|
|
 Re: المليارات هل يقطفها المساكين،،شجرة المورينقا جابتو اخر.. (Re: عبدالعزيز عثمان)
|
عبد العزيز..حبابك يا صديقي
كتر خيرك على المعلومة..و التحية عبرك لأخونا اسامة..و شكلو زعلان خلاص..!!
و نحن الشعب السوداني برضك زعلانين على الخج الحاصل هنا..!!
بعد طلطاشر سنة يا عبد العزيز.. رجعت السودان..و من غرائب الصدف.. كان اكتوبر 2012..و في الدلنج سمعت الناس بتتحدث عن نبات المورنجا و سحرو العجيب.. اها قلت ليهم..وروني النبات ده..و شفت عشبة يادوبك في مراحلها الأولى..و قمت توشك افتيت للجماهير..و عينك ما تشوف الإ النور..ياخي الجماعة قربوا يملوني ليك شباشب..و بيض فاسد..و طماطم فاسدة.. لأنو قلت ليهم كلام ما عجبهم تب..!!
قلت ليهم: يعني ككيف الناس تحتفي بالمورينقا..و تنسى البان؟.. مع انو شجر البان الواحد ده ياها المورينقا الما جاب ليها الشعب السوداني خبر تب.. غير اللهم .. من فريع البان البيسوح نديان في رواية البتوق نديان..و شنو كده ما عارف..!!
عشنا في مدينة الدلنج..و عندنا حتة اسمها الغابات..في جنوب المدينة.. التسمية جات لأنو دي الحتة البتشرف عليها الحيكومة عبر هيئة الغابات..و كان فيها اشجار المهوقني..و جزء كبير للغاية فيهو شجر البان..و بنسميهو (غابة البان) في الدلنج.. الحتة التانية..و شفتها بصورة منظمة في شمال مدينة ربك في النيل الأبيض..و هي جزء من الدورة الزراعية في مشروع عسلاية لإنتاج السكر..و وقاموا زرعوا مساحات كبيرة من شجر البان.. في جزء من تبادل الدورة الزراعية و كده..!!
يا ترى في كم بيت سوداني فيهو شجرة بان.. او على قول صديقنا اسامة .ز مورينغا؟..الفروقات بسيطة للغاية.. اسامة يتحدث عن شجرة المروينقا اورفيرا..و البان الواحد ده اسمو .. اورينغا بيرغرينرا..!!.ز اشمعنا يعني ؟..هل لأنو الموريقنا اورفيرا اصلها هندي (اجنبي)؟..
الحاجة الما جايب ليها خبر سيدنا الشعب السوداني طيب الذكر.. انو شجرة البان ( مورينقا عشان الناس تتكيف اكتر) ياها الفيها الرحمة.. ياها المنها سبحة اليسر بتاعة الفقرا امبتارا .. و ياها المنها حاجات كتيرة.. زيت.. محبة.. و قوى جنسية.. أي و الله..يا عبد العزيز..و لو الشعب السوداني قرا نقتنا هنا.. باكر تلقي أي سودانية متزوجة ح تحط صفقة من شجر البان في الشاي..!! (قريباتك بتاعات غرب افريقيا عندهن جن اسمو الزنجبيل.. ياخي ديل حتى العصير بيحطن فيهو زنجبيل..!!!!)..
و لأنو نحن السودانين دايما حاجاتنا ما قاعدة تعجب الإ لمن نشوفها عند الغير.. فعندي.. اقوى و اطيب من المورينقا ( شجرة البان و فصائلها) هو شجرة سودانية اصيلة اسمها شجرة الهجليج.. أي و الله يا عبد العزيز ، الهجليج الواحد ده..!!
في كردفان ، نعرف استخداماتها ، من لحائها نغسل الهدوم ( اظرط من أي منظف صابون حايم على وجه الأرض) ، من غشاء الثمرة ( يطحن و يسمى ام كمكمة.. و يستخدم لعلاج مرض السكر)..من الغشاء اللدن حول الثمرة ( نصنع حاجة اسمها السرنوية و هي اشبه بالقمر دين..وبرضك فيها شفاء)..نفلق الثمرة..و نخرج الحبة..و اسمها ( ام كرناكة).. ناكلها مسلوقة و فيها شفاء من حاجات كتيرة منها ضغط الدم.. ثم نغليها ، و نصنع بطريقة خاصة و معقدة للغاية ..زيت..و هو زيت عندي انقى و اطيب من زيت الزيتون..و يستخدم لعلاج امراض كتيرة ..!!!!
هناك استخدام طقوسي ثقافي.. يرتبط بعملية الوشم.. التي تسمى في كثير من الثقافات السودانية.. بدق الشلوفة..وفيه تستخدم اشواك شجرة الهجليج من عمر معين للغاية (طبعا معها سائل من حويصلة ابو القنفود.. لأنو بيمنع التهاب الجرح..!!).. ببساطة.. لأن انسان المنطقة..و بالتجربة اكتشف ان هذه الأشواك... فيها مناعة طبيعية..و الجرح الذي يحدث بسببها يشفى تلقائيا (زمان ، و من غرور ، كنت بتساءل ليها الناس ما قاعدة توظف شوك الهجليج الرخص او اليانع .. لمعالجة التتونس في السودان..!!!!!!؟)..
في سنة 2007 ، كنت بتفرج في قناة التلفزيون الكندية ( الفرنسية تحديدا) و شفت برنامج وثائقي عن شجرة الهجليج...و كان من السنغال..و السنغاليون شغالين باعتبار انو دي شجرة سنغالية..و جايبين كل الإستخدامات التي ذكرتها هنا ، بما فيها الإحالات الثقافية ..!!).. كتبنا عن الشدرة كجزء من ذاكرتنا الثقافية.. لكن الشعب السوداني مرات قاعد يجليها واقفة..!!
يا ريت اخونا المهندس خالد.. يسافر و يزور مناطق كردفان.. و ح يلقى اشجار تفوق المورنيقا باشواط..و من عجب هي اجسار سودانية مية المية..!!
شرحوا.. المورينقا يا شعبنا الفضل فصيلة من فصائل شدرة البان..و تحت تحت ياها البا ن الواحد ده..!!
ودمت..
كبر
|
|
  
|
|
|
|
|
| |
Kabar
فيس بوك
تويتر
انستقرام
يوتيوب
بنتيريست