|
|
 Re: فى البدء...كانت كادقلى (Re: nour tawir)
|
وصل المشوار بصابر وسليمان الى اطراف المدينة ثم تدريجيا بدأت المنازل تختفى لتحل مكانها اشجار اللالوب والنبق وكل خيرات مناطق السافنا الغنية.
بدات الشمس تتلمس طريقها الى كبد السماء التى تحولت بدورها الى قطعة صفيح ساخن.
اطبق الهدوء على المكان فيما عدا اصوات العصافير وبعض الحيوانات التى تسكن فى الغابة.
اخيرا جدا جلسا تحت شجرة وارفة الظلال واخرج سليمان بعض من الماء والاكل الذى اعدته والدته لهما.
اسند صابر ظهره للشجرة ومد بصرة الى الامام وهو هادئ وقد كسته موجة الحزن الغريب مرة اخرى وجلس سليمان بالقرب منه ومد بصره ايضا وبادر صابر دون ان يلتفت اليه...
يا صابر انت طوالى مهموم كدا؟
وانت يعنى المبسوط يا سليمان؟
من المفروض اننا سعداء وخاصة بعد دخول الجامعة وتحقيق بعض الاحلام.
دا مش الموضوع يا سليمان.
الموضوع شنو يا صابر؟
انت ملاحظ شنو فى كادقلى فى الاجازة دى؟
وبصراحة يا سليمان.
ما لا حظت شئ واضح ولكن عندى احساس مخيف وما عارف سببه شنو.
بداية جميلة عشان يا سليمان انا برضو حاسى وبعدين فى ناس كتار اشتكوا من معاملة الافندية فى المجلس.
زى شنو يعنى؟
يعنى يقابلهم الموظف مكشر. ويخلى الواحد واقف ساعات بدون ما يسأل فيه, وينهره ويقول ليه تعال بكرة.
الموضوع دا حاصل من زماااان يا صابر.
عارف ولكن التعامل مع النوبة بقى فيه حاجة ما واضحة.
يمكن عشان الحركة بتاعة ناس رحمة الرحومة لما ضربوا ام دولو والحكومة قالت دى بداية تمرد.
تمرد من مين يا سليمان.
بصراحة بيقولوا تمرد من النوبة.
وانت شايف شنو يا سليمان؟ الكلام دا منطقى؟
الكلام دا ما منطقى ولكن الحكومة متخوفة وبس.
وليه ما تتخوف من اى ناس تانين؟
تحمل المسئولية للنوبة ليه؟
والله يا صالح يا اخوى انا زيك ملخبط. يعنى لو خلونا زى ايام الطفولة وكل ناس فى حالهم يكون افضل فى رايى ولكن انت شفت فى الخرطوم وسمعت ارهاصات الحكومة عن النوبة.
شفت يا سليمان والحكاية زى ما تكون مدبرة عشان يجرونا لى حاجة ما معروفة.
تكون لاحظت يا سليمان المناوشات والاساءات الكان بوجهها واحد من مجلس الشعب لافندينا الرشحناه وفوزناه.
افندينا راجل مخلص يا سليمان ولكين مجلس الشعب ما هو برضو الحكومة وهم بيفتكروا انه افندينا بيشكل خطر عليهم.
من يا تو ناحية؟
الاساءات وصلت الى سب النوبة وبقت علنية. وما تنسى يا سليمان انه كادقلى فيها نسبة عالية من الامية. يعنى ناس الحكومة لو ركزوا على النغمة بتاعة نوبة وما نوبة دى ,النار حتولع.
وبعدين وصلت وين مع الاخوان المسلمين يا سليمان؟
اكون صريح معاك يا صابر, من ناحية العبادة انا ماشايف مشكلة وطول عمرنا مسلمين والحمد لله ولكين المزعج فى الامر انهم برضو بيركزوا على حكاية العروبة والاسلام وبيخططوا لاسلمة المنطقة.
جفل صابر....
واهو دا الانا خايف منه. يخططوا كيف؟
والاسلوب شنو الحيستخدموه عشان يفرضوا الاسلام على المسلمين فى جبال النوبة؟!
احتمال تكون المسألة فيها خطورة اكبر مما تتصور او اتصور يا صابر ولكن ومع الشريعة الاسلامية الفرضوها هسع واصبح الاسلام يفرض بالسوط وحد السيف, يمكن ايضا يفرض بالبندقية. انت شايف الخرطوم بتغلى وانا حاسى انه دى نهاية نميرى.
وحتى لو انتهى نميرى الحيجى بعده حينفذ البرنامج يا سليمان. انت ناسى انه الحكومات السودانية كلها من الاستقلال وحتى تاريخه حكومات اسلامية بشكل او اخر؟
عارف يا صابر ولكن الاسلام شئ واستخدامه لتمرير اجندة تانية دا موضوع تانى.
نظر اليه صابر باستغراب ودهشة.
واصل سليمان متجاهلا تلك النظرة...
انا عارف انت بتفكر فى شنو يا صابر. البلد دى انا اتولدت فيها وعشت فيها وجدودى كمان. يعنى ما عندنا غيرها.
لما الموضوع يتطرق للارض والحلال, فأنا مع البلد يا صابر ما مع الحكومة.
والاخوان المسلمين؟
ما عارف حااوصل معاهم لى شنو ولكن تأكد انى زيك حريص على البلد دى وكل امنيتى انه العامة لا يتم استخدامهم فيما يحرق الاخضر واليابس والنوباوى والبقارى وغيره.
اطمئنيت يا صابر؟
انا ما شاكى فيك يا سليمان وا لا الخوة دى كانت انتهت من زمان.
انا عايز اعرف البقارة فى راسهم فى شنو؟
ولما تحصل مصيبة, حيتصرفوا كيف؟
ننتظر ونشوف يا صابر...
الانتظار براه ما بكفى .
وفى ايدك او فى ايدى شنو؟
والله ما عارف لكين لازم تكون فى طريقة؟
على فكرة سيد عامل شنو فى الكلية الحربية؟
رد صابر,فترة طويلة ما شفته ولكين هو موجود فى اجازة قصيرة اليومين ديل وماشى ازوره.
ماشى تزوه بس ولا ماشى تسمع منه؟
الاتنين....
| |
 
|
|
|
|
|
|
|
|
Re: فى البدء...كانت كادقلى (Re: nour tawir)
|
سيد كافى ابن افندينا قنبلة موقوتة ولكنها متحركة باستمرار.
اصبح شديد الطول مثل والده, ولكنه ايضا مبتسم باستمرار .
لاحظ صابر ان سيد قد اكتسب شخصية طاغية ديناميكية الحركة.
فهو يتحرك بثقة تكاد تصل الى حد الغرور وفى عينيه قوة الادراك والفهم والتمعن.
وبما يتميز به صابر من هدوء طاغى ايضا انتظر ان يبدأ سيد حديثه ولكنه لم ينتظر كثيرا, حيث امر سيد اخته ان تضع صينية الشاى بلهجة يفهم منها انه يريد حديثا خاصا ما صابر...
يا صابر الموضوع وضح تماما.
موضوع شنو؟
الجلابة ناوين لينا على نية ما يعلم بها الا الله.
كيف يا سيد؟
فى كلام كتير عن جبال النوبة وعن الاسلمة.
ونميرى ما فرض الاسلمة على البلد كلها يا سيد.
دا مش الموضوع. الاسلام فى جبال النوبة وحسب ما فهمت لازم ياخد طابع تانى.
زى شنو يعنى..
يفرض على كل النوبة.
والمسلمين؟
برضو يفرض عليهم!
دا مش كلام غريب يا سيد؟
اكتر من غريب. ولكن انا حاسسس انه المسالة مش هى الاسلام.
الاسلام مجرد سلم يوصل الى نهايات اخرى.
وبعدين حركة ام دولو القاموا بيها ناس رحمة الرحمومة رغم انهم بقارة ولكن الحكومة بتقول تمرد من النوبة.
تمرد على شنو؟
احنا هسع قلنا حاجة يا سيد؟
ماهو عشان احنا ما قلنا حاجة, دا المخوفهم وزارع الشك فى قلوبهم.
والله يا سيد هم عايزين يفرضوا وضع معين وبيفتشوا عن المبررات وبس.
وتفتكر ليه يا صابر؟
اولا فى اكتشاف للبترول فى هجيليجا يا سيد. تانيا فى يورانيوم فى ميرى, وغير كدا الثروة الحيوانية اساسها من جبال النوبة وفوق دا وداك انه المنطقة كلها زراعية وممتازة للتنمية الاقتصادية.
طيب ما يعملوا تنمية زى ما عايزين.
الكلام دا برضو يطلع منك ياسيد؟
هم عايزين الارض لكن بدون ناس.
قلت شنو يا صابر؟
زى ما قلت ليك. الكلية الحربية القربت تتخرج منها دى هى سلاح قوى اما انه سوف ينهيك او انه سوف ينهى اهلك.
غضب سيد ولكنه تمالك نفسه فسال صابر
وانت شايف شنو يا صابر؟
شايفك يا سيد الدم بيغلى فى عروقك.
الناس ديل ما اغبياء, اما انهم يتخلصوا منك وباسرع ما يمكن او انهم يستخدموك لو حسوا باستجابتك.
وانت برضو شايف شنو يا صابر؟(وهو كاظم الغيظ)
شايف انهم حيحاولوا يتخلصوا منك وباسرع ما يمكن.
هم عارفنك ابن افندينا, وافندينا جايب ليهم القلق, كلامه صعب وما بتبلع ليهم.
وشايفين فيك وطنية واحساس قوى بجبال النوبة, الكلام دا ما بيعجبهم.
لانهم دايرين يا تقول ليهم حاضر سيدى وتجى تقتل ليهم اهلك ويدوك دبورتين تلاته يا يجيبوا اجلك.
وبرضو شايف شنو يا صابر؟(وهو كاظم الغيظ ايضا)
شايف كدا حيجيبوا اجلك, او تلحق نفسك تشوف طريقة.
حينئذ تحدث سيد:
شوف يا صابر مهما كان برنامجهم عن جبال النوبة, وقسما عظما انا حاولع فيهم نار من هنا لغاية الخرطوم.
ما حتلحق تحرق اى حاجة.
الموضوع عايز تدبير وعايز تخطيط, وان دعا الحال وشلنا سلاح يا سيد, يبقى نشوف لينا حليف نحارب معه.
وحليف ليه يا صابر احنا ما بنقدر نحارب برانا؟!
نقدر نحارب برانا, ولكن انت ناسى انه نحنا واقعين فى النص. يعنى الحكومة عشان تحارب الجنوبيين لازم تمر من اول جبال النوبة لاخرها عشان تصل للجنوبيين من حدودنا الجنوبية, وعشان الجنوبيين يردوا على الحكومة لازم حيكون فى ضحايا من الاهالى الابرياء.
تقصد يا صابر شنو بالاهالى الابرياء؟!
بقصد البقارة.
الجنوبيين حينتقموا فى حربهم مع حكومات الشمال من البقارة, انت ناسى مشكلة الجنوب شكلها كيف؟
ما ناسى يا صابر ولكن احب اوضح ليك برضو انه الجنوبيين البيمنعهم شنو من ضرب النوبة خاصة وانهم بيحملوا النوبة ضربة حسن بشير نصر للجنوب؟
ليه؟
ليه لانه نحنا كنا عساكر.
كنا عساكر يا صابر بننفذ تعليمات عسكرية.
دا صحيح ولكن الجنوبيين ما بينظروا ليها من الناحية دى.
تقصد يا سيد انه وجودنا فى النص هو اول تعقيد فى الحرب بين الشمال والجنوب؟
بالظبط كدا.
وحتى اذا حاربنا معاهم مابرضوا يكون دا رأيهم؟
نعم برضو حيكون دا رأيهم ولكن احتمال لما تكون معاهم تقدر تأثر وتوضح ليهم موقف النوبة؟
افهم من كدا يا صابر انه نحنا نحارب مع الجنوبيين؟
عندك حل غيره يا سيد؟
وافرض لو حاربنا وانتهت الحرب والجنوبيين غدروا بينا؟
كيف يا سيد؟
يعنى اخدوا حقهم, انتقموا مننا وبعد داك لا بقينا مع الشمال ولا الجنوب ولا نقدر نحصل على حكم ذاتى ونكون طالعين من الحرب منهكين وما فى ايدنا نعمل حاجة؟
لا يا سيد. دايما فى ايدنا نعمل حاجة ولكن ولغاية ما نصل للنتيجة العايزناها , الله اعلم حجم الخسارة.
بالمناسبة ميمونة كانت هنا امبارح مع ابوها وامها واخوانها(وهو يضحك بخبث)
بقت سمحة شديد يا صابر.
عيب يا سيد دى بت خالك, وبعدين ما تزعل منى الزواج قسمة ونصيب.
ازعل منك كيف يا صابر؟
والله فرحان ليكم الاتنين لكين بتذكر مكاواتى ليها لما كانت صغيرة .
حول صابر مجرى الحديث...
خلى بالك من نفسك يا سيد.. انت فى وش المدفع مش وراه...
رد سيد وهو فى حالة انتباه شديد:
البلد كلها فى وش المدفع يا صابر والله يستر....
| |
|
|
|
|
|
|
|
|
|
Re: فى البدء...كانت كادقلى (Re: nour tawir)
|
فى تصاعد سياسى درامى مفاجئ عام 19984 بدأ الوضع الامنى يتردى فى جبال النوبة وبدأت اليات الدمار تزحف اليها من الشمال.
اسقطت حكومة الفريق جعفر نميرى وتسلم الفريق سوار الدهب السلطة فى مرحلة انتقالية فى اليلاد.
بدأ بعض البقارة فى المنطقة يشهرون السلاح الذى استخدم للنهب ونزع ملكية اراضى الغير.
تحولت كادقلى الى ترسانة عسكرية فى وقت قصير جدا وقلبت حياة الناس راسا على عقب.
ذات مساء وميمونة تجلس فى صحن دارهم مع افراد اسرتها التى كانت ترحب بها فى اجازتها القصيرة من معهد التمريض العالى, دخلت امرأة تحمل ملامح طفلة وتربط حول ظهرها طفلا وتجر وراءها اثنين اخريين.
لم تكن تلك الملامح غريبة على ميمونة ولكنها فشلت فى تحديد هوية تلك المرأة/الطفلة.
بادرتهم بالسلام الحار واحتضنت ميمونة فيما طفرت دمعة من عينها.
احتارت ميمونة وبدأت تتلفت الى امها وابيها تستنجد بهما فى معرفة تلك المرأة والغرض من تلك الزيارة.
بادرتها والدة ميمونة قائلة وهى مبتسمة:
اتفضلى فاتيمتو.
ذهلت ميمونة:
فاتيمتو؟
فهى لم ترها منذ سنين خلت ومنذ ان اختفت فاتيمتو من تحت الشجرة التى كانت تبيع فيها الفول والتسالى والطعمية وحلاوة لكوم..
جلست ميمونة بجانبها فيما تفرق اهلها لاحساسهم بخصوصية تلك الزيارة غير المتوقعة.
بدأ الحوار التالى:
كيفك فاتيمتو؟ زمان ما شفتك.
انا اتزوجت وديل اولادى!
ماشاء الله(وهى فى غاية الدهشة)التلاتة؟
التلاتة يا ميمونة, احنا بزوجونا ضغار شديد.
والله انا مبسوطة انى شفتك بعد السنين دى كلها.
تحولت الجلسة الى ذكريات الطفولة وتجربة فاتيمتو تحت الشجرة وتعالت ضحكاتهن التى قطعتها فاتيمتو فجأة وبدأت تتحدث كما لو انها تلقى بيانا عسكريا:
انا جاية فى موضوع مهم وما دايرة زول يعرف.
اتفضلى فاتيمتو سرك فى بير.
محمدو!
محمدو مين يا فاتيمتو؟
الحلاق وسيد الدكان بتاع العجلات.
مالوه؟
زوجونى ليه اهلى وديل اولاده, وهو كمان ود عمى زى ما عارفة.
عارفة يا فاتيمتو.
محمدو عنده سلاح وعايز يحارب مع اى زول يدخل كادقلى.
يحارب منو؟
يحارب النوبة.
ليه يا فاتيمتو؟
ماعارفة, بيقول انه النوبة اسلامهم ضعيف وانهم برضو ظلمون نحنا الفلاته.
كلام غريب يا فاتيمتو يطلع من احمدو بالذات.
ماهو وضعه كويس وعنده دكانين وعنده زرع كمان.
عارفة, لكين عنده كم سنه بيجى متأخر وبيقول انه كان فى اجتماع الاخوان المسلمين.
والباقين يا فتيمتو؟ اخوانك وباقى اهلك.
كل واحد عنده راى براه. منهم كتير بيقولوا البلد دى حقتنا وما لازم يغشونا ناس السياسة الجايين من الخرطوم.
وفى فلاته غيره عندهم سلاح؟
والله الما عنده بندقية قاعد يفتش على واحدة يدافع بيها عن نفسه زى ما سمعتهم.
فعلا يا فاتييمتو البلد دى فيها ناس زى محمدو وفيها ناس قلبهم عليها لانه ما عندهم غيرها.
والحيحصل شنو يا ميمونة؟
والله ما عارفة يا فاتيمتو.
لكين نقول الله يستر.
رددت فاتيمتو وراءها.. الله يستر
ثم وقفت واستأذنت فى الذهاب قبل عودة محمدو من الخارج....
| |
|
|
|
|
|
|
|
|
|
Re: فى البدء...كانت كادقلى (Re: nour tawir)
|
جلست ميمونة تفكر بعد خروج فاتيمتو.
تفكير دائرى لا يوصل الى نهايات منطقية ولكنه يعود الى نقطة البدء فى اصرار عنيد.
استلقت على عنقريب صغير(هباب) وسرحت بفكرها الى قمم الجبال التى كانت تحيط بها من كل ناحية.
هاهى كادقلى الحبيبة, مقبلة على خطر.
هذا الخطر سوف يجرف امامه الاخضر واليابس.
النوبة, البقارة, الجلابة والفلاته وغيرهم.
ماهو العمل؟
هدأت كادقلى هدوئا غريبا مخيفا
كمن يحاول جاهدا تجنب الخطر.
ولكن من من ابنائها وبناتها يعرف هذا الخطر القادم؟!
ولكن لماذا جبال النوبة بالذات؟
شعرت كادقلى بالذعر حينما تذكرت ان هذه الحياة الهانئة والهادئة والتى يتقبلونا بكل رضا وسماحة نفس, فى طريقها الى زوال.
القت نظرة على ميمونة التى استغرقت فى ذاك التفكير الدائرى ثم ذرفت دمعة,
تماما كأى ام قلقة على ابنائها وبناتها.
وفجأة ومن رحم ذاك الهدوء والظلام الذى القى عليه القمر بظلاله الباهتة,
دوت صرخة رددتها كل الجبال.
دوت صرخة من أمرأة كانت ايضا جزءا من رواد ذاك المساء الغريب.
جفلت ميمونة واحست بالاهالى يركضون بأتجاه ذاك الصوت.
تعالى نباح الكلاب.
سيطر القلق والكدر على كادقلى التى اسقط فى يدها بعد ان تأكدت ان الخطر لم يصبح محدقا
ولكنه قد بدأ بالفعل.
لم تدرى ميمونة كم من الوقت مكثت فى تلك الحالة
ولكنها هرولت الى والدها وهو داخل الى الدار.
ابوى الحصل شنو؟
راجل عمتك مندى.
مالوه؟!
لقوه مكتول ومرمى فى الشارع قريب من الزرع حقه.
سوى شنو؟
مافى زول عارف ولكين قالوا الليلة المغرب شافوا ليهم شباب عرب لابسين كاكى.
كاكى؟! يعنى حكومة يا باوى.
نعم حكومة لكين مالابسين الكاكى بتاع الجيش. لبسهم مختلف.
وكانوا حايمين يعملوا شنو؟!
ما عارف لكين الشافوهم قالوا عيونهم شر شر.
وشر ليه يا ابوى؟! مافى زول فى البلد دى ازا الحكومة.
ما هو دا المحيرنى يا ميمونة يا بتى.
وحاجة تانية كمان.
شنو يا ابوى؟!
لقوه مورم من الضرب وشخبطوا ليه وشه بالسكين!
يا باابوى دا كلام ما مفهوم كله كله.
انا بقول يا ميمونة يابتى ترجعى طوالى.
ارجع وين يا ابوى؟
الاجازة لسة.
انا عارف, ثم التفت الى احد ابنائه وقال:
بكره من بدرى تمشى تنادى لى صابر وسيد.
سيد رجع يا باابوى لكين بنادى ليك صابر...
| |
|
|
|
|
|
|
|
|
|
Re: فى البدء...كانت كادقلى (Re: nour tawir)
|
دخل صابر ظهر ذاك اليوم ودلف الى دار أهل ميمونة بلا تردد رغم خجله الشديد وتردده فى زيارة بيت ميمونة واهلها.
ناداه والد ميمونة ودعاه لتناول الغداء معه ولكن صابر اعتذر وجلس وهو مطرق الرأس يفكر.
نادى والد ميمونة على احدى بناته لرفع صينية الغداء ثم التفت الى صابر.
سمعت الحصل يا صابر؟
سمعت يا عمى.
وقد بدأت حبات العرق تنصب من جبينه.
وانت رايك شنو يا صابر؟
احنا فى خطر يا عمى والمشكلة انه الاهالى ما عندها فكرة. وما فى زول عارف ليه ممكن تحصل حرب.
دى ما حرب يا صابر يا ولدى.
الحرب ليها ميادين خاصة. لكين دا غدر وانتقام واخلاق ما عرفناها فى البلد دى قبل كدا. والموضوع حيكبر باسرع مانحنا متوقعين.
ما هى لو حرب يا عمى الواحد بشيل بندقيته عديل كدى ويمشى الميدان, لكين زى ما تفضلت الموضوع ما مفهوم.
وشكله كدا انتقام اكتر مكن اى حاجة تانية.
انتقام ليه يا صابر يا ولدى؟
وحكومة تنتقم من اهالى ليه يا صابر؟
دى حاجة غريبة ما شفناها قبل كدا.
الزمن بقى ما مضمون يا صابر.
انا جاييكم البيت بكرة اتكلم مع حبوبتك تجى تعيش معانا وباخد اذن من العمدة كمان.
وبعدين حاأجيب المأذون يعقد ليك على ميمونة ولما تمشوا الخرتوم تتقابلوا يوم الخميس والجمعة فى بيت اخوى الكبير.
لم يتردد صابر ولم يناقش الموضوع وبدا كما لو انه لا يوجد حل اخر.
حاضر يا عمى. الانت عايزه حيحصل...
امتدت تلك الجلسة الى ما قبل المغرب.
دخل استاذ حسن وقد سيطر عليه القلق, وبدأ موجها حديثه لصابر...
كويس انى لقيتك هنا يا صابر.
تسافر بسرعة وتقابل الجماعة فى الخرطوم وتشرح ليهم الحصل.
ساله صابر:
فى حاجة تانية حصلت يا أستاذ حسن؟
حرقوا القرى المجاورة للمجلد.
وفى ناس مسلحين ومنظمين بيقوموا بالاجرام دا.
والموضوع بقى واضح.
حاضر استاذ حسن.
وحاجة تانية, فى جواب حيجيبه ليك افندينا بكره توديه لسيد.
انا حامشى اشيل الجواب بى نفسى.
وعلى فكرة سليمان ود اللمين رأيه شنو فى الكلام دا كله؟
سليمان مغلوب على امره استاذ حسن.
قابلته الصباح فى السوق وقال انه حيتخرج ويجى يشتغل دكتور فى مستشفى كادقلى.
ومزمل ود التاجر؟
مزمل عايز يتخرج من كلية الاقتصاد ويجى يشتغل فى مصنع النسيج عشان يكون قريب من الدكاكين بتاعتهم.
اشك فى الكلام دا يا صابر.
وليه يا استاذ؟
مش حيكون فى مصنع والجلابة عندهم بيوت فى مدن تانية فى السودان. لما تتأذى تجارتهم ويبقوا فى خطر حيمشوا.
المتضرر الاول من الكلام دا كله هو البقارة والنوبة.
وليه البقارة ما هم مع الحكومة؟
ما كلهم. المنتمين لحزب الامة والاخوان المسلمين هم الحيدخلوا فى الورطة دى, ولكن انا قصدى انه النوبة ما حيقيفوا ويتفرجوا.
ولا انت نسيت يا صابر؟
ما نسيت يا استاذ حسن...
| |
|
|
|
|
|
|
|
|
|
Re: فى البدء...كانت كادقلى (Re: nour tawir)
|
اشتعل الموقف السياسى فى جبال النوبة كافة.
وانهار الموقف الامنى
وبدأ السلاح يدخل الى كل المنظقة وبأعداد مهولة.
وبدأت حركة السكان فى تصاعد وايقاع سريع ولكن الى اين وكيف المفر؟
تحولت ليالى كادقلى الى كابوس مرعب
وتحول نهارها الى ترقب وانتظار وحيرة.
عاد صابر الى الخرطوم ومعه ميمونة.
(اجتمعت (الخلية)
وهذا هو الاسم الذى اطلقه استاذ حسن على حركتهم بعد طول سنين وطول تخطيط و اجتماعات مكثفة.
بدأ كاكدلا الذى كان اكثرهم توترا وقلقا والاجتماع فى بيتهو يوم جمعة ونهار الحر:
يا جماعة انتوا متأكدين انه مافى زول جايب خبر للاجتماعات دى؟
رد استاذ حسن:
مافى زول الا يكون مننا ودا ما وارد.
تدخل افندينا:
الحكاية واضحة زى الشمس. يعنى احنا لو ما تحركنا ولو ما حاربنا النوبة ما حيقيفوا متفرجين.
السلاح الدخل البلد بيستخدم للنهب والسلب والقتل والحرق.
تدخل كاكدلا: انا بس محيرنى موضوع الحرقية دا.
بيحرقوا بيوت الناس ليه؟
تدخل افندينا:
لو تكون قريت عن هتلر, الفايكنج, وكل حروب العصور القديمة والحروب الرومانية او غيرها أعتمدت على النهب والحرق والقتل والاعتداء.
كاكدلا: برضو ليه؟
لانه مثل هؤلاء القوم عادة فيهم شراسة وتعطش للدماء وهم لا يلتزمون بأى اخلاقيات فى الحرب.
استاذ حسن: الفترة الانتقالية انتهت.
الحكومة ديمقراطية وبرضو الكتل متصاعد ومنظم كمان.
كاكدلا:وفى حاجة جديدة خطف العيال الصغار.
استاذ حسن: غايتو احنا دربنا العيال بما فيهم الكفاية ورسمنا ليهم الخطة فى كافة الاحتمالات.
الباقى على رب العالمين.
افندينا: ما تنسى يا حسن انه نحنا طرحنا خيار الحرب مع الجنوب وفى استجابة غير عادية.
كاكدلا: الجنوبيين احتمال 100% يغدروا بينا.
افندينا: يغدروا بينا فى حالة واحدة, اذا نحنا حاربنا معاهم بدون اتفاقية مبادئ.
وبعدين الشباب الحيمشى الحرب ديل بياكلوا النار.
كاكدلا: ما كلهم. انت ما عارف انه كلهم حيصمدوا ولا لا.
افندينا: ولو ما صمدوا يا كاكدلا حيرجعوا وين؟!
الا يعيشوا فى الجنوب طول العمر.
كاكدلا: انا ما مطمئن.
استاذ حسن :كل الاحتمالات واردة فى هذه الحرب.
كاكدلا: بسددى مش حرب. دا برنامج واضح للقضاء على اى نوباى, ويمكن بكره يغيروا الاسم كمان!!!!
استاذ حسن: يا كاكدلا. دى حرب وزى ما بيقوالوا الخواجات IT'S NOT A TEA PARTY
وفى الحرب تظهر اخلاقيات غريبة وتوقع غير المتوقع,
لانه الانت خاتى فيه الثقة ممكن يخذلك والانت ما مديه اعتبار ممكن يكون ياهو زولك زاتو.
افندينا: نهيئ انفسنا للقتل والموت لانه الناس دى لما تدخل كادقلى ما مهم يتكون شاكة فيك وفى تنظيمك.
اول ناس حيبتدوا بيهم المتعلمي.
ونحنا عددنا بسيط ومعروفين للجميع.
استاذ حسن: الموت علينا حق.
ولو كنت حا اموت دفاعا عن كادقلى , صدقونى ما بتمنى حاجة اكتر من كدا.
افندينا, سمعت بالفلاته الابتدوا يشتروا السلاح؟
ودى مشكلة تانية لانه فى كتير من الفلاته عينهم على حلال النوبة.
عموما نحن نعمر بنادق الصيد العندنا دى ونكون فى حالة استعداد.
كادلا: تمام افندينا.
| |
|
|
|
|
|
|
|
|
|
Re: فى البدء...كانت كادقلى (Re: nour tawir)
|
تفرقت الخلية
وعاد كل الى بيته
استلقى كل فى سريره
وبدا يدرس كل الاحتمالات
فيما عدا كاكدلا الذى قضى الليلة بطولها وعرضها وهو يخرج ويدخل بلا هدف واضح
حاولت زوجة اساتذ حسن ان تتحدث معه فى امر ما
فطلب منها ان تتركه لحاله
لان لديه مايشغل باله
وشغل بالها ايضا بذاك التصريح الغريب
ليست هذه عادته
فهو صريح وواضح
مهما كان الامر
جلس افندينا اما مكتبه فى بيته
حاول ان يقرأ كتابا
فلم يستطع
توضأ
صلى
قرأ قليلا فى المصحف الشريق
حاول ان ينام
فلم يستطع
فى صبيخحة اليوم التالى
وقفت كادقلى كعادتها ترقب حركة الاهالى
الحياة طبيعية
ولكنها تنذر بالخطر
ماذا عساها فاعلة؟
ابنائها
وبناتها
معروفون بالعناد
والصبر على المكاره
يارب..
ذهب الاطفال الى مدارسهم
خرجوا من مدارسهم
ذهب الموظفون الى مكاتبهم
اه...
هنا يكمن الداء
هناك نظرات متعالية
ولهجة امرة
واستياء واضح
لاحظت كادقلى الهمس المتداول بين الناس...
والحذر
والتلفت..
حل المساء
واخلد الاهالى الى بيوتهم
هدهم التعب
من كل هذا الجرى وراء المعايش
قليلة العائد..
لبست كادقلها ثوبها الداكن..
فيما عدا نجمة تربعت فى وسط سمائها
وقمر باهت
حائر
والغول يعربد خارج المدينة
يستعدد للدخول
وفجأة..
سمع طلق نارى
تبعه اخر
جلس فى تلك اللحظة جميع اعضاء الخلية ومن بيوتهم
لانهم الوحيدين الملمين بتفاصيل الخراب المستعجل الاتى
من خلف جبال كادقلى..
انتبهت كادقلى تماما
واستيقظت تماما
واصبحت فى حالة انتباه تام
تواصل صوت الرصاص..
وفجأة وقف
وبنفس الطريقة التى بدأ بها...
لم يكن احد يعلم
من اين اتى الرصاص؟
ومن هم الضحايا؟
فى تلك الليلة المنذرة بالخطر..
استمرت الحيرة
حتى الثالثة صباحا
حينما طرق شخص باب استاذ حسن
عايزنك معانا فى القيادة
اى قيادة
العسكرية
دستة جنود مدججين بالسلاح
عيونهم كلها مكر
وكراهية....
| |
|
|
|
|
|
|
|
|
|
Re: فى البدء...كانت كادقلى (Re: nour tawir)
|
تعوذ استاذ حسن من ابليس
وبسمل
وصعد الى البوكس
انطلقت العربة بسرعة 120/الساعة
لا تلوى على شئ
رفع استاذ حسن رأسه الى السماء
كما لو انه يشهد الله
وكادقلى على ذاك الموقف
كان هادئا
ثابتا
مرفوع الراس
مدرك فى قرارة نفسه
ان اللحظة قد حانت
وباسرع مما كان يتوقع...
دخل البوكس مبنى القيادة العسكرية
اى بالاحرى حامية كادقلى
كانت تلك اول مرة يدخل فيها الحامية
كان الهدوء غريبا
وباختصار لم يصدر اى صوت من اى ركن فى ذاك المكان
وفى ذاك الوقت
لكزه احدهم بعنف
انزل يالله
كاد ان يسقط على الارض
جذبه اخر من يده بعنف
من هنا
جاكم البلا فى خلقكم دى...
ادخلوه الى مكتب
ومن مكتب الى مكتب
ثم الى مكتب
حتى وجد نفسه فى نهاية الامر فى غرفة لا تبدو لها اى مساحة
والغرفة عارية تماما من اى شئ
بعد فترة قصيرة عاد احدهم
شخص اخر غير الذين احضروه
قوم تعال جاك بلا
سار استاذ حسن خلفه
ايضا ثابت
مرفوع الراس
هادئ تماما
قاده ذاك الجندى الى غرفة فيها طاولة وكرسى جلس عليه احد الضباط كما يبدو
شاب
تكسو وجههة كل علامات اللؤم والمكر والاجرام..
ليس هناك مكان يجلس فيه استاذ حسن
بدأ التحقيق:
اسمع يا افندى انت.. انا ما عندى وكت اضيعه معاك.
تجاوبنى بسرهة وننهى الموضوع دا وتمشى بيتكم
تذكره استاذ حسن.
هذا هو حماد احد تلاميذه
رد عليه: حاضر يا ابنى..
انا مش ابنك وما تخرج عن حدودك
حاضر حضرة الظابط
ايوا كدا..
اسمع يا افندى انت.. احنا عارفين كل نشاطكم واحسن تقول ومن نفسك ,انتوا بتخططوا لى شنو ضد الحكومة؟
احنا منو؟
وخططنا لى شنو ضد الحكومة؟
وزعنا منشورات؟
قدنا مظاهرات؟
اتكلمنا فى مكرفونات؟
ضربة بعصا غليظة مدبجة الرأس حتى كاد استاذ حسن ان يسقط..
وكمان بتتهزا؟
انا ما اتهزات. انت اتهمتنى بمعاداة الحكومة وانا قلت ليك عملت اى حاجة ضد الحكومة؟
والاجتماعات يا افندى؟
مع منو؟
لعملك كلهم هنا واعترفوا..
حينئذ ادرك استاذ حسن كذب ذاك الظابط الصعلوك...
اعترفوا بى شنو؟
الاجتماعات بتاعتكم..
احنا اصدقاء واهل ونشانا مع بعض وبنتقابل كل يوم وفى اى مكان فى كادقلى..
من هنا ورايح مش حتجتمعوا فى اى مكان يا افندى..
وبعدين انت ما عايز تعترف؟
اخير ليك انا..
الناس البرا ديل ما بعرفوا الله.
والله يا سعادة الظابظ اذا انت شايف انى انا عملت حاجة وانا ما عملتها, فأنا ممتثل لقضاء الله وقدره.
ذعر الضابط
يعنى بتدعى على بغضب رب العالمين؟
لا لا سمح الله.
اذا خلى ربك دا ينجيك مننا..
نادى على احدهم وامره بأن يقوم بالواجب...
كانت ليلة لا تخضع لاى قلم او تعبير..
المهم فى الامر اخرجوه فى منتصف النهار وهو لا يرى شمس الله المشرقة فى ذاك اليوم..
ثم رموه فى قارعة الطريق وهو بقايا جثة وبقايا روح.
بصق عليه احدهم وقال له:
المرة الجاية ما حتطلع منها يا عبد
احنا بس المرة دى راعينا حق الدراسة...
| |
|
|
|
|
|
|
|
|
|
Re: فى البدء...كانت كادقلى (Re: nour tawir)
|
حينما تربعت الشمس فى سماء كادقلى فى ذاك اليوم الغريب...
كان الاهالى فى حالة هرج ومرج
اسرعت الاهالى الخطى بكل اتجاهات المدينة
وقد تحولت الحيرة الى غضب
وغضب جارف
استاذ حسن؟!
افندينا؟!
كاكدلا؟!
هؤلاء خيرة شباب البلد ورجالها وقت الشدة وفى كل وقت...
جمع الاهلى رجالهم من نواصى الشوارع واعادوا كل واحد الى بيته...
خرج افندينا وبنفس (كومر المحلج) الى بيت استاذ حسن ليطئن عليه ثم الى بيت كاكدلا ثم
اسرع حيث سمع طلق نارى بالليل...
ثلاثة شباب وجدوهم فى قارعة الطريق
جثثا هامدة...
ماهى جريمتهم؟
ماذا فعلوا؟
لم يحصل اى شخص فى كادقلى على اجابة لاى سؤال فى ذاك اليوم..
فقط كانت كلها تكهنات بأن الشباب قد تم قتلهم وهم فى طريقهم الى بيوتهم ليلا..
لا يوجد حظر تجول .
اذا ما الامر؟
تحدث بعض الاهالى الى افندينا..
لا يجب ان تتحرك بهذا الشكل فأنت مراقب..
لايجب؟
وهل كان يجب اذلالنا بهذا الشكل؟
هل كان يجب اسائتنا وضربنا والقائنا فى نواصى الشوارع كالكلاب الضالة التى تم
اعدامها؟
قسما عظما سوف يرون منى مالم يخطر على قلب بشر...
العداء وضح ودون اسباب واضحة..
والاليات زحفت على كل المنطقة..
وحرق القرى وقتل الاهالى خبط عشواء , قد غطى المنطقة...
والشر دخل كادقلى وباسرع مما توقعنا..
اذا فهى حرب, وللحرب رجال..
لم يذهب افندينا الى العمل..
وتحدى السلطة باستخدام (كومر الحكومة) فى غير اغراضه..
حكومة؟
وهل توجد حكومة؟
ومنذ متى كان فى السودان حكومة؟
ولا يقولن احدكم اننا فى زمن ديمقراطية..
اذا كانت هذه هى الديمقراطية, اذا فكيف الدكتاتورية؟
واضح جدا ان هذه البلد لم يحكمها سودانيين من صلب هذا الوطن ومن بطن هذا التراب..
ولن..
اذا هذه الحرب هى فى الاساس لانتزاع الحقوق...
وليت الامر وقف عند هذا الحد ولكنها ايضا للقضاء على اصحاب الحق...
وهو فى طريقه الى بيته مساء لم ينس ان يعرج على استاذ حسن مرة اخرى والذى كان فى
حالة صحية حرجة..
ويبدو انه كان اكثر تعذيبا فى تلك الليلة التى لم تكن لها اى ملامح...
دخل وبلا مقدمات بادر استاذ حسن..
اسمع يا حسن جانى رد على الجواب الرسلته للخلية فى الخرطوم بواسطة سيد ولدى
قريت الجواب وقطعته ونتقابل بكرة الصباح فى بيتك..
دا لو أصبحنا!
| |
|
|
|
|
|
|
|
|
|
Re: فى البدء...كانت كادقلى (Re: nour tawir)
|
تحدى افندينا الحكومة تحديا لا جدال فيه
وتخطى كل الخطوط الحمراء فى ذاك التحدى
ولسبب بسيط, فهو قد فقد كل ثقة او امل فى اى حكومة سودانية..
عسكريين ثم ديمقراطيين والنتيجة واحدة
تهميش ثم اذلاال فى جبال النوبة والنتيجة واحدة
تعالى ثم غطرسة ثم لف ودوران من حكومات الشمال والنتيجة واحدة.
وشغلت ذهنه أسئلة كثيرة وهو يعلم تماما ان لا اجابة لها,
وهو البلد دى حقة من؟
سيدها منو من اصله؟
والحقارة والاجرام دا كله ليه و عشان شنو؟
وبما ان افندينا رجل واضح وهادر فى كل اراءه وتصرفاته
لا يقبل الحلول الوسط خاصة فى مسألة الحقوق والواجبات
فقد كان متأكدا تماما ان كوادر الحزب القومى ورغم نجاحاته فى بعض الدوائر الانتخابية وفى قلب الخرطوم
سوف ينزل ذاك النجاح على قاعدته نيران جهنم
اعتقالات ثم حبس ثم قتل ثم تصفية
ثم اشياء لا تخطر على قلب بشر
وليس كوادره من اقاليم السودان المختلفة
ولكن النوبة تحديدا..
لذلك قرر ان يقوم بدوره والواجب عليه دون ان يلتفت الى احد
كان اجتماع الخلية قصيرا ومحدودا
وتبودلت الكلمات كما لو انها تلغرافات
نسوا الشاى او رفضوه
المهم برد واعادوه
نسوا الاكل والشرب
وتقرر فى ذاك الاجتماع تسفير استاذ حسن للعلاج فى الخرطوم ومواصلة عمله من هناك
كاكدلا تقرر ابقاؤه فى كادقلى لمتابعة الموقف
اما افندينا فقد تقرر ان يقوم بجولة سرية على قرى الجبال لتنبيههم الى ما هو اتى
حتى تتم الاستعدادات لذلك
ان نجحت تلك الاستعدادات
حمل افندينا رشاشه ومعه ذخيرة
واختفى ما كادقلى...
| |
|
|
|
|
|
|
|
|
|
Re: فى البدء...كانت كادقلى (Re: nour tawir)
|
تأبط افندينا بندقيته وخرج من كادقلى ذات مساء متجنبا الشوارع الرئيسية للمدينة...
ثم دخل فى مزارع القطن والسمسم والاشجار الكثيفة..
متواريا بالجبال والليل...
حتى وصل الى القرية التى كانت بأنتظاره.
وجد العمده فى اطراف القرية بأنتظاره ومعه اعوانه..
ثم تبعهم افندينا دون كثير كلام..
كانوا يتحركون كالظلال وبسرعة فائقة..
حتى وصلوا مقر العمدة وجلسوا فى نصف دائرة...
وبدا العمدة كلامه:
سمعنا بالحصل يا افندينا...
والجبال الغربية بدأ فيها الحريق والكتل..
ولمن وصلنا منك المرسال حمدنا الله وقلنا نقعد نتفاكر..
ما فى وكت نتفاكر يا العمدة..
الناس ديل قريبين منكم...
ومسلحين..
انتوا سلاحكم كيف؟
بسيط. بنادق صيد وشوية ذخيره..
فى الحاله دى ياالعمدة نطلع الناس فوق راس الجبل وبسرعة...
ونواصل كلامنا فوق..
بما لافندينا من احترام وكلمة مسموعة
و بما للعمدة من احترام يصل حد التقديس فقد بدأ الاهالى فى النتفيذ..
والعمدة يعطى اوامره..
ما فى وكت تشيلوا اى حاجة البتقدروا عليه وبس...
قبل ما تصبج لازم نكون كلنا فى راس الجبل...
وبسرعة فائقة وقدرة من الشباب خلت المنطقة السهلية تماما...
وانتشروا فوق رؤوس الجبال وقد ساعد افندينا فى ادارتهم عسكريا...
وساعدهم فى كيفية اتخاذ مواقعهم حول روؤس الحبال..
وصوبوا بنادقهم وانتظروا..
كان الوقت ليلا..
وعلى مرمى البصر لا يرى المرء غير سلسلة من الجبال...
ورائحة المحاصيل تملاء انوفهم..
فالموسم موسم درت
وقد اخرجت الارض كل خيراتها...
اصبح الكلام همسا...
قال انفندينا للعمدة الذى كان يبلغ السبعين من عمره
ولكنه قوى البنيه
حاضر الذهن
سريع الحركة..
يالعمدة.. النوبة هالكين يعنى هالكين
لو ما ماتول الليلة الناس ديل حيرجعوا بكرة بسلاح اتقل وذخيرة كتيرة..
المهم الفضل لينا هسه, نموت بشرف...
رد العمدة: الشباب ما تخاف عليهم..
ووكت بقت الحرب عشان الارض..
انت بكرة تشوف يا ياكافى...
فيما هم يتحدثون..
وبقية اهل القرية كل من موقعه ينتظر..
وفى الثالثة صباحا..
وصل الشر وهو يكبر...
الله اكبر .. الله اكبر..
وبدأت الاصوات تقترب
ومن ثم بدأ الحرق من اطراف القرية...
وبدأت الدواب تجرى فى كل اتجاه
ولكن كان للاعداء خطه
وهو توجه مسار (البهايم) ومن ثم يستلمهم بعض الجماعة فى اطراق القرية فيما يشغل الباقون بضرب النار واشعال القرية...
لم يجدوا امامهم كائنا من كان..
خلت القرية تماما من اى شخص..
حينئذ انتبه الضابط وقال لهم..
دا كمين..
للخلف دور...
وما ان بدأوا بالتراجع حتى فتحت النيران من فوق راس الجبل,,
ولم يكن بمقدورهم الرد على تلك النيران من سطح الارض.
فقدوا بعض الارواح
وانسحبوا...
حتى التاسعة صباحا هدأ الجو تماما..
امر افندينا بعض الشباب بالنزول وجمع سلاح القتلى..
وتحدث الى العمدة قائلا:
المرة الجاية ما حيجوكم من الارض..
عرفوا الخطة..
المرة الجاية حيكون القصف جوى
وما فى حل غير الكراكير..
الكراكير يا افندينا فيها الدبايب والعقارب...
يموتوا من الدبيايب والعقارب ولا من منرصاص غادر؟
فهمت يا كافى يا ولدى..
واصل افندينا..
طبعا محصول السنة حرقوه كله..
مافى مشكلة. الجبال فيها خير كتير طول السنة.دبروا حالكم وانسوا المحصول..
فى ظهر ذاك اليوم نزل افندينا من الجبل ومعه بعض الشباب ببنادقهم زذخيرتهم..
ومن ابدى الاستعداد للذهاب معه امره افندينا بأن يبقى ويحمى القرية..
خرج مع نفر من الشباب لا يزيد عن الاثنى عشر شخصا
خرجوا للقرية التاليه حسب قرائته للخريطة التى يحملها
وحتى يساعد اهلها على الاستعدادات ايضا..
اسرعوا يا شباب..
لو الفى راسى دا صاح
الناس ديل ماشين القرية القدامنا ديك..
والليلة حيكون انمتقامهم اشد..
| |
|
|
|
|
|
|
|
|
|
Re: فى البدء...كانت كادقلى (Re: nour tawir)
|
احدث خروج افندينا واستاذ حسن ومن قبلهم صابر , ميمونه, سيد سليمان ود اللمين من
كادقلى فراغا كبيرا..
اذ كان وجودهم مبعثا للاطمئنان
فقد كان لاستاذ حسن وافندينا دور واضح فى معالجة بعض القضايا البسيطة بين الاهالى والاسر...
اصبح الحديث همسا فى شوارع المدينة
واصبح التحرك بحذر ايضا...
رغم انه وفى مثل ذاك الوقت من كل عام , اى فى موسم الدرت تتم كثير من الافراح والحفلات..
ولكن اختفت الافراح
واصبح الجميع يهرولون الى منازلهم قبل غروب الشمس تجنبا للرصاص الذى لا يعرفون مصدره...
اصبحت كادقلى شديدة الحزن على الحال
وعلى ما هو اتى...
اصبح تحدى الحكومة علنيا.
والمعاملة فى دوائر الحكومة اتسمت بالقسوة والاهانة العلنية للنوبة
ايضا بدأت الحركة الشعبية تقوم بمناوشة نظام الخرطوم عن طريق جبال النوبة
اى ان جنود الحركة يقومون بعمليات عسكرية ويفرون
ثم تأتى قوات الحكومة وتدك القرية بمن فيها وما فيها بتهمة التامر مع المتمردين..
اهملت كادقلى مظهرها المشرق الجذاب وكست جبالها وشوارعها الوانا باهته لا يكاد يراها
الاهالى وهم يهرولون من والى...
فى عصر ذاك اليوم كان افندينا قد اقترب من القرية التى توجهوا اليها..
كان الشباب حوله صارمون
بدا عليهم الغضب العنيف
ولكن احدهم كان بالقرب من افندينا طوال الطريق يسأله:
وهم بيعملوا كدا ليه افندينا؟
دايرين الارض..,
وطيب ماهم عايشين معانا من زمان..
دا عبث من الحكومة والبقارة زى ما انت شايف كتير منهم تعليمهم محدود برضو.
ولو تلاحظ البقارى لمن يقول وحات الله..
احتمال يكون صادق او لا
ولكن لما يقول وحات سيدى لازم تثق فى كلامه..
ودا مربط الفرس يا ابنى.
اها و حات سيدى دى , هى البيستغلوها ويلعبوا بيها على عقولهم...
وهم فى طريقهم تجنبوا الشوارع الواضحة ولا نقول رئيسية واتخذوا من الجبال ومزارع
الذرة والقطن ستارا لهم..
وفجأه رأوامن على البعد نيرانا وصلت الى عنان السماء
وسمعوا الهرج والمرج
وجرى المواشى
فطلب منهم افندينا ان يغيروا وجهتهم..
النار دى اكلت الناس والزرع
مافضل زول
وما فضل شئ
مافى فايدة نوصلهم
نغير اتجاهنا يا اولاد....
| |
|
|
|
|
|
|
|
|
|
Re: فى البدء...كانت كادقلى (Re: nour tawir)
|
اشرقت شمس كادقلى ذاك الصباح قبل اوانها وهى تسرع الخطى الى كبد السماء
الجو ساخن جدا ولم توجد نسمة هؤاء واحدة
تحول الهمس والهدوء الى حركة سريعة واحيانا هرولة..
وكادقلى تسرع معهم الخطى الى اكمال تلك الترتيبات
وبما ان السيل قد بلغ الزبى
فقد قررت كادقلى ان حكومات الخرطوم تحتاج الى ذاك الاجراء للفت النظر
خرج من احد الشوارع الضيقة مجموعة شباب من مختلف الاعمار
وحتى تلاميذ المدارس
ونساء
واطفال
وحتى الشيوخ والعجزة..
كلهم مسرعين ويبدو ان هناك خطب جلل
لم يكن هناك هرج ومرج
ولكن يبدو ان الهدف كان واضحا...
وان الامر كان مخططا بدقة وعناية
وبدأت المظاهرة من اخر حى الملكية
وهى فى طريقها الى وسط المدينة...
فى هذاك الاثناء تحركت المظاهرة من بقية الشوارع والازقة وبدأت تختلط بمصدر المظاهرة..
يحتار المرء فى تلك اللحظة من مدينة كادقلى المليئة بالمفاجاءت...
صوت واحد هادر..
نموت... وتحيا كادقلى..
نموت...وتحيا كادقلى
نموت... وتحيا كادقلى..
الرصاص لن يثنيا...
نحن على هدى افندينا..
واضح من المشهد المهيب ان كادقلى قد خرجت عن بكرة ابيها..
واستمرت حتى وصلت المجلس البلدى ووقفت تهدر ويتعالى صوتها..
ثم استمر الجمع فى طريقهم الى (امبطاح) مبنى القيادة العسكرية
الامر الذى لم يحدث من قبل فى تلك المدينة شديدة الكبرياء
الامر الذى لم تتوقعه حكومة السيد الصادق او اى من حكومات الخرطوم..
لم ينفع اى تدخل من الحكومة
وجهاز الامن اختفى تماما وبدأ يتابع المظاهرة من خلف الابواب والشبابيك...
استمرت المظاهرة الى ما بعد منتصف النهار..
قتصرت المظاهرة على النوبة فقط
وبدا التجار يتلفتون يمينا وشمالا
كل منهم يفكر فى مستقبل تجارته...
لانه ومن الواضح ان تلك المظاهرة هى بداية شرارة
ونار سوف لن تخمد مرة ثانية...
ثم بدأ الجمع يتفرق...
تلك المظاهرة هزت السلطة
وبدأت عرباتهم بعد المظاهرة تسرع فى مختلف طرقات المدينة
لا يعرف لها احد هدف واضح...
بعد انتهاء المظاهرة طلب مدير المستشفى حضور كاكدلا الى مكتبه
فى التو والحال...
| |
|
|
|
|
|
|
|
|
|
Re: فى البدء...كانت كادقلى (Re: nour tawir)
|
انت ما مشيت المظاهرة ليه يا كاكدلا؟
سؤال غريب يا دكتور..
جاوب على سؤالى...
انا شغال يا دكتور..
يعنى لو ما شغال كنت مشيت؟
انت دايرنى لى شنو بالظبط يا دكتور؟
فى نقص فى مخزن الدوا...
نقص كيف يعنى؟
الناقص شنو؟
فى شاش وقطن وحبوب ناقصة...
يا دكتور انا شغال فى المستشفى دى اكتر من عشرين سنة.. وماحصل وجهت لى تهمة زى دى..
انت عايز تصل لى شنو بالظبط يا دكتور؟
عايز اقول ليك يا كاكدلا الدوا دا بيمشى للمتمردين..
متمردين مين يا دكتور؟
يا كاكدلا ما تستهبل...انت بتتعاون مع المتمردين..
اولا اعرف مين هم المتمردين يا دكتور؟
ثانيا من غير المعقول تجى المستشفى ولا اقل من سنة وتتهم شخص بيعمل فى المستشفى
السنين دى كلها بعدم الامانه..
انا ملفى نضيف يا دكتور..
ولو عايز اى تهمة وخلاص , خليها فى حدود المعقول..
انت بتدينى اوامر؟
يا دكتور المناقشة دى هدفها واضح جدا..
انت عايز تلبسنى تهمة وخلاص..
ويجواا ناس الامن يقولوا خاين ومتمردين والكلام الانتوا بتقولوا فيه دا..
قول لى انت عايز تسلمنى لى ناس الامن وخلاص..
وهم ما دايرين ليهم تهمة بالمناسبة...
اخدونى قبل كدا من غير ما يقولوا لى السبب شنو زاتو..
انا بريحك من اللف والدوران دا كله..
لف ودوران يا كاكدلا؟
ايوا لف ودوران يا دكتور..
خلينا فى المهم انت داير منى شنو؟
انت موقوف يا كادقلى ومحال الى التحقيق..
انا عارف انى موقوف من ساعة ما ناديتنى...
فى حاجة تانية ولا اتوكل على الله؟
وانت الزيك بعرف الله؟
لا...لا..لا.. يا دكتور..
الكلام دا ما يطلع من واحد متعلم زيك..
تعليمك دا كله مشى وين فى اللحظة دى؟
برا يا كاكدلا..
حاضر يا دكتور.. سلام عليكم..
خرج كاكدلا من مكتب الدكتور وهو يعلم تماما ان نهايته قد حانت..
ذهب الى بيته راسا واخبر زوجته بأن تاخذ الاولاد وتذهب الى بيت ابيها..
رفضت الزوجة..
حمل هو الاطفال الى بيت جدهم وطلب من والد زوجته ان يأتى لاقناعها..
طلب منه(نسيبه) ان يغادر البلد..
فرد قائلا: ما انا البجرى من الموت يا عمى..
يعنى دا رايك فينى؟
ابدا يا ولدى ولكن ربنا سبحانه وتعالى برضو قال:
بسم الله الرحمن الرحيم
(ولا تلقوا بايديكم الى التهلكه)
صدق الله العظيم..
تهلكة اكتر من الاحنا فيه يا عمى؟
خرج كادقلى من منزل عمه وزار بعض الاصدقاء وقام ببعض الترتيبات ثم عاد الى بيته..
لم يكن مستغربا سماع الرصاص فى تلك الليله
حيث القمر ساطعا..
رافضا النوم..
ومصراعلى ان يشهد الله على تلك الجرائم..
فى صبيحة اليوم التالى وجد ستة عشر شابا من حجر المك قد تم اعدامهم رميا بالرصاص
ومن بينهم كاكدلا....
| |
|
|
|
|
|
|
|
|
|
Re: فى البدء...كانت كادقلى (Re: nour tawir)
|
توفرت فى أفندينا عدة صفات لم يسع هو اليها فى يوم من الايام..
ولكن وبما لله فى خلقه شئون..
فان لكل من تلك الصفات وظيفة دقيقة تؤديها وبلا أدنى خلل..
منها الطول الفارع وضخامة الجسم..
الصوت الجهور..
النظرة الثاقبة كما لو أنه أحد الصقور التى أتخذت من سلخانة حى الموظفين مقرا لها..
ثم السخرية من كل ماهو غير منطقى..
ثم الاستقامة كما لو أنه عامود من الصلب...
وصل افندينا الى الجبال الغربية مساء ومعه بعض الشباب الذين قرروا أتباعه..
شاء هو ام ابا..
وكثرت اسئلتهم..
افندينا احنا فى حالة حرب؟
نعم يا ابنى؟
افندينا انحنا حنحارب منو؟
نحارب البيحاربونا..
و البيحاربونا هم منو يا افندينا؟
دا سؤال كبير....حا اجاوب عليه لمن ناخد فترة راحة..
أنفدينا..افندينا..
وهم بيحاربونا ليه؟
دايرين الارض..
وطيب الارض دى ما بتشيلنا كلنا افندينا؟
بتشيلنا كلنا.. بس هم ما دايريننا معاهم..
والكلام دا كيف افندينا؟
زى ما قلت ليك يا ابنى..
طيب وانحنا نمشى وين افندينا؟
أهو انت جاوبت على السؤال بتاع الحرب..
احنا نموت ..
ونموت كلنا افندينا؟
ونموت كلنا ياعبدالرحيم..
بدا عبدالرحيم شاردا..وبدا أنه لم يفهم شيئا..
طيب أفندينا(بحماس مفاجئ)....والنسوان والعيال الصغار ديل كلهم يموتوا كمان؟
أيوا يا عبدالرحيم..
بس أنت اصبر على شوية..
وانا حا أجاوب على كل الاسئلة دى..
حينئذ..
خرج صوت عبدالرحيم كما لو أنه كبر مائة عام فى عشرة دقائق..
هادئ..
وقور..
ممتلئ تصميم وارادة..
وادراك مفاجئ وكامل بكل ما يجرى..
.............
دى ما اسئلة يا افندينا؟
ومال شنو يا عبدالرحيم..
دى سكاكين كانت تقطع فينى حته حته..
وأنا من هنا ورايح افندينا..
ما يفرقنى منك الا الموت!
أموت معاك..
أحسن ما أموت ميتة رخيصة!
| |
|
|
|
|
|
|
|
|
|
Re: فى البدء...كانت كادقلى (Re: nour tawir)
|
فيما كان أفندينا يبحث عن مأوى له ولمرافقيه من الشباب وسط الجبال..
وصلت الى أنوفهم رائحة الشواء..
تصاحبها صيحات وفوضى وجلب..
قطب افندينا حاجبيه..
وأفرد طوله كاملا..
ممددا أنفيه حتى يتأكد من مصدر تلك الروائح..
أحس بقبضة حادة..
وقليل من الدوار تحكم فيه فى لحظه..
واستعاد هدوئه فى الحال..
وفيما هو فى تلك الحالة..
برز عبدو ديجانقو من وسط الشباب..
افندينا دى شنو الريحة دى؟
دى ريحة اهلكم يا عبدو..
لم يفهم عبدو..
أهلنا؟
نعم عبدو..
دى واحدة من الغارات..
وفى الحالة دى بيحرقوا القرية بالناس الجواها..
وكمان البهايم..
بدأ عبدو ديجانقو فى الاستفراغ..
ثم قفز عبدالرحيم الى الامام..
افندينا أنت قلت بيكتلونا..لكين بيحرقوا الناس ليه؟
بيحرقوا القرية يا عبدالرحيم بكل الفيها..
بدا عبدالرحيم كمن فقد عقله..
افندينا لازم نمشى هسه ونعلمهم درس ما ينسوه..
تمشى وين يا عبدالرحيم؟
ديل معاهم سلاح متطور..
وعربات لاندكروزر..
يعنى ما حتقدر تلحقهم..
وبعدين انت ناسى عددنا كم يا عبدالرحيم؟
والعمل افندينا؟
الصبر يا عبدالرحيم..
والتخطيط الهادئ السليم..
افندينا ممكن اسأل سؤال؟
اتفضل عبدالرحيم..
طيب أحنا ماشين وين؟
ماشين الجبال الشرقية..
ليه؟
عشان نقابل الخلية البتحارب هناك..
وليه ما مشينا دغرى بدل ما نلف بالجبال الغربية؟
عشان فى حاجات حنعملها وحااوريكم ليها..
حاضر افندينا..
زى ما تقول..
أنحنا معاك ووراك لغاية ما توصل وتوصلنا محل داير..
ما محل داير يا عبدالرحيم..
طيب شنو افندينا؟
محل لازم نمشى!
| |
|
|
|
|
|
|
|
|
|
Re: فى البدء...كانت كادقلى (Re: nour tawir)
|
أخيرا جدا عثر أفندينا على (كركور) واسع ليضمه هو وجماعته للمبيت..
أستغرق تنظيف الكركرور وقتا غير قليل للتاكد من خلوه من العقارب والثعابين..
ومن ثم بدا النقاش..
عبد ديجانقو:
افندينا الناس ديل حرقوهم ليه؟
سياسة حكومة.
سياسة حكومة كيف يا افندينا؟
يعنى يدرسوا المداخل والمخارج بتاعة القرية فى الاول..
يحصروا عدد الناس..
وبعدين الساعة تلاتة ولا اربعة صباحا يبتوا يحرقوا القرية.ز
بى اى وزول وأى حاجة..
برضو ليه يا افندينا؟
ليه دى سؤال صعب. لكن لو راجعنا تاريخ العصور المظلمة مثلا نلقاهم كانوا بيعملوا نفس الشئ, بس بيحافظوا على النسوان والاطفال عشان يستخدموهم فى اغراض تانية.زلكين اى راجل قادر على القتال بيكتلوه على طلو.ز
مثلا عندكم جنكيز خان هولاكو..
ودا يا ابنائى كان قائد من المغول.ز وعاش فى فترة ما بعد الاسلام..
المنطقة بتاعة آاسيا وتركيادى كلانت عبارة عن سهول ووديان بيعيشوا فيها الناس زى العرب الرحل عندنا.. وكانوا دايما بيتحاربوا على مناطق الكلاء والمرعى..
والقوى يا كل الضععيف.
جنكيز خان هولاكو كان قوى وكانت عنده طموحات.ز
والطموحات دى أنه يوحد القبائل المتناحرة دى فى حاجة اسمها confederacy
| |
|
|
|
|
|
|
|
|
|
Re: فى البدء...كانت كادقلى (Re: nour tawir)
|
الconfederacy يعنى أتحاد القبائل ديك كلهاعشان تعيش بدون حروبات..
بس الخطأ بتاع جنكيز خان هولاكو فى رايى هو ممارسة الرق..
وكان عايز الناس تدين ليه بالولاء..
الحاصل لينا هسه دا هو نفس الكان بيعمله جكنيز خان هولاكو.
فقط الفرق بينه وبينهم هو انه جنكيز خان كان بيسعى للوحدة.
والناس دى فاتت جنكيز خان لانها عايزة تمسحنا من الوجود..
فى الوقت الكان جنكيز خان هولاكو بيقول انه قيمة الانسان هى أعلى قيمة..
عبدو ديجانقو:
يعنى يا افندينيا حكوماتنا دى جنكيز خان هولاكو أخير منها؟
بالضبط كدا..
والعمل؟
العمل يا اولاد هو زى ما قلت ليكم الصبر..
والعمل المتواصل..
دا مشوار طويييييييييييل...
ومش معروف حينتهى متين وكيف؟
يعنى حتى لو الحرب دى وقفت برضو حيكون فى مشاكل تانية..
الناس البتكتل فينا هسه ديل هم نفسهم ما عارفين نتيجة الحرب دى شنو؟
عبدالرحيم:
كيف يا افندينا؟
الحكومة يا عبدالرحيم قالت ليهم النوبة ديل كفار.
أنت شايفنا كفار ياعبدالرحيم؟
لا طبعا افندينا.
البقارة صدقوا.. والفلاته صدقوا..
مش لانه احنا كفار.هم عارفين انه الكلام دا ما صاح لانه احنا بنصلى فى نفس المسجد ونفس الكنيسة.
ولكن وعدوهم.
لو كتلتوا النوبة.. الارض دى حلالكم..
مافى فى تاريخ الدنيا ناس بتتمسح من الوجود.
البقارة والفلاته المتجاوبين مع الكلام داما فاهمين زاتو الحاصل شنو.. وماتنسى انه مستوى
التعليم بسيط.
عشان كدا بيستعملوا السلاح فى الكتل والسرقة والنهب والكلام دا كله.
لما يرجعوا اصحاب الحق..
أو حتى أولادهم بعد زمن طويل..
المشاكل دى حترجع تانى..
وبعدين البقارة والفلاته والبيحاربوا للحكومة ديل حيكتشفوا انه اتضحك عليهم.
حينئذ موقفهم حيكون صعب..
| |
|
|
|
|
|
|
|
|
|
Re: فى البدء...كانت كادقلى (Re: nour tawir)
|
فيما كان افندينا يناقش خطته الدفاعية القتالية البسيطة فى استراتيجيتها..
والمعقدة فى مضمونها وغاياتها..
كان القمر قد بدأ يتلمس طريقه الى كبد السماء..
رقيقا...
حساسا..
ومستحيا كعادته حينما يطل على تلك البقعة المنسية من أرض الله..
وقف القمر حائرا..
وهائما أمام ذاك الكركور..
وبدأ يتصنط لما يدور بين افندينا ومجموعة الشباب التى تسانده..
بلا قيد ..
أو شرط..
أو عائد..
سوى كرامة الانسان..
والحق فى العيش الكريم..
خرجت كادقلى فى ذاك الوقت من المساء..
وهى على غير عادتها...
لم تتزين..
ولم تخرج بكامل هيئتها كما جرت العادة..
اصابها كثير من القلق..
تعكر وجهها وانعكس فى ضوء القمر رغما عنه..
وثار الغبار فى شوارعها...
كما لو أنه رياح الخماسين فى بداياتها..
ورغم (بركات)شهر نوفمبر..
موسم الحصاد..
وأخراج الارض لكل خيراتها.
ألا أن ذلك الكرنفال.
لم تصاحبه رقصات الكامبلا..
ونشاط الكجور..
ورقصات البخسة..
وكافة الطقوس التى تصاحب ذاك الموسم..
بل العكس..
سار الاهالى الى بيوتهم فى كادقلى كما لو انهم يشيعون جنائزا غالية..
أطبق الهدوء على مدينة كادقلى..
وبدت هى فى غاية القلق والتوتر...
على غير عادتها..
واخذ الحديث والضحك والرقص شكلا آخر...
هدوء مطبق..
وهمس متقطع..
ونظرات زائغة..
وعيون تتلفت ذات اليمين وذات اليسار..
وأنطلقت كادقلى تسأل عن افندينا وأستاذ حسن وصابر وميمونة..
وكل ابنائها الذين شكلوا ايامها بكل قيمها الجميلة..
والحبلى بالمجهول..
أفتقدت كادقلى ابنائها وبناتها..
سألت كادقلى عن صابر وميمونة..
عن فاتيمتو وزوجها الحلاق..
عن افندينا ومجموعته..
عن سيد ابن افندينا ووعيه وادراكه كما لو أنه هو الوحيد الذى يملك الاجابة لكل اسئلتها..
تأذت كادقلى كثيرا من صمت ابنائها فى موسم الحصاد..
الخطب حينئذ جلل!
ماذا هى فاعلة؟!
نظرت الى القمر فلم تجد عنده الاجابة الشافيه..
أطرقت الى ارضها المعطاء دائما وابدا..
فوجدتها صامته وباردة فى سطحها..
تغلى فى داخلها..
نظرت الى ثانوية تلو للبنين..
وقد كان ذلك آخر أملها فى الاجابة الشافية..
ولكنها روعت..
حينما أكتشفت ان ثانوية تلو للبنين..
والتى تحمل المفاتيح لكثير من الاسرار..
تطالعها فى صمت..
وحزن..
ولكن فى ارادة حديدية..
أحست معها كادقلى بالرعب يسرى فى اوصالها!
كانت تلك احدى الامسيات التى لم تعرفها كادقلى فى حياتها...
أحست بالعجز فى نهاية الامر..
ثم أطلقت العنان لتفكيرها ونظراتها الى حيث يجلس أفندينا وجماعته.ز
دون ان تدرى هى أنهم فى ذاك الاتجاه..
يرسمون المستقبل الذى تحلم به!
| |
|
|
|
|
|
|
|
|
|
Re: فى البدء...كانت كادقلى (Re: nour tawir)
|
خالص التحايا..
ايها المدينه كادقلى..
ايتها المراءه كادقلى الاستاذه (نور)..
لازلنا عطشى من سيرة المدينه فااسقينا حكى ..
الا ان نروى جوفنا حقيقة هناك على ارضها..
و
فى البدء...كانت كادقلى
| |
|
|
|
|
|
|
|
|
|
Re: فى البدء...كانت كادقلى (Re: nour tawir)
|
بت كدوقلى أختى نور..
لك أهدى ..
أنحنى تبجيلا
بشعر مضئ
من الخيال المقدس
لاحيئ النساء الخضر ..
وكنا كعاشقين حقيقين
نهزى بذكريات حبنا الماضى
وأضفنا أن كــادوقلى
أجمل من زيوريخ
وأستدعينا الطفولة
بين الغابة والجبل
اه من البلاد التى شردتنا
غرباء تحت الجليد.
هذا الشعر هو نتاج هذه المدينة التى تمثل أجمل مارايت ليست لانها مسقط راسى ولاننى تصعلكت فى كل المدن لم ولن أجد أجمل منها طبيعة وأناس وتراث غنى بالبهجة والأساطير .
فى منزل جدى الكائن جوار بيت الراهبات فى حى السوق التحت جوار مدرسة الشرقية تقول لى جدتى أن المك رحال ذهب الأبيض عام 1922 وهو يبحث عن شخص يعلم الناس الكتابة فوجد الفكى حامد محمدنور وهو قادم من قرية الكتياب فجاء به وأعجبته جدتى وهى تورد الماء فى ميرى فتزوجها وأنجبوا ..والدتى أم الحسن حامد وخوالى محمدنور ويوسف حامد ومحمد أحمدأبودقن ومنح جدى أراضى وقام ببناء المسجد القديم جوار بار حبشى وتبع جدى من الكتياب ابى وهو ابناء محمد القاضى أول من درس ابن عمنا التجانى يوسف بشير القرأن فى خلوة الكتيابى باأمدرمان وجاء الجلابة من قرية الكتياب إلى كادوقلى وولا يوجد جلابى لم يتزوج من المنطقة عمر الخليفة وأبناء عبد الحفيظ و...
يعنى لاأريد أن أقول لك أن هذة المدينة لهذة الخليط دور فى تأسيسها بمحبة وسلام وهم مازالوا هناك لم يهاجروا مثلى ومثلك .. ولا تقولى بأن الجلابة شردوا ليس كذلك لاننا ببساطة لانعرف وطن غير تلك المدينة أينما يولد الناس ويعيشوا ويندمجوا فهى بلادهم مع الأحتفاظ للسكان الأصلييين بحقوقهم الثقافية والأعتراف بها .
إننى أشتركت فى البورد متأخر ولكننى يوما بعد أذنك سوف أكتب ما أعرف عن هجرة الجلابة فى حى السوق بكادوقلى منذ دخول جدى الفكى حامد عام 1922وأرتباطة بأسرة الفكى على الميراوى .
وتقبلى تحيات أسرتى الصغيرة معى هنا فى الغربة . واصلى ذكرياتك ونحن نتابع رصدك الجميل ولكن أهتمى يانور بالبعد الجمالى للفكرة فى اثناء سردك .مع حبنا لك .
| |
|
|
|
|
|
|
|
|
|
Re: فى البدء...كانت كادقلى (Re: محمد القاضى)
|
القراء/ت الاعزاء...
الاخ المحترم محمد القاضى...
(بما أنك اول المتداخلين بعد أن انصرفت عن هذا البوست لمدة طويلة)..
قبل أن أدخل فى موضوعى..
أكرر شكرى أجزله للاخ بكرى أبوبكر..
الذى تفضل مشكورا بأحضار القصة من الارشيف..
وأوعد بتكملتها هذه المرة..
وسوف أعود مساء اليوم..
وسف ابدأ بالرد على مداخلة محمد القاضى..
| |
|
|
|
|
|
|
|
|
|
Re: فى البدء...كانت كادقلى (Re: nour tawir)
|
الاخ العزيز بكرى ابوبكر
ماعارفة ليه أنا دايما متلومة معاك؟
وبدون قصد يشهد الله..
قلبت البوست قبل قليل...
بغرض الاستمرار فى الكتابة...
فاذا بى اجدك رفعت البوست!
والله لوم منى يا بكرى..
وعوجة شديدة خلاص..
وممسوحة فى وشى..
وعشان خاطرك...
وخاطر القراء..
حا أركز مهما كانت ظروفى..
ابشر بالاستمرار حتى نهاية القصة!
| |
|
|
|
|
|
|
|
|
|
Re: فى البدء...كانت كادقلى (Re: Shams eldin Alsanosi)
|
شمس الدين..
كتلك براك عادل عثمان؟
دا عمل فينى عملية صعبة جدا جدا..
وهسة محتاجة break...
عشان اقدر اواصل..
المشكلة يا شمس الدين انه احبابنا السودانيين ما قادرين يتخيلوا ارتباطنا (بالحتة ديك)..
شكله كيف..
وكادقلى بالذات..
بالنسبة لى هى معنى وجودى..
وقيمتى..
وكيانى..
وكل شئ..
يعنى من غير كادقلى..
لا اسوى شئ...
تخيل أنه أنسان يعيش أكتر من عشرين سنة وهو لا شئ!
دى مش قدرة الله سبحانه وتعالى فى اسمى معانيها؟!
| |
|
|
|
|
|
|
|
|
|
Re: فى البدء...كانت كادقلى (Re: nour tawir)
|
توفر لدى أفندينا فى تلك الليلة أحدى وخمسون شابا ورجلا...
يحملون بنادق صيد وبعض الذخيرة..
الاسر التى بقيت خلفهم فى أول محطة زاروها أنتهت بكاملها فى الغارة التى حدثت فى اليومين
المتاليين لمغادرتهم تلك القرية...
هذا عدا الذين سيقوا الى معسكر مسور بالشوك قد بدأ الاعداد له حول مدينة كادقلى..
وأغلبهم من النساء والاطفال الناجين من النيران...
لم تتوفر لدى أفندينا ومجموعته معلومات عن نتائج الحريق الذى أندلع فى تلك الليلة..
حيث مازالت رائحة الشواء تزعج انوفهم..
وأستمر الاجتماع داخل الكركور..
كانت الخطة الاساسية هى تنبيه القرى المجاورة لموجة الشر الذى يزحف اليهم بخطى حثيثة..
أما المواجهات القتالية فهذا ما منعه أفندينا تماما..
نسبة الى محدودية عددهم..
وافتقارهم الى السلاح..
عبدالرحيم قلق بطبيعة الحال..
ومشتعل على الدوام..
وبما أنه لم يكن بمقدوره المواجهة فقد قرر الحصول على أجوبة لكافة الاسئلة التى تدور بخلده فى
ذاك الاجتماع..
افندينا..
نعم يا ابنى..
يعنى أحنا ما حنحاربهم كله كله؟
ما هسه يا عبدالرحيم ...طول بالك..
المواجهة فى الوكت دا معناها أنتحار جماعى..
يعنى أفندينا ممكن لى قدام يحصل؟
انشاء الله يا ابنى..
طيب افندينا والناس الفى كادقلى؟
ديل أحتمال ما يدخلوا ليهم عديل...
طيب كيف افندينا؟
يعنى حركة اغتيالات..
زى ما حصل لكاكدلا والمعاه؟
بالظبط كدا يا عبدالرحيم..
أأأأأأأخ..أنا كا لميت فوقهم..
حيحصل يا عبدالرحيم..
وان شا الله ما يحصل..
ذعر عبدالرحيم...كيف افندينا ما يحصل؟
أن شا الله الموت دا يقيف يا عبدالرحيم..
نظر عبدالرحيم الى وجه افندينا مليا..
ثم اردف قائلا وبتأكيد واضح:
افندينا..
نعم عبدالرحيم..
أنت متأكد أنه الكتل دا ماحيقيف..
للاسف ياعبدالرحيم كلامك صاح...
| |
|
|
|
|
|
|
|
|
|
Re: فى البدء...كانت كادقلى (Re: nour tawir)
|
خرج صابر من قاعة المحاضرات ظهر ذاك اليوم وبدأ يتجول ببصره حول مقاعد كلية الحقوق بجامعة
الخرطوم..
حيث كان على موعد مع سليمان وداللمين..
وجد سليمان جالس وهو مطرق..
مهموم..
وقد لاحظ صابر أن يداه كانتا ترتعشان بشكل واضح..
وقف صابر أمامه..
فاردا طوله وجسمه النحيل..
وفى شفتيه ابتسامه قلقة أظهرت ما بداخل ذاك الفم من اسنان ناصعة البياض..
وأنتظر سليمان ليقل شيئا..
تلك العلاقة لم تحتج الى تحايا وبروتوكولات..
فهى صداقة طفوله..
تغلفها نسبة لا منتهية من الشفافية والحب والثقة..
ولكنها ايضا مغلفة بأحداث اكبر من هذين الشابين..
أحداث مدمرة..
نيران وقتل وبارود وحرائق وكل ما يخطر على قلب بشر من فظاعة..
ومستقبل أمة بالكامل يهتز كأوراق الشجر فى فصل الشتاء..
فى شنو يا سليمان؟ مالك؟
ما تتكلم يا أخى أنا ما ناقص..
الجبال..
أى جبال يا سليمان..
عندنا غيرها؟
حينئذ جلس صابره بهدوء كما لو أنه قد الم به مرض قاتل سرى فى جميع اوصاله..
وحصل شنو يا سليمان؟(علا صوته قليلا)..
فى غارات فى الجبال وباين كدا أنها برنامج مرسوم ومحدد..
طيب ما احنا عارفين دا كله حيحصل..
ما بالطريقة دى يا صابر؟
ومال كيف؟ الموت يا هو الموت يا سليمان..
دا ما موت..
بيحرقوا الناس والبهايم وبكتلوا اى واحد قادر يحارب. والباقين بلموهم ويودهم فى معسكرات
(مزروبة) بالشوك..
بدأ صابر يسأل بكلمات بطيئة مركزا على كل كلمة , وقد بح صوته تماما..
جبت الكلام دا من وين يا سليمان؟
ناوله سليمان خطابا تبدو عليه آثار عدوان سافر وقراءة متكررة الف مرة..
| |
|
|
|
|
|
|
|
|
|
Re: فى البدء...كانت كادقلى (Re: nour tawir)
|
أستغرق صابر دهرا بكامله لقراءة الخطاب..
ثم ألتفت الى سليمان فى هدوء ممل وسأله..
وانت رايك شنو يا سليمان؟
أنتفض سليمان..
عيناه كما الجمر..
زادت ارتعاشة يديه..
وبدأ الزبد يخرج من شفتيه قبل أن يتحدث..
رأيى شنو يا صابر؟!
أنت عمرك ما وثقت فينى..
صابر مقاطعا..
دقيقة..دقيقة..دقيقة..
أولا ولمعلوميتك فى اربعة شخصيات شكلت حياتى..
سليمان مقاطعا وقد بدا عليه التاثر:
حبوبتك و جدك وأنا,...
صابر...
أنت عارف يا سليمان..
عارف..
المشكلة انه علاقتى بيك هى برضو الشكلت حياتى وانت واحد من الناس دى..
ولما تسالنى سؤال زى دا يا صابر...
يبقى حكم بالاعدام فى جريمة انا ما ارتكبتها..
أنا آسف يا سليمان..
ولكن..مش البقارة هم البيعملوا الحاجات دى؟
مش انت بقارى يا سليمان؟
أنا بقارى يا صابر..
لكين الجبال الشكلت شخصيتك ومبادئك , عملت فينى نفس الشئ..
دا وضع خطير...
وصعب..
وأكبر بكثير من العلاقة البينى وبينك..
وبعدين يا صابر بلاش الكلام البترمى فوقه يمين شمال..
صابر مقاطعا:
داير كلامى معاك يكون (منمق)؟ يا سليمان؟
مش القصد..
بس كلامك حار..
يعنى شنو البقارة البيعملوا كدا؟
يا سليمان.. أنا عارفه موقف صعب. و زى ما الجبال بتعنى كل شئ بالنسبة لى..بتعنى كل شئ بالنسبة
ليك..
لكين لما أهلك يعموا كدا.. أنت ما حتلومنى على اى حاجة..
صابر؟
نعم سليمان...
أولا عمك ود اللمين مات بالسكتة..
قفز صابر على رجليه..
متين؟ وليه؟
دى يا صابر ما دايرة ليها متين وليه؟
عمك عرف الحاصل والحيحصل..
أنا معاك فى الجامعة طالب...
يعنى لا شلت بندقية ولا حرقت نار..
ولكن فى ناس قالوا ليهم النوبة ديل كفار ولازم يموتوا..و انت عارف مستوى التعليم..
كلنا متساويين فيه..
سليمان ...أولا أن حزين لموت الوالد..
حزين جدا..
عارف يا صابر..
ولكن البيعملوة البقارة دا داير ليه تفسير..
أنت حالة فردية..
وصاحبى..
ومش صاحبى وبس...
حاجات كتيرة...
لكين الباقين نعمل فيهم شنو؟
ماشين ورا الحكومة ليه؟
أنت هسه يا سليمان عايش فى الخرطوم وأنا عايش فى الخرطوم..
عارف وضعنا شنو؟
عارف يا صابر...(غرابة)...
واحنا فخورين بكدا..
لكين قول لى اهلك البيفهمهم شنو؟
ما قاعد تسمع النكات عن العربى فى الخرطوم؟
بسمع يا صابر...
وبعدين يا اخى انت اخو مسملم..
بعد الجواب دا خليتهم يا صابر..
بحلق صابر عينيه عن آخرهما(خلتيهم؟!)
خليتهم..
الارض قبل أى حاجة تانية يا صابر..
أنا آسف يا سليمان عن أى كلمة قلتها ليك لحدى هسه..
الاعتذار ماليه معنى...
أنت قريت الجزء بتاع هانى العجلاتى فى الجواب؟
قريته...
ود ال..؟
بس ليه يوم..
المشكلة يا سليمان الزيك قلال..
فى نهاية الامر الناس دى عايزة تعملها نوبالاى وبقارى..
وعملوها يا سليمان..
عارف...
يعنى موقفك دا يا سليمان لا هو موثوق به من النوبة..
ولا هو مقبول من البقارة البيحاربوا للحكومة...
عارف يا صابر...
عرفت ليه انه انا مصيتى أكبر منك يا صابر؟!
عرفت يا سليمان..
| |
|
|
|
|
|
|
|
|
|
Re: فى البدء...كانت كادقلى (Re: عبدالرحمن عزّاز)
|
عبدالرحمن عزاز
وعليكم السلام ورحمة الله تعالى وبركاته.
بس لازم أنوم شويه قبل ما أكتب..
والا الكتابة كلها حتطلع غلط!
واقوم ادخل كادقلى فى شندى ...
وشندى فى كباكبية...
وكبابية فى رومبيك..
ورومبيك فى وادى حلفا..
ووادى حلفا فى بورتسودان...
وبورتسودان فى النيل الازرق!!!!
.....
ما أخير أنوم ؟!
| |
|
|
|
|
|
|
|
|
|
Re: فى البدء...كانت كادقلى (Re: nour tawir)
|
نور تاور وشمس الدين السنوسى.
شكرآ ليكم انتو. والله لقد تعلمت اشياء كثيرة مما تكتبانه هنا. وتعرفت على ما يجمع بيننا نحن السودانيين فى كافة ارجاء الوطن. التحية ليكم ولباقى الاخوة. والقومة ليك يا وطنى..
| |
|
|
|
|
|
|
|
|
|
Re: فى البدء...كانت كادقلى (Re: Adil Osman)
|
خرج صابر من الجامعة بعد أن ترك سليمان ود اللمين غارقا فى افكاره..
وسابحا فى ملكوت رب العالمين..
لا يتحرك فى تلك الكنبة أمام كلية القانون بجامعة الخرطوم..
حتى خيل الى المارة أنه تمثال أتت به أدارة الجامعة..
بدا كما لو أنه قد شاب فى بضعة ساعات..
كومة أنسان فارقتها الحياة وافقدتها القدرة على التحرك..
بدأت شمس الظهيرة تميل الى جهة الغرب..
فانعكست على رأسه ووجهه..
وأظهرت ذاك الرأس المستدير..
وشعر أسمر كثيف يغطى جبهته..
ثم كومة من الشعر على الحاجبين كما لو أنها (ربطة قش) القى بها صاحبها بعنف..
خرج صابر الى الشارع العام لا يلوى على شئ..
تعدى مبانى الجامعة ثم دلف الى أول بص قابله كمن يطارده مارد من الجان..
وجد بالقرب منه مقعدا فارغا..
ولكنه نسى أن يجلس..
تابط بضعة كتب..
وأهوال من الهموم..
نزل من البص ودلف الى مستشفى السلاح الطبى حيث تعمل زوجته ميمونة ممرضة..
وحالما رأته أحست بالبرود يسرى فى جميع أوصالها..
وخوف أشبه بالذعر..
صابر؟!
أنا زاتى..
مالك ؟فى شنو؟
ليه عشان جيت اشوفك؟
ما من عادتك تجينى محل الشغل..
مافى حاجة..داير أشوفك عاملة شنو.. وبرضو اقول ليك ماشى لاستاذ حسن وحاأتأخر معاه الليله..
انت مش عندك أمتحانات؟
عندى..
وبعدين؟
وبعدين شنو؟
أفندينا مالوه يا صابر؟
حينئذ قفز فى حركة لا ارادية وتلفت حوله بسرعة ثم خفض صوته واقترب من ميمونة أكثر..
الاسم دا ما تجيبه فى أماكن عامة..
تانيا افندينا بخير..
أكيد فى حاجة..
بصراحة فى حاجات..
فى شنو؟
البلد ولعت حريقة..
ذعرت وأحست بأن فى حلقها أرطال من الدقيق..
حاولت أن تبلع ريقها فلم تستطع..
كادقلى؟!
كادقلى ما ولعت حريقة بالمعنى الواضح...لكين فى حرق وكتل وجرايم فى المنطقة كلها..
المهم لما ارجع حا أحكى ليك كل حاجة..
خلى بالك من نفسك يا صابر..
وأنتى كمان..
على فكرة لو سيد اتصل بيك قولى ليه أنا عايزه...
سيد ودوه التدريب العسكرى فى جبل أوليا..
| |
|
|
|
|
|
|
|
|
|
Re: فى البدء...كانت كادقلى (Re: nour tawir)
|
فى شوارع أمبدة المتعرجة..
يثور فيها الغبار فى حلقات داثرية ثم يختفى مع الاثير..
كانت الشمس قد أستقرت فى الجزء الغربى من المدينة..
وقد حولت نفسها الى كتلة من النيران الحمراء والصفراء والبنفسجية..
لم يبد عليها أنها تتعجل الخطى لمغادرة تلك المدينة التى تعج بالسكان والهموم..
كما لو أنها تشفق على مصير الكثيرين منهم عندما تغادر...
بدأ الليل يتقدم نحو المدينة..
وبلا حماس ايضا.....
وبدأ الجنود أيضا ينتشرون فى الشوارع مثل كتل الشر...
تتحرك فى كل الاتجاهات لتمارس جرائمها....
قلنا شوارع معرجة؟
نعم..
وصبيان يتصايحون هنا وهناك...
بملابس متسخة...
ووجوه لم تسمع عن براءة الاطفال منذ المهد..
بدأت اصوات الامهات والاباء تنادى على ابنائها..
اصوات تعانى من حشرجة الموت..
وضغوط سكان أطراف العدن السودانية الكبيرة..
أطرق صابر..
وبدأت خطوته تبطئ فى المسير..
كان ذهنه فى حالة هياج..
وخيل اليه أن ورشة (ود مسمار) نشطه فى عمل النجارة فى تلك اللحظة..
بدأت ضربات قلبه تتزايد كلما أحس بالاقتراب من منزل استاذ حسن..
شئ ما..
جعله يحس بالخوف على استاذ حسن..
وكان لسان حاله يقول..
لو حدث لاستاد حسن شئ..
سوف لن استطيع مواجهة الحياة...
فهو عامود من الصلب..
يرفع فوق رؤسنا سقف كرامتنا المهددة بالانهيار..
نعم هذا شعورى...
مصير المنطقة بالكامل..
قابع فى قلب وعقل وأحساس استاذ حسن..
هذا الرجل الخرافة..
هكذا كان يحدث نفسه...
حتى وجد نفسه أمام منزل استاذ حسن فى أطراف امبدة...
| |
|
|
|
|
|
|
|
|
|
Re: فى البدء...كانت كادقلى (Re: nour tawir)
|
دهش صابر حينما وجد أستاذ حسن جالس فى كرسيه أمام الباب..
وما أن رأى استاذ حسن صابر حتى هرع اليه..
وأحتضنة بقوة...
ثم نادى على من بالداخل ليحضر له كرسيا آخر...
نظر صابر الى أستاذ حسن فى وجهه فترة ليست باقصيرة..
وقد سيطرت على صابر موجة من الحزن والكتئاب لم يستطع ان يداريها..
هزل أستاذ حسن وفقد كثيرا من وزنه..
بدأت الشعيرات البيضاء تتسرب الى شعره..
بدا كما لو أنه فى السبعين من عمره..
ما يزال شديد الكبرياء..
سمح المحيا..
تلقائى...
بسيط...
متواضع..
هادئ هدوء المؤمن بحق فى الله عز وجل..
نفس الابتسامة التى ينفطر لها الحجر أثنين..
وباختصار فان أستاذ حسن هو كل القيم الجمالية فى البشر..
قطع استاذ حسن لصابر تلك اللحظة وسأله..
صابر؟
انت مشيت وين يا ولدى؟
عاد صابر الى الواقع الملموس أمامه بقفزته اللارادية المعهودة...
ثم تلفت ذات اليمين وذات اليسار كمن يبحث عن شئ..
أنتبه الى وقوفهما الاثنان وجها لوجه..
صابر بطوله الفارع وجسمه النحيل..
واستاذ حسن مربوع القامة..
جيلين من الرجال..
يقفان أمام بوابة جهنم الحمراء الذى حالت بينها وبينهما فترة زمنية مجهولة الهوية!
ابدا أستاذ حسن.. بس أنت ضعفت شديد..
أنا كويس يا صابر...بس ما عندى نفس للاكل..
وما بنوم..
أحضر الكرسى وجلس الاثنان..
يا أستاذ حسن أنت قعادك فى خشم الباب دا خطر..
مافى خطر ولا حاجة يا صابر..
الناس ديل كان دايرنك بكسروا الباب وبيخشوا...
وأنت احوالك كيف يا استاذ حسن؟
كويس والحمد لله ..أتعالجت من وجع الضهر...ومنتظر اشارة عشان ارجع كادقلى..
ما افتكر الخلية حتوافق..
ليه يا صابر؟
ثم ناوله صابر الخطاب..
قراءه استاذ حسن .. ولدهشة صابر كان استاذ حسن هادئا و ملما بكل تفاصيل تلك الرسالة...
والعمل يا استاذ حسن؟
كدى هدى نفسك شوية يا صابر..
نشرب الشاى...
وبعدين نخش جوة نتكلم..
اتغديت يا صابر؟
أتغديت الحمد لله..
انا زاتى دايرك يا صابر...وكنت متأكد أنك حتجى...
عشان كدا أستنيتك..
| |
|
|
|
|
|
|
|
|
|
Re: فى البدء...كانت كادقلى (Re: nour tawir)
|
جلس الاثنان فى غرفة عارية تماما..
يا مولاى كما خلقتنى..
ألا من سرير حديد أمامه طاولة صغيرة..
ودولاب ملابس نحيف كما لو يعانى من الانيميا..
وكرسى مقابل للسرير..
أطرق صابر كثيرا..
والقى براسه فى صدره كما لو أنه حمل ثقيل لا يقوى عليه..
وسرح بذهنه الى مدارس كادقلى الابتدائية والمتوسطة والثانوى..
برز وجه استاذ حسن فى تلك الفترة...
رجل من جيل العمالقة..
وفترة من الهدوء والجمال فى تاريخ السودان...
وفى كادقلى بالذات..
فى طريقها الى الزوال..
والى الابد..
جلس أستاذ حسن على السرير وهو ينظر الى هذا الشاب الجالس امامه..
يفيض حيوية وشبابا..
ويعانى من عشق البلد..
ومرارة الحياة القاسية التى قابلها فى طفولته..
ثم أرتال الهموم المستقرة فى وجدانه وعقله فى تلك الفترة..
قلت لى العمل شنو يا صابر؟
نعم أستاذ حسن(جلس فى حالة أنتباه شديد)..
قبل ما نتكلم عن الحلول...نشوف الناس دى زاتها دايرة شنو؟ بتعمل كدا ليه؟
عفوا أستاذ حسن... بسن أنحنا عارفين دا كله..
لا يا صابر يا ولدى..أحنا ما عارفين كل حاجة..
ما خفى أعظم..
البيحصل فى الجبال دا يا صابر ما حرب...
الحرب ليها ساحات وليها جنود بيواجهوا بعضهم البعض..
وليها اسباب...
لكين لما يغيروا على الناس وهم عزل ونايمن...
ما بتبقى حرب..
ولما يلموا الناس زى البهايم ويختوهم فى معسكرات مزروبة بالشوك...
دى ما بتبقى حرب..
دا مشروع أبادة يا صابر...
الناس دى ما دايرة تسمع بحاجة أسمها نوبة...
وبعدين يا صابر البقارة ديل والجندوهم عشان يحاربونا..
فاكرين أنه صحى النوبة حيتمسحوا من الوجود؟
بس يا استاذ حسن دى جريمة فى حق البشرية كلها مش فى حق النوبة بس..
أقول ليك يا أبنى..
لو لاحظت من التقارير البتجيك...الناس البتحارب دى مشحونة بنوع وكمية من الكراهية ضد النوبة
تحير..
مسالة كفار وما كفار..دا كله كلام فاضى..
هم عارفين أنه نحنا عندنا مساجد وكنايس وكله..
بس الناس دى عملوا ليها غسيل مخ جامد...
وفكوهمم فينا..
بس ياأستاد حسن لو ما كان فى أستعداد نفسى من اصله ما كانوا أستجابوا..
وأنا المحيرنى...
ليه؟
بينا وبينهم شنو؟
مافى بيننا وبينهم الا حسن الجوار والمصاهرة والصداقة وكل حاجة كويسة يا صابر..
بس يا أستاذ حسن بالطريقة دى الباقى من الموت حيعيش مع بعض كيف؟
لما يجى وكته يا صابر بعدين فى كلام...
لكين هسه..
النوبة حيحشوهم حش الجرجير..
فى عملية غدر وخيانة ما حصلت فى التاريخ..
الحرب لما تنتهى الحكومة حتقعد فى الخرطوم تتفرج علينا..
مسألة الكراهية ضد النوبة دى يا صابر يا ولدى دايرة ليها تفسير...
أنا لى هسه مالقيته...
| |
|
|
|
|
|
|
|
|
|
Re: فى البدء...كانت كادقلى (Re: nour tawir)
|
سمعت بالسلاح الجابه مبارك الفاضل من ليبيا يا أستاذ حسن؟
حزب الامة يا صابر عنده مشاكل كتيرة ومعقدة..
والحرب البدوها فى جبال النوبة دى وببرنامج تعريب وأسلمة والكلام دا كله ما بيعالج مشاكل
الحزب.
والاساليب الجديدة الدخلوها فى الحرب دى.. آثارها حتمتد لمئات السنين لى قدام..
برضو يا استاذ حسن فى ظواهر جديدة زى العيال الصغار البختفوا..
أحداث الضعين..
الاعتداء على الستات..
دى جرايم كبيرة جدا يا أستاذ حسن..
واظنك سمعت يا صابر حسب التقارير العندك أنه الحزب هسه بيعمل فى تعبئة عامة..
وعندة خطة عشان يمسح بيها النوبة من الوجود..
عموما يا أستاذ حسن..
أنا بتفق معاك فى أنه نواصل البحث فى الاسباب..ولكين كمان نواصل المتابعة..
بس لازم يكون فى حل..
يا صابر أحنا ممكن نتجه للمجتمع الدولى..
ومنظمات حقوق انسان...
دى بتعمل ضغط على الحكومات عشان تخفف من البتعمل فيه..
الضغط براه مش كفاية يا أستاذ حسن..
عارف..وأتفقنا أنه نشوف حكاية الحرب مع الجنوبيين..
الجنوبيين هسه يا أستاذ حسن بيعملوا غارات على الجبال عشان يضايقوا الحكومة زى ما أنت عارف..
والحكومة لقته مبرر وقالت أنه التعبئة دى عشان يصدوا الهجمات بتاعة الحركة...
وبالطريقة دى نكون نحنا بين نارين..
الحركة لما تغير على البقارة بتعمق المشاكل البيننا..
وما تنسى أنه القرية بيكون فيها نوبة وبقارة وكله..
وكل الاهالى بيكونوا أبرياء..
لما تنسحب الحركة..
تجى الحكومة تنتقم من النوبة...
يعنى المسالة شكلها كدا زى الحركة بتمهد للحكومة عشام تحاربنا..
الاسباب كثرة..
والمبررات اكتر يا صابر..
لكين زى ما قلت ليك...أتفقنا انه نحارب مع الجنوبيين.. لانه مافى حل غير كدا..
على فكرة سيد اخباره شنو يا صابر؟
مشى التدريب العسكرى فى جبل اوليا..
جانى شريط من أوبوه..
قفز صابر فى حركته الغير ارادية وبحلق عينية..
أفندينا؟!
نعم..
أفندينا زاااااتو..
وحا أسمعك الشريط هسه دى..
| |
|
|
|
|
|
|
|
|
 Re: فى البدء...كانت كادقلى (Re: nour tawir)
|
ياوالده يانور ازيك
واتتنى تباشير الخريف والدعاش الكردفانى وسالت نفسى..
هل حقا ذهبنا..!
وهل حقا اننا صرنا فى حافة التصديق بالاخبار السعيده من عدمها...
حب ..ومن حلم ..ومن امل ...ومن الم....ومن فال.....ومن فرح.....ومن غيم .....ومن اعياد...
ففى البدء...كانت كادقلى
...شلال كلبي كادقلي
صوره من كادقلي
وبجيكي صادي عشان صابر وعشان الناس الصابره سنين بالحاله المادغريه....
| |
|
|
|
|
|
|
|
|
|
Re: فى البدء...كانت كادقلى (Re: معتز تروتسكى)
|
معتز..
الله يجازيك..
كان تقلب على المواجع..
اللى هى اصلا متقلبة..
(شلال كلبى) (بكسر الكاف وتسكين اللام) كان مكانى المفضل للزيارة فى طفولتى مع أحدى عماتى..
الله يرحمها ويحسن اليها..
ماتت من القهر...
لما لقت الناس القدامها كلهم يا كتلوهم يا ماتوا...
لاى سبب من الاسباب...
شلال كلبى دا يامعتز فيه فورة عجيبة..
تشوف الموية كأنها بتغلى..
وفيها زيد ورغوة..
وبعدين تعاين للجبال تحاصرك من كل حتة..
مغطية بالاعشاب الخضرا..
كأنهات فستان لطفلة يوم العيد..
وهى فى حالة هدوء مطبق..
ولكن تحس أن هدوئها هو أحسن الاصوات..
يهدر الشلال..
ودايما مستعجل..
وما تعرف اذا كان غضبان..
أو ميت من الفرحة..
عنده عناد وتحدى..
وكأنه داير يقول ليك..
أنا فى الرقة دى..
أقوى من الجبال..
بقدر أتسرب..
وادخل كل حته..
لكين الجبال بتقدر تعمل كدا؟
طبعا لا..
وتحس يا معتز أنك أنت ..
بقيت أنت...
كامل الوجود..
وكامل الانتماء..
وكامل الجذور..
وكامل الدسم..
ثم لا تملك الا أن تصلى ركعتين..
شكر لله..
| |
|
|
|
|
|
|
|
|
|
Re: فى البدء...كانت كادقلى (Re: nour tawir)
|
أخرج استاذ حسن جهاز تسجيل صغير من دولاب ملابسه..
وأخرج معه الشريط الذى أرسله افندينا..
ثم ادار الشريط..
خرج ذاك الصوت الجهور..
الهادئ..
الواثق..
الحاسم والودود..
لاحظ أستاذ حسن أن يدى صابر قد بدات ترتعش وأن العرق قد بدأ يتصبب من جبينه...
....
أخى العزيز حسن..
وكل الاخوان والاخوات...
السلام عليكم ورحمة الله تعالى وبركاته..
أتحدث اليكم الان من أحد سفوح الجبال..
فى منطقة تعرفونها جيدا بحكم متابعتكم لنا..
نحن بخير..
ونتمنى أن تكونوا كذلك..
الوضع كما نبلغكم به باستمرار...مخيف..
وهو يزداد سوءا كل يوم..
والموقف يتصاعد بشكل درامى سريع..
أنتشرت قوات عسكرية فى الجبال..
يملكون السلاح والعربات والذخيرة والزى والرتب العسكرية..
يحرقون..
وقتلون..
ويعتدون على النساء..
ويختطفون الاطفال..
ولديهم همجية فاقت حد تصور..
قوات الحركة فى مناوشات دائمة معهم..
وعند أنسحاب الحركة..
تأتى الحكومة وتدك الارض دكا..دكا..
بما فيها ومن فيها..
نحن الان تعدى عددنا الاربعين شخصا...
معظهم من الشباب..
هم الكنوز التى أستمتع بصحبتها الان..
شباب يحملون قلوب الاسود..
وعبدالرحيم أبن أخوك الترزى (أندو)..
عبارة عن قنبلة موقوته..
حماس منقطع النظير...
مهمتنا كما أتفقنا عليها هى جمع أكبر عدد من الشباب لتوعيتهم بما يحدث..
بكل التفاصيل..
مساعدة الاهالى فى أخلاء منازلهم..
والمهام الاخرى التى كلفتونا بها..
وهذا ما افعله الان..
وحريص كل الحرص ان اجاوب على كل اسئلة عبدالرحيم..
لانه مندفع وقد يقوم بعمل متهور..
المهم اقوم بارسالهم الى القرى والمدن المجاورة لننبههم بما يمكن ان يحدث..
أيضا نشجع الاهالى على الصعود فوق قمم الجبال والاحتماء بالكراكير..
ولكن الكراير نفسها شديدة الخطورة نسبة للثعابين والعقارب التى تتخذها سكنا لها..
هناك من يستجيب..
وهناك من يرفض ويفضل الموت فى بيته..
تعرفون أنتنماء النوبة لارضهم..
التفاصيل تصلكم اول باول..
لذلك ليس لدى الكثير الذى اقوله الان..
فقط نحن فى حاجة الى مجموعة من الاحذية القوية..
بعض االمضادات الحيوية والاسبرين ..الخ
المهم كلما يتعلق بالاسعافات الاولية...
وياحسن اعلم أنك قد بعت كثيرا من ارضك وحلالك لتصرف على الخلية..
ولكننى أرجوك أن تتوقف عند هذا الحد وتترك شيئا لابنائك..
لديكم شيكات كتبتها لكم بتواريخ مؤجلة...
أرجو صرف المبلغ بالكامل ودون تردد..
يا حسن خلى بالك من سيد..
لان مايخيفنى فيه...
هو أنه حتى الان لم يفصح عما يدور بعقله..
وهو كما تعلم عنيد وجبار..
وناوى على شئ!
ولا تقلقوا علينا...
نحن خرجنا حاملين أعناقنا فى أكفنا..
وصدقونى أن كل من يفقد حياته منا..
فقد مات سعيدا...
لاننا نواجه معركة كرامة..
ولو قدر لنا القيام بمظاهرة أخرى فى كادقلى...
فسوف يختلف الهتاف..
ليصبح هذه المرة..
نموت وتحيا الجبال!!
أنتظر يا حسن فى الخرطوم حتى ترد عليك الخلية وتبلغك بدورك الحالى..
تحياتى لميمونة وصابر..
وقل لصابر نحن فى انتظار شهادته الجامعية فى القانون..
والسلام عليكم ورحمة الله تعالى وبركاته..
| |
|
|
|
|
|
|
|
|
|
Re: فى البدء...كانت كادقلى (Re: nour tawir)
|
خرج صابر من منزل استاذ حسن فى أطراف أمبدة فى وقت متأخر من الليل..
خرج مهموما حزينا.
أبطأ الخطى..
واطرق وجههه على الارض على غير عادته ألا فى الحالات المستعصية..
كان سكان الخرطوم قد آووا الى اسرتهم..
منهكين..
ومتعبين..
فئة أخرى على النغيض..
أوت الى اسرتها وهى متخمة..
منتفخة البطن..
وخاوية الرأس والضمير..
وصل صابر فى وقت مـاخر من الليل..
وجد ميمونة جالسة على كرسى بالقرب من الباب..
أنتى لسه صاحية؟
ودى بلد الواحد ينوم فيها لو فى زول فى البيت برا؟
أقوم أجهز ليك العشا...
أتعشيت مع أستاذ حسن والحمد لله..
طيب خش نوم عشان تقدر تمشى الجامعة بكرة..
نظر اليها باستغراب..
ما سألتينى الحاصل شنو؟
نتكلم بكرة يا صابر لانه الوكت متأخر وأنت وراك جامعة..
معاكى حق..
أنتى برضو وراكى شغل..
| |
|
|
|
|
|
|
|
|
|
Re: فى البدء...كانت كادقلى (Re: معتز تروتسكى)
|
معتز...
أعود مساء...
البطارية خلصت خلاص..
هل لديك صور للمنشآت والعمران الجديد فى كادقلى؟
صور لمنشآت أصبحت جزءا من كادقلى؟
سينما عمر الخليفة مثلا؟
ثانوية تلو التى تحتلها القوات الاجنبية التى تساعد النوبة العائدين فى الاستقرار الان؟
صورة لسوق كادقلى القديم والجديد؟
صورة للقاعدة العسكرية فى أمبطاح؟
صورة للشارع الخرافى الذى يربط مملكة المك رحال بقلب المدينة؟
مصنع نسيج كادقلى؟
الجبال فى فترة الخريف تغطيها الخضرة؟
حاجات زى دى...
| |
|
|
|
|
|
|
|
|
|
Re: فى البدء...كانت كادقلى (Re: nour tawir)
|
سلامات الاستاذه نور..
كفينك ياوالده صحتك واخبارك بقيتى جافية عديل...
عموما ابحث عن الصور التى ذكرتيها ولو كان مابلدواخل يستطيع الشخص ان يطبعه على ورق لكنت قد ملات المكان بصور كادقلى..
فا لكادقلى مكانه خاصه وايام طفوله لاتُنسى..
يديك العافية واصلى..
وكل ما امتلكه من صور شخصه وما التقطه من الاصدقاء والنت هو رهن اشارتك الى ان نصل الى الحلم المنشود..هنــــــــــــــــــاك...
| |
|
|
|
|
|
|
|
|
|
Re: فى البدء...كانت كادقلى (Re: nour tawir)
|
دخل صابر غرفته فى أطراف مدينة الحاج يوسف.
ثم بدأ يتقلب فى فراشه ذات اليمين وذات اليسار.
فارقه النوم فى عناد واضح..
خرج الى الفراتدة وجلس محاولا أن يركز على أحداث ذاك اليوم.
أخذ تفكيره منحى دائريا مملا..
عاد بذاكرته الى كادقلى...
الى جده الذى فارق الدنيا وتركه عرضة لكل التيارات المحيطة به.
الى جدته بهدوئها وثباتها وصبرها وقوتها وقدرتها الخرافية على أمتصاص ذاك الواقع المؤلم..
فهى حتى لا تحس بأن فى وقعها ألم..
هكذا علمتهم صاحبة الجلالة كادقلى..
ثم سار بخياله فى شوارع المدينة.
حتى وصل الى مدرسة كادقلى الابتدائية الشرقية.
حيث كانت البداية..
ووقف فى فناء المدرسة يستعرض كل تلك الوجوه البريئة..
الضحكات العالية..
عدم أدراك تلك الحلقة من الفقر المدقع..
حذاء مخروم.
صباح بدون أفطار.
كتاب ناقص.
ولكن سعادة مطلقة.
وبرائة ملائكية.
أين هم اليوم؟
فى الجامعات والخدمة المدنية والقوات النظامية..الخ..
فى تلك اللحظة تذكر سليمان وداللمين..
صديق عمره فانتفض!
| |
|
|
|
|
|
|
|
|
|
Re: فى البدء...كانت كادقلى (Re: nour tawir)
|
وقف صابر كمن لدغه عقرب..
وبدأ يزرع الفراندة جيئة وذهابا..
ما الذى يمكن أن يحدث لسليمان وداللمين؟
ما الذى سبب الازمة القلبية الحادة لوالده حتى أودت به؟
أوليس العداء العسكرى موجه للنوبة فقط؟
ماهو مصير تلك العلاقات بين النوبة والبقارة؟
كيف يمكن معالجة الشرخ الذى يتسع الان بين قبائل جبال النوبة؟
تشهد البلاد فترة ديمقراطية..
وأنتخابات..
وميكرفونات..
فى فترة الثمانينات من عام 1900
وحزب وليد قوامه أبناء المنطقة وهو الحزب القومى السودانى..
وحمى السياسة التى أنتشرت كالهشيم فى جسم المجتمع..
و لكن فى نفس الوقت سلاح وقتل وحرق وخطف وبوابات جهنم تفتح على مصراعيها فى تلك المنطقة
الغالية من الوطن..
ماالذى يحدث فى السودان؟
ثم أفندينا وحركته الثورية المحدودة..
بلا سلاح أوذخيرة أوجنود..
هذه بحق خطوة أنتحارية!
ولكنهم حصلوا على موافقة الخلية.
أنصرف بتفكيره من أفندينا ومجموعته رأسا حينما تذكر موافقة الخلية على قيام تلك الحركة
الثورية..
كما لو أن فى موافقة الخلية درءا لهم من المخاطر..
أطمأن قليلا..
ولكنه عاد وتذكر شريط الكاسيت الذى أرسله عم كافى (أفندينا) لاستاذ حسن..
وأشارته الى هانى أبن بسطاوى العجلاتى..
ثم الاشارة اليه فى الخطاب الذى وصل لسليمان ود اللمين فى ذاك اليوم..
ماذا يفعل ذاك الشقى فى جبال النوبة فى تلك اللحظة؟!
فهو قد أختفى مع والده منذ ذاك اليوم الذى ذهب فيه افندينا الى بيتهم وأعطى هانى أبن بسطاوى
العجلاتى ووالده دروسا فى القيم الاجتماعية..
يارب؟!
ثم بدأ عقله يغلى كالمرجل..
دخل الى المطبخ..
أعد لنفسه كوبا من القهوة..
وعاد مرة أخرة الى تلك الدائرة اللعينة المملة من التفكير..
| |
|
|
|
|
|
|
|
|
|
Re: فى البدء...كانت كادقلى (Re: nour tawir)
|
قضى صابر ليلة ليلاء لن ينساها مدى الحياة..
و كان قد قضاها يتقلب بين أفكاره..
أسيرا لتلك الدائرة اللعينة..
فى صبيحة اليوم الثالى وحينما نظر الى وجهه فى المرآة..
خيل اليه أنه قد شاخ وهرم فى تلك الليلة..
كبر صابر..
مع حجم الاحداث فى جبال النوبة..
والفوضى السياسية التى ضربت أطنابها فى البلاد..
ظهرت حول عينيه هالات بنفسجية وزرقاء..
أحس كمن خرج لتوه من علقة ساخنة...
أوجاعا غريبة مزقت جسمه أربا..
خرج مع زوجته ميمونة الى الطريق العام ليستقلا المواصلات العامة..
الى الجامعة والمستشفى العسكرى حيث تعمل ميمونة..
دلف رأسا الى كلية سليمان وداللمين.
ولكنه لم يجده..
عاد وأتجه نحو (البركس) barcass وهو المبنى السكنى لطلاب لطلاب جامعة الخرطوم...
| |
|
|
|
|
|
|
|
|
|
Re: فى البدء...كانت كادقلى (Re: nour tawir)
|
دلف صابر الى غرفة سليمان ود اللمين ..
ووقف فى وسط الغرفة كمن زرع فى الارض زرعا.
ولم يكن وقوفه عاديا..
وهذه أحدى صفات صابر..
يحس الناظر اليه كأنه شجرة طلح..
متمكنة فى الارض رغم شكلهاالنحيل..
وجد سليمان قد أنتهى من أعداد حقيبته و جلس فى حافة السرير مطرقا..
نظر صابر الى سليمان طويلا..
دون أن ينبس بكلمة..
ثم جلس على الكرسى المقابل...
مسافر متين يا سليمان؟
ماشى بصات أمدرمان بعد شوية..
وحتآخد فى كادقلى قدر شنو؟
والله ما عارف يا صابر...
الوالدة محتاجة لى فى ظرف زى دا..
سليمان داير أسالك سؤال؟
أتفضل يا صابر...
عم اللمين مرض متين؟
كله حصل فجأة يا صابر..
فى حاجة محددة زعلته؟
عماتى الاتنين ماتن مكتولات فى الاحداث الحاصلة دى..
وأهلى فى الحلال الحوالين المجلد كتار ماتوا..
....
تذكر صابر أفندينا فأحس بالذعر..
هل يعقل أن أفندينا يقوم بغارات أنتقامية؟
لا..لا..لا ليس هذا من طبعة وليست هذه أهداف الخلية..
ماتوا فى الاحداث كيف يا سليمان؟
مش المراحيل هم البغيروا على النوبة؟
وأنت فاكر يا صابر النوباى بستسلم كدا وخلاص يموت؟!
أنت نوباى يا صابر..
طيب حصل كيف؟
كدى فهمنى واحدة واحدة..
النوباى يا صابر قبل ما يموت بيكون أخد قدامه عشرة على الاقل..
وبعدين فى مجموعات بتدخل الحلال بتاعة البقارة وتسوى الما بيقدروا يسووه المراحيل..
تقصد منو يا سليمان؟
أطمأن يا صابر..
دا مش أفندينا...
....
ذعر صابر حيث أن حركة أفندينا سرية للغاية.
أنا مافى زول قال لى عن افنديناأى حاجة يا صابر..
بس حسب معرفتى بيه..
وحسب أختفائه من كادقلى بالطريقة ديك..
وما موجود فى الخرطوم أو فى أى مدينة تانية , وأنت ما متزعج ,أكيد بسوى ليه فى حاجة..
فى نفس الوكت أنا عارف التركيبة الاخلاقية بتاعة افندينا..
وطول عمرى بتعامل معاه كأنه مخلوق من كوكب تانى..
أنت ناسى أنه أفندينا واحد من الرجال الربونا فى كادقلى؟
ديل شباب تانين يا صابر..
وعرفت كمان أنهم بسوو حاجات تشيب الراس..
تفتكر أنتقام يا سليمان؟
والما بيخليهم ينتقموا شنو يا صابر؟
أهو... ومن قولة تيت...
أهلى قرضوا..
وكمان بشيلوا البهايم وبيختفوا..
مافى زول عارف ليهم أتر..
أنت بتتكلم عن المتمردين يا سليمان؟
فى غيرهم؟
طيب قوم أرح محطة البصات..
والجامعة يا صابر؟ أنت عندك أمتحانات..
الكلام دا عيب يا سليمان ... كدى أرح وبطل الكلام الكتير..
| |
|
|
|
|
|
|
|
|
|
Re: فى البدء...كانت كادقلى (Re: nour tawir)
|
ستارة من ماء منهمر...
هى الامطار التى هطلت على كادقلى ذاك المساء..
خلت الشوارع تماما..
ووقفت الجبال عارية تستحم فى ذاك النهر المتدفق من السماء..
كانت تلك بداية الخريف...
لزم الاهالى منازلهم وبدأت أعمدة الدخان تتصاعد الى السماء..
هزيلة ونائية عن بعضها البعض..
لان من الاهالى من أخلد الى النوم باكرا قد هده البحث عن لقمة العيش..
ومنهم من جلس يتسامر أو يهمس بأحداث تلك الفترة..
أسئلة كثيرة حائرة لم تجد لها كادقلى أجابة..
هل ستدخل المراحيل الى المدينة؟
هل سيقتلون الناس فى الشوارع؟
هل سيحرقون البيوت بمن فيها كما يحدث فى القرى المجاورة؟
هل؟
وهل؟
وهل..
كانت كادقلى حبلى بالالام والمآسى فى عامها السادس..
فمنذ بداية تلك الاحداث المؤسفة عام 1983
وحتى عام 1988 لم يمر على كادقلى يوم واحد فى راحة وهناء..
فجأة تبسمت..
وشعرت بالارتياح والغبطة..
ونسيت للحظة القلق الذى أصبح جزءا ملازما لها..
ثم فتحت ذراعيها لذاك القادم النحيل..
رغم حزنه وهمه الباديان على وجهه..
أستقبلته فى موقف بصات كادقلى..
أحتضنته بحرارة..
ثم أنحدرت من خدها دمعة حارقة..
وقف سليمان وداللمين للحظة..
يتلفت ذات اليمين وذات اليسار..
وكأنه لم يصدق عودته الى كادقلى..
رغم غيابه عنها الذى لم يكمل شهرا واحدا..
ثم انحنى وحمل حقيبة ملابسه اليتيمة..
وتوجه صوب (حى الفقرا)...
| |
|
|
|
|
|
|
|
|
|
Re: فى البدء...كانت كادقلى (Re: nour tawir)
|
لم يشعر سليمان وداللمين بالمشوار الطويل المرهق من السوق وحتى حى الفقرا..
فقد أصبح عقله مثل خلية النحل...
وبدأت الافكار تتسارع الى رأسه..
متضاربة ولا يربط بينها رابط..
جال بعقله حول مشوار حياته القصير..
ابتداء من مدرسة كادقلى الشرقية للبنين..
وحتى ثانوية تلو..
تذكر ثانوية تلو فقفز قلبه من مكانه..
فترة دراسية غريبة..
حملت الكثير من الغموض والتكهنات الاكثر غرابة..
لماذا تغير حال كادقلى الى تلك الدرجة؟
ولماذا كل تلك الاليات التى تزحف الى المنطقة فى شراسة وعنف؟..
أذا وضعنا فى الاعتبار بداية الازمة فى زمن الرئيس جعفر نميرى..
ثم المشير سوار الذهب..
نستطيع ان نجد مبررا أو معنى..
أذا كان للعنف أى مبرر..
أحدهما عسكرى ديكتاتورى..
والثانى أنتقالى سلمها للغير وذهب..
لا نستغرب العنف حينما يصدر منهم..
وحتى فى الفترة الانتقالية القصيرة تواصلت الاليات العسكرية..
وتوسعت الرتب العسكرية لتشمل كل من يرغب..
وجلجل العنف العسكرى بكل الاسلحة المتاحة..
أما فترة الديمقراطية الثالثة...
وهى فترة السيد الصادق المهدى فلماذا يتواصل هذا العداء؟
مامعنى الديمقراطية المسلحة؟!
ليس فى الامر أى علاقة بديانات النوبة لانهم موحدين..
مسلمين أو مسيحيين أو حتى اصحاب ديانات أخرى..
أما تبريرها للعنف بقصد صد هجمات المتمردين..
فهذا أيضا غير صحيح..
لان من يقتلونهم هم الاهالى..
وليس المتمردين..
هذا عدا النهب والسرقة وانتزاع الملكية..
ثم وفوق كل هذا وذاك..
أن الذى يحدث للبقارة اليوم فى غاية من الخطورة..
وهذه هى النتيجة فقدت من أهلى وأسرتى مالا يعرفه السيد الصادق..
ثم ما هو مصير علاقتى بصابر وبقية زملائى فى الدراسة؟
يا الهى..
تذكر مزمل ود التاجر محمد أحمد(السمين) الذى يدرس الاقتصاد..
تذكر سامى ابن بسطاوى العجلاتى..
ولماذا ورد فى ذاك الخطاب باسم هانى العجلاتى؟
حتى صابر من فرط همه لم يتبين الامر..
ماهو السر ياترى؟
هل هو نفس الشخص..
أم اخيه؟
أم ماذا؟
و ماذا يفعل مع المراحيل حتى أصبح الضابط هانى؟
سامى أبن بسطاوى العجلاتى يصبح الضابط هانى؟!
يبدو ان الخطب جلل..
لم يحس سليمان ود اللمين بالكلاب التى كانت تنبح فى أستقباله..
ولم يحس بالامطار التى واصلت غسلها لجسمه..
ولم يحس بالشوارع الخالية..
بل العكس خيل اليه ان أمطار كادقلى كانت رحيمة به..
حيث غسلت عن نفسه جبل من الهموم...
حتى وجد نفسه أمام منزلهم فى (حى الفقرا)..
| |
|
|
|
|
|
|
|
|
|
Re: فى البدء...كانت كادقلى (Re: nour tawir)
|
تجمع حول أفندينا حتى ذاك العام 1988 أكثر من مائة وخمسين متطوعا معظمهم من الشباب..
كانوا فى طريقهم الى الجبال الشرقية ولكن بطرق أكثر التواءا..
لا يجتمعون فى مكان واحد..
ولكن يتم توزيعهم على الجبال والقرى المجاورة فى مهام محددة..
ثم يلتقون مع أفندينا والمجموعه التى حوله فى مكان معين لتقديم تقاريرهم...
ثم يكلفون بمهام جديدة..
ويتم استيدالهم حسب مايراه افندينا مناسبا ويوافقون عليه..
تمركز نشاطهم حول متابعة (أخبار العدو) ثم توصيل الاخبار الى القرى المعنية بالغارات التالية
لاخذ الاحتياطات اللازمة..
فى أحد سفوح الجبال عسكر أفندينا وحوله ثلاثة عشر شابا..
وقف أفندينا والقى نظرة على المنطقة السهلية الممتدة أمامه...
لم تكن الرؤيا وآضحة بسبب هطول الامطار..
كان الوقت عند الغروب.
ولكن الشمس أسرعت الخطى وأختفت خوفا من الامطار..
سرح أفندينا بخياله فى اللاحدود..
وبدأ يسأل نفسه..
ما الذى يمكن أن يحدث لاولئك الشباب عند وصولهم الى المحطة الاخيرة؟
ما الذى ينتظر أؤلئك الشباب الذين يملؤهم الحماس ويدفعهم الى نهايات مجهولة؟
ما الذى ينتظر أولئك الشباب الذين حرموا أنفسهم نعمة التعليم وقرروا النضال من أجل استرداد
الحق؟
نعم... لا يهم التعليم طالما أن الحق والكرامة أباحتهما الجيوش الغازية؟
ثم من هى الجيوش الغازية؟
أوليسوا من أبناء تلك الارض؟
حملوا السلاح واشهروه فى وجه النوبة؟
نعم...
أنقلب البقارة على النوبة 180 درجة..
حاربوا للفريق سوار الذهب فى الفترة الانتقالية..
ثم الصادق المهدى رئيس مجلس الوزراء اليوم...
وليت لهم هدف واضح ومحدد يمكن مناقشتهم فيه..
ولكهنا رغبة مدمرة تجتاح كل الذى امامها..
operations no living creature
هل يعقل أن البقارة كانوا يحملون للنوبة كل ذاك العداء؟
أم هل يعقل أن يكون للتضليل الاعلامى كل هذا التأثير؟
ما الذى يحدث هنا؟!
ولماذا؟!
ولمصلحة من؟!
أنتبه أفندينا على صوت عبدالرحيم يخاطبه فى همس..
أفندينا...أفندينا..
نعم ياابنى..
المطرة بلت هدومك كلها وكدا تجيك حمى وبعدين البقودنا منو؟
شكرا يا عبدالرحيم جاى هسة..
الشباب أتعشوا؟
نعم افندينا..أتاريه الزاكى شاطر فى العصيدة..
أفندينا.افندينا..
نعم ياابنى..
تفتكر الشريط الرسلناه لاستاذ حسن والجماعة وصل؟
من زمااااان..
طيب ما جا رد ليه؟
حيجى يا عبدالرحيم...انت ناسى الخريف والمطر..
وناسى انه (المرسال) حيلف ويدور عشان ما يقع فى يد العدو؟
آى... صحى والله..
بطل الشفقة يا عبدالرحيم..
حاضر...
افندينا افندينا...
نعم يا عبدالرحيم..
نعمل الشاى خلاص وتبتدى لينا الدرس؟
حاضر يا ابنى..
وحتكلمنا عن شنو الليلة؟
أنتوا فى بالكم موضوع معين يا عبدالرحيم؟
نعم أفندينا. الجماعة دايرينك تحكى لينا قصة الحكومة مع النوبة من الاستقلال لحدى هسه...
بيعادونا ليه؟
حاضر يا ابنى..
أمشى انت..انا جاى هسه....
ثم أخذ افندينا نفسا عميقا من عبق تراب الارض...
معطرا بالامطار والرياح والرعد ورائحة شواء الاهالى فى محرقة المراحيل..
أستنشقه بهدوء وحسرة وغصة فى الحلق..
أختلطت دمعة حارة فى عينة بماء المطر..
ثم لحق بعبدالرحيم..
| |
|
|
|
|
|
|
|
|
|
Re: فى البدء...كانت كادقلى (Re: معتز تروتسكى)
|
معتز..
أنت بتجيب الصور دى من وين؟
مشكلتى فى كتابة القصة هى أننى لا أستطيع أن أكتب متى شئت..
ولكن حينما تفرض القصة نفسها..
ولهذا السبب أعتذر للقارئ/ة شديد الاعتذار..
وأرجو ان أوفق فى الكتابة مساء اليوم..
| |
|
|
|
|
|
|
|
|
|
Re: فى البدء...كانت كادقلى (Re: nour tawir)
|
لحق أفندينا بالشباب داخل (الكركور)...
كان دخول (الكركور) بالنسبة لافندينا تحديا حقيقيا وذلك لطوله وضخامة جسمه..
ولكنه أتسقر أخير وجلس على أحد الصخور..
كان المكان نظيفا جدا وصامتا..
صمت الجميع وركزوا أنظارهم على افندينا(كافى)..فى ترقب و شوق..
وجوه سمراء..
ناطقة بالحب والاحترام والاجلال لافندينا..
وترقب لسماع بعض المعلومات التى قد تبدو بديهية للعارف ولكنها بالنسبة اليهم مسألة مصير..
ووطن وأهل ومستقبل..
بأختصار مسالة حياة أو موت..
دأب أفندينا على أختصار و تبسيط المعلومات وترك المجال مفتوحا للاسئلة والحوار..
سيطر على مشاعره بسرعة ورسم أبتسامته العريضة الساحرة على وجهه..
ثم قطع أحدالشباب ذاك الصمت وهو يتلفت ذات اليمين وذات اليسار ليتأكد من أنه لم يرتكب خطام.
ثم وجه سؤاله افندينا..
أفندينا ممكن أسألك سؤال؟
أعتاد أفندينا على كثرة الاسئلة..
بل كان يشعر بسعادة طاغية وهو يجاوب على هذا ويداعب ذاك..
أنفضل يا أبنى..
أفندينا رغم (المطرة) صابة لكين برضو فى ريحة حريق..
الحريق جاى من بعيد يا أبنى..والمطر فى الحتة ديك (رشاش) بس..
ومع أتجاه الهوا..تصلك الريحة..
شكرا أفندينا..
أحضر عبدالرحيم كوب الشاى لافندينا كمن يقدم قربانا للالهة..
وعبدالرحيم فى فى حبه المطلق والتصاقه الدائم بافندينا اصبح مثل (جودس)
أحد حوارييى المسيح عليه السلام..
كا اقربهم اليه..
وكان أكثرهم حبا للمسيح عليه السلام وكذلك حب النبى له..
(جوداس) الذى قررت النبؤة أن يشى بالمسيح عليه السلام...
وفى اللحظات الاخيرة فى حياة عيسى عليه السلام...
كان المسيح ينظر الى (جوداس) فى حزن عميق..
ويأمره وهو أكثر حزنا قائلا:
افعل ما يجب أن تفعل..
حمل عبدالرحيم بين جوانحه حبا لا يمكن الافصاح عنه أو الكتابة عنه..
فقد كان أفندينا يمثل بالنسبة اليه كل أهدافه وأحلامه وتطلعاته فى الحياة..
أما ان يصل مع أفندينا الى حل نهائى لتلك الماساة الملهاة..
أو أن يموت..
هكذا حدث نفسه مرارا وتكرارا...
| |
|
|
|
|
|
|
|
|
|
Re: فى البدء...كانت كادقلى (Re: nour tawir)
|
بدأ افندينا يتطلع فى تلك الوجوه السمراء التى تحيط به..
تطلع فى هدوء..
مركزا نظراته فى كل وجه..
وقد كان لسان حاله يقول:
ماهو مصيركم يا أبنائى؟
هل سوف تلتقون بعد عشر سنوات وأنت بكامل العدد؟
أين تقودنا هذه الظروف الغامضة المبهمة؟
وهل ساكون بينكم فى نهاية المطاف؟
نظر الى ملابسهم...
ملابس مدنية...
T (شيرتات)و قمصان بأكمام قصيرة أو طويلة..
أحذيه addidas أو باتا..
ثم بنادق..
وضعوا البنادق فوق أفخاذهم وهو يتطلعون الى أفندينا..
كانت تلك الحركة أتفاق صامت بينهم..
أن توضع البنادق فى ذاك الوضع المريح وهم فى فترة الاستراحة..
وبعد أن أستقر ببصره فى آخر شاب..
أستدار بسرعة غير متوقعة..
أعتدل فى جلسته..
ثم بدأ فى صوته الضخم والهادئ والعميق..
بدأ بالاسئلة...
كويسين يا شباب؟
كويسين أفندينا..
فى واحد عيان ولا حاجة؟
مافى أفندينا؟
(المونة) بتاعة السكر والشاى والصابون تكفينا أسبوع لى قدام؟
أسبوعين أفندينا...
طيب يا شباب...
نخش فى الموضوع...
| |
|
|
|
|
|
|
|
|
|
Re: فى البدء...كانت كادقلى (Re: nour tawir)
|
أنتوا عايزين تعرفوا الوضع الاحنا فيه دا ليه..
مش كدا؟
نعم أفندينا..
زى ما ملاحظين يا شباب أحنا لا جيش ولا مدنيين..
يعنى ما عندنا زى ورتب وأسلحة بتاعة جيش..
نعم أفندينا..
وعارفين برضوا أنه نحنا رسالتنا ما عسكرية وما مدنية..
يعنى بنكتل دفاعا عن النفس وفى حالة أنه الزول أو الناس القدامنا بشكلوا خطر على المجموعة
أو الاهالى..
نعم افندينا..
وعارفين برضو أنه نحنا مهمتنا الاساسية أنه ننبه الناس قبل ما تحصل الغارة..
يعنى ننقذ ما يمكن أنقاذه..
نعم أفندينا..
طيب الوضع دا أحنا أخترناه لانه فى بشاعة حاصلة للاهالى..
وحاصلة لى أهلنا..
وحاصلة لينا نحنا..
ولكن فى نفس الوكت يا شباب بقول ليكم فى جيش بيتكون..
(أتسعت عينا عبدالرحيم عن آخرهما)..
الجيش دا جيش تحرير..
هم هسه دى بيتدربوا فى أثيوبيا.
وحنتقابل معاهم فى نقطة معينة..
بعد داك أنا حاأسلمكم للقائد عشان برضوا تتدربوا وتقاتلوا..
وأنا مهمتى حتتغير..
(لو أنهم أحسوا بالدهشة...
فأن ذلك لم يتضح فى وجوههم)..
طيب يا شباب..
الترتيبات دى كلها والحرب دى عشان شنو؟
والوصلنا لى دا كله شنو؟
دا موضوعنا الليلة...
| |
|
|
|
|
|
|
|
|
|
Re: فى البدء...كانت كادقلى (Re: nour tawir)
|
الحضارة السودانية يا شباب حضارة نوبية..
السودان يا شباب أصله نوبة..
ودا تاريخ عريق عمرة ثمانية ألاف سنة..
كانت عندنا حضارة..
وتجارة..
وثقافة...
وفكر...
وعلم...
وكانت البلد فى حالة رفاهية..
كانت عندنا تجارة مع مصر...
وحاربنا كمان مع ناس أسمهم الاشوريين لمن أستنجدوا بينا...
يعنى كانت لينا علاقات دبلوماسية وتحالفات عسكرية مع دول بعيدة جدا..
بعدين يا شباب وبعد ظهور المسيحية أبتدا النوبة يدخلوا فى الدين المسيحى.
لانه ملكهم أول من أعتنق الديانة دى..
ومرت سنين طويلة جدا لغاية ما دخل الاسلام..
وجو قادة المسلمين فى مصر وقرروا ينشروا الاسلام برضو فى السودان..
حصلت مقاومة عنيفة..
وحصلت حروب...
فى نهاية الامر قرر ملوك النوبة مع عبدالله ابن ابى السرح قائد المسلمين فى مصر..
أنهم يوقعوا أتفاقية بى شروط معينة..
الاتفاقية دى أسمها أتفاقية البغط..
وهكذا وتدريجيا دخل الاسلام والمسلمين فى السودان...
دخلوا رجال مضطهدين دينيا..
أو عندهم مشاكل فى بلدهم...
أو تجار..
عشان كدا ما جوا بى أولادهم..
جوا براهم ونشروا الاسلام عن طريق الطرق الصوفية..
تزوجوا نساء النوبة..
لغاية ما طلعت لينا التركيبة السودانية الهسه دى...
والسؤال المهم جدا العايزكم تفكروا فيه دايما..
أنه النوبة بدل ما كانوا ملوك وأمراء وأصحاب البلد دى..
الوصلهم شنو للوضع دا؟!
| |
|
|
|
|
|
|
|
|
|
Re: فى البدء...كانت كادقلى (Re: nour tawir)
|
صمت رهيب...
وهدوء تام الا من أصوات الحيوانات المفترسة وصوت المطر الذى بدأ يخف تدريجيا..
وآصل افندينا...
الموضوع طويل يا شباب...
والتاريخ أطول.عشان كدا كله ما حيتقال فى ليلة واحدة..
أنا بس حبيت أديكم نبذه عامة وسريعة..
والتفاصيل بتجى فى الاجابة على الاسئلة بتاعتكم..
النوبة يا شباب أتعرضوا لغارات وحروب داخلية باستمرار..
وبدأوا يزحفوا من أقصى الشمال...
لغاية ما وصلوا سنة 700 الى المنطقة الشرقية اللى هى العباسية تقلى..
جوا محازين للنيل الازرق..
بعضهم أستقر فى شمال كردفان..
والباقين وآصلوا لغاية ما وصلوا جبال النوبة..
المنطقة الاحنا بنحارب عشانها هسه..
فى نوبة طبعا أستمروا يعيشوا فى الشمال..
وهم الحلفاويين والمحس و بقية قبائل الشمال النيلى..
وحتى فى جبال النوبة حصلت غارات مستمرة..
وبرضو عشان تجارة الرقيق..
كانوا بيجوا يخطفوا الناس ويبيعوهم فى شمال غرب أفريقيا ولحدى الخليج الفارسى...
الكلام دا حصل أكتر حاجة فى زمن محمد على باشا..
اللى هو كان حاكم مصرى من أصل تركى...
قال جاى يفتش الدهب..
التجارة دى ذاتها لقت ليها منتفعين من السودان..
أقصد تجارة الرقيق..
زى الزبير باشا رحمة الادوكم ليه فى التاريخ...
دا كان تاجر رقيق مافى شك..
لحدى ما جا الاستعمار البريطانى يا شباب..
وأعلن السودان كدولة لاول مرة فى التاريخ...
والغى تجارة الرق..
لكن الاستعمار برضة كانت ليه مساوئه وليه مشاكلة...
ولانه البلد ما حقتهم..
آبائنا وأجدادكم حاربوهم لغاية ما طلعوا سنة 56.
| |
|
|
|
|
|
|
|
|
|
Re: فى البدء...كانت كادقلى (Re: nour tawir)
|
أفندينا عندى سؤال..
وكت الاسئلة ما جا يا جابر..
الموضوع مضايقنى لمن ما قادر أركز..
قول يا جابر..
كانت يدا جابر ترتعش..
ظهرت على أنفه وجبهته حبات من العرق..
وبدآ وآضح الانفعال..
أفندينا شنو شروط أتفاقية البغط؟
عدد 350 من الشباب الامراء يرسلوهم لى مصر فى كل عام..
ويتم تبادلهم ببعض السلع التجارية..
بس حا أتأكد ليك من عدد الامراء..
فى تلك اللحظة بدأ جابر ترتعد بشكل وآضح وقد تسارعت أنفاسه..
أفندينا ديك كانت بداية الغلطة..
8 آلاف سنة وأحنا بندفع تمن الغلطة الفظيعة دى..
لغاية ما بقت تمن أبدى ما عنده حد...
كيف يا جابر؟
التبادل كان غلط وغير أنسانى...
وكان أنهزامى كمان..
الامراء ديل كان عبيد فى مصر!
أنا بتفق معاك تماما يا جابر..لكن الظروف حتمت كدا..
يعنى يضحوا بمجموعة من الشباب ولا الناس كلها تموت؟
الناس كلها تموت أفندينا..
ويفضل وآحد يوصل الرسالة من جيل لى جيل لغاية ما نرجع زى ماكان..
ماممكن نرجع زى ما كان يا جابر مهما عملنا..
تاريخ السودان أفندينا برجع زى ماكان..
هسة شوف الحرب دى ليها معنى؟
طبعا لا(مجاوبا نفسه)..
رجعوا يخطفوا الاطفال زى ما حصل زمان..
وبعدين أفندينا الرق فى فترة الانجليز أصلوا ما وقف..
كان تحت السطح..
وكتير من الرقيق رفضوا يسيبوا أسيادهم بعد ما حرروهم لانه ما عارفين يشموا وين..
وبعدين من سنة 56 لغاية هسه 1986 الرق وقف كم سنة أفندينا؟
عشرة سنوات؟
أها رجع تانى..
لانه الناس البتكتل هسه دى..
والبتحرق واحنا قاعدين هنا نشم ريحة البنى آدمين زى الشية..
بيخطفوا العيال وبيمارسوا همجية المغول...
مغول ليه؟(يسأل نفسه ويجيب)..همجية السودانيين!
أفندينا ...تاريخ السودان عمره ما تغير.
عشان كدا النقطة الجوهرية وبداية الانسان السودانى ذو الحضارة والتراث دى ممكن نرجع ليها..
لكين كل ما نقرب من النقطة الاساسية..
الموضوع يفلت ..
تعرف ليه افندينا؟
لانه نحنا شعب عنده شيزوفرينيا عرقية..
نوع أستعلائى لسه بيقول عن نفسه عربى..
ونوع أنهزامى بيطأطئ راسه..
العربى لسه بعد 8 الاف سنة تزاوج وتوالد فى السودان..
لسه عنده شيزوفرينيا عرقية وبيقول ليك عربى..
والنوبى فرط كتير فى حقة لغاية ما بقى رد الحقوق شبه مستحيل...
وأهو أحنا بندفع تمن الغلطات دى..
أطرق افندينا لفترة ليست بالقصيرة..
وبدا عليه الارهاق المفاجئ.
ولم يستطع أن يخف حزنه.
رفع راسه قائلا:
للاسف يا جابر ياأبنى ....
أنا بتفق معاك!
| |
|
|
|
|
|
|
|
|
|
Re: فى البدء...كانت كادقلى (Re: nour tawir)
|
وآصل افندينا وقد تهدج صوته..
أستمرت التآمرأت على النوبة قبل وحتى اليوم..
لانه قبل الاستقلال..
وفى الفترة الكان بتتم مفاوضات عشان نحرر السودان من الانجليز...
الاحزاب التقليدية وشت النوبة للانجليز وقالت ليهم النوبة ديل عنصريين..
وعشان كدا ياشباب...
ورغم أنه نحنا حاربنا حرب شرسة ضد الانجليز..
الا وأنه النوبة ما شاركوا فى أول حكومة وطنية..
وأستمرت التآمرات..
لغاية ما وصلنا للكركور القاعدين فيه دا..
تنحنح كوكو تيه قليلا ثم قال..
أفندينا أعمل شاى فى فترة الاستراحة؟
أتفضل يا كوكو وكتر خيرك يا أبنى..
نحنا فعلا محتاجين لى كباية شاى..
وبعدين قدامنا مشوار طويل قبل ما الشمس تطلع..
جاهزين يا شباب؟
كلهم فى صوت واحد وفى حالة أنتباه تام(جاهزين أفندينا)...
فيما كان كوكو يقوم بعمل الشاى أستأذن جابر ليستنشق بعض الهواء فى الخارج..
ولكنه عاد فى عجلة من أمره وبدأ يهمس..
أفندينا؟
وقف افندينا فى حركة مفاجأة فى فترة لم يتدخل فيها الزمن..
فى حاجة يا جابر؟
فى مجموعة من (العدو) ماشين بى رجلينهم ومتجهين ناحية الشرق؟
عددهم كم يا جابر؟
القدرت أحسبهم خمسين..
دى غارة..
شكلهم كدا تقول طالعين الجبل!
ما حيطلعوا لغاية الكركور..
ليه أفندينا؟
هم عارفين أنه النوبة فى القرى الفاضية بكونوا طلعوا الجبل..
والحل؟
أحنا أصلوا متجهين جنوبا...أنت نسيت يا جابر؟
لا ما نسيت أفندينا.. لكين لو قابلناهم فى النص؟
أحنا عددنا كم يا جابر؟
أربعين..
نواجهم يا جابر..
تمام أفندينا..
| |
|
|
|
|
|
|
| |
nour tawir
بكرى ابوبكر
معتز تروتسكى
عبدالرحمن عزّاز
Shams eldin Alsanosi
Adil Osman
فيس بوك
تويتر
انستقرام
يوتيوب
بنتيريست