الطاقات المهدرة

Quote: منظر تانى: التومه بت ابضلف جات تقدل شايلها سعفها فى راسها،و متابطةاساس لمشغوله لم تتخلق معالمها بعد،لكن بلا شك سوف تكون النتيجة لوحه من مشغولاتنا اليدوية... فى يدها كورية بلا قعر وهى تصيح من بعيد هوى ود السارة ناولنى مويه فى الكورية ابل فيها الحنقوق ده.. باقى الطبق ده ملحقاهـ عرس العوض ود كلتوم.. القهوة ما بدورهـ لكن عليك الله يابت الجنيد تتباركى الرسول شوفى امك كان عندها حرجل اغلى لى منو قبضة اييد.. عندى نحار داير يلحقنى الرقدو... تجلس حبوبة التومة وقبل ان تتمهل فى الجلسه ياتى شافع لابس فنيله بى حمالات،حافى القدمين،اغبش كما الفول المدمس ليه كريشه.. نعم هو معاويه ود المدير..وهو بلوك فى طرف الفنيله يستطرد حبوبة التومة امى قالت ليك كان عندك طايوق اديها حته فى الكوز ده.. حاجة التومة متبرمه: هسه امك ماعرفت ترسلك للقاشور دهـ الا بعد ما وصلت هنا.. مابقدر اصد امش شوف ناس خالتك بخيته.. يذهب معاوية ومازالت الفنيله فى فمه.. ياحليل فنايلنا كنا نتم بيهن الغداء فى امانة الله كما المعيز نلوك فيهن.. مخير الله لاشفنا مذركير لابامبرز لاسيرلاك،يصدق معنا ان نقول منذ خشونة اظافرنا،لانه لانعومه تذكر.. بت الجنيد والضيوف ضل النيمة مسرح، صور كثيرة تتداعى واخيله متماوجه واطياف متشابكه كلها جميلة لدرجة لا تعرف على ايتها تتكى او بايتها تمسك لترتاح من رهق هذا الزمن الاشتر الجهجاهـ سريع الاستدارة.. زمان كانت الحياة جميلة خضلة،والناس اطيب واكثر رحمة.. قطعا سوف اعود للراكوبة بمشهد اخر،،،