|
|
 Re: بشاشة دة ما عندو موضوع (Re: Optimist)
|
| Quote: فاغفر لنا هذا الزلل يا صديقي، |
ما بيناتنا يامحسن
بديت من اخر كلامك يامحسن لاني ماعرفتا اجيك من وين .. ومع انو البداية بي كوت للرد لمن هم على مثل شاكلتك ،امر لايستقيم .. فالكوت ده بدايات جيدة لمن هم دونك في درجات البلاغة وايفاء الحديث حقه ..
واصلا المداخلة بي كوت دي تنم عن ضعف في الطرح والفكرة ..
ولكن بما انو كلامك يحتاج وقفة ومن ناحية تانية انا ما اصلا ضعيف الطرح والفكرة وفاقد منطق واسكلتون ..
فلا غضاضة..
يامحسن من الواضح انك ما احسنت فهم كلامي ..
او ما عجبك ان يرد عليك واحد فنطوط زي دكين فجيتي مدرع بعصارة تجربتك السمينة كما عجل ابراهيم الحنيز على حد تعبيرك الفكِـه.
ياخي الخواجات الاستشهدتا بيهم في مقالك ديل والله من كترتم وجهلي بهم لو كنتا قتا لي انو رؤية ادريان ساليلا للانسان في القرن المنصرم هي رؤية بتقمع فكره جدلية الوجود المتقمص ،وكان ادريان المشار اليه ده في الحقيقة مجرد مكوجي فلبيني تحت شقتك في دبي ...ما كان فرقت معاي وكان صدقتك ..
كان صدقتك لانو الثابت عندي انك زول مدرع بي معرفة حنيزة، وما كان فرقت معاي لاني الناس القتهم ديل سواء ان صحت نظرياتهم للحياة او لم تصح هم عندي ادميين غير معروفين وانا جاهل بهم وتبقى رؤيتهم مرهونة بامزجة وظروف ومعطيات اخرى لست ملزما بها بالضرورة .
وانا اسعى لاختيار طريقي وفق الفطرة - التي نفيتها عني- ووفق ما هو متوفر لي في ظروفي وليس وفق لما قد توفر للغير في ظروف غير..
هم رجال ونحن رجال كما قال احدهم في مقتطف من حديثه عن قفل باب الاجتهاد ..
وانا دكين شخصيا احساسي بي نفسي عالي جدا وفي معظم ايام السنة باستثناء الخريف يغمرني حسس عالي باني لست اقل شانا من ناس جالليو ،اوغيرهم من بقية العصبة الكريمة رواد الفكر والتنظير الانساني.
انا نظريتي بتقول انو الجاذبية هي معضلة الخلق ..وانها أُس حركة التاريخ..وده مشروع كتاب ما مستعد افاتحك فيهو او العب بي اوراقو هنا .
ده طبعا ما موضوعنا عشان ما تقول دكين ده ميل لي وادي الرتيلة ،انما اتيت على ذكر ما قد سبق للتدليل على أن من ذكرتهم عندي تماما زي تراجي اختك الكبيرة وبشاشا المنبت..لا يعنوني في كثير او قليل..سوى أن الاخيرين يهيمون في لججِ الحقدِ وعماء البصيرة، خطائيين يكررون حديثا ممجوجا غير مستساغ .
احب اوضح ليك أنو الشخصيات الذكرتهم في نصك اب عشرين صفحة ده، انا لو قعدتا تاني 30 سنة في حياة اخرى ما اقدر اسمع بيهم مجرد سماع خليك من اقرا ليهم .
كما واشكرك على الزمن الاستقطعتو من زمنك لاجلنا .
وعودا لبدء ..قتا ليك ما احسنت فهم كلامي لاني ماطالب ثار وما عنصري بي الفهم الانتا قاصدو ،انا فقط اسعى لحفظ كياني ..هويتي ضد المدعين وضد من يرون أن وجودي مزعج .. كنتا اعتقد انو كلامي ده واضح جدا بيد انو كلامك كان بكرس ولمدة عشرين صفحة بي زمن كتابتك اني عنصري ،دموي وبغيض .
بالعشرين صفحة الضافية حقتك دي لامن انا ذاتي فقدتا ملامح الموضوع ابتداءاً..
يعني اسكلتون لي قراية نص طويل ساي ما عندي ناهيك عن اسكلتون لكتابة نص طويل متماسك .
ما كتبته اليك لم يكن سوى عرض حال مختصر وغير منمق لما آل وسيؤل المصير البشري بالمعطيات الحالية.. قس على ذلك الوضع المحلي في السودان.
ان يصير التفكير البشري الى تساميك الذي تدعي به لابد من تجارب يمر بها ..
الانسان الاول لامن مرق من الكهف لاول مرة ما مسك حجر مسنون ورسم في الجدران شروط العقد الاجتماعي وشروط للصيد والالتقاط وحفظ حقوق الجوار .
ما قام كده طوالي طاخ عمل محلية كهوف شرق النيل ..
وما عشان انو هنالك مجتمعات توصلت بي فكرها الى افاق راقية ورحبة اكثر انسانية يعني ذلك ان تبت قبائل جنوب النيل الازرق حين تحكم في امر ابنائها بما توصل اليه المعهد السويسري للقانون المقارن ...طبعا جنوب النيل الازرق ده مجرد مثال وقس على ذلك جميع المجموعات الموجودة في السودان بما فيهم النوبيين عشان ما تقول متعنصر ضد النيل الازرق .
الفارق الفكري بين ديل وديل هو خلاصة تجربة كبيرة دارت فيها معارك حربية وفكرية ، طمرت فيها افكار وقامت اخرى ..ابيدت مجموعات وجاءت اخرى .
ماالسويسريين ديلاك ذي ما توصلو لي عدم جدوي التخلف ديل برضو حيتوصلو لي ذلك ..بس لانو العالم الانتا شايفو متطور ما حريص على انو يصلوهو باخوي واخوك ..ومشغول بي اطماعو وعايش في جحيمو الخاص لذلك حيقومو ناس جنوب النيل الازرق يصلوهو بنفس المنهج الديلاك وصلو بيهو ( ِشبك ،معارك ،دماء ، نظرة لتلك الدماء ،تحسر ، ثم بعد ذلك صياغة عقد اجتماعي وقانون مرعي ومحمي ليس بالـ common law و ليس بقانون شمال نيجيريا او الشريعة الإسلامية او قانون ناس كرشنا فاسديف وفقهاء القانون الهندي وانما بمؤسسات مدنية وحقوق يكون الضامن الراعي لها هي قناعة لاجدوى الدماء التامة)
It is just matter of time ونحنا بالضبط في الماتر اوف تايم ده قاعدين نرعوي بكل ابتلاءٍ ومِحنة تاتي علينا .
اهو مثلا انتا اكتشفت لا جدوي الدماء كنتاج للبلاغة السياسية- الافتريت عليها دي -التي اودت بالبرامكة .
موتة البرامكة القبل مئات السنين كانت جزء من تفاصيل ركزت في محمولك الثقافي هذبتك وخلتك تعرف لاجدوى اسنة الرماح والدماء ..بالرغم من بشاعتها إلا انو انتجت من اصلاب خليفة المجزرة من هم اكثر تقييما للحياة .
دي الانا قاصدها ليك في معرض ما ذكرت في ردي اليك ، وما عشان انا بتكلم عن شي بتوقع انو يحصل معانتا انا بحب ما اتوقع ..
ما عشان انا قتا انو حتحصل مجازر وفق قراية منطق التطور البشري الطبيعي – الممكن تقراهو من مجلة ميكي ذاتو- معناتا انا راعي حضارة دراكولا.
للاسف يا محسن قد تقولت علينا كثيرا في نصك اب عشرين صفحة ده .. بل واكثر من ذلك حملت حديثي ما لايحتمل وانتا زول روائي وحياتك كتابة وتدري مغبة التحوير والاثر البالغ في تحميل الحديث ما لايحتمل.
لكي اكون اكثر ايضاحا لك ،هنالك فرق مرونة انساني كبير جدا بينك وبين شاب مسيري او تعايشي او رزيقاتي في كردفان ودارفور وبحر العرب او أي رجل اخر دارع حجباتو وشايل كلاش وقاصد الدواس لانو يعتقد بالله واحد انو ارضه وعيالو مهددين بي دولة الزغاوة الكبرى او غيره،اها الفرق ده هو نفس الفرق البين الخليفة العباسي في بغداد الخلافة الذي اعتقد بسوء نية البرامكة وبين بلند الحيدري رحمه الله او أي عراقي اخر مؤدب انسانياً ويؤمن بالسلام الانساني في بغداد صدام او في أي صقع اخر من العالم .
اها انا بقرا الفرق بين المسيري القبلي الجامح - بما زُيـن له من اعتقاد - وبينك انتا زي الفرق بين الخليفة بتاع البوسة بما زين له وبين بلند الحيدري.
وبقرا توجه الدولة القائم على مواجهة ما لا تستطيع مواجهتة حقيقة ، والجعجعة الفارغة واناشيد امريكا روسيا قد دنا عذابها الاستشهدتا بيها انتا ضدي ..
بقراها كلها على انها هي في الحقيقة بينات ظرفية تدعم كلامي وانها ثقافات لا تفرخ إلامآتم ..وثقافات ُتفرخ مثل ما ذكر هي ثقافة لن يتم ادب سلام حامليها إلا عبر محارق.
يا محسن ياخوي انا بقرا ليك في واقع حاصل وحيحصل موش حاجات انا بتمنى انها تحصل ..
البتتمناهو انتا وغيرك من المثاليين شي والحاصل والحيصل شي تاني .. الدنيا دي ما ماشة بي التنظير المثالي بتاعك انتا وصحبك الميامين الذكرتهم في مذكرتك الضافية .
عقب ضربة الشفا الماعرفوها بي كروز ولا بي طيارات ولا بي منجنيق خرجت مسيرة غاضبة شفتها في التلفزيون فيها لافتة كبيرة مكتوب عليها ( محلية ام شديدة او قرية كده لا اذكر اسمها - تهدد وتتوعد امريكا ) ، امريكا هنا ما ذكرتها عشان انا زي الكيزان بحشرهم في أي مناسبة ولا مناسبة ،هي مذكورة لانها جزء من الموضوع..
اها شفتا كيف ناس ام شديدة رافعين لافتة يتوعدوا فيها امريكا..
امريكا الممكن تصور بي قمر صناعي مواقعة تيس لي بهم العمدة في حوش المحلية.
ام شديدة الكلها عن بكره ابيها وبي كل زوج من بهايمهم ونباتات المنطقة ممكن يخشو في فرطاقة اسمها فيلادلفيا ويظل هناك متسع بها..طبعا رجالة امريكا انتا ما محتاج من يعرفك عليها ..
اها حركات ناس ام شديدة الماكويسة دي بتاعة رفع اللافتة انا ما بسميها رجالة وطيش زي ما انتا بتقول انو انا سميتها في سلسلة ما افتريته على وقولتني اياه، وانو انا عايز اواجه مجنزرات المارينز ومظلات القوات المجوقلة واليقرز بي سيف عشر من ساقية خيري الدنقلاوي ..
دي انا بسميها ذهنية محتاجة تعرف معنى المداوسة عشان تتطور بحق موش محتاجة منظرين واستاذة مستنيرين .. دي اسمها ارهاصات المجزرة الجاية .. بقراها كده لانو دي القراية المنطقية ليها وإن كان لها قراءات اخرى .
الترابي غفر الله له.. قاد حركة ثورية كبرى في السودان في المية سنة الاخيرة علي مستوى الشباب بي صيف العبور والمتحركات..المغيرات صبحا والعاديات ضبحا والقعقاع ومافتح به الله عليه من اسماء يبرر بها الدواس ويلهب بها الحماسة افضى ذلك إلى التحاق شبيبة بحروب اودت بحياتهم .. ولا تزال آثار فاسه باينة في المجتمع السوداني .
لامن القى في حركة زي دي من ناس يبيعتبروا- بغض النظر عن رايك انتا فيهم او راي غيرك- مستنيرين ونخبة .. معناتا نحنا لسع راجيانا محارق ..
اها انا كيف في مجتمع زي ده اقتنع بي انو ممكن اخلق منهم مجتمع متنور يؤمن بالاخوة المبنية على محبة .
لامن القى مسيري بسيط ما بفهم إلا انو بحر العرب ده جزء من ميراثهم والقى مثقف متنور محامي وضليع في القانون مابفهم إلا الغاية لتبرير وسائله ..
لامن القى ديل في مجتمع واحد دايرني اتوقع شنو غير مزيد من البشتنة ولي سنين جاية ..
ياصديق انا صالح تماما لاني اعيش في وسط السيادة فيهو للقانون لكن ما بصلح لي وسط فيه سيادة القانون لسع بين بين وحتظل كذلك لازمان قادمات..
فما تسكني بي افكاري التي لم تحسن قراتها .
Quote: ياما صرفتو رواتب وذخيرة وأخدتو بدلات كتل، ناس الجنوب والغرب والشرق ديل هَسّع دايرين مجرّد يعيشوا، وإنتو دايرين صولجان ومباريات زمنها يقارب العشرين سنة، حقيقي الفاضي يعمل فيها ملك حردان،
|
هسع فرقك شنو من بشاشا لامن انتا عبتا عليهو انو بستخدم صيغة الجمع لتجريم شماليين جزء كبير منهم مظلوم..
الشماليين ديل والله مافايتنهم إلا باعانات المغتربين البرسلوها ليهم دي.. المتوفر للشماليين في شمال السودان لايزيد اعانات اخوانهم واولادهم المغتربين ..يعني مافي حكومة هناك بتبني مدرسة او حكومة بتبني مستشفى كلو عون ذاتي من جمعيات القرى والمشايخ في الخليج ودول المهجر الاخرى..
مشكلتهم من زمان قطعو الامل في دعم المركز ليهم .. ما عندهم احساس بي انو دعم الدولة ليهم حق يجب المطالبة به زي الجنوبيين وناس الغرب وناس الشرق مؤخرا..
احساسنا بالدولة من شدة ما فقدناهو بقينا ما حاسين بيهو إلا في الشدة المتجلية في جباية المطارات والسفارات .. ...والله قرى الولاية الشمالية دي ممكن تعيش كدول مستقلة براها زي الترتيب ويعملو ليها وزير مالية مقيم بين جدة والرياض .. وتعتبر السعودية ودول الخليج مورد طبيعي لمصدر تمويل الدولة الاساسي ونضمنها في دستور الدولة ...
ديل ناس بسطاء تكاتفهم فيمنا بينهم بغطي فروقات الفقر بين العوائل والاسر ..
لذلك ما ظهر فيهم متمرد ..والظهرو مؤخرا ما ظهرو لانهم تعبو من المكاتفة والمعروف ..ظهرو لانو شافوا غيرم بشيل حقو عنوة واقتدارا.
وصحي نحنا زي ما انتا قتا ما ناس دواس ولا بنحصل الناس البنيشو الخيط نص الليل (ناس الثقافات الحربية )ولا ركابين سروج..بس ذلك أن دل لا يدل إلا على السلام النفسي العايشو النوبي .. نحنا الدواس كمانهو ايام رماة الحدق..
الرجال الفتحو لحدي القوقاز وجنوب فرنسا غلبهم يمشو في دنقلا دي إلا بعقد مرعي ومتفق عليه ..
لذلك طيبتنا وسلامنا النفسي ده نتاج حقب حضارية توالت .. انتجت نوبي اليوم الانتا شايفو زول مسيكين وبتاع هجرة وساعي في الارض بالسلام والمحاربين عندهم ما بتمو بص سيرة ..انتا قايل دي مثلبة جاي تعايرني بيها؟
ولانو نوبي اليوم بدا ينسي كنتاج لطمث ثقافتة الحضارية الانسانية المنتجة من ادبيات حروب امتدت حتى الدلتا والمفترض انها كانت بتنمي فيهو ثقافة لا جدوى الحرب ..
ولانو بدت تخش فيهو الثقافة الوافدة الرعوية هو ذاتو في رقبتو بقى محتاج لي ترتيبات عشان يفهم معنى انو يتعايش في سلام بيد انه اقل من غيره في الاحتياج على مستوى القبائل السودانية..لذلك النسيان غير المتعمد تراني بما رايتني .
رجعونا تاني لي عصور النوبة الاولي ماقبل الاستنارة ..
ولذلك ابشرك يامحسن إن حرن الدواس وحمي هم ذاتم بقيفوا ليك الف احمر ضد البهدد وجودهم ..كان كروز ولا كان سيف ولا كان شوتال .. ما هبالة مني لكن لانو الكائن الحي بعمل كده لامن يحس بانو معرض للفناء.
ماتصور لانو واحد بنيش الخيط نص الليل وفرحان بالخيط والليل أن جاني قال لي قوم فز بقول ليهو .. اتفدلي يا زولة ..حرم يانجضتو يانجضني..وللعلم لامن يحصل الشي ده ما بكون فرحان..وانما ذلك خيار المسالم المضطر البفتش لي مخارجة النفس.ان تخارجت نفسي فبها وان لم فتلك مسيرة التاريخ ومشيئة الخالق وقد اراد ان يفسح مجالا لغيري .
نحنا مسالمين بطبعنا ومناطقنا ما شهدت نزاعات مسلحة منذ مئات السنين ..وفينا العرس من الغرب وفينا العرس من العرب وفينا العرس من جنوب النيل الازرق ..عرسوا لانو دي قناعتهم واتجاهات الريدة حددت مصايرم .
الفتوحات القامو بيها الانجلو سكسون في المكسيك والكاريبي وفتنام وافغانسان والعراق دي قامو بيها النوبيين قبل سنين مؤلفة ..
ان تكون محاربا دشنا نياشا للخيط انصاص الليالي او ركابا لسرجٍ لا يزل ،ليست معضلة ،ولاتاخذ منك إلا مسافة أن ُيقتل لك عزيز او ُيمثل بجثتة او تخش فرع التدريب الموحد باللواء 11 مظلي جبل اولياء ..
بس مسافة انك تبقى ادمي متسالم مع نفسك وقنوع دي دايرة ليها سنين من حضارة باهية ومسافة قدر مسافة الريدة زي ما قال القدال ..ولحدي مسافة الريدة والسنين الباهية بتاعك دي ما تجي خلينا نتحزم للجايانا عشان التحزم للجاي قد يمنع الجاي ..
مشكلتنا في هذا الزمان العفن انو انحنا مسالمين.. قد نزول منها لانو ده ما زمن ناس مسالمة
والله السلام النفسي لي حبوبة اولاد ود خالتك المفترس القتو داك لو فتشتو في اكثر متسامح في انحاء الدنيا ما تلقاهو ..
اقصى ما فعلته حفيدة الشمس انذاك احتجاج تحت نيمة .. مسيرة منفردة تندد وتجشب بماتحت صرة الجعليين وبي الزمن العفن (على حد قولها) الخلاهم يناسبو ناس جايين مبارين المطرة ..دي حبوبة مستنيرة وتؤمن بالاحتجاج السلمي كوسيلة للتعبير.
دي لو كانت من المتمة كانت دست لي نسيبها المسدس في شاي الصباح ..
لذلك ما تجني علينا بتعميمكم المخل انتا وبشاشة..تركبونا سرج واحد مع غيرنا لمجرد انو الغير ديل من الشمال وانتا عارف وبشاشا متغابي العرفة في انو الامر ليس كما تزعمون .. هسع العنصري فينا منو ؟؟
كان في اطيب من البوشناق ..والله نسوانهم كانو احلى من النوبيات البتتغزل فيهم ديل وزي فلق الصباح وبلادهم زي الرسموها براهم بي مزاج وردي وزيزفوني..
شوف ياخوي والله انا اكتر واحد هنا مسالم واحب الحب والمقالدة وتوزيع البسمات من القلب ،لكن انا ما مستعد اقعد اتفرج وهناك من ينظر الينا وكاننا سبب بلايا الارض ، ما مستعد اتكلم هيروغليفي في وسط مجموعات بتتكلم امهري..
كلامك السمح والمنطقي ده هو ما يجب ان يكون عليه حال العباد بعد كم تاشر مية سنة او في الفردوس .. المنطق ليس من سمات غالبية قاطني الارضيين في الوقت الحالي .. ولامن يبقو منطقيين وفردوسيين اعلم انها لن تدوم وقد آن اوان رحيل المستخلفين عليها .
ماكان في ارقى من المجتمع اليوناني والروماني ومنهم جاتنا نص علوم المنطق الانساني.. الان لم يبق منهم إلا إستاد نصو مهدم والباقي تاريخ مسطر في مدونات..
لانهم هم ذاتم كانو يبنون مسرحا واستاد بجهة وكتيبة من حرس الامبراطور للهمج والرعاع من جهة اخرى.. ذي ما يوناني العصر الحالي ببنو في مخازن السلاح الما خمج القتا خاتنها لي دولة مستنيرة .. المستنيرة دي افراد امتها مخلوقين من لبخ ؟!
ما بشر برضو.. يعني خاتنها يطحنو بيها بشرية ..متخلفة, مستنيرة ,ام جاية من ريفي اللعوتة .. المهم بشرية ..
اهو ده الجزر والسلخ القاصدو ليك..
ما بتمناهو يحصل ..لكن بالمنطق الانتا شايفني بعيد منو ..هو جاي جاي ..
مسالة حشر امريكا دي استغرب ما فهمتها كيف..
يامحسن لو تعنصر هنود الاباتشي حين جزر كلمبس اول هندي شقى على الايست كوست ما كانو هسع بسووا في متاحف لي تراثهم في نيويورك وغيرها من مدن اميركا زيهم زي الفراعنة ..
لو كان كلمبس لقى في وشو سواطير وفؤوس اتحاد عام الهنود الحمر بشرق امريكا وبراري متشغان كان غصب عن امو خت الكورة في الواضة وعمل معاهدة وكنيسة في باحة مدينة (نيو لندن) وتبادل معهم شوالات البطاطس مقابل تلاتين عبدا هنديا من متوسطي الاعمار وان يدخلو المدينة عابرين غير محاربين وان شرد منهم بريطاني اعادوه اليهم ،وان شرد هندي من الهنود لم يعيدوه (ده طبعا هظار لاني زهجتا من الكتابة).
انا ما جبتا سيرة امريكا لانها تقف ضد الاسلام عشان تقول لي عقلية كيزان.
انا اتكلمتا عن امريكا لانها تسير وفق منهج قيامي .. تؤمن بسحل كل ماهو غير انجلو سكسوني لانهم يعتقدون انهم شعب الله المختار ..
| Quote: شيء دي" هل أبناء غرب وجنوب السودان هم أمريكا؟ أم هم عملاء ووكلاء |
امريكا مجرد مثال لبشرية تكنس البشرية الاضعف ..
تمكنت فكنست من هم ادنى منها ..
انا بقى ما اركن لي كلام نظري وفلسفة مثالية لن توجد في القريب المنظور وان وجدت فان الله حينها لا شك سيرثها وسيرث من عليها ..لانو الجنوب والغرب ممكن براحة يكونوا جزء من مكائد غربية او مسرح لاطماع او أي مخطط اخر لو استمر التحريض وتلفيق التهم جزافا زي ما بتعمل صاحبتك تراجي دي.
لن اركن لما قلت عشان اتكنس لي مزبلة الاباتشي او القى نفسي مشرد زي يهود الثلاثيات من بعد عزتهم ..او عرب 47 بعد منعتهم .
انتا قايل لو تمكن الجنوبيين من القيادة العامة فجر ذلك الاثنين - بعقليه المحاربين الداسو بيها الخرطوم ديك برغم وجودك ووجود سبعين زيك بنفس المنهج الجميل المثالي- كنتا هسع حاكون قاعد هنا في بطحاء نجد... ولا انتا كنتا حتلقى زول تحول ليهو دراهمك في المتمة ..
قريشاتك البتلمها دي والله إلا كان تعمل بيها سبيل تكتب فيهو (ربي ارحم شهداء المتمة الذين اقامو دهرا في الخرطوم ثم اخذو على حين غرة غُـرة يوم الاتنين ) والسبيل ذاتو ماتقدر تعملو إلا شمال عطبرة او شرق ابو ظبي .
جميعكم هسع كان نكون عند منحى النيل ..ده على ابهى افتراض ..بل واكثر من ذلك مطالبون بالعودة الى الجزيرة العربية.
العرب ديل قعدوا في اسبانيا 400 سنة ومرقو منها ما يمرقو من السودان وعمرهم فيه حوالي 200 سنة ؟؟ده ما كلامي بالمناسبة وانما كلام روي عن محاربين من اعالي النيل .
انا ما عربي لكن بريد لي واحدة ابوها بديري دهمشي وامها جعفرية ويهمني وجودهم بالجوار لانو هي بتخدم صالح وجودي بشكل من الاشكال ولانو جابتهم حركة تاريخ سمحة ومجيدة .وانا متاكد انو القافلة الجابت مريودتي دي ما هي نفسها الجابت اسلاف بشبش ولاسرت حين سرت ليلا بقمرٍ واحد واكيد ديك جو في يوم ممطر وخريفي وغائم بينما اسلاف الاخير ديل جو في يوم مسغبة ونكران جميل.
هو قبيييل يا دكين، الجنوبيين ديل ذاتم، الكان تارسم منّكم ومن خرطوم الاستكرات دي شنو، ما ياهم أولاد الغرب الشينين ديل نفسهم،
| Quote: هو قبيييل يا دكين، الجنوبيين ديل ذاتم، الكان تارسم منّكم ومن خرطوم الاستكرات دي شنو، ما ياهم أولاد الغرب الشينين ديل نفسهم، |
يامحسن انتا زول بتزعل لامن يقولوك كلام ما قتو ولو ضمنياً ..انا ما عندي مكنزمات رفض لي ناس الغرب فما ترمي بمقاصد تدلل على ذلك .
انتا ما نبي ولم يوحى اليك حتى الان ولا تتسم بشي يجعلك ترفض شيئا وتراني اهلٌ له .. عشان كده يا صحبي كف عن الصاق النعوت جزافاً.
انا صداقاتي اغلبها من هناك وما مضطر افرز وافصل ليك محبتي عشان تقتنع.. وما عندي كذلك تعنصر ضد الجنوبي البتقولوا ده ..والمابترضاه لي نفسك ما تفكو فيني .
كل من ُظلم فرفع السلاح فهو على حق وقد ظلم اهل الغرب فرفعوا السلاح فهم على حق لان بقائهم احياء اصبح مهددا .ولا اعيب على احدا الدفاع عن وجوده فلا ُيعيبن علىَّ احدكم حفظي حياتي وحياة من بهم يتشكل معنى وجودي.
واهو دي قتها انتا بي نفسك ناس متورسين مننا بي ناس تانين يعني ما متروسين مننا بي منطق مجريتك ومنطق تسالمو تعايشو تصحو.
اها عايزني انا ارجا الراجايني ورا الترس ...
ارجا انتا ياخوي ..بعدين خم وصر .
يا عزيزي انا ما بهمني اني اكون منطقي او مثالي او ذو ثقافة حربية او دموي اوغير ذلك من اباطيل بقدر ما بهمني اني اضمن سلامة وجودي ضد كل ما يتهدد وجودي .. سوت شنو الدبلوماسية للبوسنيين والبلقان في عصر النظريات الانسانية المثالية .. لي يوم الليلة بمرقوهم زمرا زمرا من حفر غميسة ..
وما قاعد انادي لي دولة النوبة التي اتى عليها الزمان .. التي اتىعليها الزمان لان الزمان ياتي علىكل شي لا يصمد امام غوائله ..
لكن بحب احفظ ما تبقى منها امام غوائل زماني..
طبعا ده كلو كلام علاقتو بي مسالة بشاشة وانو غير دنقلاوي غير قوية وان كانت له علاقة ،وانما اتى به كلامك عن العنصرية في ردك الاول وكلام الست هانم تراجي القالت غصب عن الرطانة ..
وكلامك في مسالة اني احاجج بشاشا بي منطق الفصاحة والتهاتر وليس بي منطق المنطق هو كلام صحيح بس ده لانو بشاشا نفسو لا يقود منطقا وانما مفردات ممجوجة مكررة يعتقد انها سبه ..
ينعت بها الشماليين دون فرز بشاشا عندو كديسة في راسو اسمها جلابة وعرب ..عقدة ادمي موش فكره بتاعة مناهضة عنصرية وطرح خلاق لتماذج انساني.
ودمتا طيب.
|
|
 
|
|
|
|
|
| العنوان |
الكاتب |
Date |
| بشاشة دة ما عندو موضوع | Optimist | 10-29-05, 06:17 AM |
| Re: بشاشة دة ما عندو موضوع | humida | 10-29-05, 06:28 AM |
| Re: بشاشة دة ما عندو موضوع | فيصل نوبي | 10-29-05, 06:35 AM |
| Re: بشاشة دة ما عندو موضوع | نهال كرار | 10-29-05, 06:38 AM |
| Re: بشاشة دة ما عندو موضوع | Ahmed Mohammed Osman | 10-29-05, 06:45 AM |
| Re: بشاشة دة ما عندو موضوع | عبداللطيف خليل محمد على | 10-29-05, 06:52 AM |
| Re: بشاشة دة ما عندو موضوع | humida | 10-29-05, 07:00 AM |
| Re: بشاشة دة ما عندو موضوع | فيصل نوبي | 10-29-05, 07:07 AM |
| Re: بشاشة دة ما عندو موضوع | Optimist | 10-29-05, 07:15 AM |
| Re: بشاشة دة ما عندو موضوع | Osman M Salih | 10-29-05, 03:46 PM |
| Re: بشاشة دة ما عندو موضوع | Osman M Salih | 10-29-05, 03:54 PM |
| Re: بشاشة دة ما عندو موضوع | Ahmed Mohammed Osman | 10-29-05, 07:15 AM |
| Re: بشاشة دة ما عندو موضوع | Osman M Salih | 10-29-05, 02:39 PM |
| Re: بشاشة دة ما عندو موضوع | Osman M Salih | 10-29-05, 02:32 PM |
 Re: بشاشة دة ما عندو موضوع | معتز تروتسكى | 10-29-05, 02:44 PM |
| Re: بشاشة دة ما عندو موضوع | Osman M Salih | 10-29-05, 02:58 PM |
| Re: بشاشة دة ما عندو موضوع | Osman M Salih | 10-29-05, 03:00 PM |
| Re: بشاشة دة ما عندو موضوع | Osman M Salih | 10-29-05, 03:08 PM |
| Re: بشاشة دة ما عندو موضوع | Osman M Salih | 10-29-05, 04:13 PM |
| Re: بشاشة دة ما عندو موضوع | النصرى أمين | 10-29-05, 03:57 PM |
| Re: بشاشة دة ما عندو موضوع | هشام مدنى | 10-29-05, 04:16 PM |
| Re: بشاشة دة ما عندو موضوع | Osman M Salih | 10-29-05, 05:06 PM |
| Re: بشاشة دة ما عندو موضوع | Osman M Salih | 10-29-05, 05:19 PM |
| Re: بشاشة دة ما عندو موضوع | Osman M Salih | 10-29-05, 05:22 PM |
| Re: بشاشة دة ما عندو موضوع | Osman M Salih | 10-29-05, 05:52 PM |
| Re: بشاشة دة ما عندو موضوع | Osman M Salih | 10-29-05, 06:04 PM |
 Re: بشاشة دة ما عندو موضوع | altahir_2 | 10-30-05, 04:21 PM |
| Re: بشاشة دة ما عندو موضوع | هشام مدنى | 10-29-05, 05:49 PM |
| Re: بشاشة دة ما عندو موضوع | Osman M Salih | 10-29-05, 06:36 PM |
| Re: بشاشة دة ما عندو موضوع | Osman M Salih | 10-29-05, 06:41 PM |
| Re: بشاشة دة ما عندو موضوع | Osman M Salih | 10-29-05, 06:48 PM |
| Re: بشاشة دة ما عندو موضوع | هشام مدنى | 10-29-05, 07:13 PM |
| Re: بشاشة دة ما عندو موضوع | هشام مدنى | 10-30-05, 05:55 AM |
| Re: بشاشة دة ما عندو موضوع | DKEEN | 10-29-05, 07:08 PM |
| Re: بشاشة دة ما عندو موضوع | حسن الملك | 10-29-05, 07:30 PM |
| Re: بشاشة دة ما عندو موضوع | نادية عثمان | 10-29-05, 09:24 PM |
| Re: بشاشة دة ما عندو موضوع | Bashasha | 10-29-05, 09:24 PM |
| Re: بشاشة دة ما عندو موضوع | bob | 10-29-05, 09:34 PM |
| Re: بشاشة دة ما عندو موضوع | Bashasha | 10-29-05, 09:42 PM |
| Re: بشاشة دة ما عندو موضوع | Bashasha | 10-29-05, 10:23 PM |
| Re: بشاشة دة ما عندو موضوع | Bashasha | 10-29-05, 11:56 PM |
| Re: بشاشة دة ما عندو موضوع | DKEEN | 10-30-05, 00:47 AM |
| Re: بشاشة دة ما عندو موضوع | ahmad almalik | 10-30-05, 01:10 AM |
| Re: بشاشة دة ما عندو موضوع | DKEEN | 10-30-05, 08:04 AM |
| Re: بشاشة دة ما عندو موضوع | Deng | 10-30-05, 01:45 AM |
| Re: بشاشة دة ما عندو موضوع | humida | 10-30-05, 02:14 AM |
| Re: بشاشة دة ما عندو موضوع | Bashasha | 10-30-05, 02:17 AM |
| Re: بشاشة دة ما عندو موضوع | Munir | 10-30-05, 02:58 AM |
| Re: بشاشة دة ما عندو موضوع | Osman M Salih | 10-30-05, 03:21 AM |
| Re: بشاشة دة ما عندو موضوع | Osman M Salih | 10-30-05, 03:29 AM |
| Re: بشاشة دة ما عندو موضوع | Osman M Salih | 10-30-05, 03:32 AM |
| Re: بشاشة دة ما عندو موضوع | Faisal Taha | 10-30-05, 03:57 AM |
| Re: بشاشة دة ما عندو موضوع | Osman M Salih | 10-30-05, 03:52 AM |
| Re: بشاشة دة ما عندو موضوع | Osman M Salih | 10-30-05, 04:28 AM |
| Re: بشاشة دة ما عندو موضوع | Osman M Salih | 10-30-05, 04:53 AM |
| Re: بشاشة دة ما عندو موضوع | Osman M Salih | 10-30-05, 05:17 AM |
| Re: بشاشة دة ما عندو موضوع | Osman M Salih | 10-30-05, 05:20 AM |
| Re: بشاشة دة ما عندو موضوع | Osman M Salih | 10-30-05, 05:45 AM |
| Re: بشاشة دة ما عندو موضوع | هشام مدنى | 10-30-05, 06:01 AM |
| Re: بشاشة دة ما عندو موضوع | Osman M Salih | 10-30-05, 06:07 AM |
| Re: بشاشة دة ما عندو موضوع | حسن الملك | 10-30-05, 08:02 AM |
| Re: بشاشة دة ما عندو موضوع | Bashasha | 10-30-05, 11:45 AM |
| Re: بشاشة دة ما عندو موضوع | عبداللطيف خليل محمد على | 10-30-05, 01:59 PM |
 Re: بشاشة دة ما عندو موضوع | عبد الحميد البرنس | 10-30-05, 04:15 PM |
| Re: بشاشة دة ما عندو موضوع | Bashasha | 10-30-05, 04:48 PM |
| Re: بشاشة دة ما عندو موضوع | DKEEN | 10-30-05, 05:56 PM |
| Re: بشاشة دة ما عندو موضوع | zoul"ibn"zoul | 10-30-05, 06:33 PM |
| Re: بشاشة دة ما عندو موضوع | حسن الملك | 10-30-05, 07:55 PM |
| Re: بشاشة دة ما عندو موضوع | Bashasha | 10-30-05, 09:06 PM |
| Re: بشاشة دة ما عندو موضوع | حسن الملك | 10-30-05, 09:29 PM |
| Re: بشاشة دة ما عندو موضوع | Bashasha | 10-30-05, 09:59 PM |
| Re: بشاشة دة ما عندو موضوع | Bashasha | 10-31-05, 07:48 AM |
| Re: بشاشة دة ما عندو موضوع | DKEEN | 10-31-05, 05:01 PM |
| Re: بشاشة دة ما عندو موضوع | DKEEN | 10-31-05, 05:33 PM |
| Re: بشاشة دة ما عندو موضوع | zoul"ibn"zoul | 10-31-05, 07:35 PM |
| Re: بشاشة دة ما عندو موضوع | Tragie Mustafa | 10-31-05, 09:13 PM |
| Re: بشاشة دة ما عندو موضوع | Faisal Taha | 11-01-05, 06:22 AM |
| Re: بشاشة دة ما عندو موضوع | Bashasha | 10-31-05, 10:05 PM |
| Re: بشاشة دة ما عندو موضوع | omar ali | 10-31-05, 11:51 PM |
| Re: بشاشة دة ما عندو موضوع | zoul"ibn"zoul | 11-01-05, 02:41 AM |
| Re: بشاشة دة ما عندو موضوع | معتز تروتسكى | 11-01-05, 03:03 AM |
| Re: بشاشة دة ما عندو موضوع | Bashasha | 11-01-05, 08:24 AM |
| Re: بشاشة دة ما عندو موضوع | DKEEN | 11-01-05, 08:24 AM |
| Re: بشاشة دة ما عندو موضوع | wd al geran | 11-01-05, 12:25 PM |
| Re: بشاشة دة ما عندو موضوع | DKEEN | 11-01-05, 08:47 AM |
| Re: بشاشة دة ما عندو موضوع | Bashasha | 11-01-05, 09:35 AM |
| Re: بشاشة دة ما عندو موضوع | Bashasha | 11-01-05, 09:36 AM |
| Re: بشاشة دة ما عندو موضوع | zoul"ibn"zoul | 11-01-05, 12:56 PM |
| Re: بشاشة دة ما عندو موضوع | هشام مدنى | 11-01-05, 01:09 PM |
| Re: بشاشة دة ما عندو موضوع | Bashasha | 11-01-05, 02:27 PM |
| Re: بشاشة دة ما عندو موضوع | zoul"ibn"zoul | 11-01-05, 06:34 PM |
| Re: بشاشة دة ما عندو موضوع | DKEEN | 11-01-05, 07:13 PM |
| Re: بشاشة دة ما عندو موضوع | Munir | 11-02-05, 03:11 AM |
| Re: بشاشة دة ما عندو موضوع | HOPEFUL | 11-02-05, 08:17 AM |
| Re: بشاشة دة ما عندو موضوع | zoul"ibn"zoul | 11-01-05, 08:23 PM |
| Re: بشاشة دة ما عندو موضوع | Bashasha | 11-01-05, 08:52 PM |
| Re: بشاشة دة ما عندو موضوع | wd al geran | 11-02-05, 02:00 AM |
| Re: بشاشة دة ما عندو موضوع | DKEEN | 11-02-05, 04:04 AM |
| Re: بشاشة دة ما عندو موضوع | DKEEN | 11-02-05, 04:23 AM |
 Re: بشاشة دة ما عندو موضوع | Mohamed Adam | 11-02-05, 03:31 AM |
| Re: بشاشة دة ما عندو موضوع | ghariba | 11-02-05, 04:14 AM |
|
| |
فيس بوك
تويتر
انستقرام
يوتيوب
بنتيريست