محمود الزين حامد: حزن وحداد هاديء

Quote: سلام ياسيف كيف؟ ما لقيت رسالتك الاخيره دي الا امبارح لانه انا في الخميس والجمعه بكون برنامجي جايط مع البيت والاولاد: عهود 6 سنوات ومحمود سنتين. وبالمناسبه الاخير مسمى على جدي اب ابوي لكن اي زول كان بقول لي محمود الزين وكان دايما ردي انه ده محمود جدي ومحمود الزين ومحمود محمد طه وانه اي محمود بعرفه ما خذلني بالتالي هو جمع محاميد كتيرين كويسين لكن من الوفاه بقول ليهو ود الزين . بقرا في جوابات محمود هسه واستغرب؛ كيف البني ادم مننا ممكن يكون في يده ثروه زي دي وما يستفيد منها! انا مولوده في هولندا ياسيف. تخيل ليك صاحب ممكن بعد 30 سنه يمشي هولنده ويمشي لمحل ولدوك ويصور الشارع والبيت وبوابته ويرسل الصور لامك؟ محمود عمل كده. رسل لامي الصور حقت البيت الو لدتني فيهو بس لانه عرفها مهتمه بانها تشوف الحته دي وقال كمان البيت بيشبهنا. كتب لي "صديقي ادم اللازم ارسله والده الى قريه مجاورة الى صديقه ولم ير ادم بيت صاحب والده من قبل ولكنه حين دخل القريه بحثا عن البيت تعرف عليه وحده سالته كيف كان ذلك قال انه يعرف صديق والده، قلت ومامعنى ذلك؟ قال ان البيت ذاك يشبه صاحبه تماما، ملامحهم مشتركه.. هل تعتقدي يا هلوله ان الناس الذين يجمعهم شيء محدد يتشابهون حتى لو كانوا من جنسيات مختلفه؟ انا اعتقد ذلك". سيف راسي واجعني وماقادره اكتب وما بحب اكلفت كتابه عن محمود وسؤالك عن ابادماك ماعندي مع انه القصص سمعتها منه .. عندي صخور جايبها كان من ليبيا، سؤالك عن زواجه ماسمعت بيه لانه لسه ما تم ... صفاء لاقاها في كورس في يوليو السنه الفاتت عن مناهج البحث (نفس الكورس اللاقى فيهو تيسير النوراني بعد سنوات)، ودرَّسها اسبوعين والخط شبك، وسافر وجاء راجع تاني في 30/11/2010، وعقد في اخر 12 2010 وسافر تاني يوم من العقد، يعني عقد لمدة 9 شهور ما لحقت تسافر ليهو، واي زول يلاقيها يقول ليها بختك محظوظه، والنهايه انت عارفها او عارفها بالالف المجروره زي ماكان محمود بنطق الحاجات . هاله