن و لأنه من كسلا أم دقاق تراه و تظنه بيجاويا أصيلا سافر إلى أصقاعهم في الشرق و التحم بهم إلتحام الباحث و العارف في نفس الوقت
إليك -يا صديقي عمر طمبل هل تقرأني؟- محمد البدري و نحن نحاول أن نبني سودانا جديدا نحلم فيه بالإحترام المتبادل
يا عمر يا طمبل إن كنت تقراني فحاول أن تخبرني بذلك
مرتضى جعفر
| |
|
|
|
|
|
|
Re: الفنان البيجاوي محمد البدري دبايوا..و القومة ليك، فلنوثق له هنا (Re: Murtada Gafar)
|
مافي مشكلة يامرتضى البوست دا انا حارسو ليك بعدين يظهر انو في مشكلة عندك لانو الاغنية شغاله كويس ـ بالنسبة لي تحميل الاغاني برضو مافي مشكلة وريني واقف وين ونعمل مراجعة مع بعض سريعة الشريط دا لسه ما وقع في ايدي ـ عندي شريط قديم جدا من تقريبا ستة سنوات كان قبل كدا نزل منو اعمال متعددة في بوستات مختلفة عن محمد البدري اسمح لي اني اجيبه هنا والشريط دا طالما نزل السوق دا خبر ضخم جدا بالنسبة لي وشكرا جزيلا انا بحاول انزل السوق في اقرب فرصة وإذا تحصلت عليهو ليك علي كل الشريط بنزلو هنا في البورد إذا لسه الملف ما راضي يشتغل معاك عندي فكرة اني انزكل الاعمال العندي ( فيديو ) وريني رايك انا قاعد حارس ليك البوست دا
| |
|
|
|
|
|
|
Re: الفنان البيجاوي محمد البدري دبايوا..و القومة ليك، فلنوثق له هنا (Re: Murtada Gafar)
|
اخي مرتضي جعفر اولا احيك علي اللفته البارعه للاحتفاء بالفنان الكبير محمد البدري وقبل مده قصيره قدم التلفزيون سهره عن شرق السودان تحدث فيه اخي دكتور اوشيك سيدي باستفاضه عن بدايات محمد البدري وانتقاله الي المدينه وتربعه علي عرش الاغنيه البجاويه وغني ودالبدري اغنيه كسلا التي يقول فيها كاسلا كاسلا انا قلبي سافرا ولا اخفيك سرا في تلك اللحظه انا قلبي سافرا
| |
|
|
|
|
|
|
Re: الفنان البيجاوي محمد البدري دبايوا..و القومة ليك، فلنوثق له هنا (Re: اسامه سعيد)
|
عزيزنا علاء تمبس
لك محبتي التامة
يا سيدي أنا ما عنديش اي مانع و اعتبر البوست تبعك، فكرة تحميل الفيديو دي أنا مبسوط ليها جدا و أرجو أن تفعلها مباشرة
العزيز اسامة سعيد
تعرف يا حبيبنا إن اسمك ده مطابق تماما لصديق ما بفضلو عليك موجود في لندن الأسبوع الفات إتصلتا عليو هاتفيا عشان اسمعوا جزء من شريط محمد البدري ده، فياخ برضو نحي صديقنا عمر طمبل الذي طالما تغني بغنية كسلا كاسلا أنا قلبي سافرا
Quote: كاسلا كاسلا انا قلبي سافرا ولا اخفيك سرا في تلك اللحظه انا قلبي سافرا |
شكرا لكما و خلوكم قراب
مرتضى جعفر
| |
|
|
|
|
|
|
Re: الفنان البيجاوي محمد البدري دبايوا..و القومة ليك، فلنوثق له هنا (Re: Murtada Gafar)
|
بهدي لحن عملاق الفن محمد البدري الي ابن الخالة محمد ابراهيم بكسلا..حي العرب وبهدي اللحن الى العزيزة الخالة آمنة وأسرتها بكسلا الختمية وبهدي اللحن الي بعض آل ابن العمة عثمان صديق بكسلا بانت وبهدي اللحن الى محمد عثمان احمد على بالسواقي الجنوبية بمناسبة الزواج وبهدي اللحن الي ابنة العم آمال عمر بكسلا..وقر بمناسبة الزواج وبهدي اللحن للحاج على سليمان ابوحنة بمدينة وقر بمناسبة الشفاء وبهدي اللحن الى الأخ حسن سليمان سعد بكسلا مدينة هداليا وبهدي اللحن الى سعد حسن بمدينة كسلا درديب بمناسبة الشفاء وبهدي اللحن الى عثمان سليمان سكر بأمري الحامداب.. وبهدي اللحن الى على سعد عثمان بالمناصير بمناسبة المولودة الجديدة بهدي اللحن الى الأخ حسن محمد على القاضي بمدينة بورتسودان وبهدي اللحن للأخ الأستاذ عثمان قاسم عمر بمدينة سنكات وبهدي اللحن الى سليمان عبد الغني بمدينة مسمار.. كسلا. بمناسبة زواج الإبنة وجعل الله أيامكم كلها سعادة.. وبهدي اللحن الى ابن العمة الجيلي باسعيد بمدينة كسلا حي العرب مع الأمنيات بالشفاء
| |
|
|
|
|
|
|
Re: الفنان البيجاوي محمد البدري دبايوا..و القومة ليك، فلنوثق له هنا (Re: Murtada Gafar)
|
زولنا مرتضى..شكرا ليك دايماً بي تجيب التحف النادرة أنت محمد البدري أنا أكاد لا أشبع من غناهو..بحكم إرتباط نص أسرتي بمدن الشرق وصاروا كلهم يرطنوا حتى لسانهم إتقلب.. محمد البدري عندو برنامج قدموهو معاهو في العيد الفات ياريت البرنامج دا في زول يكون سجلو أو ان ينزل في شريط يباع منتهى الروعة والتطريب.. محمد البدري أيضاً تستهويهو عيون الغناء السوداني الآخر أنا سمعت له شريط بالعود في سنة 93 غني فيهو من الحقيبة( من باب نفسك يا القطار) وتشيل معه مجموعة بنات منتهى الإبداع وسمعت له شريط آخر بالموسيقي..قعدة منتهى الروعة في سنة 96 في بورتسودان بالبيانو..
| |
|
|
|
|
|
|
Re: الفنان البيجاوي محمد البدري دبايوا..و القومة ليك، فلنوثق له هنا (Re: Murtada Gafar)
|
شكرا الأخ ابوذر بابكر على الطلة و على الوصلة بتاعت البوست
أنا سعيد جدا أنو كلانا إلتفت إلى هذا الإنسان البديع ود البدري على قولك
تمبس ما مقصر معانا و وعد بإنو ينزل المزيد من الكليبات، أنا عندي كاسيت لكن ما بقدر على شغلانة تحميل الأغاني دي، عموما ما صعبة و أنا دائما بقول لي أصحابي أنا من أسرة كومبيوترية بالتالي ممكن نوكل المهمة لأطراف أسرية أخرى عليمة بس أتجي نهاية الأسبوع و نرتاح من الجري البنجري فيو ده.
مودتي و حا نسمع لمان نقول كفى..بس سؤال فقهي كده ممكن ننزل أكتر من فيديو كليب أو أكثر من أغنية في بوست واحد أفيدونا افادكم الله
مرتضى جعفر
| |
|
|
|
|
|
|
Re: الفنان البيجاوي محمد البدري دبايوا..و القومة ليك، فلنوثق له هنا (Re: Murtada Gafar)
|
العزيز مرتضى .. شغلنا الشاغل عن البوست .. لكن معاك لسه ..
دائما كلما استمع لمحمد البدري استحضر( المطر ) ابوذر ،،اتلاقينــا في بوست المطر المرفق ـ ومن يومــه ارتبط جمال صوت محمد البدري بالمطر عندي ..
Quote: بس سؤال فقهي كده ممكن ننزل أكتر من فيديو كليب أو أكثر من أغنية في بوست واحد أفيدونا افادكم الله |
عادي يامرتضى ممكن ننزل أكتر من ملف ـ بس في عملية تعديل بسيطة بنعمله في الكود ، مثلا: الملف الأولاني بيشتغل مباشرة مجرد ما تفتح الصفحة ، أما بقية الملفات لابد أنو نعمل تعديل في الكود علي اساس أنو الملف يشتغل معانا عند الضغط عليه .. وطبعا العملية دي بتتم بعد سماع الملف السابق أو الضغط لتوقيف الملف ، ثم أختيار الملف البعديهو
الضغط على الملف للتشغيل
| |
|
|
|
|
|
|
Re: الفنان البيجاوي محمد البدري دبايوا..و القومة ليك، فلنوثق له هنا (Re: tmbis)
|
تسكموا يا جعفر و تمبس
تعرفوا الزول ده نفتش ليهوا تفتيش
و ما في غير اغنيه واحده في قسم الموسيقي بسودانيزاونلاين زيدوا لينا المكتبه لهذا الفنان المتفرد
.... يزداد جمال صوت البدري حتي لو تغني باغنيه بغير اللهجه البجاويه
بالذات اغاني الفانون السودانيون الكبار......... ما عندك واحده ذي دي يا تمبس
نصرالدين
| |
|
|
|
|
|
|
Re: الفنان البيجاوي محمد البدري دبايوا..و القومة ليك، فلنوثق له هنا (Re: Murtada Gafar)
|
انتو هنا اصبتونى فى مقتل
البيجا
الرقص البيجاوى
الاداء المسرحى
كله كله ..
يا سلام..
هذا بديع بديع بديع
شوفو المرونه العالية البيحرك بيها انسان البيجا جسمو وهو بيرقص
رقص بسيط ومعبر وجميل..
من اجمل الرقصات السودانية
اما حنجرة المغنى وآهاته واحساسه فهى منسجمة جدا مع حزن المنطقة ومناظرها الخلابة وجمال عواطف الحب المتأججة .. من تاجوج والمحلق.. وحتى التسجيل
شكرا على هذا البوست الخلاب..
| |
|
|
|
|
|
|
Re: الفنان البيجاوي محمد البدري دبايوا..و القومة ليك، فلنوثق له هنا (Re: Murtada Gafar)
|
العزيز مرتضى جعفر .. انا يحق لي اني اشكرك على البوست دا .. وبحرارة .. قبل ساعتين من الآن ـ صحبت على رنة التلفون ، رقم من خارج السعودية ، عرفني المتصل بأنه إبراهيم اداب شقيق زميلنا في البورد Degna تحدث كثيرا عن متابعته لكل الأعمال الخاصة بالاستاذ محمد البدري والسبق سلطت الضوء عليها هنا في البورد ، ومتابعته لهذا البوست التوثيقي تحديدا وفاجأني الرجل .. بأن ربطني بخط آخر من السودان ـ جأني الصوت دافئا وقوي يحكي صمود البجاء وشواهق جبال الشرق .. نعم حدثني الاستاذ ( محمد البدري ) شخصيا هاشا باشا ـ فارسا ـ فنانا زول عادي وطيب تلمس في صوته وداعة الاطفال ـ حنين الأم ،،، وريحة التراب ـ وكان في كل كلمة يلهج لسان حاله بالشكر لموقع سودانيز وليك شخصيا ولي ابوذر المطر .. يااااااااا محمد البدري ـ يا انسان ياودود ياجميل حتى في انتقاء عباراتك وتهذيب الفنان شكرا الاستاذ إبراهيم اداب الذي حمله الاستاذ ( محمد البدري ) رسالة شكر قام بنشرها على موقع : http://www.bejacongress.com/index.html
وجاء فيها شكره للموقع ولشخصك وابذر المطر وشخصي الضعيف: http://www.bejacongress.com/News%20page.htm شكرا يامرتضى .. والآن حق ليأن افاخر بعلاقتي التي سوف تدوم طويلا ـ بالاستاذ محمد البدري والذي وعدني بأن يزودني باسرع فرصة باعمال مختلفة وسوف نكون على اتصال.. وطبعا موعود بدعوة خاصة من الاستاذ محمد البدري في اقرب زيارة للسودان إن شاء الله أنت شوف ليك طريقة انا قريب وساعتين وساعتين بس .. واشير غلى أن تم اكثر من اتصال علي برضو من خارج السعودية بيشيدوا فيهو بالبوست التوثيقي دا .. والعديد طالبين رابط لحفظ الاعمال دي ـ وح اقوم بادراج الروابط الخاصة في اقرب وقت كما اشير إلى ان بطرفي ملف فيديو آخر سوف ادرجه فور الانتهاء من تجهيزه.. استمر يامرتضى .. وما تشيل هم لي موضوع الكاسيت العندك دا .. بنلقى ليهو حل ..
واصل انا بالجوار
| |
|
|
|
|
|
|
Re: الفنان البيجاوي محمد البدري دبايوا..و القومة ليك، فلنوثق له هنا (Re: tmbis)
|
الأخ تمبس دعني أورد هنا نص رسالة الشكر التي بعث بها الفنان الكبير محمد البدري
شكـــــــر وتقـــديــر
الفنـــان الأستـــاذ / محمــد البدري
يتقدم بخالص الشكــــر والتقديـــــر للأستــــاذ الفنـــان/ علاء يونــس الشهير ب
[tmbis]
المقيم بالرياض المملكة العــربية السعــودية
لما يقوم من دور رائع لابراز الفن البجاوي من خلال مشاركاته في موقع سودانيزاونلأين
الشــكر موصــول للأخوة ابوذر بابكــر والأخ مرتضي جعـــفر وكل الأخوان
و هنا الرابط ليها
http://www.bejacongress.com/News%20page.htm
سأعود لها و لك يا تمبس و يا تماضر خليك معانا
مرتضى جعفر
| |
|
|
|
|
|
|
Re: الفنان البيجاوي محمد البدري دبايوا..و القومة ليك، فلنوثق له هنا (Re: Murtada Gafar)
|
الأعزاء الطيبون
مرتضى وعلاء الدين وكل الزملاء هنا
نحن المدينون ل "محمد البدرى" مدينون له بأن جمل حياتنا بصوته الفريد حقا وبأدائه المتميز والذى نقل إلينا هذه اللغة الساحرة فعلا
كنت معجبا بلغة وأغانى وطريقة أداء أهلنا البجة منذ وقت طويل وكنت شغوفا بالإستماع للمبدع العظيم "آدم شاش" والذى وللأسف لا يعرفه بل ولم يسمع عنه كثيرون، وكنت أترصد برنامج "ربوع السودان" تلك النافذة المضيئة كيما أحظى بلحن لآدم شاش واسجله
والآن أشرق فى سماء الإبداع "محمد البدرى" وهو بالفعل كنز ثمين ومعين لا ينضب من الجمال لذا كان النداء ومنذ البداية أن يلتفت إليه محبو الفن الأصيل الجميل
والتحية له وهو يشمخ كما جبال شرقنا العزيز علينا وكل الأمنيات له بمزيد من السمو وبعميم الصحة والسعادة دائما
ويا علاء بالله لو لميت فى وسيلة إتصال بمحمد البدرى قول لى عوك عشان أتصل بيهو أنا برضه ونقدم ليهو فروض المحبة والإعزاز والتقدير
والتحية للأخ إبراهيم اداب حامل مسك الأخبار البهية
| |
|
|
|
|
|
|
Re: الفنان البيجاوي محمد البدري دبايوا..و القومة ليك، فلنوثق له هنا (Re: tmbis)
|
مرة سألت عمنا منصور والد الزول السمح الفوق دا تمبس .. وهو راجل موسيقي قديم تخرج على يديه الكثير من الموسيقين .. لماذا لم تكن عندنا موسيقى سودانية بحته ياخد منها أجيالنا والأجيال القادمة .. قبل إجابته على سؤالي .. طاف بي على ربوع السودان وقبائله .. وحكى لي الكثير عن تراث هذه القبائل وموسيقاها وأيقاعاتها .. ولا شك في شرقنا الحبيب ..
محمد البدري زول فنان وموسيقاه مريحة للوجدان .. كان كلما وقع شريط لمحمد البدري في يد تمبس يتصل على ويقول لي الليلة لقيت لي حاجة رائعة .. أقول ليهو شنو يقول شريط لمحمد البدري .. وقبل هذا البوست ونشكر عليه الزول الجميل مرتضى جعفر الذي أتحفنا به .. كنا نتحدث أنا وتمبس حول هذا الموضوع ووراني ملفات الفيديو الكان بجهز فيها .. وكانت سعادته كبيرة حينما رأى هذا البوست ..
التحية لكل المتداخلين .. والتحية للفنان محمد البدري ..
| |
|
|
|
|
|
|
Re: الفنان البيجاوي محمد البدري دبايوا..و القومة ليك، فلنوثق له هنا (Re: Muna Khugali)
|
مرتضى جعفر دبايوا شكرا لهذه الاضاءة الشرقاوية ومع احى الجميع وخاصة الفنان الجميل تمبس واقول دائما تمبس رجل جميل ولكن عيبه الوحيد حبه لللالوب . ورائد الغناء البجاوى هو الفنان ادم شاش ويحكى ان ادم شاش ذهب فى الستينات لتسجيل اول اغنيات بجاوية فى الاذاعة السودانية وعندما جاء للاذاعة منع من الدخول بحجة انه لم تقدم له الدعوة وايضا الفن البجاوى لم يكن معروفا او كانت الاذاعة محتكرة لفنانى الخرطوم ولكنه اصر لتقديم الفن البجاوى وقرر الغناء بربابته على باب الاذاعة وكل من يمر به يظنه مجنونا وبالصدفة مر به مقدم برنامج يقدم المواهب من الاقاليم لا يحضرنى اسمة واسم البرنامح والنتيجة الفنان ادم شاش سجل اجمل اغنياته وحتى يومنا هذا يوجد تسجيله وخاصة عند اذاعة بورتسودان التى تكرر تقديم ذلك اللقاء الجميل.
| |
|
|
|
|
|
|
Re: الفنان البيجاوي محمد البدري دبايوا..و القومة ليك، فلنوثق له هنا (Re: Aisha Hommaida)
|
الاخ مرتضى يقولون لا يفتى ومالك فى المدينة بالمناسبة عندنا عضو متخصص فى اللغة البجاوية وهو يتسنم الثقافة البجاوية واسمه محمد ادروب ورجل اصدر مؤخرا قاموس الكلمات البجاوية واعتقد مشاركته ستكون افضل بكثير منى واعتبر نفسى تلميذا له واتمنى ان يشارك هنا للتوثيق وفك معانى الكلمات المغناه .. الاخ صديق ضرار دبايوا الاخ محمد البدرى تجمعنى به علاقة خاصة وقد اشيع وقتها باننى ابن اخته والصحيح ان بيننا علاقة وكان يقدمنى لاصحابه بانه خالى ولكننى لست ابن اخته ولكننا ابناء بلدة واحده وعلاقتنا الاسرية كبيرة جدا. ولك الشكر والتقدير.
| |
|
|
|
|
|
|
|