الحايطلع فوق او اضرب الدلجة،،من سلع واراضي،2015،،كلاااام نجيض,,

Quote: عليك الله يا عبد العزيز الدق الدلجة ... بعدما ارتفع في خرطوم السجم ده شنو .. غير الانسان وقيمته .. هي بس الدلقت الدلجة لامن قالت اغيثوني .. شوف شيء بينزل مافي .. ربما سيثبت على ما هو عليه لفترة .. ثم سيواصل الارتفاع .. عارف ليه ما عشان آلية عرض وطلب .. وزيادة هجرة للحضر متزايدة من الريف .. لا .. لأن صانع القرار عايز كده .. السوق كلو سايقنو مكان دايرين .. وبيتحكموا فيهو .. السمسار هي الدولة نفسها يا عبد العزيز .. تسّوق الاراضي الهي دايرها .. وتجلب ليها الخدمات بي مزاجها .. وتستقطب الطبقة العندها قروش للسكن في تلك الاحياء .. بذلك ترتفع القيمة للارض السكنية .. لأنه ما معقول تمشي تبني ليك بيت عادي .. في حي أساساُ تم التخطيط له ليكون ما عادي .. انا لمن قاعد اتذكر الخرطوم دي .. كانت كيف .. واقارن كل تلك الصورة بالوضع الحالي .. والله بضحك في سري وأقول سمحة المقدرة .. الحكومة جعلت كل ما هو غير ممكن ممكنا .. لأن الحكومة كسمسار اراضي .. ما سايبة السوق ده طلقيبة كده .. عشان يتحكموا فيهو السماسرة الصغار .. لا .. الحكومة هي من يخطط لذلك .. الشيء الدايرين يسوّقوهو .. بيودوهو السما .. والشيء المادايره الحكومة .. تجعل الناس يزهدو فيهو لانها لن تجعل ذلك متاحاً .. وستلوي عنق الطلب وتوجهه تجاه أحياء بعينها .. هسه شوف كمية الأحياء النفخت فيها الحكومة الروح .. وجعلتها منها أحياء ملء البصر .. القي نظرة بس على أحياء بحر أزرق .. شرق وغرب والمنطقة الحواليها .. الكانت عبارة عن فيافي وخلا .. هسه بقت كيف ؟؟ .. وقارن كل ذلك باحياء بحر أبيض وشوف هي هسه شنو ؟؟ ... وبتساوي كم لو قارنتها بأحياء نجرتها الحكومة الحالية من راسها ده .. وساقت الطرق والشوارع والكباري والأسواق والخدمات .. لتلك الأنحاء والأحياء فجعلت منها أحياء .. لايسكنها الا من له قدرة شرائية معتبرة .. فعشان كده ما تعشم في اراضي تدق الدلجة وعلى الاطلاق .. شوف الحكومة متجهة وين وضري عيشك .. في اتجاه هواها غير كده ستعود خالي الوفاض .... في 2013 وقبلها كمان .. قالو الاراضي السكنية حتنزل في 2014 .. هل نزلت ؟؟!! .. ما أظن .. قس علي ذلكـ سنتنا دي .. السبب الوحيد الحيخلي الوضع يتغير .. وكان في نزول يحصل .. إنه الحكومة دي تغادر ... غير كده عشمك ده ما أظن في محلو .. يأخ بس راقب سوق العربات وقارن وفكر .. والله تضحك لامن الضحك يشرطك .. لأنه بتلقى الاسعار لا علاقة لها البتة بالمعروض .. ولمن سيد العربية يقول ليك هو داير فيها كم تدي ربك العجب .. لأن ماتراه أمامك بيكون عبارة عن خردة متحركة .. وبرضو سيدا مالي سعرها .. ليه ؟؟ !! .. لأنه الحكومة قافلة حنفية الوارد .. لمنافع شخصية بحتة .. وعشان فلان وعلان يستفيدوا من الوضع الحالي .. أكيد كان جاء نظام تاني وغير بس في سياسة الاستيراد .. وفك الاحتكار لتغير وضع سوق العربات تماماً .. وعلى ذلك قس با حبيب .. اراضي وغيرو وغيرو .. .. يمين حتى سعر ربطة الجرجير دي .. حيتغير سعرها ويهبط ويدق الدلجة .. لان السوق حيكون ما فيهو احتكار .. وسيغيب دور الدولة كسمسار كبير .. يتحكم في السوق وفق هوى منسوبيه .. الشغلة كلها ترتكز على قرار سياسي وبس .. بعدين إنت ما سامع جرس الحكومة الداقي في اراضي المندرة ولا شنو ؟؟؟ .... عليك باراضي المندرة .. لكين كمان كان الحكومة دي اتخارجت .. فقل على قريشاتك السلام .. لان تلك الانحاء لا تصلح للزراعة حتى لو فكرت في فلاحتها ...