إقترحت تغيير إسم الحزب الشيوعي إلى الحزب الاشتراكي السوداني

Quote: ....دي سرقه عديل كده لاراء ناس ....و كفاحم و نضالاتم و تضحياتم و احزانم و معانتم و عدم تمتعم بحياتم الانسانيه البسيطه جدا و مواجهاتم للموت بالظلم وفي ثبات ساخت له مفاصل جلادهم وضد جور و صلف الحكومات و الانظمه القميئه و العميله المرت علي بلدنا وسامت اهلها العسف و الجور و الطغيان و الموت المجاني ....و في احسن الفروض ان لم تكن قضيه سرقه علي رؤوس الاشهاد ....ستكون هي قضيه وراثه ...احيلت لوريث غير شرعي ....لانو الحزب الجديد الحيتكون ده و باي اسم ...ما حيكون الحزب الشيوعي السوداني باي خال من الاحوال ببساطه لانو الحزب الشيوعي السوداني ما جديد ...قديييييييم قدم الحركه الوطنيه و منذ اربعينات القرن الماضي .

قالوا معاوية عندما وصله خبر مقتل عثمان ابن عفان جاب قميص عثمان و علقه فى المنبر فى المسجد فى دمشق و بقا يقول داير تار قريبه عثمان. هو فى الحقيقة متدبّي للخلافة، لكن اتسبل ليها بقميص عثمان. أها يا اخوي انت و صاحبك الشريف دا شغالين تلويع و ترويع فى الناس بالاشياء من قبيل قميص الزميل الشهيد على فضل, الشريف رفع لينا على فضل و انت بتتكلم عن سرقة نضال الناس.

يا ايها السادة مافي سرقة و نضال الناس على العين و الراس. لكن ياخي نضال اي اي زول مهما بلغ لا يعطيه الحق فى اٍحتكار الحزب. قبل ايام انا ردت على الشقيق العزيز عبد العظيم عثمان فى بوست اخر وردت فيهو سيرة الزميل يوسف حسين. قلت لعبد العظيم يوسف حسين تخرج من الجامعة من قسم الجيلوجيا لمن خريجي الجيلوجيا يعدوا على اصباع اليد، بدل يمشى الخليج يلم الريال و الدولار تفرغ لخدمة الشعب السوداني من خلال عمله فى الحزب الشيوعي. اوردت سيرته يوسف حسين كمثال الحقه بالكلام الوراد هنا عن علي فضل و غيره من المناضلين. نضال الناس كلهم على العين و الراس لكن نضال اي زول ما بيده حق فى احتكار الحزب او يكونه رايه و موقفه أكثر اهميه و اعلى درجة من اراء بقية الناس. الزملاء سواسية كاسنان المشط. كلامكم البتقوله دا بتقسموا الزملاء زاتهم لطبقات، طبقة رايه ذوي قيمة اعلى. المناضلين رايهم يمشى و عامة الزملاء ديل رايهم ميت. المنطقي انو الحزب يدار بالديمقراطية، الراي الذى تفرزه الديمقراطية هو الذى يسود. اللوائح لا تمناع فى نقاش اي شئ يخص الحزب، الاشياء دي كلها كانت مطروحه للنقاش قبل الخامس فما الذى يمنع ان يطرحه للنقاش مرة اخرى؟ ما صدر عن الخامس ليس مقدس!

بعدين انت يا حلولي بتتكلم عن المقترح الذى عرضته انا يمثل سرقة للحزب او وراثه له. ياخي فى زول ح يسرق الحزب يوديه بيتهم؟ الحزب ملك للشعب السوداني و ما اقترحه انا من تغيير فى اسم الحزب و اقترحه اخرين لا يعني سرقة للحزب. نعم يعني وراثه للحزب، و لا توجد فى مشكلة فى ذلك. وراثه للتاريخ حق و الحزب و وراثه للتجربة و تطوير لها, شئ عجيب انو الزول يشرح الكلام دا لناس بقولوا انهم ماركسيين. الدنيا ماشة يا زول لقدام ولا ندخل فى نفس النهر مرتين و الدنيا فى صيرورة سرمدية مستمرة و لا يصمد فيها و يقدر على البقاء الا الذى يقدر على المؤامة مع الشروط المناخية و الحياتية الجديدة (داروين، اصل الانواع). الما بتؤام مع الدنيا من حوله سوف ينقرض و يموت. انا شايف مقترحي بتاع التغيير أفضل من مقترحكم بتاع البقاء على نفس الاسم. لانو مقترحي فيهو عنصر المؤامة دا مع البيئة الجديدة، صحيح هو وراثة للحزب و تطوير لتجربته Nothing to be ashamed of . اما مقترحكم فقد يؤدي لموت كل هذه التجربة و ضياعها.