|
|
 فعلا نحن شعب متفرد ، تعالو شوفو
|
من صفحة المخرج الشاب ميرغنى سوار الدهب
(ليس كمثله شعب)! في زحمة السوق العربي ديك أذن الأذآن وكأن القيامة قامت الناس تتجارى على الوضوء لقيت شماسي كدا بملي في الأباريق للناس سألتو إنت بتبيع الموية؟ قال لي أنا ماببيعا بس بساعد الناس ساي لاحظ دا شماسي (قول واحد).. حرامي تلب لي مرة نفساء لقاها براها بترضع في طفل قال ليها قروشك ودهبك..قعدت تبكي قالت ليهو والله ماعندنا عيشة يابسه ساي في البيت وأنا أسي جعانة وراجلي يجيني سكران أنصاص الليالي . قام الحرامي تلب مرق وجاها راجع شايل كيس فيهو عيش ولبن وطعمية وأداها 20 جنيه . وقف برا إنتظر زوجها لمن جا دقاهو وقال ليهو مابتختشي تخلي مرتك الوالدة وبترضع جعانة وإنت حايم تسكر وتتصعلق . لاحظ دا حرامي (قول إتنين).. قبيلة من القبائل السودانية الساكنة شرق النيل إتكتل ولدن وحكمت المحكمة بالإعدام على قاتل إبنهم وقدر ماحاول أهل القاتل العفو أو الدية رفضو ووسطوا البلد كلها بي رئيس الجمهورية فرفضوا رغم إنو عرضو عليهم مليار جنيه. يلا قامو قالوا ليهم الشيخ البرعي جاييكم من الذريبة. نفس الناس الكانوا رافضين أي صلح أو عفو قاموا نصبو صيوان بألفين كرسي وضبحوا الجمال والثيران ولاقو الشيخ البرعي برفقة أهل القاتل بالبنادق والفرح وأكرموا أهل القاتل وعفو وكان مهرجان من البكاء والزغاريد .دا كلو شان خاطر رجل فقير إلى الله .لاحظ ديل أهل زول مقتول ! (قول تلاته).
برغم إنها كانت فقيرة وعملت ست شاي قبل أن يفتح الله عليها بمطعم أسماك ويوسع عليها في الرزق إلا إنها لم تتنكر للمحتاجين . فبقت ترسل وجبات ضخمة من الأسماك لدور الأيتام والعجزة والمعاقين بالدفار. ..بل بقت تساعد الشباب على الزواج بالشيلة ودفع قيمة المهر فبقت براها عبارة عن منظمة تطوعية متحركة .دي الزولة المحسنة عوضية أسماك . لاحظ إنها مجرد ست شاي بسيطة تتحول بطيبة قلبها لفاعل خير مجهول (قول أربعة)..
إمام مسجد السيدة سنهوري يقف بعد صلاة الصبح مباشرة ويخاطب المصلين (ياجماعة في أخت طالبة السترة وتبحث عن زوج ممكن تعيش معاهو أيا كان ظرفو) واحد من الشباب شغال في بقالة قبل بيها .يلا طلعت زولة بت ناس أثرياء بس كانت عاوزة شاب تقي بصلي الصبح حاضر . لاحظ الشاب قبل بيها بدون مايعرف هي شنو بس شان يسترا:-) ..(قول خمسة).
مريض سوداني بأحد المستشفيات بالسعودية قطعت قروشو ومفترض يجيب أدوية من صيدلية برا المستشفى. نادى مصري قال ليهو أطلع في الممر شوف أي سوداني أديهو الروشته دي خليهو يجيني. المصري مندهش طلع وأدا الروشته لسوداني فقام الزول مشى الصيدلية إشترى الأدوية وجا زار السوداني وكفر ليهو . المصري إتخيل الموضوع كاميرا خفية وقعد يحكي القصة دي عشرين سنة . لاحظ دا مريض سوداني طريح الفراش كان بيثق في أي سوداني موجود بالمستشفى لمجرد إنو سوداني (قول سته).
ست عرقي جابوها القسم طاعنة زبون إتحرش بيها بالسكين . قدام الضابط وقفت(والله ياجنابو أنا ببيع عرقي ومعترفة لكن حياتي مافرطتا في عرضي ولا قليت أدبي والزول دا قل أدبو وأنا زعلتا وطعنتو). لاحظ دي ست عرقي (قول سبعة).
كابتن صلاح يهبط بطائرته سودانير مطار القاهرة أيام التوتر مع مصر . فنوع من الإستفزاز جو المصريين لابسين كمامات وقالوا حايرشوا الطيارة والركاب قاعدين . كابتن صلاح رفض . قالوا ليهو ماحانسمح بنزول الركاب . قال ليهم في ستين ورجع بالطيارة مطار الخرطوم .ورغم إنو إتفصل بالسبب دا لكنو إنتصر لكرامة السودانيين .لاحظ عزت الكابتن دا(قول تمنية) ..
مجموعة نهب مسلح ثبتو بص في الخلا .. طالبو الناس بالدهب والقروش . كان في عرسان في البص لحظة العروس بتقلع في غويشتا شافا زعيم العصابة وعجبتو طلب منها تنزل من الباص وزوجها ال######## ساااكت. فجأة المساعد في البص يقيف قدام العروس (شيلو أي حاجة بس ماتلمسوا زول والله أنا حي ماف زول يقرب الزولة دي إلا تكملوا ذخيرتكم فيني). .الكلام عجب ناس العصابة وكان ممكن يكتلوهو ببساطة .طلبو من زوج العروس يطلقا شان يزوجوها للمساعد دا .فطلقا وسألو العروس بتدوري نزوجك للزول الفارس الحماك دا ؟فوافقت وسألو هل من بين الركاب شيخ يعقد للعرسان ؟ وعقدوا ليهم وضربو الذخيرة إحتفالا ورجعوا للناس حاجاتن ومشو . لاحظ ديل عصابة تعجبن نخوة رجل فتخجلهم وتردهم إلى جادة الصواب (قول تسعة).. في أحداث قرن حصل موت ومجازر متبادلة شماليين وجنوبيين . لكن بعد أقل من شهر كان الشماليين والجنوبيين يأكلون سويا في المطاعم ويركبون نفس المواصلات . لاحظ بعد المذابح دي كلها يرجعوا عاديين ! ولو كانت حدثت في دولة تانية لأحتاجو لقرن كي تزول المرارات .(قول عشرة).والأمثال تحتاج لكتاب ضخم عنوانه ليس كمثله شعب .فلو أن هناك شعب يستحق أن نرفع له قبعة الإحترام وننحني له إعجابا فهو شعبنا السوداني العملاق .
كسرة:
بحبك أشهد الله ياشعبنا وأزداد فيك عشقا كل يوم . ياود ضكران يابت دغرية
|
|
  
|
|
|
|
|
| العنوان |
الكاتب |
Date |
| فعلا نحن شعب متفرد ، تعالو شوفو | هجو الأقرع | 10-28-14, 07:24 PM |
 Re: فعلا نحن شعب متفرد ، تعالو شوفو | يوسف الطيب احمد إدريس | 10-28-14, 07:46 PM |
| Re: فعلا نحن شعب متفرد ، تعالو شوفو | هجو الأقرع | 10-28-14, 09:20 PM |
| Re: فعلا نحن شعب متفرد ، تعالو شوفو | محمد البشرى الخضر | 10-29-14, 10:23 AM |
| Re: فعلا نحن شعب متفرد ، تعالو شوفو | عصام دهب | 10-29-14, 10:38 AM |
| Re: فعلا نحن شعب متفرد ، تعالو شوفو | هجو الأقرع | 10-29-14, 12:54 PM |
| Re: فعلا نحن شعب متفرد ، تعالو شوفو | هجو الأقرع | 10-29-14, 01:18 PM |
| Re: فعلا نحن شعب متفرد ، تعالو شوفو | اميرة السيد | 10-29-14, 02:00 PM |
 Re: فعلا نحن شعب متفرد ، تعالو شوفو | خالد عبد الله محمود | 10-29-14, 03:53 PM |
| Re: فعلا نحن شعب متفرد ، تعالو شوفو | اميرة السيد | 10-29-14, 06:12 PM |
| Re: فعلا نحن شعب متفرد ، تعالو شوفو | بدر المعارف محمد المساعد | 10-30-14, 09:23 AM |
| Re: فعلا نحن شعب متفرد ، تعالو شوفو | هجو الأقرع | 10-30-14, 04:11 PM |
| Re: فعلا نحن شعب متفرد ، تعالو شوفو | هجو الأقرع | 10-30-14, 04:09 PM |
| Re: فعلا نحن شعب متفرد ، تعالو شوفو | عصام دهب | 10-30-14, 09:21 AM |
| Re: فعلا نحن شعب متفرد ، تعالو شوفو | هجو الأقرع | 10-30-14, 03:49 PM |
| Re: فعلا نحن شعب متفرد ، تعالو شوفو | حامد ساكن حامد بشير | 10-30-14, 10:08 AM |
| Re: فعلا نحن شعب متفرد ، تعالو شوفو | عصام دهب | 10-30-14, 10:14 AM |
| Re: فعلا نحن شعب متفرد ، تعالو شوفو | هجو الأقرع | 10-30-14, 04:16 PM |
| Re: فعلا نحن شعب متفرد ، تعالو شوفو | عبدالحفيظ ابوسن | 10-30-14, 10:34 AM |
| Re: فعلا نحن شعب متفرد ، تعالو شوفو | رحمه فضل المولى عجك | 10-30-14, 03:28 PM |
| Re: فعلا نحن شعب متفرد ، تعالو شوفو | هجو الأقرع | 10-30-14, 04:26 PM |
| Re: فعلا نحن شعب متفرد ، تعالو شوفو | usama Babiker | 10-30-14, 04:26 PM |
| Re: فعلا نحن شعب متفرد ، تعالو شوفو | هجو الأقرع | 10-30-14, 04:31 PM |
| Re: فعلا نحن شعب متفرد ، تعالو شوفو | هجو الأقرع | 10-30-14, 04:20 PM |
| Re: فعلا نحن شعب متفرد ، تعالو شوفو | هجو الأقرع | 10-30-14, 04:41 PM |
| Re: فعلا نحن شعب متفرد ، تعالو شوفو | هجو الأقرع | 10-30-14, 04:47 PM |
| Re: فعلا نحن شعب متفرد ، تعالو شوفو | نادر الفضلى | 10-30-14, 04:54 PM |
| Re: فعلا نحن شعب متفرد ، تعالو شوفو | هجو الأقرع | 10-30-14, 05:25 PM |
| Re: فعلا نحن شعب متفرد ، تعالو شوفو | هجو الأقرع | 10-30-14, 05:28 PM |
| Re: فعلا نحن شعب متفرد ، تعالو شوفو | رحمه فضل المولى عجك | 10-31-14, 11:39 AM |
| Re: فعلا نحن شعب متفرد ، تعالو شوفو | عبدالعزيز الفاضلابى | 10-31-14, 03:50 PM |
|
| |
هجو الأقرع
فيس بوك
تويتر
انستقرام
يوتيوب
بنتيريست