المُتكلم عنه في شئون البيت السوداني
تحياتي للجميع وخاصة للأخت نور تاور أكيد كل واحد فيكم ربط ما بين عنوان هذا البوست وبوست الاخت نور تحت عنوان (المسكوت عنه في شئون البيت السوداني) اتمنى ان تكون اول من يقرأ هذا الموضوع هي الاخت نور وقبل ان ادخل في تفاصيل هذا الموضوع اتمنى ان تعلم الزميلة نور باني لست ضد موضوعها من حيث المبدأ وان اختلاف الرأي لا يفسد للود قضية. فتحت هذا البوست وجعلته منفصلا عن البوست الذي كتبته نور وتعمدت ان لا يكون في شكل مداخلة حتى أخلق توازن مابين المسكوت عنه والمتكلم عنه في شئون البيت السوداني. قرأت بوست الاخت نور ولكن مالفت نظرى وباستغراب هو الاتي: ولنبدأ من عنوان البوست تمنيت لو كان عنوان البوست كالاتي المسكوت عنه في بعض البيوت السودانية.. وعلى الجميع وضع ثلاثة خطوط تحت كلمة بعض إلا ان الاخت نور كتبت المسكوت عنه في شئون البيت السوداني الأمر الذي يوحى للقارئ بأن هذا الذي يجرى من سلبيات يحدث في كل البيوت السودانية وليس في القليل القليل من البيوت. مع العلم اني لست من دعاة دفن الرؤوس في الرمال والتغاضي عن المشكلة بل على العكس تماما فلنعري كل السلبيات لكن في نفس الوقت لا نخلط بين الاخضر واليابس. ثانيا: تمنيت لو الان الاخت نور وعند ذكرها لكل نموذج مشين ان تذكر معه نموذج مشرف حتى يكون هناك توازن في المعادلة وحتى لا تميل كفة الميزان على الجانب السلبي خصوصا وان هذا الموضوع يهز كيان مجتمع بأكمله وليس بيت او بيتين لان القارئ لذلك الموضوع –موضوع الزميلة نور- اول ماتقفز الى ذهنه هو ان المقصود بذلك كل البيوت السودانية وليس البعض،خصوصا اذا قرأه زائر غير سوداني او حتى سوداني. ثالثاً: الا تعتقدي معي ياعزيزتي نور ان كل النماذج التي ذكرتيها هى ليس الا شواذ ولا يمكن تعميمها على مجتمع باكمله والشي الاخر نحن كسودانيين اكيد ومما لاشك فيه يوجد فينا الصالح والطالح وليس شعب مثالي بل مثلنا مثل بقية خلق الله. رابعا: صدقيني لو قمتى بفتح أي مجلة او جريدة عربية واتجهتي لصفحة الحوادث ستجدي عشرات القصص في جميع دول العالم مشابهة تماما ان لم تكن اشد وافظع. اذكر قبل عدة سنوات كنت مدمن على قراءة صحيفة مصرية تسمى الحوادث ..صدقيني من يقرأ تلك الصحيفة يظن ان المجتمع المصرى باكمله مجرمين . لكن الشعب المصري ايضا به الصالح والطالح وليس كلهم مجرمين. اليوم انا عاوز انصب نفسي (محامي دفاع عن البيت السوداني) ذلك البيت الجميل بكل ماتحويه معاني الجمال عشان كده يانور عاوزك تمشي معاي لمشوار رايك شنو؟؟ ح استناك هنا ..كدى امش البسي توبك بسرعة عشان نحصل الزمن .............. شايفه يانور الحي القدامنا ده حي سوداني والبيوت القدامنا دى كلها بيوت سودانية من اول بيت في رأس الشارع لى آآآآخر بيت هناك شايفه البيت داك الموجود بعد الشجرة ديك ؟؟ايوه هو زاتو عاوزك تمشي معاي حنسجل ليو زيارة لمده ربع ساعة البيت ده صاحبو اسمو(محمد الحسن حميد) بس مستأجرو منو واحد اسمو (عم عبد الرحيم) وعم عبد الرحيم ده عندو زوجتو اسمها (امونه) على فكرة بيت عم عبد الرحيم ده بشبه 90% من البيوت السودانية تعالي نخش البيت ده ..... خسارة (امونة) ما موجوده تعالي نشوفا مشت وين كانت ماهـا فى كانت فى المراح شدتـلـو الحمار تحلب فى الغنم لى شاى الصباح والطير ما نضم ما رسل نغم ......... الحمد لله اهي امونة رجعت من المراح بعد ماحلبت الغنم .. شايفها قاعد تتناقش مع عم عبد الرحيم.كدى خلينا نسمعم بقولو في شنو امونة الصباح قالتلو النعال والطرقة انهرن ما قالتلو جيب شيلن يا الحبيب غشهن النقلتى والترزى القريب بس يا ام الحسن طقهن آبفيد !! طقهن آبزيد !! انطقن زمن وان طق الزمن لازمك توب جديد وبى اية تمن غصبًا للظروف والحال الحرن شان يا ام الرحوم ما تنكسفى يوم لو جاراتنا جن مارقات لى صفاح او بيريك نجاح ده الواجب اذن وايه الدنيا غير لمة ناس فى خير او ساعة حزن بالله يانور شفتي كمية الحب والحنان الموجود في البيت السوداني ده (بيت عم عبد الرحيم) اها يانور ده نموذج نمرة (1) نموذج نمرة (2) رايك شنو نمشى للجيران ديل اهو بيتم قريب بالشارع ده .ناس البيت ديل سودانيين) الليلة عندهم زواج بنتهم واسمها لميس.. لميس دى امها قامت بتربيتها خير قيام وربتها خير تربية الى ان اصبحت عروس . ومن شدة اعجاب امها ببنتها لميس ماقادره حتى تفارق عينا رغم انو ماشا مع عريسها .. سمعتي اغنية نادر خضر (لميس).؟؟ ربما تقولي ان ماذكرته مجرد كلام شعراء وبس. لكن صدقيني هولاء الشعراء يصورون مايرونه على ارض الطبيعة. ياستي بلاش شعر تعالى اديك قصص من واقعنا المعاش: نموذج (3) خلينا يانور نشرب لينا حاجة بارده من الدكان ده وفي نفس الوقت احكي ليك القصة دى حصلت معاي شخصيا: كانت تعمل معي زميلة عراقية في نفس المكتب وفي يوم الايام ونحن بنتونس مع بعض اذا بها تقول لي ياهشام انا مستغربه جدا من السودانيين؟؟ صدقيني لما سمعت الكلمة القلم وقع من يدي خفت كمان يكون سوداني عمل ليو حاجة كده ولا كده. فرديت عليها ان شاء الله خير؟؟ فاخبرتني ان جيرانهم في العمارة اسرة سودانية وفي يوم من الايام حضرت اليهم اسرة سودانية وقاعدين معاهم لمدة اسبوع؟؟ فانتو كيف بتتحملو اسرة تقعد مع اسرة تانية لمدة اسبوع؟؟ والله هذا ماحكته لى بالظبط عندها ابتسمت وتنفست الصُعدا (على قول تختخ في لغز المغامرين الخمسة) فرديت عليها بكل كبرياء ياعزيزتي عندنا شي عادي جدا انو لو جاك ضيف او أي شخص محتاج تمدي ليهو يد العون والمساعدة وانا ماشايف أي شي غريب في الموضوع . طبعا العراقية مازالت مندهشه بهذا الكرم السوداني نموذج (4) خليني يانور اديك نموذج من هنا من هذا المنبر يحكي عن دفء وحميمية الاسرة السودانية أكيد قرأتي عن الزميلة منى خوجلي احدى المشاركات في هذا المنبر اها منى دي شفتي لما بنتها آية بلغت عمرها 17 سنة ؟؟شفتي عدد السودانيين الزاروهم في بيتهم؟؟اقصد في المنبر ده هل تصدقي تجاوز الالف زائر .والحمد لله ان هذا العدد زار منى في المنبر لانو لو زارا في البيت تعرفي كان كان ح يحصل شنو ؟؟ ماعاوز اقول اعصابهم ح تنهار لكن بيتم ح ينهار (لاسمح الله) وعلى الجميع الذهاب الى ذلك البوست لمعرفة عدد الزوار وليشعرو بدفء العلاقات الاسرية في البيت السوداني شفتي يانور اهو ده برضو نموذج عن بيت سوداني . نموذج (5) اسمعي القصة الحقيقية دى يانور والله عندما حكاها لى احد اصدقائي كم تأثرت وحركت فيني مشاعر لا توصف حكي لى هذا الزميل ان هناك اسرة سودانية (بيت سوداني) الزوج والزوجة وعدد من الاطفال زواجهم مستمر حتى اليوم وتجاوزت سنينه العشرين سنه حالة هذه الاسرة السودانية بسيطة جدا (يوم في ويوم مافي) تشئ الظروف انو في منتصف الشهر انعدم كل شي من البيت لا فلوس ولا اكل ولا لبن للأطفال . ماذا يفعلون؟؟؟ هل تصدقي ماذا فعلت تلك الزوجة السودانية اذا بها تخلع (الدبله) من اصبعها وهي اعز ما تملكه أي زوجه لتعطيها لزوجها لكي يبيعها ويشترى بثمنها مستلزمات البيت ..هل تصدقي..في البداية رفض الزوج اخذ الدبلة ولكن تحت اصرار الزوجة اذا به يقوم باخذها والنار تمزقه فهذه اعز هدية قدمها لزوجته من عشرين سنه ومن المفترض ان تبقى في اصبعها مادامت على ذمته.. انظري كيف كان تصرفها النبيل هذا!! الا يدعو الى الفخر وانو البيت السوداني لسه بخيرو وعافيتو تمنيت لو ان صديقي هذا اخبرني بهذه القصة في نفس اليوم لاذهب للصائغ الذي اشتراها واعيدها لتلك الزوجة واقول لها انت زوجة رائعة جدا. لكن خسارة اكيد الان تلك الدبلة في اصبع عروس اخرى. وبعد ده كلو يانور تقول لي المسكوت عنو في شئون البيت السوداني اكرر يانور هذا مجرد رأئي الشخصي واتمنى الا يفهم انه ضد ماكتبتيه عن البيت السوداني فقط حبيت ان اكتب عن الجانب المضي والمشرق في البيت السوداني . على فكرة هذا البوست حقوق الملكية فيه غير محفوظة فعلى الجميع المداخلة بقصصهم من ارض الواقع لعكس الجانب المشرق والناصع البياض للبيت السوداني ملاحظة القصيدة التي كتبت اعلاه مأخوذة من رائعة الفنان الراحل مصطفى سيد احمد (عم عبد الرحيم) لذا وجب التنويه واتمنى ان يبقى هذا البوست جنبا الى جانب مع بوست الزميلة نور وانتم يامن قرأتم هذا البوست (المتكلم عنه في البيت السوداني (معاي ولا مع نور)؟؟؟؟ تحياتي هشام حامد العبيد (عدل بواسطة هشام حامد العبيد on 02-25-2006, 12:40 PM) (عدل بواسطة هشام حامد العبيد on 02-25-2006, 12:46 PM) (عدل بواسطة هشام حامد العبيد on 02-25-2006, 12:47 PM) (عدل بواسطة هشام حامد العبيد on 02-25-2006, 12:50 PM) (عدل بواسطة هشام حامد العبيد on 02-25-2006, 12:52 PM) (عدل بواسطة هشام حامد العبيد on 02-25-2006, 01:09 PM) (عدل بواسطة هشام حامد العبيد on 02-25-2006, 01:10 PM) (عدل بواسطة هشام حامد العبيد on 02-25-2006, 01:12 PM) (عدل بواسطة هشام حامد العبيد on 02-25-2006, 02:12 PM)

العنوان	الكاتب	Date
المُتكلم عنه في شئون البيت السوداني	هشام حامد العبيد	02-25-06, 12:35 PM
Re: المُتكلم عنه في شئون البيت السوداني	nassr abdelbari	02-25-06, 03:41 PM
Re: المُتكلم عنه في شئون البيت السوداني	عبدالرحمن عزّاز	02-25-06, 06:05 PM
Re: المُتكلم عنه في شئون البيت السوداني	انتصار محمد صالخ بشير	02-25-06, 04:22 PM
Re: المُتكلم عنه في شئون البيت السوداني	القلب النابض	02-25-06, 07:13 PM
Re: المُتكلم عنه في شئون البيت السوداني	هشام حامد العبيد	02-26-06, 12:59 PM
Re: المُتكلم عنه في شئون البيت السوداني	انتصار محمد صالخ بشير	02-26-06, 01:28 PM
Re: المُتكلم عنه في شئون البيت السوداني	القلب النابض	02-26-06, 01:33 PM
Re: المُتكلم عنه في شئون البيت السوداني	nour tawir	02-26-06, 01:41 PM
Re: المُتكلم عنه في شئون البيت السوداني	هشام حامد العبيد	02-26-06, 01:52 PM
Re: المُتكلم عنه في شئون البيت السوداني	هشام حامد العبيد	02-26-06, 02:07 PM
Re: المُتكلم عنه في شئون البيت السوداني	انتصار محمد صالخ بشير	02-26-06, 03:37 PM
Re: المُتكلم عنه في شئون البيت السوداني	nour tawir	02-27-06, 02:28 AM
Re: المُتكلم عنه في شئون البيت السوداني	هشام حامد العبيد	02-27-06, 01:15 PM
Re: المُتكلم عنه في شئون البيت السوداني	nour tawir	02-28-06, 01:02 AM
Re: المُتكلم عنه في شئون البيت السوداني	هشام حامد العبيد	03-05-06, 01:24 PM

[رد على الموضوع]

صفحة 1 „‰ 1: << 1 >>

احدث عناوين سودانيز اون لاين الان

اراء حرة و مقالات	Latest Posts in English Forum
Articles and Views	اخر المواضيع فى المنبر العام
News and Press Releases	اخبار و بيانات

الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة

About Us
Contact Us
About Sudanese Online

اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين

News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums

If you're looking to submit News,Video,a Press Release or or Article please feel free to send it to [email protected]