ياهو دة العوض ..

Quote: دة آخر حوار كان بينا يا العوض.. بتذكر بعديها قلت لي: يا طارق أمشي في حاجة الخير للنهاية أوعك تقيف يا طارق مهم كان يا طارق ما تقيف وما تشوف وراك.. أنا بعرفك كويس يا حبيب خالتك الساكنة جمب محمد أخوي أصلها طيب يا طارق وإنت أصلك كمان أوعك تقيف الزول دة ما دام محتاج ليك خلي الناس تكتب العايزاهو وإنت أمش في طريق الخير دة وإن شاء الله عندي قريشات كدة إن دخلن أنا برسل ليك نصيبي - يا شيخ العوض أنا ما هاميني كلام الناس البتجعجع في الفاضي وما عارفة الحاصل أنا تراني قاعد أعافر من هنا لي هنا ووالله في كرام كتار ساعدوني في موضوع الفيتوري الشعب دة لسة بي خيره ياخ.. أنا هاماني زوجته وبنته بيتأثروا شديد ياخ بالحاجات البتتكتب دي آخر مرة قلت ليهم خلوا الناس يرموا فوقي أنا الحاجات الكعبة كلها في الموضوع دة والساويها الله بتكون.. - يا طارق أمشي في طريقك وربنا دة بينصفك ونحن إن شاء الله بنسندك.. دة كان حوارنا يا حبيب... ودي ياها طريقتك يا حاج العوض.. وخيرك كان سابق ولسانك الطيب كان برضو بيدخل قلوب الناس زي النسمة.. يا العوض كنت كريم الخصال وهسي إنت في حمى الكريم الرحيم يا العوض كنت بشوش وسمح المحيا وهسي إنت في حمى الواحد الأحد يا العوض كنت تحب الناس من طرف وهسي إنت في حمى الودود العزيز يا العوض أنا مقطوع هنا ما عندي زول أمشي عليه ما لقيت لي زول أقالده وأبكيك معاهو.. كان نفسي أقالد المسلمي وأخوانه وأبكيك معاهم.. ما عارف أمشي الخرطوم كيف وأضرب ليك وما أسمع: ود جبرين يا حبيبنا حمد لله على السلامة ما بقدر أقوليك ما حا أبكيك لأنه غلبني ما أبكيك.. بس حا أشهد أمام الله أنك كنت جميلا ودودا كريما عفيفا طيب المعشر هاشا باشا رحيما بكل من قصدك.. اللهم إنك أدرى بحبنا له لوجهك الكريم.. اللهم أكرم وفادته وأشمله بعفوك ورضاك اللهم أدخله فسيح جناتك مع الصديقين والشهداء اللهم اجعل قبره روضة من رياض الجنة.. رحمك الله يا شيخ العوض.. أنت شخص لا يُعوًّض..font>†